Србија и Кина продолжуваат да го зајакнуваат стратешкото партнерство, соопштено е по средбите на претседателот Александар Вучиќ и претседателката на Собранието Ана Брнабиќ со кинескиот претставник во Белград.

„Разговаравме за најважните прашања од билатералните односи и за бројни аспекти од стратешкото партнерство на двете земји“, рече Вучиќ по средбата со секретарот на Комитетот на Комунистичката партија на Кина од провинцијата Шандонг, Лин Ву.

Тој истакна дека посебна тема на разговор биле актуелните проекти за брзи патишта и планови за развој и модернизација на инфраструктурата во секторите патен и воздушен транспорт.

Соработката меѓу Србија и Кина се зајакнува и во областа на образованието, науката, истражувањето и развојот, изјави претседателката на Народното собрание на Србија по разговорот со кинескиот претставник и се заблагодари за ставот за Косово. Кина не ја призна независноста на Косово.

Видете и ова:

Може ли Вучиќ да биде надигран во балансирањето?

Лин Ву истакна дека „во Србија е забележлив голем развој“ и дека тоа отвора нови полиња за соработка меѓу Србија и Кина, беше соопштено по средбата.

Србија ги зајакнува односите со Кина откако на власт дојде Српската напредна странка (СНС) на Александар Вучиќ во 2012 година.

Кинескиот претседател Си Џинпинг го посети Белград во мај, на 25-годишнината од НАТО бомбардирањето на кинеската амбасада во Белград, што беше негова втора посета во последните десет години.

Кина и Србија, која повеќе од една деценија е кандидатка за членство во Европската унија, во 2016 година потпишаа декларација за стратешко партнерство на двете земји.

Седум години подоцна, Пекинг и Белград потпишаа договор за слободна трговија.

Во последниве години, Кина направи бројни инвестиции во Србија, од кои најголеми се во фабриката за железо и челик Смедерево, рударството и топилницата Бор и фабриката за гуми Линглонг во Зрењанин.

Во Србија, Кина го изгради белградскиот мост Пупин на Дунав, дел од автопатот Милош Велики и ја реконструираше термоцентралата Костолац.

Владата на Република Словенија му забрани влез на Милорад Додик. Причината не беше објавена, но беше кажано дека станува збор за „тајна“.

Ова го објави вицепремиерот на Словенија, Матеј Арчон, по владината седница.

Додик повеќе не е претседател на босанскиот ентитет Република Српска (РС), по пресудата на Судот на Босна и Херцеговина и одлуката на Централната изборна комисија (ЦИК) со која му беше одземен мандатот.

На почетокот на август, Додик беше законски осуден на една година затвор и шестгодишна забрана за вршење јавни функции во Босна и Херцеговина поради непочитување на одлуките на Кристијан Шмит, висок претставник на меѓународната заедница во Босна и Херцеговина.

Видете и ова:

Сенките на 90-тите, Вучиќ и повлекувањето на Западот

Од април, на Додик му е забранет влез во Австрија и Германија поради сецесионистички потези и поткопување на Дејтонскиот мировен договор.

Постапки за забрана за влез за Додик покренаа Полска и Естонија.

Кон средината на јули, членовите на Европскиот парламент, исто така, побараа воведување санкции во Извештајот на Европската комисија за напредокот на БиХ, поради „реторика на поделба и сецесионистичка политика“.

Досега, Европската Унија не можеше да се согласи за санкции против Додик, поради противењето на унгарскиот лидер Виктор Орбан.

Додик, заедно со неколку други функционери од РС, е на американската „црна листа“ од минатата година поради поткопување на Дејтонскиот договор и загрозување на интегритетот на Босна и Херцеговина. Санкциите беа воведени откако парламентот на РС усвои закони со кои се отфрлаат одлуките на Уставниот суд на Босна и Херцеговина и на високиот претставник.

Шведска планира уште 70 милијарди круни (7,47 милијарди долари) за воена поддршка на Украина во текот на следните две години, изјави шведскиот министерот за одбрана Пал Џонсон, јави агенцијата Ројтерс.

Голем дел од трошоците ќе бидат распределени преку набавки управувани од шведската агенција за одбранбен материјал, на пример дополнителни артилериски системи „Арчер“, тип што веќе го користат украинските трупи во војната со Русија.

Џонсон на прес-конференција рече и дека, по сомневањето за упад со руски беспилотни летала во Полска на 10 септември, Шведска се солидаризирала со Полска и е подготвена да придонесе со воени средства доколку тоа ѝ е потребно на земјата.

Видете и ова:

Нарушувањето на полскиот воздушен простор, го активира членот 4 од Договорот за НАТО

Полска, поддржана од авиони од сојузниците на НАТО, на 10 септември собори неколку сомнителни руски беспилотни летала во својот воздушен простор.

Москва негираше одговорност за инцидентот, а висок дипломат во Полска рече дека беспилотните летала дошле од правец на Украина. Руското Министерство за одбрана соопшти дека нејзините беспилотни летала извршиле голем напад врз воени објекти во западна Украина, но не планирале да погодат никакви цели во Полска.

Британскиот амбасадор во Соединетите Држави, Питер Манделсон, е разрешен поради неговите врски со покојниот американски сексуален престапник Џефри Епштајн, објави британското Министерство за надворешни работи во четврток (11 септември), само неколку дена пред официјалната посета на Доналд Трамп на Лондон.

Електронската пошта помеѓу 71-годишниот ветеран од Лабуристичката партија и американскиот финансиер кој, како осомничен за сексуална експлоатација на, претежно девојчиња, почина во притвор под сомнителни околности, беа откриени оваа недела, пишува АФП.

Овие е-пораки „покажуваат дека длабочината и ширината на односот на Манделсон со Епштајн значително се разликуваат од она што беше познато во времето на назначувањето“ на амбасадорот, соопшти Министерството за надворешни работи.

„Во светлината на ова, и од почит кон жртвите на злосторствата на Епштајн, тој е отстранет од позицијата како амбасадор, со непосреден ефект“, се вели во соопштението.

Видете и ова:

Трамп ги тужи Мардок и „Волстрит џурнал“ поради текстот за Епштајн, бара 10 милијарди долари отштета

Во САД се води политичка и правна битка околу поврзаноста на Трамп и други со трговијата со сексуални услуги, делумно со деца, што беше бизнис на финансиерот и филмски продуцент Епштајн (1953 - 2019), популарен во високите кругови.

Трамп негира постоење на список на клиенти на Епштајн, додека други тврдат дека властите го имаат и мора да го објават за да може истрагата да продолжи.

Говорот на Милорад Додик во Москва на 9 септември повторно содржи неприфатливи и навредливи историски споредби. Ова е наведено во соопштението за медиумите на германската амбасада во Босна и Херцеговина на 11 септември, по средбата меѓу Додик и рускиот министер за надворешни работи Сергеј Лавров во Москва.

Додик поголемиот дел од своето обраќање до медиумите му го посвети на високиот претставник Кристијан Шмит.

„Високите претставници разрешија над 900 избрани претставници во Босна и Херцеговина, од кои две третини од Република Српска. Република Српска остана посветена на „буквата“ од Дејтонскиот договор, додека Западот го користеше таканаречениот дух на договорот. Со години имаме неименуван странец по име Шмит преку кого тие наметнуваат одлуки“, рече Додик.

Видете и ова:

Лавров го поддржа Додик и го обвини Западот за кризата во БиХ

Од Германската амбасада ги повикаа „сите во Босна и Херцеговина да се дистанцираат од овој начин на изразување на г-дин Додик и да соработуваат со Меѓународната заедница на пристоен начин“.

Амбасадата потсетува дека високиот претставник Шмит беше номиниран од Германија, а избран од Управниот комитет на Советот за спроведување на мирот во целосна согласност со меѓународното право и релевантните резолуции на Советот за безбедност на ООН, почнувајќи од Резолуцијата 1031 (1995).

„Како последен орган за донесување обврзувачки одлуки за потребните мерки за спроведување на Дејтонскиот мировен договор, неговите овластувања произлегуваат од Анекс 10 од Општиот рамковен договор за мир (GFAP) и редовно се потврдуваат од Советот за безбедност на ООН од 1998 година, вклучително и Резолуцијата 1144. Уставниот суд на Босна и Херцеговина, исто така, експлицитно ги призна овластувањата на високиот претставник“, се вели во соопштението на Амбасадата.

Инаку, на средбата во Москва, Лавров и Додик, ги повторија своите претходни ставови дека „комплицираните односи во Босна и Херцеговина се резултат на грубо мешање на Западот во внатрешните работи на Босна и Херцеговина“.

Агенцијата за електронски комуникации објави дека заврши постапката по јавниот тендер за доделување радиофрекфенции за трет мрежен оператор во државава, на кој што единствен понудувач е „Оне Македонија телекомуникации“ на унгарски „Фор-ај-џи“.

По одлуката за завршување на постапката директорот на АЕК, по завршување на Локалните избори закажани за 19. следниот месец, треба да донесе одлука за избор на најповолен понудувач.

„По јавното отворање на понуди на 22 август, Комисијата за спроведување на јавен тендер со јавно наддавање изготви извештај со соодветен предлог со директорот на АЕК. Согласно Законот за електронски комуникации во рок од три дена од приемот на извештајот директорот носи одлука за завршување на постапката по јавен тендер со јавно нададвање. Следен чекор е по завршување на изборниот процес директорот да донесе одлука за избор на најповолен понудувач“, информираа за МИА од АЕК.

Потенцијалниот нов мобилен оператор во земјава, според условите од тенедерот, треба да почне со работа на крајот на 2026 година.

Видете и ова:

„Оне Македонија телекомуникации“ на унгарски „4iG“, единствен понудувач на тендерот за трет мобилен оператор

Писмото со намери за влез на македонскиот телекомуникациски пазар кое на 6 август лани го испрати унгарската компанија „4IG“ прерасна во Меморандум за разбирање, на кој заеднички потпис на 2 септември 2024 ставија претседателот на групацијата Гелерт Жасзаи и министерот за транспорт и врски Александар Николовски.

Видете и ова:

Внимателно кон трет мобилен оператор

Од унгарската групација, лани за Радио Слободна Европа, за меморандумот соопштија дека е првиот чекор од можна долгорочна соработка.

„Всушност, тоа покажува заемна посветеност „4iG“ да влезе на македонскиот пазар. Групацијата „4iG“ е присутна во Албанија и Црна Гора со брендот ОНЕ и е дел од долгорочната деловна стратегија за проширување на мрежата во регионот. Значи, Македонија е една од пресвртниците во оваа експанзија“, одговорија од „4IG“ за РСЕ.

Ви минатото, опозицискиот СДСМ предупредуваше на можна опасност од влезот на унгарскиот „4IG“ на македонскиот телекомуникациски пазар поради соработката со кинески „Хуавеи“.

Во октомври 2020 година, владите на Соединетите Држави (САД) и Северна Македонија потпишаа потпишаа Меморандум за разбирање и за безбедност на 5Г технологијата. Со меморандумот, Северна Македонија се обврза дека нема да користи 5Г технологија од „непроверени и некредиблни“ производители, меѓу кои спаѓаат кинеските „Хуавеи“ и „ЗТЕ“.

Полска воведе ограничувања на воздушниот сообраќај по должината на своите источни граници со Белорусија и Украина, објави денеска (11 септември) оперативната команда на полските вооружени сили, во услови на зголемени тензии еден ден откако повеќе беспилотни летала влегоа во воздушниот простор на членката на НАТО.

Ограничувањата стапија на сила на полноќ и се на сила до 9 декември, соопшти оперативната команда, а објави Ројтерс.

Од зајдисонце до изгрејсонце, летовите во ограничената зона се забранети, освен за летала со екипаж кои летаат во согласност со планот на летот, имаат соодветни транспондери и одржуваат двонасочна комуникација со надлежните воздухопловни власти.

Видете и ова:

Полска собори руски дронови во својот воздушен простор

Исклучокот важи и за воени летови и одредени специјални летови со посебни ознаки.

„Од зајдисонце до изгрејсонце, важи целосна забрана за летање, освен за воени авиони. Во зоната EP R129, важи 24-часовна забрана за летање за цивилни беспилотни летала“, изјави полската Агенција за управување со воздушниот сообраќај.

Руското Министерство за одбрана во среда соопшти дека неговите беспилотни летала извршиле голем напад врз воени објекти во западна Украина, но дека истите не биле наменети за таргетирање цели во Полска.

Дождот што заврна утрово (11 септември) во Скопје нема да помогне многу за гаснење на пожарите на депонијата Дрисла и на Вардариште, што траат веќе неколу дена, оценува директорот на Дирекцијата за заштита и спасување Стојанче Ангелов.

Тој вели дека во претходните денови биле фрлени тони и тони вода, но чадењето продолжува. Бидејќи гаснењето со вода не давало резултати, се пристапило кон затрупување на најкритичниот дел од депонијата.

Ангелов за денеска напладне најави прес-конференција на која детално ќе информира за сите активности кои се преземаат на депониите Дрисла и Вардариште.

Во централниот дел на депонијата Дрисла сѐ уште гори поголема количина отпад, при што се испушта густ чад кој се чувствува во делови од Скопје.

Видете и ова:

Депонијата Дрисла сѐ уште гори

Во меѓувреме продолжуваат активностите за затрупување на Дрисла кои треба да да бидат интензивирани во текот на денов.

За денеска се планирани повеќе дополнителни активности и на дивата депонија Вардариште.

Ангелов вчера изјави дека постојат индиции оти се работи за намерно подметнат пожар, бидејќи во текот на летото, кога имало високи температури не дошло до самозапалување на депонијата.

Граѓаните на САД денеска ќе ја одбележат 24-годишнината од нападите на 11 септември 2001 година со церемонии, волонтерски активности и оддавање почит на жртвите, објавија американските медиуми.

Многу од роднините на речиси 3000 луѓе кои загинаа ќе им се придружат на високите личности и политичарите кои учествуваат на церемониите во Њујорк, во Пентагон и во Шенксвил, Пенсилванија.

Во терористичките напади на џихадистичката група Ал-Каеда загинаа 2977 луѓе, вклучувајќи многу финансиски работници во Светскиот трговски центар, како и пожарникари и полицајци кои се упатија кон запалените згради во обид да спасат што е можно повеќе луѓе.

Годишнината од нападите, која често се смета за ден на национално единство, доаѓа неколку часа по убиството на конзервативниот активист Чарли Кирк на универзитет во Јута. Властите изјавија дека се очекува убиството на Кирк да предизвика зголемена безбедност за церемонијата, која ќе се одржи на локацијата на Светскиот трговски центар во Њујорк.

Видете и ова:

Конзервативниот коментатор Чарли Кирк почина откако беше застрелан на универзитетот во Јута, вели Трамп

За време на комеморацијата на нултата точка во долниот Менхетен, на која ќе присуствуваат потпретседателот Џеј Ди Венс и неговата сопруга Уша, роднините на загинатите ќе ги прочитаат гласно имињата на жртвите. Моментите на молчење ќе ги одбележат точните моменти кога киднапираните авиони ги погодија иконските кули близначки на Светскиот трговски центар и моментите кога тие се урнаа.

Во Пентагон во Вирџинија, ќе им се оддаде почит на 184-те војници и цивили кои загинаа. Бомбардерите удриле еден од авионите во зградата на Министерството за одбрана на САД. Претседателот Доналд Трамп и првата дама Меланија Трамп ќе присуствуваат на церемонијата, а потоа ќе присуствуваат на бејзбол натпреварот од Националната лига во Бронкс помеѓу Њујорк Јенкис и Детроит Тајгерс вечерва (11 септември).

Видете и ова:

Како 11 септември 2001 година го смени светот

Луѓето низ целата земја ја одбележуваат годишнината со различни активности и добротворни акции како дел од Националниот ден на сеќавање и служба. Волонтерите ќе делат облека и храна, ќе чистат паркови и населби, ќе даруваат крв и ќе работат на други активности.

Нападите од 11 септември имаа глобално влијание и го променија текот на американската политика, како на домашен, така и на меѓународен план. Тие доведоа до „глобална војна против теророт“ и војните во Авганистан и Ирак и придружните конфликти во кои загинаа стотици илјади воени и цивилни животи.

Иако киднаперите кои ги урнаа авионите во зградите беа убиени во нападите, американската влада се бори да го заврши долгото судење против човекот обвинет за организирање на заговорот, Халид Шеик Мохамед. Поранешниот лидер на Ал Каеда беше уапсен во Пакистан во 2003 година и однесен во американската база во заливот Гвантанамо на Куба, но судењето никогаш не се одржа.

На децата под 15 години во Франција треба целосно да им се забрани користењето на социјалните медиуми, а оние на возраст меѓу 15 и 18 години треба да се соочат со ноќен „дигитален полициски час“, побара во четврток (11 септември) францускиот парламентарен комитет.

Препораките беа изнесени во извештај од пратениците на комитетот по месеци сведочења од семејства, раководители на социјалните медиуми и од инфлуенсери.

Канцеларијата на претседателот Емануел Макрон веќе посочи дека сака забрана за деца и млади адолесценти, откако Австралија минатата година започна да го изготвува нивниот закон со забрана за лица под 16 години.

Шефот на комитетот, Артур Делапорт, за АФП изјави дека ќе поднесе и кривична пријава до обвинителите против масовно популарната платформа за кратки видеа ТикТок за „загрозување на животот“ на корисниците.

Комитетот беше формиран во март, првично за да го испита ТикТок и неговите психолошки ефекти врз малолетниците по тужбата против платформата од седум семејства во 2024 година, обвинувајќи ја дека ги изложува своите деца на содржина што ги тера кон самоубиство.

Главниот автор на извештајот, Лор Милер, изјави дека дизајнот на ТикТок што предизвикува зависност и неговиот алгоритам „е копиран од други социјални медиуми“.

ТикТок нагласи дека безбедноста на младите корисници на нивната апликација е нивен „врвен приоритет“.

Но, Делапорт изјави дека „нема сомнение дека платформата знае што тргнува наопаку, дека нивниот алгоритам е проблематичен и дека постои еден вид активно соучество во загрозувањето“ на корисниците.

Видете и ова:

Лекарите апелираат на опасностите од новиот „ТикТок“ предизвик со парацетамол

Раководителите на ТикТок, кој е во сопственост на кинеската компанија ByteDance, го известиле парламентарниот комитет дека апликацијата користела модерација подобрена со вештачка интелигенција која минатата година открила 98 проценти од содржината што ги крши нејзините услови за користење во Франција.

Но, за пратениците, тие напори се сметале за недоволни, а правилата на ТикТок биле „многу лесни за заобиколување“.

Исто така, се покажало дека штетната содржина продолжува да се шири на апликацијата, а алгоритмот на ТикТок бил ефикасен во привлекувањето на младите корисници во јамки што ја зајакнуваат таквата содржина.

Во кривична пријава до која имаше увид АФП, Делапорт рече дека шефицата на ТикТок за Европа, Блискиот Исток и Африка, Марлен Мазур, може да биде виновна за лажење на комитетот за потенцијалните штети на ТикТок детално опишани во внатрешните досиеја протечени во американските и француските медиуми.

Ученик отворил оган во средно училиште во предградие на Денвер, Колорадо, повредувајќи двајца тинејџери пред да го насочи пиштолот кон себе, соопштија локалните власти, цитирани од американските медиуми.

Властите подоцна соопштија дека момчето кое отворило оган починало.

Инцидентот бил пријавен околу 12:30 часот (локално време) во средното училиште „Евергрин“ во Евергрин, Колорадо, околу 30 милји западно од Денвер.

Истрелите биле испукани и внатре и надвор од училишната зграда, а полицајците кои пристигнале на местото на настанот го пронашле стрелецот во рок од пет минути, изјави портпаролката на шерифската канцеларија на округот Џеферсон, Џеки Кели.

Ниту еден од полицајците кои пристигнале на местото на настанот не испукал никаков куршум, додаде Кели.

Видете и ова:

Конзервативниот коментатор Чарли Кирк почина откако беше застрелан на универзитетот во Јута, вели Трамп

Повеќе од 100 полицајци од околното подрачје се упатиле кон училиштето за да помогнат, изјави портпаролот на шерифската канцеларија на округот Џеферсон.

Тројцата тинејџери од Евергрин кои биле застрелани биле однесени во болница и првично биле наведени во критична состојба. Нивната возраст не била објавена.

До вечерта, еден од нив бил во стабилна состојба.

Средното училиште има повеќе од 900 ученици.