Вести
Вработени во МВР сведочеа за убиството на Вања и Панче
Со сослушување сведочи, денеска (16 октомври) во Основниот кривичен суд Скопје продолжи судскиот процес за убиството на 14-годишната Вања Ѓорчевска од Скопје и 74-годишниот Панче Жежовски од Велес.
Како сведоци на рочиштето се појавија вработени во МВР кои биле ден од истрагата и потрагата по двете жртви кои беа пријавени за исчезнати на 24 и 27 ноември, а чиј тела беа пронајдени на 3 декември 2023 година.
Поранешниот началник од Велес, Ристо Самарџиев, во судница сведочеше дека телото на Жежовски го пронашле на непристапно место до е тешко да се дојде ако некој не го посочи конкретно. Тоа, според ексначалникот, го посочил еден од обвинетите, Велибор Манев.
„Велибор ни го кажа местото на настанот. Прво кажа дека тие се виновници за убиството на Вања, го кажа местото каде е убиена и закопана. После тоа го прашавме за Панче и ни кажа и за Панче, го земавме и нè однесе на местото на настанот. Тој го знаеше точното место каде што е закопан Панче“, рече Самарџиев.
Тој посочи дека обвинетиот Манев кажал оти лицето кое пукало бил првоосомничениот во случајот Љупчо Палевски.
Телото на Жежовски беше пронајдено во близина на Велес.
За тоа како било пронајдено телото на девојчето Вања во околината на Скопје, пак, претходно на рочиштето сведочеше поранешниот помошник-началник од скопската полиција, Музафер Каишиќ.
Тој бил првиот што контактирал со родителите на девојчето, кога се јавиле индиции дека Вања е киднапирана.
„Првата средба со родителите на Вања беше на денот на пријавување во вечерните часови. Тогаш ние директно се вклучивме во работата, отидовме да видиме што е сработено и што да се преземе. Тогаш родителите за прв пат ги видовме. Мајката беше посталожена. Првиот впечаток за таткото беше чуден за мене но и за колеги, после разговорот анализиравме беше конфузен, потиштен во многу изјави и многу работи кои ние го прашувавме“, сведочеше Каишиќ.
И тој во својот исказ кажа дека до телото на убиеното девојче ги однел Влатко Кешишов, уште еден од обвинетите во случајот.
Судскиот процес за двократното убиство започна на 20 септември. На првото рочиште обвинетите Љупчо Палевски – Палчо, Боре Видевски, Велибор Манев и Влатко Кешишов, како и таткото на девојчето, Александар Ѓорчевски се произнесоа дека не се чувствуваат за виновни.
Денешното рочиште беше второ на кое се сослужуваа сведоци. На првото во понеделникот, 14 октомври, меѓу сведоците беше и мајката на убиената Вања, Зорица Ѓорчевска, која тврдеше дека не ги познава обвинетите за убиството. Таа сведочеше и дека таткото, кој сега е обвинет, веднаш се сомневал дека ќерка им е киднапирана.
Истиот ден сведочеа и ќерката и зетот на 74-годишниот Жежовски од Велес. Тие раскажаа дека го пријавиле исчезнувањето на велешанецот откако во неговиот дом наишле на запалена греалка и сијалица, а пензионерот го немало. Го немало ниту возилото „Цитроен“ кое, инаку, не го давал никому и имало голем багажен простор.
види ги сите денешни вести
Владината потрошувачка кошничка ќе опфаќа четиричлено семејство
Владината потрошувачка кошничка сепак ќе биде за четиричлено семејство, а не за тричлено, како што досега се најавуваше. Ова денеска (26 јуни) го потврди министерот за економија Бесир Дурмиши.
Според Дурмиши, потрошувачката кошничка ќе биде пореална од синдикалната и ќе биде донесена на првата седница на Економско-социјалниот совет што треба, која како што додаде, треба да се одржи наскоро.
„Затоа правиме нова потрошувачка кошничка, затоа што ќе биде со реални податоци колку му треба за еден месец на едно четиричлено семејство во делот на храната, пијалоците, облеката и така натаму. Таа што ја објавуваат синдикатите, немаме ништо против, но е несоодветна и нереална, поради тоа што бројките не се точни“, потенцираше Дурмиши на денешната прес-конференција.
Во пресметката на просечната потрошувачка кошничка ќе бидат вклучени сите видови овошја и зеленчук што се произведуват во земјава, изјави неодамна и министерот за земјоделство, шумарство и водостопанство Цветан Трипуновски.
Според синдикалната месечна потрошувачка кошничка, на едно семејство му требаат речиси 64 000 денари за да ги задоволи минималните потреби и тоа ни оддалеку не е доволно доколку само двајца члена на семејството работат и добиваат минимална плата.
Во меѓувреме, зголемување на трошоците за живот регистрираше и Државниот завод за статистика, кој соопшти дека инфлацијата во мај 2025 се зголемила за 1,5 отсто во однос на април. Споредено со мај 2024 година пак, зголемувањето изнесува 3,3 отсто.
Најголемо покачување се бележи кај храната и безалкохолните пијалоци, кај рестораните и хотелите, кај земјоделските производи. Априлската синдикална кошничка чинела 62 691 денар, а мајската минимална кошница, достигнала вредност од 63 908 денари.
Хамнеи: САД „не добија ништо“ од нападите врз Иран
Во телевизиско обраќање во четврток, 26 јуни, врховниот лидер на Иран, ајатолахот Али Хамнеи предупреди дека секоја идна агресија против Иран ќе има голема цена.
Хамнеи, исто така, рече дека способноста на Иран потенцијално да стигне до големите американски воени бази е значително достигнување и додаде дека ваквите акции би можеле да се повторат доколку агресијата се обнови.
Врховниот лидер на Иран изјави дека архинепријателот Израел „речиси се распадна“ по одмаздничките напади на Исламската Република за време на 12-дневната војна што ја започна Израел.
„Ционистичкиот режим речиси се распадна и беше уништен од нападите на Исламската Република“, рече Хамнеи, два дена по прекинот на огнот со кој заврши војната меѓу Иран и Израел.
Хамнеи, меѓудругото додаде дека Соединетите Држави „не добиле ништо“ од нивните напади за време на 12-дневната војна, во која беа погодени ирански нуклеарни објекти.
Во соопштението објавено од државните медиуми, Хамнеи рече дека Соединетите Држави „директно се вклучиле во војната, убедени дека нивното одбивање да интервенираат ќе доведе до целосно уништување на ционистичкиот режим“.
„САД не добија ништо од оваа војна“, рече Хамнеи, додавајќи дека „Исламската Република победи и како одмазда ѝ зададе тешка шлаканица на Америка“.
Во меѓувреме, Советот на чувари во Иран го ратификуваше законот со кој се суспендира соработката на Техеран со Меѓународната агенција за атомска енергија (МААЕ), објави Иранскиот клуб на млади новинари, осврнувајќи се на оваа тело составено од свештеници и адвокати кое ја проверува усогласеноста на законот со Уставот и исламскиот закон.
Законот, претходно усвоен од иранскиот Парламент, потенцијално би можел дополнително да ги влоши односите на Иран со Западот и да влијае на меѓународниот надзор врз неговата нуклеарна програма, јавија британските медиуми.
МААЕ сè уште не издаде официјална реакција на одлуката.
Муртезани: Позициите на Бугарија мора да се разделат од оние на другите земји членки на ЕУ
Министерот за европски прашања Орхан Муртезани изјави дека е неопходно да се направи разлика помеѓу ставовите на Бугарија и останатите земји членки на Европската Унија кои го признаваат македонскиот идентитет и јазик.
Според него, за нас е добредојдено сè што прави разлика помеѓу билатерална позиција на Бугарија, и заедничка позиција на сите земји членки на ЕУ, со тоа што би се издвоило што е прашање на билатерален идентитетски аспект и што е прашање на пристапување во Унијата.
„Мислам дека поединечно, ако ги слушаме сите 26 други земји, сите го признаваат и македонскиот идентитет и македонскиот јазик. Тоа не е спорно. Меѓутоа со Резолуцијата, нивната волја дополнително ќе се потврди. Затоа ние инсистираме да се разделат позициите на другите земји членки и Бугарија, по однос на билатералното прашање“, изјави Муртезани по денешната тркалезна маса „Геополитичкиот пејзаж и проширувањето на ЕУ: Перспективи за Северна Македонија и другите земји-кандидатки од Западен Балкан“, што се одржа во Македонската академија на науките и уметностите.
Во однос на реформите и уставните измени, Муртезани нагласи дека процесот е во тек, но дека за вклучување на Бугарите во Уставот е потребен поширок политички договор.
„Првиот дел е што се однесува до реформите и којшто е се работи во континуитет. Дел од реформите се спроведуваат со поголем интензитет, дел со намален интензитет. Меѓутоа тоа е процес којшто оди. Што се однесува до вклучувањето на Бугарите во преамбулата на нашиот Устав, тоа е прашање за коешто треба поширок политички консензус и двотретинско мнозинство во Собранието. Сѐ додека немаме широк политички консензус и двотретинско мнозинство во Собранието, а пред тоа треба сите тие наши грижи или барања да бидат ставени на маса, и разговарани, нема да има политички простор да направиме чекор напред“, рече Муртезани.
Околу можноста за внесување на придавката „модерна“ пред македонски јазик и идентитет во извештајот на Европскиот парламент, министерот повика на трпение и воздржаност.
„Прво мислам дека не треба од сега да прејудицираме. Да видиме како ќе се одвива процесот до крај. Ние се надеваме дека тоа што помина во првиот чекор треба да се заврши во вториот. Меѓутоа тоа е прашање на внатрешен политички консензус во ЕП. Секако дека ние би сакале идентитетот да остане таков како што ние сметаме и го чувствуваме, меѓутоа да чекаме финална одлука, па после ќе видиме“, порача министерот.
Комитетот за надворешни работи (АФЕТ) на Европскиот парламент со 40 гласови „за“, 19 „против“ и 10 „воздржани“ го усвои Предлог-извештајот за земјава подготвен од австрискиот европратеник Томас Вајц.
По гласањето бугарски европратеник најави дека како додаток на Извештајот ќе предложат дополнение со „мислење на малцинството“.
Беше поднесен и амандман по скратена постапка за вметнување на зборот „модерен (современ)“ пред македонски јазик и идентитет во Извештајот, но согласно Деловникот за работа, тој не беше ставен на гласање затоа што против таквиот предлог се изјаснија најмалку шест пратеници членови на АФЕТ. Деловникот предвидува дека предложен амандман нема да биде ставен на гласање, доколку против предлогот се изјаснат најмалку петмина европратеници.
Извештајот на Вајц треба да се најде на пленарна седница на Европскиот парламент на заседанието од 7 до 10 јули во Стразбур.
Препораки за заштита од горештините
Температурите денеска, 26 јуни се очекува да достигнат максимум од 41 степен Целзиусов, а УВ факторот да достигне 9, прогнозира Хидрометеоролошкиот завод. Жешкото време се очекува да продолжи и утре, со мало намалување на температурата на воздухот во текот на викендот.
Избегнување да се излегува на сонце, носење лесна облека, капа и очила за сонце, како и престој во климатизирани простории, се само дел од препораките на Институтот за јавно здравје. Граѓаните велат дека на овие високи температури брзо ги завршуваат обврските и се враќаат дома.
Институтот за јавно здравје (ИЈЗ) објави препораки за заштита на лицата над 65 години во услови на високи температури. Оттаму нагласуваат дека оваа група на луѓе се посклони кон здравствени проблеми поврзани со топлината. Тие влегуваат во таканаречената „ризична категорија“ бидејќи потешко се прилагодуваат на температурните промени, имаат поголема веројатност да имаат хронична здравствена состојба, да користат редовна терапија што може или ги менува нормалните реакции на телото на топлина, појаснуваат од ИЈЗ.
Се апелира повозрасните да избегнуваат изложување на сонце, како и работа на отворено, во периодот од 11 до 17 часот. Да носат лесна, светла и памучна облека, заштитни очила за сонце, капа и крем со висок УВ фактор. Препораките се да се пие повеќе од вообичаено и да не се чека додека не се почувствува жед за вода. Алкохолните пијалаци да се избегнуваат, како и оние што содржат кофеин, но и екстремно ладните. Доколку лекарот им има поставено некои ограничувања за внес на течности, да се консултираат со него.
Се препорачува да се избегне користење шпорет, рерна и слични уреди од 11 до 17 часот.
Поради најавените високи температури до 27 јуни, Институтот за јавно здравје ги повика работодавачите и работниците на строго почитување на препораките за заштита при работа во услови на екстремна горештина. Меѓу другото се препорачува да се обезбеди вентилација и климатизација на работните простории и да се избегнува работа на отворено од 11 до 17 часот.
Се препорачува и воведување работа од далечина, флексибилно или двократно работно време каде што е можно, како и ослободување од работни обврски за бремени жени и лица постари од 60 години доколку нема услови за прилагодување на работниот простор.
Меѓу мерките и препораките на Владата за овие вонредни временски услови е и дека градовите ќе имаат обврска да обезбедат климатизиран јавен превоз во текот на целиот ден.
Од 1 јули до 31 август, на државните сообраќајници во Македонија стапува на сила летниот режим на сообраќај, кој го ограничува движењето на тешки камиони со тежина поголема од 15 тони, во текот на викендите и во денови со исклучително високи температури.
Трамп ги продолжи вонредните мерки за Западен Балкан во кои е вклучена и „црната листа“
Американскиот претседател Доналд Трамп ја потпиша одлуката за Западен Балкан, со која се продолжуваат за една година вонредните мерки што поранешниот американски претседател Џорџ В. Буш ги донесе пред 16 години, објави американската влада. ккдкд
Одлуката, меѓу другото, вклучува објавување на таканаречените црни листи на лица и организации под санкции на САД поради кршење на Дејтонскиот мировен договор и загрозување на националната безбедност и интереси на САД. Од 2017 година, на листата е и претседателот на Република Српска (РС) Милорад Додик.
Трамп ги продолжи мерките за уште една година, и тоа го стори во претходниот мандат, во 2017 година, како и неговите претходници во претседателската функција.
На 26 јуни 2001 година, Буш издаде извршна наредба во која се наведува дека интересите на САД се загрозени од поединци и организации во Босна и Херцеговина, Македонија и Косово.
Наредбата предвидува голем број правни последици, вклучувајќи блокирање на средства, забрана за влез во САД и финансиски трансакции за обвинетите од Хаг и околу 150 лица и организации поврзани со обвинетите за воени злосторства, терористички организации или поткопување на Дејтонскиот мировен договор.
Вашингтон верува дека овие лица го загрозуваат мирот и процесот на стабилизација во регионот.
„Заканата што се рефлектира во постапките на лицата кои се вклучени, помагаат или финансираат екстремистичко насилство во Македонија и на други места во Западен Балкан, или во попречувањето на спроведувањето на Дејтонскиот мировен договор и резолуцијата на ОН во Косово, не е отстранета“, се наведува во одлуката, која, по Буш, Барак Обама и Џо Бајден, ја потпиша и Трамп.
Врз основа на таа одредба на Буш од 2001 година, постои таканаречена црна листа на лица и организации со кои на американската влада и компаниите им е забрането да соработуваат и чии средства и финансиски трансакции се блокирани во САД.
Листата, која ги вклучува лицата вклучени во оваа одлука, како и други од сличен тип, ја објавува Канцеларијата за контрола на странски средства (OFAC), која работи во рамките на Министерството за финансии на САД.
Досега, освен Босна и Херцеговина, САД ставија десетици лица од Западен Балкан на својата листа на санкции. Најчесто станува збор за државни функционери и луѓе на власт.
Во земјите од Западен Балкан, најсанкционирани лица има од Босна и Херцеговина и Србија.
Во спротивно, САД воведуваат санкции врз поединци и компании врз основа на Глобалниот закон Магнитски за кршење на човековите права и забрануваат секаков бизнис со компании кои нелегално стекнале капитал.
Според овој закон, Соединетите Држави се насочени кон поединци поврзани со сериозни злоупотреби на човековите права или корупција. Сите средства на санкционираните лица кои се наоѓаат на црната листа на САД се замрзнати. Покрај тоа, сите компании поврзани со нив се исто така блокирани.
Брнабиќ најави продолжување на апсењата на „оние кои планираат уништување на Србија“
Претседателката на Собранието на Србија, Ана Брнабиќ, изјави дека апсењата на оние кои „подготвуваат дела против уставниот поредок и безбедноста на Србија“ ќе продолжат и во наредните денови.
„Акцијата за апсење и идентификување на тие терористички организации апсолутно ќе продолжи. Претседателот на Србија ќе продолжи со состаноците со безбедносните служби и со врвот на полицијата со цел да се зачува уставниот поредок и да се спречи крвопролевањето што го планираа на Видовден“, изјави Брнабиќ за телевизијата Пинк.
На 25 јуни, полицијата уапси шест лица под сомнение дека планирале „насилна промена на власта“ на протестот што го најавија студентите во блокада за 28 јуни во Белград.
Вишото јавно обвинителство објави дека осомничените се согласиле да не се враќаат дома сè додека не „убијат или уништат“ претставници на државните институции, дека најавиле употреба на огнено оружје и се согласиле да „нападнат припадници на полицијата со цел да ги разоружаат“.
Брнабиќ им „честиташе“ на медиумите што учествуваа во создавањето на специјална емисија емитувана на 25 јуни на неколку провладини телевизиски станици, во која беа прикажани материјали за наводни планови за протести и блокади во Србија во претходните седум месеци.
И претседателот на владејачката Српска напредна партија, Милош Вучевиќ, изјави дека верува оти апсењата не се завршени и оцени дека безбедносните служби мора да ги идентификуваат „сите“ кои, според неговите зборови, планираат насилно преземање на власта.
Вучевиќ за телевизија Пинк изјави дека овие апсења „најдобро потврдуваат дека државата се консолидирала по обидот за обоена револуција“.
На 23 јуни, полицијата го уапси Стефан Томиќ, студент на белградскиот Факултет за физика, под сомнение за „повик за насилна промена на уставниот поредок“.
Неговото апсење беше осудено од студентите во блокада, професорите и граѓаните кои се собраа на 26 јуни на протест пред Палатата на правдата во Белград, каде што треба да биде сослушан Томиќ.
Од почетокот на масовните протести во Србија, полицијата постојано апси студенти, професори и демонстранти-некои од нив, под сомнение за обид за насилно соборување на уставниот поредок.
Едно од барањата на студентите во блокадата е да се запре кривичната постапка против сите нив, со оценка дека се уапсени спротивно на законот и дека станува збор за притисок и заплашување од страна на властите.
Студентите започнаа блокади на факултетот и протести кон крајот на ноември 2024 година - барајќи одговорност од властите за смртта на 16 лица при падот на настрешницата на реконструираната железничка станица во Нови Сад на 1 ноември.
Турција ја поддржува целта на НАТО за одвојување на 5% за одбраната
Турција ја поддржува одлуката на НАТО да ги зголеми одбранбените трошоци повеќе од двојно, односно на 5% од БДП до 2035 година, изјави извор од турското Министерство за одбрана во четврток (26 јуни).
Сојузниците на НАТО во среда се согласија да ја зголемат својата колективна цел за трошење на 5% од бруто домашниот производ во текот на следната деценија, наведувајќи ја долгорочната закана што ја претставува Русија и потребата од зајакнување на цивилната и воената отпорност.
„Турција е над критериумот од 2% според Заложбата за одбранбени трошоци. Како втора по големина армија на НАТО, Турција е меѓу петте најголеми придонесувачи во операциите и мисиите на алијансата“, изјави извор за Ројтерс.
Изворот рече дека Турција ги исполнила сите свои цели за капацитет на НАТО и продолжува да инвестира во развој и истражување на одбранбената индустрија.
Таа планира да прошири слоевита мрежа за воздушна одбрана низ целата земја, центрирана околу нејзиниот национален проект „Челична купола“.
„Инвестираме во системи за воздушна одбрана, хиперсонични, балистички и крстосувачки ракетни капацитети, беспилотни копнени, морски и воздушни системи, како и носачи на авиони од следната генерација, фрегати и тенкови“, рече изворот.
Новата цел на НАТО вклучува најмалку 3,5% од БДП за основни трошоци за одбрана, а остатокот ќе се потроши на инфраструктура поврзана со безбедноста за подобрување на цивилната подготвеност и отпорност.
Зеленски потпиша договор за специјален трибунал за Украина
Вечерта на 25 јуни, претседателот на Украина, Володимир Зеленски, потпиша договор со Советот на Европа за формирање специјален трибунал за гонење и судење на одговорните за „злосторството агресија против Украина“, надевајќи се дека еден ден ќе му се суди и на Владимир Путин, претседателот на Русија.
„Ќе биде потребна политичка и судска храброст за да се обезбеди судење на сите руски воени злосторници, вклучувајќи го и Владимир Путин“, рече Зеленски.
Ова е прв пат да се формира посебен трибунал под покровителство на Советот на Европа, органот за човекови права на континентот, кој има 46 члена, вклучувајќи ја и Украина.
Русија беше исклучена кратко откако започна војна против Украина во февруари 2022 година, која сè уште трае.
Специјалните трибунали им судат на лицата одговорни за сериозни кршења на човековите права во контекст на одреден конфликт, како што се воените злосторства во Југославија или геноцидот врз Тутсите во Руанда.
Неговото формирање, објавено на 9 мај во Лвив од страна на Украина и нејзините европски сојузници, ја заобиколува невозможноста за судење за „злосторството агресија“ пред Меѓународниот кривичен суд (МКС), кој Москва не го признава.
„Денешната спогодба и овој трибунал ни даваат право да добиеме правда за злосторството агресија“, рече Зеленски, кој пристигна во Стразбур доцна навечер откако го помина денот во Хаг на самитот на НАТО, каде што се сретна со американскиот претседател Доналд Трамп.
„Агресорот мора да ја изгуби“ војната, истакна тој.
„Злосторството агресија“ се дефинира како „планирање, подготовка, иницирање или извршување од страна на лице кое е во позиција ефикасно да контролира или насочува политичка или воена акција на држава, чин на агресија кој, по својата природа, сериозност и обем, претставува кршење на Повелбата на Обединетите Нации“.
Сепак, специјалниот трибунал нема да може да ги гони Путин, ниту неговиот премиер Михаил Мишустин и министерот за надворешни работи Сергеј Лавров, додека се на функција.
Петнаесет судии од различни земји ќе го изберат одборот на директори на новиот трибунал и ќе бидат назначени за необновливи мандати од три до девет години.
Покрај предложениот специјален трибунал, Советот на Европа стои зад регистарот на воени штети во Украина, кој досега има примено „повеќе од 34 000 барања за надомест“, според генералниот секретар на Советот на Европа, Швајцарецот Ален Берсе.
Трамп тврди дека нуклеарната програма на Иран е „уназадена за децении“, и покрај извештајот што ги доведува во прашање нападите
Американскиот министер за одбрана Пит Хегсет го потврди протекувањето на владин извештај за проценка на штетата предизвикана од американските воздушни напади врз три ирански нуклеарни локации.
Тој го нарече „прелиминарен“ со „ниско ниво на доверба“, а откако неколку медиуми цитираа извори кои велат дека документот покажал дека операцијата веројатно само ја запрела нуклеарната програма на Техеран за неколку месеци.
Извештајот беше остро критикуван од американскиот претседател Доналд Трамп, кој, заедно со Хегсет, разговараше за проценката со новинарите во Хаг на 25 јуни, каде што присуствуваа на самитот на НАТО.
Хегсет рече дека ќе биде покрената истрага на ФБИ за тоа како деталите од проценката, изработени од Агенцијата за одбранбено разузнавање (ДИА), разузнавачката гранка на Пентагон, биле протечени во неколку медиуми, вклучувајќи ги Си-Ен-Ен, Њујорк Тајмс, Вашингтон Пост и Ројтерс.
Во проценката се вели дека нападот не ги уништил клучните компоненти на нуклеарната програма на Иран, што е спротивно на тврдењето на Трамп дека нападите „целосно и целосно ги уништиле“ постројките за збогатување ураниум на Иран.
Иако Трамп им рече на новинарите во Хаг дека „разузнавачките информации се многу неубедливи“, тој верува дека штетата е „многу сериозна“.
„Имаше целосно уништување“, рече тој, додавајќи дека нападите ја вратија нуклеарната програма на Иран за „децении“.
„Тие нема да градат бомби уште долго“, додаде тој.
Некои аналитичари претходно изразија сомнеж во тврдењето на Трамп дека локациите биле уништени.
Во медиумските извештаи од 24 јуни, беа цитирани и неименувани лица кои биле запознаени со содржината, кои потврдија што беше објавено за проценката.
Едно лице цитирано од CNN рече дека проценката вели дека нападите го вратиле Иран „можеби најмногу неколку месеци“.
Извештаите, исто така, наведуваат дека анализата на DIA е во тек и може да се промени како што ќе бидат достапни нови разузнавачки податоци.
Министерот за одбрана Пит Хегсет, исто така, го оспори извештајот, поддржувајќи ја проценката на Трамп.
„Врз основа на сè што видовме, и јас видов сè, нашата кампања за бомбардирање го уништи капацитетот на Иран за нуклеарно оружје“, рече Хегсет.
„Нашите бомби ја погодија точно вистинската точка на секоја цел и работеа совршено“.
Тој додаде дека ефектот од бомбите бил „закопан под планина од урнатини“, па секој што вели дека бомбите не биле разорни, само се обидува да ја поткопа успешната мисија на претседателот.
Сателитските снимки покажаа големи дупки во областите на локацијата, но со оглед на тоа што објектот е длабоко под земја, штетата не беше видлива.
Рафаел Гроси, раководител на агенцијата на ОН за надзор на нуклеарната енергија (МААЕ), на 23 јуни изјави дека воздушните напади веројатно предизвикале „многу значајна“ штета на Фордоу, голем објект за збогатување на ураниум.
„Во моментов, никој, вклучително и МААЕ, не е во позиција целосно да ја процени подземната штета во Фордоу“, рече Гроси во изјава на итен состанок на управниот одбор на МААЕ, составен од 35 земји.
МААЕ не беше во можност да изврши инспекции во Иран поради конфликтот.
„Со оглед на употребениот експлозив и исклучително чувствителната природа на центрифугите на вибрации, се очекува многу значајна штета“, додаде Гроси.
Претседателката Сиљановска имала протоколарен разговор во Хаг со бугарскиот премиер Жељазков
Претседателката Гордана Сиљановска-Давкова, која учетвува на самитот на НАТО во Хаг, синоќа (24 април) пред вечерата што ја организираше холандскиот крал Вилем-Александер, имала пријатен протоколарен пријателски разговор со бугарскиот премиер Росен Жељазков.
„Имав пријатен разговор со премиерот на Бугарија. Разговаравме за нужноста од меѓусебно разбирање, да се почитуваме, за потребата да го следиме духот на двата народа, за да помагаме и за потребата кој е веќе внатре да му помогне на оној кој оди кон ЕУ. Верувам во потребата од пријателство, верувам дека ќе се случи и мислам дека тоа е нешто неминовно.
Не можам однапред да предвидам, но од она што го видов вчера гарантира дека низ дебата ќе дојдеме до единство“, посочи Сиљановска-Давкова пред денешниот состанок на Советот на НАТО во Хаг.
Премиерот Христијан Мицкоски, од Скопје на 24 април на новинарите им рече „немам информации“ за тоа што разговарале претседателката и бугарскиот премиер.
Министерот за надворешни работи и надворешна трговија Тимчо Муцунски, кој е во делегацијата со Сиљановска-Давкова, синоќа од Хаг порача дека тие се отворени за дијалог, но нема одговор од Софија.
Можноста за средба на Сиљановска-Давкова со Жељазков на маргините на Самитот на НАТО во Хаг беше најавувана од македонска страна и според изјавите и на претседателката и на премиерот, иницијатива имало и од претседателот на Европскиот совет Антонио Кошта.
Иако се очекуваше Бугарија на Самитот да биде претставувана од претседателот Румен Радев, сепак властите во Софија решија да го испратат премиерот Жељазков. Сиљановска-Давкова во пресрет на патувањето во Хаг рече дека иако таму нема да биде нејзиниот хомолог - Радев, таа нема проблем да седне и да разговара и со премиерот.
Двете соседни земји – Северна Македонија и Бугарија имаат билатерал спор кој е пречка за македонските евроинтеграции.
Северна Македонија е кандидат за членство во ЕУ од 2005 година. Откако државата го реши речиси тридеценискиот спор околу името во 2017 со Грција, официјална Атина го тргна ветото на евроатлантскиот пат на земјата. Државата го промени уставното име додавајќи ја придавката „Северна“ и стана членка на НАТО во 2020, но истата година вето за отпочнување преговори со ЕУ стави Бугарија.
Потоа, договор беше постигнат во 2022 година со усвојување на т.н. француски предлог со кој се предвиде Скопје да ги продолжи евроинтеграциите откако во преамбулата од Уставот ќе ја вметне и бугарската заедница.
Уставните измени не се случија, а Владата предводена од ВМРО-ДПМНЕ бара гаранции дека нема да има нови условувања во иднина од бугарска страна и нема да се оспорува македонскиот идентитет и јазик.
Мултимедија
Најпосетени
Што треба да знаете