Грчките разузнавачки служби открија членови на невладини организации вклучени во „трговија со луѓе“ - шверц на илегални имигранти од Турција во Грција, објави весникот „Катимерини“. Според документот цитиран од атинскиот весник, разузнавачката служба и полицијата тајно ја испитувале улогата на четири невладини организации кои користеле „нелегални процедури и методи“ во турските шверцерски операции на мигранти и бегалци од Турција на грчкиот остров Лезбос среде кризата со Турција во август.

Балканска мигрантска рута - огради и шверцери

„Шверцот на луѓе“, во кој, наводно, се вмешани државјани на Германија, Франција, Швајцарија, Австрија, Норвешка и Бугарија, го откри тајната мисија на двајца мигранти во Турција и нивната наводна соработка со осомничени членови на невладини организации. Двајцата странци, регрутирани од грчката разузнавачка служба, отишле во Измир, Турција, а потоа се качиле на брод со илегални имигранти кои оделе за Лезбос.

Грчките власти префрлаат мигранти во нов камп по пожарот во Мориа

Доверливите документи прегледани од „Катимерини“ наведуваат дека вкупно 35 членови на четири невладини организации го олесниле движењето на илегални имигранти и бегалци од Турција кон Лезбос користејќи „нелегални методи и процедури“. Невладините организации дури ја следеа грчката крајбрежна стража, ги следеа радиофреквенциите на официјалните комуникации и „играа улога на шпиони, а не на хуманитарци“, изјави грчкиот министер за имиграција Нотис Митаракис.

Шефицата за надворешна политика на Европската Унија, Каја Калас, денеска (15 јули) изјави дека сè уште очекува наскоро да се постигне договор за нов пакет санкции против Русија, откако Словачка повторно го блокираше процесот.

Новиот пакет, воведен како одговор на војната во Украина, е во застој со недели поради спор со Словачка околу плановите за постепено укинување на увозот на руски гас.

Калас очекуваше напредок на состанокот на министрите за надворешни работи на ЕУ денеска.

Сепак, премиерот на Словачка, Роберт Фицо, познат по својот проруски став, рече дека му се потребни дополнителни гаранции од Брисел во врска со плановите за прекин на увозот на руски гас до крајот на 2027 година.

Видете и ова:

Калас се надева на договор за 18-от пакет санкции кон Русија

Словачка останува зависна од рускиот гас и остварува приходи од транзитни такси за испораките што минуваат низ нејзина територија.

„Навистина жалам што денес не постигнавме договор“, рече Калас. „Но, сè уште се надевам дека ќе донесеме одлука утре.“

Официјалните претставници на ЕУ велат дека е во тек договор за намалување на ограничувањето на цената за извоз на руска нафта во трети земји и покрај претходното противење од Малта.

Мерката е дел од иницијативата на Г7 насочена кон ограничување на приходите од извоз на нафта на Русија во светот.

Ценовното ограничување, кое Г7 го постави на 60 долари за барел во 2022 година, им забранува на бродските и осигурителните компании да учествуваат во извозот на руска нафта по повисоки цени.

Според новиот план на ЕУ - кој веројатно ќе биде поддржан од другите членки на Г7, како што се Велика Британија и Канада - се предвидува флексибилна цена под пазарната вредност.

Ова моментално би изнесувало околу 47,6 долари, според внатрешните дискусии на ЕУ што ги виде АФП.

Дипломатите признаваат дека недостатокот на поддршка од САД ќе ја намали ефикасноста на мерката.

Како дел од санкциите, ЕУ планира да воведе мерки и против повеќе бродови од „флотата во сенка“ од стари танкери што Русија ги користи за да ги заобиколи ограничувањата за извоз на нафта.

Новите мерки доаѓаат во време кога Доналд Трамп ја засили својата реторика против Русија, заканувајќи се дека ќе воведе големи „секундарни царини“ ако Москва не се согласи да престане со борбите во рок од 50 дена.

Мерката куќен притвор за осомничениот С.Љ. инволвиран во нападот на градоначалничката на Скопје, Данела Арсовска, се заменува со мерка притвор, откако Кривичниот совет на Основниот кривичен суд Скопје ја уважи жалбата на Основното јавно обвинителство.

Од Кривичниот суд велат дека осомничениот е веќе спроведен во Затворот Скопје, а како што наведуваат, одлуката следува откако судот оценил дека постојат околности кои укажуваат на опасност од бегство и можност за повторување на делото.

Инцидентот се случи на 11 јули 2025 година, кога градоначалничката Арсовска, заедно со градски службеници, извршувала увид на нелегален објект во изградба на улицата „Севастополска“ во Чаир.

„Тој се претставил како сопственик на објектот во градба, па почнал грубо да ја навредува, да и се заканува, по што и физички ја нападнал. Кога изреагирале останатите вработени во градските служби и припадниците на МВР и го тргнале првоосомничениот, со закани продолжило и второосомниченото лице. Со чинот на насилство двајцата осомничени во јавноста и кај другите присутни лица предизвикале чувство на несигурност, загрозување и страв“, соопшти Обвинитeлството.

Видете и ова:

Градоначалничката Арсовска доби 24-часовно полициско обезбедување

Инаку, Обвинителството покрена постапка против двете лица за кривично дело Насилство по член 386 став 3 во врска со став 1 од Кривичниот законик. За првоосомничениот беше побарана мерка притвор, а за вториот осомничен – мерки на претпазливост, вклучувајќи забрана за приближување до оштетените,
забрана за напуштање на живеалиштето, одземање на патна исправа и редовно јавување во суд.

„Градоначалничката Арсовска, како носител на јавна функција, ќе биде под 24-часовна полициска заштита, со цел да ѝ се обезбеди лична сигурност и непречено извршување на нејзините обврски“, соопшти Министерството за внатрешни работи на 12 јули.

Арсовска на 31 мај достави документи за незаконски легализации на дивоградби во Обвинителството, а на 27 јуни до до Обвинителството за гонење организиран криминал и корупција (ОЈОГОКК) достави докази за нови, како што рече, криминални легализации од градоначалникот на Чаир, Висар Ганиу.

Украинскиот премиер изјави дека поднел својата оставка, како дел од големата, широко очекувана реконструкција на владата во земјата разурната од војна.

Се очекуваше претседателот Володимир Зеленски да ја прифати оставката на Денис Шмихала, кој беше на функцијата од 2020 година, пред Русија да започне целосна инвазија во февруари 2022 година. Тој објави фотографија од неговото лично напишано писмо за оставка денеска (15 јули).

Неговата позиција ќе ја заземе Јулија Свириденко, која досега беше прва заменичка на премиерот.

Како технократ, Свириденко одигра значајна улога во преговорите со Соединетите Држави за договор што им дава на американските компании пристап до вредни минерали и ретки земни метали во Украина.

При најавата за реконструкција на владата, претседателот Зеленски рече дека Јулија Свириденко ќе се стреми да го прошири домашното производство на оружје во Украина, да ги поедностави деловните прописи и дополнително да го зајакне системот за социјално осигурување на земјата.

По повеќе од 41 месец речиси постојано руско бомбардирање, Украинците се сè повеќе исцрпени, иако во голема мера остануваат поддржувачи на воените напори.

Анкетите на јавното мислење покажуваат дека Зеленски продолжува да ужива голема поддршка кај граѓаните, иако заостанува зад некои други истакнати јавни личности, особено Валери Залужни, кој претходно беше врховен командант на украинските сили, а подоцна стана амбасадор во Обединетото Кралство.

Видете и ова:

Трамп го менува ставот за оружјето за Украина, но не врши целосен притисок врз Путин

Зеленски беше избран во 2019 година, а по руската инвазија, прогласи воена состојба, што оневозможува одржување на нови избори. Сепак, тој се соочува со критики за тоа што не распиша претседателски избори, иако повеќето аналитичари веруваат дека нивното одржување би било невозможно во воени услови.

Рускиот претседател Владимир Путин го искористи ова како аргумент за да тврди дека Зеленски е нелегитимен. Во февруари, американскиот претседател Доналд Трамп, исто така, го критикуваше Зеленски - нарекувајќи го „диктатор без избори“ - иако подоцна ја ублажи својата реторика, а воедно ги зголеми критиките кон Путин.

Се очекува Зеленски да го разреши и министерот за одбрана Рустем Умеров и да го назначи за амбасадор во Соединетите Држави.

Денис Шмихал, сегашниот премиер, треба да го преземе Министерството за одбрана, според планот на претседателот Зеленски.

Сите назначувања мора да бидат потврдени од парламентот, но не се очекуваат никакви пречки во тој процес.

Тим од тројца независни експерти кои работат за највисокото тело на ОН за човекови права, со фокус на Израел и палестинските територии, поднесе оставка, наведувајќи лични причини.

Израелската влада постојано го критикуваше тој тим експерти, познат како Комисија за истрага на окупираната палестинска територија и Израел, избегнуваше соработка со тимот и ги одби сите нивни барања да патуваат во регионот, објави АП.

Ниту независните експерти, ниту советот, немаат никаква моќ над земјите, туку имаат за цел да посочат кршење на правата и да соберат информации за осомничени сторители што би можеле да ги користат Меѓународниот кривичен суд или други судови кои се фокусираат на меѓународната правда.

Оставките, објавени од Советот за човекови права поддржан од ОН, кој го формираше тимот, доаѓаат во време кога насилството на палестинските територии продолжува и има малку знаци за смирување на израелската воена кампања против Хамас - која САД и ЕУ ја сметаат за терористичка организација- и другите милитанти кои стојат зад нападот од 7 октомври 2023 година.

Нави Пилај, поранешната шефица на ОН за човекови права, која ја водеше комисијата во изминатите четири години, во писмо до претседателот на советот изјави дека поднесува оставка од 3 ноември поради „возраст, здравствени проблеми и тежината на неколку други обврски“.

Видете и ова:

САД воведуваат санкции против специјалната известувачка на ОН за палестинските територии

Министерството за здравство во Појасот Газа, контролирано од Хамас, соопшти дека жените и децата сочинуваат повеќе од половина од повеќе од 58.000 смртни случаи во војната.

Министерството не прави разлика помеѓу цивили и борци. ОН и другите меѓународни организации ги сметаат овие бројки за најсигурна статистика за жртвите во војната, објавува АП.

Војната започна со упад на Хамас во јужен Израел на 7 октомври 2023 година, кога, според израелските бројки, околу 1.200 луѓе беа убиени, а 251 лице беше киднапирано.

Косовската претседателка Вјоса Османи ја обвини Србија дека дејствува како продолжена рака на руските напори за дестабилизација на Западен Балкан, но не ја повтори својата претходна изјава за наводната улога на американскиот претседател Доналд Трамп во спречувањето на ескалацијата на ситуацијата од Србија на Косово.

Зборувајќи во Рига, денеска (15 јули, заедно со летонскиот претседател Едгарс Ринкевичс, Османи ја отфрли идејата за „тензии“ меѓу Косово и Србија, претставувајќи ја ситуацијата како агресија од едната страна и самоодбрана од другата.

„Не би го нарекла тоа тензии меѓу Косово и Србија, бидејќи се обидуваме да не паднеме во замката на изедначување на двете страни“, рече Османи, одговарајќи на новинарско прашање за улогата на Русија во тензиите и ескалациите меѓу Косово и Србија.

„Никогаш не смееме да ги ставаме агресорот и жртвата во ист кош. Србија постојано се обидува да ја дестабилизира нашата земја, вклучително и преку акти на агресија, додека ние постојано се браниме“, рече Османи.

„Никогаш не сме окупирале ниту нападнале ниту еден сантиметар од територијата на кој било сосед. Она што отсекогаш сме го правеле – и што ќе продолжиме да го правиме – е да ја браниме нашата независност, нашиот територијален интегритет, мирот и слободата, кои беа тешко стекнати“, додаде таа.

Османи во последните денови неколку пати зборуваше за можна ескалација на ситуацијата од страна на Србија.

Таа на предавање во Вашингтон на 10 јули изјави дека американскиот претседател Доналд Трамп неодамна спречил можна ескалација на ситуацијата меѓу Србија и Косово.

Неведе дека има „доверливи информации“ дека ова е „многу, многу скорешен развој на настаните“.

Видете и ова:

Османи: Трамп спречи можна ескалација на ситуацијата од Србија во Косово

Изјавата предизвика критики од Ричард Гренел, пратеникот на Трамп за специјални мисии.

Тој ја обвини Османи за „манипулирање“ со зборовите на Трамп.

„Доналд Трамп е номиниран за Нобелова награда за мир за неговата работа на мирот и економска нормализација меѓу Косово и Србија во 2019 и 2020 година, преку потпишувањето на Вашингтонскиот договор во Белата куќа на Трамп“, вели Гренел во објава на X.

Тој додаде дека Османи „не била дел од тој договор“ и дека е „апсурдно да се преправа дека има нешто ново“.

Радио Слободна Европа (РСЕ) контактираше со Белата куќа за дополнително појаснување, но не доби одговор.

Ниту косовската влада ниту Министерството за внатрешни работи не одговорија на прашањата на РСЕ за тоа на каква ескалација мислеше Османи.

Вршителот на должноста министер за внатрешни работи Џељал Свечља накратко изјави на 15 јули: „Исклучително сме благодарни за поддршката на Соединетите Американски Држави низ целата историја на Република Косово“.

Видете и ова:

Вучиќ ги отфрли обвинувањата на Османи дека Србија се заканила со ескалација на конфликтот со Косово

Последната голема ескалација во северот на Косово – област со мнозинско српско население – се случи во септември 2023 година, кога група вооружени Срби, предводени од Милан Радоичиќ, ја нападнаа косовската полиција во Бањска, убивајќи еден полицаец.

Приштина го окарактеризира нападот како терористички чин оркестриран од Србија – обвинение што Белград го негираше.

По коментарите на Гренел, тимот на претседателката Османи објави дека таа ќе одржи прес-конференција по враќањето од нејзиното официјално патување.

Зборувајќи во Рига, Османи исто така изјави дека руското влијание во Косово е „нула“.

„За жал, не можам да кажам истото за нашата соседна земја, бидејќи Србија се претвори во држава под руско влијание - без разлика дали е политичко, економско или воено. Преку ова влијание во Србија, Русија се обидува да предизвика дестабилизирачки последици во поширокиот регион, бидејќи колку е понестабилна Европа, толку повеќе одговара на интересите на Русија“, рече Османи.

Таа нагласи дека Косово ќе соработува тесно со своите партнери од Европската Унија и НАТО преку мерки за одвраќање и превенција, со цел да се спречи каква било дестабилизирачка тактика од страна на Русија, имплементирана преку Србија, да вроди со плод.

Навременото и соодветно менување на Изборниот закон ќе придонесе за организирање на подобри избори, смета амбасадорката на Швајцарија во земјава Вероник Хулман, која се надева дека при измените на Изборниот законик ќе бидат земени предвид препораките од Венецијанската комисија и заклучоците од Државниот завод за ревизија.

„Се надеваме дека препораките од Венецијанската комисија и заклучоците од Државниот завод за ревизија ќе бидат земени предвид при измените и дополнувањата на Изборниот законик така што соодветното и навременото менување на Изборниот законик ќе придонесе за организирање на подобри избори. Се надеваме дека тоа ќе се случи навреме“, изјави Хулман која денеска (15 јули) присуствуваше на конференцијата за финансиска отчетност на изборите организирана од Државниот завод за ревизија, Мисијата на ОБСЕ и ИФЕС.

Според Државниот завод за ревизија, остануваат системските слабости во делот на уредувањето на начинот на уплата на донациите каде што е оставена можноста донациите да бидат уплатени кај победникот на изборите, а не кај сите подеднакво.

„Нема поголеми прекршувања во претседателските и парламентарните избори. Клучната констатација на ДЗР е дека 77 проценти од платеното политичко рекламирање за претседателските избори се финансира од Буџетот на државата преку ДИК, додека за парламентарните избори е околу 67 проценти. Остануваат и понатаму состојбите кои треба да се надминат во делот на системските слабости како што е уредувањето на начинот на уплата на донации по објавување на конечните резултати. Нашето законодавство дозволува по објавување на конечните резултати, одредени правни и физички лица да плаќаат донации, а секако кога веќе ќе се знаат резултатите, останува можноста секој кој е заинтересиран, да уплати на победникот, а не на сите подеднакво“, изјави главниот државен ревизор Максим Ацевски.

Видете и ова:

СДСМ и ВМРО-ДПМНЕ најголеми трошаџии за реклами во изборната кампања

Ацевски е задоволен и од отчетноста на политичките партии бидејќи од повеќе од 60 партии, само четири не ги испочитувале законските рокови за поднесување на финансиските извештаи и извештаите за донации.

„Од повеќе од 60 партии, само четири се блокирани за средствата што ги добиваат од буџетот што е огромен успех. Само неколку партии останаа блокирани со одлука на министерот за правда затоа што не ги испочитуваа законските рокови, иако беа навреме известени од страна на ДЗР дека треба да ги почитуваат законските рокови“, рече Ацевски.

Во земјава во октомври треба да се одржат редовни локални избори.

Основниот кривичен суд во Скопје ги прогласи за виновни Љубе Крстевски и Бранко Билбиловски за убиство на кучето Феликс, кое почина на 7 јануари 2025 година од последици на нанесените повреди.

Според обвинителниот акт, на 19 ноември 2024 година, Крстевски, користејќи тврд предмет налик на стап, во повеќе наврати го удрил Феликс во пределот на главата без оправдана причина, нанесувајќи му потрес на мозокот и хематоми. Заедно со Билбиловски, го врзале кучето со жица и го влечеле до контејнер, каде што го фрлиле, верувајќи дека е мртво.

Судот го осуди Крстевски на три месеци затвор, а Билбиловски доби парична казна од сто дневни глоби, со вредност од 10 евра по глоба, во вкупен износ од 1000 евра.

Делото е квалификувано според член 233 став 1 од Кривичниот законик, кој предвидува парична казна или затвор до три години за оној што ќе усмрти животно без причина или ќе го изложи на непотребни маки и болки.

Ова е прва пресуда со затворска казна за овој вид кривично дело.

Изјавите на американскиот претседател Доналд Трамп за Русија се многу сериозни, изјави портпаролот на Кремљ, Дмитриј Песков, додавајќи дека на Русија ѝ треба време да ги анализира пораките од Вашингтон.

„Изјавите на претседателот Трамп се сериозни, некои од нив беа упатени лично до претседателот на Русија. Секако ни треба време да ги анализираме“, рече Песков, пренесен од руските медиуми.

Тој рече дека Москва е подготвена да го продолжи дијалогот со Киев, додавајќи дека Вашингтон го сака истото, а „наводно, и Европа“.

Додаде дека Путин ќе ги коментира зборовите на Трамп доколку смета дека е потребно.

„Да ја почекаме неговата одлука“, рече Песков.

Видете и ова:

Трамп го менува ставот за оружјето за Украина, но не врши целосен притисок врз Путин

Портпаролот на Кремљ, исто така, изјави дека Москва сè уште не добила никакви сигнали во врска со одржувањето на потенцијалната следна рунда преговори со Киев.

„Тешко е да се каже со што е поврзано, но ние сме подготвени да го продолжиме дијалогот“, рече Песков.

Тој оцени дека Киев не ги доживува одлуките донесени во Вашингтон и НАТО како сигнал за мир, туку за продолжување на војната.

Според Трамп, испораката на оружје ќе биде дел од договор што го вклучува НАТО и кој ќе им плати на САД за оружјето што ќе го испратат на Украина.

„Всушност, ќе им испратиме разни парчиња многу софистицирана воена опрема, а тие ќе ни платат 100 проценти за тоа“, им рече Трамп на новинарите.

Американскиот претседател повтори дека е „разочаран“ од рускиот претседател Владимир Путин.

„Путин навистина изненади многу луѓе. Зборува убаво, а потоа бомбардира ноќе“, изјави Трамп.

Трамп, кој постојано го изразуваше своето восхитување кон Путин како лидер и го опиша нивниот однос како „многу добар“, рече дека сметал дека четири пати бил блиску до постигнување договор за завршување на војната, но сите не успеале.

Вкупно 50 и пол години затвор добија шестмина членови на криминалната група Грчец, уапсени во јануари минатата година, од кои четворица за инволвираност во неовластено купување на 15 килограми наркотична дрога-кокаин, нејзино пренесување и пуштање во промет во државава, а двајца за злосторничко здружување со цел вршење на кривично дело двојно убиство од одмазда и по порачка.

Судот ги прогласи Фадил Бајрамовски, Севди Азири, Неџати Исени и Бесим Асани за виновни за кривичното дело „Неовластено производство и пуштање во промет на наркотични дроги, психотропни супстанции и прекурзори“ од чл.215 ст.3 од Кривичен законик.

Бајрамовски, Азири и Исени се осудени на казна затвор пет години, додека Бесим Асани шест години казна затвор.

Останатите двајца Судот ги прогласи за виновни дека сториле кривични дела Злосторничко здружување од чл.394 ст.3 и Убиство од чл.123 ст.2 т.5 од Кривичен законик.

Фати Сулејмановски судот го осуди на казна затвор од една година и шест месеци за делото Злосторничко здружување и 14 години затвор за делото Убиство или на една единствена казна затвор од 14 години и шест месеци.

Шулејб Сулејмановски е осуден на казна затвор од две години за кривичното дело Злосторничко здружување и 14 години за делото Убиство или на една единствена казна затвор од 15 години.

Видете и ова:

Обвинение за петмина во предметот „Грчец“

Групата не дејствувала инцидентно, туку континуирано и тоа најмалку од јуни 2019 до март 2021 година и во истрагата биле опфатени 15 лица, меѓу кои сега дел се починати, а дел се уште се недостапни на органите на прогон.

Судијката Фанка Јанчулова-Михаиловска, при објава на пресудата рече дека околноста за постоењето на криминална група се потврдува преку континуирано повторување и организирање на набавка на наркотична дрога, а друга околност е користење на исто возило при набавка на дрога од Албанија и потоа од Белгија.

Од јуни 2019 до март 2021 година Шеваљ Муареми и други н.н. лица недостапни на органите на прогон формирале и раководеле со група за транспорт и неовластено пуштање во промет на дрога во Македонија. Групата договорила набавка на 14 килограми кокаин од Албанија по цена од 33 илјади евра за килограм и потоа организирала транспорт преку Косово во Македонија.

Судот, при објава на пресудата рече дека убиството е дел од поголем криминален план за убиство на лица кои им пречат и за што е потврда фактот дека жртвата е рационално и свесно одбрана.

Видете и ова:

Крвава војна во скопското подземје

Одбраната реагирала на дел од обезбедените докази преку апликацијата Скај, но Судот, како што објасни, ги прифатил бидејќи биле добиени со меѓународна правна помош од Франција.

Основното јавно обвинителство за гонење на организиран криминал и корупција во јануари 2024 година отвори истрага против 15 лица, а во јули 2024 до Основниот кривичен суд Скопје поднесе Обвинителен акт против пет лица.

За четири лица кои се недостапни на органите на прогонот, обвинителството преку Министерството за правда ги има преземено сите неопходни активности согласно Законот за меѓународна помош во кривична материја. Така, за две лица се доставени документи за екстрадиција до Обединетите Арапски Емирати, за едно лице до Р. Хрватска и за едно лице до шпанските власти.

Постапките за екстрадиција се водат согласно процесните закони на државите во кои се наоѓаат осомничените лица и за нив истражната постапка ќе продолжи по нивното обезбедување, како и за останатите осомничени.

Обезбедување постојана работа и интеграција на семејствата од ранливите групи, особено од ромската заедница, ќе елиминира девијантни појави, како што се случува на крстосниците во градовите каде деца и возрасни се обидуваат да заработат со миење на ветробранските стакла на автомобилите.

Ова во одговор на новинарско прашање го истакна министерот без ресор задолжен за интеграција и имплементација на Стратегијата за инклузија на Ромите 2022–2030, Шабан Салиу.

Преку иницијативи за преквалификација и законски измени, министерот нагласи дека, во координација со Министерството за труд и социјална политика и други надлежни органи, се планира креирање услови за вклучување на родителите на овие деца во нормалните работни процеси.

„Мораме да им обезбедиме на тие лица односно родителите на тие деца постојана работа да не доаѓаат до тие девијантни појави и да не ги пенализираме се додека не им овозможиме можности да се вклучат во интегративните процеси на државата, односно во нормалните работни процеси“, истакна Салиу.

Тој најави дека до Владата ќе поднесат иницијатива, бидејќи, според него, има начин како да се отстрани оваа, како што ја рече, девијантна појава.

Видете и ова:

Салиу: Сегрегација на ромски ученици има и во Кочани и Прилеп

На прес-конференција, министерот Салиу во отчет за сработеното во изминатата година оцени дека се отворени патиштата за директна системска интеграција на Ромите во сите сфери во живеењето.

Најголеми постигнувања, според него, има во интегрирањето во образованието, а се работело и на пристапот до здравствени услуги и конкретни проекти насочени кон обезбедување пристапно и достојно домување.

Салиу соопшти дека во образованието обезбедени се средства за поддршка на ромските образовни политики преку две буџетски програми, а вкупниот буџет наменет за имплементација на мерките од Националниот акциски план за образование изнесува 42.442.000 денари, или 60 проценти од вкупниот буџет наменет за Роми на ниво на државава.

Во делот на здравството, според него, има значајни постигнувања во подобрувањето на пристапот до здравствени услуги за ромската заедница. Во текот на 2024 година, биле ангажирани 19 здравствени медијатори преку договор за дело во различни општини, а годинава биле издвоени 6.000.000 денари за имплементација на таа мерка и ангажирани нови 20.