Вести
ЕУ ќе ја поедностави процедурата за депортација на илегалните мигранти
Европската комисија предложи регулатива за воспоставување на заеднички европски систем за враќање, кој ќе овозможи побрзи, поедноставни и поефикасни процедури за депортација од ЕУ на илегалните мигранти и лицата чии барања за азил се одбиени, вклучително и отворање на „Центри за враќање“ во трети земји.
Според еврокомесарот за внатрешни работи и миграција Магнус Брунер, станува збор за збир на ефикасни и модерни процедури за враќање на илегалните мигранти.
„Овие правила се фундаментални за заштита на просторот за слободно движење на ЕУ без внатрешни граници. Со новиот европски систем за враќање, ќе се погрижиме оние кои немаат право да останат во ЕУ да бидат вратени назад“, истакна Брунер.
Новата правна рамка за враќање претставува дополнување на Пактот за миграција и азил, што беше усвоен минатата година, а со кој ЕУ постави сеопфатен пристап кон справување со предизвиците поврзани за миграцијата.
Според статистичките податоци, во моментов од ЕУ се депортираат само околу 20 проценти од лицата кои немаат право на легален престој во земјите членки на Унијата.
Целта на новите правила е да се воспостави модерна и поедноставна правна рамка, со што на земјите членки на ЕУ ќе им се овозможат потребните механизми за поефикасно враќање на илегалните мигранти со целосно почитување на основните човекови права.
Мерките предвидуваат и специфични правила за лица кои претставуваат безбедносен ризик, реадмисија како дел од процесот на враќање, како и отворање на „Центри за враќање“, кои врз основа на билатерален или договор на ниво на ЕУ можат да се воспостават и во земји што не се членки на Унијата, доколку тие ги почитуваат меѓународните стандарди и принципи за човекови права согласно меѓународното право.
Со одредбите на Пактот за миграција и азил, чија примена треба да започне од средината на 2026 година, се предвидува побрза и поефикасна обработка на барањата за азил, а со новопредложениот систем ќе се овозможи одбиените баратели на азил веднаш да бидат депортирани од ЕУ.
види ги сите денешни вести
Судот одреди обештетување за семејствата на настраданите во Нови Сад
Вишиот суд во Нови Сад денеска (18 јули) соопшти дека донел пресуда со која државното претпријатие „Инфраструктура железница Србија“ и државата Србија се обврзуваат да им исплатат надомест на штета за претрпена душевна болка на четири лица поради смртта на нивни блиски.
Радио-телевизија Србија (РТС) објави дека се работи за членови на фамилиите на загинатите при падот на настрешницата.
Во соопштението се наведува дека на тужителите Б.Р., Б.П. и И.Р. треба да им се исплатат по 5.000.000 динари (околу 42.600 евра), а на тужителката М.Р. износ од 4.500.000 динари (околу 38.400 евра) со законска казнена камата.
Против оваа пресуда е дозволена жалба до Апелациониот суд во Нови Сад.
При уривањето на настрешницата на Железничката станица во Нови Сад на 1. ноември 2024 година, загинаа 16 луѓе. Настрешницата падна четири месеци по свеченото отворање на зградата по тригодишна реконструкција.
Оваа трагедија доведе до повеќемесечни протести и блокади на факултетите во Србија, на кои се бара одговорност од властите за несреќата.
И „Козле“ остана без вода, децата привремено згрижени на други клиники
Поради проблем со водоснабдувањето, децата кои имаат потреба за хоспитализација на Клиниката за белодробни заболувања во Козле, ќе се препраќаат кон Клиниката за детски болести и Клиниката за инфективни болести и фебрилни состојби.
Министерството за здравство денеска (18 јули) соопшти дека во Козле ќе продолжи само третманот на пациенти во дневна болница и амбулантските прегледи.
По нормализирање на водоснабдувањето во Универзитетската клиника за белодробни заболувања кај децата ‘Козле’, непречено ќе продолжи хоспитализацијата на пациентите во оваа јавна здравствена установа - велат од Министерството за здравство.
Директорката на болницата, Катерина Бошкова вчера за дел од медиумите изјави дека функционираат со цистерни со техничка вода донесена од Јавното претпријатие „Водовод и канализација“.
„Невозможно е да се лекуваат болнички пациенти без вода“, додаде д-р Бошкова.
ЈП „Водовод и канализација“-Скопје во врска со прекинот на водоснабдувањето на Детската болница Козле попладнево информираше дека при нивниот извршен увид констатирале оти причината за прекинот не е во нивна надлежност.
Во денешното писмено соопштение, од ова јавно претпријатие посочуваат дека станува збор за дефект на водоводната инсталација која е во сопственост на болницата.
За наведеното, известени се надлежните во болницата и тие треба да го санираат дефектот на внатрешната водоводна инсталација, велат од скопски Водовод.
Од јавното претпријатие посочуваат дека и покрај нивните апели, во текот на увидот констатирале дека болницата Козле нерационално ја користи водата за пиење, со полевање на парковската површина во склоп на болницата.
Од утре уште повисоки температури, здравствените власти со препораки за заштита на здравјето на населението
Во периодот од 20 до 24 јули 2025 година се очекува значително зголемување на дневните температури, кои во одделни региони може да достигнат и до 41°C – информираше денеска (18 јули) Министерството за здравство, повикувајќи се на најновата прогноза од Управата за хидрометеоролошки работи (УХМР).
По тој повод, Министерството апелира да се почитуваат општите препораки за заштита на населението од високи температури.
Меѓу нив, се вбројува препораката за престој во затворени, разладени простории, особено во периодот од 11:00 до 17:00 часот.
-Внесувајте доволно течности, избегнувајќи алкохол и засладени пијалоци. Носете лесна, светла облека и користете заштита за глава и очи. Избегнувајте физичка активност во најтоплите часови од денот – советуваат здравствените власти.
Во денешното соопштение се наведува дека особено чувствителни на високи температури се децата, бремените жени, старите лица и лицата со хронични заболувања.
-Во случај на симптоми како вртоглавица, главоболка, гадење или забрзан пулс – веднаш побарајте медицинска помош, велат од Министерството за здравство.
Оттаму препорачуваат активностите на отворено во најтоплиот дел од денот да се одложат, а на работното место и во домот да се обезбедат микроклиматски услови (разладени простории со температура до 25°C).
УХМР претходно информираше дека под влијание на топла воздушна маса од југ, од утре следува период на сончево и многу топло време со мала до умерена облачност.
Особено топло време се очекува во текот на следната работна седмица, кога дневната температура насекаде ќе биде над 30 степени Целзиусови, на повеќе места ќе надминува 35 степени, а наместа ќе биде и над 40 степени Целзиусови - велат од Управата за хидрометеоролошки работи.
Продолжен притворот на обвинетите за пожарот во дискотеката во Кочани
Кривичниот суд денеска (18 јули) соопшти дека е продолжен притворот на обвинетите за пожарот во дискотеката „Пулс“ во Кочани.
Воедно, оттаму информираат дека обвинителниот акт е веќе доставен до сите обвинети и нивните адвокати. Откако ќе го примат, започнува рок од осум дена за приговор. По истекот на тој рок, судечкиот совет ќе заседава и ќе ја извести јавноста за следните чекори.
Судот, исто така, потврди дека Основното јавно обвинителство Скопје ќе го води понатамошниот дел од постапката.
-Кривичниот совет при овој суд постапувајќи по предлог на Основното јавно обвинителство – Кочани за продолжување на мерките за обезбедување присуство на обвинетите, на обвинетите Д.Ј. од Кочани, Т.Ј. од Кочани, Џ.К. од Скопје и Б.Х. од Скопје им ја продолжи мерката притвор. Додека на обвинетите М.С., О.Г., Љ.П., И.Г., М.Г., С.Д., сите од Кочани, потоа Ј.Ј. и Љ.Г. од Скопје како и Б.М и Ш.Х., од Тетово и Е.М. од Виница им се продолжи мерката куќен притвор - стои во соопштението од Кривичен.
Во однос на конкретниот обвинителен акт КООА 155/25, оттаму информираат дека на 02.07.2025 година во попладневните часови списите на предметот биле доставени до судот, заедно со целокупниот доказен материјал меѓу кој вештачења, медицинска документација, како и техничка опрема одземена во текот на истрагата.
Потоа, предметот и сите предлози се завеле во АКМИС системот, а во наредниот ден актот е распределен на совет за оценка на истиот.
-При увидот во списите на предметот, утврдено е дека три обвинети правни лица немаат законски претставник во постапката, по што судот определи претставници по службена должност – велат од Кривичен.
Оттаму посочуваат дека дополнително на 08.07.2025 од страна на Јавниот обвинител било доставено доуредување на обвинителниот акт од 01.07.2025 година, кое се однесувало на генералиите и личните податоци на обвинетите.
Откако беа исполнети сите услови, советот издаде наредба за достава на обвинителниот акт со споменатото до уредување, заедно со листа на докази до сите обвинети, нивните бранители и претставниците на обвинетите правни лица поставени по службена должност.
Кога истиот ќе биде примен од странките, ќе започне да тече рокот од 8 дена за приговор, а по приемот на сите приговори и истек на Законски утврдениот рок, советот ќе заседава и ќе известува, велат од Кривичен.
Исто така, судот ја информира јавноста дека во текот на вчерашниот ден, 17.07.2025 година, во овој суд е доставено решение на Јавното обвинителство на Република С. Македонија РО бр. 367/25 од 15.07.2025 година со кое за месно и стварно надлежно обвинителство за постапување по конкретниот обвинител акт се определува Основно јавно обвинителство Скопје.
Оттаму апелираат да се почитуваат правата на сите засегнати како и законските рокови.
Согласно обвинителниот акт, на 34 физички и три правни лица обвинети за пожарот во дискотеката „Пулс“ им се ставаат на товар - тешки дела против општата сигурност.
Помеѓу обвинетите се сопственици на локали, управители, инспектори, градоначалници, членови на обезбедување и државни службеници.
Поради немање доволно докази, постапката се запира за 11 лица, помеѓу кои двајца поранешни министри.
Во пожарот што се случи на 16 март, годинава животот го загубија 62 лица помеѓу кои шест деца, а над 200 беа повредени.
Случај „Адитив“: Претседателката на ДКСК обвинета за одавање службена тајна
Основното јавно обвинителство за гонење на организиран криминал и корупција поднесе обвинителен предлог против претседателката на Државната комисија за спречување на корупцијата (ДКСК), Татјана Димитровска, која се сомничи дека во периодот од мај до декември 2024 година, на неповикано лице обвинето во предметот „Адитив“ му сторила достапни податоци кои се сметаат за службена тајна.
Воедно, на Димитровска ѝ се става на товар и дека незаконски го добила сертификатот за класифицирани информации.
-Како службено лице – претседател на ДКСК, од мај до декември 2024 година на неповикано лице обвинето во предметот „Адитив“ на друг начин му сторила достапни податоци кои согласно чл. 25 и чл. 50 од Законот за спречување на корупција и судир на интереси, како и чл. 289 од ЗКП претставуваат службена тајна – стои во денешното соопштение од Обвинителството.
Според соопштението, Димитровска прекусвојот службен телефон и апликациите Viber и WhatsApp му давала податоци на обвинетиот за поведени постапки, за отворање на предмети против сега обвинетите правни и физички лица во предметот „Адитив“, службени белешки за отворање на предмет и распределба на член на ДКСК, одлуки по истите, како и податоци за проверка на имот на обвинетиот и на неговото семејство.
- Со своите дејствија таа открила податоци што согласно закон се сметаат за службена тајна и чие откривање може да има штетни последици како за службата, така и за постапките што се водат пред ОЈОГОКК - велат од Обвинителство.
На Димитровска ѝ се става на товар и дека незаконски го добила сертификатот за класифицирани информации, откако преку службениот телефон му испратила пристапни податоци на ревизор во Државниот завод за ревизија, кој во нејзино име го положил тестот за безбедносна обука.
-На истата обвинета ѝ се става на товар и дека со цел да добие Сертификат за положен испит, во август 2024 година од службениот телефон преку апликацијата Viber на третообвинетиот – ревизор во ДЗР, му испратила компјутерски податоци – логови за пристап на електронски систем за обука на Дирекцијата за безбедност на класифицирани информации, велат од Обвинителството.
Оттаму посочуваат и дека третообвинетиот од службениот електронски уред на Државниот завод за ревизија пристапил од нејзината електронска адреса и во име и за нејзина сметка го положил тестот за класифицирани информации.
Сертификатот за успешно завршување на курсот за класифицирани информации издаден од страна на Дирекција за безбедност на класифицирани информации второобвинетата го употребила како вистински компјутерски податок и врз основа на него ѝ бил издаден безбедносен сертификат за пристап до национални класифицирани информации со степен Државна тајна, појаснуваат од ОЈО.
Во обвинителен акт поднесен до Основен Кривичен суд, веќе обвинето во предметот „Адитив“, сега се товари и за кривични дела Злосторничко здружување, за помагање при Злоупотреба на постапка за јавен повик, доделување на договор за јавна набавка или јавно приватно партнерство и кривично дело Перење пари и други приноси од казниво дело.
-Обвинетиот, како член на група, вработен во едно од обвинетите правни лица, од месец јули 2022 до октомври 2024, со умисла извршил две или повеќе временски поврзани дејствија и искористувајќи ист траен однос и исти прилики и околности, на управителките на обвинети правни лица во предметот „Адитив“ им ставил на располагање средства и ги отстранил пречките за кривичното дело – информираше Обвинителството денеска (18 јули).
Во соопштението се додава дека на овој начин, тој им помогнал свесно да ги повредат прописите и да ги изиграат постапките за доделување на договорите за јавни набавки.
Обвинителството појаснува дека во периодот од месец август 2023 до ноември 2024 година, обвинетиот на сопствената денарска сметка уплатил парични средства во вкупен износ од 408.300 денари.
Покрај ова, од правното лице во коешто бил вработен во 84 наврати примил парични средства на име трошоци за службени патувања во вкупен износ од 1.963.800 денари.
Иако знаел дека средствата правното лице ги прибавило со сторување на кривичното дело Злоупотреба на постапка за јавен повик, доделување на договор за јавна набавка или јавно приватно партнерство, со цел да го прикрие понатамошниот нивен тек, ги пуштил во оптек и ги подигнувал во готово, со што ги исполнил битијата на кривичните дела кои сега дополнително му се ставаат на товар, велат оттаму.
Покрај Димитровска, обвинителството поднесе обвинителен предлог и против уште две лица. Меѓу нив е и раководителка на сектор во Подружница ТЕЦ Неготино АД ЕСМ Скопје, која во септември 2024 година, исто така, на неповикано лице му доставила податоци што се сметаат за службена тајна.
-Во обвинителниот предлог првообвинетата е службено лице – Раководител на сектор во Подружница ТЕЦ Неготино АД ЕСМ Скопје која од јули до ноември 2024 година, на неповикано лице обвинето во предметот „Адитив“, на друг начин му сторила достапни податоци што претставуваат службена тајна и се однесуваат на севкупното работење на правното лице.
Дополнително, откако од Одделот за криминалистичка полиција кој постапувал по наредба на ОЈОГОКК, било доставено Барање за доставување на документацијата што се однесува на спроведена постапка за набавка на мазут за периодот од 2021-2023 година, таа преку апликација WhatsApp на телефонски број на обвинетиот му испратила фотографија од Известувањето иако сите податоци, документи, известувања и извештаи согласно закон се сметаат за службена тајна и нивно откривање може да има штетни последици за започнатата постапка.
Истражната постапка беше отворена кон крајот на април како резултат на екстрахираните електронски докази во рамките на предметот „Адитив“ кој е веќе започнат и се суди во дигиталната судница во Идризово.
Онколози од Скопје почнаа со прегледи во Битола
Доктори од Универзитетската клиника за радиотерапија и онкологија почнаа да прават консултативни прегледи во одделот за онкологија во Клиничката болница во Битола на барање на таа јавна здравствена установи.
Идната недела такви прегледи ќе прават и во Клиничката болница во Тетово - изјави директорот на УК за радиотерапија и онкологија, Игор Стојковски.
„Еден колега веќе отиде, а една колешка е отидена денеска. Планираме и следниот петок да оди уште една колешка од различни патологии. Во прво време тие одат за консултативни прегледи. Покрај Клиничката болница во Битола, има барање и од Клиничката болница во Тетово, каде доктори ќе одат идната недела. Тие се таму еден или два дена“, рече д-р Стојковски.
Тој најави дека пациентите ќе бидат навремено информирани за тоа кои доктори ќе одат и која патологија ќе ја покриваат, па наместо да доаѓаат во Скопје ќе можат со нив да се консултираат во местото на живеење.
Посочи дека во прво време тоа ќе биде во форма на консултативни прегледи, а потоа зависно од инфраструктурата и можностите на клиничките болници во Битола и Тетово, ќе почне да се аплицира и некоја специфична онколошка терапија.
„Се планира и други болници да бидат опфатени, уште разговараме, бидејќи некои од нив немаат соодветна инфраструктура. За да доаѓа некој специјалист од Скопје треба да има и соодветна инфраструктура во смисла на дневна болници, просторија за прегледи...“, додаде д-р Стојковски.
Прашан кога онколошките пациенти ќе можат да ја подигнуваат терапијата во аптека во местото на живеење, рече дека за хроничната таблетарна терапија која ја користат пациентите со хормонски зависен канцер на дојка, идната недела или неделата по неа, на Управниот одбор на Фондот за здравствено осигурување треба да се усвои одлука, потоа се објавува во соодветни правилници, по што пациентите ќе можат да ја подигнуваат во аптеките.
„Со извештај од специјалист онколог, матичниот лекар пишува рецепт и пациентот ќе моќе да ја подигне терапијата во аптека. Работиме и на протоколите за апликација на терапија во другите центри што ќе бидат дисперзирани и се надевам дека и нив ќе ги завршиме“, појасни д-р Стојковски.
Досега пријавени околу 400 лица за превенција од пожари
Околу 400 кандидати се пријавиле на јавниот повик на Владата за ангажман на граѓани за превенција на пожарите, а рокот за пријава е продолжен за уште прет дена.
Раководителот на Главниот штаб за управување со кризи, Стојанче Ангелов денеска (18 јули) на прес конференција изјави дека еден од основните услови е лицата кои се пријавуваат да бидат регистрирани како активни баратели на работа.
„За жал, нам ни се пријавија повеќе луѓе вклучително и кај мене лично, но и во нашите институции, лица кои не се пријавени во Агенцијата за вработување како активни баратели на работа или работат на други места, но се заинтересирани да се вклучат во оваа мерка. Од овие причини овие лица не можат да се приклучат кон оваа мерка“, образложи Ангелов.
Тој појасни дека оние лица кои не се активни баратели на работа имаат време и можат да се пријават во АВСРМ и потоа да отидат во најблискиот Центар за вработување и да поднесат соодветна апликација.
Притоа лицата треба со себе да носат и лекарска потврда издадена од матичниот лекар во која се наведува дека немаат сериозни болести, кои би пречеле во извршување на работните задачи.
„Да, примањата се навистина ниски, но овие примања се како една мала награда која би им се дала за време на селекцијата на која тие би присуствувале. Нашата намера е лицата кои ќе се пријават да добијат униформа и опрема, да поминат неколкудневна обука и потоа оние кои ги исполнуваат основните услови да бидат вклучени во полесни пожари, вклучително гаснење пожар на тревни површини“, додаде Ангелов.
Можност за вработување во територијалните противпожарни единици
Според него, оние кои понатаму би се покажале како похрабри и поподготвени, би имале можност да бидат вработени во локалните територијални противпожарни единици (ТППЕ).
Од најдобрите, особено во скопскиот регион, како што рече, ќе се одберат лицата кои ќе станат дел од новата специјална единица за заштита и спасување, која веќе е во фаза на формирање.
Ангелов информира дека најмал интерес за оваа мерка има во Скопско, а е предвидено ангажирање на 80 лица. Во останатите градови има поголем интерес.
За мерката за ангажирање на 400 лица, пред сѐ, во создавањето на противпожарните појаси, Владата информираше на 07. јули.
Владината портпаролка, Марија Митева на прес конференција соопшти дека секој ангажиран учесник ќе добива финансиска поддршка од 24.000 денари.
Во понеделникот пак, на 14. јули пратеничката група на СДСМ и коалицијата поднесе амандман за зголемување на буџетските средства за противпожарна заштита во износ од 500 милиони денари.
Пратеничката, Сања Лукаревска тогаш од собраниската говорница истакна дека законот предвидува да има еден пожарникар на 1.500 жители.
„Врз основа на оваа математика има двојно помалку пожарникари од законски предвидените норми. А се провлекува, исто така, и проблемот со возила и со опрема“, рече Лукаревска, додавајќи дека дел од пожарникарите работат со стари возила, некаде и од 50-тата година и со стара опрема, а не постои ниту соодветен тренинг-центар за обука на новите и старите пожарникари.
Амандманот за пожарникарите сепак не беше изгласан. Односно, како што рече пратеничката од ВМРО-ДПМНЕ, Дафина Стојаноска никој не гласал „против“, но и никој не гласал „за“.
„Не знам колку се во тек колегите од СДСМ, ДУИ и Левица дека веќе е во тек план за вработување на 400 пожарникари, дека е во полна кондиција сè што се однесува на опрема на оваа Влада за справување со пожарите. Факт е дека и најмалиот и најголемиот пожар, и по зафатнина и по моќност, не траел повеќе од 12 часа“, истакна Стојаноска.
ЦУК: Изгаснати 28 пожари
Во текот на последното деноноќие изгаснати се вкупно 28 пожари.
„Активен е само пожарот во село Нивичино, општина Василево, каде гори нискостеблеста шума. Добивме информација за почнат пожар меѓу селата Ракле и Никодин, Прилепско“, соопшти на денешната прес-конференција Надица Вчкова од Центарот за управување со кризи (ЦУК).
Според неа, под контрола се ставени пожарите во општина Велес, селата Џидимирци, Крушје и Иванковци, во дојранското село Николиќ, во општина Демир Хисар и во општина Македонски Брод, меѓу селата Црешнево, Локвица и Крапа.
Таа информираше дека оние пожари кои се појавија вчера попладне, како резулатат на силен ветер и искрење од жици, во општините Куманово, Старо Нагоричане, на територија на Град Скопје, Струга, Демир Хисар и Битола, сите се целосно изгаснати.
Вработените од „Флораком“ на протест поради неисплатена плата
Вработените од „Флораком“ која е фирма ќерка на јавното претпријатие „Паркови и зеленило“ денеска (18 јули) протестираа пред влезот на јавното претпријатие и блокираа раскрсница на булеварот „Илинденска“ поради неисплатена плата за месец јуни и останати надоместоци.
Тие изјавија дека доколку до 22 јули не им биде исплатена платата за месец јуни повторно ќе ја блокираат раскрсницата.
Претседателот на Синдикатот на работниците од угостителството, туризмот, комунално-станбеното стопанство, занаетчиството и заштитните друштва (СУТКОЗ), Стојанче Кашиковски рече дека по одржаниот протест на 10 јули се одлучиле за радикализација на нивните протести преку блокирање на влезот на ЈП „Паркови и зеленило“ и „Флораком“.
Тој тврди дека вработените во „Флораком“ веќе подолг период се соочуваат со нередовна исплата на плати, не им е исплатено здравствено и пензиско осигурување.
„Се соочуваме со проблем поголем број од работниците кои се хронични болни да не можат и својата редовна терапија да ја земат. Покрај нашите писмени известувања, барања да се сретнеме со менаџментот за надминување на проблемот, за жал, нема слух од таа страна“, посочи Кашиковски.
Тој рече дека на 10 јули имале кратка средба со менаџментот, на која им било ветено дека до 15 јули ќе биде исплатена плата за мај.
„За жал до 15 јули како што беше ветено таа не беше исплатена. После најавата за овој протест во текот на вчерашниот ден повторно под притисок беше исплатена една плата. Вработените од „Флораком“ ја немаат земено платата за месец јуни. Законскиот рок беше 15 јули“, рече Кашиковски.
Покрај овие проблеми, посочи тој, вработените во „Флораком“, „Паркови и зеленило“ и „Луна“, фирма ќерка на „Паркови и зеленило“ ги немаат земено останатите надоместоци кои следуваат согласно Колективниот договор, односно не е испочитувана спогодбата за исплата на регрес за годишен одмор, не е исплатен новогодишен додаток.
Воедно, додава тој, цело време има ветување од страна на менаџментот дека тоа ќе се среди на рати, но веќе шест месец тоа не е исполнето.
Одговарајќи на новинарско прашање за тоа кои се причините за неисплаќање на платата и што им е кажано од страна на менаџментот Кашиковски рече дека им биле дадени различни образложенија, но знаат дека од страна на Град Скопје редовно се дават субвенции, а вработените редовно ги извршуваат своите обврски. Значи, појасни тој, налозите кои пристигнуваат за подигање расади, садници од страна на „Паркови и зеленило“ се исполнети од вработените, меѓутоа фактурите по тие налози не се исплатени.
„Причината не ја знаеме, таа треба да се побара кај менаџметот и во Град Скопје. На наше инсистирање во последните шест месеци во повеќе наврати писмено и телефонски се обидовме да оствариме контакт со менаџментот и имавме само една средба“, додаде Кашиковски.
Трамп бара објавување на документите од големата порота во случајот на Епштајн
Администрацијата на американскиот претседател Доналд Трамп ќе побара од судот да дозволи објавување на сведочењата од големата порота во случајот на осудениот сексуален престапник Џефри Епштајн.
„Врз основа на апсурдната количина публицитет што му беше даден на Џефри Епштајн, ја замолив државната обвинителка Пам Бонди да ги достави сите релевантни сведочења пред Големата порота, под услов судот да одобри“, рече Трамп.
Кратко по неговата изјава, Бонди напиша на X Network дека Министерството за правда е подготвено да побара од судот да ги стави на располагање транскриптите од судењето пред големата порота.
Некои поддржувачи на Трамп го доведоа во прашање случајот на Епштајн откако Министерството за правда заклучи претходно овој месец дека нема докази за долготраен терористички заговор за неговите клиенти и смртните случаи во затвор во 2019 година. Тие побараа да се објават повеќе информации за случајот, предизвикувајќи редок раскол меѓу базата на Трамп.
Одлуката на Трамп доаѓа откако тој рече дека ќе го тужи Волстрит џурнал (WSJ) поради статија во која се тврдеше дека „непристојна“ честитка за роденден со неговото име му била испратена на Епштајн во 2003 година, пред Епштајн да биде обвинет за сексуални злосторства. Трамп вели дека писмото е лажно.
Според WSJ, писмото било дел од колекцијата роденденски честитки составена од соработничката на Епштајн, Гислајн Максвел. Таа беше осудена на 20 години затвор во 2021 година за помагање на Епштајн во трговија со деца за сексуална експлоатација.
Смртта на Епштајн во затвор во 2019 година, додека чекаше федерално судење, официјално беше прогласена за самоубиство.
Неговото име беше поврзано со многу познати личности, вклучувајќи го и поранешниот американски претседател Бил Клинтон, како и британскиот принц Ендру.
Епштајн првично беше уапсен во Флорида во 2005 година по обвинувањата дека платил на 14-годишно девојче за секс. Десетици други опишаа дека биле сексуално злоставувани од Епштајн. Во 2008 година, Епштајн постигна договор за признавање на вина и тајно се изјасни за виновен по една точка, а потоа отслужи 13 месеци во затворска програма што му овозможи да продолжи да работи.
Но, во 2019 година, Епштајн ќе биде обвинет за трговија со луѓе во Њујорк. Тој е обвинет дека им плаќал на девојчиња под 18 години да вршат сексуални дејствија во неговите домови во Њујорк, Флорида, и на неговиот приватен остров помеѓу 2002 и 2005 година.
Доколку беше осуден, ќе беше осуден на 45 години затвор.
ЕУ одобри нов пакет санкции против Русија
Европската Унија одобри нов пакет санкции против Русија поради војната во Украина, вклучувајќи и намалување на ценовниот лимит за извоз на руската нафта.
„ЕУ штотуку го одобри еден од своите најсилни пакети на санкции против Русија досега“, изјави шефицата на европската дипломатија, Каја Калас.
„Ќе продолжиме да ја зголемуваме цената, за да може единствена опција за Москва да биде запирањето на агресијата“, додаде Калас.
Усвојувањето на санкциите го поздрави и претседателката на Европската Комисија, Урсула фон дер Лајен:
„Ѝ удираме директно во срце на руската воена машина, со тоа што ги таргетираме банкарскиот, воениот и енергетскиот сектор и вклучуваме ново динамично ограничување на цените на нафтата“.
Како што објави Ројтерс, најновиот пакет санкции вклучува намалување на ценовниот лимит за Г7 групата за руската сирова нафта на 47,6 долари по барел.
Оваа мерка е дел од иницијативата на Г7 со цел да се ограничи приходот на Русија од извозот на нафта ширум светот.
Ценовното ограничување, утврдено од Г7 на 60 долари за барел во 2022 година, им забранува на компаниите за превоз и осигурување да учествуваат во извозот на руска нафта по повисоки цени.
Санкциите вклучуваат и забрана за трансакции со гасоводот „Северен поток“ и таргетирање на бродови кои се дел од таканаречената „флота во сенка“ на Русија, бродови за кои се верува дека ги заобиколуваат санкциите на ЕУ со тоа што превезуваат претежно руска нафта. Иако рускиот гас во моментов не тече низ двата гасоводи „Северен поток“ во Балтичкото Море што ја поврзуваат Русија со Германија, потегот за забрана на трансакциите има за цел да го спречи потенцијалното продолжување на таквите испораки.
Ова е осумнаесеттиот пакет економски мерки против Москва откако започна инвазијата во 2022 година, а беше усвоен откако Словачка ја укина блокадата што траеше неколку недели, по преговорите со Брисел за одделни планови за постепено укинување на увозот на руски гас.
Мултимедија
Најпосетени
Што треба да знаете