Русија истрела стотици дронови и ракети кон цели ширум Украина, уништувајќи станбени блокови и домови во главниот град Киев и на други места.
Според извештаите, има најмалку 21 жртва, а десетици луѓе се повредени.
Нападот од 28 август е најголемиот што го погоди Киев во последниве недели e најнов показател дека Русија нема намера да се повлече од своите напади, било на бојното поле, било врз цивилни цели.
Нападот доаѓа и речиси две недели по големиот самит меѓу рускиот претседател, Владимир Путин и американскиот претседател Доналд Трамп, кој имаше за цел да се најде начин за запирање на 42-месечната инвазија на Украина од страна на Москва.
Обвинителството во Киев соопшти дека до пладне биле потврдени најмалку 16 загинати лица, а повеќе од триесетина се повредени.
Спасувачите пребаруваа низ купишта чадливи урнатини во потрага по преживеани, а властите предупредија дека бројот на жртви најверојатно ќе се зголеми.
Една од најпогодените локации беше населбата Дарница во Киев, каде што дел од петкатна станбена зграда беше директно погодена.
Во Киев и Киевската област, 29 август е прогласен за ден на жалост во чест на жртвите од воздушните напади.
Напад од големи размери
Украинското воено воздухопловство соопшти дека ноќниот напад вклучувал речиси 600 дронови-камикази и мамци, како и 31 ракета, меѓу кои балистички и крстосувачки ракети. Некои од ракетите биле истрелани од авиони.
Најмалку 13 локации низ земјата беа погодени, а остатоци од проектили паднаа на уште 26 други места.
Канцеларијата на украинската редакција на Радио Слободна Европа (РСЕ) во Киев беше оштетена откако две ракети погодија цивилни објекти на мала оддалеченост. Некои прозорци беа скршени, а опремата оштетена.
„Оние што сведочат за настаните во Украина никогаш не треба да бидат повредени. Иако канцелариите на Радио Слободна Европа претрпеа оштетувања, среќа е што изгледа ниту еден член на тимот не е повреден,“ изјави претседателот на Радио Слободна Европа, Стивен Капус.
„Бидете сигурни дека нашите новинари ќе продолжат со својата клучна работа. Нашите мисли се со семејствата на загинатите и повредените во овие напади, како и со украинските служби за итна помош.“
Во меѓувреме, украинскиот претседател Володимир Зеленски упати апел за построги меѓународни санкции против Русија.
„Веќе одамна е време за нови, силни санкции против Русија за сè што прави. Пропуштени се рокови, уништени се десетици можности за дипломатија“, наведе Зеленски на социјалните мрежи.
Зеленски ги повика земјите како Кина и Унгарија – двете кои повикаа на мировни иницијативи – да реагираат на цивилните жртви.
На бојното поле, долж фронтот од 1.100 километри, руските сили продолжуваат да ги притискаат украинските одбранбени линии, кои се во дефицит и со луѓе и со оружје.
Руските трупи неодамна пробија украински линии североисточно од градот Покровск, што ги натера украинските команданти да прераспределат дел од своите најискусни единици за да ја запрат офанзивата.
„Ова е традиционалната позиција и начин на дејствување на Русија,“ изјави Јури Федоров, независен воен експерт, за Current Time.
„Иако е можно да се бара врска помеѓу дејствата на Русија — како лудото гранатирање на Киев и други украински градови — и дипломатските случувања околу Украина, Москва очигледно продолжува со веќе воспоставена стратегија, иако неуспешна.“
Одмазднички напади во Русија
И покрај интензивираните преговори меѓу Трамп и Путин, Украина и Русија продолжуваат да се напаѓаат со воздушни удари.
На 28 август, Украинската дирекција за одбранбена разузнавачка дејност (ХУР) објави дека украинските сили извршиле напад врз руски ракетен корвет од класата Бујан-М во Азовското Море. Овој брод, мал ракетен брод опремен со крстосувачки ракети Калибр, според извештаите оперирал близу до Крим, кој Русија го анектираше, кога беше нападнат.
Накусо по објавата од Киев, Министерството за одбрана на Русија соопшти дека нејзините сили уништиле украински разузнавачки брод за време на ноќни удари во Дунав, во регионот Одеса во Украина.
Исто така, украинските дронови ја нападнаа рафинеријата на нафта во руските региони Краснодар и Самара, предизвикувајќи пожари на две постројки. Украинските дронови исто така нападнаа железничка станица во Самара, предизвикувајќи задоцнувања, но без жртви.
Украинските напади врз рафинериите и нафтените цевководи доведоа до расеани недостатоци на бензин во неколку руски региони, со извештаи за широка несташица дури и во Пацифичкиот регион Приморје.
