Вести
Орбан не може да биде посредник, смета Зеленски
Украинскиот претседател Володимир Зеленски смета дека Виктор Орбан не може да посредува меѓу Русија и Украина за да се стави крај на инвазијата на Москва додека унгарскиот премиер отпатува во Пекинг за да ја продолжи, како што ја нарекува, „мировната мисија 3.0“.
Состаноците на Орбан во Пекинг уследија по неговите посети на Киев и Москва откако Унгарија го презеде претседавање со Советот на ЕУ на 1 јули, за што претставниците на ЕУ и на САД се огласија со порака дека унгарскиот премиер на овие патувања не ја претставува Унијата.
Во писмото до претседателот на Европскиот совет Шарл Мишел од 5 јули, Орбан рече дека, врз основа на неговите разговори со рускиот претседател Владимир Путин, верува дека сега има „поголема шанса за позитивен прием на сите можни предлози за прекин на огнот и за патоказ до мировните преговори“.
Мајк Карпентер, висок советник за Европа во Советот за национална безбедност на Белата куќа, пак, рече дека средбата на Орбан со Путин не била корисна.
„Не мислам дека [посетата на Орбан на Москва] ќе ја поддржи Украина и нејзините напори за изнаоѓање мир или суверенитет или територијален интегритет“, рече Карпентер на 8 јули на брифинг со новинарите одржан додека САД се подготвуваат за отворање на самитот на НАТО на 9 јули.
Претседателот на Европскиот совет, Шарл Мишел, минатата недела рече дека ротирачкото претседателство на ЕУ „нема мандат да се ангажира со Русија во име на ЕУ“ и го повтори ставот на Унијата дека Русија е агресор во војната во Украина.
Орбан во своето писмо тврди дека раководството на САД е „ограничено“ поради тековната кампања за претседателските избори. Затоа, тој смета дека ЕУ не може да очекува никакви предлози од Вашингтон во наредните месеци и дека Брисел треба да размисли за покренување европска иницијатива.
Говорејќи на прес-конференција во Полска, Зеленски рече дека само моќните земји со вооружени сили многу посилни од руските можат да успеат да организираат мировни преговори.
„Дали има многу такви земји низ светот? Не многу. Верувам дека САД и Кина се такви земји. И ЕУ, не една земја, туку целата ЕУ. Ова може да биде посредничка мисија“, рече Зеленски.
Тој додаде дека Киев останува отворен за предлози од други земји за тоа како да се обликува патот кон мирот, но тие треба да се усогласат со украинската визија, особено со мировниот план од 10 точки.
Зеленски инсистираше на тоа дека територијалниот интегритет на Украина мора да биде основата на секој мировен договор.
Руски воздушен напад врз Киев, погодена е и детска болница
Путин, пак, вели дека условите за завршување на војната вклучуваат откажување на Киев од желбата да се приклучи на НАТО и отстапување на Крим и четири други окупирани региони во Украина.
Во писмото до Мишел, Орбан наведува дека тој не дал никаков предлог „и не изразил никакво мислење во име на Европскиот совет или Европската унија“.
Тој рече дека во однос на мировната формула презентирана од Зеленски, Путин повторно посочил оти Русија сè уште го смета за релевантен документот предаден за време на мировните преговори во април 2022 година во Турција. Особено делот што ги специфицира меѓународните безбедносни гаранции што треба да и се дадат на Украина.
Во писмото на Орбан, исто така, се вели дека толкувањето на Путин за ситуацијата на фронтот „суштински се разликува“ од она на Зеленски.
Рускиот лидер верува дека „времето не е на страната“ на Украина, туку на страната на руските сили. Според Орбан, Путин не се осврнал на руските жртви, но проценките на Русија за загубите на Украина се движат меѓу 40.000 – 50.000 војници месечно.
Затоа, Путин беше изненаден што Зеленски отфрли привремен прекин на огнот, вели Орбан.
„Русија е подготвена да го разгледа секој предлог за прекин на огнот што не служи за скриено преместување и реорганизација на украинските сили“, пишува Орбан во писмото.
Украина не објавува податоци за своите жртви, но Зеленски на 25 февруари рече дека 31.000 украински војници загинале во војната до тој момент и ги отфрли како неточни многу повисоките проценки што ги дава Москва за украинските загуби.
Во писмото Орбан се осврнува и на кинеско-бразилскиот мировен предлог што се разгледува од руска страна. Кина, во мировниот план од шест точки, предлага да се одржи меѓународна мировна конференција „во соодветно време“ и повикува на еднакво учество и на Украина и на Русија.
Москва е „подготвена да размени мислења за тоа, под услов рамката на мировните преговори да биде соодветна“, рече тој.
На самитот во Швајцарија, пак, беше разгледан предлогот на Украина за мир, а Киев се надева дека ќе се одржи и втор самит подоцна оваа година. Кина не присуствуваше на првиот состанок во Швајцарија.
По средбата на Орбан со Кси во Пекинг, тој му напиша посебно писмо на Мишел во кое наведува дека разговорите „потврдиле оти кинеската мировна политика, која се заснова на принципите да нема проширување, без ескалација и никаква провокација, ќе остане на сила во догледно време во иднина“.
види ги сите денешни вести
За една година ограбени продавниците во Германија во вредност од 3 милјарди евра
Кражбите во продавници нагло се зголемуваат во Германија, а гонењето на крадците е премногу слабо, велат од малопродажниот сектор во земјата.
„Загубите од кражби во продавници се зголемија на 3 милијарди евра во 2024 година, што е за 20% повеќе во однос на бројката од 2022 година“, изјави Стефан Гент, раководител на Германското трговско здружение (HDE), за гераманскиот информативен портал t-online.
Гент ја забележа организираната природа на голем дел од кражбите.
„Бандите се движат фокусирано низ централните градови, крадејќи скапа стока, како што се парфеми, чевли, електронски уреди, а потоа ги продаваат на сивиот пазар“, рече тој.
Гент додава дека покрај тоа, крадците што работат сами се сè поагресивни кога ќе бидат фатени. Тој ги критикува германските обвинители за не преземање доволно мерки.
„Продавниците покренуваат обвиненија, а обвинителите потоа ги отфрлаат случаите врз основа на ефикасност. Како резултат на тоа, многу трговци на мало повеќе не пријавуваат кражби во продавници во полицијата“, вели тој.
Претставниците на трговците бараат измени во законот, инвестиции во безбедноста и зголемено финансирање на судството.
„Се плашам од услови како во Соединетите Американски Држави, каде што речиси сè е зад стакло. Тоа е израз на недоверба кон клиентите, додека повеќе од 90% се чесни“, рече тој.
Украински напади предизвикаа пожар во нафтено складиште во Сочи
Напад со украински беспилотни летала во текот на ноќта предизвика пожар во складиште за нафта во Сочи, руското одморалиште кое беше домаќин на Зимските олимписки игри во 2014 година, на околу 400 километри од украинската граница, соопштија властите во неделата, јавува новинската агенција Франс Прес.
Украина во изминатиот период често ја напаѓа руската нафтена и гасна инфраструктура како одговор на нападите врз сопствената територија откако Русија ја започна својата офанзива во февруари 2022 година.
„Сочи претрпе напад со беспилотни летала од страна на режимот во Киев синоќа“, изјави гувернерот на рускиот регион Краснодар, Венијамин Кондратиев, на социјалната мрежа Телеграм.
Тој рече дека остатоците од беспилотното летало погодиле „резервоар за нафта, што предизвикало пожар“.
Градоначалникот на Сочи, Андреј Прошунин, рече дека нема жртви и дека „ситуацијата е целосно под контрола“, додавајќи дека пожарникарите продолжуваат да го гаснат пожарот.
Сликите, објавени од руските медиуми, но чија автентичност новинската агенција Франс Прес не можеше да ја потврди, покажаа пламен и густ облак од црн чад што се издигаше од местото.
Воздушниот сообраќај беше накратко прекинат на аеродромот во Сочи, но кратко потоа беше обновен, соопшти рускиот регулатор за воздушен транспорт Росавијација.
Украинските власти не коментираа за пожарот. Воздушните напади врз Сочи се релативно ретки во споредба со некои други руски градови.
Сепак, во нападите со украински беспилотни летала таму загинаа две лица кон крајот на минатиот месец, според локалните власти.
Киев соопшти дека ќе ги интензивира своите воздушни напади врз Русија како одговор на зголемувањето на руските напади на нејзина територија во последните недели, во кои загинаа десетици цивили.
Во меѓувреме, руското Министерство за одбрана соопшти дека три украински беспилотни летала биле пресретнати во регионот Ленинград, кој го вклучува и балтичкото пристаниште Санкт Петербург.
Во ноќните напади на Русија во јужниот и северниот дел на Украина, исто така, повредени се неколку лица, соопштија властите.
Три други лица се повредени во североисточниот регион Харков, додаде таа, додека локалните власти, исто така, објавија повреди во регионите Запорожје и Херсон на југ.
„Русите продолжуваат да водат војна не против украинските сили, туку против украинските цивили“, рече Свириденко.
Минатата недела, американскиот претседател Доналд Трамп му даде на својот руски колега Владимир Путин десетдневен ултиматум, до следниот петок, за прекин на конфликтот во Украина.
Кина и Русија започнаа поморски вежби во Јапонското Море
Кина и Русија започнаа заеднички поморски вежби во Јапонското Море на 3 август. Вежбите „Заедничко Море-2025“ започнаа во водите во близина на руското пристаниште Владивосток, соопшти Министерството за одбрана на Кина.
Двете војски ќе спроведуваат операции за спасување на подморници, борба против подморници, воздушна и ракетна одбрана и поморска борба.
Четири кинески бродови, вклучувајќи уништувачи со водени ракети, учествуваат во вежбите заедно со руски бродови, соопшти министерството.
По тридневните вежби, двете земји ќе спроведуваат поморски патроли во „водите на Тихиот Океан“.
Кина и Русија редовно одржуваат заеднички вежби, а маневрите „Заедничко Море“ започнаа во 2012 година, објави новинската агенција Франс Прес.
Велика Британија се заканува со затвор за криумчари кои се рекламираат на социјалните мрежи
Криумчари на луѓе кои ги користат социјалните медиуми за да ги промовираат своите услуги на мигрантите кои сакаат нелегално да влезат во Велика Британија би можеле да се соочат со пет години затвор, најави британската влада.
Лабуристичката влада на премиерот Кир Стармер е под силен политички и јавен притисок да го намали бројот на мигранти кои нелегално пристигнуваат во мали чамци од Франција.
Повеќе од 25.000 луѓе го направиле преминот досега оваа година.
Анализата на Министерството за внатрешни работи покажа дека околу 80% од мигрантите кои пристигнуваат со мали чамци ги користеле социјалните медиуми за време на нивното патување за да пронајдат или да комуницираат со шверцери на луѓе.
Според новите измени на законите луѓето кои објавуваат онлајн за да рекламираат услуги што олеснуваат кршење на законите за имиграција ќе се соочат со парични казни и затворски казни до пет години.
Олеснувањето на нелегалната имиграција во Велика Британија веќе е кривично дело, но владата соопшти дека нејзиниот последен план ќе и даде на полицијата уште една опција за да ги спречат криминалните банди кои профитираат од организирање на премините.
Минатиот месец, владата воведе нов режим на санкции што ѝ овозможува да замрзне средства, да воведе забрани за патување и да го блокира пристапот до финансискиот систем на земјата за поединци и субјекти вклучени во овозможување на нерегуларна миграција.
Земјотрес од 7 степени по Рихтер и ерупција на вулкан во Камчатка
Нов силен земјотрес со јачина од 7 степени според Рихтеровата скала утрово го погоди крајниот исток на Русија. Руските власти соопштија дека го откажале предупредувањето за цунами за полуостровот Камчатка во неделата, откако земјотрес ги погоди блиските Курилски Острови.
Според извештаите, земјотресот се случил во близина на брегот на крајниот југ од полуостровот Камчатка.
Епицентарот бил на длабочина од околу 40 километри. Ова е најсилниот во серијата земјотреси што следеа на 30 јули, кога регионот беше погоден од еден од најсилните земјотреси во историјата – земјотрес со магнитуда од 8,8 степени.
По тој земјотрес, следеа стотици „афтершокови“, со магнитуда до 6,5 степени.
Преку ноќ, вулканот Крашениников на Камчатка еруптираше за прв пат по 600 години, објавија во недела научници за руската државна новинска агенција РИА.
И двата инциденти би можеле да бидат поврзани со огромниот земјотрес што го потресе рускиот Далечен Исток минатата недела, што предизвика предупредувања за цунами дури до Француска Полинезија и Чиле, а потоа следеше ерупција на Кључевској, најактивниот вулкан на полуостровот Камчатка.
Курилските острови се протегаат од јужниот врв на полуостровот Камчатка. Руските научници предупредија во среда дека се можни силни последователни потреси во регионот во следните неколку недели.
„Ова е првата историски потврдена ерупција на вулканот Крашениников по 600 години“, изјави Олга Гирина, раководител на тимот за одговор на вулкански ерупции на Камчатка.
На Телеграм каналот на Институтот за вулканологија и сеизмологија, Гирина изјави дека последното излевање на лава од Крашениников се случило во рок од 40 години од 1463 година и оттогаш не е позната никаква ерупција.
Одделот на Камчатка при руското Министерство за вонредни ситуации соопшти дека по ерупцијата на вулканот е регистриран облак од пепел што се искачува до 6.000 метри. Самиот вулкан е висок 1.856 метри.
„Облакот од пепел се движеше кон исток, кон Тихиот Океан. Нема населени области по неговиот пат“, соопшти министерството на Телеграм.
На ерупцијата на вулканот ѝ е доделен портокалов код за авијација, што укажува на зголемен ризик за воздухопловството, соопшти министерството.
Отворена истрага против обвинителот кој ги водеше случаите против Трамп
Американска федерална агенција (ОСЦ) отвори формална истрага за поранешниот специјален советник Џек Смит, кој надгледуваше две кривични истраги против претседателот Доналд Трамп по неговиот прв мандат во Белата куќа.
Истрагата е насочена кон тоа дали Смит прекршил закон што им забранува на федералните службеници да ги користат своите позиции за политички активности. Барањето за истрага е поднесено од американскиот сенатор Том Котон, републиканец од Арканзас.
ОСЦ е независна агенција што го истражува однесување на федералните службеници, но нема овластување да поднесува кривични обвиненија. Таа е различна од канцеларијата на специјалниот обвинител што претходно ја водеше Смит, која беше назначена од Министерството за правда за гонење кривични случаи.
Истрагата на ОСЦ е најновата во низата мерки што Трамп и неговите сојузници ги презедоа против оние што ги сметаат за политички непријатели.
Сенаторот Котон што го поднесе барањето за истага го обвини Смит за агресивно водење истраги против Трамп за да му наштети на неговата претседателска кампања.
Според него, Смит е политички актер кој се преправа дека е јавен службеник.
Смит поднесе две кривични пријави против Трамп, од кои во едната е осомничен за нелегално задржување на доверлив материјал, а другата е поврзана со обидите на Трамп да ги поништи резултатите од изборите во 2020 година.
Ниту еден од овие случаите не е на суд, откако Врховниот суд на САД им додели имунитет на поранешните претседатели.
Смит ги отфрли двата случаи откако Трамп победи на изборите, повикувајќи се на долгогодишната политика на Министерството за правда против гонење на актуелни претседатели.
Сепак, тој објави извештај во јануари годинава во кој се вели дека доказите што ги собрал би биле доволни за да го осудат Трамп.вата кампања.
Украина ги интензивира нападите врз Русија
Украинските сили продолжија да ја таргетираат воената инфраструктура длабоко во Русија рано наутро на 3 август, продолжувајќи го притисокот врз Кремљ неколку дена пред рокот што американскиот претседател Доналд Трамп ѝ го даде на Москва да прифати мировен договор со Киев.
Руските власти во црноморското одморалиште Сочи соопштија дека украинските беспилотни летала погодиле и запалиле регионално складиште за нафта, а повеќе од 120 пожарникари се борат да ги контролираат пламените јазици во населбата Адлер во градот.
Руските воздухопловни власти соопштија дека летовите на аеродромот во Сочи се запрени поради нападот со беспилотно летало, најновиот во низата неодамнешни мерки, бидејќи украинските напади го нарушуваат цивилното воздухопловство во Русија.
Руските аеродроми честопати се принудени да ги сопрат летовите низ западен дел од земјата. Сочи, град со околу 455.000 жители, е 1.360 километри јужно од Москва и околу 1.000 километри од украинската граница.
Гувернерот на рускиот Воронежски регион, Александар Гусев, изјави дека „како резултат на падот на остатоците од дронот имало пожари во голем број приватни куќи и помошни згради, а неколку возила биле оштетени“.
„Опасноста од напад со беспилотни летала низ целиот регион останува“, напиша тој на социјалната платформа Телеграм.
Киев не коментираше веднаш за извештаите за нападите, кои не можеа веднаш да бидат потврдени.
Но, извештаите доаѓаат во време кога Украина се чини дека ги засилува нападите со беспилотни летала длабоко во Русија во време кога Трамп врши притисок врз рускиот претседател Владимир Путин да се согласи на прекин на огнот и крај на војната, која сега е во четвртата година.
Трамп на 1 август изјави дека распоредува нуклеарни подморници „поблиску до Русија“, иако не прецизираше дали станува збор за подморници со нуклеарен погон или нуклеарно вооружени подморници.
„Само сакам да бидам сигурен дека неговите зборови се само зборови и ништо повеќе од тоа“, изјави Трамп за телевизијата Newsmax.
Тој се осврна на објавата на социјалните мрежи од поранешниот руски претседател Дмитриј Медведев во која го обвини Вашингтон дека игра „игра на ултиматуми“ како одговор на објавата на Трамп дека го скратил рокот од 50 дена за Кремљ да прифати прекин на огнот на 10 дена - сугерирајќи датум на 8 август.
Сончево време со мала веројатност за пороен дожд
Денеска не очекува сончево време со мала до умерена облачност, а попладне ќе има услови за изолирана појава на пороен дожд и грмежи.
Температурата низ државава ќе се движи од 12 до 36 степени Целзиусови. Во Скопје пак, минималната температура се очекува да биде 17, а максималната 36 степени Целзиусови.
Според Управата за хидрометеоролошки работи, утре на повеќе места ќе биде нестабилно со пороен дожд и грмежи, локално во форма на невреме со засилен ветер и изолирана појава на град. Локална појава на нестабилност ќе има и во вторник, а од среда се очекува стабилизирање на времето со пораст на дневната температура
Иранскиот претседател во посета на Пакистан за зајакнување на односите
Пакистан го пречека иранскиот претседател Масуд Пезешкијан во саботата на дводневна официјална посета, бидејќи двата соседа имаат за цел да ги зајакнат своите билатерални односи во услови на зголемени тензии во регионот и пошироко, јавува германската новинска агенција ДПА.
Пезешкијан пристигна во источниот град Лахор, а локалните медиуми емитуваа снимки од слетувањето на неговиот авион.
Поранешниот премиер Наваз Шариф и главниот министер на покраината го пречекаа претседателот.
За време на неговата прва посета, иранскиот претседател треба да разговара со претседателот Асиф Али Зардари и премиерот Шехбаз Шариф, соопшти пакистанското Министерство за надворешни работи.
Во петокот, Пакистан соопшти дека ќе продолжи да ја игра својата улога во смирувањето на тензиите меѓу Иран и САД.
„Иран е наш близок пријател и братска соседска земја. Ние остануваме посветени на давање позитивен придонес за намалување на тензиите и промовирање дипломатски решенија за проблемот. Отворени сме да ја играме таа улога и ќе продолжиме да ја играме таа улога“, изјави портпаролот на Министерството за надворешни работи на неделниот брифинг за медиумите.
Претходно, американскиот државен секретар Марко Рубио изрази „благодарност за континуираната подготвеност на Пакистан да игра конструктивна улога во посредувањето во разговорите со Иран и неговата посветеност на зачувувањето на регионалната стабилност“.
Односите меѓу Пакистан и Иран честопати беа нестабилни, особено поради прекуграничната милитантност, а тензиите ескалираа во јануари минатата година кога двете страни започнаа ракетни напади од типот „очи за око“.
И покрај тензиите, двете земји ја држеа дипломатската врата отворена. Во мај, иранскиот министер за надворешни работи го посети Пакистан во услови на зголемени тензии со Индија.
За време на иранско-израелската војна, Пакистан го поддржа правото на Иран на самоодбрана и ги осуди нападите на САД врз нуклеарните постројки.
Вучиќ: Додик нема да биде уапсен во Србија, ако дојде
Пресудата против Милорад Додик, претседателот на босанскиот ентитет Република Српска (РС), сериозно ја поткопа безбедноста во регионот, оцени Српскиот совет за безбедност на 2 август.
Додик, беше осуден на една година затвор и шестгодишна забрана за вршење јавна функција на 1 август поради непочитување на одлуките на високиот претставник во Босна и Херцеговина, Кристијан Шмит.
Српскиот претседател Александар Вучиќ по седницата на Советот на 2 август изјави дека ова е „најтешката ситуација за нас од 2008 година“.
„Прашањето е каде и како ќе заврши ова и затоа е важно нашето инсистирање на зачувување на мирот и регионалната стабилност. Донесената одлука е ништо друго освен недемократска, таа е насочена и против Република Српска и српскиот народ како целина“, рече Вучиќ и нагласи дека „Додик нема да биде уапсен во Србија, ако дојде“.
Вучиќ изјави дека на српскиот народ во Косово му претстои „тешка борба за опстанок“ и дека таму е „многу тешко“, но дека „ситуацијата во Босна и Херцеговина му предизвикува најголем страв“.
Во заклучоците на Советот се наведува дека „политичката и безбедносната ситуација во регионот е сериозно нарушена, со тенденција дополнително да се влоши и да предизвика меѓуетнички конфликти директно насочени против српскиот народ“.
Советот „ги повика сите актери во регионот да останат смирени и рационално да ја разгледаат ситуацијата“ и подвлече дека „ваквите акти директно го кршат уставниот поредок на Босна и Херцеговина, воспоставен со Дејтонскиот мировен договор“.
Примарната цел на дипломатските и правните активности на Србија по оваа пресуда, како што заклучи Советот, ќе биде „зачувување на РС во согласност со Дејтонскиот договор, со силна и активна кампања во меѓународните организации како најважни партнери“.
Србија, како што заклучи Советот, ќе „ги употреби сите дипломатски, политички и правни средства што ѝ се на располагање за да обезбеди поддршка на Република Српска и нејзините легални и легитимни претставници“.
Адвокатот на Додик, Горан Бубиќ, објави по објавувањето на пресудата дека ќе биде поднесена жалба до Уставниот суд на Босна и Херцеговина, во обид да ја оспори.
„Исто така, ќе побараме привремена мерка за замрзнување на извршувањето на пресудата до одлуката на Уставниот суд на БиХ“, рече Бубиќ на прес-конференција на 1 август во Бања Лука, наведувајќи дека ова се чекори неопходни за понатамошна жалба до Европскиот суд за човекови права.
На истата прес-конференција, Додик изјави дека не ја прифаќа пресудата ниту кривичното дело за кое е осуден.
Тој најави нови одлуки на Народното собрание на РС, кое треба да усвои „јасен план за тоа како да се излезе од ова“, без да прецизира какви би биле тие одлуки.
Мултимедија
Најпосетени
Што треба да знаете