Вести
Следните десет дена ќе се знае дали во Србија ќе има нови избори, вели Вучиќ
Српскиот претседател Александар Вучиќ на 28 јануари изјави дека во следните десет дена ќе се знае дали владејачката коалиција ќе предложи нов мандатар или ќе се одржат нови парламентарни избори, откако премиерот Милош Вучевиќ поднесе оставка.
Според Вучиќ, откако парламентот ќе ја потврди оставката на премиерот, ќе започне 30-дневна процедура за избор на нова влада. Доколку тоа не се направи, ќе се распишат избори.
Вучиќ рече дека ќе организира консултации со сите парламентарни партии за понатамошните чекори.
„Во следните десет дена ќе донесеме одлука дали ќе одиме на избори или ќе бидеме дел од новата влада. Ние како Српска напредна партија (СНС) се уште немаме кандидат“, рече Вучиќ.
Оваа изјава Вучиќ ја даде на прес-конференција по вонредна седница на Владата на Србија, на која присуствуваше и тој. Инаку денеска во неколку градови во Србија, студентите повторно организираа протести на 28 јануари, откако група мажи кои ноќта меѓу понеделникот и вторникот ги напуштија канцелариите на владејачката Српска напредна партија (СНС) ги нападнаа студентите кои во близина лепеа пропаганден материјал.
Во нападот тешко е повредена една студентка, а четири лица се уапсени и обвинети за насилничко однесување. Нападот се случи неколку часа откако претседателот Александар Вучиќ вечерта на 27 јануари испрати помирувачки пораки и уште еднаш повика на дијалог со студентите кои блокираат десетици факултети во земјата од крајот на ноември.
Како што рече, Ивица Дачиќ, претседател на Социјалистичката партија на Србија и коалициски партнер на СНС, „веќе изјави дека не е за нови избори“.
Милош Вучевиќ претходно во вторникот објави дека поднесува оставка, откако активисти на СНС претепаа група студенти кои лепеа пропаганден материјал во близина на просториите на партијата во Нови Сад.
Во нападот тешко е повредена една студентка. Нападот се случи откако претседателот, премиерот и претседателот на Народното собрание објавија дека се сисполнети сите барања на студентите, кои два месеца блокираат десетици факултети и бараат политичка и кривична одговорност за смртта на 15 лица при уривањето на настешницата на железничката станица во Нови Сад на 1 ноември 2024 година.
Во врска со нападот врз студентите пред просториите на СНС во Нови Сад, Вучиќ рече дека „нападите на просториите на таа партија траат со денови и недели“.
Тој рече дека тоа се повторило ноќта меѓу 27 и 28 јануари во Нови Сад.
„Речиси секогаш истите луѓе од истата анархистичка група во Нови Сад почнаа да чкртаат и да ставаат матрици по партиските простории. Момците од партиските простории излегоа, ги оттурнаа и ги тргнаа од таму“, рече Вучиќ.
Тој додаде дека до тој момент „се беше во ред“, а потоа се случи „нешто скандалозно што не го разбираме“.
„Тие момци почнаа да ги бркаат оние што ги поставуваа тие шаблони низ улиците на Нови Сад и на крајот повредија една девојка“, рече Вучиќ.
Тој рече дека луѓето кои ги претепале студентите нанеле „голема штета на Србија, на нивната партија, на секој од нас“.
Вучиќ рече дека „тешко ја прифатил“ оставката на српскиот премиер Милош Вучевиќ, бидејќи добро си ја завршил работата и „не направил ништо лошо“.
Вучиќ рече дека во Србија се поддржува „незаконско однесување“ на сите нивоа и праша што ќе се случи ако активистите од СНС почнат да „гребат простории на други партии“.
Поради нападот врз студентите во Нови Сад, академици организираа протести во повеќе градови во Србија.
Студентите повеќе од два месеци блокираат повеќе од 60 факултети и бараат кривична и политичка одговорност за смртта на 15 лица во уривањето на настрешницата на железничката станица во Нови Сад.
Владините претставници тврдат дека се исполнети сите барања на студентите.
Академиците, пак, велат дека барањата не се исполнети и дека прекинот на работата на факултетите ќе продолжи до понатамошно известување.
Неколку масовни протести, на кои присуствуваа десетици илјади граѓани, се одржаа во последните недели на повик на студентите кои ги блокираа универзитетите.
Вишото јавно обвинителство во Нови Сад поднесе обвинителен акт против 13 лица во врска со уривањето на настрешницата.
Меѓу обвинетите се поранешниот министер за градежништво, транспорт и инфраструктура Горан Весиќ и неговата помошничка Анита Димоски, како и поранешната директорка на јавното претпријатие „Инфраструктура на Железници на Србија“ Јелена Танасковиќ.
10 обвинети се во притвор, Весиќ е во бегство, а Танасковиќ и Димоски се во домашен притвор.
види ги сите денешни вести
Одобрено обвинение како продолжение на истрагата за „Адитив“
Кривичниот суд го одобри обвинителниот акт против Б.Н. во предметот „Адитив“, отфрлајќи ги приговорите на одбраната. Истовремено, поднесен е обвинителен предлог против уште три лица за кривично дело „оддавање службена тајна“, а се разгледува и можноста за спојување на обвиненијата.
„Ја информираме јавноста дека Советот за оцена на обвинителен акт со КОК ООА 47/25 против Б.Н. за кривичните дела од чл. 394, чл. 275-в и чл. 273 од КЗ поднесен како продолжение на истрагата во предметот познат како „Адитив“, донесе решение со кое приговорите на обвинетиот поднесени преку неговите бранители се одбиваат, а обвинителниот акт се одобрува во целост“, стои во соопштението од Кривичен.
Оттаму дополнуваат дека заедно со конкретниот обвинителен акт, до судот од страна на ОЈО ГОКК бил поднесен и обвинителен предлог против Б.П.М., Т.Д. и М.С. за кривичното дело од чл. 360 од КЗ – Оддавање службена тајна, кој предлог не подлежи на оцена.
Дополнително, поднесено е и барање за спојување на обвиненијата со предметот „Адитив“, за кое, како што соопштуваат од Кривичен, ќе се одлучува во наредниот период.
Предметот „Адитив“ е поврзан со злоупотреби во државната компанија ЕСМ и фиктивни тендери вредни милиони евра.
Истрагата опфаќа над 30 лица, меѓу кои и поранешни директори и функционери, а обвиненијата вклучуваат злосторничко здружување, злоупотреба на службена положба, перење пари и оддавање службена тајна.
Основното јавно обвинителство за гонење на организиран криминал и корупција поднесе обвинителен предлог и против, сега веќе поранешната, претседателка на Државната комисија за спречување на корупцијата (ДКСК), Татјана Димитровска, која се сомничи дека во периодот од мај до декември 2024 година, на неповикано лице обвинето во предметот „Адитив“ му сторила достапни податоци кои се сметаат за службена тајна.
Воедно, на Димитровска ѝ се става на товар и дека незаконски го добила сертификатот за класифицирани информации. Димитровска поднесе оставка на 25 јули, а на 29 јули македонското Собрание ја констатираше.
Владата апелира институциите да ги пријават службените возила во ДКСК
Владата апелира државните институции да го пријават бројот на службени возила во Регистарот на Државната комисија за спречување на корупцијата (ДКСК), за да нема злоупотреби со нивно користење во тек на кампањата за претстојните локалните избори.
„Апелирам до сите институции да го поднесат бројот на службените возила“, изјави денеска портпаролката на Владата Марија Митева. Претходно ДКСК соопшти дека во Регистарот на возила на државни органи, органи на локалната самоуправа, јавни претпријатија или други правни лица што располагаaт со државен капитал, институциите пријавиле податоци за 1916 возила.
Таа уверува дека ќе се испочитува рокот за означување со боја на регистарските таблички на службените возила.
„На седница на Владата веќе е донесена одлука дека рокот за поставување на регистерски таблички во боја е до 15 септември и тоа ќе го завршиме се во насока да нема повеќе злоупотреби на службени возила за цели кои се надвор од службените“, рече Митева.
Рокот за доставување податоци за бројот, марката на возилото, година на производство, регистарски број и возна состојба до ДКСК заврши на 18 август.
Доколку правните лица не ги достават податоците за возилата со кои расолагаат во предвидениот рок, ДКСК покренува прекршочна постапка во рок од 15 дена од истек на рокот за доставување на податоците.
Според одлуката на Владата, до 15. следниот месец сите службени возила треба да добијат специјални таблички во црвена боја. Се предвидува да се воведе и специјален регистар на државните автомобили, којшто ќе овозможи прецизна евиденција за местоположбата и користењето на секое службено возило.
Косовското собрание повторно не избра претседател, две кандидатки на владејачката партија не добија поддршка
Косовското Собрание и денеска, 20 август не се конституираше, по повеќе од 50 обиди за формирање ново собрание според резултатите од изборите во февруари.
Констутивата седница започна на 15 април, но следеше криза поради несогласувања меѓу партиите на власт и опозицијата во врска со начинот на гласање за претседател на Собранието - дали ќе биде јавно или тајно, и во врска со кандидатот на движењето Самоопределување Аљбулена Хаџија за таа позиција.
Уставниот суд со одлука му наложи на Собранието да избере нов претседател на Парламентот во рок од 30 дена, почнувајќи од 18 август, преку јавно гласање, но ставајќи го истиот кандидат на гласање не повеќе од три пати.
Кандидатката на Самоопределување за претседател на Собранието, Аљбулена Хаџија, од која владејачката партија не се откажуваше цело време, не беше повторно избрана на јавното гласање во продолжението на седницата на 20 август. Од вкупниот број присутни, 57 пратеници гласаа за, 56 против, а 3 беа воздржани.
Гљаук Коњуфца од Движењето Самоопределување потоа ја предложи Доника Гервал, која досега не беше номинирана, но таа исто така не ги доби потребните 61 глас за да биде избрана. И овојпат 57 пратеници гласаа и за тоа, 56 беа против, а 3 беа воздржани.
После тоа, претседателот на конститутивната седница, Авни Дехари, ја затвори седницата, а продолжението беше најавено за 22 август.
Албулена Хаџија и Доника Гервала - кои денес не добија гласови за претседател на Парламентот - се министри во Владата на Косово на должност (Владата на Косово е на функција од 27 март, кога беа потврдени конечните резултати од парламентарните избори, сè додека не се избере нова).
Движењето „Самоопределување“ на актуелниот премиер Албин Курти освои 48 места на изборите на 9 февруари, а другите парламентарни партии одбија да гласаат за својот кандидат за претседател на Собранието, за чија номинација се потребни најмалку 61 глас.
Иако „Самоопределување“ инсистира дека Аљбулена Хаџиу е достоен кандидат, некои од најголемите парламентарни партии, како што се ДПК, ДСК и АБК, ја исклучуваат како личност која „предизвикува раздор“.
На изборите, ДПК беше втора со 24 места, ДСК трета со 20, по што следуваше Српска листа - најголемата српска партија во Косово - со 9, и коалицијата на АБК и Социјалдемократската иницијатива, со 8 гласа. Уште 11 места ги држат малцинствата.
Најмалку 76 лица загинале во сообраќајна несреќа во Авганистан
Најмалку 76 лица загинале кога автобус што превезувал авганистански мигранти вратени од Иран се судрил со други возила во западен Авганистан, изјави покраински функционер.
„Седумдесет и шест граѓани ги загубија животите во овој инцидент, а тројца други се сериозно повредени“, изјави Мохамад Јусуф Саеди, портпарол на покраинската влада на Херат.
Полицијата во округот Гузара, кој се наоѓа на периферијата на градот Херат каде што се случи несреќата во вторник вечерта, соопшти дека автобусот се судрил со мотоцикл и камион што превезувал гориво. Како резултат на несреќата, избувнал пожар.
Автобусот превезувал Авганистанци кои неодамна се вратиле од Иран во авганистанскиот главен град, Кабул.
Најмалку 1,5 милиони луѓе се вратиле во Авганистан од Иран и Пакистан од почетокот на оваа година. Двете земји се обидуваат да ги депортираат мигрантите што ги примиле со децении, соопшти Агенцијата за миграција на Обединетите Нации.
Државната новинска агенција Бахтар соопшти дека несреќата во вторник вечерта била една од најсмртоносните во Авганистан во последните години.
Сообраќајните несреќи се чести во Авганистан поради оштетените патишта по децениите конфликт, ризичното возење по автопатите и недостигот на сообраќајни прописи.
Израел планира да повика 50.000 резервисти за преземање на Газа
Израелската војска планира да мобилизира околу 50 000 резервисти пред планираното заземање на градот Газа, а известувањата за регрутација треба да бидат испратени во наредните денови, изјави воен претставник за АФП.
Резервистите треба да ја започнат својата служба во септември, изјави претставникот во среда (20 август).
Ова би го зголемило вкупниот број на распоредени резервисти на околу 120.000. Тој рече дека заземањето на Газа првенствено ќе вклучува активни војници. Израелските трупи веќе се присутни во предградијата на Газа, рече функционерот, именувајќи ги населбите ал-Зејтун и Џабалија.
Израелските медиуми денеска објавија дека министерот за одбрана Израел Кац го одобрил оперативниот план за заземање на Газа доцна во вторник.
Ова се случи и покрај фактот што исламистичката организација Хамас, која САД и ЕУ ја прогласија за терористичка, тврдеше дека им дала на меѓународните медијатори „позитивен одговор“ на новиот предлог за прекин на огнот во Појасот Газа претходниот ден.
Градот Газа останува најважното упориште на Хамас, рече претставникот, истакнувајќи дека исламистичката група сè уште поседува „оперативни способности“ и е способна да се вклучи во „герилска војна“.
„Операцијата, исто така, имаше за цел да го уништи подземниот систем на тунели на Хамас“, рече тој.
Организациите за човекови права редовно ја истакнуваат катастрофалната хуманитарна ситуација во Појасот Газа.
Според планот на израелската војска, цивилите во градот Газа - проценети на околу 1 милион луѓе - треба да се преселат во шаторски кампови подалеку на југ. Нивното снабдување со медицинска помош и храна треба да се обезбеди таму, истакна воениот претставник, додавајќи дека тие соработуваат со меѓународните организации за помош.
„Јасен“ сѐ уште гори, се работи на локализирање на пожарот
Борбата со големиот шумски пожар во ловиштето „Јасен“ продолжува и денеска (20 август).
Во текот на ноќта, огнот се доближил до шумскиот пат кој води од влезната капија на ловиштето „Јасен“ до ресторанот на брегот на езерото Козјак, но не се проширил, информираше директорот на Дирекцијата за заштита и спасување, Стојанче Ангелов.
Тој посочи дека во синоќешната акција биле вклучени припадници на Единицата за брзо распоредување со пинцгауери, вработени во ловиштето „Јасен“, пожарникари од Скопје и Македонски Брод, како и тим на Дирекцијата за заштита и спасување.
„Утрово започна и специфична и опасна операција за правење нов противпожарен појас на стрмниот гребен кој се спушта кон езерото, со цел огнот да биде целосно запрен. И покрај густиот чад, еден полициски и еден армиски хеликоптер веќе дејствуваат од рано утро, а се очекува приклучување и на ер трактор од ДЗС штом се расчисти видливоста“, истакна Ангелов.
На терен се и специјалци од армијата и полицијата од елитните единици „волци“ и „тигри“, претежно алпинисти, кои работат во опасни услови на расчистување на појасот и за сузбивање на огнената стихија.
Во моментов во државата се активни уште неколку пожари кои се безопасни, бидејќи горат трева и грмушки, соопштија од ДЗР.
Поради честите пожари летово, на територијата на цела држава е прогласена кризна состојба, која Владата на седница на 7 август ја продолжи за нови 30 дена.
За да се зајакнат капацитетите во справување со пожарите, Дирекцијата за заштита и спасување преку општините потпиша договори со 352 граѓани што се пријавија на неодамнешниот повик за обука на пожарникари.
Белата куќа отвори официјален профил на ТикТок
Белата куќа отвори официјален профил на ТикТок на 19 август, додека се приближува нов рок за матичната компанија на мрежата, ByteDance, да се повлече од своите операции во САД или ќе се соочи со затворање.
Првата објава на профилот на Белата куќа, објавена во вторник, содржи снимки од јавните настапи на американскиот претседател Доналд Трамп, со пораката: „Америко, се вративме“.
ByteDance, со седиште во Кина, е критикувана во Соединетите Држави поради стравувањата дека би можела да дозволи податоците на американските граѓани да паднат во рацете на владата во Пекинг.
Алгоритмот на ТикТок, кој одлучува кои видеа корисниците ќе ги видат следно, е клучна точка на спор.
Критичарите на ТикТок предупредуваат дека кинеската влада би можела да го користи алгоритмот за да влијае на јавното мислење во САД, нешто што ТикТок и ByteDance отсекогаш го негираа.
Поранешниот американски претседател Џо Бајден минатата година потпиша закон со кој се бара од ByteDance да се повлече од своите операции во САД или ќе се соочи со забрана.
Трамп, кој го наследи Бајден, постојано го продолжуваше рокот за продажба на апликацијата. Оваа година, на 19 јуни, рокот беше поместен за 90 дена.
Технички, законот потпишан од Бајден дозволуваше само едно продолжување.
До денес, не се случила никаква продажба. За време на неговиот прв мандат, Трамп се обиде да влијае на продажбата со закана со забрана, но беше блокиран од американските судови.
На крајот, Трамп го смени курсот, користејќи го ТикТок во својата кампања за да допре до помладите гласачи и да го зајакне својот обид да се врати во Белата куќа.
Официјалните сметки на Белата куќа на платформата X и на Инстаграм имаат 2,4 милиони и 9,3 милиони следбеници, соодветно.
Официјалната сметка на Трамп на X, порано позната како Твитер, има 108,5 милиони следбеници, додека неговата омилена социјална мрежа е Truth Social, која ја поседува и има 10,6 милиони следбеници.
В сабота почнува увидот во Избирачкиот список
Во пресрет на локалните избори закажани за 19 октомври, во сабота на 23 август почнува јавниот увид во Избирачкиот список кој трае 20 дена односно до 11 септември на полноќ. ДИК го потпишува заклучениот Избирачки список, односно изводите од Избирачкиот список на кои се гласа, најдоцна на 3 октомври.
Граѓаните, барањето за запишување, дополнување или бришење на податоците во изводите на Избирачкиот список што е ставен на јавен увид ги поднесуваат писмено до подрачното одделение на ДИК или месната канцеларија на подрачјето на живеење, или по електронска пошта до ДИК. Со барањето се приложуваат и потребните докази. Барањата за запишување, дополнување или бришење на податоци во Избирачкиот список се поднесуваат во периодот од 23 август до 11 септември.
ДИК по барањата и пријавите на граѓаните е должна да одлучи со решение во рок од 24 часа од денот на приемот на барањето. Против решението со кое се одбива барањето, граѓанинот во рок од 24 часа од приемот на решението може да поднесе тужба до Управниот суд по електронски пат.
Барањето за доставување на Избирачкиот список политичките партии го доставуваат до ДИК по електронски пат, најдоцна на 11 септември.
ДИК во рок од три дена (најдоцна на 14 септември) од денот на завршување на јавниот увид, избирачкиот список го доставува до политичките партии кои доставиле барање до денот на завршување на јавниот увид, а политичките партии во рок од пет дена од денот на приемот на избирачкиот список до ДИК (најдоцна на 19 септември) доставуваат барање за запишување, дополнување или бришење на податоци.
Министерството за внатрешни работи во рок од еден ден од завршувањето на јавниот увид на 12 септември треба да достави листа на државјани кои поднеле барање за издавање нова лична карта или патна исправа по било кој основ од денот на распишување на изборите до денот на завршување на јавниот увид и листа на лица кои ќе наполнат 18 години до денот на изборите. ДИК податоците за овие лица ги впишува во избирачкиот список по службена должност.
Избирачкиот список во кој се извршени сите промени кои произлегле од јавниот увид, ДИК го заклучува најдоцна 15 дена по завршениот јавен увид, најдоцна на 26 септември. ДИК го потпишува заклучениот Избирачки список, односно изводите од Избирачкиот список на кои се гласа, најдоцна 15 дена пред денот на одржувањето на изборите или најдоцна на 3 октомври.
Воените лидери на НАТО ќе се состанат на 20 август на разговори за Украина
Воените лидери на НАТО се очекува да се состанат в среда (20 август) за да разговараат за Украина додека Вашингтон и европските престолнини разработуваат детали за тоа како би можеле да изгледаат безбедносните гаранции за Киев, јави новинската агенција Ројтерс.
Генералот на воздухопловните сили на САД, Алексус Гринкевич, кој исто така ги надгледува сите операции на НАТО во Европа, ќе ги информира началниците на одбраната за резултатите од состанокот меѓу американскиот претседател Доналд Трамп и рускиот претседател Владимир Путин на Алјаска минатата недела.
Адмиралот Џузепе Каво Драгоне, претседател на воениот комитет на НАТО, рече дека ќе има видеоконференција во среда.
„Како што напредуваат дипломатските напори за обезбедување мир во Украина, со нетрпение очекувам (од Гринкевич) информации за моменталната безбедносна ситуација“, напиша Драгоне на мрежата Икс.
И американски функционер, зборувајќи за Ројтерс под услов да остане анонимен, рече дека се очекува американскиот генерал Ден Кејн, претседател на Здружениот генералштаб, да присуствува на состанокот, но плановите би можеле да се променат.
Пентагон не одговори веднаш на барањето за коментар.
Официјални лица изјавија за Ројтерс дека Пентагон спроведува вежби за планирање за видот на поддршка што Вашингтон би можел да ја понуди, што оди подалеку од едноставно обезбедување оружје.
Британската влада соопшти дека она што е познато како Коалиција на волјата (коалиција од 31 земја кои ветија зајакната поддршка за Украина против руската агресија) која се состана виртуелно во вторник, се согласила нивните тимови за планирање да се сретнат со американските колеги во наредните денови за да ги унапредат плановите за безбедносни гаранции за Украина.
Украинскиот претседател Володимир Зеленски по состанокот со Трамп и европските лидери изјави дека безбедносни гаранции за Киев веројатно ќе бидат разработени во рок од 10 дена.
Трамп ја отфрли можноста за распоредување американски војници во Украина и не даде детали за безбедносните гаранции за кои претходно рече дека Вашингтон би можел да му понуди на Киев според кој било повоен договор.
Претходно, Трамп му телефонираше на Путин за да започне со подготовки за средба лице в лице меѓу Путин и Зеленски по еден ден вонредни состаноци во Белата куќа на 18 август, како дел од напорите за завршување на војната во Украина.
Трамп рече дека му се јавил на Путин за да разговара за можна средба со Зеленски откако го угости него и лидерите на Велика Британија, Франција, Германија, Италија, Финска, Европската Унија и НАТО во Белата куќа.
На Милорад Додик ќе му биде одземен дипломатскиот пасош
Дипломатскиот пасош на Милорад Додик ќе биде одземен, потврди министерот за надворешни работи на Босна и Херцеговина, Елмедин Конаковиќ, за Радио Слободна Европа.
Пасошот мора да биде вратен во рок од 15 дена, според министерството.
Во случај да не го почитува овој рок, Министерството за надворешни работи ќе ја извести граничната полиција и дипломатско-конзуларната мрежа дека неговиот пасош е поништен.
Оваа одлука доаѓа еден ден откако официјално заврши мандатот на Додик како претседател на Република Српска и откако Судот на Босна и Херцеговина ја отфрли жалбата на адвокатот на Додик против одлуката на Централната изборна комисија (ЦИК) на БиХ, со која му се одзема мандатот за оваа функција.
Одлуката на Судот е конечна.
Според Изборниот закон на БиХ, Централната изборна комисија треба да распише предвремени избори за претседател на Република Српска, кои мора да се одржат во рок од 90 дена. Мандатот на избраниот претседател би траел до општите избори планирани за октомври следната година.
Претходно, ЦИК на Босна и Херцеговина донесе одлука за одземање на мандатот на Милорад Додик, неколку дена откако Судот на Босна и Херцеговина објави на почетокот на август дека Додик е законски осуден на една година затвор и шест години забрана за вршење јавни функции во Босна и Херцеговина поради непочитување на одлуките на високиот претставник на меѓународната заедница во БиХ.
Со жалбата, до која Радио Слободна Европа имаше пристап, правниот тим на Милорад Додик ја оспорува ретроактивната примена на прекинувањето на мандатот, бидејќи датумот на прекинување беше одреден на 12 јуни, додека одлуката за прекинување на мандатот беше донесена на 6 август.
Додик ја отфрли и конечната пресуда на Судот на Босна и Херцеговина и одлуката на ЦИК и најави одржување референдум во Република Српска за крајот на септември.
Адвокатскиот тим на Додик, исто така, побара од Уставниот суд на БиХ привремена мерка со која ќе се забрани извршувањето на пресудата до конечната одлука на Уставниот суд, иако Додик јавно не го признава овој суд.
Адвокатскиот тим на Додик претходно објави дека обраќањето до Уставниот суд е предуслов за обраќање до Европскиот суд за човекови права во Стразбур.
Според конечната пресуда на Судот на Босна и Херцеговина, Додик е осуден бидејќи го потпишал објавувањето на законот, кој претходно беше поништен од високиот претставник Кристијан Шмит, за неспроведување на одлуките на Уставниот суд и Канцеларијата на високиот претставник на територијата на Република Српска.
Правниот тим на Милорад Додик побара од Судот на Босна и Херцеговина да ја претвори едногодишната затворска казна во парична казна, што е можност предвидена со Кривичниот законик на Босна и Херцеговина. Судот на Босна и Херцеговина го прифати ова барање.
На овој начин, Додик ќе плати околу 36.500 марки (малку повеќе од 18.000 евра) за една година, односно 100 марки (50 евра) на ден во затвор.
Мултимедија
Најпосетени
Што треба да знаете