Актуелниот претседавач со Претседателството на БиХ, Жељко Комшиќ изјави дека доколку странците не го спречат српскиот член на тоа трипартитно тело, Милорад Додик, нема да има друг избор освен да го спречат сами.

Комшиќ тоа го кажа во интервју за Радио Сараево и додаде дека, БиХ „никогаш всушност не била оставена на мир од оние кои го загрозуваат опстанокот на државата“.

„Веќе ни се случи сето најлошо што можеше да и се случи на една земја и нејзините граѓани, од агресија, геноцид и злосторства што историјата на човештвото не ги памети. Државните непријатели го убија стравот во нас и на тоа треба да размислуваме ако повторно насилно ги нападнат нашата држава и граѓаните“, рече Комшиќ.

• Можни сценарија по одлуката на Собранието на Република Српска
• Собранието на Република Српска го покрена процесот на пренос на надлежности од БиХ

Тој изјави дека стравот не парализира, освен неколкумина кои својата лична удобност сакаат да ја претстават како рамнодушност на народот кон судбината на државата.

„Странците, без разлика дали се наши пријатели или непријатели, мора да го знаат тоа. Со разбојник нема да преговараме за постоење институции чие формирање е извршено согласно Уставот и законот во Парламентарното собрание на Босна и Херцеговина. Сум кажал еднаш и ќе кажам уште еднаш. Подобро е странците да го запрат Додик отколку ние да го спречиме“, вели Комшиќ во интервју за радио Сараево.

Членот на Претседавателството на Босна и Херцеговина Милорад Додик изјави дека ќе забрани во Република Српска делување на правосудните институции во Босна и Херцеговина. До ова доаѓа откако дел од босанските медиуми објавија дека обвинителството на Босна и Херцеговина води истрага против 13 лица поради постоење основано сомнение дека сториле кривично дело напад врз уставниот поредок на БиХ. Првоосомничен во оваа истрага лидерот на Сојузот на независни социјалдемократи и српски член на Претседателството на БиХ, Милорад Додик.

Вршителот на должноста премиер на Косово Албин Курти изјави дека ќе направи сè за новото Собрание да биде конституирано до крајот на јули, a во духот на соработка меѓу политичките партии.

По двочасовната средба со претседателката на Косово, Вјоса Османи, Курти истакна дека законските рокови течат и дека конституирањето на новиот собраниски состав мора да се случи во последната недела од јули.

„Ќе сториме сè што можеме за да го оствариме тоа во дух на соработка, со идеја за консензус или компромис, за потоа да преминеме на формирање нова влада“, рече Курти.

Тој додаде дека на средбата биле разгледани сите аспекти на процесот на конституирање на Парламентот. Курти нагласи дека треба да се почека завршувањето на средбите на претседателката со претставниците на другите партии за да се процени дали ќе има доволно напредок.

Видете и ова:

По 40-ти пат неуспешен обид за конституирање на Собранието на Косово

Уставниот суд на 26 јуни ги задолжи пратениците да го конституираат Собранието во рок од 30 дена. Во саботата, на повик на Курти, беше одржана средба со претставници на сите парламентарни партии, освен Српската листа, но не беше постигнат договор.

Претседателката Османи за денеска (2 јули) закажа средби со лидерите на Демократската партија на Косово, Демократскиот сојуз на Косово и Алијансата за иднината на Косово, за да разговара за излез од актуелната ситуација, со оглед на тоа што косовскиот парламент не е конституиран и по 40 обиди.

Предметот за пожарот во дискотеката „Пулс“, оформен од Основното јавно обвинителство – Кочани, денеска(2 јули) е префрлен од Основниот суд Кочани во Основниот кривичен суд Скопје, согласно решението на Врховниот суд на РСМ, со кое се утврдува дека скопскиот суд е стварно и месно надлежен за оценка на обвинителниот акт.

Како што соопштија од Основен кривичен суд Скопје, Основниот кривичен суд Скопје е опреден како надлежен за постапката, па во тој правец, доставениот обвинителен акт, согласно АКМИС – системот ќе биде распределен на совет за оцена на обвинение кој по примерот ќе го достави актот до обвинетите по што започнува Законскиот рок за приговор на истиот.

„По исполнување на предвидените услови за постапување, советот ќе закаже седница за оцена за исходот странките и јавноста, ќе биде навремено известени“, стои во соопштението од Кривичен суд.

Видете и ова:

Крстевски: Кочани будно ќе го следи судењето, не дозволуваме „тргување“ со жртвите

Оттаму потсетуваат дека Врховниот суд на Република Северна Македонија, постапувајќи по предлог на Апелациониот суд Штип, донесе одлука Основниот кривичен суд Скопје да биде надлежен за постапување по конкретен предмет, поради недоволен број кривични судии во судовите во Штип и Струмица.

Одлуката е донесена врз основа на анализа на кадровските и техничките капацитети, како и сложеноста и јавниот интерес на предметот и во неа се нагласува потребата од искусни судии кои ќе обезбедат ефикасно, стручно и законито постапување.

Согласно обвинителниот акт, на 34 физички и три правни лица обвинети за пожарот во дискотеката „Пулс“ им се ставаат на товар - тешки дела против општата сигурност.

Видете и ова:

Три месеци по трагедијата во Кочани - повредените бавно закрепнуваат

Помеѓу обвинетите се сопственици на локали, управители, инспектори, градоначалници, членови на обезбедување и државни службеници.

Поради немање доволно докази, постапката се запира за 11 лица, помеѓу кои двајца поранешни министри.

Во пожарот што се случи на 16 март годинава животот го загубија 62 лица помеѓу кои шест деца, а над 200 беа повредени.

Европската комисија предложи измени на Законот за климата на ЕУ, со кои се поставува климатска цел за намалување на нето емисиите на стакленички гасови до 2040 година за 90 отсто во однос на нивото во 1990 година.

„Договорот за климатската цел од 90 отсто ни дава јасен светилник за насочување на нашите идни активности. Одговараме на барањата на Европејците кои цврсто ја поддржуваат климатска акција“, изјави извршната потпретседателка за чиста, праведна и конкурентна транзиција Тереза Рибера при презентацијата на измените.

Според неа, со измените ЕК останува решена да продолжи со своите климатски политики, кои, како што рече, се клучни за постигнување и на други цели на нејзината социјална и економска политика, како што се безбедноста и просперитетот на европските граѓани и компании.

Еврокомесарот за клима, нула нето емисии на штетни гасови и чист раст Вопке Хукстра изјави дека со целта за ниво на 90 отсто емисии, ЕК останува на курсот на чистата транзиција.

„Знаеме зошто го правиме тоа од економски, безбедносни и геополитички причини и имаме план како тоа да функционира“, рече Хукстра.

Видете и ова:

ЕК бара јасни планови за намалување на емисиите на стакленички гасови

Според него, со измените на индустријата и земјите членки на ЕУ им се дава јасна насока и се поддржуваат нивните инвестициски планови, а воедно се осигурува и дека Европа цврсто останува на вистинскиот пат за да постигне климатска неутралност до 2050 година.

Според оценките на Комисијата, ваквите измени не само што ќе им дадат сигурност на инвеститорите, иновациите и бизнисите, туку и ќе ја зголемат енергетската безбедност на Европа. ЕК проценува и дека ЕУ е на добар пат да ја исполни целта за намалување на емисиите на стакленички гасови до 2030 година за 55 отсто од нивото во 1990 година.

Видете и ова:

Когенеративни централи - чист воздух и евтина струја или само профит?

Европскиот Закон за климата, кој стапи во сила во јули 2021 година, предвидува ЕУ да постигне климатска неутралност до 2050 година и намалување на нето емисиите на стакленички гасови до 2030 година за најмалку 55 проценти во споредба со нивото од 1990 година. Со предложените законски измени сега се поставува и нова цел за до 2040 година.

Измените на Законот сега ќе бидат доставени на разгледување до Европскиот парламент и Советот на ЕУ, кои, согласно вообичаената законодавна процедура, треба да договорат усогласен текст на предлогот и да го одобрат.

На Република Српска ѝ се потребни помошни полициски сили за борба против хуманитарните кризи и обезбедување на собири, бидејќи на Министерството за внатрешни работи на РС му недостасуваат над илјада полицајци, изјави Синиша Каран, министер за внатрешни работи на Република Српска, на седницата на Народното собрание.

На седницата во Бања Лука која се одржува дебнеска, 2 јули, Каран зборуваше за измените на Законот за полиција и внатрешни работи на РС, со кои се планира воведување на помошни полициски сили.

Откако беше најавено дека ќе се дискутира за овој закон, Делегацијата на Европската Унија во БиХ и Канцеларијата на високиот претставник (ОХР) се изјаснија против него.

Исто така, Рамо Исак, министерот за внатрешни работи на вториот ентитет, Федерацијата на Босна и Херцеговина, изјави дека тие исто така ќе започнат постапка за формирање на резервни полициски сили.

„Праксата покажа дека активниот број на полицајци не е доволен. Од 2020 година до денес, само до пензионирање, 2000 полицајци го прекинале работниот однос“, рече Каран.

Видете и ова:

Ќе се формира ентитетска гранична полиција во Република Српска

Тој истакна дека во моментов во Министерството за внатрешни работи на РС се вработени околу 5500 полицајци. Тој го спомена и проблемот со прекувремената работа.

„Во последните пет години се одржаа десетици илјади спортски настани, за кои полицајците работеа прекувремено, така што до денеска имаат акумулирано дури два милиони прекувремени часови“, рече тој.

Тој вели дека нема „скриени намери“ за донесување на овој закон, туку само да се формира помошна единица што би им помогнала на активните полициски сили, како и дека таа ќе биде ангажирана по потреба.

Во него се појаснува дека луѓето во помошните полициски сили ќе бидат избрани преку јавен конкурс, нивниот вкупен број нема да надминува 20% од редовните полициски сили, а овластувањата ќе бидат утврдени со подзаконски акт.

Додава дека негативните коментари за законот се „знак на непријателски став кон РС“ и дека нема ништо против формирањето помошни единици од страна на федералната и кантоналната полиција.

Во 2019 година, РС се обиде да формира резервна полициска сила, но таа ставка беше избришана од измените на Законот за полиција, а Жандармеријата беше формирана како посебна организациска единица во Полициската управа.

Босна и Херцеговина има вкупно 16 полициски агенции, од кои три работат на државно ниво, две на ентитетско ниво, десет во кантоните на Федерацијата на Босна и Херцеговина и независната полиција на округот Брчко.

Според податоците на Евростат од пред четири години, БиХ има за една третина повеќе полицајци од просекот во ЕУ.

Американскиот Сенат, во кој мнозинството го контролираат републиканците, го усвои големиот закон на Доналд Трамп за намалување на даноците и трошоците, наречен „Големиот прекрасен закон“.

Потпретседателот Џej Ди Венс го даде одлучувачкиот глас, усвојувајќи го законот откако сенаторите беа изедначени во гласовите 50-50.

Предлог-законот сега се враќа во Претставничкиот дом за конечно одобрување.

Претставничкиот дом, кој исто така е контролиран од републиканско мнозинство, го одобри законот минатата недела и го испрати до Сенатот, но откако Сенатот го измени законот, Претставничкиот дом мора повторно да го одобри.

Доналд Трамп побара од пратениците да го усвојат законот и да му го испратат на потпис до Денот на независноста, 4 јули.

Американскиот претседател нагласува дека Конгресот мора да го одобри овој закон за да се постигнат посакуваните цели за она што тој го нарекува „Да ја направиме Америка повторно голема“.

Законот вклучува огромен пакет мерки што би ги спровеле многу од главните домашни приоритети на Трамп, а воедно би додал 3,3 милијарди долари на националниот долг, според Ројтерс.

Видете и ова:

Сенатот го отфрли предлогот за ограничување на овластувањата на Трамп за воена акција против Иран

Републиканците имаа тежок пат да го усвојат законот од 940 страници во Конгресот, кој го контролираат со кревко мнозинство.

Со оглед на тоа што демократите беа убедливо против, републиканците имаа само три гласа повеќе во Сенатот додека преговараа за специфични даночни олеснувања и политики за здравствена заштита што би можеле да направат голема разлика и да остават милиони луѓе без здравствено осигурување.

На крајот, тројца републикански сенатори гласаа против законот, а по нерешен резултат 50-50, според законот, потпретседателот на Соединетите Држави го даде одлучувачкиот глас во корист на него, со што законот беше усвоен во Сенатот.

Потпретседателот се смета и за претседател на Сенатот и има право да гласа во него.

Гласањето во Претставничкиот дом, каде што републиканците имаат мнозинство од 220 наспроти 212 демократи, веројатно ќе биде конкурентно и тесно, објави Ројтерс.

Иранскиот претседател Масуд Пезешкијан го потпиша указот за суспендирање на соработката меѓу Иран и Меѓународната агенција за атомска енергија (МААЕ), јавува АФП.

„Пезешкијан го издаде указот за суспендирање на соработката со МААЕ“, се наведува во соопштението.

Агенцијата наведува дека, по израелските и американските напади врз нуклеарните постројки на Иран, пратениците усвоија закон насловен како „Суспендирање на соработката на Исламската Република со Меѓународната агенција за атомска енергија со барање за две итни мерки“.

Еден член од законот наведува дека, „со оглед на кршењето на националниот суверенитет и територијалниот интегритет на Иран од страна на ционистичкиот режим и САД во врска со мирнодопските нуклеарни постројки на земјата и заканата за врвните интереси на Иран, врз основа на член 60 од Виенската конвенција за договори од 1969 година, Владата е должна веднаш да ја прекине сета соработка со Меѓународната агенција за атомска енергија врз основа на Договорот за неширење на нуклеарно оружје (NPT) и нејзините заштитни мерки, сè додека не се исполнат одредени услови, вклучително и обезбедување на безбедноста на постројката и научниците“.

Видете и ова:

Трамп зборува за можна „промена на режимот“ во Иран по американските воздушни напади

Инаку Иран го отфрли барањето на шефот на МААЕ, Рафаел Гроси, да ги посети нуклеарните објекти бомбардирани за време на војната.

Порано оваа недела, Пезешкијан го осуди „деструктивното“ однесување на Гроси, додека Франција, Германија и Велика Британија ги осудија неспецифицираните „закани“ против шефот на МААЕ.

Ултраконзервативниот ирански весник „Кајхан“ неодамна тврдеше дека документите покажуваат дека Гроси бил израелски шпион и дека треба да биде погубен.

Иран изјави дека барањето на Гроси да ги посети бомбардираните локации сигнализира „злонамерна намера“, но инсистираше дека немало закани против него или против инспекторите од неговата агенција.

Во понеделник, портпаролот на иранското Министерство за надворешни работи, Есмаил Бакаеи, изјави дека гласањето на парламентот за прекин на соработката со МААЕ ја одразува „загриженоста и гневот на иранското јавно мислење“.

Дванаесетдневната војна започна кога Израел започна голема кампања на бомбардирање врз Иран и уби врвни воени команданти и нуклеарни научници, а Техеран одговори со бранови ракети и беспилотни летала лансирани кон Израел.

На 22 јуни, сојузникот на Израел, САД, изврши напади врз иранските нуклеарни постројки во Фордо, Исфахан и Натанц.

Видете и ова:

Аракчи: Преговорите меѓу Иран и САД нема да се обноват брзо

Американскиот претседател Доналд Трамп изјави дека нападите на САД ја „збришале“ нуклеарната програма на Иран, иако обемот на штетата не е јасен.

Министерот за надворешни работи на Иран, Абас Арагчи, призна „сериозна“ штета на нуклеарните постројки. Но, во неодамнешното интервју за Си-Би-Ес тој рече дека не може да ја уништи технологијата и науката преку бомбардирања“.

Израел и некои западни земји велат дека Иран се стремел кон развој на нуклеарно оружје - амбиција што Техеран постојано ја негира.

Соединетите Држави ги запираат некои испораки на оружје претходно ветени на Украина зод администрацијата на Џо Бајден , откако претходно ревизијата на Пентагон покажа дека американските залихи се намалиле премногу.

„Одлуката „интересите на Америка да се стават на прво место“ е донесена по прегледот на Министерството за одбрана на американската воена поддршка за други земји низ целиот свет“, изјави портпаролката на Белата куќа, Ана Кели, во соопштението.

„Силата на вооружените сили на Соединетите Држави останува несомнена - само прашајте го Иран“, рече Кели, осврнувајќи се на неодамнешните американски бомбардирања и ракетни напади врз нуклеарните постројки на Иран.

Изјавата на Кели дојде откако „Политико“ цитираше американски функционер, кој зборуваше под услов да остане анонимен, а кој рече дека ревизијата на Пентагон открила дека залихите се премногу ниски за некои претходно ветени артикли, па затоа пратките на некои артикли кои се чекаат нема да бидат испратени.

САД кои обезбедија повеќе од 66 милијарди долари во оружје и воена помош за Украина откако Русија ја започна својата целосна инвазија во февруари 2022 година, извршија притисок врз сојузниците да ѝ обезбедат на Украина системи за воздушна одбрана и друга опрема.

Сепак, многумина не се подготвени да се откажат од своите високотехнолошки системи, особено земјите во Источна Европа кои исто така се чувствуваат загрозени од Русија.

Замрзнувањето на дел од оружјето доаѓа откако Русија го започна својот најголем комбиниран воздушен напад врз Украина минатиот викенд, во ескалација на бомбардирањето што дополнително ги уништи надежите за напредок во мировните напори што ги застапува американскиот претседател Доналд Трамп.

Украина бара од Западот повеќе системи за воздушна одбрана, додека Русија ги засилува своите ракетни и беспилотни напади, вклучително и нападите врз цивилната инфраструктура, во кои загинаа десетици цивили.

Минатата недела, Трамп се сретна со украинскиот претседател Володимир Зеленски на маргините на самитот на НАТО. По состанокот, тој рече дека САД ќе се обидат да ѝ обезбедат на Украина повеќе системи за воздушна одбрана за да се заштити од смртоносни руски напади, но нема да се обврзат да ѝ дадат поголема помош на Украина.

„Ќе видиме дали можеме да ставиме на располагање некои Патриоти“, рече Трамп во Хаг на 24 јуни кога еден новинар го праша дали ќе ѝ продаде системи за воздушна одбрана на Украина.

„Многу е тешко да се набават. И нам ни се потребни. Ние го снабдивме Израел со нив“, рече Трамп.

Видете и ова:

Воената економија на Русија се движи кон рецесија, но тоа нема да ја забави војната

Трамп, кој ја критикуваше количината на американската воена помош испратена на Украина за време на претседателската кампања во 2024 година, даде нејасен одговор кога беше прашан за продолжување на одбранбената помош за Украина.

„Ќе видиме што ќе се случи“, рече Трамп, чија Републиканска партија е длабоко поделена по ова прашање, а нејзиното изолационистичко крило е силно против помошта за Украина.

Тој призна дека Украина ги сака „Патриотите“ „повеќе од сè друго“, велејќи дека неговата администрација ќе „види дали можеме да ставиме некои на располагање“. Истакна дека САД ги снабдуваат Израел со нив за да си помогнат да се одбрани од ракети испукани од Иран и прокси-групите што ги поддржува.

Ракети за системите за воздушна одбрана „Патриот“, прецизна артилерија и ракети „Хелфаер“ се меѓу оружјата што САД ги задржуваат, објавија „Политико“ и други американски медиуми.

Видете и ова:

Системот Патриот пристигна во Украина, Зеленски и се заблагодари на Романија

Министерот за одбрана Пит Хегсет на сослушување на поткомитетот на Сенатот претходно овој месец изјави дека дел од американските трошоци за безбедноста на Украина сè уште се во фаза на подготовка, но не даде детали. Хегсет, исто така, призна дека финансирањето за воена помош за Украина ќе биде намалено.

Тој рече дека предлог-законот за буџетот што се разгледува во Конгресот вклучува тешки избори и „ја одразува реалноста дека Европа треба да биде повеќе ангажирана во одбраната на сопствениот континент. И претседателот Трамп заслужува пофалби за тоа“.

Хегсет нагласи дека администрацијата на Трамп има поинаков став за конфликтот во Украина.

„Веруваме дека мирно решение преку преговори е во најдобар интерес на двете страни и во интерес на нашата нација“, истакна тој.

Расправата во Собранието по Предлогот за изменување и дополнување на Буџетот за 2025 година, во второ читање, почнува денеска (2 јули) на седницата на Комисијата за финансирање и буџет.

Десет дена трае општиот претрес и амандманската расправа во Комисијата за финансирање и буџет. Според информациите објавени на собранистака страница, за Предлог-буџетот се поднесени над 200 амандмани од овластени предлагачи.

Со Предлог ребалансот што го усвои Владата на 19. месецов вкупните приходи се проектирани на ниво од 362,4 милијарди денари, а капиталните расходи се планирани во висина од 47,5 милијарди денари. Проекцијата за БДП останува 3,7 проценти, а инфлацијата се очекува понатаму да се стабилизира и е проектирана на ниво од 2,8 проценти. Буџетскиот дефицит останува непроменет и во апсолутен износ и како процент од БДП, односно 41,3 милијарди денари или 4 проценти од БДП.

„Економската активност добива на динамика и забрзува, таквиот тренд ќе го одржиме и во наредниот период со политиките кои се планирани со Ребалансот. Дисциплинираниот пристап во управувањето со јавните финансии ќе продолжи, буџетскиот дефицит останува непромент и во апсолутен износ и како процент од БДП и е понизок од остваренито дефицит минатата година, внимателен и сериозен пристап применуваме и во управувањето со јавниот долг, а за тоа најважен показател е намалувањето од 36 милион евра регистрирано во првиот квартал од 2025 година“, рече министерката за финансии Гордана Димитриеска-Кочоска на прес-конференцијата на која го претстави Предлог ребалансот на Буџетот.

Видете и ова:

Визионерска инфлација со Ханиоти под точка „разно“

Во објавениот коментар за ребалансот на Буџетот, институтот Фајнанс тинк го реафирмира ставот дека проектираниот раст на даночните приходи од 12,6 проценти, односно повеќе од двојно повисоко од збирот на проектираната реална стапка на раст на БДП и (ревидираната) стапката на инфлација, е амбициозен.

„Во таа насока, говори и реализацијата на даночните приходи во првите пет месеци од годинава која изнесува 37,6 проценти (споредено со пропорционален процент на остварување од 41,7 проценти), слично со остварувањето кај приходите од ДДВ (36,9 проценти), акцизите (34,4 проценти) и увозните давачки (36,6 проценти) кои претставуваат директен одраз на пулсот на економијата“, посочуваат од Институтот.

Според Фајнанс тинк, сепак, вредно за обележување е дека неданочните приходи се зголемуваат во износ од 4,2 милијарди денари, кои во значаен дел се остварени од финансискиот резултат на Народната банка, обезбеден преку законски измени порано во текот на годинава со кои се овозможи 85 проценти од финансискиот резултат на Народната банка да се уплаќа во Буџетот на државата.

Со ваквото зголемување на буџетските приходи се овозможи зголемување на буџетските расходи, и тоа најмногу кај платите на јавната администрација (830 милиони денари), стоките и услугите (1,8 милијарди денари) и пензиите (2,5 милијарди денари).

Американскиот претседател Доналд Трамп објави дека Израел се согласил со условите за конечен договор за 60-дневен прекин на огнот во Газа, во кој ќе се вложат напори за завршување на војната во палестинската енклава.

„Моите претставници денеска имаа долг и конструктивен состанок со Израелците за Газа. Израел се согласи на потребните услови за постигнување на 60-дневен прекин на огнот, за време на кој ќе работиме со сите страни за да ја завршиме војната“, објави Трамп преку социјалните мрежи.

„Катарците и Египќаните, кои работеа многу напорно за воспоставување мир, ќе го поднесат овој последен предлог. Се надевам, за доброто на Блискиот Исток, дека Хамас ќе ја прифати оваа понуда бидејќи нема да биде подобро - ЌЕ СТАНЕ САМО ПОЛОШО“, заклучи американскиот претседател.

Амбасадорот на Израел во Обединетите Нации, Дени Данон, изјави дека Израел е „апсолутно“ подготвен за прекин на огнот, но не беше веднаш јасно дали Хамас ќе ги прифати условите од предложениот договор.

Најавата на Трамп доаѓа пред средбата со израелскиот премиер Бенјамин Нетанјаху закажана за следната недела, каде што американскиот претседател, како што самиот рече, ќе биде „многу цврст“.

Видете и ова:

Убиени 59 лица во Газа додека се обидувале да добијат храна

На 30 јуни, американскиот претседател изјави дека верува оти Нетанјаху сака да ги прекине непријателствата во Газа.

„Тој го сака тоа. Можам да ви кажам дека го сака тоа. Мислам дека ќе имаме договор следната недела“, додаде Трамп.

Исто така, на 30 јуни, израелскиот министер за стратешки прашања Рон Дермер беше на пат да се сретне со специјалниот претставник на САД за Блискиот Исток, Стив Виткоф, државниот секретар на САД, Марко Рубио, и потпретседателот Џ.Д. Венс во Вашингтон.

Зборувајќи за каналот на Би-Би-Си њуз, Данон рече дека Хамас, палестинската група која е прогласена за терористичка група од САД и Европската Унија, „игра тврдоглаво“.

„Вршиме притисок врз Хамас, и ако не дојдат на преговарачка маса, единствената опција што ќе ја имаме за да ги вратиме заложниците е да примениме поголем воен притисок“, рече Данон.

„Војната ќе заврши кога заложниците ќе се вратат дома“, додаде тој.

Околу 50 израелски заложници се уште се во Газа, од кои се верува дека најмалку 20 се живи.

Минатата недела, висок функционер на Хамас за Би-Би-Си изјави дека медијаторите ги засилиле напорите за посредување во нов прекин на огнот и договор за ослободување на заложниците во Газа, но дека разговорите со Израел остануваат во застој.

Израел изјави дека конфликтот може да заврши само кога Хамас ќе биде целосно распуштен. Хамас долго време повикува на траен прекин на огнот и целосно повлекување на Израел од Газа.

Коментарите на Трамп доаѓаат кратко откако Израел нареди евакуација во северна Газа пред зголемување на воената акција. Најмалку 20 Палестинци беа убиени во израелски воздушен напад врз кафуле на плажа во градот Газа на 29 јуни, според лекари и очевидци.

Израел започна воена кампања во Газа по нападот на Хамас врз Израел на 7 октомври 2023 година, во кој загинаа околу 1200 луѓе. Според Министерството за здравство управувано од Хамас, оттогаш во Газа се убиени најмалку 56647 луѓе.

Во март, претходниот договор за прекин на огнот пропадна кога Израел започна нови напади врз Газа. Израелската војска ја опиша акцијата како „превентивни напади засновани на подготвеноста на Хамас да извршува терористички напади, да акумулира сила и да се вооружува“.

Претходниот договор за прекин на огнот меѓу Израел и Хамас, кој стапи на сила на 19 јануари, беше планиран во три фази, но не помина првата.

Втората фаза вклучуваше воспоставување траен прекин на огнот, враќање на преостанатите заложници живи во Газа во замена за Палестинците затворени во Израел и целосно повлекување на израелските сили од Газа.

Украински беспилотен авион во нападот во понеделникот во текот на ноќта погоди објект во рускиот индустриски град Ижевск, на повеќе од 1.000 километри источно од Москва, при што загинаа три лица, а 35 беа сериозно повредени, изјави гувернерот на руската Удмуртска Република.

Александар Бречалов рече дека нападот бил насочен кон индустриски објект во регионалниот главен град, но не прецизираше кој.

Тој потврди дека ранетите добиваат медицинска помош во градската болница и дека психолози работат со жртвите и нивните семејства.

Извори во Украина ја презедоа одговорноста за нападот, велејќи дека целта била електромеханичката фабрика „Купол“ во Ижевск.

Фабриката е клучен елемент во руската одбранбена индустрија, позната по производството на ракетниот систем земја-воздух „Тор“ и борбениот дрон „Гарпија-А1“, што ја прави многу вреден воено-индустриски комплекс во регионот.

Каналите на социјалните медиуми објавија видеа наводно со кои се снимени моментот на ударот на дронот и последователната експлозија.

Како одговор на инцидентот, Росавијација, руската федерална агенција за воздухопловство, објави привремено затворање на аеродромот во Ижевск, како и на аеродромите во Саратов, Казан, Уљановск и Нижнекамск.

Ижевск е главен центар на руската одбранбена индустрија. Тој е дом на компании како што е производителот на оружје „Калашников“ и игра клучна улога во рускиот синџир на снабдување со војска.

Според руското Министерство за одбрана, нападот во Ижевск бил дел од поголема украинска офанзива со беспилотни летала што се случила преку ноќ.

Министерството соопшти дека соборило 60 беспилотни летала во неколку региони, вклучувајќи го Крим, кој Русија го анектираше, како и Ростов, Курск, Саратов, Белгород, Воронеж, Орјол и териториите околу Азовското Море и Црното Море.

Министерството соопшти дека беспилотните летала биле пресретнати и не дало проценки за штетата.

Жителите на регионот Саратов, кој се граничи со Казахстан, пријавија дека слушнале експлозии во текот на ноќта. Гувернерот на Саратов, Роман Бусаргин, ја потврди заканата од беспилотни летала во областа.

Регионот Саратов е дом на стратешка инфраструктура, вклучувајќи ја и воздухопловната база Енгелс-2.

Една од најголемите руски рафинерии за нафта, Танеко, се наоѓа во блискиот град Нижнекамск во Татарстан.

Исто така, во Татарстан се наоѓа Специјалната економска зона Алабуга во градот Јелабуга, каде што се склопуваат беспилотните летала Шахед што ги користи Русија во Украина.

Овие локации претходно биле цел на беспилотни летала, што укажува на украинска стратегија за таргетирање на руските воено-индустриски објекти длабоко на нејзината територија.