Вести
Шест спорни прашања имаат уставните судии за Законот за јазиците
Со пренос во живо на неколку платформи, уставните судии ќе бараат одговори од своите странски колеги за шест спорни правни прашања кои им се наметнале по иницијативите за Законот за употребата на јазиците. Кои се клучните спорни прашања што ги имаат уставните судии јавноста ќе ги дознае на подготвителната седница која ќе се оддржи на 20 март годинава.
На прашањата на уставните судии ќе одговараат странски и македонски уставни судии, професори по уставни право, а поканети се и потписниците на Охидскиот рамковен договор и изготвувачи на Уставот.
Подготвителната седница следува откако во декември минатата година, Уставниот суд одлучи да повика експерти за да слушне различни мислења за Законот за употреба на јазиците, а дури потоа да одлучува.
По подготвителната седница Уставниот суд може да ги отфрли иницијативите, да одлучи да поведе постапка за законот во целост или само за делови од него, да ја запре времено неговата примена додека да донесе конечна одлука, или да го прати на доработка во Парламентот.
Одлуките за уставноста на законот претседателот на Уставниот суд очекува да бидат донесени во текот на мај или најдоцна јуни, каде на седница ќе се разгледуваат два реферата, првиот од подготвителната седница на 20 март за суштината на законските решенија, а вториот од подготвителната седница одржана на 18 март 2021 година за начинот на кој е донесен законот, кога тогашниот македонски претседател Ѓорѓе Иванов не го потпиша указот за законот.
За овој закон, до Уставниот суд во 2019 година кога стапи во сила, пристигнаа 12 иницијативи со кои се оспоруваат делови од него, но и целиот закон. Законот беше оспорен од граѓани, адвокати, универзитетски професори, но и две политички партии - владејачката ВМРО-ДПМНЕ и опозициската Левица. Сите иницијативи Уставен ги спои во еден предмет.
Мислења и од членови на Венецијанската комисија и Судот во Стразбур
Меѓу странските експерти кои до сега го потврдиле своето присуство е потпретседателот на Венецијанската комисијаМартин Куљер кој ќе има задача да го образложи ставот на Комисијата по пријателскиот совет кој го побара Уставниот суд од нив.
На слични прашања ќе одговора и неговиот колега од Судот за човекови права во Стразбур Артур Кучс, кој како искусен експерт за малцински прашања и употреба на јазици ќе одговара на прашањата за праксата на Судот во слични случаи и ќе ги презентира европските стандарди за употребата на јазиците.
Од домашните експерти и професори кои до сега го потврдиле своето присуство се поранешната судијка во Судот за човекови права Маргарита Цаца Николовска, како и професорката по уставно право и член на Венецијанската комисија Рената Дескоска и нејзиниот заменик член, професорот по уставно право Јетон Шасивари. Меѓу останатите се професори од сите факултети во земјава кои се занимаваат со уставно и административно право и претседателот на Основниот Скопје 1, Иван Џолев, претседателот на Управниот суд, Бурим Сејдини и претседателката на Апелациониот суд во Битола, Жаклина Доведен.
Дел од подносителите на иницијативата како Тодор Петров и професорката Татјана Каракамишева го потврдиле своето присустви на подготвителната седница.
Минатата седница во декември лани помина со бојкот на тројца судии, а пред Уставниот суд беа поставени шатори од таканаречените „чувари на законот за употреба на јазиците “ предводени од лидерот на ДУИ Али Ахмети, и лидерите на опозициската коалиција “Европски фронт“ како и од симпатизери на партиите.
Од Уставнниот суд велат дека до Министерството за внатрешни работи испратиле допис со најава за седницата, затоа што како што велат, ќе има и странски гости и учесници во неа. Од коалицијата „Европски фронт “ при последната седница најавија дека ќе одржат собир пред Уставниот суд секој пат кога ќе се дискутира за уставноста на Законот за употреба на јазиците.
Во последното соопштение од ДУИ ( на 14 март) кусо најави дека „ со сите демократски средства ќе го брани Законот за употреба на јазиците и нема да дозволи враќање назад“, без да открие повеќе детали. До објавувањето на овој текст од ДУИ не одговорија на прашањата на РСЕ, какви планови има за 20 март.
ДУИ: Се будат анти-Охридски духови
Во соопштението е наведено дека четири години од потпишувањето на Законот за употреба на јазиците, со како што велат, моментот кога беше заокружен легислативниот дел од Охридскиот рамковен договор, се будат анти-Охридските духови .
„Секој обид за оспорување на Законот за употреба на јазиците е обид за оспорување на Охридскиот договор и уставниот поредок на Северна Македонија“, се вели во нивното соопштение.
Претседателот на Уставниот суд, Дарко Костадиновски на брифинг со новинарите посочи дека со индигнација ги отфрла сите лаги и опасни манипулации.
„Контрастот на тоа прашање би било зошто постои уставниот суд, да ја скинеме или да ја чуваме до 2030 или 2050. Ние имаме должности, да се употребат такви тешки зборови и да се манипулира е политичко дивјаштво, од каде знаат каква ќе биде одлуката на судот, уште од сега знаат каква е одлуката на судот. Што ако судот рече дека нема проблем, дали ќе се извинат тогаш?“, вели Костадиновски.
Во последното интервју за РСЕ, пратеникот на ДУИ Блерим Беџети изјави дека можно е да не учествуваат на локалните избори во октомври доколку „се чепне “ во законот за употребата на јазиците.
„Значи ни во овој период ни за кандидат не е одлучено, ни со коалиционите партнери не е дефинирано, бидејќи сметаме дека има време. Периодот пред нас за жал и во овој месец, еден параполитички орган како што е Уставниот суд ќе експериментира „во начело на правото“ со законот за употребата за албанскиот јазик“, изјави Беџети.
Костадиновски - Не правам компромиси со владеење на правото
За претседателот на Уставниот суд Костадиновски „злоупотребата на сензитивни прашања е на примитивно политичко ниво.
„Не правам компромиси со владењето на правото . Зошто е толку голема недовербата на граѓаните во целокупниот систем? Тоа е поради невладеењето на правото. Како владеењето на правото е прекршување на нивното право? Не е мојата цел да ги разубедувам политичарите, нема да престанат, нивните манипулации ќе продолжат. Ако успееме ние како судот да ги убедиме граѓаните да не бидат манипулирани, тоа е успех“,, вели Костадиновски.
На претходната седница во декември минатата година против одржување на подготвителна седница се изјасни уставната судијка и поранешна претседателка на Уставниот суд, Добрила Кацарска, која рече дека е несериозно по пет години да се држи подготвителна седница.
Наспроти информацијата на судијката известител Елизабета Дуковска, која кажа дека побарала и „пријателски совет“ од Венецијанската комисија, Кацарска потенцираше дека ова советодавно тело на Советот на Европа веќе дало свое мислење во дури 98 точки. Таа посочи и дека за предметот веќе има готов реферат во кој се одговара на сите спорни прашања што се покренуваат во поднесените иницијативи.
Уставниот суд се состои од девет судии. Шестмината кој присуствуваа на минатата дискусија за Законот за употреба на јазиците се од македонска националност. Двајцата судии Албанци во актуелниот состав на Уставен, Осман Кадриу и Насер Ајдари, како што беше најавено, воопшто не присуствуваа на седницата.
Судијата Фатмир Скендер, кој е од турска националност, пак, ја напушти дебата за оваа точка откако не му беше прифатен предлогот таа да се тргне од дневниот ред на седницата.
види ги сите денешни вести
Вучиќ: Не размислувавме за воведување вонредна состојба
„Ние не сме за воведување вонредна состојба“ како одговор на државата на секојдневните протести во Србија кои се придружени со немири, изјави српскиот претседател Александар Вучиќ на вонредна прес-конференција на 17 август.
„Не го разгледуваме тоа бидејќи постапката е комплицирана. Тоа е последно средство, но, не сме го разгледале и не би сакал да го разгледам“, рече тој.
Тој најави дека во следните „три или четири дена, државата ќе спроведе изненадувачки одлуки“ како одговор на антивладините протести.
„Ќе ви се чини дека сме се повлекле, дека сме се исплашиле“, рече Вучиќ, додавајќи дека реакцијата на државата „нема да биде вообичаена“.
Тој не прецизираше во која насока ќе одат овие одлуки.
Во последните неколку вечери во српските градови се организираат антивладини протести, придружени со немири и судири меѓу демонстрантите и полицијата.
Собирите беа поттикнати од настаните во градовите Врбас и Бачка Паланка во Војводина на 12 август, кога поддржувачите на владата ги нападнаа демонстрантите со пиротехнички средства. Немирите беа предизвикани и од постапките на полицијата тој ден, која демонстрантите ја обвинија дека не презема ништо за да ги спречи нападите.
Полицијата, од друга страна, ги отфрла овие обвинувања, наведувајќи дека спречила поголем немир.
„Кого ќе убијат вечерва, кого ќе запалат вечерва, но тоа нема да трае вечно“, рече српскиот претседател во неделата.
Тој додаде дека се подготвува „формална и законска реакција на државата“ и дека „сè ќе се искористи за враќање на мирот и општествениот ред“.
Европските лидери ќе му се придружат на Зеленски на состанокот во Белата куќа
Претседателката на Европската комисија, Урсула фон дер Лајен, објави дека ќе му се придружи на украинскиот претседател Володимир Зеленски, заедно со други европски лидери, на состанокот со американскиот претседател Доналд Трамп во Вашингтон.
„На барање на претседателот Зеленски, ќе му се придружам на претседателот Трамп и на другите европски лидери во Белата куќа“, објави таа на социјалните мрежи.
Покрај шефот на Европската комисија, своето присуство на состанокот во Вашингтон го потврдија и францускиот претседател Емануел Макрон, германскиот канцелар Фридрих Мерц и финскиот претседател Александар Стуб.
Средбата меѓу Зеленски и Трамп е најавена за 18 август, а се очекува да продолжи со дискусиите за начините за завршување на војната во Украина.
Средбата ќе се одржи три дена откако американскиот претседател се сретна со рускиот претседател Владимир Путин во Алјаска, но без конкретни резултати за завршување на војната во Украина.
Европските лидери во саботата го поддржаа трилатералниот самит меѓу Зеленски, Трамп и рускиот претседател Владимир Путин откако самитот меѓу САД и Русија не донесе прекин на огнот.
Во изјавата потпишана од францускиот претседател Емануел Макрон, германската канцеларка Ангела Меркел, британскиот премиер Кир Стармер и претседателот на Европската комисија се нагласи потребата од продолжување на притисокот врз Русија сè додека не се постигне мир, вклучително и преку санкции.
Европските претставници, исто така, изјавија дека се загрижени за дипломатското приближување на Трамп со Путин, тврдејќи дека Зеленски требало да биде вклучен на самитот во Алјаска.
Средбата на Трамп со Путин, која помогна во ублажувањето на меѓународната изолација на лидерот на Кремљ, не направи многу за да ги смири стравувањата во Киев и европските градови од потенцијален договор што би можел да ја загрози безбедноста или суверенитетот на Украина или да ја поттикне руската агресија.
Самитот заврши без договор за прекин на огнот, а Трамп и Путин не одговорија на прашањата на новинарите за време на кратката прес-конференција.
Следниот ден, Трамп рече дека Киев треба да постигне договор со Москва за прекин на војната бидејќи „Русија е многу голема сила, а тие не се“. Трамп, исто така, се откажа од барањето за итно прекин на огнот, тврдејќи дека наместо тоа треба да се преговара за целосен мировен договор.
Самитот во Алјаска, одржан на 15 август, беше дипломатска конференција на највисоко ниво меѓу Вашингтон и Москва од руската инвазија на Украина во 2022 година. Сепак, се чини дека не донесе значајна промена во воените цели на Путин во Украина.
Според неименувани извори цитирани од бројни медиуми, Путин му рекол на Трамп дека може да се согласи на замрзнување на фронтот во украинските региони Запорожје и Херсон доколку Украина целосно се повлече од регионите Луганск и Донецк.
Русија тврди дека ги анектирала сите четири региони. Таа контролира поголем дел од областа Луганск и околу 70 проценти од областа Донецк, а делумно ги контролира и областите Запорожје и Херсон.
Демонстрантите низ Израел бараат крај на војната во Газа и ослободување на заложниците
Демонстрантите излегоа на улица низ Израел во неделата барајќи крај на војната во Газа и договор за ослободување на заложниците, додека војската се подготвува за нова офанзива.
Протестите се случија неколку дена откако израелскиот кабинет за безбедност ги одобри плановите за заземање на градот Газа, по 22 месеци војна што доведоа до ужасни хуманитарни услови на палестинската територија.
Големо израелско знаме блокирано со портрети на преостанатите заложници беше развеано во Тел Авив, а демонстрантите ги блокираа неколкуте градови во градот, ги вклучуваат и автопатот што ги поврзува Тел Авив и Ерусалим.
Организаторите на протестите, исто така, повикаа на генерален штрајк.
„Мислам дека е време војната да заврши. Време е сите заложници да бидат ослободени. И време е Израел да се движи кон закрепнување и постабилен Блиски Исток“, рече Дорон Вилфанд, учесник на митингот во Ерусалим.
Сепак, некои членови на владата кои се противат на каков било договор со Хамас ги критикуваа демонстрациите.
Безалел Смотрих, израелскиот министер за финансии и претставник на крајната десница, го осуди она што го нарече „перверзна и штетна кампања што му оди во прилог на Хамас“.
Тој тврдеше дека јавниот притисок за договор всушност е „закопување заложници во тунели и обид да се принуди државата Израел да се предаде на своите непријатели и да се загрози нејзината безбедност и иднина“.
Снимките ги прикажуваат демонстрантите како се собираат во Беери, кибуц во близина на границата со Газа, кој беше еден од најтешко погодените од нападот на Хамас, а израелските медиуми објавија протести на многу места низ земјата.
Плановите на Израел да ја прошири војната во градот Газа и блиските бегалски кампови предизвикаа меѓународна осуда и домашен отпор.
Експертите поддржани од ОН предупредуваат на широко распространет глад во Газа, каде што Израел драстично го ограничи количеството хуманитарна помош.
Според Цивилната одбрана на Газа, израелските сили убиле најмалку 13 Палестинци во саботата додека чекале да добијат хуманитарна помош во близина на дистрибутивните точки.
Четириесет и девет Израелци остануваат заробени во Газа, вклучувајќи 27 за кои израелската војска вели дека се мртви.
Четириесет и девет Израелци остануваат заробени во Газа, вклучувајќи 27 за кои израелската војска вели дека се мртви.
Во напад на Хамас, кој САД и Европската Унија го сметаат за терористичка група, во октомври 2023 година загинаа 1.219 лица, претежно цивили, а 251 беа приведени.
Во израелската офанзива што следеше загинаа повеќе од 61.897 Палестинци, претежно цивили, според Министерството за здравство во Газа контролирана од Хамас.
Туризам во Албанија: Што покажува статистикaта?
Милиони посетители, милијарди евра. Туризмот стана честа тема кога станува збор за Албанија во последните години. Сепак, како и минатата година, и овогодинешното лето донесе одредени загрижености дека албанските плажи се помалку посетени од очекуваното.
Пред една година, премиерот на Албанија, Еди Рама, изјави дека објавувањето фотографии и видеа од празни плажи е „организиран напад“ насочен кон штета на туризмот во Албанија. Подоцна рече дека Албанија треба да ги таргетира туристите кои трошат повеќе пари, а не само да го зголемува бројот на посетители.
Сепак, според податоците на Институтот за статистика на Албанија, бројот на туристи повторно се зголемил, иако не со исто позитивно темпо како во претходните години.
Од Азија, Африка и Америка - бројот на странски посетители од сите делови на светот се зголеми, во споредба со истиот период во претходните години.
Сепак, најголемиот број странски посетители во Албанија, околу 95 проценти, доаѓаат од Европа - при што Косово е најголемиот извор на странски туристи во Албанија со години.
Според Централната банка на Албанија, странските туристи минатата година потрошиле околу пет милијарди евра.
Ова значи дека секој посетител потрошил просечно 427 евра, што, според Централната банка, е помалку отколку во земјите во регионот како што се Грција и Турција.
Сепак, Светскиот совет за патувања и туризам предвидува дека трошоците за туризам ќе се зголемат на 7,3 милијарди евра оваа година, што би сочинувало 26,4 проценти од бруто домашниот производ.
Светскиот совет проценува дека туристичкиот сектор ќе вработи околу 314.000 луѓе до 2034 година. Секторот моментално вработува околу 20 проценти од албанската работна сила.
Каде патуваат туристите во Албанија?
На југ, камчестите плажи со чиста вода привлекуваат најмногу посетители, додека на север многу туристи се упатуваат кон Тет и Валбони.
Според Институтот за статистика на Албанија, некои музеи и национални паркови, исто така, привлекле стотици илјади туристи во 2024 година.
Повеќе од 90 проценти од сите странски посетители доаѓаат во Албанија на одмор или во посета на роднини.
Сепак, во последниве години, бројот на транзитни патници кои влегуваат во Албанија само за да го продолжат своето патување до други дестинации, исто така, значително се зголеми.
Солзавец, судири и полициска интервенција на протестите во неколку градови во Србија
Инцидентите не го одминуваат ниту петтиот ден од масовните антивладини демонстрации во Србија кои се одржуваат и денеска на 16 август во неколку градови.
Во Ваљево, беа демолирани просториите на владејачката Српската напредна партија. Демонстрантите фрлаа камења и факели, а во просториите избувна пожар.
Пожарникарите интервенираа за да го изгаснат пожарот, додека демонстрантите се повлекоа од местото и немаше собири пред просториите. Полицијата не интервенираше за време на инцидентот.
Демонстрантите го скршија и влезот во зградата на Општина Ваљево каде полицијата, која е во полна опрема за разбивање демонстрации, формираше кордон и употреби солзавец. Демонстрантите фрлаа камења и пиротехнички средства кон кордонот.
Во Белград, имаше конфликт меѓу демонстрантите и полицијата пред општинскиот комитет на СНС, со предупредувања за употреба на сила од страна на полицискиот кордон што ги растера демонстрантите. Меѓу звуците што се слушаа беа и топовски истрели.
Во Лесковац, учесниците на протестот се приближија до просториите на СНС, но беа запрени од полициските сили што беа поставени како бариера. Демонстрантите најавија дека ќе чекаат да пристигнат претставници на СНС.
Министерот за внатрешни работи, Ивица Дачиќ, изјави дека по протестот на 15 август, приведени се 38 лица, а повредени се шест полицајци.
Секојдневните собири на демонстрантите се реакција на протестите во градовите Врбас и Бачка Паланка во Војводина, кога поддржувачите на владата ги нападнаа демонстрантите со пиротехнички средства. Немирите беа предизвикани и од постапките на полицијата тој ден, која демонстрантите ја обвинија дека не презема ништо за да ги спречи нападите.
Комесарката за заштита на еднаквоста Бранкица Јанковиќ денеска оцени дека конфликтите на улиците низ Србија се случуваат затоа што е изгубена довербата на граѓаните.
Во соопштение за медиумите, таа оцени дека „луѓето ја земаат правдата во свои раце, бидејќи оние кои се должни да го сторат тоа не им обезбедиле заштита“.
„Нееднаквиот третман на граѓаните, давањето предност на некои во однос на другите, создава негодување, гнев, тензии, драматично тешки форми на кои моментално се соочуваме“, рече Јанковиќ.
Во врска со извештајот за прекумерна употреба на сила против демонстрантите, таа ги осуди ваквите постапки на полицијата.
Претседателката на српскиот парламент и функционерка на владејачката Српска напредна партија, Ана Брнабиќ, реагираше на нејзината изјава.
Во објава на социјалната мрежа X, Брнабиќ рече дека изјавата на комесарката е „изјава од лице со нула личен и професионален интегритет“.
Масовните протести во Србија траат од ноември 2024 година, откако 16 лица загинаа во несреќата на железничката станица во Нови Сад.
Граѓаните и студентите кои ги предводеа протестите бараат одговорност за несреќата, а потоа побараа предвремени избори. Владата одбива да ги распише.
Настаните на улиците во последните денови се кулминација на бранот незадоволство на демонстрантите од една страна и реакцијата на владата на политичката криза со која се соочува од друга страна.
Пет месеци од пожарот во „Пулс“ - родителите по 18.пат излегоа на марш
Во Кочани денеска се одржа 18-тиот „Марш на ангелите“, собир на родители и роднини во чест на жртвите од пожарот во клубот „Пулс“, во кој животот го загубија 62 лица, а околу 200 беа повредени.
Маршот започна од Паркот на револуцијата, обвинителството и судот во Кочани. Стартуваше во 18:05 часот, време кое симболично ја претставува доцната институционална реакција на надлежните во дискотеката „Пулс“.
„Колку животи треба да згаснат за вие да се разбудите“, „62 животи – 62 иднини, 62 семејства со вечна болка“ беа дел од транспарентите на маршот.
Денеска се навршија пет месеци од најтешкиот ден во нашите животи, пет месеци празнина во срцето, во кои секој здив е потежок од претходниот, изјави Розета Џамова, сестра на загинатиот Јорданчо Џамов.
„Во овие месеци болката не стивнува. Секоја мисла води кон нив, секој миг е обоен со тагата по изгубеното. Спомените се единствената сила што не држи исправени. Мостот меѓу вчера и денес. Меѓу присуството и тишината. Љубовта што ја оставија зад себе е вечна и никогаш нема да згасне“, рече таа.
На маршот беше кажано дека полицијата се обидела да ја саботира поддршката за маршот со тоа што задржувала и легитимирала грагани кои со автомобили од други градови тргнале да учествуваат на протестот во Кочани.
Семејствата на загинатите и натаму бараат одговорност од институциите за трагедијата и посочија дека нема да се откажат од борбата за правда.
Активни пожарите во „Јасен“ и помеѓу селата Рогачево и Јажинце
Вкупно пет пожари на отворен простор се регистрирани до 12 часот денеска, од кои активни се два, а изгаснати се три пожари, информира Центарот за управување со кризи (ЦУК).
Активни се пожарот во повеќенаменското подрачје „Јасен“, Општина Македонски Брод, каде е зафатена мешана шума и пожарот помеѓу селата Рогачево и Јажинце, Општина Јегуновце, каде горат пасишта и мешана шума.
Изгаснати се пожарите покрај патот Тетово - Гостивар каде гореше ѓубриште, во село Врановци, Општина Врапчиште каде гореа ниска вегетација и ливади и во село Матејче, Општина Липково каде беше опожарена ниска вегетација и стрниште.
Лажна дојава за бомба на скопскиот аеродром
Ноќеска во 02:41 часот, на телефонскиот број за итни случаи 112 е добиена пријава за поставена бомба во авион кој требало да полета од „Меѓународниот аеродром Скопје“ кон Турција.
Како што соопшти утрово Министерството за внатрешни работи, се работи за лажна дојавата за бомба на скопскиот аеродром.
-Веднаш по добиената пријава преземени се соодветни активности и извршени се потребните проверки од страна на антитерористичката единица при МВР и утврдено е дека пријавата е лажна, односно дека нема никаква експлозивна направа, велат од МВР.
По завршувањето на проверките, околу 06:00 часот, аеродромот продолжи со редовно работење.
Нови руски напади врз Украина по средбата меѓу Трамп и Путин во Алјаска
Русија лансираше 85 борбени дронови и балистичка ракета во Украина во текот на ноќта во петокот, соопшти Киев во саботата, неколку часа откако рускиот лидер Владимир Путин и американскиот претседател Доналд Трамп одржаа разговори во Алјаска.
Долгоочекуваната средба во оддалечената американска држава заврши без пробив во прекинувањето на повеќе од тригодишната инвазија на Русија во Украина.
Украинските воздухопловни сили соопштија дека Москва „лансирала балистичка ракета Искандер-М и 85 дронови Шахед“ и дека ги таргетирала „првичните фронтовски линии“ во четири региони.
Во својот дневен извештај, воздухопловните сили соопштија дека нападите биле извршени „ноќта на 16 август“, почнувајќи од вечерта на 15 август - кога Путин и Трамп одржале разговори.
Киев соопшти дека неговата воздушна одбрана соборила 61 дрон.
Самитот Трамп-Путин заврши без објава за прекин на огнот, и покрај месеците притисок од Западот врз Кремљ да се согласи на прекин на борбите.
Украинскиот претседател Володимир Зеленски сè уште не дал јавно коментар за разговорите.
Руската инвазија на Украина, започната од Путин во февруари 2022 година, одзеде илјадници животи.
Судири меѓу полицијата и демонстрантите на протестот во Белград
Трета ноќ по ред, во петокот се одржаа протести во неколку градови во Србија.
Протестите се реакција на судирите меѓу поддржувачите на владејачката Српска напредна партија и демонстрантите во два града во Војводина, Врбас и Бачка Паланка, на 12 август.
Судири меѓу полицијата и некои демонстранти беа регистрирани на 15 август во Белград на неколку локации.
Неколку илјади граѓани се собраа пред Владата на Србија, на неколку стотици метри од Општинскиот одбор на СНС. Неколку десетици поддржувачи се собраа пред просториите на партијата, а кордоните на жандармеријата ги разделија двете групи.
Во еден момент, беше испален огномет, а жандармеријата, заедно со Полициската бригада, почна да ги растерува демонстрантите. Беше фрлен солзавец, а жандармеријата употреби оклопни возила за да ги потисне демонстрантите.
Тие одговорија со фрлање камења и палење контејнери. Во текот на ноќта во главниот град беа регистрирани уште неколку судири меѓу полицијата и демонстрантите, а ситуацијата се смири околу полноќ.
Неколку лица се повредени, објавија новинарите на терен.
Министерот за внатрешни работи Ивица Дачиќ објави дека шест полицајци се повредени, а 38 лица се уапсени за време на уличните немири во Белград. Во јавно обраќање, Дачиќ рече дека демонстрантите дошле на митингот со намера да им наштетат на полицајците.
„Тие дојдоа маскирани, носејќи шипки, столбови, камења, штитови. Користеа праќки за да фрлаат мермери и камења кон полицајците. Имаа подготвени шишиња со замрзната вода или запалива течност - сто контејнери беа запалени“, рече Дачиќ.
Според него, екипа од телевизијата Информер била нападната во Нови Сад, а две лица биле уапсени.
Во Нови Сад, каде што демонстрантите ги демолираа општинските канцеларии на Српската напредна партија претходниот ден, митингот во петокот помина мирно. Граѓаните се собраа пред Полициската станица, а потоа одржаа протестна прошетка низ центарот на градот.
Немаше инциденти за време на официјалниот дел од протестот. По завршувањето на протестот, група демонстранти нападнаа екипа од телевизиската станица Информер, која е наклонета кон владата.
Протести се одржаа во неколку други градови низ земјата.
Од вторник во српските градови се организираат антивладини протести, за време на кои паралелно се собираа и поддржувачи на владејачката Српска напредна партија.
За време на овие собири, кои беа повикани од студенти и граѓани кои ги поддржуваат, избувнаа неколку инциденти.
Во тоа време, собраните антивладини демонстранти пријавија дека врз нив се пукало со пиротехнички средства од правец на просториите на СНС. Полицијата во Врбас интервенираше за да ги одвои дел од демонстрантите од другите.
Антивладините протести, предводени од студенти, траат во Србија повеќе од девет месеци. Властите се сметаат за одговорни за смртта на 16 лица кога се урна настрешница на железничка станица во Нови Сад на 1 ноември.
Владата ја негираше одговорноста за несреќата и одби да распише предвремени избори, едно од последните барања на организаторите на масовните протести.
Мултимедија
Најпосетени
Што треба да знаете