Вести
Филипче- од одговорност не бегам, но ќе чекам да заврши истрагата
Од одговорност ниту бегам, ниту ќе бегам, но чекам да заврши истрагата, рече попладнево министерот за здравство Венко Филипче на првата прес конференција по синоќешниот пожар во кој изгоре тетовската модуларна ковид болница при што загинаа четиринаесет лица.
„По завршувањето на истрагата ќе ја донесам одлуката дали ќе поднесам оставка. Навистина тешко може да го опишам чувството и сочувството кое што го имам со семејствата. Не бегам ниту од одговорноста на наодите на истрагата, ниту од моралниот аспект, но нека заврши истрагата“, рече Филипче.
Тој не навлегуваше во други детали за истрагата, прецизирајќи дека во моментот на избувнувањето на пожарот во модуларната болница имало 26 пациенти, двајца лекари и четири медицински сестри. Обдукуцијата открила и која е возраста на загинатите чии тела беа однесени во судска медицина.
„Починатите се на возраст од 29 до 79 години. 12 пациенти кои беа во модуларната болница сега се хоспитализирани во болницата во Тетово и се во стабилна здравствена состојба. Нема починати здравтсвени работници“, рече Филипче.
Министерот додаде дека вчера и денеска вршеле увид во целата документација за набавка и за поставување на модуларната болница, но дека треба да се утврди и на кој начин била раководена по предавањето во употреба.
„Го доведуваа во прашање квалитетот и безбедноста. Она што тука го имам со мене, тоа е целата документација за набавка и поставување за модуларните болници и сето тоа е со запазени строги стандарди и постапки и вакви проекти поддржани од Светска Банка. Истрагата треба да утвди дали по предавањето во употреба истиот бил квалитетно употребуван“, рече Филипче.
Инаку, на денешната вонредна седница Владата донесе одлука да биде прогласена тридневна жалост на територијата на целата држава. Претседателот Стево Пендаровски кој беше во посета на Тетово рече дека во рок од пет дена ќе се заврши истрагата и ќе има повеќе информации. Пендаровски додаде дека засега нема индиции дека пожарот во Тетово е подметнат.
види ги сите денешни вести
Алиу: Тројца повредени во дискотеката „Пулс“ сè уште се лекуваат во странство
Тројца пациенти повредени во дискотеката во Кочани сè уште се надвор од државата, двајца се лекуваат во Турција и еден во Словенија, а втората група повредени на Пониква заминува од средина на јули, информираше денеска министерот за здравство, Азир Алиу.
Во моментов, информациите околку пациентите кои се лекуваат во странство се дека се во стабилна здравствена состојба. Во државата, беше посочено, во Клиничкиот центар на Пластична хирургија, има пациенти кои се таму заради длабочината на повредите, додека здравствено биле стабилни. Двајца пациенти се во приватната болница „Систина“. Редовно се следи состојбата на сите пациенти.
„Во Пониква во моментов е првата група, при крај, таму со нив се и пет физиотерапевти кои работат по програми, специјалист физијатар и општ хирург. Таму младите сакаат да продолжат и понатаму, имаме барања од некои од нив да продолжат и со втората група. Втората група ќе биде упатена најверојатно од втората половина на јули“, одговори Алиу.
Околу обвинувања на блиски на загинати во пожарот во Кочани, за несоодветен третман во болницата во Кочани и недостиг на соодветна опрема, веднаш по трагедијата, министерот рече дека истрагата од надлежните служби, би требало да даде одговор на многу прашања во врска со трагедијата.
Откако бил министер, Алиу дека кочанската болница е меѓу топ приоритети и дека прават максимум во рамки на можностите за нејзино соодветно опремување. Дополни дека работна група континуирано работела на проблемот.
77 лица приведени по протестите во Белград, Вучиќ најави нови апсења
Српскиот претседател Александар Вучиќ ги обвини студентите во блокадата во неделата дека упатиле „директен повик на граѓански судири и напади врз полицијата“ до граѓаните на крајот од протестот во Славија на 28 јуни.
На заедничка конференција со министерот за внатрешни работи Ивица Дачиќ, тој побара од надлежните обвинителства да „ја работат својата работа“ и „да не се однесуваат несоодветно и наивно“.
Тој им честиташе на полицајците „за нивното професионално однесување и нивната желба да ги победат напаѓачите со минимална употреба на сила“.
„Секако, ќе има уште многу апсења за напади врз полицијата. Ова не е крај. Се идентификуваат и други лица. Агенцијата за безбедност и информации исто така работи на ова“, рече Вучиќ.
Вишото јавно обвинителство во Белград во неделата објави дека 29 лица се приведени до 48 часа поради насилство на улиците на главниот град и напади врз полицијата по протестот на плоштадот Славија на 28 јуни.
Според соопштението, тие се приведени поради постоење основи на сомнение дека сториле кривични дела Насилно однесување на спортски настан или јавен собир и Напад врз службено лице при вршење на службена должност.
Исто така, по наредба на Првото основно јавно обвинителство во Белград, четири лица се приведени до 48 часа.
„Три лица се приведени поради постоење основи на сомнение дека вчера пред почетокот на јавниот собир нападнале полицајци, додека едно лице во алкохолизирана состојба сакало да скокне преку оградата и да нападне ученици во Пионирски парк“, соопшти Вишото јавно обвинителство.
За време на полициската интервенција по студентскиот протест на плоштадот Славија на 28 јуни, 77 лица беа приведени, а 48 полицајци беа повредени, изјави српскиот министер за внатрешни работи Ивица Дачиќ во недела, 29 јуни.
Дачиќ рече дека првите судири меѓу некои демонстранти и полицијата започнале во 21:42 часот на аголот од улиците Кнежа Милоша и Крунска.
„За време на полициската интервенција, повредени се 48 полицајци - 38 припадници на жандармеријата, двајца припадници на бригадата, седум полицајци од полициските интервентни единици и еден полицаец назначен за оперативно обезбедување“, рече Дачиќ.
Според него, еден полицаец претрпел сериозни повреди на главата.
77 лица биле однесени во полициски станици од митингот, а 38 биле приведени, рече Дачиќ.
„Против 35 лица ќе бидат поднесени кривични пријави, а против 6 лица ќе биде поднесено барање за поведување прекршочна постапка“, рече Дачиќ.
Според официјалните податоци, 22 лица се јавиле во медицински установи, од кои две со сериозни повреди.
„Едно лице е приведено, на другото му е дијагностицирана фрактура на левиот зглоб и е пуштен на домашно лекување“, рече Дачиќ.
Некои од демонстрантите и полицијата се судрија во центарот на Белград по официјалното завршување на студентскиот протест на плоштадот Славија на 28 јуни.
Полицијата објави во саботата навечер дека најмалку шест нивни полицајци и двајца граѓани се повредени во немирите.
Протестот „Се гледаме на Видовден“, според прелиминарната проценка на Архивата на јавни собири, собра 140.000 луѓе, додека Министерството за внатрешни работи излезе со проценка од 36.000.
Студентите бараат распишување предвремени парламентарни избори и отстранување на камп од центарот на градот, кој го поставија студенти кои се спротивставуваат на блокадите на факултетите организирани од студентите во знак на протест против смртта на 16 лица при уривањето на настрешница во Нови Сад во ноември 2024 година.
Во исто време, во тој камп се одржа протест од страна на поддржувачи на српскиот претседател Александар Вучиќ и луѓе кои се спротивставуваат на студентските блокади на факултетите.
Премиерот на Србија ги осуди насилните демонстрации на белградските улици
Српскиот премиер Ѓуро Мацут „остро го осуди насилството и нападите врз полицијата што се случија на улиците на Белград од страна на хулиганите по митингот на плоштадот Славија“, објави Владата рано наутро во недела.
„Србија е демократско општество во кое мислењата можат и мора да се изразуваат на мирен и цивилизиран начин, без да се загрози безбедноста на граѓаните и да се наруши јавниот ред и мир, нагласи премиерот“, рече Мацут.
Мацут им се заблагодари на припадниците на Министерството за внатрешни работи и на сите безбедносни служби кои реагираа брзо и професионално, спречија поголеми инциденти и ги заштитија граѓаните и нивниот имот.
Премиерот ги повика „сите актери да ги смират тензиите и да се однесуваат одговорно“.
„Само преку дијалог, почитување и почитување на законот можеме да најдеме решенија за сите предизвици“, нагласи Мацут.
Некои од демонстрантите и полицијата се судрија во центарот на Белград по официјалното завршување на студентскиот протест на плоштадот Славија на 28 јуни.
Полицијата објави во саботата навечер дека најмалку шест од нивните полицајци и двајца граѓани се повредени во немирите.
За време на полициската интервенција, вработени во неколку медиуми беа нападнати и повредени.
Студентскиот протест „Се гледаме на Видовден“ собра, според прелиминарна проценка на Архивата на јавни собири, 140.000 луѓе, додека Министерството за внатрешни работи излезе со проценка од 36.000.
Студентите бараат распишување предвремени парламентарни избори и отстранување на камп од центарот на градот, кој го поставија студенти кои се спротивставуваат на блокадите на факултетите организирани од студентите во знак на протест против смртта на 16 лица при уривањето на настрешница во Нови Сад во ноември 2024 година.
Во исто време, во тој камп се одржа протест од страна на поддржувачи на српскиот претседател Александар Вучиќ и луѓе кои се спротивставуваат на студентските блокади на факултетите.
Франција забранува пушење на плажи, паркови и автобуски станици
Франција го забранува пушењето на плажи, паркови, јавни плоштади и автобуски станици од недела, соопшти владата.
Уредбата, објавена во Службениот весник во сабота, ќе го забрани и пушењето надвор од библиотеките, училиштата и базените, а има за цел да ги заштити децата од пасивното пушење.
Уредбата не ги споменува електронските цигари, а оние што ќе ја прекршат забраната се соочуваат со казна од 135 евра.
„Тутунот мора да исчезне од местата каде што има деца“, изјави министерката за здравство и семејство, Катрин Вотрен, во мај, наведувајќи го „правото на децата да дишат чист воздух“.
Баровите и кафулињата се ослободени од забраната.
Според француските власти, 75.000 луѓе умираат секоја година во земјата од компликации поврзани со тутунот.
Според неодамнешна анкета, шест од 10 Французи, односно околу 62 насто ја поддржуваат забраната за пушење на јавни места.
Институциите да побрзаат со постапките за „Пулс“, порачаа родителите на „Маршот за ангелите“
Родителите на загинатите во пожарот во клубот „Пулс“ на денешниот „Марш за ангелите“ во Кочани побараа институциите да побрзаат со постапките против осомничените за трагедијата. Порачаа дека нивните деца заслужуваат правда и не сакаат ова да биде уште една трагедија што ќе остане заглавена во административните архиви.
Колоната на единаесеттиот протестен марш, што почна во 18 часот и 5 минути, ја мина вообичаената маршрута од Паркот на Револуцијата, низ Трговскиот центар, кон зградата на Општина Кочани. Со свирежи и гласни извици пред Полициската станица и пред Основниот суд и Јавното обвинителство во Кочани, родителите го искажаа незадоволството од текот на постапката.
„Одговорните во институциите да ја сфатат нашата неизмерна загуба со која живееме секој ден и да постапат побрзо. Сите докази веќе им се во рацете, снимките, нашите сведоштва, сѐ што видовме со свои очи таа кобна вечер. Зошто сѐ уште нема одговорност, до кога ќе чекаме одговор од ОЈО ГОК? Тие имаат толку многу докази од сведоци, од нас директно како сведоци и од камерите за видеонадзор. Тоа се докази кои водат до одговорност на Министерството за внатрешни работи и на институциите кои требаше да се грижат за јавниот ред и мир и за безбедноста“, истакнаа родителите на собирот пред Јавното обвинителство.
Родителите побараа одговорност од полицијата и од обезбедувањето во „Пулс“ за кои, како што рекоа, не реагирале навреме, но и одговорност поради, според нив, за недоволната подготвеност на противпожарните екипи и несоодветната опременост и недоволниот персонал во болницата во Кочани.
Како одговор на обвинувањата на социјалните мрежи родителите рекоа дека нивните реакции не се под влијание на ниту една политичка партија, со забелешка дека никој од лидерите на партиите од власта и од опозицијата досега не дошол за да им изрази сочувство.
Родителите на починатите ги отфрлија и обвинувањата дека тие се одговорни за трагедијата со тоа што им дозволиле на децата да одат во „Пулс“.
Во руски напад во Одеса загинаа две лица
Брачна двојка е убиена за време на рускиот напад врз Одеса, соопштија локалните власти, додека украинската безбедносна служба објави дека уништила руски хеликоптери и противвоздушен ракетен систем во окупираниот Крим.
„Во нападот врз облакодерот во кој беше убиен брачен пар, најмалку десет лица беа ранети“, соопштија украинските власти.
Според службите за итни случаи на Украина, нападот со беспилотно летало предизвикал пожар на три ката од зградата, заробувајќи ги луѓето во становите.
„Уништени домови, исплашени деца, човечко страдање. Ова се последиците од уште еден непријателски напад“, рече градоначалникот на Одеса, Генадиј Труханов, на Телеграм.
Олех Кипер, шефот на воената администрација на регионот Одеса, изјави дека бројот на повредени се искачил на 14, меѓу кои и три деца.
„Нашите лекари прават сè што е можно за да спасат секој живот“, додаде Кипер.
Руската страна сè уште не го коментираше нападот. Наместо тоа, руското Министерство за одбрана соопшти дека повеќе од 40 украински беспилотни летала биле соборени преку ноќ над западните руски региони, како и над окупираниот Крим.
Безбедносната служба на Украина (СБУ) објави дека три борбени хеликоптери и еден противвоздушен ракетен систем биле уништени кога нивните беспилотни летала го погодиле воениот аеродром Кировск на Кримскиот полуостров.
Не беше можно независно да се потврди ова тврдење, но локалните канали на Телеграм објавија дека во областа се слушнале експлозии во текот на ноќта.
Обраќајќи се на прес-конференција во Минск еден ден претходно, рускиот претседател Владимир Путин рече дека руските и украинските предлози за мир се „апсолутно контрадикторни“. Тој, исто така, го осуди како „агресивно“ неодамнешното ветување на членките на НАТО за зголемување на трошоците за одбрана.
На 27 јуни, американскиот претседател Доналд Трамп изрази надеж дека војната на Русија во Украина ќе биде „решена“, осврнувајќи се на неговиот неодамнешен разговор со Путин.
„Работиме на тоа. Претседателот Путин се јави и рече: Би сакал да ви помогнам со Иран. Реков: направете ми услуга: ќе се погрижам за Иран. Помогнете ми со Русија. Мораме да го решиме тоа. И мислам дека нешто ќе се случи таму“, им рече Трамп на новинарите во Белата куќа.
Русија продолжи со нападите врз Украина во последните месеци и покрај напорите на САД да посредуваат во постигнување мировен договор.
По две рунди преговори во Истанбул минатиот месец, немаше видлив напредок освен размена на затвореници и останките на убиените во војната.
Полицијата приведе 17 лица за време на прославите на Видовден во Газиместан
Косовската полиција објави дека 17 лица се приведени на испрашување за „поттикнување омраза“ и „носење провокативна и провокативна облека“ за време на прославата на Видовден во Газиместан.
„Сите полициски акции беа спроведени во соработка и координација со судските органи, според чија одлука еден осомничен е приведен поради основано сомнение за кривично дело нелегално поседување оружје, друг е обвинет за прекршок, четворица се ослободени, додека уште 11 се под истрага“, се вели во соопштението.
Во Газиместан, кој се наоѓа на околу десет километри од Приштина, Срби од Косово, како и од Србија и земјите од регионот, се собраа за да го прослават Видовден, празник што ја одбележува битката против турската војска на Косово во 1389 година.
Косовската полиција заклучи дека немало поголеми инциденти благодарение на превентивните и оперативните мерки преземени од сите полициски оддели.
Српската листа претходно објави дека косовската полиција привела повеќе од 15 Срби за носење на српското знаме или за носење „историски симболи“ на нивните маички.
Српската листа во соопштението наведува дека официјална Приштина денес покажала дека „не ги почитува верските и граѓанските права на српскиот народ“.
Тие додадоа дека вршителот на должноста премиер на Косово, Албин Курти, ја „инструментализирал“ полицијата и дека целта била „да се заплашат и да се справат со Србите“.
„Српската листа предупредува дека меѓународната заедница повеќе не може да остане тивок набљудувач на прогонот на еден народ. Молчењето за ваквите дејствија значи соучество во систематското угнетување на Србите во Косово и Метохија“, се наведува во соопштението.
Свети Видовден традиционално го слави и Српската православна црква, која исто така одржува верски обреди, како знак на сеќавање на војниците кои загинаа во она што е познато како Битката на Косово.
Во областите каде што се одржа настанот имаше големо полициско присуство, вклучувајќи ги и припадниците на Специјалната единица на косовската полиција. Присутни беа и членови на Инспекторатот.
Овогодинешната прослава на Видовден помина без поголеми инциденти.
Претходно, членот на Српската демократија, Стефан Вељковиќ, беше приведен затоа што одбил да соблече маица со ликот на лидерот на партијата, Александар Арсенијевиќ.
Арсенијевиќ, на чиј имот беше пронајдено оружјето, не е во Косово, а косовскиот министер за внатрешни работи, Ѓељаљ Свечља, рече дека ќе биде уапсен кога ќе влезе во Косово. Арсенијевиќ негираше дека пронајденото оружје е негово, тврдејќи дека му било „поставено“.
Некои членови на Српската листа беа присутни и на Газиместан, вклучувајќи го и Славко Симиќ.
Во претходните неколку години, оваа водечка партија на косовските Срби не доаѓаше на прославите на Видовден на Газиместан, туку само присуствуваше на литургијата во манастирот Грачаница.
На почетокот на јуни оваа година, Основниот суд во Приштина ја поништи минатогодишната одлука на општина Грачаница да дозволи истакнување на српското знаме по повод Видовден. Судот изјави дека општината, која има мнозинско српско население, ги пречекорила своите овластувања и постапила спротивно на косовските закони, бидејќи Видовден не е официјален празник.
Сепак, српски знамиња може да се видат како висат низ цела Грачаница, но и пред зградата на општината, по повод Видовден.
Вршителот на должноста министер во владата, Ненад Рашиќ, изјави дека истакнувањето на симболот на српската заедница „не претставува закана за ничиј идентитет, туку потврда за Косово како демократско општество засновано на почитување на човековите и малцинските права“.
Српската листа реагираше на оваа одлука, оценувајќи дека истото треба да се направи кога се истакнуваат албански знамиња во Косово.
Вршителот на должноста премиер на Косово, Албин Курти, изјави во пресрет на Видовден дека, според проценките на безбедносните и разузнавачките служби, постои намера на Србија да предизвика инциденти и дека во оваа пригода групи Срби од Србија, Црна Гора и Босна и Херцеговина се организирале да дојдат на Косово.
„Таквите групи традиционално биле провокативни, носејќи српски и руски националистички симболи кои се спротивни на Уставот на Косово, а исто така се против демократските и европските вредности“, рече Курти.
Од друга страна, директорот на Канцеларијата за Косово во српската влада, Петар Петковиќ, оцени дека обвинувањата на Курти против Србија се „луди и неосновани“ и изјави дека косовскиот премиер всушност сака да „создаде алиби за сопствените репресивни планови што сака да ги спроведе“.
Газиместан на Косово е познат и по говорот што тогашниот српски претседател Слободан Милошевиќ го одржа таму во 1989 година. Овој говор често се наведува како еден од воведите во вооружените конфликти што следеа за време на распадот на поранешна Југославија.
ДПИ: Цените во малопродажба зголемени до 5 насто, во големопродажбата се враќаат на старо
Директорот на Државниот пазарен инспекторат Влатко Стојкоски денеска на прес-конференција во Владата информираше дека има одредено зголемување на цените во малопродажба, додека во големопродажба цените се вратени на ниво како пред одлуките за ограничување на маржите и замрзнување на цените што завршија на 30 април годинава.
„Има одредени зголемувања на цените на пазарите во малопродажба, додека во големопродажба начелно цените се вратени како пред одлуката. Има одредени зголемувања од три до пет проценти кај производите со најголем обрт, додека кај оние со помал обрт како производи за лична хигиена, бебешка храна, пелени се движат од 10 до 20 проценти. Забележани се намалувања од 20 до 100 проценти кај зеленчукот и овошјето“, рече Стојкоски.
Анализата од ДПИ пред 10-тина дена е доставена до Министерството за економија и труд и таа се темели на извршена контрола направена кај трговците на мало и трговците на големо со која биле опфатени повеќе од 100 субјекти или над 1000 продажни места.
Според Стојкоски, се работи за обемна анализа што треба да биде разгледана по што ќе се произнесе Министерството за економија.
Димитриеска-Кочоска: Досега нема понуди за брзата пруга од Коридорот 10, рокот продолжен до 7 јули
До овој момент нема пристигнато понуда за изградба на брзата пруга од Коридорот 10 бидејќи целиот проект е комплексен и на банките им треба време да може да ги анализираат сите работи, изјави денеска министерката за финансии Гордана Димитриеска-Кочоска.
На прес-конференција во Владата, каде даде отчет за сработеното во првата година од Владата, министерката рече дека рокот за достава на понудите е 7 јули кога ќе се знаат повеќе детали.
„Интересот е многу голем. Ние пуштивме барање за понуда до 22 институции, а дополнително ни се јавија уште две кои побараа да пуштиме понуди до нив. Нормално дека во интерес на државата треба да обезбедиме понуди и што е можно пониска цена за железничката пруга така што пуштивме дополнително барање и до тие две институции. Има многу прашања и заради тоа го продолживме рокот до 7 јули. Станува збор за комплексен проект и мора да ги разбереме и банките дека имаат потреба од појаснувања. Во постојана комуникација сме“, истакна Димитриеска-Кочоска.
Министервото за финансии има испратено барање за понуди до 24 банки за изградба на брзата пруга долж Коридорот 10.
ЗНАМ до средината на јули ќе ги објави кандидатите за градоначалници
Претседателот на Движењето ЗНАМ и актуелен градоначалник на Куманово, Максим Димитриевски денеска во изјава за медиумите истакна дека до средината на јули неговата партија ќе ги обелодени кандидатите за градоначалници, а во општините каде нема да имаат кандидат, ќе го поддржат ВМРО-ДПМНЕ.
„ЗНАМ на овие избори ќе учествува со кандидатски листи за советници самостојно како нов политички субјект. И тоа е добро за нас, да се провериме каде сме и како е нашата доверба. И дополнително со свои кандидати за градоначалници во сите оние општини кои ќе излезат како резултат на преговорите со нашите политички партнери, а тоа во овој случај е ВМРО-ДПМНЕ и коалицијата кои тие ја предводат. Сметам дека веќе до средината на јули ќе се знае епилогот од тие преговори. Разговараме за поголем број на општини кои не се концентрирани во една изборна единица или во еден регион, туку пошироко низ државата и штом ќе заврши тој разговор, би ги обелодениле резултатите“, рече Димитриевски.
Тој соопшти дека на местата каде ЗНАМ ќе има свои кандидати за градоначалници, ВМРО-ДПМНЕ ќе преземаат обврска да го поддржат нивниот кандидат уште во првиот круг и обратно.
“Овде зборуваме исклучиво за кандидати кои се квалитетни луѓе, докажани во својата сфера на делување и познати во јавноста. За имињата ќе разговараме дури откако ќе заврши епилогот на преговорите со нашите политички партнери“, рече Димитриевски.
Актуелниот кумановски градоначалник нагласи дека би поддржале кандидат на ВМРО-ДПМНЕ за градоначалник на Градот Скопје. Потенцира дека тоа зависи и од името на кандидатот за градоначалник и од политичкиот договор на партијата.
„Да, апсолутно. Првенствено, зависи од името и презимето на кандидатот и секако од политичкиот договор на партијата. Спецификата на локалните избори секогаш е граѓаните колку и да се политички определни, сепак кога се работи за градоначалник, секогаш се одлучуваат спрема личноста многу повеќе отколку кон политичкиот субјект кој го предлага. Но, во секој случај сепак политичката поддршка многу значи во самата кампања, рече Димитриевски.
ЗНАМ денеска одржа панел дискусија „Посветеност – Отчетност – Резултат“ по повод одбележувањето една година учество во Владата.
Мултимедија
Најпосетени
Што треба да знаете