Неколку учесници во повеќе инциденти се уапсени по завршувањето на вечерашниот масовен студентски протест на плоштадот Славија во Белград. Полицијата не им дозволи на новинарите да го снимаат апсењето.
За време на полициска интервенција, повреден е и асистентот на телевизијата Н1, Јован Павловиќ, јавува телевизијата.
Претходно, групи на маскирани мажи се судриле со полицијата во близина на црквата „Свети Марко“, јавува репортерот на Радио Слободна Европа. Тие фрлаа шишиња и ракетни факели кон полицијата, а беа испукани и неколку топовски истрели.
Полицијата интервенираше, а репортерот на РСЕ виде како приведуваат најмалку еден демонстрант.
На местото на настанот беа стотици полицајци во опрема за борба против немири, како и единици на жандармеријата со оклопни возила. Толпата скандираше навреди кон српскиот претседател Александар Вучиќ.
Полицијата се судри со демонстрантите и на булеварот Крал Александар, а интервенираше и на улицата Кнез Милош, во близина на турската амбасада во Белград. Како што јавува Н1, во еден момент биле испукани неколку топовски истрели и петарди. Во меѓувреме, ситуацијата на терен е смирена.
Полицијата испали и солзавец врз демонстрантите кои се собраа пред кордон поставен на улицата „Кнез Милош“, во близина на Претседателството. Некои од толпата фрлаа камења, шишиња и други предмети кон полицијата. Полицијата одговори со солзавец.
На булеварот Крал Александaр е поставен кордон на жандармеријата. Таму се и оклопните возила на единицата.
Еден од припадниците на жандармеријата со мегафон ги повика собраните граѓани да се разотидат, во спротивно, рекоа тие, ќе реагираат.
Но, граѓаните засега не се разотиваат. Собраните формираа „човечки ланец“, држејќи се за раце пред кордонот.
Српскиот министер за внатрешни работи Ивица Дачиќ остро ги осуди „нападите од страна на учесниците на ненајавениот митинг во Славија врз припадниците на Министерството за внатрешни работи“.
Тој рече дека ќе преземе сите мерки за воспоставување јавен ред и мир, и дека сите оние што ја нападнаа полицијата ќе бидат гонети.
„Полицијата ќе преземе сите мерки за воспоставување јавен ред и мир, ќе ги одбие сите напади и ќе ги употреби сите овластувања за да ги одбие нападите, како и да ги уапси сите оние што ја нападнаа полицијата“, рече Дачиќ.
Официјалниот крај на студентскиот протест беше прогласен преку звучниците на плоштадот Славија околу 21:45 часот.
„Од овој момент, ова повеќе не е студентски протест. Ние остануваме тука како граѓани. Оваа борба не е само студентска. Денес, сите бараме избори. Сите ќе се кренеме и сите ќе победиме“, се вели во снимена порака емитувана на звучниците.
Во пораката се наведува дека студентите ќе ги контролираат изборите „како никогаш досега“.
Српскиот претседател Александар Вучиќ објави видео од состанокот со студентите кои се спротивставуваат на блокадите во Пионирскиот парк на Инстаграм.
„Студентите победија, блокадите загубија. Горди сме на овие млади луѓе“, напиша Вучиќ на Инстаграм.
Во видео обраќање од еден од шаторите во Пионирскиот парк, Вучиќ рече дека на митингот во Славија имало три пати помалку луѓе отколку на 15 март, како што претходно објави Министерството за внатрешни работи.
Тој најави враќање на студентите на универзитетите и им се заблагодари на студентите кои се спротивставуваат на блокадите.
Инаку, денеска во Белград се одржаа два протести на националниот празник Видовден во центарот на градот.
Едниот беше организиран од студенти кои ги блокираат факултетите низ целата земја од ноември 2024 година и бараат предвремени избори. Другиот е од граѓани кои, како што велат, го поддржуваат претседателот на Србија, Александар Вучиќ.
Српското Министерство за внатрешни работи објави дека околу 36.000 луѓе присуствувале на студентскиот протест во Славија. На просторот пред Народното собрание, пак, каде што се собраа поддржувачи на Српската напредна партија и студенти кои се спротивставуваат на блокадите на факултетите, се делеше бесплатна храна и пијалоци.
Поддржувачите на владата дојдоа од градови од цела Србија, а кога ги прашавме зошто се на протест, тие одговорија дека се таму за да го поддржат српскиот претседател Александар Вучиќ.
Едно од двете барања што студентите ги упатија до Владата пред протестите во Славија беше да се отстрани кампот на групата што се нарекува себеси „Студенти 2.0“ од центарот на Белград.
Овој камп беше поставен на почетокот на март во паркот Пионирски, десет дена пред големиот студентски протест во Белград. Претставниците на „Студенти 2.0“ велат дека се спротивставуваат на студентските блокади и тогаш најавија дека ќе останат во центарот на Белград сè додека факултетите не продолжат со работа.
Студентите бараат Владата да му испрати на претседателот Вучиќ предлог за распуштање на Парламентот и распишување предвремени избори.
Исто така бараат Владата да апелира до полицијата да го спречи собирањето на „студентите кои сакаат да студираат“ во паркот Пионирски и плоштадот Никола Пашиќ.
Тие поставија рок до 21 часот на 28 јуни за двете барања. Вучиќ на 27 јуни изјави дека „ултиматумот не е прифатен“.
