Вести
Двојно убиство во кумановско: Брат пукал кон сестрата и нејзините синови
Брат ја убил сестра си и нејзиниот син, денеска во кумановското село Габреш, соопшти полицијата.
Според информациите од СВР Куманово, двојното убиство е епилогот од нерасчистените имотно-правни односи.
Мажот на возраст од 66 години, пукал со огнено оружје кон неговата сестра и нејзините двајца синови, при што ја убил сестра си (63) и едниот (38) од синовите. Другиот (36), според податоците на полицијата, е пренесен во општа болница Куманово.
„Поради нерасчистени семејни односи денеска во 12:25 часот полициски службеници од СВР го лишиле од слобода Д.Ѓ. (66) затоа што во село Габреш, кумановско поради нерасчистени имотно правни односи пукал од огнено оружје кон неговата сестра Д.Р.(63), и нејзините синови Ж.Р.(36) и Т.Р.(38). Итна медицинска помош констатирала смрт кај Д.Р. и Т.Р., додека Ж.Р.со повреди е пренесен во Општа болница Куманово“, информираше полицијата.
Од кумановската болница потврдија дека кај нив е донесено лице со три прострелни рани, но поради сериозноста на повредите е префрлено на понатамошно лекување на една од скопските клиники.
види ги сите денешни вести
Израел го нападна Дамаск додека беснеат борби во јужна Сирија
Силни воздушни напади денеска го потресоа Дамаск, а беа насочени кон Министерството за одбрана, додека Израел вети дека ќе ги уништи сириските владини сили што ги напаѓаат заедниците Друзи во јужна Сирија и побара нивно повлекување.
Немаше непосреден коментар од Израел за силните напади денеска попладнево, за кои сириските државни медиуми соопштија дека биле извршени од израелските сили.
Израелската армија претходно најави напад врз влезот во комплексот на Министерството за одбрана.
Непосредно пред силните експлозии, министерот за одбрана Израел Кац рече дека „ќе следат болни удари“.
Десетици луѓе беа убиени оваа недела во насилство околу јужниот град Сувајда, каде што борците нд Друзите се судрија со владините безбедносни сили и припадници на бедуинските племиња, поради што Израел постојано интервенираше за да ги заштити Друзите.
Насилството ги истакна главните предизвици со кои се соочува привремениот претседател Ахмед ал-Шара, и покрај подобрувањето на односите со Соединетите Американски Држави, додека тој се обидува да ја обедини Сирија во услови на длабока недоверба меѓу групите што ја отфрлаат исламистичката власт.
Сириските владини трупи беа испратени во регионот Сувајда во понеделник за да ги смират судирите меѓу борците Друзи и вооружените бедуини, но на крајот се судрија со милициите на Друзите.
Друзите се следбеници на религија што е гранка на исламот и живеат во Сирија, Либан и Израел.
Претходно, безбедносни извори од сириското Министерство за одбрана изјавија за Ројтерс дека најмалку две беспилотни летала ја погодиле зградата и дека офицерите се засолниле во подрумот.
Државната телевизија Елехбарија објави дека двајца цивили се ранети во нападот.
Израелската армија објави дека „ја погодила влезната порта на комплексот на воениот штаб на сирискиот режим“ во Дамаск.
Тие, исто така, продолжија да напаѓаат цели на „сирискиот режим“ во јужна Сирија, вклучувајќи тенкови и камиони со митралези што се движеле кон Сувајда.
Сириската мрежа за човекови права објави дека 169 лица се убиени во насилството оваа недела. Безбедносни извори ја проценуваат бројката на 300. Израел, кој редовно ја бомбардираше Сирија под водство на соборениот претседател Башар ал-Асад, бара новата исламистичка влада да ги држи своите сили подалеку од јужна Сирија.
Тие ветија дека ќе ги заштитат Друзите и испратија израелски трупи на сириска територија долж Голанската Висорамнина окупирана од Израел.
Пратеникот на САД за Сирија, Том Барак, кој ја пофали новата сириска влада и во мај рече дека мирот меѓу Сирија и Израел е можен. Тој во вторникот изјави дека Вашингтон е во контакт со сите страни „за да се постигне мир и интеграција
Украинскиот парламент поддржа зголемување на трошоците за одбрана
Украинскиот парламент денеска даде првично одобрение за дополнителни 9,8 милијарди долари буџетски средства за војската и одбраната оваа година, бидејќи војната со Русија трае без јасен крај на повидок.
Парламентот ги одобри измените на буџетот на прво читање, зголемувајќи ги рекордните трошоци за одбрана во буџетот за 2025 година од 2,2 трилиони гривни (53,2 милијарди долари) на дополнителни 412 милијарди гривни (9,8 милијарди долари), соопштија пратениците и Министерството за финансии, објави Ројтерс.
„Потребата за измени на државниот буџет за 2025 година произлегува од потребата да се обезбедат одбранбените сили со дополнително оружје, муниција и воена опрема“, соопшти Министерството за финансии.
Роксолана Пидласа, претседателка на парламентарниот буџетски комитет, изјави дека околу 216 милијарди гривни ќе бидат насочени кон купување и производство на дополнително оружје.
Владата планира да собере дополнителни средства преку домашниот пазар на државни обврзници.
Исто така, очекува повисоки даночни приходи откако Киев одлучи да зголеми разни даноци минатата година, соопшти министерството.
Додека руските сили продолжуваат со бавното, но стабилно напредување во источна Украина, заземајќи село по село во последните месеци, а обидите за мировни преговори не дадоа резултати, Украина и Русија водат и економска битка, велат аналитичарите, објавува Ројтерс.
Економијата на Украина покажа релативна отпорност во текот на речиси три и пол години војна, благодарение на прилагодливоста на домашните фирми и милијарди долари странска помош од западните сојузници.
Украина доби повеќе од 135,4 милијарди долари странска финансиска помош од почетокот на руската инвазија во февруари 2022 година, според Министерството за финансии.
Инвазијата го намали БДП на Украина за околу 29 проценти во 2022 година, но економијата забележа скромен раст во 2023 и 2024 година. Оваа година се очекува раст од околу 2,7 проценти, вели владата.
Сепак, економијата на Русија е значително поголема.
Русија ги зголеми државните трошоци за национална одбрана за една четвртина во 2025 година, достигнувајќи 6,3 проценти од БДП, највисоко ниво од Студената војна. Трошоците за одбрана сочинуваат 32 проценти од вкупниот федерален буџет на Русија за 2025 година.
Полицијата влегла во неколку скопски општини поради обезбедување докази за дивоградби
Повеќе оддели во рамки на МВР-организиран криминал, крим полиција, СВР Скопје во текот на вчерашниот ден влегле во повеќе општини во рамки на Град Скопје при што постапуваат по конкретни наредби дадени од јавен обвинител, а поврзани со бесправни градби, информира министерот за внатрешни работи Панче Тошковски.
Во насока на обезбедување докази за бесправна градба, Тошковски посочи дека е влезено во општините Чаир, Сарај, Аеродром и Кисела Вода.
„Не би можел да споделам во овој момент информации во врска со обезбедна документација, но сакам да напоменам дека ова се тековни активности на МВР. Ова не е сега јавноста има интерес за конкретната тема и МВР постапува, туку ова се тековни активности по коишто постапуваме секојдневно“, изјави Тошковски, одговарајќи на новинарски прашања по потпишувањето на меморандум за соработка со Црвениот крст.
Тошковски истакна дека мора да се постапи согласно закон и доколку се утврди дека станува збор за дивоградба и престатвува ризик за безбедноста на граѓаните, истата ќе биде предмет на уривање.
Прашан дали МВР постапува по пријавите од градоначалничката Данела Арсовска, Тошковски рече МВР постапува во сите предмети во кои добива наредба од Јавното обвинителство или каде имаат соодветни информации и самите преземаат одредени дејствија.
„Ова не го говорам заради тоа што е поврзано со темата, која се наметнува во јавноста во последнио период, ова го говорам затоа што е тековна активност на МВР во континуитет. За разлика од претходно предметите не се ставаат во фиоки, туку напротив континуирано и активно се работи и се преземаат дејствија. Факт е дека градоначалничката се што има собрано како доказен материјал го доствува до Јавното обвинителство за организиран криминал и така треба. Јавното обвинителство постапува и дава наредби до МВР, а кое постапува согласно конкретни наредби од јавен обвинител и така треба да функционира едно нормално општество. Секој треба да си ја работи својата работа во рамки на делокругот на работење“, изјави Тошковски.
Градоначалничката на Скопје Данела Арсовска на 31 мај достави документи за незаконски легализации на дивоградби во Обвинителството, а на 27 јуни до Обвинителството за гонење организиран криминал и корупција (ОЈО ГОКК) достави докази за нови, како што рече, криминални легализации од градоначалникот на Чаир, Висар Ганиу.
Таа неодамна беше физички нападната во Општина Чаир, додека вршела увид на терен, на локација каде што се гради дивоградба спроти Полициската станица Чаир. МВР поднесе кривични пријави против две лица кои физички ја нападнале градоначалничката, а Обвинителството поведе постапка и побара притвор за првоосомничениот и мерки за претпазливост за другото лице.
По овој инцидент, Арсовска доби 24 часовно полициско обезбедување.
Коцевски: Нема политичко влијание на мојата работа
Државниот јавен обвинител Љупчо Коцевски изјави дека врз неговата работа нема политичко влијание, оценувајќи го извештајот на Европската комисија за правосудството како реален и објективен.
Тој посочи на напредок во транспарентноста и борбата против високата корупција, но и на сериозни предизвици како што се недоволниот буџет и недостигот од кадар во Обвинителството.
Одговарајќи на новинарски прашања поврзани со извештајот на Европската комисија околу правосудството, Коцевски посочи дека Комисијата правилно ги проценила работите.
„Европската комисија правилно ги проценила работите. Последниот период навистина се зголеми транспарентноста и потоа она сѐ што јас го ветив на почетокот, а тоа е давање приоритет на предметите за висока корупција и истите се ажурираа и до овој момент навистина имаме успех. Во однос на останатото, точно е тоа дека јавното обвинителство има помалку предвидени средства во однос на она што следува со закон и тоа го воочила Комисијата, така да во тој дел сметам дека се она што е напишано реално во однос на односот на Јавното Обвинителство. Можам да кажам одговорно дека лично на мене нема никакво влијание ниту еден политичар досега во однос на некои предмети“, истакна Коцевски.
Прашан дали се размислува за раздвојување на предметот поврзан со пожарот во дискотеката „Пулс“ во Кочани, Коцевски рече дека најверојатно тоа нема да се направи, дополнувајќи дека ЈО има искуство со поголем број обвинети во еден предмет.
„Јавното обвинителство тргна токму од тие околности, дали може да се раздвои постапката или не може да се раздвои имајќи ги предвид низа околности. Ако се раздвоеше постапката, можеби ќе се комплицираше, а се работи за ист кривично-правен настан, што значи дека доколку таму во една постапка бидат обвинети, во друга постапка може да бидат сведоци и така натаму. Меѓутоа има и од претходното искуство што имаше предмети со над 30 обвинети. Сметам дека не е бројката многу голема и чекаме сега одобрување на обвинителниот акт. Тоа е еден предмет, а другиот предмет, се надевам дека некаде во почетокот на септември ќе заврши истрагата за полициските службеници што е предметот во организиран криминал“, изјави Коцевски.
Меѓудругото, републичкиот обвинител информираше и дека за сите пријави за дивоградби во Општината Чаир како и за територијата на цела држава се постапува со предистраги и истраги, но не посочи бројки.
„Околу дивоградбите имаме неколку предмети. Имаме предмети во истрага, имаме предмети во предистрага. За последните случувања, знаете, вчера судот по жалба на јавното обвинителство определи притвор за потенцијалниот сторител на кривичното дело што значи Јавното обвинителство (ЈО) и понатаму ќе постапува по секоја кривична пријава или евентуално по секој поднесок во врска со дивоградбите и тука, не се сомневам дека јавните обвинители ќе постапуваат правилно. Она што вчера го слушнав дека градоначалничката поднела нова кривична пријава. Истата ќе се процесира во најбрз можен рок. Старите се во тек, што значи дека по собирање на доказите ќе се донесе јавнообвинителска одлука. Затоа, реков истрага има, така што ќе се постапи“, истакна обвинителот Коцевски.
Советот на јавните обвинители денеска (16 јули) ја одржа дваесет и седмата седница на која беа избрани двајца нови обвинители во Основно јавно обвинителство Скопје и во Основно јавно обвинителство за гонење на организиран криминал и корупција (ОЈО ГОКК).
Летонија ја испорача првата пратка оклопни возила „Патрија“ за Украина
Летонија испорача нова пратка воена помош на Украина, додека оваа земја продолжува да се брани во актуелната војна со Русија, јави ДПА.
За време на посетата на летонската премиерка Евика Силиња на Киев, оваа балтичка земја, членка на ЕУ и НАТО, на украинските вооружени сили има предаде 15 оклопни транспортери „Патрија 6x6“, објави Министерството за одбрана.
„Летонската поддршка за Украина не се само зборови, туку конкретни акции“, беше цитирана Силиња во соопштението, пренесено од германската агенција.
Летонија планира во текот на оваа година во Украина да испорача вкупно 42 оклопни возила. Возилата се произведуваат во Летонија од страна на „Патрија“, финска компанија од одбранбениот сектор.
Покрај оклопните транспортери, Рига се подготвува да обезбеди беспилотни летала и друга воена опрема во вредност од 70 милиони евра.
Летонија, исто така, планира да обучи до 4000 украински војници како дел од својата постојана помош.
Украина повеќе од три години се брани од целосната руска инвазија со поддршка на западните сојузници. Летонија, која граничи и со Русија и со нејзиниот близок сојузник Белорусија, е меѓу најцврстите поддржувачи на Киев, потсетува ДПА.
Владата ќе побара 8,5 милиони евра од Планот за раст
Владата на вчерашната седница донела одлука да побара ослободување на дел од парите од европскиот План за раст предвидени во Реформската агенда 2024-2027 година, за кои планот за реализација е до јуни годинава. Според прелиминарните проценки на Европската Комисија за спроведеното до декември 2024 година биле исполнети околу 40 проценти од ветеното, со што се исполнува условот за повлекување на половина од предвидените пари, брифираат од Министерството за европски прашања.
Според тоа македонската Влада ќе побара повлекување на половина од предвидени 17,5 милиони евра, односно 8,5 милиони. Од нив 3,9 се заеми за буџетска поддршка, 2,2 милиони евра ќе бидат заем за преку Инвестициската рамка за Западен Балкан и 2,45 милиони евра се грантови.
Од вкупно петте предвидени чекори, само два во целост се исполнети, а другите кои се однесуваат на енергетика и владеење на право се делумно исполнети. Од реформите кои се во целост спроведени се Законот за внатрешна финансиска контрола и Законот за трговски друштва во надлежност на Министерството за економија.
Како целосно исполнети задачи се проценети донесените закони за енергетика, како и законите за кибер безбедност, законот за електронски комуникации и законот за архивирање на дигитални податоци. Дополнително, исполнето е барањето за зголемување на спроведени инспекции на терен за 20 проценти.
Во однос на делумно исполнетите обврски, една од нив е забелешката на Европската Комисија за недоволна оперативност на работните групи во Министерството за енергетика за зелена транзиција. Дополнително во овој сектор како неисполнет услов се смета постепеното намалување на субвенциите за производство на електрична енергија.
Втората проблематична точка е пополнувањето на слободните позиции на судии. Овој чекор не е исполнет во целост затоа што, како што брифираат од министерството, не бил запазен принципот на пополнување на испразнетите позициите на редовна основа од завршените кандидати од Академијата за судии и обвинители, затоа што се реферира на осмата генерација, а конкурстот за деветтата генерација е поништен, додека десетата е во тек.
За спроведувањето на реформските обврски до декември лани, Северна Македонија требаше да добие 17 милиони евра, а за оние чиј рок беше јуни годинава вкупниот износ за целосна реализација изнесува 70 милиони евра.
Еврокомесарката за проширување Марта Кос на 1 јули за време на Самиот ЕУ-Западен Балкан, посветен на Планот за раст, порача дека очекува секое евро од шесте милијарди да биде потрошено на земјите од Западен Балкан.
На балканските лидери, таа им испрати јасна порака, дека ако не испорачаат реформи, нема да добијат пари. Како што констатираше еврокомесарката, досегашниот просек за сите земји од регионот е дека 75% од реформите се или спроведени или во тек е имплементирање. Една четвртина од реформите, пак, не се имплементирани.
ЕУ формира центар за борба против медиумските дезинформации во Украина и Молдавија
Европската опсерваторија за дигитални медиуми (ЕДМО) формира нов регионален центар, чија задача ќе биде да ги поддржи Украина и Молдавија во борбата против дезинформациите.
Како што јави МИА, центарот, наречен ФАКТ, ќе ги открива и анализира манипулативните и дезинформациски кампањи, особено со потекло од Русија, а во тие рамки ќе ги следи и состојбите во Молдавија во пресрет на есенските парламентарни избори, со цел да придонесе за обезбедување на интегритетот на изборниот процес.
Инаку, ова е 15 регионален центар на ЕДМО и прв наменет за земји надвор од ЕУ и Европската економска област (ЕЕА).
ЕДМО и неговите регионални центри се независни од кој било национален или јавен орган во ЕУ и вклучуваат организации кои се придржуваат до највисоките стандарди за професионален интегритет, етичко однесување и независност.
Жељко Комшиќ е нов претседавач со Претседателството на БиХ
Хрватскиот член на Претседателството на Босна и Херцеговина, Жељко Комшиќ, кој е избран со гласовите на бошњачките избирачи, од денеска (16 јули) ја презема функцијата претседавач со Претседателството на БиХ.
Комшиќ на оваа позиција доаѓа по принципот на ротација, заменувајќи ја српската членка на Претседателството, Жељка Цвијановиќ.
Како што соопштија од Претседателството на БиХ, Комшиќ ќе ја извршува функцијата претседавач во наредните осум месеци.
Изборот на Комшиќ и понатаму е причина за незадоволство кај Хрватите, еден од трите конститутивни народи во БиХ, кои бараат измена на Изборниот закон. Тие сметаат дека бошњачките гласачи го избираат нивниот претставник во Претседателството и затоа инсистираат на реформи.
Сепак, измените досега не се реализирани, бидејќи, според критичарите, на Бошњаците им одговара сегашната состојба во која имаат две фигури во Претседателството што ги застапуваат нивните интереси.
Најмалку 11 повредени во последните руски напади врз Украина
Во руските напади во текот на ноќта во Украина биле ранети најмалку 11 лица, соопштија властите на повеќе погодени региони.
Во Харкив, во североисточниот дел на земјата, во руски напад биле ранети тројца луѓе, соопшти гувернерот Олег Синегубов.
Во Криви Рог, во источната област Дњепропетровск, руските сили извршиле „масовен“ напад, објави преку Телеграм гувернерот на таа област, Серхиј Лисак. Лисак рече дека Русите го гаѓале градот со дронови и оти истрелале една ракета, додавајќи дека е ранет 17-годишник кој е во тешка состојба и е префрлен во болница.
Градоначалникот на Криви Рог, Олександар Вилкул, рече дека врз градот симултано биле испукани балистичка ракета и 28 дронови од типот Шахид, при што е уништен еден индустриски објект.
Првата заменичка на началникот на Виничката обласна администрација, Наталија Заболотна претходно соопшти дека седум лица се повредени во синоќешниот напад на руски дронови врз Винице.
„Веќе имаме седуммина повредени. Петмина од нив имаат изгореници“, напиша Заболотна на Фејсбук, додавајќи дека две лица со изгореници се во тешка состојба.
Заболотна објасни дека руските дронови погодиле објекти од индустриската инфраструктура, предизвикувајќи пожари, од кои еден веќе е локализиран. Дополнително, биле ошетени четири станбени згради, со штети на покривите, прозорците и вратите. Една од куќите била исто така значително оштетена.
Според информациите, за време на синоќешниот напад, 28 руски дронови го погодиле регионот на Винице, при што биле уништени околу 18 цели.
Трамп: Некои ракети за „Патриот“ веќе се на пат кон Украина
Претседателот на Соединетите Држави, Доналд Трамп, изјави дека некои ракети за системот „Патриот“ веќе се на пат кон Украина, еден ден откако објави дека членките на НАТО ќе испратат оружје во земјата, што е промена во неговото претходно противење на испраќање американско оружје во разорената од војна Украина.
„Тие доаѓаат од Германија“, им рече тој на новинарите на 15 јули, без да навлегува во детали.
Германскиот министер за одбрана Борис Писториус изјави дека два системи за воздушна одбрана „Патриот“ се подготвуваат за испорака во Украина.
„Германија ќе ги сноси трошоците за нивната испорака, но техничките, логистичките и финансиските детали сè уште не се разјаснети“, изјави Писториус на 14 јули по состанокот со американскиот министер за одбрана Пит Хегсет во Пентагон.
Тие детали „изгледаат како да се решливи за двете страни, па затоа брзо преминуваме кон нивна имплементација“, додаде Писториус, нагласувајќи дека на Украина итно ѝ е потребна дополнителна противвоздушна заштита.
Руските беспилотни летала „Шахед“ го нападнаа Харкив вечерта на 15 јули, при што беа повредени две лица, соопштија локалните власти. Регионалниот гувернер Олех Сињехубов изјави дека во градот се регистрирани најмалку 17 експлозии во рок од 20 минути.
Трамп рече дека не разговарал со рускиот претседател Владимир Путин откако на 14 јули објави дека му поставил рок од 50 дена за Русија да прифати договор за прекин на огнот за да избегне санкции врз земјите што тргуваат со Москва.
Тој не кажа дали се планирани преговори за постигнување договор, но го бранеше утврдениот рок.
„Ако не постигнеме договор за 50 дена, тоа ќе биде лошо“, рече Трамп. Сепак, тој додаде дека можеби нема да бидат потребни сите 50 дена за да се постигне договор.
Трамп беше прашан и за извештајот во „Фајненшл тајмс“, во кој се вели дека тој приватно ја охрабрил Украина да ги засили длабинските напади на руска територија.
Според извори запознаени со разговорите, весникот наведува дека Трамп го прашал украинскиот претседател Володимир Зеленски дали украинската армија може да ја нападне Москва доколку САД и испорачаат оружје со долг дострел.
„Не, не треба да ја таргетира Москва“, им рече Трамп на новинарите на 15 јули, кога го прашаа дали Зеленски треба да нареди напад врз руската престолнина.
Американскиот претседател, исто така, ја намали важноста на можноста САД да испратат оружје со долг дострел во Киев.
Европските претставници работат на тоа да обезбедат Украина да го добие оружјето што ѝ е потребно, додека Европската Унија се обидува да постигне договор за нов пакет санкции против Русија, откако Словачка повторно го блокираше неговото усвојување.
„Навистина ми е жал што денес не постигнавме договор. Но, сепак се надевам дека утре ќе донесеме одлука“, изјави шефицата на европската дипломатија, Каја Калас, на 15 јули.
Новиот пакет санкции е со недели во застој поради спорот со Словачка околу одделните планови за постепено укинување на увозот на руски гас.
Словачкиот премиер Роберт Фицо изјави дека му се потребни дополнителни гаранции од Брисел во врска со плановите за прекин на увозот на руски гас до крајот на 2027 година. Словачка останува зависна од рускиот гас и заработува приходи од транзитни такси за пратки што минуваат низ нејзина територија.
Мултимедија
Најпосетени
Што треба да знаете