Вести
ЕУ ќе ја поедностави процедурата за депортација на илегалните мигранти
Европската комисија предложи регулатива за воспоставување на заеднички европски систем за враќање, кој ќе овозможи побрзи, поедноставни и поефикасни процедури за депортација од ЕУ на илегалните мигранти и лицата чии барања за азил се одбиени, вклучително и отворање на „Центри за враќање“ во трети земји.
Според еврокомесарот за внатрешни работи и миграција Магнус Брунер, станува збор за збир на ефикасни и модерни процедури за враќање на илегалните мигранти.
„Овие правила се фундаментални за заштита на просторот за слободно движење на ЕУ без внатрешни граници. Со новиот европски систем за враќање, ќе се погрижиме оние кои немаат право да останат во ЕУ да бидат вратени назад“, истакна Брунер.
Новата правна рамка за враќање претставува дополнување на Пактот за миграција и азил, што беше усвоен минатата година, а со кој ЕУ постави сеопфатен пристап кон справување со предизвиците поврзани за миграцијата.
Според статистичките податоци, во моментов од ЕУ се депортираат само околу 20 проценти од лицата кои немаат право на легален престој во земјите членки на Унијата.
Целта на новите правила е да се воспостави модерна и поедноставна правна рамка, со што на земјите членки на ЕУ ќе им се овозможат потребните механизми за поефикасно враќање на илегалните мигранти со целосно почитување на основните човекови права.
Мерките предвидуваат и специфични правила за лица кои претставуваат безбедносен ризик, реадмисија како дел од процесот на враќање, како и отворање на „Центри за враќање“, кои врз основа на билатерален или договор на ниво на ЕУ можат да се воспостават и во земји што не се членки на Унијата, доколку тие ги почитуваат меѓународните стандарди и принципи за човекови права согласно меѓународното право.
Со одредбите на Пактот за миграција и азил, чија примена треба да започне од средината на 2026 година, се предвидува побрза и поефикасна обработка на барањата за азил, а со новопредложениот систем ќе се овозможи одбиените баратели на азил веднаш да бидат депортирани од ЕУ.
види ги сите денешни вести
Русија бара Украина да се повлече од четири свои региони и да се откаже од воена отштета, објави Ројтерс
Руските преговарачи на мировните преговори во Истанбул побараа Украина да ги повлече своите сили од сите украински територии за кои претендира Москва пред да се согласи на прекин на огнот, изјави за Ројтерс висок украински функционер запознаен со разговорите.
Тоа барање, заедно со другите поставени во петокот, ја надминува рамката на нацрт-мировниот договор предложен од САД минатиот месец по консултациите со Москва.
Првите директни разговори во Истанбул меѓу двете страни по три години завршија со договор за размена на воени заробеници, без договор за прекин на огнот.
Според украински функционер, Русите предложиле повлекување на украинските трупи од Доњецк, Запорожје, Херсон и Луганск како услови за мировен договор и дури тогаш ќе дојде до прекин на огнот.
Русија ги контролира повеќето од овие региони, но украинската армија се уште се бори во некои делови. Москва дополнително бара меѓународната заедница да признае пет региони на Украина како руски. Покрај Доњецк, Луганск, Запорожје и Херсон, се бара и признавање на Крим, анектиран во 2014 година, како дел од руската територија.
Американскиот предлог вклучува „де јуре“ признавање само за Крим и „де факто“ признавање за делови од други региони под руска контрола.
Москва побара од сите страни да се откажат од правото на воени отштети, додека САД бараат Украина да добие компензација. Украинскиот функционер рече дека руските преговарачи ги поставиле овие барања усно, а не писмено, објави Ројтерс.
Украина оцени дека руската преговарачка позиција во Истанбул покажала дека Москва не е сериозна за постигнување мир, а европските сојузници на Киев бараат од американскиот претседател Доналд Трамп да воведе нови санкции кон Русија.
Киев и неговите европски сојузници подготвија алтернативен предлог според кој прво би се случило прекин на огнот, а дури потоа би почнале преговорите. Тие исто така одбиваат да разговараат за територијални прашања до подоцнежна фаза.
Израел почна нова голема офанзива во Појасот Газа
Израелската армија (ИДФ) во петокот доцна вечерта објави дека започнала нова голема офанзива во Појасот Газа.
„Во текот на изминатиот ден, ИД започна со големи напади и мобилизација на силите за да постигне оперативна контрола во Појасот Газа. Ова е дел од подготовките за проширување на операциите и исполнување на целите на војната, вклучително и ослободување на заложниците и разбивање на терористичката организација Хамас“, се вели во соопштението на армијата на платформата Х.
Израелските медиуми објавија дека проширувањето на операциите ќе започне по завршувањето на патувањето на американскиот претседател Доналд Трамп во регионот на Персискиот Залив, доколку дотогаш не биде постигнат нов договор за Газа.
Трамп оттогаш го заврши своето повеќедневно патување, а нов договор сè уште не е на повидок.
Во петокот, палестинската новинска агенција ВАФА објави дека најмалку 100 луѓе се убиени во северниот дел на Појасот Газа од четвртокот вечерта по повеќекратните израелски воздушни напади, додека здравствените власти контролирани од Хамас соопштија дека се убиени 93 лица, а повеќе од 200 се повредени.
Бројките не прават разлика меѓу цивилни и воени жртви и не можат независно да се проверат.
Израелската влада веќе два месеци ја блокира сета помош за територијата, додека меѓународните хуманитарни организации предупредуваат на катастрофални хуманитарни услови.
Макрон се надева дека ќе се обнови дијалогот Косово - Србија
Францускиот претседател Емануел Макрон изјави дека се надева оти дијалогот меѓу Косово и Србија ќе биде рестартиран „во наредните недели“.
Тој оваа изјава ја даде на заедничката прес-конференција со албанскиот премиер Еди Рама, откако беше прашан за критиките на косовската претседателка Вјоса Османи дека Европската унија го губи кредибилитетот.
„Поминавме многу време во дијалогот меѓу Белград и Приштина. ЕУ има легитимитет да бара конкретен напредок за политичките прашања“, рече Макрон за време на неговата посета на Албанија, на еднодневниот самит на Европската политичка заедница.
Тој ја спомена загриженоста на ЕУ за „политичките и социјалните тешкотии“ во Косово и Србија и рече дека овие позиции на ЕУ се познати и не се ништо ново.
„Не е добра идеја кога се обидуваме да ги поделиме линиите или да се обидеме да го доведеме во прашање процесот“, додаде Макрон.
Поради кризата на северот на Косово, која ги зголеми тензиите меѓу двете земји, од септември 2023 година во Брисел не се одржува рунда политички дијалог, туку се водат само разговори на ниво на главни преговарачи.
Ден претходно Османи ја повика Европската унија да ги укине казнените мерки против Косово пред да продолжи дијалогот меѓу Косово и Србија за нормализација на односите.
„Прво треба да разговараме за укинување на мерките од страна на ЕУ, бидејќи тоа го нарушува самиот кредибилитет на ЕУ“, рече Османи во Тирана.
Соопштени детали за договорот со Лондон: Ќе се градат железници, болници, студентски дом...
Со документот за стратешко партнерство, двете влади испраќаат силна порака дека интересите на граѓаните се најважни, а дека политиката е моќен инструмент кога создава вредности, а не поделби, истакна денеска, 17 мај, премиерот Христијан Мицкоски на заедничката пресконференција со британскиот амбасадор Метју Лосон по повод согласноста за договор за стратешко партнерство со Обединетото Кралство.
Премиерот нагласи дека договорот ќе биде основата за инвестициски циклус којшто „ќе има вкупна рамка од 5 милијарди фунти, односно 6 милијарда евра, при што дел од овие пари ќе бидат употребени за инвестиции во инфраструктурата, изградба на модерна карго и брза патничка железницата од Табановце до Гевгелија, инвестиции во здравството и нови болници, завршување на проектот на клиничката болница во Штип, заедно со зградата на новиот медицински факултет, студентски дом со капацитет од двестотини легла, изградба на болницата во Кичево заедно со здравствен дом, реконструкција на клиничката болница во Тетово...“.
„Партнерството што го формализираме, ќе придонесе за модернизација на нашите вооружени сили и подлабока интеграција во НАТО стандардите. Ќе ни овозможи да ја зголемиме безбедноста на границите и да се спротивставиме на трговијата со луѓе и шверцот“, изјави Мицкоски.
Според премиерот, стратешкото партнерство не е награда туку е признание за нашата досегашна доследност.
„Ова што се постигна претставува втор клучен столб на нашата меѓународна позиционираност, по стратешкото партнерство со САД. Овој договор е голема потврда дека нашата држава чекори по патот на стабилноста, безбедноста, развојот и европската иднина“, нагласи премиерот.
Амбасадорот Метју Лосон оцени дека договорот е врвен момент во билатералната врска меѓу двете земји, изградена на заеднички вредности, заедничко членство НАТО и мошне богата трговска врска.
„Ние сме големи инвеститори и британската Влада реши да го надградува тоа преку договор меѓу двете влади кој се фокусира на трговија и инвестиции за да се креира поголем раст и стотици милиони фунти од кои граѓаните на оваа земја ќе имаат корист заедно со граѓаните на нашата земја“, рече Лосон.
Тој демантираше дека со договорот државава се обврзала на прифаќање мигранти, појаснувајќи дека станува збор за соработка на полициски сили и подобро справување со криминални групи.
Руски дрон погоди цивилен минибус, загинаа деветмина, соопшти Киев
Во напад на руско беспилотно летало е погоден минибус со цивили во регионот Суми, во близина на руската граница, при што загинаа девет лица, а четворица беа ранети, соопштија украинските власти.
Нападот на 17 мај дојде еден ден откако првите директни мировни преговори по повеќе од три години завршија без позитивен резултат и кога Киев ја обвини Москва за „неприфатливи“ барања. Русија ги отфрли повиците на Украина, европските земји и Соединетите Држави за 30-дневен прекин на огнот во војната, сега веќе во нејзината четврта година од целосната инвазија на Русија на Украина во февруари 2022 година.
Нападот е извршен со дрон, соопшти регионалната воена управа на Суми. Националната полиција на Украина обвини дека руските сили намерно го гаѓале комбето, кое се користело како меѓуградски автобус. Беше погоден во близина на градот Билопиља, недалеку од руската граница.
Сликите објавени од Националната полиција на Телеграм покажаа извалкан минибус Мерцедес и остатоци расфрлани на патот.
Немаше моментален коментар од Русија, која тврди дека не цели цивили и покрај многуте докази за спротивното. Регионот Суми е место на чести руски напади.
По видливите и неубедливи разговори меѓу украинската и руската делегација во Истанбул на 16 мај, американскиот претседател Доналд Трамп рече дека е потребна средба со рускиот претседател Владимир Путин за да се постигне напредок во ставањето крај на најдолгиот конфликт во Европа од Втората светска војна.
„Мораме да се собереме“, изјави Трамп во интервју за Фокс њуз. Тој рече дека е оптимист за ангажман со Путин, но е подготвен да изврши притисок врз Русија доколку е потребно.
Портпаролот на Кремљ, Дмитриј Песков, на 16 мај рече дека средбата Трамп-Путин на која ќе се разговара за билатералните врски, Украина и други прашања е „сигурно неопходна“, но ќе биде потребно време за да се подготви и не треба да се одржи освен ако не даде резултати.
На разговорите во Истанбул, кои траеја околу 90 минути, преговарачите се согласија да разменат по 1.000 затвореници од секоја страна во блиска иднина, изјавија шефовите на двете делегации. Тоа би била најголемата поединечна размена од почетокот на целосната инвазија.
Но, немаше индикации дека големите јазови меѓу Русија и Украина за прашања како територијата и прекинот на огнот беа намалени. Европските лидери му се придружија на украинскиот претседател Володимир Зеленски во осудата на Москва.
„Руската позиција е јасно неприфатлива, и тоа не е првпат“, рече британскиот премиер Кир Стармер во заедничката изјава со лидерите на Полска, Германија и Франција на самитот во Тирана, Албанија.
Тој рече дека по состанокот со Зеленски, кој исто така беше на самитот, и заедничкиот телефонски разговор со Трамп на кој разговараа за разговорите во Истанбул, „сега тесно ги усогласуваме и координираме нашите одговори и ќе продолжиме да го правиме тоа“.
Мајнл-Рајзингер: Билатералните прашања не треба да бидат камен на сопнување
Вие сте делот од кој Европа не може да се откаже и навистина сме сериозни кога велиме дека не сме комплетни без вас, порача денеска шефицата на австриската дипломатија, Беате Мајнл-Рајзингер, на заедничката прес-конференција со министерот за надворешни работи и трговија, Тимчо Муцунски.
„Оваа држава има направено многу, секако дека сте имале и фрустрирачки моменти на тој пат, процесот е навистина многу долг и ние забележуваме од страна на ЕУ дека имаме обврска да почувствуваат граѓаните на оваа држава дека сме сериозни на овој пат и поради тоа се залагаме за градуелната интеграција во ЕУ и сакаме да почувствувате дека ве поддржуваме“, рече австриската шефица на дипломатијата која е во официјална посета на Скопје.
Таа сепак додаде дека Северна Македонија треба да изоди уште неколку чекори до нејзината цел- отворање на пристапниот процес на преговори со ЕУ.
„Исто така ЕУ треба да има интерес да го поддржи овој процес, да го забрза, да биде искрена и да не става уште некои камења за сопнување. Долг пат е ова, но е искрена цел за заедничка европска иднина и ние ќе направиме сè за да не ви ставаме нови сопки“, рече Мајнл-Рајсингер.
Нејзиниот македонски колега Тимчо Муцунски пак истакна дека Планот А е полноправно членство во ЕУ и од тој план државата нема да скршне.
„Меѓутоа, она што го очекуваме од Унијата е предвидливост, односно билатералните прашања да останат билатерални и не прифаќаме решение по секоја цена. Ние сме прва земја во регионот којашто потпиша Партнерство за безбедност и одбрана со ЕУ, нешто што сега во актуелниот контекст се покажува како многу значајно. Земја лидер согласно став на високи претставници на ЕУ во делот на имплементација на Реформската агенда која е интегрален дел од Планот за раст. Значи, ние на дело покажуваме дека план А е полноправно членство во ЕУ, рече Муцунски.
Тој повтори дека како држава од Брисел очекуваме предвидливост и билатералните прашања да останат настрана од процесот на пристапување и оти се во постојана комуникација и со претставници на ЕУ, на змеји-членки, како и со претставници од Бугарија, при што некои средби се формални, а некои се неформални.
Претседателот на Европскиот совет Антонио Кошта за време на посетата на Скопје порача дека процесот на евроинтергација на земјава се одвива многу долго и оти сега е време да се испорачаат резултати.
На новинарско прашање дали има план Б за тоа да се надминат барањата од страна на Бугарија, Кошта истакна дека не треба да се потценува планот А и дека треба да се фокусираме на негова испорака. Премиерот Мицкоски, пак, на заедничката прес-конференција со Кошта, изрази надеж дека во периодот што следи заеднички ќе го одблокираме овој процес.
Затворска казна од година и пол за поранешните директори на тетовската модуларна болница
Порашните директори Флорин Бесими и Артан Етеми се осудени на една година и шест месеци затвор за пожарот на Модуларната болница во Тетово. Тетовската болница како правно лице е казнета со парична казна од 1 милион денари.
Бесими по пресудата нагласи дека судскиот процес немал за цел да ги открие вистинските виновници за пожарот во Модуларната болница.
„Од длабочините на мојата душа, изразувам сочувство до семејствата на жртвите. Судењето немаше за цел да ја открие вистинската одговорност за пожарот во модуларната болница. Ова судење се претвори во судење против оние кои не беа виновни. Бев обвинет дека немам противпожарни апарати. Јас не го потпишав приемот-предавањето на објектот и за ова сведочев на суд, но ова не беше земено предвид. Ова не е правда, туку отстапување од вистината“, рече Бесими.
Судскиот процес се повтори, а во истиот беа обвинети двајцата директори и тетовската болница.
Во пожарот во модуларната болница на 8 септември 2021 година животот го загубија 14 луѓе.
Тогаш Етеми и Бесими како обвинети за тешки дела против општата сигурност добија условна казна од година и пол.
Во време на пожарот, министер за здравство беше актуелниот лидер на опозициската СДСМ, Венко Филипче, кој веднаш по настанот си даде оставка од морални причини, но тогашниот премиер Зоран Заев не ја прифати.
Модуларната болница ја градеше фирмата „Брако“, во која пак удел имаше поранешниот вицепремиер Кочо Анѓушев.
Два месеци по трагедијата: Кочани не смее да остане град на тагата
Два месеци од пожарот во кочанската дискотека и уште само еден месец до завршувањето на истрагата. Животите ги загубија 62 млади луѓе, над 200 беа повредени, од кои стотина беа однесени на лекување в странство. Почна широка акција на полицијата и на Обвинителството, со апсења и на поранешни градоначалници, полициски началници, поранешни министри, иснпектори, полицајци...
По шокот, во Кочани тага, а гневот резултираше со спонтани протести и демолирање на локалите на сопственикот на дискотеката „Пулс“.
Родителите и роднините на загинатите и на повредените, поддржани од илјадници граѓани излегоа на улица и побараа одговорност и неселективна правда.
Обвинителството и Министерството за внатрешни работи ветија брза и непристрасна истрага, а државниот обвинител Љупчо Коцевски дури кажа и датум: „Истрагата ќе заврши до 16-17 јуни“.
Кочани нема да застане
Два месеци од тогаш, протестите, маршевите за поддршка, барањата за правда, собирите за солидарност и хуманитарните акции не застануваат. Властите речиси секојдневно убедуваат во професионалност и правичност. Пораките два месеца се истите: „Правда мора да има и Кочани не смее да остане запаметен само како градот на тагата“. Постојано се бара иницијатива да им се помогне на семејствата, на граѓаните и на градот, за Кочани да не остане град на тагата.
Во кочанската болница во моментов се лекуваат 39 пациенти, а процесот на лекување и рехабилитација е индивидуален во зависност од степенот на повредите. 65 пациенти се на домашно лекување, но и тие се вклучени во процесот на рехабилитација. Во земјава, двајца пациенти го продолжуваат лекувањето на Клиниката за пластична хирургија, додека уште двајца се хоспитализирани во приватната болница „Систина“, и тие се во стабилна состојба.
Надлежните уверуваат дека сите пациенти ја добиваат потребната медицинска нега и третман, во согласност со тежината на повредите и стандардите за лекување. Во странство моментално се лекуваат 15 лица, чиешто здравствено состојба е стабилна.
„Не знаеме веќе во што да веруваме“
Од граѓанската иницијатива „Support Кочани“ велат дека во последно време фокусот не е на Кочани онолку колку што треба да биде. Оттаму сметаат дека е потребна поголема транспарентност, организација и институционален одговор. Велат дека има позитивни примери, но многу нешта недостасуваат и дека надлежните треба отворено да кажат дали и за што им е потребна помош. Од иницијативата велат дека повредените чија состојба е подобра се откажуваат од средствата кои им се донирани и ги префрлаат на сметките на оние чија здравствена состојба е сеуште тешка. Тие алармираат дека во Кочанската болница условите за лекување на повредените не се соодветни и дека недостасува стручен медицински кадар за вакви ситуации.
„Животот продолжува зошто сите во градот имаат обврски, одат на работа, во училиште. Но, болката е тука. Луѓето бараат неселективна правда и нема да застанат додека работата не се истера до крај. Ние не знаеме во што да веруваме веќе, знаеме каков е нашиот судски ситем, колкава е довербата во него. Сакаме да се истера правдата до крај. Знам дека Кочани нема да застане додека не се истера правдата до крај“, вели Марко Димитриев од „Поддршка за Кочани“, во интервјуто за РСЕ кое во целост ќе го емитуваме во недела.
„Правда без политика“
Со истрагата за пожарот во дискотеката „Пулс“ се опфатени 34 луѓе, а за едно лице постапката е стопирана бидејќи почина. Кон средината на април, Обвинителството ја прошири истрагата и меѓу осомничените се најдоа и последниот кочански градоначалник Љупчо Папазов, и двајца поранешни Ратко Димитриевски и Николчо Илијев. Под истрага и во домашен притвор е и поранешниот министер за економија Крешник Бектеши, поранешен државен секретар, еден раководител, службено лице и помлад соработник во Министерството. Осомничени се и поранешен директор на Пазарен инспекторат и инспектори, сопственичката на фирмата која дала елаборат за употреба на објектот како дискотека, синот на сопственикот на дискотеката „Пулс“...
За овие два месеца од кочанската трагедија беа организирани десетици протести, протестни маршови, спортски, културни и донаторски активности за поддршка на повредените и на семејствата на загинатте и повредените.
Политиката не остана на страна, колку и да инсистираа на тоа учесниците во бројните собири за поддршка на семејствата на настраданите во Кочани. Политички белег доби истрагата кога беа приведени и притворени партиски функционери, меѓу кои и поранешниот министер Крешник Бектеши, кадар на опозициската ДУИ. Реакцијата од Али Ахмети беше: Ако Бектеши биде обвинет - излегуваме на улица. Бектеши од притвор замина во домашен притвор.
„Не сте сами“
Хуманитарните акции и акциите за поддршка продолжија и денеска. Движењето „Кој е следен?“ денеска, 16 мај, направи симболичен перформанс пред Основното јавно обвинителство во Скопје со кој, како што рекоа, „сакаат да потсетат на трагедијата во Кочани и да испратат порака за потребата од неселективна правда и одговорност за системската корупција“.
„Корупцијата и моќта убиваат. Безбедноста е основно право и ние нема да престанеме да се бориме додека институциите не почнат вистински да им служат на граѓаните“, порачаа од движењето и ги повикаа сите граѓани да им се придружат ним и на родителите на загинатите во несреќата, кои секоја сабота во 16:05 часот маршираат низ Кочани, барајќи правда и одговорност.
Меџити: Разговараме со пратеници од опозицискиот Европски фронт, можеби ќе преминат од другата страна
И по заминувањето на Арбен Таравари, во албанскиот дел имаме легитимитет и ист број пратеници, 13-14, изјави денеска вицепремиерот Изет Меџити. Тој претпладнево, по отворањето на конференцијата „Унапредување на зелената инфраструктура во Западен Балкан“, им рече на новинарите дека во моментов Владата има стабилно мнозинство, но и дека се преговара со пратеници од Европскиот фронт, за кои рече „се опозиција и можеби ќе преминат од другата страна“.
На новинарско прашање дали тие ќе дејствуваат како дел од пратеничката група на Вреди, Меџити одговори дека дел се од мнозинството и од Европскиот фронт и, рече, „ќе бидат поддршка за Владата“.
По оставката на министерот Арбен Таравари, на кого од власта му порачаа дека „не може да биде и дел од Владата и да шурува со ДУИ“, се отвори прашањето за реконструкција на владиниот кабинет, кое премиерот Христијан Мицкоски го затвори со најава само за замена на министри.
Меџити претпладнево рече дека се „во преговори за повеќе политички опции за ресорот здравство по заминувањето на Таравари и врз основа на тоа ќе дадат нов предлог за министер“, нагласувајќи дека тие разговори не се само во рамки на Вреди или со премиерот Христијан Мицкоски, туку и со „други поединци, групи и политички субјекти кои се надвор од Влен – во рамки на Европскиот фронт, кои се опозиција и можеби ќе преминат од другата страна“.
Тој не прецизираше дали тоа значи дека преговараат со Зијадин Села, лидер на крило на Алијанса за Албанците која е дел од Европскиот фронт предводен од ДУИ.
Вицепремиерот не беше прецизен ниту за тоа дали вицепремиерот за добро владеење Арбен Фетаи, кадар од партијата на Таравари, ќе остане на функцијата, со оглед дека се уште не најавил оставка: „Добро ја тера работата, успешно придонесува за промените и се надевам дека ќе продолжи“.
Самит на Европската политичка заедница во Тирана
Денеска во Тирана ќе се одржи шестиот Собир на Европската политичка заедница под наслов „Нова Европа во новиот свет: единство - соработка - заедничко дејствување“, на кој ќе присуствува и македонскиот премиер Христијан Мицкоски.
Клучна тема на Собирот, чии ко-домаќини се претседателот на Европскиот совет, Антонио Кошта и албанскиот премиер Еди Рама, ќе биде сигурноста и споделената визија за иднината на Европа.
Се очекува водачите да дискутираат за безбедноста на Европа, вклучувајќи ја и поддршката за Украина, европската одбрана, заштитата на демократијата, како и подготвеноста и капацитетот за одговор на разни закани.
Дополнително на ова, на настанот ќе се организираат и три тркалезни маси на високо ниво со акцент на безбедноста и демократската отпорност на Европа, вклучувајќи ја и руската агресија врз Украина, потоа на унапредување на европската конкурентност и сигурност преку иновации и издржливост, како и на предизвиците во мобилноста и зајакнување на младите.
Во поканата упатена до европските водачи за учество на Собирот, Кошта и Рама истакнуваат дека Европа се наоѓа во важен историски момент, одбележан со повеќеслојни и комплексни предизвици.
„Додека продолжува агресивната војна на Русија против Украина, нејзините последици се чувствуваат далеку надвор од границите на Украина, оптоварувајќи ја нашата безбедност и тестирајќи ја нашата колективна отпорност“, се наведува во поканата.
На Собирот на ЕПЗ во Тирана е најавено присуство на 47 шефови на држави или влади од Европа.
Покрај премиерите Мицкоски и Рама, на настанот ќе учествуваат и претставници на сите 27 членки на ЕУ, на земјите од ЕФТА (Исланд, Лихтенштајн, Норвешка и Швајцарија), како и на Азербејџан, Андора, Босна и Херцеговина, Велика Британија, Грузија, Ерменија, Косово, Молдавија, Монако, Сан Марино, Србија, Турција, Украина и Црна Гора.
На Собирот ќе бидат присутни и претседателката на Европската комисија, Урсула фон дер Лајен, високиот претставник на ЕУ за надворешни работи и безбедносна политика, Каја Калас, како и генералните секретари на НАТО, Марк Руте, на Советот на Европа, Ален Барсе и на Организацијата за безбедност и соработка во Европа (ОБСЕ), Феридун Синирлиоглу.
Идејата на Европската политичка заедница е да го поттикне дијалогот и соработката помеѓу водачите на континентот за справување со прашања од заеднички интерес и за зајакнување на безбедноста, стабилноста и просперитетот на Европа. Таа не е предвидена да замени ниту една постоечка структура, организација или процес, туку е форум на кој европските земји можат да пронајдат дополнителен простор за соработка по најважните прашања на континентот.
До сега се одржаа пет собири на Европската политичка заедница.
Мултимедија
Најпосетени
Што треба да знаете