Што би можеле да значат ракетите Томахавк за Украина

Томахавк крстари покрај американски Ф-14 над јужна Калифорнија во 2002 година.
Киев постојано бара пристап до американски ракети со долг дострел. Во 2024 година, украинскиот претседател Володимир Зеленски наговести дека Киев побарал Томахавк. Службеник на Белата куќа во тоа време наводно го нарекол барањето „тотално неизводливо“.

Рана верзија на ракетата „Томахавк“ тестирана над Ново Мексико во 1976 година.
„Томахавк“ беше развиен во 1970-тите години за време на тензиите со Советскиот Сојуз за време на Студената војна. Крстосувачката ракета е дизајнирана да лета на долги растојанија доволно ниско за да ги избегне повеќето радари, а воедно да ја задржи брзината на патнички авион.

Комбинираните фотографии покажуваат детонација на Томахавк над млазен авион за време на тестирањето во 1986 година
Ракетата долга 5,5 метри е опремена со боева глава тешка речиси половина тон и може да лета околу 1.600 километри.

Комбинацијата од дострел, брзина и деструктивна моќ на „Томахавк“, го прави ова оружје различно од сè што моментално има Украина.

Секоја ракета е опремена со сложени внатрешни навигациски системи и чини околу 2 милиони долари.

Персонал на британската морнарица ракува со ракета „Томахавк“ во поморска база во Индискиот Океан во ноември 2001 година.
Американскиот претседател Доналд Трамп изрази сè поголема фрустрација кон Москва поради нестабилните мировни преговори. Потенцијалното снабдување со „Томахавк“ наводно неодамна беше обновено, бидејќи Белата куќа се обидуваше да го натера Кремљ „да ја почувствува болката“ од војната што ја започна.

Томахавк, лансиран од подморница, погодува цел на островот Сан Клементе, место за обука и тестирање оружје на американската морнарица покрај брегот на Јужна Калифорнија, за време на тест во ноември 1998 година.
За време на телефонски повик на почетокот на јули, претседателот Трамп наводно го прашал Зеленски: „Володимир, можеш ли да ја погодиш Москва? [...] Можеш ли да го погодиш и Санкт Петербург?“ Се вели дека украинскиот претседател одговорил: „Апсолутно. Можеме ако ни го дадете оружјето“. На 15 јули, Трамп негираше дека има за цел да го вооружи Киев со ракети со долг дострел, велејќи им на новинарите: „Ние не сакаме да го направиме тоа“.

Брод на американската морнарица лансира ракета „Томахавк“ во Средоземното Море во март 2011 година.
Не е јасно како Украина ќе се справи со оружјето, кое обично се лансира од воени бродови или подморници. „Томахавк“ можат да бидат лансирани од некои авиони, но украински функционер им призна на новинарите дека „Томахавк“ „не се лесни за употреба“ без стратешки бомбардери, кои Киев ги нема.

Американски системи „Тајфун“, кои се способни да лансираат крстосувачки ракети „Томахавк“.
Постојат новоразвиени копнени лансери за „Томахавк“, но технологијата моментално ја користат само САД. Системите за копнено лансирање за крстосувачките ракети почнаа да се развиваат по пропаѓањето на Договорот за нуклеарни сили со среден дострел во 2019 година. Договорот меѓу САД и Русија забрани ракети лансирани од земја со дострел помеѓу 500 и 5.500 километри.