Вести
СДСМ: Шефот за контрола на наплата во Државни патишта самиот не плаќа патарини
Миланчо Митревски, кој е назначен за шеф на контрола на наплатната служба на патарините во Петровец, самиот не плаќа патарини, изјави на денешната прес - конференција од партиското седиште на СДСМ, Менде Илиевски, советник во Советот на Општина Битола.
Тој побара директорот на Јавното претпријатие за државни патишта (ЈПДП), Коце Трајановски веднаш да го разреши Митрески, а надлежните институции да преземат мерки за соодветна одговорност веднаш.
„Снимки од патарините кои ни ги доставија свиркачи покажуваат дека Митревски кога проаѓа со возилото на патарина не плаќа патарина. На 15.08.2024 во 08:47 часот непосредно од кога е назначен заедно со неговата сопруга Бети, присилно го тера вработениот на наплатна станица Отовица да го пропушти без да плати. Оваа е честа пракса на Митревски. Веднаш надлежните институции да преземат мерки и да установат колку пати Митревски направил вакви дела. Бидејќи овие податоци се јавно достапни, СДСМ ги провери на веб порталот од Системот за електронска контрола на патарините и тие се целосно потврдени“, изјави Илиевски.
Во текот на вчерашниот ден, опозицискиот СДСМ објави и дека Митревски бил фатен како ја злоупотребува службената положба за што имал и изречена дисциплинска санкција. Опозициската партија обвини дека Митревски наплаќал повеќе пари на патарините, а вишокот пари си ги земал за себе.
„Тој не ги исполнува условите да биде шеф на контролорите, единствена квалификација му е тоа што е “хард кор“ партиски кадар на ДПМНЕ и сопруг на советничка на ДПМНЕ во Велес“, рече Илиевски.
Од владејачката ВМРО-ДПМНЕ реагираат дека ова се неосновани напади, велејќи дека опозициската партија гледа колку е подобрена работата на ЈПДП и затоа го напаѓаат Коце Трајановски.
„СДС гледаат како сега се работи во ЈПДП и со која брзина се реализираат работите, нешто што беше незамисливо во нивно време. Втора работа која СДС сака да ја сокрие и заради која го напаѓа Коце Трајановски е тоа што непосредно пред избори во ЈПДП бројот на вработени го зголемиле за 50%, т.е. вработиле нови 150 луѓе. СДС ја кријат партизацијата која ја направиле и мислат дека со неосновани напади ќе го измамат народот“, се вели во партиската реакција.
Според ВМРО-ДПМНЕ, најголемиот страв во СДСМ „пред се е заради одговорноста за милионските криминали кои ги правеле, за која знаат дека доаѓа“.
види ги сите денешни вести
Филков по една година на функцијата: Остануваме посветени на реформите и владеење на правото
Во изминатите 12 месеци од Министерстото за правда до Владата биле доставени 22 системски закони, од кои 13 директно предвидени со Реформската агенда. Законите, како што истакна денеска (7 јули) министерот за правда Игор Филков, го засегаат правосудниот систем – изборот, оценувањето, платите, статусот и одговорноста на судиите и обвинителите, како и институционалните капацитети на Советите, вештачењето и службите во правосудството.
„Градиме институции што работат за граѓаните, а не за привилегираните. И ова е само почеток“, порача Филков на денешната прес-конференција по повод една година на функцијата.
Тој истакна дека по осум години во функција е ставена Комората на вештаци, дека се издаваат лиценци и дека е воспоставена нова програма за полагање на испит. Додаде дека била поништена одлука на претходната влада со која нотарската тарифа беше десеткратно зголемена.
„Во функција го ставивме системот за надомест за жртви на кривични дела со насилство согласно законот. Ја отворивме канцеларијата на комисијата која што непречено работи. Со ова воспоставивме основа за практична примена на општестевната солидарност, заштита на човековите права и борба против секундарната виктимизација“, истакна Филков.
Се пофали и со електронските алки за надзор на лица во куќен притвор и куќен затвор, кој како што потсети, биле ставени во функција по десет години.
Од осумте закони во Реформската агенда со рок до јуни 2025, седум се веќе испратени во владина процедура, од кои го истакна Законот за Судски совет, за кој нагласи дека „не се работи за декларативен пристап, туку за суштинска промена насочена кон градење транспарентен, отчетен и професионален Судски совет“.
„Министерството за правда изработи целосно нов Закон за Судски совет кој веќе е во владина процедура. Законот беше изготвен преку инклуизивен и траснпарентен процес, преку јавни дебати, експертски консултации и активно вклучување на сите релевантни чинители. Посебна потврда за ова е и позитивното мислење добиено од Венецијанската комисија„, изјави Филков, апелирајќи до пратениците на Собранието за препознавање на итноста и важноста од носењето на овој закон.
Во процедура се и законите за плати на судии, за плати на јавните обвинители и за плати на членовите на Судскиот совет и за плати на членовите на Советот на јавни обинители.
До Владата, посочи Филков, се испратени уште два многу важни закони кои не се дел од реформската агнеда, а тоа се Законот за спречување на судир на интереси и Закон за заштитено пријавување и заштита на укажувачи.
Во подготовка се уште десет закони, меѓу кои Кривичен законик, Закон за кривична постапка, Закон за судови, Закон за пробација, Закон за конфискација на имот во граѓанска постапка, Закон за помилување, Законт за здруженија и фондации, како и Закон за процена и Закон за судски буџет.
Филков, исто така, нагласи дека е формиран и нов Совет за координирање на информатичко комуникациската техенологија во правосудството, кој работи на дигитализација на целокупниот систем и негово меѓусебно поврзување.
Граѓаните пријавуваат мито, игнорирање пациенти, ненавремена здравствена услуга
Барање мито, непрофесионално однесување, игнорирање пациенти, доцнење во пружање здравствена услуга. Овие се проблемите на кои се жалат македонските граѓани, инфрмираше денеска министерот за здравство, Азир Алиу.
„Триесет и девет лица поставиле прашања, ги имаат наведено и здравствените институции во кои се соочиле со проблем. За да бидеме сигурни дека она што го пријавиле е точно, имаме канцеларија која се занимава само со овие прашања. Со овие споменати институции ќе имаме состанок. Во моментов нема да обелоденам за кои здравствени институции станува збор“, рече Алиу на денешната прес-конференција.
По повод една година работа на Владата и еден месец откако тој раководи со ресорот здравство, Алиу кажа дека биле зголемени платите, дека успешно го решиле недефинираниот статус на приватните специјализанти.
„Младите лекари не се оставени сами. Стојам зад секој здравствен работник, градиме систем во кој ќе се изрази довербата. Прв пат е ажурирана позитивната листа на лекови. Во првиот месец, институцијата ја доближивме до граѓаните. Кабинетот на министерот е алатка за директна комуникација и слух. Граѓанинот има право на одговор а ние имаме обврска да реагираме“, рече тој, информирајќи и за здравствените установи кои се реконструирани или се во план да се реконструирааат.
Во врска со проблемот на кој укажаа дијабетичарите, односно дека се уште немаат достапни количини за новодијагностицирани пациенти на современата антидијабетична терапија како и информациите дека Комисијата за дијабетес ќе почне да прави ревизија на постоечката терапија, министерот вели дека се работи на решение на проблемот.
„Имав средба со нив, и денес ќе имам средба со дел од експертскиот тим и ќе излеземе со решение кое нема да биде на штета на дијабетичарите, тоа ве уверувам. Сите маки што ги имаат ми ги кажаа. Овој пристап не е само за таа група, туку и за пациентите со ретки болести и за други пациенти“, рече Алиу.
Алиу во петокот (4 јули) имаше отворен кабинет за граѓаните, на кој како што рече, слушнал и добри идеи, а некои од нив му се пожалиле дека не добиле здравствени услуги.
Изгаснат еден крак од пожарот меѓу Блаце и Чучер Сандево, другиот продолжува да се шири
Во општина Чучер Сандево, помеѓу селата Блаце и Чучер, каде гори мешана шума и ниска вегетација, екипите за гаснење се сè уште на терен и активно интервенираат, соопштија од Центарот за управување со кризи.
„Еден крак од пожарот е пресечен и изгаснат, но останува уште еден активен крак кој се шири кон сосема непристапен ридско-планински терен. Интервенцијата е отежната, бидејќи пожарот зафатил голема површина. Се вложуваат максимални напори за да се стави ситуацијата под контрола“, стои во објавата на Фејсбук од ЦУК.
Директорот на ДЗС Стојанче Ангелов, вели дека најверојатна причина за пожарот во оштина Чучер Сандево е фрлен отпушок од цигара од возило во движење или намерно потпалување.
„Од мое непосредно забележување можам да кажам дека овој пожар изби непосредно до магистралниот пат кон Блаце и можна причина е фрлен отпушок од цигара од возило во движење или намерно потпалување. Затоа, апелираме до граѓаните да се однесуваат совесно и никогаш да не фрлаат отпушоци од цигари надвор од возило, дури и тогаш кога се убедени дека се изгаснати“, апелира Ангелов.
Во пожарот помеѓу селото Блаце и Чучер Сандево зафатена е мешана шума и ниска вегетација.
За негово гаснење од утрово во пет часот биле ангажирани два полициски хеликоптера, еден армиски хеликоптер, како и три возила на Дирекцијата за заштита и спасување, која со повеќе пожарникари и возила го гаси големиот пожар на отворен простор на територијата на општина Чучер Сандево над магистралниот пат Скопје - Блаце, кој изби вчера (6 јули) во попладневните часови.
Министерството за внатрешни работи доцна синоќа информира дека е нормализиран сообраќајот до граничниот премин „Блаце“ и дека е укината забраната за движење за товарните возила и автобусите која беше воведена вчеравечер откако пожарот над магистралниот пат Скопје-Блаце се прошири.
За справување со пожарите во летниот период, Владата овој месец најави вработување на 400 пожарникари. Тоа е предвидено во Оперативниот план за 2025 „Визија за промена“ – соопштија и од владината прес-служба и од владеачката ВМРО-ДПМНЕ.
Заради превенција и подобро справување со шумските пожари, овие 400 лица ќе се вработат во општините каде што има најмногу потреба за нив, додадоа од партијата.
Српската листа покрена петиција против изградба на два моста на Ибар
На иницијатива на Српската листа, најголемата партија на Србите во Косово, која ја има поддршката од Белград, во понеделник (7 јули), во Северна Митровица, започна потпишувањето на петиција против изградбата на два моста преку реката Ибар, за кои камен-темелникот беше поставен на 1 јули, во присуство на вршителот на должноста премиер, Албин Курти.
За изградбата на овие два моста - едниот за пешаци, а другиот за сообраќај - Владата на Косово издвои околу три милиони евра, а завршувањето на работите се очекува на есен.
Премиерот Курти рече дека целта на спроведувањето на овој проект е да се поврзе Северна Митровица во која живее мнозинското српско население, со Јужна Митровица каде што живее мнозинското албанско население.
Тој, исто така, изјави дека владата се залага за поголема „комуникација, циркулација, соработка и размена меѓу северот и југот“.
Од друга страна, претседателот на Српската листа, Златан Елек, пред почетокот на потпишувањето на петицијата за Радио телевизија Србија изјави дека целта е да се покаже „унифицираниот став на српскиот народ дека не прифаќа еднострани одлуки за проекти на штета на српската заедница“.
Тој додаде дека петицијата ќе биде потпишана во следните два дена, по што ќе биде доставена до Меѓународната заедница.
Претходно, Европската Унија во својот одговор до Радио Слободна Европа изјави дека секоја одлука за изградба на инфраструктура преку Ибар мора да се донесе внимателно и инклузивно, со целосно вклучување на сите засегнати заедници.
Инаку, мостовите се градат веднаш до главниот мост на Ибар, што е дел од Договорот за слобода на движење, постигнат во рамките на дијалогот меѓу Косово и Србија. Воената мисија на НАТО во Косово (КФОР) е сместена на овој мост, бидејќи е познат по етничките конфликти во повоениот период, што е главната причина за неговото затворање.
Моментално е отворен само за пешаци, а Владата на Косово го најави неговото отворање за сообраќај во јули минатата година, што предизвика тензии и реакции од Меѓународната заедница.
Вршителот на должноста премиер Курти изјави дека Владата никогаш нема да се откаже од отворањето на главниот мост.
Членовите на српската заедница од Северна Митровица претходно за РСЕ изјавија дека отворањето на главниот мост само ќе ги зголеми тензиите на терен, додека Албанците од Јужна Митровица изјавија дека таков потег би придонел за коегзистенција и слобода на движење.
Косово и Србија се договорија за отворање на мостот на Ибар за сообраќај како дел од дијалогот за нормализација на односите во 2014 година. Планирана е таканаречена ревитализација на мостот, со цел отстранување на сите барикади поставени од локалните Срби и мостот да стане функционален.
Потоа, во 2016 година, беше договорен нов план за имплементација, чија цел беше да се надминат несогласувањата околу различните толкувања на претходните заклучоци.
Според новиот план за имплементација, целосното отворање на мостот требаше да се случи во јануари 2017 година.
Сепак, работите за ревитализација на мостот беа завршени дури во јуни 2018 година, а мостот, во кој беа инвестирани 1,5 милиони евра, никогаш не беше отворен за моторни возила, туку само за пешаци.
Средба Трамп-Нетанјаху за прекин на огнот во Газа
По 21 месец војна, се зголемуваат надежите за ново примирје во Појасот Газа.
Израелскиот премиер Бенјамин Нетанјаху во понеделник (7 јули) во Вашингтон ќе има клучна средба со американскиот претседател Доналд Трамп. Трамп претходно им рече на новинарите дека ќе биде „многу цврст“ во разговорите со Нетанјаху за да се стави крај на конфликтот.
Тој рече дека верува оти „ќе имаме договор“ оваа недела.
„Работиме на постигнување на договорот што беше дискутиран, под условите што беа договорени. Верувам дека разговорот со претседателот Трамп може да помогне во унапредувањето на овој исход, на кој сите се надеваме“, рече Нетанјаху пред да замине за САД.
Израел и Хамас, група која е означена како терористичка група од САД и ЕУ, започнаа индиректни разговори во Катар за предлогот на САД, кој повикува на 60-дневно примирје и ослободување на заложниците.
Сепак, сè уште не е јасно дали клучните разлики што постојано спречуваа договор можат да се надминат.
Посетата на Нетанјаху на Белата куќа е негова трета откако Трамп се врати на функцијата во јануари.
Оваа посета доаѓа по одлуката на Трамп да се придружи на израелската војна против Иран со напад врз нуклеарните постројки на Иран.
Откако посредуваше во постигнувањето примирје меѓу двете земји, Трамп објави дека сега е фокусиран на напорите за завршување на војната меѓу Израел и Хамас.
Војната започна кога Хамас го нападна Израел на 7 октомври 2023 година, убивајќи над 1200 луѓе и земајќи стотици заложници.
Израел одговори со жестока офанзива врз Појасот Газа, во која загинаа повеќе од 57 000 Палестинци, според тамошните здравствени власти.
Четири лица се убиени, а повеќе од 30 ранети во најновите руски напади во Украина
Најмалку четири лица биле убиени, а повеќе од 30 ранети во руските напади низ Украина во текот на ноќта, соопштија регионалните власти во понеделник (7 јули).
Две лица загинале во регионот на Суми на исток и едно во областа на Одеса на југ, објавија украинските државни служби за вонредни состојби во објава на Телеграм.
Еден маж бил убиен во јужниот регионот на Херсон, информираше регионалниот гувернер.
Повеќе од 30 лица биле ранети, повеќето од нив во источните региони Харкив и Дњепропетровск, соопштија официјални лица.
„Руски беспилотни летала, исто така, го погодија главниот град Киев во напади во кои биле оштетени згради, но немаше жртви“, напиша градоначалникот на градот на Телеграм.
Во Русија, Министерството за одбрана соопшти дека во текот на ноќта соборило 91 украински дрон, вклучувајќи осум во Московскиот регион, а поголемиот дел од останатите во регионите што граничат со Украина.
Во петокот, Русија го започна својот најголем напад со беспилотни летала и ракети врз Украина откако започна инвазијата во февруари 2022 година, испраќајќи 530 беспилотни летала и околу десетина ракети кон Киев во напад во кој загинаа најмалку две лица.
Осми ден протестни блокади во Србија
На осмиот ден од блокадите на протестите во Србија, во текот на утрото на 7 јули, полицијата ги спречи граѓаните да блокираат клучни патишта на неколку локации во Белград.
Силни полициски сили се присутни на улиците во центарот на градот и другите населби.
На некои од локациите, полицијата ги идентификувала граѓаните, објави телевизијата Н1.
На покана на студентите, неформалните собири на граѓани најавија блокади на улици и раскрсници од седум часот наутро, на повеќе од десет пунктови во Белград.
Меѓу нив се и некои од клучните патишта во Нов Белград, Чукарица, Палилула, како и во Раковица, Земун, Калуѓерица.
Блокадите се закажани за време на утринскиот „шпиц“ во сообраќајот во градот, кога вообичаено се формираат гужви во текот на работните денови.
Блокадите во градовите низ Србија започнаа откако студентите повикаа на „граѓанска непослушност“ по протестите во Белград на 28 јуни.
Тие бараат распишување предвремени избори, отстранување на кампот од центарот на градот каде што со месеци престојуваат луѓе кои се спротивставуваат на блокадите и ослободување на студентите кои беа приведени за време на демонстрациите на 28 јуни.
Масовни протести и блокади на факултетите низ цела Србија започнаа по смртта на 16 лица при падот на настрешницата на Железничката станица во Нови Сад на 1 ноември, а студентите и граѓаните бараат одговорност од властите за несреќата.
Нападите на украинските дронови го доведуваат рускиот воздушен сообраќај во хаос
Украинските напади со беспилотни летала втор ден по ред сериозно ги попречуваат летовите низ цела Русија, а најголемите аеродроми што ги опслужуваат Москва и Санкт Петербург се меѓу оние што беа принудени да ја ограничат активноста во текот на целиот ден на 6 јули.
Руското Министерство за транспорт соопшти дека околу 400 летови се откажани до 18 часот по московско време поради „ограничувања воведени за да се осигура безбедноста на летовите“ и ги повика патниците да размислат за патување по патеки.
„До 18 часот по московско време, 171 лет беше откажан на аеродромот Шереметјево за пристигнување и заминување. Педесет и шест летови остануваат одложени - повеќе од два часа - чекајќи заминување“, соопшти министерството.
Аеродромот Пулково во Санкт Петербург, вториот по големина град во Русија, соопшти дека 90 летови за заминување и пристигнување се откажани, а уште 37 се одложени најмалку два часа.
„Треба да се напомене дека постои развиена железничка врска помеѓу Санкт Петербург и Москва. Билетите се достапни во двата правци: и за возови на долги релации и за брзи возови“, се додава во соопштението.
Министерството, исто така, соопшти дека летовите се суспендирани на аеродромите во Иваново, Калуга, Киров, Псков и Тамбов.
Градоначалникот на Москва, Сергеј Собјанин, изјави дека шест украински дронови биле соборени додека се приближувале кон главниот град, но не даде детали за евентуална штета. Беше објавено дека дронови биле соборени и во близина на Санкт Петербург и Калуга од страна на локалните власти.
Гувернерот на регионот Белгород, Вјачеслав Гладков, на 6 јули изјави дека украинските дронови повредиле двајца цивили во близина на граничната област.
Украинските напади следат по некои од најголемите воздушни напади на руските сили врз Киев, во кои загинаа најмалку две лица, а десетици беа повредени додека станбени области во главниот град беа разурнати.
На 6 јули, украинските власти соопштија дека пет лица се убиени како резултат на руско гранатирање во повеќе населби во регионот Донецк, при што десетици приватни домови беа погодени.
Москва негира дека таргетирала цивилни области, и покрај широките докази за такви напади од почетокот на нејзината целосна инвазија во февруари 2022 година.
На терен, руските сили продолжуваат со обидите да пробијат делови од фронтот од 1000 километри, притискајќи ги украинските сили со помалку екипаж и оружје.
Руските сили доцна на 6 јули тврдеа дека освоиле уште две села во Украина, едно во регионот Донецк, а другото во регионот Харкив. Извештајот не можеше веднаш да се потврди.
На 5 јули, украинскиот претседател Володимир Зеленски ги поздрави новите договори со сојузниците за кои рече дека ќе обезбедат „стотици илјади“ нови беспилотни летала за борба против Русија и рече дека Киев „подготвува нови чекори што ќе ја натераат Русија навистина да почувствува дека ќе плати за оваа војна“.
Зеленски постојано апелираше до западните партнери да испорачаат повеќе оружје и да го зголемат притисокот врз Русија преку дополнителни финансиски санкции.
Американскиот претседател Доналд Трамп на 4 јули изјави дека рускиот колега Владимир Путин разбира дека „можеби ќе следуваат повеќе санкции“, бидејќи Москва продолжува да го отфрла притисокот на Вашингтон за прекин на огнот во Украина.
„Знаете, многу зборуваме за санкции и тој разбира дека можеби ќе дојдат“, рече Трамп.
„Тој сака да оди до крај, само да продолжи да убива луѓе, тоа не е добро“, рече тој, додавајќи дека е „многу незадоволен“ од лидерот на Кремљ.
На 6 јули, Трамп повтори дека е „разочаран“ од последниот телефонски повик со Путин на 3 јули.
Многу набљудувачи велат дека Путин не брза да се согласи на договор за прекин на огнот, бидејќи верува дека ја добива војната на терен и дека времето е на негова страна.
Сепак, Русија претрпе огромни загуби во работна сила, а нејзината економија претрпе голем удар поради зголемените трошоци за одбрана.
Поплавите во Тексас однесоа 50 животи, спасувачите трагаат по исчезнатите
Спасувачите рано на 6 јули бараа 27 девојки кои исчезнаа од летен камп покрај река во Тексас откако поројните дождови предизвикаа катастрофални поплави во кои загинаа најмалку 50 лица во американската држава.
Повеќе предупредувања за поплави останаа на сила низ централен Тексас откако водата навлезе во населбите, а реката Гвадалупе се искачи за осум метри за само 45 минути.
Летниот камп во округот Кер, каде што престојуваа стотици луѓе, беше хаос, со ќебиња, мечиња и други работи покриени со кал.
„Пронајдовме 43 мртви лица во округот Кер. Меѓу мртвите се 28 возрасни и 15 деца“, рече Лари Леита, шериф на регионот погоден од поплавите.
Шефот на Одделот за внатрешна безбедност, Кристи Ноем, рече дека крајбрежната стража на САД „работи низ бури“ за да ги евакуира луѓето.
Шефот на Одделот за управување со вонредни состојби во Тексас, Ним Кид, изјави дека воздушни, копнени и водни екипи пребаруваат по реката Гвадалупе за преживеани и тела.
Гувернерот на Тексас, Грег Абот, изјави дека продолжувањето на потрагата во текот на ноќта е неопходно бидејќи „секој час е важен“.
Поплавите започнаа на 4 јули.
Националната метеоролошка служба (NWS) предупреди дека се прогнозираат повеќе дождови и дека „прекумерното истекување може да доведе до поплавување на реки, потоци, потоци и други ниски и склони кон поплави локации“.
Ненадејните поплави, кои се случуваат кога земјата не е во состојба да апсорбира обилни врнежи од дожд, не се невообичаени.
Но, многу научници велат дека во последниве години, климатските промени предизвикани од човекот ги направија екстремните временски настани како што се поплавите, сушите и топлотните бранови почести и поинтензивни.
Извор: AFP
Орце Ѓорѓиевски кандидат за градоначалник на Скопје
Актуелниот градоначалник на Кисела Вода Орце Ѓорѓиевски, е кандидат за градоначалник на Град Скопје на ВМРО-ДПМНЕ на локалните избори што ќе се одржат во октомври.
Одлуката ја соопшти претседателот на ВМРО-ДПМНЕ и премиер Христијан Мицкоски, по денешната седница на Извршниот комитет што се одржа во седиштето на партијата во Скопје, истакнувајќи дека се темели на анкетите кои покажуваат дека Ѓорѓиевски води убедливо дури и петпати повеќе во однос на решенијата што се споменуваат од СДСМ, а како градоначалник покажал резултати.
„За овој период што го познавам Орце знам дека е мотивиран да победува прво на изборите, а потоа секој ден за Град Скопје. Ѓорѓиевски ќе биде нова енергија која му е потребна на Скопје, после четири години девастација на градот. Ги научивме сите лекции за да не погрешиме во изборот на градоначалник овојпат“, рече Мицкоски.
Ѓорѓиевски кажа дека е свесен во колку лоша состојба се наоѓа градот и истакна дека е подготвен да го воскресне Скопје.
„Време е да изградиме град со кој не само ние, туку и генерациите после нас ќе се гордеат. Фокус ќе бидат сообраќајниот хаос и хигиената. Градот ни е валкан и тоа е најголемиот проблем на скопјани – рече Ѓорѓиевски.
Утврдени се и кандидатурите за општините Гази Баба, актуелниот Бобан Стефковски, за Карпош Сотир Лукроски, од приватнот сектор, за Лозово актуелниот градоначаник Бошко Цветкоски, за Пехчево, актуелниот градоначалник Александар Китански, за Ресен актуелниот Јован Тозиоски, за Зрновци исто така актуелниот градоначалник Борче Коцев.
„Настапуваме со понуда за чесни и некомромитирани вредни кадри за општините и ќе излеземе со јасна визија и програма за развој на секоја општина, рече Мицкоски.
Претходно беа објавени кандидатурите за 33 општини кои владејачката партија ги утврди на седници на Извршниот комитет во мај и во јуни – за Битола, Кавадарци, Охрид, Велес, Штип, Гевгелија, Аеродром, Бутел, Ѓорче Петров, Чучер-Сандево, Свети Николе, Карбинци, Градско, Зелениково, Илинден, Конче, Делчево, Ново Село, Василево, Босилово, Берово, Петровец, Вевчани, Брвеница, Јегуновце, Македонски Брод, Могила, Пробиштип, Богданци, Демир Капија, Росоман, Новаци и Дебарца.
Локалните избори се одржуваат во октомври 2025 година.
Мултимедија
Најпосетени
Што треба да знаете