Министерот за економија, Крешник Бектеши, смета дека не е најцрното сценарио за Северна Македонија фактот што во буџетот има намалување на приходите за 13,9 проценти.

„Согласно информациите кои јас како министер ги имам се движиме во првото сценарио кое и не е најцрно сценарио што се однесува до приходите на државата. Ние не застануваме тука, веќе се реализираат сите мерки од првите три сета економски. Во моментов се работи и на нов четврт економски сет“, рече денеска Бектеши пред бизмисмените од Стопанската Комора на Северозападна Македонија.

Според него, ќе се дефинираат поединечни сектори каде би имало потреба за поголема поддршка од страна на државата, ќе се направат секако и даночни реформи и директно субвенционирање на компаниите кои би биле храбри во 2021 година да инвестираат.

Земајќи го во предвид досегашното искуство од справување со Ковид 19 и последиците кои ваквата појава ги остава врз економијата, Владата, рече Бектеши, е подготвена и во иднина да реагира со соодветни мерки, пред бизмисмените од Стопанската Комора на Северозападна Македонија.

Велика Британија, Франција и Германија го активираа таканаречениот механизам за повторно воведување на санкциите на ОН против Техеран.

Европското трио, познато како Е3, го извести Советот за безбедност на ОН на 28 август да го започне процесот, кој трае 30 дена.

Во соопштението, министрите за надворешни работи на Е3 рекоа:

„Ќе го искористиме 30-дневниот период за да продолжиме да соработуваме со Иран во врска со нашата понуда за продолжување или какви било значајни дипломатски напори за враќање на неговата усогласеност со обврските“.

Тие нагласија дека „ја делат фундаменталната цел дека Иран никогаш не смее да бара, стекнува или развива нуклеарно оружје“.

Овој чекор го става Иран во ризик од соочување со обновени санкции кои беа отстранети како дел од значајниот нуклеарен договор од 2015 година, формално познат како Заеднички сеопфатен план за акција.

Државниот секретар на САД, Марко Рубио, го поздрави потегот на Е3.

„Во исто време, Соединетите Држави остануваат достапни за директен ангажман со Иран - во унапредување на мирно, трајно решавање на нуклеарното прашање на Иран“, рече тој во соопштението.

„Враќањето на санкциите не е во спротивност со нашата искрена подготвеност за дипломатија, туку само ја зајакнува“, додаде Рубио.

Иран го осуди потегот.

„Оваа одлука на трите европски земји сериозно ќе го поткопа тековниот процес на интеракција и соработка меѓу Иран и Меѓународната агенција за атомска енергија (МААЕ)“, се вели во соопштението на Министерството за надворешни работи, нарекувајќи го потегот „провокативна и непотребна ескалација“.

Видете и ова:

Како што се приближува рокот, какви би биле „обновените“ санкции против Иран?

Министерот за надворешни работи, Абас Арагчи, рече дека одлуката е „неоснована и незаконска“. Тој додаде дека Техеран ќе одговори на она што го нарече „неоправдана акција“, без да даде детали.

Сепак подоцна, во писмото до шефицата за надворешна политика на ЕУ, Каја Калас, тој рече дека Техеран е подготвен да ги обнови „фер“ преговорите за својата нуклеарна програма, ако Западот покаже добра волја.

Тој изјави „подготвеност на Иран да ги продолжи фер и избалансираните дипломатски преговори, под услов другите страни да покажат сериозност и добра волја и да избегнат дејствија што им штетат на шансите за успех“.

ОН ги повика Иран и светските сили да го искористат притисокот за постигнување нов нуклеарен договор пред да стапат во сила обновените санкции.

„Во следните 30 дена, постои можност да се избегне каква било понатамошна ескалација и да се најде пат напред“, рече Стефан Дужарик, портпарол на генералниот секретар на ОН, Антонио Гутереш.

Видете и ова:

Шефот на нуклеарната агенција на ОН вели дека инспекторите се вратиле во Иран

Откако ќе се финализира процесот на враќање на ситуацијата во нормала, веќе замрениот нуклеарен договор од 2015 година, ефикасно ќе заврши.

Договорот беше дизајниран да ја спречи Исламската република да развива нуклеарно оружје - нешто што Техеран долго време инсистира дека не го спроведува. Тој ги опишува строгите правила за независно следење на нуклеарните активности на Иран и наметнува ограничувања и на количината ураниум што може да го поседува и на нивото до кое може да се збогати.

Иран почна да се повлекува од своите обврски откако САД се повлекоа од договорот во 2018 година и повторно воведоа санкции. Оттогаш Техеран ја забрза својата нуклеарна програма, сега збогатувајќи ураниум до чистота од 60 проценти - далеку над ограничувањето од 3,67 проценти како што стои во нуклеарниот договор.

Иран ја прекина соработката со Меѓународната агенција за атомска енергија во јули како одговор на бомбардирањето на САД и Израел на неговите клучни нуклеарни постројки во Фордо, Исфахан и Натанц. Еден од условите што ги постави Е3 за одложување на процесот беше Техеран да ја продолжи целосната соработка со нуклеарното надзорно тело на ОН пред крајот на август.

Украинскиот претседател Володимир Зеленски во четвртокот вечерта (28 август) изјави дека рускиот напад со ракети и беспилотни летала врз Киев, во кој загинаа најмалку 21 лице, бил „напад на Русија“ врз американскиот претседател Доналд Трамп, кој самиот рече дека „не е задоволен“ од тој напад.

„Русија сега ги напаѓа сите во светот кои сакаат мир. Тоа е удар за Украина... И тоа е исто така удар на Русија врз претседателот Трамп“, рече Зеленски во вечерното видео обраќање.

Американскиот претседател е сè повеќе фрустриран од недостатокот на напредок кон прекин на огнот и ѝ се закани на Москва со нови санкции и царини.

„Слушнавме во Вашингтон дека рускиот претседател Владимир Путин наводно е подготвен да ја заврши војната. Но, наместо тоа, тој избра балистички ракети пред какви било вистински чекори кон мир“, додаде Зеленски.

Украинскиот претседател рече дека очекува рамката за безбедносни гаранции за Украина да биде откриена уште следната недела. Европските сојузници ветија дека ќе обезбедат безбедносни мерки за Украина во случај на прекин на огнот, со евентуално вклучување на САД.

Меѓудругото, Зеленски на група европски лидери на виртуелен состанок им порача дека „е важно претседателот Трамп да види дека ние во Европа сме обединети во нашата решеност да ја завршиме војната“.

Видете и ова:

Голем воздушен напад на Киев, најмалку 21 жртва, десетици повредени

Белата куќа објави дека Трамп е незадоволен од руските напади во ноќта помеѓу среда и четврток, во кои десетици луѓе беа повредени во украинскиот главен град.

„Тој не беше среќен поради оваа вест, но не беше ниту изненаден. Ова се две земји кои се во војна многу долго време“, изјави портпаролката Каролин Ливит на брифинг за медиумите.

Функционери од Европа, САД и ОН го осудија нападот врз Киев во текот на ноќта, додека Велика Британија и Европската Унија ги повикаа руските дипломати да го изразат своето незадоволство.

Високи украински функционери треба да се сретнат со специјалниот претставник на Трамп, Стив Виткоф, во Њујорк за да разговараат за дополнителни начини за помош на Украина да се одбрани и во напорите за завршување на војната.

Најмалку 21 лице загинаа во Киев кога руски ракети уништија станбени згради и куќи во украинскиот главен град. Десетици луѓе беа повредени, а спасувачите пребаруваа купишта тлеечки урнатини за преживеани.

Во Киев и регионот на Киев, петок (29 август) е прогласен за ден на жалост во чест на жртвите од нападот.

Новите измени во Законот за безбедност на сообраќајот ќе донесат забрана за користење мобилни телефони и електронски уреди не само за возачите на моторни возила, туку и за пешаците и велосипедистите.

Министерот за внатрешни работи, Панче Тошковски денеска (28 август) рече дека новите мерки се дел од проектот „Безбеден град“.

„Со измените се предвидува забрана за употреба на телефони и електронски уреди при управување со велосипед, мопед, мотоцикл, скутер, трактор и други возила, а истовремено и за пешаците при одење, преминување на коловоз или движење по велосипедска патека“, изјави Тошковски.

Во рамките на овој проект, сообраќајните прекршоци ќе се регистрираат со помош на улични камери. Како што најави Тошковски, тој ќе почне да функционира од 1 јануари 2026 година.

Видете и ова:

„Безбеден град“ лови илјадници прекршоци дневно, казните чекаат законски измени

„Најмалку еден месец пред официјалниот почеток ќе има тест-период, во кој граѓаните ќе бидат известувани за сторените прекршоци без изрекување казни. Со казнување ќе започнеме од 1 јануари“, рече ресорниот министер.

Системот за почеток ќе се имплементира во Скопје, Тетово и Куманово, а планирано е да опфати и делници од Коридор 8 и Коридор 10. До средината на 2026 година, според Тошковски, целата држава ќе биде покриена со камерите.

Министерот најави и заострување на законите, вклучително и измени во Кривичниот законик.

„Оние кои возат без возачка дозвола, под дејство на алкохол или дрога, или возат 90 километри на час над дозволеното, не заслужуваат да бидат дел од сообраќајот. Покрај парични казни, ќе има и затворски казни и трајно одземање на возилата“, нагласи тој.

Во 2024 година, во сообраќајни несреќи во земјава животите ги загубиле 142 лица.

Централната изборна комисија на Босна и Херцеговина распиша предвремени избори за претседател на Република Српска од редовите на српскиот народ, за 23 ноември.

Оваа позиција остана празна откако Централната изборна комисија му го одзеде мандатот на Милорад Додик на 18 август, врз основа на правосилна пресуда на Судот на Босна и Херцеговина, со која е осуден на една година затвор и шест години забрана за извршување јавни функции поради неспроведување на одлуките на високиот претставник.

Додик одбива да се повлече од оваа функција.

Видете и ова:

Изборната комисија на БиХ ќе одлучува за предвремени избори за претседател на Република Српска

Во меѓувреме, Собранието на Република Српска усвои низа неуставни закони и заклучоци кои се однесуваат на одржување референдум во овој ентитет, на кој граѓаните треба да се изјаснат за пресудата на Судот на Босна и Херцеговина против Милорад Додик и за одлуката на Централната изборна комисија (ЦИК) на БиХ со која му беше одземен мандатот како претседател на РС.

ЦИК донесе одлука да распише предвремени избори за претседател на Република Српска од редовите на српскиот народ, бидејќи на двајцата потпретседатели (еден Бошњак и еден Хрват) не им беше одземен мандатот.

На седницата на ЦИК беше усвоен и заклучокот централниот избирачки список да се заклучи на 27 август оваа година во 24 часот. Во тој момент, право на глас во избирачкиот список има околу 1 милион и 266 илјади избирачи.

За одржување на предвремените избори за претседател на Република Српска потребно е да се издвојат 6 милиони и 490 илјади марки (околу 3,2 милиони евра).

Наставниците од средните училишта во државата до 12 септември можат да се пријават за напредна обука за примена на вештачката интелигенција во наставата - соопшти денеска (28 август) Министерството за образование и наука.

Обуката „AI во училница“ е наменета за наставници со основно познавање на дигитални алатки и активно владеење на англискиот јазик, и има за цел да им помогне да ја интегрираат вештачката интелигенција во сите фази на наставниот процес, од подготовка на часови до оценување.

Пријавувањето е отворено до 12 септември, а потоа ќе следи селекција и тестирање на кандидатите.

Обуката ќе започне на 1 октомври, се наведува во соопштението.

Видете и ова:

Естонија прва во светот воведува четботови во училиштата

Наставниците што ќе ја поминат обуката ќе добијат бесплатен пристап до осум различни курсеви месечно со најсовремена и практична содржина, како и можност за стекнување на осум дигитални сертификати месечно дополнети со печатен сертификат за успешно завршување на целата програма.

Воведувањето на вештачката интелигенција во наставата беше најавено пред два месеца од страна на ресорната министерка, Весна Јаневска.

Таа тогаш истакна дека ваквата технолошка иновација стратешки и постепено ќе биде имплементирана во начинот на учење, спроведување на наставата и генерално во развојот на човечките ресурси.

„Препознаваме дека вештачката интелигенција не треба да го замени човечкиот фактор во образованието, туку да го дополни и унапреди“, истакна Јаневска на Меѓународниот самит за образовни технологии, што се одржа во Истанбул, од 20 до 22 јуни 2025 година, во организација на Министерството за национално образование и наука на Република Турција.

Администрацијата на американскиот претседател, Доналд Трамп предложи намалување на времетраењето на престојот во САД за странски студенти и новинари, како дел од заострувањето на ограничувањата за легална имиграција во земјата.

Според овој предлог, на странските државјани кои поседуваат студентски визи не би им било дозволено да престојуваат во САД повеќе од четири години, објави АФП.

За странските новинари престојот ќе биде ограничен на 240 дена, иако ќе можат да поднесат барање за обновување на истиот период. Само кинеските новинари ќе бидат ограничени на 90 дена.

Видете и ова:

САД ги одложија санкциите врз српската нафтена индустрија по шести пат

Досега САД издаваа визи за времетраењето на студентската програма.

„Нелегални“ визи, како и студентските визи, не можат да важат подолго од 10 години.

Овој предлог беше објавен во Федералниот регистар, официјалното списание на федералната влада, отворајќи краток период за јавни коментари пред да стапи на сила.

„Претходните влади дозволуваа странските студенти и други носители на визи да остануваат во САД речиси неограничено долго, што претставуваше безбедносен ризик, ги чинеше даночните обврзници , непроценливи суми и ги доведуваше американските граѓани во неповолна положба“, соопшти Министерството за внатрешна безбедност.

Според статистиките на Министерството за трговија, меѓународните студенти придонеле за американската економија со повеќе од 50 милијарди долари во 2023 година.

Видете и ова:

Трамп најавува клучна одлука за војната во Украина во рок од две недели

САД во академската 2023-2024 година пречекаа повеќе од 1,1 милион меѓународни студенти, повеќе отколку која било друга земја. Обично плаќајќи ја целата школарина, нивното присуство претставува клучен извор на приходи за американските универзитети.

„Овој предложен правилник испраќа порака до талентираните поединци ширум светот дека нивниот придонес не е ценет во САД“, рече Мириам Фелдблум, раководителка на група што ги претставува лидерите на американските високообразовни институции.

Во последните недели, администрацијата на Трамп го заостри спроведувањето на имиграциските закони, потсетува АФП.

На средината на август, Стејт департментот објави дека од јануари поништил 6.000 студентски визи. Околу 55 милиони носители на визи се погодени од засилените проверки.

Израел бара од глобален мониторинг за глад да ја повлече проценката во која се наведува дека градот Газа и околните области страдаат од глад и дека тој веројатно ќе се прошири, отфрлајќи го извештајот како „длабоко погрешен“.

Реакцијата на Израел е откако Интегрираната класификација на фази на безбедност на храната (IPC) - глобална иницијатива на агенциите на Обединетите нации што работи на идентификување на состојбите со глад соопшти дека 514.000 луѓе, или близу една четвртина од Палестинците во Газа, се соочуваат со глад, а бројот се очекува да се зголеми на 641.000 до крајот на септември.

Речиси две години по почетокот на војната во Газа, Израел постојано ги отфрла ваквите наоди како лажни и пристрасни во корист на палестинската милитантна група Хамас.

„Извештајот е длабоко погрешен, непрофесионален и сериозно ги пропушта стандардите што се очекуваат од меѓународно тело на кое му е доверена толку сериозна одговорност“, напиша Генералниот директор на израелското Министерството за надворешни работи, Еден Бар Тал до IPC.

Видете и ова:

Газа официјално гладува, вели глобален монитор за глад

IPC немаше коментар за израелското писмо.

Министерството за здравство на Газа на 27 август соопшти дека уште 10 лица починале од неухранетост и глад, со што бројот на смртни случаи од такви причини се зголеми на 313 лица, вклучувајќи 119 деца, од почетокот на војната во Газа во октомври 2023 година.

Во Глобалната иницијатива за идентификување на состојбата со глад учествуваат 21 група за помош, агенции на ОН и регионални организации финансирани од Велика Британија, Канада, Европската Унија и Германија.

Иницијативата регистрираше глад четири пати во минатото - во Сомалија во 2011 година, во Јужен Судан во 2017 и 2020 година и во Судан во 2024 година.

Повеќе европски влади и меѓународни организации го повикаа Израел да дозволи поголем пристап до хуманитарна помош во Газа.

Во пукотница во католичко училиште во американскиот град Минеаполис, Минесота, загинаа три лица, вклучувајќи го и вооружениот напаѓач, а уште 20 се повредени, потврди полицијата.

Потврдена е смртта на две деца, на возраст од 8 и 10 години.

Агенцијата Ројтерс јави дека се повредени 17 лица.

Според локалната полиција, вооружениот напаѓач бил малолетник, а мотивот за нападот сè уште не е познат. Полицијата првично соопшти дека пет лица се мртви, но подоцна го ревидираше бројот на жртви. Истрагата е сè уште во тек, а на жителите им се препорачува да ја избегнуваат училишната област.

Видете и ова:

Пукање во училиште за возрасни во Шведска, убиени десет лица

Благовештанското католичко училиште има околу 390 ученици, од градинка до средно училиште и се наоѓа на кампус од 62 хектари. Бројни служби за итни случаи, вклучувајќи полиција, пожарникари и медицински екипи беа на местото на пукањето.

Американскиот претседател Доналд Трамп кажа дека бил информиран за пукањето и дека ФБИ е на местото на настанот.

„Ве молам, придружете ми се во молитвата за сите вклучени!“, напиша Трамп на социјалните мрежи.

Гувернерот на Минесота, Тони Еверс, изрази сочувство за настраданите и благодарност до службите.

„Се молиме за децата, наставниците и целата училишна заедница додека чекаме повеќе информации“, рече Еверс.

Последното е едно од речиси 490 масовни пукања што се случија во Соединетите Американски Држави оваа година, според податоците на Архивата за насилство со оружје.

Нов протестен собир е организиран пред Филозофскиот факултет во Нови Сад, еден ден откако деканот на образовната институција, Миливој Алановиќ, ја прекина студентската блокада што траеше со месеци.

Пред влезот во зградата, како што јавува репортер на Радио Слободна Европа, има и полиција во опрема за нереди, додека присутните извикуваат „Администрација надвор“.

„Тука сме додека не нè пуштат во зградата, а ќе мора да нè пуштат“, рече еден од студентите преку мегафон.

Видете и ова:

Граѓански собири против блокадите низ Србија

Протестите пред Филозофскиот факултет се случуваат откако студентите на 26 август објавија дека деканот Миливоје Алановиќ „влегол на факултетот со неколку професори и ја сменил бравата“ тоа утро и им се заканил на студентите со дисциплински мерки.

Поради неговите постапки, студенти, професори и граѓани се собраа пред факултетот во текот на целиот ден на 26 август, а во текот на вечерта се случи инцидент кога, на повик на деканот, полицијата пристигна на факултетот.

По тој повод, насобраните се обидоа да ја спречат полицијата да влезе во зградата на факултетот.

Министерството за внатрешни работи на Србија објави дека едно лице е уапсено под сомнение за напад врз полицијата и дека се преземаат мерки за пронаоѓање на другите кои, како што е наведено, „учествувале во нападот врз полицајците“.

Академската заедница реагираше и на најновите настани на Филозофскиот факултет во Нови Сад.

Видете и ова:

Вучиќ ги пoвика претставниците на демонстрантите на јавна дебата, тие одбија додека не се распишат избори

Академскиот пленум на тој факултет го повика деканот Алановиќ да поднесе оставка поради „узурпирање“ на факултетот.

Исто така, околу 60 наставници и соработници на Филозофскиот факултет во Нови Сад потпишаа петиција истиот ден со која се осудува упадот на деканот во факултетот и исклучувањето на студентите кои ја блокираат институцијата.

По несреќата во Нови Сад лани во октомври, кога се урна кровот на реконструираната железничка станица и загинаа 16 лица, студентите низ цела Србија ги блокираа факултетите.

Оттогаш тие бараат кривична и политичка одговорност за несреќата.

Филозофскиот факултет во Нови Сад беше првиот во градот што беше „окупиран“ од студенти во бран блокади што подоцна следеа и на други факултети.

Граѓаните да пријават евентуални неправилности поврзани со кардиолошките и кардиоваскуларните интервенции, повикаа министерот за здравство Азир Алиу и директорот на Фондот за здравствено осигурување, Сашо Клековски.

Апелот до граѓаните е откако кардиохирургот Сашко Кедев изјави дека на приватни клиники пациенти биле непотребно оперирани за профит.

„Секој еден граѓанин кој мисли дека му е направено и наплатено нешто што не требало да биде направено и наплатено, зборувам за кардиологија и кардиохирургија, да поднесе претставка. Дали тука, дали во Министерство за здравство, бидејќи многу би ја олеснило работата на комисијата ако имаме одредени претставки“, рече Клековски.

Министерството за здравство соопшти дека пријавите можат да се поднесат преку посебна алатка на веб-страницата на министерството при што пријавите се доверливи.

Видете и ова:

Кардиолошки операции под лупа – за здравје или за профит?

Клековски на прес-конференција кажа дека интерната комисија формирана да ги испита наводите на Кедев, располага со потребната документација.

Супервизија ќе прават тројца странски доктори за јавноста дополнително да се увери дека постапката ќе биде објективна, рече Клековски.

Сè уште се дискутира методологијата по која ќе работи комисијата - дали да биде по доставени случаи или „слепа“ контрола на избран пример.

Вкупниот буџет во 2025 година за петте специјализирани болници (Клиника за кардиологија, за кардиохирургија, СБ Охрид, Аџибадем Систина и Жан Митрев) изнесува над 2.4 милијарди или околу 40 милиони евра, а вклучувајќи ги другите надминува 45 милиони евра. Од тоа околу 26 милиони евра се во јавно здравство, а 19 милиони во приватно здравство.

Буџетот за 2025 година е поголем за околу 400 милиони денари од тој во 2022 година.

Во 2024 година биле извршени вкупно 9.404 интервенции од кои 6.876 во јавно здравство и 2.528 во приватно здравство. Во 2024 година биле извршени 418 интервенции помалку од 2023 година (тогаш имало 9.822). Ова се податоци само за услуги платени од Фондот, без приватно платени услуги.

Иако Кедев не посочи конкретна болница, „Аџибадем Систина“ му се закани со тужба и побара да каже на кого мисли, а тој врати дека „тужбата ќе биде можност конечно да се види што навистина се случува во македонското приватно здравство“.