Вести
Се одржува голем протестен марш „Правда за Фросина“
Со порака „правда за Фросина, започна вечерашниот протест на голема група граѓани предводени токму од родителите и сестрата на загинатата студентка Фросина Кулакова. Онаму каде се случи трагедијата, на булеварот Партизански одреди близу Универзална сала беше испратена порака дека вакви настани не смеат да се повторат. Големиот гнев е предизвикан од несреќата која се случи на 29 јануари, а за која подоцна се дозна дека ја предизвикал пијан млад возач, без возачка дозвола, кој возел со огромна брзина и поминал на црвено на семафорите каде на пешачки премин поминувала Фросина.
На денешниот втор протест беше упатена порака „Кој е следен?“ како реакција на сите инциденти со неконтролирано возење и неказнување, кои резултираат со трагични последици.
„Безбедноста е право, не луксуз“, „Ако корумпиран систем живее, народот умира“, „Денес правда за Фросина, утре за сите нас“, „Не е кобно местото, туку луѓето и системот“, „Партизанска не е Формула1“, „Улиците не се тркачки патеки“ беа дел од транспарентите, кои ги носе учесниците на протестот.
Со извикување „бараме правда“ демонстрантите го продолжија протестот марширајќи кон Собранието на Северна Македонија, кон државното обвинителств и Кривичниот суд Скопје.
Инаку 22 годишната Фросина Кулакова беше студентка од Неготино, а загина откако во неа удри „пежо 207“ управувано од Васил Јованов. Револтот кај граѓаните кулминираше после информацијата дека тој претходно добил судска пресуда од Кривичниот суд Скопје „воспитна мерка“ иако бил гонет за поседување и продажба на голема количина дрога.
Несреќата се случи седум месеци по пресудата додека се чека одлука од Апелациониот суд по жалбата на обвинителството. Исто така Јованов во минатото предизвикал и сообраќајка во која повредил жена пешак, но исплатил само паричен надомест за тоа без да одговара. Гневот на граѓаните е насочен кон неговите родители и судијката која ја донела воспитната мерка.
Нејзината сестра Росица денеска од протест во Кавадарци побара да одговара и таткото на сторителот и судијката.
Вчера пак медиумите објавија дека возачот, 20 годишниот Васил Јованов кој е во притвор има мобилен телефон. Денеска од Управата за извршување санкции рекоа дека ќе истражуваат како за само еден ден успеал да дојде до телефон.
Кривичниот суд имаше објаснување
Од Кривичниот суд Скопје во објаснуваадека судот за две кривични дела „неовластено производство и пуштање во промет на наркотични дроги“ донел осудителна пресуда за момче кое немало полни 20 години.
„Упатување во воспитно поправен дом, каде согласно чл. 48 ст.3 и ст.4 обвинетиот во домот останува најмалку 6 месеци, а најмногу 5 години односно до наполнети 23 годин.
Согласно Законските одредби од ЗКП по досудена Заводска мерка, Мерката притвор не може да опстојува, заради што Јавниот обвинител вложил жалба во однос само на кривичната санкција. Предметот на 07.11.2024 година е доставен на надлежно постапување на Апелациониот суд Скопје, од каде сеуште не е вратен на евентуално извршување“, рекоа на 30 јануари од Судот.
Сепак и покрај тоа што од судот изразија жалење за загубата на млад човечки живот истакнаа дека не им е јасна конекцијата на пресудата со овој настан.
„Станува збор за општествен проблем!“, предупреди Судот.
Инаку сообраќајката во која беше прегазена Фросина Кулакова не е прва која предизвикува бурни реакции и гнев кај граѓаните за дивеењето по улиците. Само на истиот булевар, „Партизански одреди“, изминатите години згаснаа неколку млади животи.
Во 2015 беше прегазена студентката Фросина Цековска од 26-годишен возач возач кој исто така беше под дејство на алкохол и со брзина поголема од дозволената.
24-годишната Викторија Николова од Радовиш во јануари 2022 година, беше прегазена на истиот булевар, но кај трговскиот центар Сити мол. 22-годишниот возач, според Обвинителството, тогаш возел со поголема брзина од дозволената.
види ги сите денешни вести
Расте бројот на жртви од руските напади во Киев, сè уште се извлекуваат тела од урнатините
Украинските служби за итни случаи сè уште извлекуваат тела од урнатините на уништените станбени згради во Киев, погодени од руските ракетни и беспилотни летала, додека бројот на жртви во украинската престолнина се искачи на 24.
Државната служба за итни случаи информираше дека работници со кучиња трагачи и тешка градежна опрема ги пребаруваат урнатините на 18 јуни за повеќе преживеани од нападот еден ден претходно - еден од најголемите во Киев во последниве години.
Повеќе од 150 луѓе во Киев и на други места беа ранети во серијата напади од 17 јуни што ја погоди и Одеса, при што загинаа најмалку две лица во пристаништето на Црното Море.
Украинските власти прогласија ден на жалост за жртвите од нападот, кој украинскиот претседател Володимир Зеленски го нарече „чист тероризам“ и го обвини рускиот лидер Владимир Путин.
„Целиот свет, Соединетите Држави и Европа конечно мора да реагираат како што цивилизираното општество реагира на терористите. Путин го прави ова единствено затоа што може да си дозволи да ја продолжи војната“, изјави Зеленски.
Зеленски отпатува во Канада за да се придружи на самитот на Групата седум, а на маргините закажа разговори со американскиот претседател Доналд Трамп.
Сепак, состанокот беше откажан поради предвременото заминување на Трамп, а лидерите не успеаја да постигнат силен договор за конфликтот во Украина. Неименуван канадски функционер им изјави на новинарите дека за тоа е виновен американскиот отпор.
Трамп ја наведе ескалацијата на конфликтот меѓу Израел и Иран како причина за неговото предвремено заминување.
Зеленски се сретна со британскиот премиер Кир Стармер, по што британската влада објави дека во наредните недели ќе се одржи уште еден состанок на „Коалицијата на волјата“.
Стармер, кој ја дискутираше идејата за испраќање меѓународни мировници во Украина по постигнувањето прекин на огнот, најави нов пакет санкции за Русија, како и Канада.
Во Киев, цел деветкатен дел од станбена зграда беше срамнет со земја од ракетен напад за време на рускиот напад, кој се случи рано наутро додека многу жители спиеја. Прозорците на соседните згради беа скршени, а купишта отпад беа расфрлани по улицата.
„Тоа е катастрофа“, изјави за „Курент тајм“ еден преживеан во Киев, со лицето и градите покриени со крв.
„Тоа беше првиот удар... Ме фрли во ходник. Отидов да ја викнам мајка ми. Мора да била во шок и се обидела да го затвори прозорецот. Потоа се случил втор удар. Не се сеќавам многу. Се освестив и ја извлеков мајка ми од собата, фала му на Бога, бидејќи имаше толку многу чад што можеше да се задуши“, рече преживеаниот Украинец.
Русија започна уште еден бран оган од беспилотни летала врз украински цели рано утрото на 18 јуни, иако беше многу помал и помалку смртоносен од нападот претходниот ден, кој исто така вклучуваше крстосувачки и балистички ракети.
Ослободени од затворски притвор сите осомничени за падот на настрешницата во Нови Сад
Апелациониот суд во Нови Сад го укина притворот на уште петмина осомничени во случајот со паѓањето на настрешницата на железничката станица во тој град, кога загинаа 16 лица.
Тие беа осудени на куќен притвор во траење од три месеци.
Со оваа одлука на судот, ниту еден од 13-те уапсени по падот на настрешницата повеќе не е во затворски притвор.
Како што беше најавено на 18 јуни, Апелациониот суд делумно ги прифати жалбите на бранителите и им го прекина притворот на Љиљана Милиќ Марковиќ, Зорица Славковиќ Марјановиќ, Душан Јанковиќ, Милан Шпремиќ и Дејан Тодоровиќ.
Претходно, на 29 мај, совет на Вишиот суд во Нови Сад одлучи да го замени притворот на осомничените Небојша Шурлан, Слободан Наумовиќ, Милан Јелкиќ и Марина Гавриловиќ со куќен притвор.
На 12 јуни, притворот на Зорица Славковиќ Марјановиќ исто така беше укинат и заменет со забрана за напуштање на станот.
Обвинението, кое обвинителството го поднесе на 30 декември, беше вратено кон средината на април од страна на Вишиот суд во Нови Сад „на доработка“ со образложение дека „е потребно подобро разјаснување на предметот за да се испита неговата суштина“.
Со тоа, постапката беше вратена во фаза на истрага.
Меѓу 13-те лица опфатени во обвинението на обвинителството во Нови Сад се поранешниот министер за транспорт Горан Весиќ, неговата соработничка во министерството Анита Димоски и поранешната директорка на „Српска железничка инфраструктура“ Јелена Танасковиќ.
Тројцата од нив, како и поранешниот директор на „Српска железничка инфраструктура“ Небојша Шурлан, се товарат за тешко кривично дело против јавната безбедност, во врска со кривичното дело предизвикување јавна опасност.
Танасковиќ и Димоски веќе се во домашен притвор, додека Горан Весиќ се брани од слобода.
Меѓу обвинетите, кои беа ослободени од притвор, се проектанти и лица задолжени за контрола и надзор.
Тие се товарат за тешко кривично дело против општата безбедност, во врска со неправилно извршување на градежни работи.
Постапката ја води и Вишото јавно обвинителство во Белград, кое на почетокот на март поднесе обвинение за пропустите што доведоа до паѓање на настрешницата.
Реконструираната зграда на Железничката станица во Нови Сад беше официјално отворена само четири месеци пред падот на настрешницата, со порака дека реновираната зграда ги надминува европските стандарди.
Несреќата доведе до масовни протести во Србија, на кои се бараше одговорност за несреќата од властите. Протестите, кои ги предводеа студенти во последните месеци, станаа симбол на пошироко незадоволство од владеењето на правото во Србија - заедно со прашањето дали небрежноста и корупцијата на системот доведоа до падот на настрешницата и смртта на 16 лица.
Ристески: Ако има потреси во економијата, ќе реагираме со соодветни мерки
Комплетната анализа на Државниот пазарен инспекторат (ДПИ) за зголемување на цените на прехранбените производи ќе биде готова во текот на наредната недела, најави денеска (18 јуни) заменик министерот за економија и труд, Марјан Ристески, прашан за тоа дали веќе се работи на мерки за намалување на цените на прехранбените производи во супермаркетите.
„Ние ги следиме цените максимално преку Државниот пазарен инспекторат правиме анализи и доколку заклучиме дека има потреба да се донесе некоја одлука и мерка ќе го направиме во интерес на граѓаните за заштита на животниот стандард. Пред сѐ, на нас како Влада ни се интерес граѓаните и нивниот животен стандард“, изјави Ристески.
Заменик министерот за економија и труд додаде дека врз основа на тековната анализа, која ја изготвува ДПИ има мало зголемување на цените.
„Особено вратени се дел од цените на производите како што беше пред одлуката, којашто беше пред еден месец и повеќе, има мало покачување на одредени цени, има останато некои и на исто ниво. Но, имаме поголемо зголемување на цените на кафето и маслото, кои се берзански производи и зависат од светските берзи. Меѓутоа, сепак за крајна одлука ќе биде известена јавноста, доколку ја има, а тоа ќе ја покаже комплетната анализа, која ќе биде готова во текот на наредната недела“, рече Ристески.
Прашан за кризата на Блискиот исток, која најверојатно ќе се рефлектира и на берзата на енергенси и за тоа дали Владата има план како да се справи со нов енергетски удар, Ристески посочи дека Владата ја следи ситуацијата на светско ниво.
„Ја следиме не само ситуацијата на внатрешната економија, туку ги пратиме и светските случувања, како што иде, така и ќе реагираме како Влада. Мораме да бидеме и претходно подготвени, да имаме информации и да имаме состаноци на повеќе министерства и на ниво на Влада. Се следи ситуацијата доколку ескалира работата, која би предизвикала и одреден потрес и на светската економија, нормално е дека ќе реагира Владата со соодветни мерки“, изјави Ристески.
Министерката за финансии Гордана Димитриеска-Кочоска деновиве изјави дека Владата не може да влијае на цената на берзанските производи, но дека внимателно се следи ситуацијата.
Претседателот на Регулаторната комисија за енергетика (РКЕ), Марко Бислимоски пак изјави дека војната меѓу Израел и Иран ќе има влијанија врз цената на нафтата и во Македонија, но дека не очекува влијание на цените на останатите продукти. Тој изрази надеж дека по пикот цените ќе се стабилизираат, посочувајќи го примерот со војната во Украина кога цената на дизелот достигна 110 долари по барел.
„Банкарски тајни“ за имињата на фирмите што земаа од унгарскиот кредит
Тајна е кои фирми и колку пари земале од унгарскиот кредит, за кој се задолжи државата, а македонските граѓани ќе плаќаат камати следните 15 години. Ниту Владата ниту Развојната банка не откриваат податоци за приватните фирми. ДКСК следи дали има можност за корупција, додека кредити веќе се одобрени
Дадени се 125 милиони евра што е половина од парите наменети за компаниите од унгарскиот кредит. Ова за Радио Слободна Европа го потврдуваат од Развојната банка на Северна Македонија преку која парите земени како кредит од Унгарија, треба да завршат кај македонските компании.
Но, од банката не откриваат кои се приватните фирми кои веќе добиле пари особено бидејќи кредитите кои ги земаат сепак не се од државната банка, туку преку комерцијалните банки.
„Информациите кои се бараат од Развојна банка, се информации со кои банката се стекнала при вршење на банкарски и други активности за поединечни лица и истите согласно Законот за банките, член 111 и член 112, претставуваат банкарска тајна која банката е должна да ја заштити и чува“, велат од Развојната банка.
Од средината на мај Владата овозможи да се користат парите од кредитот кој државата го зема од Унгарија. Предвидено е дека 250 милиони евра ќе бидат финансиска поддршка за компании преку поволни кредити кои ќе ги земаат од комерцијалните банки, кои пак преку Развојната банка ќе ги користат парите од унгарскиот кредит. Од Владата велат дека интересот за користење на средствата од компаниите е голем, но дека сите надлежности се во Развојната банка.
„Владата ги воспостави условите за користење на оваа кредитна линија на најтранспарентен начин што само по себе им овозможува на институциите да го спроведуваат процесот согласно утврдени процедури. Достапноста на оваа можност за сите домашни компании кои се заинтересирани, го потврдува сосема спротивното – оваа Влада носи мерки и политики кои согласно правила и процедури важат подеднакво за сите“, велат во одговорот за РСЕ од Владата.
Инаку неодамна опозициската партија Левица објави дека ги барала податоците за приватните компании кои ќе ги користат народните пари, и тоа по Законот за слободен пристап до информации од јавен карактер, но дека не ги добиле со образложение дека се работи за банкарска тајна.
Антикорупциска го следи процесот
Државната комисија за спречување на корупцијата смета дека мора да се откријат имињата на фирмите кои ги користат народните пари. Според ДКСК ова е процес од висок јавен интерес кој не може да биде нетранспарентен.
„ДКСК смета дека станува збор за прашање од висок јавен интерес, поради што будно ја следиме состојбата и ја разгледуваме можноста за постапување, во рамки на нашите надлежности. Сметаме дека секое трошење на јавни средства, во случајов средства добиени преку задолжување на државата, мора да биде целосно транспарентно“, велат од Антикорупциската комисија.
Инаку развојната банка се плаши да ги открие информациите кои се бараат од неа и поради казните. Според банката откривањето на информациите се санкционира со глоба во износ од 15.000 евра за банката и 30% од изречената казна за одговорното лице.
„Освен санкцијата, објавувањето на овие заштитени информации ќе предизвика негативна репутација за банката, како и можност за покренување на низа правни процеси од страна на крајните корисници“, велат од банката.
Според економскиот аналитичар Зоран Јовановски би требало граѓаните да знаат како се трошат нивните пари, но дека клучнато е што сепак банките ги одобруваат кредитите.
„ Транспарентноста, мислам дека сите сме за транспарентност, тоа е генерален принцип, јас немам ништо против. Сепак ќе помине време, ќе помине година, ќе поминат две, па ќе видиме како ќе оди наплатата на тие кредити. За мене битна е одлуката што банките ја проценуваат кредитната способност на компаниите кои што ќе го земат кредитот, бидејќи банките имаат знаење за таа работа. Тоа е многу подобро одошто државата да даваше проценки за оние компании кои ќе аплицираат со своите проекти дали ќе имаат капацитет да ги сервисираат тие кредити“, вели Јовановски.
Условите за земање кредит за фирмите се со 1,95 % камата, грeјс период од 3 години и рок на отплата до 15 години. Тие за проектот кој ќе го финансираат од кредитот мора да имаат сопствено учество од 20 %. Одлуката за финансирање е во рацете на комерцијалните банки.
За унгарскиот заем, Собранието на 17 септември изгласа посебен Закон по што на 8 октомври во Будимпешта се потпиша договорот.
Кредитите за компаниите се дел од милијарда евра заем кој Северна Македонија го доби од Унгарија. Двесте и педесет милиони евра се за компаниите, исто толку за локалните власти, а 500 милиони за враќање стари заеми на државата.
Македонскиот премиер Мицкоски и неговиот унгарски колега, Виктор Орбан, го договорија кредитот на НАТО самитот во Вашингтон, во јули 2024 година.
Рокот за отплата е 15 години со три години грејс период, каматата за државата е 3,25 проценти.
Производство и трговија најчесто финансирани области
Развојната банка до сега исплатила125,8 милиони евра во три транши од кредитната линија за подршка и развој на домашните компании кон деловните банки. Најголемиот износ кој една фирма може да го добие е 10 милиони евра. До сега парите кои се доделени се за 470 проекти од кои најголем дел односно 269 се за мали фирми, 113 средни, 60 големи и 28 микро компании.
Според дејностите 171 проект се од производството, 113 од трговијата, 88 за транспорт, а останатите се за градежништво, хотели и угостители. За останати дејности банката во одговорот до РСЕ навела 15 проекти од останати дејности, но не е потенцирано за какви дејности станува збор.
По вид на инвестиција, 48% од исплатениот износ е за инвестиции во градежни фирми, 40% за инвестиции во опрема, 7% за инвестиции во обновливи извори на енергија и околу 6% за инвестиции во транспортни средства.
Инаку тие пари компаниите не смеат да ги користат за да враќаат стари долгови кон банките бидејќи каматната стапка од државниот кредит е многу пониска од оние на комерцијалните банки.
Првично имало огромна заинтересираност за парите од кредитот, дури и поголема од она што го проектираше државата. Дел од банките одлучиле да финансираат повеќе фирми со помали средства за да може што е можно повеќе компании да искористат од кредитот на државата, а остатокот од парите да ги добијат преку комерцијалните кредити. Кредити добиле само приватни фирми.
Осум македонски државјани евакуирани од Израел
Министерството за надворешни работи и надворешна трговија информира дека првата група македонски државјани кои побарале евакуација од територијата на Израел, синоќа (17 јуни) безбедно пристигна на скопскиот аеродром.
Се работи за осум лица (четири деца и четири возрасни) кои, како дел од поголем организиран транспорт, ја напуштија територијата на Израел и се упатија кон Египет, од каде што со авион во сопственост на Владата беа транспортирани до Скопје.
Министерот за надворешни работи и надворешна трговија, Тимчо Мучунски, преку социјалните мрежи информираше за успешно завршениот процес на евакуација, нагласувајќи дека со оваа операција нашата земја се вбројува меѓу првите во Европа кои организираа и реализираа безбедно враќање на свои државјани од зоната на конфликт на Блискиот Исток.
Министерството, преку дипломатско-конзуларното претставништво во Тел Авив, останува во континуирана комуникација со останатите македонски државјани кои се наоѓаат на територијата на Израел.
За сите прашања и конзуларна поддршка, на располагање се дежурните телефонски броеви.
Убиени 59 лица во Газа додека се обидувале да добијат храна
Најмалку 59 Палестинци беа убиени, а повеќе од 200 ранети во вторник наутро додека чекаа камион со храна да пристигне во јужна Газа, соопшти Министерството за здравство на Газа.
Инцидентот се случил во градот Кан Јунис, каде што луѓето чекале конвои на ОН и комерцијални конвои со хуманитарна помош.
Според очевидци, израелските сили прво извршиле воздушен напад врз блиска куќа, а потоа отвориле оган врз насобраните луѓе. Сведокот Јусеф Нофал рече дека видел многу луѓе како лежат неподвижни и крварат.
„Тоа беше масовна ликвидација. Тие пукаа дури и додека луѓето бегаа“, рече тој.
Телата на мртвите и ранетите беа пренесени во болницата Насер во Кан Јунис, каде што беше потврден бројот на жртви.
Локалните власти ја обвинуваат израелската армија дека со недели отворала оган врз гладни цивили кои се обидувале да стигнат до точките за дистрибуција на храна управувани од приватниот изведувач Хуманитарна фондација Газа (GHF), поддржана од САД и Израел.
Официјален Тел Авив тврди дека целта на новата дистрибутивна мрежа е да се спречи помошта да стигне до Хамас, но ОН и хуманитарните организации ги отфрлаат овие тврдења и предупредуваат дека системот ги крши основните хуманитарни принципи.
Израелската војска досега не го коментираше најновиот напад, иако претходно призна дека понекогаш испукува „предупредувачки истрели“ кога цивилите се приближуваат премногу до воените сили.
Агенциите на ОН предупредуваат на опасноста од глад во Газа, каде што живеат околу 2 милиони луѓе. Хуманитарната мрежа под ОН продолжува да се обидува да достави помош, но се соочува со сериозни предизвици: воени блокади, грабежи и целосен колапс на јавниот ред.
Од почетокот на израелската воена кампања во октомври 2023 година, повеќе од 55.300 Палестинци се убиени, од кои повеќе од половина се жени и деца, според Министерството за здравство на Газа.
Израел ја започна офанзивата по нападот на Хамас на 7 октомври во кој беа убиени околу 1.200 луѓе, а 251 лице беше киднапирано. Според израелските податоци, 53 заложници сè уште се во Газа.
Над 600 странци избегале од Иран во Азербејџан
Повеќе од 600 странски државјани преминале од Иран во соседен Азербејџан откако Израел започна со напади врз земјата минатиот петок, изјави за АФП, владин претставник во Баку.
„Од почетокот на воената ескалација меѓу Израел и Иран, повеќе од 600 граѓани од 17 земји се евакуирани од Иран преку Азербејџан“.
Евакуираните, кои ја преминале границата преку контролниот пункт Астара на брегот на Каспиското Море, се транспортираат до аеродромот во Баку и „се превезуваат во нивните матични земји со меѓународни летови“, рече изворот.
Меѓу евакуираните има граѓани на Русија, Белорусија, Казахстан, Киргистан, Таџикистан, Узбекистан, како и Германија, Шпанија, Италија, Србија, Романија, Португалија, САД, Обединетите Арапски Емирати, Кина и Виетнам.
Азербејџан ги затвори своите копнени граници во 2020 година поради пандемијата Ковид-19 и оттогаш ги држи затворени.
„Со оглед на потребата од евакуација, Азербејџан привремено ја отвори својата граница за оние што го напуштаат Иран“, рече функционерот.
Министерството за надворешни работи на Полска соопшти дека ќе евакуира дел од персоналот на својата амбасада во Техеран преку Баку.
„Одлучивме да евакуираме или да го поддржиме заминувањето на персоналот кој не треба да остане во земјата, таканаречениот персонал кој не е неопходен“, изјави за новинарите заменик-министерката за надворешни работи Хенрика Мосчичка-Дендис.
„Нашите колеги ќе се обидат да стигнат до границата со Азербејџан“, рече таа, без да прецизира за колку луѓе станува збор.
Туркменистан, една од најзатворените земји во светот соопшти дека дозволил и транзит на околу 120 лица евакуирани од Иран преку нејзина територија, главно граѓани на земјите од Централна Азија.
Израел започна невидени напади врз Иран од петокот (13 јуни), велејќи дека има за цел да го спречи Техеран да развие нуклеарно оружје - цел што Иран негира дека ја остварува.
Во израелските напади загинаа најмалку 224 лица, а повеќе од 1000 се повредени, според официјалниот број објавен во неделата.
Според канцеларијата на премиерот Бенјамин Нетанјаху, Иран извршил повеќекратни напади во кои од петокот загинале најмалку 24 лица во Израел.
Мицкоски: Софија има можност да го докаже тоа што го зборува со повлекување на амандманите во ЕП
Премиерот Христијан Мицкоски изјави дека тоа што го зборуваат претставници на Бугарија ќе имаат можност да го докажат на 24 јуни со повлекување на амандманите во Европскиот парламент, и да ја прифатат иницијативата за средба во рамки на состанокот на НАТО во Хаг кон крајот на месецов.
„Пристигнуваат многу различни пораки од официјална Софија. Нашите стари рекле „помалку слушај што зборуваат, повеќе гледај што работат“. Има таква можност да го покажат ова што го зборуваат. На 24 јуни на Комисијата за надворешни работи при ЕП (АФЕТ) се наоѓа извештајот во којшто очекувам бугарските членови на ЕП да ги повлечат амандманите во кои бараат македонскиот многувековен идентитет и јазик да се додефинираат со зборчето сегашен или „present“, и во рамките на тој дух да биде усвоен тој извештај и потоа и патоказот за малцински права којшто многу скоро ќе биде на дневен ред. Така што имаат можност ова што го збруваат да го покажат и на дело“, изјави Мицкоски прашан да ја искоментира вчерашната изјава на бугарскиот претседател Румен Радев.
Бугарскиот претседател Радев синоќа (16 јуни) од Тирана порача дека не станува збор за нерешени билатерални односи, за наметнување вето или за запирање на процесот на интеграција, туку за внатрешни предизвици кои се поврзани со човековите права во Република Северна Македонија.
„Има Договор за добрососедство, пријателство и соработка од 2017 година и во него има два протокола. Има преговарачка рамка од 2022 година, европски консензус на сите земји членки и од власта на Северна Македонија, така што Бугарија никогаш не поставила и нема да постави услови надвор од тој договор, надвор од преговарачката рамка и надвор од двата протоколи“, рече Радев.
Мицкоски изрази очекување Софија да ја прифати средбата во рамки на состанокот на НАТО во Хаг, и како што истакна, „да се разговара и за Коридорот 8, да биде и тоа приоритет кај нашиот источен сосед и како добри соседи да ги градиме нашите меѓусебни односи“.
Шефот на дипломатијата Тимчо Муцунски вчера изјави дека дека се работи на засилување на динамиката на средби со официјална Софија и оти сме подготвени за изнаоѓање на рационални решенија во рамките на европските вредности, но како што рече, наше е да ставиме јасна црвена линија по однос на одредени прашања поврзани со идентитетските атрибути.
Премиерот Мицкоски викендов информираше дека е остварена комуникација со Канцеларијата на Европската Комисија во државава по иницијативата за средба со бугарската страна и оти има предлог термин, за кој се чека да се изјасни Бугарија.
Претседателката Гордана Сиљановска-Давкова, пак, во петокот кажа дека иако е правило да има средба со нејзиниот колега, не е проблем да разговара за деблокирање на нашите евроинтеграции со бугарскиот премиер Росен Жељазков на Самитот на НАТО во Хаг, со оглед на тоа дека е потврдено оти нејзиниот бугарски колега, претседателот Румен Радев нема да дојде во Хаг.
Вучиќ: Српската напредна партија нема да организира контрамитинг на 28 јуни
Српскиот претседател Александар Вучиќ изјави дека владејачката Српска напредна партија (СНС) нема да организира контрамитинг на 28 јуни, денот кога Србија го слави Видовден, а во период кога студентите кои веќе неколку месеци ги блокираат факултетите најавија собир во Белград.
„Размислуваме за Нови Сад, без разлика дали е на 28 јуни или на 5 јули. Секако сакаме да избегнеме конфликт, бидејќи сме одговорни луѓе“, рече Вучиќ.
Тој рече дека за три месеци ќе биде еден од оние „кои физички ќе ги штитат блокадите од нападите на обичните луѓе“.
Претставниците на властите во Србија го користат терминот „блокатори“ за студентите и граѓаните кои протестираат неколку месеци барајќи одговорност за смртта на 16 лица при падот на настрешницата во Нови Сад.
Во врска со повеќемесечните протести и блокади во Србија, Вучиќ рече дека „сите одговорни ќе бидат изведени пред лицето на правдата“, обвинувајќи ги студентите во блокадата и учесниците во протестите за „колапс на државните универзитети и државните институции“.
Во врска со неодамнешното протерување на припадници на Министерството за внатрешни работи (МВР) на Србија од Косово, Вучиќ рече дека „нема крај на тензиите“, но дека „Србија ќе победи“.
На 14 и 15 јуни, властите во Косово протераа четворица припадници на Министерството за внатрешни работи на Србија кои живеат во Косово, под сомнение дека претставуваат закана за националната безбедност на Косово. Според одлуката на Министерството за внатрешни работи на Косово, тие беа лишени од косовското државјанство. Властите во Белград го нарекоа потегот на косовските власти „антисрпска политика“.
Осврнувајќи се на актуелниот конфликт меѓу Израел и Иран, српскиот претседател Александар Вучиќ за РТС изјави дека Србија „сака да ја смири ситуацијата“.
„Имаме пријателски односи со двата народа“, рече Вучиќ и додаде дека Србија продава муниција „и на муслиманските земји и на еврејската држава и на католичките, протестантските и православните земји, ние продаваме муниција на сите земји“.
„Тоа е нашата работа, од тоа живееме“, додаде Вучиќ.
Израелско-иранскиот конфликт започна на 13 јуни со израелски напад врз Иран и неговите воени и нуклеарни постројки. Потоа Иран започна напади со балистички ракети врз Израел, а врховниот лидер на Иран вети дека ќе „зададе тешки удари“ како одмазда. Следеше меѓусебно гранатирање, кое сè уште трае.
Земјите од регионот на Блискиот Исток го осудија нападот на Израел, додека лидерите од целиот свет повикаа на итен прекин на воените дејствија од двете страни.
Четиринаесет мртви во руски напад врз станбени области во Киев
Во комбиниран руски напад со беспилотни летала и ракети во Киев рано утрото на 17 јуни загинаа најмалку 14 лица, вклучувајќи еден американски државјанин, а беа повредени најмалку 44 лица, соопштија украинските власти.
Официјалните лица изјавија дека руските сили користеле дронови и ракети во нападот, кој погоди неколку области на главниот град.
Градоначалникот на Киев, Виталиј Кличко, изјави дека девет лица се ранети во градскиот округ Свјатошински, а уште 11 во округот Соломјански. Шест лица се хоспитализирани, а пожари избувнаа во два други киевски округа како резултат на паѓање на остатоци.
Шеесет и двегодишниот Американец „починал во куќа во населбата Соломјански, спроти местото каде што медицинските лица им помагале на повредените“, напишал Кличко на Телеграм.
„Киев се соочи со еден од најстрашните напади“, напиша украинскиот претседател Володимир Зеленски во објава на социјалните мрежи.
Зеленски рече дека Русија лансирала вкупно повеќе од 440 дронови и 32 ракети во нападот во текот на ноќта на 17 јуни, кој ги таргетирал и регионите Чернигов, Житомир, Кировоград и Николаев.
Украинските воздухопловни сили соопштија дека собориле 402 од дроновите и 26 од ракетите.
„Сè уште не е јасно колкумина се заробени во урнатините на зградата што беше делумно уништена“, рече Зеленски на X, додавајќи дека куќите во осум области на Киев се оштетени и дека најмалку 75 лица се ранети во нападите низ Украина.
„Ваквите напади се чист тероризам. И целиот свет, САД и Европа конечно мора да одговорат како што цивилизираното општество реагира на терористите. Рускиот претседател Владимир Путин го прави ова само затоа што може да си дозволи да ја продолжи војната. Тој сака војната да продолжи. Погрешно е кога моќните на овој свет замижуваат пред тоа“, напиша Зеленски.
Тимур Ткаченко, началник на градската воена администрација, потврди дека избувнале пожари во различни делови на Киев. Други делови од земјата беа исто така нападнати, вклучувајќи го и југоисточниот град Запорожје, каде што регионалниот гувернер пријави најмалку четири напади.
Во меѓувреме, Русија објави дека нејзината воздушна одбрана соборила два украински беспилотни летала што се движеле кон Москва.
Руските единици за воздушна одбрана, исто така, уништиле 51 украински дрон над граничниот регион Белгород во период од три и пол часа, соопшти Министерството за одбрана.
Нападот извршен од руските сили е најновиот во серијата масовни напади со беспилотни летала и ракети врз Киев и други градови во земјата.
Ова се случи во пресрет на закажаната средба меѓу американскиот претседател Доналд Трамп и украинскиот претседател Володимир Зеленски на самитот на Групата седум (Г7) во Канада.
Но, доцна на 16 јуни, состанокот беше откажан, откако Белата куќа објави дека Трамп ќе се врати во Вашингтон порано поради тензиите на Блискиот Исток. Се очекува да се одржат и други средби еден на еден на Зеленски со светските лидери.
Шефот на кабинетот на украинскиот претседател, Андриј Јермак, остро ги осуди новите руски напади врз Киев, велејќи дека Москва „продолжува со војната против цивилите“.
Москва продолжи со нападите врз Украина и покрај напорите на САД да посредуваат во постигнување на прекин на огнот. Малку напредок е постигнат во преговорите, освен размената на затвореници. Москва го отфрли барањето на Киев за безусловно примирје, додека Украина ги отфрли руските барања како „ултиматуми“.
Мултимедија
Најпосетени
Што треба да знаете