Рускиот претседател Владимир Путин изјави дека Русија е подготвена да биде домаќин на украинскиот претседател Володимир Зеленски на разговори во Москва во кое било погодно време за него.

Неговата изјава следува откако Зеленски пред два дена го покани Путин да се состане со него во регионот Донбас за да разговара за крај на конфликтот во источна Украина.

Украина на 20 април рече дека е постигнат „значителен напредок“ во разговорите за повторно воспоставување примирје со проруските сепаратисти на истокот на земјата, каде конфликтите и тензиите со Русија се интензивираат во последните неколку недели.

„Има значителен напредок“, изјави Олексиј Арестович, портпарол на украинската делегација, која учествува во преговорите организирани во врска со примирјето.

Сепак, тензиите не се намалуваат на фронтот и цивилите се плашат дека ќе продолжат тешки конфликти, пишува АФП.

Русија најави повлекување на војската од границата со Украина

Примирјето во голема мера се почитуваше во втората половина на 2020 година, но од почетокот на годината тој повторно започна да се распаѓа и започнаа конфликтите меѓу силите во Киев и сепаратистите, за кои се верува дека Русија воено и финансиски ги помага. Во исто време, тензиите се зголемија со Москва, која во последните неколку недели собра десетици илјади војници на границата со Украина, зголемувајќи го стравот во Киев дека се подготвува голема воена операција.

Украина ја обвинува Русија дека се обидува да ја уништи, додека Москва нагласува дека не се заканува никому, но ги осудува и украинските „провокации“.

Најмалку 20 Палестинци биле убиени во серија израелски напади врз Појасот Газа во средта на 13 август, соопштија локални медицински извори.

Меѓу жртвите се седум лица кои биле убиени северозападно од градот Газа на пункт за дистрибуција на хуманитарна помош каде работеле како обезбедување. Уште седум лица, меѓу кои пет деца, биле убиени кога при воздушен напад бил погоден шаторот во кој престојувале.

Нападите се случуваат во време кога израелските сили најавуваат операција за преземање на градот Газа, што предизвика меѓународна осуда и предупредувања за потенцијални катастрофални хуманитарни последици.

Во посебен напад со беспилотно летало на северот на Појасот Газа, пак, загинало едно лице, додека петмина цивили биле убиени чекајќи помош јужно од долината на реката што тече низ централниот дел на Појасот, објави палестинската новинска агенција WAFA. Израелската војска соопшти дека ги истражува тврдењата.

Во текот на утрото на 13 август беа пријавени неколку воздушни напади, особено во Газа, а беа погодени и неколку објекти.

Видете и ова:

Илјадници на протест во Тел Авив по одлуката за проширување на војната во Газа, расте осудата на Израел

Смртоносни инциденти сè почесно се случуваат во близина на пунктовите за дистрибуција на помош управувани од Хуманитарната фондација Газа (GHF) којашто е поддржана од Израел и САД. GHF започна со операции во мај, по тримесечно прекинување на испораката на помош.

Војната започна на 7 октомври 2023 година, кога Хамас, кој е прогласен за терористичка организација од САД и ЕУ, изврши напад врз Израел, убивајќи околу 1.200 луѓе и заробувајќи повеќе од 250 лица кои потоа беа земени како заложници во Појасот Газа.

Оттогаш, повеќе од 61.700 Палестинци се убиени, според Министерството за здравство управувано од Хамас. Иако бројките не можат да бидат независно потврдени, Обединетите Нации ги сметаат за веродостојни.

Министерството тврди и дека повеќе од 1.850 луѓе загинале обидувајќи се да добијат помош, честопати преминувајќи активни борбени зони.

Безбедносниот кабинет на Израел, предводен од премиерот Бенјамин Нетанјаху, одлучи дека армијата треба да ја преземе контролата врз Газа, со можна цел да го елиминира Хамас. Временскиот рок за операцијата сè уште не е познат, но локалните медиуми наведуваат дека подготовките би можеле да траат околу две недели.

Уставниот суд на Северна Македонија оформи предмет во кој ќе го испитува Протоколот што земјава го потпиша во Република Бугарија на 17 јули 2022 година и беше потпишан во период кога се договори т.н. „француски предлог“ за одблокирање на пристапните преговори со Европската унија.

Од Уставен денеска (13 август) информираа дека во тек е постапка во која се испитуваат податоците и известувањата потребни за донесување на одлука.

Иницијативата со која се оспори Протоколот ја поднесе поранешната пратеничка и експретседателка на партијата ДОМ, Лилјана Поповска, која смета дека е спротивен на Уставот односно на основните слободи и права на човекот.

„Подносителката тврди дека Пртоколот има несоодветна форма и содржина, дека излегува надвор од рамките на правен акт кој обработува еден член од Договор меѓу две земји и произведува штетни дејствија врз идентитетските прашања за македонскиот народ, јазик и држава“, информираа од Уставниот суд.

Видете и ова:

Потпишан протоколот меѓу С.Македонија и Бугарија

Како што навела Поповска, таа смета и оти Пртоколот е противуставен бидејќи не е ратификуван во Собранието и не е објавен во Службен весник, а тврди и оти е спротивен на Законот за склучување, ратификација и извршување на меѓународни договори.

„Во иницијативата е наведено дека Протоколот не е полноправен акт потврден од Параламентот туку останува само записник од состанок на Меѓувладина комисија“, велат од Уставен.
Она што го бара експратеничката од Уставен е да се поништи Проколот.

Протоколот беше потпишан во Софија за време на вториот состанок на Заедничката меѓувладина комисија меѓу Северна Македонија и Бугарија од страна на поранешните министри за надворешни работи на двете земји, Бујар Османи и Теодора Генчовска.

По потпишувањето, Османи тогаш кажа дека за земјава биле важни три работи и тоа: Протоколот да не биде дел од преговарачката рамка, македонскиот јазик да биде чист во комуникацијата со ЕУ и историските прашања да се надвор од преговорите.

Видете и ова:

Османи - Протоколот е базиран на реципроцитет

На брифинг со новинарите, тој тогаш рече дека Протоколот „во својата правна суштина е записник од состанок“, во кој има дневен ред, преглед на политичкиот дијалог, средбите и активностите, потоа преглед на секторска соработка и на меѓуресорските работни групи, како и пет теми за кои двете држави треба да преземаат мерки. Петте теми се однесуваат на историјата, поддршка на ЕУ интеграцијата, говорот на омраза, територијалните претензии и рехабилитацијата на жртвите на репресија од комунистичкиот режим.

Наспроти тврдењата на тогашната власт, ВМРО-ДПМНЕ како опозиција, вклучително и актуелниот премиер Христијан Мицкоски, реагираа бурно споредувајќи го документот со капитулација.

Државната комисија за спречување на корупцијата (ДКСК) ќе добие нов претседател по завршувањето на локалните избори.

Ова стана јасно откако денеска, 13 август, во собраниската Комисија за прашања на изборите и именувањата Собранието го формираше телото кое треба да ја направи селекцијата на кандидатите што ќе се пријават на огласот за претседател.

Тоа значи дека во текот на изборниот процес, Антикорупциската комисија ќе биде без претседател, а со тоа и со еден член помалку – шест од вкупно седум члена. Челната функцијата привремено ќе ја извршува заменик-претседателот, кој според законските одредби, ги врши сите должности и овластувања што ги имал претседателот.

Видете и ова:

Собранието ја констатира оставката на претседателката на Антикорупциска, Татјана Димитровска

ДКСК остана без прв човек откако доскорешната претседателка Татјана Димитровска си поднесе оставка. Оставката следеше откако таа беше обвинета за две кривични дела: оддавање службена тајна на поранешниот директор на ТЕЦ Неготино, Небојша Стојановиќ, обвинет во случајот „Адитив“, и за компјутерски фалсификат, бидејќи ревизор од ДЗР во нејзино име го положил тестот за сертификат за државна тајна.

По ова, Собранието на 5 август одлучи да распише оглас за нејзин наследник. Меѓутоа, на 9 август собранискиот претседател Африм Гаши ги распиша локалните избори што треба да се одржат на 19 октомври (прв круг) и на 2 ноември (втор круг).

Ваквата ситуација го доведе во прашање изборот на нов претседател на ДКСК бидејќи изборните правила забрануваат вработување нови лица во државни институции од распишувањето до завршувањето на изборите, додека постапките што се започнати се ставаат во мирување.
Пратениците побараа мислење од останатите шест члена на Антикорупциската комисија дали да продолжат или да го стават во мирување процесот на избор, но тие одбија да се произнесат. Сепак, антикорупционерите им укажаа на пратениците на законските одредби околу забраните што беше причина изборот да се остави за по завршување на изборите.

„Сакаме да укажеме на Комисијата за селекција дека нејзината работа ќе продолжи по завршување на изборите на 3 ноември“, им рече Сајкоски на членовите на Комисијата што треба ја прави селекцијата на пристигнатите кандидатури.

Видете и ова:

Случај „Адитив“: Претседателката на ДКСК обвинета за одавање службена тајна

Инаку, како членови на ова тело беа избрани замениккот народен правобранител Илбер Руфати, двајца претставници на здруженија кои се дел од советите за соработка на Владата и граѓанскиот сектор – Дарко Аврамовски и Бардил Јашари, како и четворица пратеници – Бојан Стојаноски од ВМРО-ДПМНЕ, Саранда Имери Стафаи од ВРЕДИ, Митко Трајчулески од СДСМ и Арбана Пашоли од Европскиот фронт.

Оваа комисија, по завршувањето на изборите, ќе треба да ги провери документите и да ги селектира кандидатите кои ќе се пријават на огласот за претседател на ДКСК што трае до 15 август. Потоа, во рок од пет дена од објавувањето на листата кандидати, ќе треба да организира интервју со нив за да може да утврди ранг-листа.

Ранг-листата потоа ќе треба да се најде во рацете на пратениците-членови на собраниската Комисијата за прашања на изборите и именувањата кои, пак, во рок од два дена треба да изгласаат и достават предлогот за претседател до Собранието за да може тој да се изгласа и на пленарна седница.

Слободата на изразување и слободата на медиумите се ограничени во земјите од Западен Балкан, оцени американскиот Стејт департмент во својот најнов извештај за состојбата со човековите права во светот.

Ова е прв извештај за човековите права издаден од Стејт департментот по преземањето на власта од страна на администрацијата на претседателот Доналд Трамп.

За Северна Македонија се наведува дека невладините организации во земјава забележуваат оти медиумските слободи се загрозени од стратешки тужби против новинари – т.н. слап тужби (SLAPP), притисок од функционери, самоцензура и напади за истражувањата за корупција, дезинформации и говор на омраза.

Се споменуваат и примери за конкретни случаи, како што се заканите со смрт против новинарката Лепа Џундева и нападот на новинарот Фуркан Салиу.

Видете и ова:

Репортери без граници: Македонија на 42 место според индексот за слобода на медиумите

Во извештајот се нотира и дека медиумите во Северна Македонија, особено јавните радиодифузни сервиси, се соочуваат со политички и економски притисоци, додека онлајн медиумите, иако се послободни, страдаат од дигитални напади и обиди за нивна дискредитација.

До септември 2024, четири новинари биле мета на слап тужби од државни и приватни актери, нотира Стејт департментот во извештајот за минатата година.

Што се нотира за земјите од регионот?

Покрај за слободата на медиумите, извештајот за земјите од Западен Балкан ги истакнува и проблемите што се евидентирани во претходните извештаи – неуспехот да се гонат воените злосторства.

Во делот за Босна и Херцеговина се нотира дека властите во ентитетот Република Српска презеле активности што ги ослабеле државните институции, ги зголемиле меѓуетничките тензии и ја ограничиле слободата на изразување. Претседателот на Република Српска Милорад Додик, забележува Стејт департментот, го поткопува уставниот поредок на БиХ преку засилени вербални и правни напади.

Во однос на Косово, се наведува дека властите не презеле доследни чекори за идентификување, истрага, гонење и казнување на службените лица кои ги прекршувале човековите права.

Кога е во прашање Србија, според извештајот, немало значајни промени во состојбата со човековите права. Но, се истакнуваат извештаи за сериозни ограничувања на слободата на изразување и слободата на медиумите, вклучувајќи насилство или закани за насилство врз новинари и неоправдано прогонување на новинари, како и трговија со луѓе, вклучувајќи принудна работа.

И за Црна Гора се наведува дека немало значајни промени во 2024 година, а меѓу проблемите со човековите права се посочуваат извештаи за тортура или суров, нечовечки и понижувачки третман, како и сериозни ограничувања на слободата на изразување и медиумските слободи.

Извештајот за 2024 година не ги споменува притисоците или ограничувањата со кои се соочува ЛГБТ+ популацијата во земјите од Западен Балкан.

Видете и ова:

„Не знам што се случи“ - македонска државјанка меѓу протераните од Србија

Состојба во светот

Во годишниот извештај, Стејт департментот значително ги ублажи критиките кон некои земји кои се силни партнери на републиканскиот претседател Доналд Трамп, како што се Ел Салвадор и Израел, а во кои организациите за човекови права тврдат дека има сериозна историја на злоупотреба на човековите права.

Од извештајот за 2024 е отстрането споменувањето на дискриминацијата со која се соочуваат ЛГБТ+ луѓето, намален е претходниот фокус на репродуктивните права, а воведени се критики за ограничувањата на политичкиот говор кај сојузниците на САД во Европа, за кои американските претставници веруваат дека се насочени кон десничарските политичари.

Во извештајот се споменува она што администрацијата на Трамп го смета за ограничувања на слободата на говорот во Обединетото Кралство, Франција и Германија односно се користи идентичен јазик дека „состојбите со човековите права во сите три сојузници на НАТО се влошија во текот на годината“.

На 89-годишна возраст почина Милка Ефтимова - македонската оперска примадона, доајен на Македонската опера и амбасадор на македонската уметност и култура во светот.

Во својата богата и плодна кариера, таа отпеа четириесет оперски улоги, како и многубројни партии во ораторијални дела и соло изведби, застанувајќи повеќе од 1200 пати на оперската и концертната сцена, во дваесетина земји низ светот.

Таа ќе остане запаметена по улогите на Орфеј во ,,Орфеј и Евридика", Ацучена во ,,Трубадур", Еболи во ,,Дон Карлос", Сузуки во ,,Мадам Батерфлај", Марфа во ,,Хованшчина", Урлика во ,,Бал под маски" и многу други, а најголем печат остави во насловната улога на ,,Кармен". Од оперската сцена јубилејно се прости токму со Кармен на 6 ноември 1991 година.

Милка Ефтимова е родена во Радовиш на 26 февруари во 1936. Завршила средно музичко училиште во Штип, музичка академија во Љубљана, и предавала на Факултетот за музичка уметност и во средното музичко училиште во Скопје. Во 1961 за првпат застанала на сцената на оперскиот театар.

Таа беше редовен професор на Факултетот за музичка уметност во Скопје, наставник на Музичко-балетскиот училиштен центар во Скопје и Средното музичко училиште во Штип.

Добитник е на наградите: „11 Октомври“ (1985), „Св.Климент Охридски“ (2001), „Мајка Тереза“ (2009), како и Орден за заслуги на Република Северна Македонија (2022).

Околу 350 лица денеска (13 август)полагаат за лиценца за работа за воспитувачи, негуватели, стручни работници, соработници и директори. Оваа обврска е задолжителен предуслов за вработување во детските градинки.

Министерот за социјална политика, демографија и млади Фатмир Лимани денеска присуствуваше на полагањето на стручниот испит на Филозовскиот факултет кој процес беше блокиран од 2023 година.

„Конечно го одблокиравме процесот на полагање стручни испити за доделување и добивање лиценци за работа, во детските установи, процес кој беше во застој од 2023 година. Поради нефункционален електронски систем за полагање, голем број на кандидати не може да пристапат кон испитот што предизвика застој токму кога имавме најголема потреба за кадар во градинките на нацинално ниво. Се со цел надминување на овој проблем, и на оваа ситуација, извршивме измени во Законот за заштита на деца, со кој се овозможи стручниот испит да се спроведува и во хартиена форма и тоа до 1 јануари 2026 година, а по тој рок процесот за лиценцирање ќе продолжи по електронски пат“, истакна Лимани.

Видете и ова:

Првото вето од Сиљановска Давкова за закон, владата најави корекции

Тој информираше дека денеска ќе полагаат околу 350 лица, а до крајот на овој месец уште 350 кандидати ќе имаат можност да го завршат овој процес и да се стекнат со соодветна лиценца за работа.

Лимани нагласи дека сите пристигнати барања за стекнување со лиценца детално се разгледуваат и потенцира дека секој барател ќе биде исконтактиран од страна на комисијата.

Европската банка за обнова и развој (ЕБРД) ќе ѝ додели заем од 500 милиони евра на украинската државна гасна компанија Нафтогас (NAK) за финансирање итни набавки на гас, со цел зајакнување на енергетската безбедност на земјата, која оваа година е сериозно нарушена од повторените насочени руски напади. Ова е најголемиот единечен заем што Банката го одобрила во Украина.

Заемот е поддржан со гаранција од Европската Унија, која покрива 90 проценти од износот, во рамките на Инвестициската рамка за Украина-механизам насочен кон обезбедување средства за закрепнување и долгорочен развој на земјата.

Новата финансиска поддршка следи по големите руски напади врз постројките за производство и преработка на гас на Нафтогаз во првата половина од 2025 година, при што се предизвикани значителни загуби во производството и зголемена потреба од увоз на гас додека компанијата ги обновува оштетените капацитети.

Ова е четвртиот пакет финансирање што ЕБРД го обезбедува за Нафтогас од почетокот на целосната руска инвазија врз Украина во 2022 година. Со него, вкупната поддршка на Банката за компанијата достигнува 1,6 милијарди евра - од кои 1,27 милијарди евра во заеми и 330 милиони евра во грантови обезбедени од Норвешка преку ЕБРД.

Видете и ова:

Украина во неизвесност и по договорот за вооружување меѓу САД и НАТО

ЕБРД е најголемиот институционален инвеститор во Украина и од почетокот на војната има пласирано повеќе од осум милијарди евра во земјата, се наведува во денешното соопштение од оваа институција. Петте приоритети на Банката во Украина се енергетска безбедност, витална инфраструктура, безбедност на храната, трговија и приватен сектор.

Инвестициската рамка за Украина е дел од механизмот „Фонд за Украина“ на ЕУ во вредност од 50 милијарди евра, наменет за привлекување јавни и приватни инвестиции за закрепнување и реконструкција. Рамката располага со финансиски инструменти во износ од 9,3 милијарди евра – 7,8 милијарди во гаранции за заеми и 1,5 милијарди во комбинирано финансирање – со цел да се мобилизираат 40 милијарди евра за обнова, реконструкција и модернизација на Украина.

Министерството за внатрешни работи на Србија објави дека за време на ненајавените собири во Врбас и Бачка Паланка, биле повредени четворица полицајци од Полициската управа на Нови Сад, вклучувајќи го и заменик-началникот на оваа полициска управа.

„Полициските службеници се повредени во кордонот што ги одвојуваше демонстрантите од поддржувачите на Српската напредна партија кои стоеја пред просториите на партијата, додека демонстрантите ги нападнаа“, се вели во соопштението.

Според Министерството за внатрешни работи, демонстрантите фрлале разни предмети кон полицијата и собраните поддржувачи на СНС.

Припадници на српската полиција интервенираа во вторник вечерта за да ги одвојат граѓаните што демонстрираа во Врбас од членовите на владејачката Српска напредна партија (СНС), објави телевизијата Н1 од местото на настанот.

На фотографиите од оваа медиумска компанија од Врбас, околу 130 километри северно од Белград, може да се види дека пиротехнички средства, петарди, јајца, шишиња летаат кон демонстрантите, противници на владата, кои се собрале на претходно објавениот состанок.

Н1 наведува дека нападот го извршил припадник на Српската напредна партија и дека станува збор за „синхронизиран напад“ што се случил и во Бачка Паланка, околу педесет километри од Врбас, каде што полицијата не реагирала.

Видете и ова:

Поделена Србија: Тенката линија помеѓу политичките конфликти и отвореното насилство

Како што претходно објави Радио Слободна Европа, поддржувачите и противниците на владата биле одделени со полициски кордони неколку пати во различни градови на Србија во последниот месец. Заедно со истурање вода, фрлање јајца, поради навреди до физичко насилство.

Во понеделник, 11 август, во Бачка Паланка се одржа митинг во поддршка на Драган Прпа, кој беше нападнат од маскирани насилници, а на митингот имаше инциденти, бидејќи голем број поддржувачи на СНС се собраа пред просториите на партијата.

Претходно, на 10 август, во Врбас, околу 30 километри од Нови Сад, полицијата ги оддели поддржувачите на владата, предводени од СНС, и оние кои се против владата. Двете групи разменија пцовки и навреди, а летаа пластични шишиња и јајца.

Сепак, вниманието на јавноста го привлече уште пред тоа инцидент во Бачки Петровец на 9 август. Тој ден, група мажи вербално нападнаа и искинаа фотографии на кои се прикажани протести предводени од студентите во блокада од протестите низ Војводина на изложба организирана од неформална група граѓани - Словаци од Бачка, Банат и Срем.

Европските и украинските лидери ќе разговараат со претседателот на Соединетите Држави (САД), Доналд Трамп, на виртуелен состанок во среда (13 август), пред неговиот самит со претседателот на Русија, Владимир Путин во Алјаска.

Американскиот претседател рече дека состанокот ќе послужи како „запознавање“ во рамките на неговите напори за ставање крај на војната меѓу Русија и Украина.

Виртуелна видео средба меѓу Трамп, украинскиот претседател Володимир Зеленски и лидерите на Германија, Финска, Франција, Велика Британија, Италија, Полска и Европската Унија е планирана за 14 часот, објави портпаролот на германската влада.

Генералниот секретар на НАТО, Марк Руте, исто така, ќе учествува на конференцијата организирана од германскиот канцелар Фридрих Мерц.

Украина се надева дека средбата ќе послужи, барем делумно, како европска противтежа на самитот во Алјаска.

Минатата недела, Трамп се согласи да го одржи првиот состанок меѓу САД и Русија од 2021 година, нагло менувајќи го курсот, и покрај тоа што неколку недели изразуваше разочарување од Путин, кој ги игнорираше мировните иницијативи на САД.

Видете и ова:

Украинците се сомневаат дека средбата Трамп-Путин ќе донесе крај на војната

Трамп вели дека и Киев и Москва ќе мора да се откажат од делови од својата територија за да ја завршат војната. Руските трупи веќе окупираа речиси една петтина од вкупната територија на Украина.

Непредвидливоста на тоа како ќе се одвива состанокот во Алјаска предизвика загриженост во Европа дека американските и руските лидери би можеле да донесат одлуки со далекусежни последици, па дури и да се обидат да ја принудат Украина да прифати неповолно решение.

„Сега се фокусираме на тоа да се осигураме дека тоа нема да се случи, да работиме со американските партнери и да останеме координирани и обединети од европска страна. Сè уште има многу време до петок“, рече еден висок функционер од Источна Европа.

Администрацијата на Трамп ги намали очекувањата за каков било поголем напредок кон прекин на огнот во вторник, нарекувајќи ја неговата средба со Путин во Алјаска „добра можност за слушање“.

Видете и ова:

Венс: И Украина и Русија, најверојатно ќе бидат „незадоволни“ од каков било мировен договор

Европските лидери постојано нагласуваат дека ги поздравуваат напорите на Трамп за мир, но истакнуваат дека не смее да има договор за Украина, без учество на самата Украина.

Шест високи европски претставници изјавија за Ројтерс дека го гледаат ризикот од договор што би бил неповолен за безбедноста на Европа и Украина. Тие изјавија дека европското единство би било клучно доколку тоа се случи.

Портпаролката на Белата куќа, Каролин Ливит, во вторникот им изјави на новинарите дека самитот ќе биде „добра можност за слушање“ за Трамп да открие што е потребно за да се постигне договор.

По виртуелната средба, Трамп и потпретседателот Џ.Д. Венс треба да разговараат со европските лидери на уште една онлајн средба во 15 часот, изјави германскиот портпарол.

Потоа, во 16:30 часот, е закажан онлајн состанок на „Коалицијата на подготвените“, група земји што работат на планови за поддршка на Украина во случај на прекин на огнот.

Собраниската Комисија за прашања на изборите и именувањата утре ќе одржи седница на која се очекува да формира Комисија за селекција на кандидати за претседател на Државната комисија за спречување на корупцијата (ДКСК). Како што стои на календарот на активности на веб-страната на Собранието, седницата е закажана за 12 часот.

Собранието на 5 август го распиша Огласот за нов претседател на Антикорупциска. Како што се наведoa тогаш од Собранието, рокот за пријавување ќе трае 10 дена, а понатамошните фази од постапката ќе се спроведат согласно роковите и процедурите утврдени во член 12 од Законот за спречување на корупцијата и судирот на интереси.

Собранието на 1 август донесе Предлог на одлука за објавување на јавен оглас за избор на претседател на Државната комисија за спречување на корупцијата откако сега веќе поранешната претседателка на ДКСК Татјана Димитровска поднесе оставка по обвинувањата на Обвинителството за гонење организиран криминал и обвиненијата за две кривични дела и тоа за оддавање службена тајна на поранешниот директор на ТЕЦ Неготино Небојша Стојановиќ, обвинет во „Адитив“, и за компјутерски фалсификат затоа што ревизор од ДЗР во нејзино име и го положил тестот за сертификат за државна тајна.

Видете и ова:

Распишан јавен оглас за нов претседател на ДКСК по оставката на Димитровска

Законот за спречување на корупцијата и судирот на интереси во членот 14 предвидува во случај на оставка на претседател или член на ДКСК, Собранието да констатира престанок на фукцијата. Во ставот 6 од овој член се наведува и дека во случај на престанок на функцијата или разрешување на претседателот на ДКСК до изборот на нов претседател на комисијата, функцијата на претседател ја врши заменик-претседателот на Државната комисија, со сите должности и овластувања кои ги имал претседателот.

Во членот 7, пак, се наведува дека во случај на разрешување, односно претстанок на функцијата на претседателот, односно мандатот, Собранието најдоцна во рок од десет дена започнува постапка за избор на нов претседател, односно член на Државната комисија.

Врз основа на членот 12 став 2 од Законот, во случај на разрешување, односно престанок на функцијата на претседателот, односно член на ДКСК пред истекот на мандатот, Собранието започнува постапка за избор на нов претседател, односно член на ДКСК во рок од десет дена од престанокот на мандатот.

Постапката за избор на претседател и членови на Државната комисија започнува со објавување јавен оглас за избор на претседател и членови на Државната комисија, а ја спроведува Комисијата за прашања на изборите и именувањата на Собранието. Собранието го објавува огласот во „Службен весник“ и во најмалку три дневни весници. Рокот за пријавување на кандидати за огласот е десет дена од денот на објавувањето на огласот во „Службен весник на Република Македонија“.

Комисијата за прашања на изборите и именувањата на Собранието во рок од десет дена од објавувањето на огласот формира Комисија за селекција на кандидати за претседател и за членови на ДКСК. Таа ги проверува документите и ги селектира кандидатите, и во рок од пет дена од објавувањето на листата на овој член, се организира интервју на кандидатите кои ги исполнуваат условите од членот 11 на овој закон кое се емитува на Собранискиот канал.

Во рок од три дена од спроведувањето на интервјуто, Комисијата за селекција утврдува ранг-листа на кандидатите согласно со утврдените критериуми и ја доставува на Комисијата за прашања на изборите и именувањата на Собранието, која во рок од два дена, најдобро рангираните кандидати му ги предлага на Собранието во единствена предлог листа за претседател и членови на ДКСК, со образложение за секој од предложените кандидати.