Основниот кривичен суд Скопје дозволи повторување на судската постапка за приведениот поранешен прв цариник Драган Даравелски. Даравелски беше осуден со правосилна пресуда во мај 2007 година на 7 години затвор за злоупотреба на службената положба и овластувања. Пресудата беше потврдена и од Апелациониот суд Скопје во март 2008 година, по што стана правосилна, но Даравелски не заврши во затвор зашто беше во бегство.

Судот соопшти дека по разгледување на барањето на одбраната на Даравелски, ги разгледал судските списи и донел решение со кое барањето го третира како основано, а причина за тоа е што на осудениот му се судело во отсуство.

Скопското обвинителство се жалелно, но Апелација ја потврдила одлуката на судот за која денеска ќе биде известен и затворот Идризово.

На 10 јануари, тој беше приведен на граничниот премин Табановце, на влез во Македонија, по што беше однесен во затворот Идризово.

Видете и ова:

Основен суд Куманово: нема застареност за извршување на казната за Даравелски

Од судот велат дека кривичната постапка против обвинетиот Драган Даравелски не е запрена односно со конкретното решение се дозволува повторување на постапката и ќе биде оформен нов предмет кој ќе биде распределен на понатамошно постапување.

Даравелски беше осуден со правосилна судска пресуда за проневера на 2,5 милиони евра, додека беше директор на Царинската управа, во време кога премиер беше Љубчо Георгиевски, меѓу 1998 и 2002 година. Веднаш по промената на власта започна истрага против него и беа поднесени повеќе кривични пријави за злоупотреба на службената должност и овластување, при што беше отворена истражна постапка.

Тој во меѓувреме замина за Србија, па беше осуден во отсуство на 7 години затвор и беше наредена конфискација на негов имот во вредност на штетата што ја направил на државата.

Во 2016 година Даравелски помина извесно време во екстрадициски притвор во Белград, но во меѓувреме стана државјанин на Србија и не беше испорачан во Македонија.

Доживотен затвор за четворица обвинети побараа обвинителките од скопското јавно обвинителство во завршните зборови на судењето за убиството на Вања Ѓорчевска и Панче Жежовски. Тоа е максимална казна која ја бараат од судот за обвинетите Љупчо Палевски, Влатко Кешишев, Боре Видевски и Велибор Манев, додека за таткото на Вања, обвинетиот Александар Ѓорчевски побараа судот да му ја одреди соодветната затворска казна.

Како што посочи обвинителката Ана Стојковиќ Димитровска, исказите на обвинетите дадени пред Обвинителството не се совпаѓаат со исказите дадени пред судот, ниту пак, како што рече, се совпаѓаат со изведените докази. Според неа, не е нужно да се утврди мотивот за убиството, туку, како што рече, тој е субјективен однос на злосторникот кон делото.

„Отсуството на мотив не е причина некој да не биде осуден. Казната според Кривичниот законик е од 10 години до доживотен. Нема олеснителни околности за обвинетите. Сите се во зрела возраст, сите се родители, сакале да се и политички фактор. Дополнително ги трауматизираат фамилијата и јавноста со нивните негирања на доказите и со манипулациите. За сите четворица Јавното обвинителство бара доживотен затвор. Одземање живот на дете не се толерира“, посочи обвинителката.

Видете и ова:

Стан не е причина да се убие дете, тврдат адвокатите за убиството на девојчето Вања

За таткото на Вања, Александар Ѓорчевски, обвинителката рече:

„Нема потешка казна од загуба на дете и од живот со таква совест како во случајов на таткото на Вања, обвинетиот Александар Ѓорчевски. Не тврдиме дека сакал да му го убијат детето, но учествувал во киднапирањето на ќерка си и бараме соодветна казна за тоа”.

Стојковиќ Димитровска за првообвинетиот Палевски, нагласи дека ја водел целата операција, креирал алиби и уништувал докази. Според Обвинителството снимките и другите докази, ја утврдуваат неговата вина.

„Тврдеше дека снимките од пред куќата во мај е од друг период, мај 2023, но тие го немале возилото „рено кангу“ пред септември 2023. Палевски за себе се обидувал да создаде алиби. За 22 ноември се обиде алиби да му биде Ерол Османи, дека му го поправал котелот, но Османи тврди друго. За 27 ноември нема алиби, тврди дека бил во банка, но тоа е после 11 часот, а детето е убиено пред 9. Тврдеше дека нема податоци од базните станици за неговиот телефон, но тие постојат и не му одат во прилог. За време на злосторот носеле радиостаници. Сите обвинети имаат повици после 11 часот, рече обвинителката.

За Велибор Манев нагласи дека обвинетиот тврдел дека сакале да го грабнат Панче, но не и да го убијат, како и дека Вања била грабната по грешка, но, како што рече, и двете тврдења се неосновани.

Видете и ова:

Обвинителката Крстевска: Сите наводи на Палевски се неосновани

Додаде дека исказот во Обвинителството даден од страна на обвинетиот Боре Видевски се совпаѓа со исказот на останатите обвинети. Вели неговата одбрана се состои од негирање пред судот иако претходно ги признал делата што му се ставаат на товар во исказот даден пред Јавното обвинителство.

За обвинетиот Влатко Кешишев рече дека тој се обидел да се прикаже само како послушник на првообвинетиот Љупчо Палевски и дека не бил соизвршител, но, според обвинителката, од доказите произлегува дека е соизвршител, бидејќи копал дупка, вршел обиколка околу куќата на Манев, ги закопувал убиените, носел радиостаница, како и ги возел обвинетите.

Ова е второ рочиште како обвинителството ги дава своите завршни зборови за грабнувањето и убиството на Панче Жежовски од Велес и на 14-годишната Вања Ѓорчевска од Скопје. Жежовски беше убиен на 22 ноември 2023 година а Вања 5 дена подоцна.

Мајката на Вања, Зорица Ѓорчевска, преку адвокатот кој ја застапува рече дека се согласува со кривичниот прогон, на обвинетите како и за поранешниот сопруг Александар, таткото на нејзиното убиено дете.

„Кога ќе слушневме за вакви брутални убиства на деца, на моите девојчиња им велев: Ова кај нас не се случува. Но, ми се случи мене. Го убија моето дете. Го испратив на училиште, по една недела ја дочекав во мртовечки сандак. Ова повеќе не смее да се повтори”, прочита адвокатката писмо од Зорица.

Кон кривичниот прогон се придружија и ќерките на Жежовски.

Судењето ќе продолжи со завршни зборови на одбраната, по што судот ќе треба да ја донесе и објави пресудата.

Министерката за образование и наука Весна Јаневска изјави дека наредната учебна година ќе има учебници за секое дете и оти дотогаш ќе се надминат одредени недоразбирања што постојат на релации министерство-општини-училишта.

„Очигледно има некакви недоразбирања меѓу раководствата на училиштата, па и меѓу некои општини и централната власт. Учебници треба да има за секое дете. Министерството ќе обезбеди учебник за секое дете. Постојат нeкои недоразбирања каде што се бара учебници кои реално ги нема и реално нема ни учебници затоа што училиштата не ги побарале од министерството. Оваа година сериозно ќе се потрудиме тој предизвик да го надминеме“, истакна Јаневска на последниот ден од учебната година и по повод завршената реконструкција на ОУ „Андреја Савески - Ќиќиш“ во Тетово.

Проблемот со немање нови учебници се повторува на почетокот на секоја учебна година. Учебниците или не се секаде навреме доставени, или пак дел од тие што се доставени се стари и речиси неупотребливи.

Учебниците се печатат во тираж кој пред почетокот на учебната година, секое училиште го пријавува преку посебна електронска апликација на МОН, зависно од потребите како што е зголемен број на ученици или оштетени учебници.

Видете и ова:

Продолжува расправата за концепцијата за гимназиско образование, средношколците ќе имаат нови учебници

На прашање до кога ќе се чекаат одредени реконструкции или нови згради за училишта низ државата, Јаневска посочи дека новата влада постојано вложува во инфраструктурата, но оцени дека за една година може да се направат само определени работи.

Министерката информираше дека со 32 000 000 евра се инвестира во повеќе инфраструктурни проекти и дека во моментов се градат седум училишни згради, 20 училишта се реновираат, а во тек е изградба на четири спортски сали и реконструкција на два студентски дома.

Неколку лица биле убиени во пукотница што се случила денеска (10 јуни) во средно училиште во австрискиот град Грац.

Според таблоидот „Кронен цајтунг“, убиени се десет лица, вклучувајќи 7 ученици. Во извештајот се наведува дека неколку лица се повредени.

Повикувајќи се на полицијата, државната медиумска служба ОРФ објави дека неколку лица се тешко повредени, вклучувајќи ученици и наставници, и дека се верува дека нападот го извршил ученик кој подоцна извршил самоубиство.

ОРФ додава дека евакуацијата на училиштето е во тек.

Полицијата претходно потврди дека е во тек операција на улицата каде што се наоѓа средното училиште, но не даде дополнителни коментари за инцидентот.

Управата за финансиска полиција до Основното јавно обвинителство Кавадарци поднела кривична пријава против С.Н. во својство на градоначалник на Општина Росоман.

Како што соопштија од Финансиската полиција, пријавениот С.Н. во својство на градоначалник на Општина Росоман, во текот на 2022 и 2023 година постапил спротивно на Закон за градење чл. 58 став 2, а во врска со член 205 став 1 и чл. 209 од Закон за општа управна постапка, на начин што изготвил 6 лажни јавни исправи, од кои 4 одобренија за градење и 2 одобренија за реконструкција на улици.

„Истите во текот на 2022 и 2023 година ги употребил како вистински во правниот промет, а при тоа иако бил должен не ги водел во јавната евиденција, односно, во информацискиот систем „е-Одобрение за градење“, на кој начин за период од 2022 до 2024 година искористени се парични средства во износ од 14.023.318 денари обезбедени од страна на Центар за развој на Вардарски плански регион - Биро за регионален развој, парични средства во износ од 6.740.517 денари обезбедени од страна на општина Росоман и парични средства во износ од 15.134.066 денари обезбедени од страна на Министерство за транспорт, на кој начин спротивно на законските прописи за период од 2022 до 2024 година со изготвување на 6 лажни јавни исправи, одобренија за градење и реконструкции на штета на буџетот на општина Росоман, Центар за развој на Вардарски плански регион - Биро за регионален развој и Министерство за транспорт противзаконски искористени се парични средства во вкупен износ од 35.897.901 денари со што пријавениот го сторил кривичното дело фалсификување исправа чл. 378 став 1 и 3, а во врска со член 45 од КЗ на РСМ“, се наведува во соопштението од Управата.

Видете и ова:

Струшкиот градоначалник Мерко доби ослободителна пресуда за набавката на службениот автомобил

Истао така, се додава дека пријавениот свесно и со намера да се стекне со противправна имотна корист во својство на градоначалник на Општина Росоман од 08.11.2021 година, ги надминал предвидените износи во Буџетот на општина за трошоци за репрезентација донесени од страна на Совет на општина Росоман, ги надминал и ненаменски искористил дел од предвидените износи во Буџетот на општина за трошоци за горива и масла (моторни возила) донесени од страна на Совет на општина Росоман, потпишувајќи и овозможувајќи од сметката на општина Росоман да се исплатат парични средства за нафтени деривати за возила кои не се во сопственост на општината.

Тој ги надминал и ненаменски искористил дел од предвидените износи во Буџетот на општина за трошоци за прехранбени производи и пијалаци донесени од страна на Совет на општина Росоман набавувајќи производи кои не се за потребите на општината, односно, купени биле повеќе видови на млечни и сувомеснати производи, поголеми количини на алкохолни пијалаци и друг вид на производи кои по својата природа се наменети за домашна потрошувачка кошничка.

Шведската активистка Грета Тунберг е депортирана од Израел, заедно со еден од шесте француски активисти, кои биле патници на хуманитарен брод што пловел кон Појасот Газа сè додека не бил уапсен од израелските власти, објави во вторник (10 јуни) францускиот министер за надворешни работи Жан-Ноел Баро.

„Еден од нашите сонародници потпиша израелски формулар со кој прифаќа депортација без да чека одлука на судството. Неговото враќање во Франција се очекува денес. Другите петмина одбија, а нивната можна депортација ќе се случи по одлуката на израелски судија во наредните денови“, рече францускиот министер на маргините на конференцијата за заштита на океанот во Ница.

Министерот не го откри идентитетот на францускиот државјанин кој ќе се врати во земјата во вторник.

На едрилицата „Мадлин“, која исплови од Сицилија на 1 јуни, патуваа 12 лица, меѓу кои и шведската активистка за климатски промени Грета Тунберг и француската европратеничка Рима Хасан.

Тунберг и другите активисти беа однесени на аеродромот во Тел Авив пред да бидат депортирани, соопшти израелското Министерство за надворешни работи.

Бродот бил однесен во израелското пристаниште Ашдод, објави Ројтерс.

„Се очекува дека дел од патниците на „селфи јахтата“ ќе го напуштат Израел во наредните часови. Оние кои ќе одбијат да потпишат документи за депортација и да ја напуштат земјата ќе бидат изведени пред судија, во согласност со израелскиот закон, за да ја одобри нивната депортација“, информира министерството.

Видете и ова:

ОН: Израел ги игнорира „фундаменталните принципи на човештвото“ во Газа

Активистите беа посетени на аеродромот од дипломатски претставници на нивните земји, додаде израелското министерство.

Целта на Мадлин беше да им донесе хуманитарна помош на Палестинците и да ја прекине израелската блокада на таа палестинска територија, која, според Обединетите нации, е загрозена од глад.

Тоа беше втор обид на организацијата „Флота на слободата“ да го испрати својот брод во Газа.

На почетокот на мај, бродот „Совест“ го запре своето патување кон енклавата откако беше погоден од два дрона во близина на малтешките територијални води, објави Ројтерс.

Мадлин се обидела да донесе овошни сокови, млеко, ориз, конзервирана храна и протеински плочки во Газа, донации од стотици граѓани на сицилијанскиот град Катанија, изјави претходно новинарката Андреа Легни, една од патниците на бродот.

Во нападот со руски беспилотни летала врз украинскиот град Одеса, погодени се медицински установи и станбени згради, а еден 59-годишен маж е убиен, додека четири лица се повредени, објави на Телеграм Олег Кипер, гувернер на Одесската област.

„Исто така, цел на нападот беше и породилиштето“, додаде Кипер.

Во главниот град на Украина, службите за итни случаи интервенираа во четири градски области неколку часа по полноќ, објави градоначалникот на Киев, Виталиј Кличко, на Телеграм.

Москва изјави дека тоа е одмазда за неодамнешните украински напади врз руска територија.

Претседателот Володимир Зеленски повика на акција „а не на молк од светот“ за да се стави крај на повеќе од тригодишната војна.

„Од суштинско значење е одговорот на овој и други слични руски напади да не биде молчење од светот, туку конкретна акција. Акција од Америка, која има моќ да ја принуди Русија на мир. Акција од Европа, која нема друга алтернатива освен да биде силна. Акција од другите ширум светот кои повикаа на дипломатија и крај на војната - и кои Русија ги игнорираше. Мора да има силен притисок заради мирот“, напиша Зеленски на социјалните мрежи.

Нападите се случија откако украинските сили извршија таен напад со беспилотни летала наречен „Операција Пајажина“ на 1 јуни против руски воени бази длабоко во Русија.

Видете и ова:

Русите го нападнаа Киев со бараж од ракети и беспилотни летала, загинаа 4 лица, а 20 се повредени

По тој напад, американскиот претседател Доналд Трамп го повика рускиот претседател Владимир Путин и му рече дека Путин ветил многу силен одговор на нападите.

За време на руските напади рано наутро во вторник, сирените за воздушен напад беа активирани во поголемиот дел од Украина, вклучувајќи ги и регионите Донецк, Луганск и Харкив.

Шефот на воената администрација на Киев, Тимур Ткаченко, изјави дека нападите врз различни населби биле извршени истовремено.

Остатоците од соборените проектили паднале врз неколку згради низ градот, а пожари избувнале и во станбена зграда и магацини, додаде тој.

Видете и ова:

Русија и Украина разменија заробеници по најголемиот напад со дронови од почетокот на војната

Во Одеса, според гувернерот Кипер, пациентите и персоналот успеале да ја евакуираат медицинската станица и породилното одделение, додека некои амбулантни возила биле оштетени.

Повредените добиваат медицинска помош, рече Кипер. Починатиот 59-годишен маж сè уште не е јавно идентификуван.

Нападот се случи еден ден по почетокот на размената на воени заробеници, во која ќе бидат вратени тешко ранети и болни затвореници, лица под 25 години, како и телата на 12000 мртви војници.

Украинскиот претседател Володимир Зеленски рече дека размената ќе се одвива во неколку фази, опишувајќи го како сложен процес со многу чувствителни детали.

Рускиот претседател Владимир Путин ја започна целосната инвазија на Украина во 2022 година.

Русија и Украина разменија воени заробеници по најмасовниот руски напад со дронови од почетокот на војната, извршен пред два дена.

Според украинските воздухопловни сили, Русија истрелала 479 дронови и 20 ракети од различни типови кон централните и западните делови на Украина. Од нив, 277 дронови и 19 ракети биле пресретнати и уништени, а само 10 погодиле цели, при што едно лице било повредено.

Ескалацијата на воздушните напади доаѓа во време на засилен руски притисок на бојното поле долж 1000-километровата линија на фронтот во источна и североисточна Украина.

Претседателот Володимир Зеленски изјави дека ситуацијата во некои од овие области е „многу тешка“, без да даде детали.

Украина се соочува со недостиг на војници и потреба од поголема западна воена поддршка, особено за противвоздушна одбрана, но неизвесноста околу политиката на САД предизвикува загриженост за идната помош.

И покрај неуспехот во преговорите за прекин на огнот, двете страни разменија групи воени заробеници, вклучувајќи ранети војници и млади под 25 години. Зеленски и руското Министерство на одбраната потврдија дека размената е дел од етапен процес кој ќе продолжи во наредните денови, без да прецизираат бројки.

„Процесот е сложен, со многу чувствителни детали, а преговорите се водат речиси секој ден“, нагласи Зеленски.

Видете и ова:

Русија истрела рекордни 479 дронови кон Украина

Рускиот преговарач Владимир Медински потврди дека Русија започнала враќање на своите заробени војници во рамките на истанбулските договори.

„Некои се млади, но не се прекршиле и издржале до крај. Русија не ги напушта своите“, напиша тој на Телеграм, ветувајќи продолжување на напорите за ослободување на заробениците.

Украина неодамна изведе значајни контранапади, вклучувајќи го нападот со дронови на 1 јуни врз руски воени бази, меѓу кои и аеродромот Саваслејка во Нижни Новгород, на 650 км од украинската граница.

Украинскиот Генералштаб тврди дека биле погодени два руски борбени авиони, но руските власти не го коментираа нападот, а некои руски воени блогери тврдат дека авионите не биле оштетени. Од друга страна, руското Министерство на одбраната изјави дека нападите, вклучувајќи го оној врз украинската база во Дубно, се одговор на украинските напади врз руски аеродроми каде се наоѓале стратешки бомбардери.

Нема драстично зголемување на цените на основните прехранбени производи, рече денеска (9 јуни) министерот за економија Бесар Дурмиши. Тој за ова бил усно информиран од директорот на Државниот пазарен инспекторат Влатко Стојкоски, но утре, како што изјави, Владата ќе го добие и официјалниот извештај за спроведените инспекциски контроли во текот на мај.

Според Дурмиши, поскапувања има само кај сезонски производи кои не спаѓаат во делот на основните прехранбени.

„Утре ќе биде доставена до Влада информацијата за вонредните контроли во мај. Ќе не известат точно како се движеле цените по завршување на мерката. Од она што знам засега, нема драстично зголемување на цените, само на производи кои се сезонски, но тие не спаѓаат во делот на прехранбените основни производи. Од она што усно ме информираше директорт на ДПИ, немаме драстично зголемување на цените на основните прехранбени производи“, истакна министерот.

Видете и ова:

Истекува мерката за ограничени маржи на дел од производите

Дурмиши информира дека утре ќе биде доставен и извештајот за тоа колку трговците ја почитуваат одлуката за транспарентност и објавување на цените на производите на нивните веб страници.

Владината мерка за ограничување на бруто-профитните маржи за над 1 000 прехранбени и непрехранбени производи во трговијата на мало и големо заврши на 30 април. Одлуката беше донесена во февруари годинава.

Маркетите, аптеките и продавниците за техника и мебел од (18 април) ги објавуваат цените на своите производи на нивните официјални веб-страници, што е нивна обврска согласно измените на Законот за заштита на потрошувачи. Како што е наведено во Правилникот, трговците треба да ги ажурираат цените на стоките на дневна основа, односно секој работен ден до 10 часот, а во случај на ненамерна техничка грешка во ажурирањето на цените на стоките, трговецот треба да ја корегира грешката во рок од 24 часа.

Шефот на Меѓународната агенција за атомска енергија (МААЕ), Рафаел Гроси ги повика Иран и САД да најдат „дипломатско решение“ во разговорите за нуклеарната програма на Техеран, на состанокот на ова надзорно тело.

Се очекува состанокот на одборот на гувернери на МААЕ да слушне и да гласа за резолуција со која ќе се утврди дека Техеран не ги почитува нејзините заштитни мерки, за прв пат по 20 години.

Иран вети дека ќе преземе силни мерки против западните земји кои ја промовираат резолуцијата на собирот во австриската престолнина, а Бехруз Камалванди од иранската агенција за атомска енергија рече дека МААЕ „не треба да очекува Исламската Република Иран да продолжи со својата широка и пријателска соработка“ ако мерката биде одобрена.

Зборувајќи на почетокот на состанокот во Виена на 9 јуни, Рафаел Гроси рече дека е „убеден дека единствениот пат напред е преку дипломатско решение“.

„Во текот на изминатите месеци, тесно и интензивно соработував со Исламската Република Иран и Соединетите Држави, преку активни консултации, во поддршка на нивните билатерални преговори за постигнување на меѓусебно прифатлив договор што ја гарантира мирната природа на нуклеарната програма на Иран“, додаде Гроси.

Во објава од 6 јуни на платформата X, иранскиот министер за надворешни работи, Абас Аракчи, ги критикуваше Велика Британија, Франција и Германија - колективно познати како E3 - за „лажно обвинување на Иран“ за кршење на своите обврски и тврдеше дека потегот бил „дизајниран да предизвика криза“.

„Запомнете ги моите зборови додека Европа размислува за уште една голема стратешка грешка: Иран ќе реагира силно против секое кршење на неговите права. Вината лежи единствено и целосно кај неодговорните актери кои не запираат пред ништо за да добијат релевантност“, предупреди Аракчи.

Видете и ова:

Иран или САД - кој прв ќе се повлече од нуклеарните црвени линии?

Нацрт-резолуција подготвена од E3 и поддржана од САД беше споделена на 5 јуни со 35-те членови на Одборот на гувернери на МААЕ, кој ќе се состанува до 13 јуни.

Во својот последен квартален извештај, МААЕ соопшти дека Иран нагло го зголемил производството на високо збогатен ураниум, складирајќи 408,6 килограми збогатен на 60 проценти - во споредба со нешто помалку од 275 килограми во февруари.

Агенцијата, исто така, го критикуваше Иран за лоша соработка, особено за неговиот неуспех да објасни нуклеарни траги откриени на непријавени локации.

Иако збогатувањето од 60 проценти е под прагот од 90 проценти потребен за материјал за оружје, тоа далеку го надминува ограничувањето од 3,67 проценти утврдено со меѓународниот нуклеарен договор од 2015 година, од кој американскиот претседател Доналд Трамп излезе во 2018 година за време на неговиот прв мандат. Трамп се врати на претседателската функција во јануари.

Ова доаѓа во време кога Трамп се обидува да склучи договор со Иран за да ги ограничи неговите нуклеарни активности.

Вашингтон и Техеран одржаа пет рунди разговори откако Трамп, кој повторно воведе санкции по повлекувањето од договорот од 2015 година, се врати на функцијата.

Видете и ова:

Иран бара гаранција од САД дека ќе ги укине санкциите во нуклеарните преговори

Збогатувањето на ураниум е главна пречка. Американската администрација тврди дека Иран мора да ги прекине сите активности за збогатување, а Иран го отфрли тоа барање.

Аракчи, кој го предводи преговарачкиот тим на Техеран, на 31 мај изјави дека добил „елементи“ од американскиот предлог за потенцијален договор по разговорите со посредство на Оман.

Претседателот на иранскиот парламент, Мохамед Багер Галибаф, на 8 јуни изјави дека „планот на САД дури и не споменува укинување на санкциите“.

Тој го обвини Вашингтон дека се обидува да наметне „едностран“ договор што Техеран нема да може да го прифати.

Во меѓувреме, иранскиот министер за разузнавање, Есмаил Хатиб, тврдеше, без да понуди докази, дека Техеран запленил „важна ризница“ од информации во врска со нуклеарната програма на Израел.

Градоначалникот на Струга, Рамиз Мерко, доби ослободителна пресуда во предметот што се водеше против него за наводна злоупотреба на службената положба при набавката на службен автомобил „ауди“ во вредност од 67 000 евра. Според обвинителниот акт, тој го набавил автомобилот во услови кога општината се наоѓала во долгови и со блокирана сметка, а обврските и се сервисирале преку релоцирање средства од централниот буџет на државата.

Основниот кривичен суд во Скопје денеска (9 јуни) оцени дека нема доволно докази за да се утврди дека Мерко сторил кривично дело.

Судот утврди дека постапката за јавна набавка била спроведена без прекршување на законските процедури, а не постојат докази дека Мерко делувал со намера за лична или за политичка корист.

Видете и ова:

Нема застареност за кривично гонење на Мерко за набавката на луксузен автомобил, одлучи струшкиот суд

Адвокатот на Мерко, Игор Петковски, изјави дека пресудата потврдува оти целата набавка била спроведена транспарентно и во рамки на законот. Тој додаде дека вкупната вредност на службените возила изнесувала 114 000 евра, што исто така била предмет на интерес во јавноста.

Македонскиот суд донесе одлука дека во овој конкретен случај на јавна набавка нема основ за кривична одговорност, со што градоначалникот на Струга беше ослободен од сите обвинувања.

Струшкиот градоначалник Рамиз Мерко од политичката партија ДУИ на 9 јуни 2023 година се најде на „црната листа“ на САД поради корупција и мешање во судски процеси.

Според соопштението од Стејт Департментот тој присвојувал државни средства, се мешал во судските и другите јавни процеси, нанесувајќи ѝ штета на вербата на јавноста во демократските институции.

Мерко е обвинет и за незаконски поставување на директори на училишта и други институции. Тој е исто така обвинет дека како градоначалник на општина Струга, во март лани, поставил спомен обележје – плоча на влезот на општинската зграда, со кое поттикнал етничка омраза и раздор меѓу жителите на Струга, со што сторил кривично дело предвидено во член 27 од Законот за меморијални споменици и спомен-обележја.