Вести
Министерот за правда на САД тврди дека немало измама што би го променила изборниот резултат
Американскиот министер за правда Вилјам Бар изјави вечерва дека не констатирал „изборна измама“ доволно голема за да ја поништи победата на Џо Бајден, наспроти тврдењата на американскиот претседател во заминување Доналд Трамп. „Во оваа фаза не видовме измама од обем што може да го промени исходот на изборите“, рече Бар во изјавата за агенцијата АП. Бар рече дека има обвинувања за „систематска измама“; според кои машините биле програмирани да даваат погрешни резултати од изборот. Тој додаде дека неговото и Министерството за национална безбедност ги испитале овие обвинувања и досега не е пронајдено ништо што ги потврдува овие обвинувања.
Трамп: нема да го сменам ставот дека претседателските избори се наместени
Трамп, кој одбива да го признае поразот во неделата ги критикуваше Министерството за правда и федералната полиција дека не му помогнале во борбата за докажување на постоење изборни измами. „Постои растечка тенденција правосудниот систем да се користи како средство за решавање на сите проблеми, а кога луѓето се незадоволни од нешто, чекаат да се појави Министерството за правда“, рече Бар. Министерот за правда, познат по својата лојалност кон Трамп, досега се грижеше да не му противречи на американскиот претседател, потсетува агенцијата Франс прес.
види ги сите денешни вести
Жителите на Ужице протестираат поради приведување на нивни сограѓани
На 8 јули, дел од граѓаните на Ужице се собраа пред зградата на судот во тој град во југозападна Србија, барајќи ослободување на шестемината уапсени на протестот пред два дена.
Локалните медиуми известуваат дека нивното сослушување е во тек .
Некои од нив беа приведени, како што претходно објави Министерството за внатрешни работи (МВР), под сомнение за насилно однесување и напад врз службени лица за време и по обидот на група граѓани во неделата да блокираат регионален пат.
Вечерта на 6 јули, силни полициски сили ги отстранија граѓаните што седеа на главниот пат, по што демонстрантите ја обвинија полицијата за прекумерна сила при пробивање на блокадата, за удирање на некои од насобраните и употреба на бибер спреј.
Министерството за внатрешни работи потоа објави дека околу 350 граѓани го пробиле полицискиот кордон, излегле на националниот пат и го блокирале сообраќајот, дека собраните не одговориле на полициското предупредување и наредба за евакуација и дека полицијата интервенирала подоцна.
Притворот на еден од тројцата демонстранти кои беа уапсени во Чачак под сомнение за напад врз полицајци на протест пред просториите на владејачката Српска напредна партија (СНС) во тој град во југозападна Србија беше продолжен на 30 дена.
Како што објави Бета, неговиот притвор е продолжен поради сомневање дека „ги нападнал полицајците со метален телескоп“, додека двајцата се ослободени.
Поради продолжување на притворот на тој граѓанин, неколку стотици луѓе се собраа и во понеделник вечерта пред зградата на Полициската управа во Чачак, од каде што излегоа на протестна прошетка низ градот.
После тоа, неколку стотици блокираа дел од Ибарската магистрала и го запреа сообраќајот од Чачак кон Ужице.
Министерството за внатрешни работи во вторник објави дека полицијата привела 18 лица на блокади на патиштата во Србија претходната ноќ и го проверила идентитетот на 800 граѓани.
„Во Белград, Ужице и Нови Сад беа регистрирани неколку инциденти, во кои полицијата постапи во согласност со законот“, соопшти МВР.
Блокадите низ цела Србија започнаа на повикот на студентите за граѓанска непослушност на протестот во Белград на 28 јуни, кога тие повторно побараа распишување предвремени избори, за владата да ја отстрани шаторската населба на поддржувачи на владејачката Српска напредна партија што стои меѓу Претседателството и зградите на Народното собрание повеќе од три месеци - поради што нема сообраќај во центарот на главниот град, како и ослободување на притворените студенти.
Демонстрациите и студентските блокади на факултетите во Србија траат веќе осум месеци, со кои се бара одговорност од властите на Српската напредна партија (СНС) за смртта на 16 лица при падот на настрепницата на главната железничка станица во Нови Сад на 1 ноември.
Чаирската романтика растегната меѓу криминал и политика
Откако скопската градоначалничка Данела Арсовска интензивно објавува дивоградби и незаконска легализација во Општина Чаир, се разгоре битката на таа тема меѓу ДУИ и ВЛЕН. Арсовска тврди дека ова е случај само во Чаир, додека градоначалникот Висар Гаину ја обвини дека предизборно одработува за ДУИ.
Според тврдењата на градоначалничката на Скопје, Данела Арсовска има масовно незаконско легализирање на објекти кои се високи згради, елитни станбени комплекси, а не ситни градби и реконструкции во Општина Чаир. Но, тврди и дека тоа е единствена општина во која има толку голем број на фалсификати за легализација на дивоградби.
Во изјава за Радио Слободна Европа, Арсовска вели дека гарантира дека такво нешто нема на друго место, но дека ако има документација и за други општини веднаш би пријавила.
„Еве и во Град Скопје ако сакате да зборуваме политички опортуно би било еве да кажам дека некој градоначалник на ВМРО ДПМНЕ тоа го правел или дека некој градоначалник на СДСМ тоаго правел, ама не го правеле. Не фалсификувале никој документи како што тоа го прави Висар Ганиу и никој не дозволил во 2024-тата година да се градат 12, 13 катници со по 70, 80 стана како што го прави тоа Висар Ганиу. Верувајте кога ви кажувам дека стојам против организирана криминална банда која што беше ДУИ, а сега е ВЛЕН наспроти мене и коишто со секакви закани против мене и против моето семејство се обидуваат да ме натераат да молчам“, вели Арсовска.
Од друга страна градоначалникот на Чаир, Висар Ганиу ја обвини Арсовска дека одработува за ДУИ кои се плашат од пораз на локалните избори.
„Арсовска одработува за ДУИ, таа не комуницира со ниту еден градоначалник освен со градоначалникот на Сарај. Бујар Османи и Блерим Беџети престанете да се криете зад Арсовска. Ова што го правите е паника затоа што знаете дека ќе изгубите на локалните избори во Чаир“, рече Ганиу на 25 мај 2025.
Чаир некогаш и сега
Данела Арсовска дојде на позицијата градоначалник на Град Скопје како независен кандидат поддржан од владејачката ВМРО ДПМНЕ и премиерот Христијан Мицкоски. Но, за кусо време настана кавга меѓу нив, па започнаа меѓусебни обвинувања. Во меѓувреме таа беше обвинета дека коалицира со ДУИ, откако направи повеќе измени на директорски позиции во градските претпријатија.
Најави дека нема да се кандидира на претстојните локални избори, но дека ќе ги открие сите криминали на сегашната владејачка гарнитура предводена од коалицијата на ВМРО ДПМНЕ и ВЛЕН во која се и поранешни функционери од ДУИ.
Еден од нив е и актуелниот вицепремиер Изет Меџити, сега лидер на партијата Демократско движење, кој пак беше градоначалник на Чаир од 2005 до 2017 година. Со него беа поврзани неколку афери кои ги објавуваа медиумите за нелегални градби во општината.
Арсовска тврди дека секојдневно добива закани, дека нема никаква заштита и не се чувствува безбедно. Вели дека таа, семејството и вработените во градот Скопје, ќе бидат безбедни кога Висар Ганиу ќе биде приведен.
Искрена или таргетирана борба со криминал?
Речиси цел мандат Данела Арсовска го помина на критикувана од јавноста откако градот често остануваше и останува без автобуски превоз, а таа се скара и со приватните превозници и со вработените во ЈСП. Во нејзиниот мандат се случи градот да се дави во ѓубре откако службите на Комуналното претпријатие откажаа послушност.
Од друга страна, деновиве започна да објавува и видеа на социјалните мрежи каде е во лов на диви приклучоци на водоводната мрежа. Викендот објави див приклучок во Општина Сарај, додека вчера објави дека секој ден се фаќаат по 30 диви приклучоци од кои си наводнуваат цели ниви, на дивоградби, за полнење базени.
Поради ова таа тврди дека нема доволно вода па деновиве во главниот град или нема притисок во повисоките зони или има рестрикции на вода во дел од населбите. За независниот советник во Град Скопје од Зелен хуман град, Горјан Јовановски битката со секаков криминал треба да се почитува, но дека треба да се даде одговор зошто баш сега се почнува со неа.
„Многу е круцијално да се има континуираност во борбата. Ако се нема континуираност, тогаш не може да се знае дали таа борба е искрена или е таргетирана. Но, доколку тоа е многу фиксирано и стационирано во одреден момент, треба да се објасни зошто “, вели Јовановски.
Сепак според него добро е да се појавуваат овие битки со криминалот, но мора тоа да се случува секоја година, со што ќе се докаже дека е кристално јасна намерата да се извади криминалот од општеството.
Државниот инспекторат во 2024 издал специјално соопштение за Чаир, а денес молчи
Градоначалниците во Општина Чаир не ги исполниле законските надлежности и дозволиле хаотично бесправно градење. Ова е насловот на соопштението издадено од Државниот инспекторат за градежништво и урбанизам во април 2024 година. Според инспекторатот во општината повеќе се граделе дивоградби отколку што се издале легални решенија за градба и тоа за период од 2013 до 2020 година.
„Дозволено е изградба на голем број на згради и деловни објекти со што е причинета штета кон јавниот интерес со неплаќање на комуналии за истите и е дозволено самоволие на поединци да профитираат на грбот нa чесните граѓани со поигрување на законите. Тука не станува збор за минорни прекршувања на Законот за градење, кои и те како треба да се санкционираат, тука станува збор за грубо кршење на сите закони со дозволување на градби на колективни станбени згради без соодветни одобренија и на места каде истите не се предвидени со Детален урбанистички план“, пишува во извештајот на инспекторатот од април 2024 година.
Инспекторатот направил вонреден инспекциски надзор во Чаир бидејќи имало пристигнато 327 претставки од луѓе или фирми, кои пријавуваале дивоградби. Инспекторатот нотирал дека во општината нема Општински градежен инспектор кој би го спровел Законот за градење и би спречил бесправно градење во самата општина.
Исто така според инспекторатот, Општината имала законска можност да склучи меѓуопштински договор со некоја од соседните општини кои имаат Општински градежни инспектори или да овласти некој административец да ја врши дејноста на инспектор, но тоа не го сторила.
„Градоначалниците на Општина Чаир не ги исполниле законските надлежности дадени од Закон за локална самоуправа, со што во територијата на Општина Чаир е дозволено хаотично бесправно градење без истите да се санкционират согласно законските одредби од Закон за градење и Закон за инспекциски надзор а во врска со Кривичниот законик поточно во согласност со чл.244-а од истиот закон“, пишува Инспекторатот
До Инспекторатот пристигнале и кривични пријави за бесправни градби кои се изведени или се изведуваат во Општина Чаир, кои од страна биле доставени до надлежните се вели во соопштението.
РСЕ испрати прашања до инспекторатот и се обиде да контактира и со директорот, но безуспешно па одговори на прашањата не доби.
Обвинителствата отворија предмети за дивоградби и фалсификат во Чаир
Неколку случаи поврзани со дивоградбите во Општина Чаир се отворени во скопското обвинителство и во обвинителството за гонење на организиран криминал и корупција. Од ОЈО Скопје велат дека веднаш по приемот на предметот кој до нив го достави градоначалничката на Град Скопје, Данела Арсовска е извршена проверка и идентификација на конкретните парцели.
„На 5 јуни јавниот обвинител издаде детална наредба до Управата за финансиска полиција, од која побара, согласно нејзините законски овластувања, да ја прибави целокупната документација од општина Чаир за наведените парцели, да се прибави документација поврзана со постапките за легализација на наведените објекти, да се прибави документација од Град Скопје и Агенцијата за катастар за недвижности, да се извршат разговори со конкретно наведени лица, како и да се направат и други проверки и да се обезбедат докази во однос на статусот на градба на наведените локации од 2010 година до денес“, се вели во одговорот од Обвинителството.
Во истото Обвинителство е отворен и предмет по допрен глас откако медиумите објавија за сомнежи за легализирање на дивоградби кои воопшто не биле почнати да се градат во времето на легализација. Таква беше сторијата на 360 Степени, објавена во септември 2023 година кога прикажа повеќе згради кои пред да биде законот за дивоградба воопшто не постоеле, а се легализирани токму по тој закон иако не можеле да бидат опфатени со него. Како доказ за ова беа земени сателитски снимки.
Од Обвинителството велат дека и тие користат вакви снимки во процесите, но дека судот често ги отфрла како доказен материјал.
Инаку, според обвинителството, наредени се проверки и во определени фирми како и во Министерството за транспорт и врски за да се откријат кривичните дела и сторителите. По наредбата се уште се постапува, велат оттаму.
Сиљановска-Давкова ќе го чека новиот закон за Судски Совет, па потоа ќе предложи нов член
Претседателката Гордана Сиљановска-Давкова одговарајќи на новинарски прашања изјави дека се уште не предложила наследник за членот на Судскиот совет Милјазим Мустафа, чиј мандат истекува утре (9 јули), бидејќи како што вели, ја критикувала работата на овој Судски совет и според неа, лошиот закон за Судски совет, во којшто критериумите за избор се несоодветни. Вели дека ќе го почека донесувањето на новиот закон за судски совет во Собранието.
„Не, не го сторив тоа, јас ја критикував работата на овој Судски совет, една од причините за Судскиот совет и за судството, е и лошиот закон за Судски совет, во којшто критериумите за избор се несоодветни, овозможуваа политизација и партизација во Судскиот совет, говорам не само за двајцата членови, кои според Уставот јас ги предлагам, туку и за оние од Собранието, како и оние коишто се избираат од самите судии“, изјави Сиљановска-Давкова.
Потсети дека по Оценската мисија на ЕУ било заклучено дека една од најважните реформи во судството треба да биуде прво разговор со експерти по уставно и казнено право.
„Сугерирано ми е, и мислам дека е тоа во ред, да го почекам донесувањето на законот, министерот тврди дека тоа ќе оди брзо, решенијата од новиот закон се многу построги, попрецизни, појасни... Работата на советот минус еден член, нема да го оневозможи одлучувањето, бидејќи знаете дека одлуките се носат со осум члена од петнаесетте. Кога мерам јас не би сакала во последниот воз или налет по стариот закон каде што не е јасно што е тоа истакнат правник, а да не говорам и за самата постапка, таа не е конкурентна, не е компетитивна, со еден кандидат е, има решенија кои што мислам дека е добро секој нов член на Судскиот совет да ги исполни за да влезе во Судскиот совет“, потенцира Сиљановска-Давкова.
Сепак оцени дека има бројни измени во законот, коишто според неа се квалитетни.
Претседателката информира дека денеска ќе го испрати писмото до претседателот на Собранието, со образложение дека ќе го почека новиот закон.
„Денеска ќе го испратам писмото до претседателот на Собранието, бидејќи Собранието го врши изборот, со причините заради кои мисолам дека кога мерите, е подобро да го почекате донесувањето на новиот закон бидејќи по него сите други ќе се регрутираат, односно избираат, одошто на некој начин да го легитимирате и законот што жестоко сте го критикувале, ама и работата на Судскиот совет која не би сакала уште еднаш да ја оценам“, рече претседателката.
Членот на Судскиот совет, Милјазим Мустафа беше избран во Собранието на 9 јули 2019 та на предлог на поранешниот претседател Стево Пендаровски.
Седум активни пожари, еден локализиран и еден под контрола
Активни се вкупно седум пожари на отворено, еден е локализиран, еден е под контрола, а изгаснати се 23, соопшти Центарот за управување со кризи (ЦУК).
Како што информираат оттаму, активни се пожарите во општина Прилеп – с. Бешиште, општина Македонски Брод – помеѓу с. Црешнево и с. Слатин, општина Чашка – под Солунска глава, меѓу изворите на Бабуна и Бабина дупка, општина Чучер Сандево – помеѓу с. Блаце и с. Чучер Сандево, општина Шуто Оризари – Њу Стар Хотел, општина Дојран – с. Николич и општина Крива Паланка – с. Жидилово.
Локализиран е пожарот во Општина Делчево – градска депонија, а под контрола е пожарот во Општина Македонски Брод – с. Самаково (лесно запалив материјал).
Според ЦУК, изгаснати се пожарите во Сарај – с. Глумово, Петровец – с. Ржаничино, Аеродром – с. Долно Лисиче, Ѓорче Петров 1 – с. Злокоќани, Ѓорче Петров 2 , Чучер Сандево – м.в. Голиево, Центар – ул. Лазар Личеноски, Велес – с. Горно Оризари, Куманово – с. Белаковце, Старо Нагоричане 1 – с. Ругинце , Старо Нагоричане 2 – с. Ругинце , Кратово – с. Железница, Штип – с. Балвани, Долнени – с. Сарандиво, Боговиње – с. Седларце, Брвеница – с. Теново, Желино – с. Чефлик, Врапчиште – с. Неготино, Битола 1 – с. Магленце, Битола 2 – близина на болницата Плодност, Свети Николе – правец Штип – Велес, Прилеп 1 – м.в. Жабино маало и Прилеп 2 – кај фирмата Гаро-Градба.
Надлежните апелираат до граѓаните да не палат оган на отворен простор, особено во периоди на високи температури и зголемен ризик од пожари.
За справување со пожарите во летниот период, Владата овој месец најави вработување на 400 пожарникари. Тоа е предвидено во Оперативниот план за 2025 „Визија за промена“ – соопштија и од владината прес-служба и од владеачката ВМРО-ДПМНЕ.
Заради превенција и подобро справување со шумските пожари, овие 400 лица ќе се вработат во општините каде што има најмногу потреба за нив, додадоа од партијата.
Европратениците ќе дебатираат за Предлог-извештајот на Вајц за земјава
Европратениците денеска (8 јули) ќе дебатираат за Предлог-извештајот на австрискиот европратеник Томас Вајц по извештаите на Европската комисија за земјава за 2023 и 2024 година.
„Европскиот парламент ја повторува својата целосна поддршка на континуираната и доследна посветеност на Северна Македонија за приклучување кон ЕУ и на потребните трансформативни промени што се потребни за исполнување на критериумите за пристапување, ја пофалува посветеноста на земјата на европската интеграција и ги охрабрува континуираните напори за унапредување на реформите усогласени со ЕУ и покрај предизвиците и неуспесите што го тестираа трпението и довербата на македонското општество“, се наведува во Предлог-извештајот на Вајц.
Во документот се посочува дека земјава има статус на кандидат за членство ЕУ од 2005 година, дека успешно го заврши скрининг процесот во декември 2023 година и дека аспирациите на граѓаните за приклучување кон Унијата доведоа до напредок во однос на демократијата и социо-економските реформи, но сепак процесот на пристапување и натаму за жал се соочува со одложувања од различни причини.
Исто така се наведува дека согласно своите обврски од заклучоците на Советот од јули 2022 година, земјава „треба да ги спроведе уставните измени за да може веднаш да заврши почетната фаза на пристапните преговори“, како и дека македонските власти „предложиле решенија за уставни промени кои не ги исполнуваат условите од заклучоците на Советот од јули 2022 година“.
Во точката К од документот се посочува дека Советот „не го исклучи недвосмислено поставувањето на понатамошни нови услови за започнување на пристапните преговори“, па во членот 3 европратениците го повикуваат Европскиот совет „јавно и недвосмислено да сигнализира дека Советот има намера брзо и безусловно да донесе позитивна одлука за преминување во следната фаза од преговорите за пристапување со Северна Македонија откако ќе бидат исполнети условите од неговите заклучоци од 18 јули 2022 година, целосно почитувајќи го македонскиот јазик и идентитет...“.
На овој член 3 е поднесен заеднички амандман предложен од европратениците Анджеј Халицки во име на Европската народна партија (ЕПП), Кетлин Ван Бремпт во име на Прогресивната алијанса на социјалистите и демократиите (СД) и Дан Барна во име на либералната група „Да ја обновиме Европа“ (РЕ), со кој се предлага бришење на делот од текстот: „целосно почитувајќи го македонскиот јазик и идентитет...“.
Во точката Л од предлог извештајот се потсетува дека „ЕУ постојано го покажува своето признавање на македонскиот јазик и идентитет“, но со заеднички амандман предложен од Халицки, Ван Бремпт и Барна во име на нивните групи се предлага целосно бришење на оваа точка.
За разлика од нив, Вајц предлага останување на точката Л и додавање на нова точка Л-а која би гласела: „со оглед на тоа што прашањата за јазикот, идентитетот и културата се по природа чувствителни, особено во контексти што вклучуваат сложени историски наративи и нови независни држави“.
„(ЕП) ја поздравува посветеноста на македонскиот народ на интеграцијата во ЕУ и поддршката што тој ја покажува на овој проект две децении од почетокот на процесот; ја повикува Комисијата да направи се што е можно за да им помогне на властите на Северна Македонија да ги остварат потребните чекори пред да влезат во следната фаза на преговорите, како и понатаму во процесот на преговори, за да помогне во исполнувањето на очекувањата на граѓаните и земјата и да ги почувствуваат сите мерки од постепена интеграција во структурите на ЕУ, со што ќе се зголеми довербата во ЕУ и нејзините демократски вредности“, се наведува во Извештајот.
Во документот исто така се нотираат средствата што ги добива земјата од одделни членки на ЕУ и добрата соработка со нив, но сепак се „предупредува на зајакнување на сојузите со нелибералните режими“.
На Предлог-извештајот се поднесени вкупно 28 амандмани, меѓу кои покрај веќе споменатите, се и тие на бугарскиот европратеник Ивајло Валчев од редовите на групата Европски конзервативци и реформисти (ЕЦР), кој предлага три амандмани со кои се предвидува вметнување на зборот „современ“ пред „македонски јазик и идентитет“ во точката Л и членовите 3 и 7. Покрај ова, Валчев има поднесено и амандмани за вметнување на протоколите од Договорот за добрососедство во извештајот, за „изнаоѓање заедничка наратив за заедничката историја“ и за „заштита на припадниците на бугарското малцинство во земја.
Грчки европратеници, пак, бараат вметнување на содржини за почитување на „суверенитетот, уставниот идентитет и културното наследство на постојните земји членки“ на ЕУ, запирање на „говорот на омраза кон земјите членки кои се нејзини соседи, особено Грција и Бугарија“ и осуда на „службената злоупотреба на името „Македонија“ од страна на владини претставници“ на земјава, потоа замена на „македонска“ или „македонски“ со „на Северна Македонија“ и „национално наследство“ со „државно наследство“, како и покрај Коридорот 8, наведување и на Коридорот 10 во делот за транспортната поврзаност.
Инаку, Предлог-извештајот е пропратен и со „Објаснувачка изјава“ на Вајц, кој е известувач на ЕП за земјава, во која се наведува дека со документот имам за цел да обезбеди избалансирана проценка на сложениот политички контекст во земјава, истовремено повикувајќи ги политичките засегнати страни во државата да ги унапредат реформите и да ги почитуваат минатите договори, а институциите на ЕУ и земјите членки да спречат идни билатерални блокади и на земјата да и ги обезбедат потребните гаранции и соодветната поддршка.
Гласањето по Предлог-резолуцијата на Вајц е предвидено за утрешното продолжение на овонеделната сесија на Европарламентот во Стразбур.
Трамп го пролонгира рокот за стапување во сила на царините до 1 август
Претседателот на САД, Доналд Трамп синоќа (7 јули) потпиша извршна наредба со која се пролонгира стапувањето во сила на така наречените реципрочни американските царини до 1 август.
Новите стапки се пониски од одложените реципрочни царини што Трамп ги објави на почетокот на април - 37 проценти за Србија и 35 проценти за Босна и Херцеговина. Набрзо ги одложи тие царински давачки за 90 дена.
Трамп ги објави новите царини во писма до лидерите на земјите, во случајот со Србија до претседателот Александар Вучиќ, а во случајот со БиХ до актуелната претседателка на претседателството на БиХ, Жељка Цвијановиќ.
Овие писма се исти, освен што се разликуваат во царинската стапка што ја воведуваат поединечните земји.
Трамп го започнува писмото со наведување дека е „почестен“ што испраќа писмо кое ја покажува силата и посветеноста на трговските односи меѓу САД и дадената земја и „фактот дека САД се согласиле да продолжат да работат“ со таа земја, и покрај, како што наведува, „значајниот трговски дефицит“ на САД со таа земја.
Тој понатаму го повикува лидерот на земјата да учествува во „извонредната американска економија, пазарот што е убедливо број еден во светот“.
Трамп додава дека неговата администрација заклучила дека САД мора „да ги прекинат долгорочните и многу постојани трговски дефицити предизвикани од нецарински, политички и трговски бариери“ што ги имаат тие земји, како што се во случајот, БиХ и Србија.
Американскиот претседател вели дека наведената царинска стапка - 30 проценти за БиХ и 35 проценти за Србија - е далеку помала од она што е потребно за елиминирање на нееднаквоста и трговскиот дефицит.
Тој истакнува дека нема да има царина ако одредена земја или компании од неа одлучат да произведуваат во САД.
Трамп, исто така, се закани дека ќе ги зголеми царините доколку земјите одлучат да возвратат со воведување дополнителни царини на американскиот увоз.
„Ако од која било причина одлучите да ги зголемите вашите царини, тогаш без оглед на бројот што ќе одлучите да го зголемите, тој ќе биде додаден на 35-те проценти што ги наплаќаме“, рече Трамп во писмо до Вучиќ.
Во понеделник, Трамп објави нови царински стапки за голем број земји на неговата мрежа „ Truth Social“.
Тој најави царини од 25 проценти за Јапонија, Јужна Кореја, Малезија и Казахстан, 30 проценти за Јужна Африка, 32 проценти за Индонезија, 35 проценти за Бангладеш, 36 проценти за Камбоџа и Тајланд и 40 проценти за Лаос и Мјанмар.
Трамп вели дека САД ќе продолжат да испорачуваат оружје за Украина
Американскиот претседател Доналд Трамп на 7 јули изјави дека Соединетите Држави ќе испратат повеќе оружје во Украина за да ѝ помогнат на земјата разурната од војна да се одбрани од руските напади.
„Ќе испратиме уште оружје. Мораме. Тие мора да бидат способни да се одбранат. Сега се погодени многу силно“, им рече Трамп на новинарите во Белата куќа.
САД ќе испратат првенствено одбранбено оружје, додаде тој, зборувајќи на почетокот на вечерата со израелскиот премиер Бенјамин Нетанјаху.
Коментарите изгледаат како пресврт на најавата на Пентагон минатата недела дека ќе се воздржи од испорака на некои ракети за воздушна одбрана, прецизно водена артилерија и друго оружје поради загриженоста дека американските залихи се намалиле премногу.
Украина бара од Вашингтон да ѝ продаде повеќе ракети и системи „Патриот“ што ги смета за клучни за одбрана на своите градови од она што стана речиси редовни ноќни руски воздушни напади, додека војската на Москва се обидува да ја совлада воздушната одбрана на Украина.
Украинскиот претседател Володимир Зеленски повторно се осврна на потребата од повеќе единици за воздушна одбрана „Патриот“ во своето вечерно видео обраќање на 7 јули.
„Работиме, особено, со американската страна на релевантните одлуки во врска со системите „Патриот“ и ракетите за нив“, рече тој.
По повикот со Трамп на 4 јули, Зеленски рече дека се согласил да работи на зголемување на способноста на Киев да „го брани небото“ додека руските напади ескалираа. Тој рече дека разговарал со Трамп за заедничко производство на одбрана, набавки и инвестиции.
Трамп рече дека на Украина ќе ѝ бидат потребни ракети „Патриот“ за да се одбрани, но во изјавата од 7 јули, не ги спомена конкретно.
Трамп рече дека е решен да го прекине конфликтот и повторно ја изрази растечката фрустрација од рускиот претседател Владимир Путин.
„Воопшто не сум задоволен од претседателот Путин“, рече Трамп.
Тој се закани дека ќе воведе нови санкции против руската нафтена индустрија за да се обиде да го поттикне Путин на мировни преговори, но досега се воздржа.
Сепак, сенаторот Линдзи Греам (републиканец од Јужна Каролина) минатата недела изјави дека Трамп му дал зелено светло да го протурка законот со кој се бара висока царина за стоки увезени од земји како Кина и Индија кои продолжуваат да купуваат руска нафта.
Зеленски на 7 јули објави планови за проширување на производството на беспилотни летала со сојузниците за повоениот период.
„Работиме со партнерите за да обезбедиме дека производството во нивните земји работи со полн капацитет - и за нашата заедничка одбрана денес и за арсеналите на партнерите по војната“, рече Зеленски во своето вечерно видео.
Киев соработува со сите лидери и земји кои можат да помогнат преку инвестиции, компоненти или производство, вели Зеленски.
„Чекор по чекор, го затвораме финансискиот јаз за производство на беспилотни летала и беспилотни летала-пресретнувачи и ги пополнуваме украинските производствени линии со специфични нарачки“, информираше украинскиот претседател.
Украина се брани од целосна руска инвазија што започна во февруари 2022 година. Руските напади врз Украина што траеја до раните часови на 7 јули убија најмалку 11 цивили, а повредија повеќе од 80 други, вклучувајќи седум деца, соопштија официјални лица.
Поранешниот руски министер за транспорт пронајден мртов неколку часа по неговoто сменување
Поранешниот руски министер за транспорт Роман Старовојт беше пронајден мртов во својот автомобил со прострелна рана, потврдија истражителите само неколку часа откако претседателот Владимир Путин ненадејно го замени среде бранот украински напади со беспилотни летала што го нарушија воздушниот сообраќај и открија ранливости длабоко на руска територија.
Портпаролката на Рускиот истражен комитет, Светлана Петренко, изјави во понеделник дека телото на Старовојт е пронајдено во неговото лично возило во Одинцовскиот округ во Московскиот регион.
„Околностите за смртта на Роман Старовојт се утврдуваат. Примарната теорија е самоубиство“, рече Петренко.
Претходно изтурината, Путин го разреши Старовојт без објаснување по помалку од една година на местото министер за транспорт.
Во брзата реконструкција на владата по разрешувањето на Старовојт, Путин го назначи Андреј Никитин, заменик-министер за транспорт и поранешен гувернер на Новгородската област, за вршител на должноста министер.
Иако руските власти не го поврзаа разрешувањето на Старовојт со кризата во воздушниот сообраќај, некои аналитичари забележуваат дека времето покренува прашања за веројатно барање жртвено јагне во услови на интензивирање на воените и логистичките предизвици.
Локалните медиуми имаа спротивставени извештаи за времето на смртта на Старовојт, како и за тоа каде се пронајдени телото и пиштолот.
Рускиот истражен комитет, кој истражува сериозни кривични дела, објави дека започнал истрага што „ги утврдува околностите на смртта на Роман Старовојт“.
Руското Министерство за транспорт во неделата соопшти дека околу 400 летови биле откажани низ целата земја до раните вечерни часови.
Конституирањето на Собранието на Косово повторно пропадна: Дали мандатите на пратениците се во опасност?
Денеска (7 јули) по 43-ти пат избраните претставници не успеаја да го конституираат Собранието на Косово.
Како и претходно, опозициските партии - вклучувајќи ја Демократската партија на Косово (ПДК), Демократскиот сојуз на Косово (ЛДК), Алијансата за иднината на Косово (ААК), Нисма и Српска листа - одбија да номинираат членови за комисијата што ќе организира тајно гласање за претседател на Собранието, сметајќи го овој процес за неконзистентен со Уставот.
На отворено гласање, тие постојано го отфрлаа назначувањето на Албулена Хаџиу од Движењето Самоопределување на оваа позиција.
Самоопределување, кое освои мнозинство гласови на парламентарните избори во февруари, инсистира дека тајното гласање е легитимно и повикува на тоа да продолжи.
На денешната седница, која траеше само неколку минути, пратениците од ПДК, ЛДК и ААК излегоа на говорницата за да го повикаат Самоопределување да го прекине она што го нарекоа „политички циркус“ - што го натера претседателот на седницата, Авни Дехари, да побара нивниот говор да биде прекинат.
Слично сценарио се случи и на претпоследната седница на 5 јули, но таа се одржа по неколку часа доцнење, поради, како што беше јавено, закана за бомба во Собранието, која се покажа како лажна.
На 26 јуни, Уставниот суд на Косово побара од пратениците да го конституираат Собранието во рок од 30 дена, но не објасни што би можело да се случи во случај на непочитување на оваа одлука.
Политичките партии продолжуваат да ја толкуваат оваа одлука на различни начини.
Минатата недела, претседателката на Косово, Вјоса Османи, ги покани претставниците на политичките партии на состанок за да разговараат за опциите за излез од кризата.
Таа ја спомена и можноста за обраќање до Уставниот суд за дополнителни појаснувања.
Филков по една година на функцијата: Остануваме посветени на реформите и владеење на правото
Во изминатите 12 месеци од Министерстото за правда до Владата биле доставени 22 системски закони, од кои 13 директно предвидени со Реформската агенда. Законите, како што истакна денеска (7 јули) министерот за правда Игор Филков, го засегаат правосудниот систем – изборот, оценувањето, платите, статусот и одговорноста на судиите и обвинителите, како и институционалните капацитети на Советите, вештачењето и службите во правосудството.
„Градиме институции што работат за граѓаните, а не за привилегираните. И ова е само почеток“, порача Филков на денешната прес-конференција по повод една година на функцијата.
Тој истакна дека по осум години во функција е ставена Комората на вештаци, дека се издаваат лиценци и дека е воспоставена нова програма за полагање на испит. Додаде дека била поништена одлука на претходната влада со која нотарската тарифа беше десеткратно зголемена.
„Во функција го ставивме системот за надомест за жртви на кривични дела со насилство согласно законот. Ја отворивме канцеларијата на комисијата која што непречено работи. Со ова воспоставивме основа за практична примена на општестевната солидарност, заштита на човековите права и борба против секундарната виктимизација“, истакна Филков.
Се пофали и со електронските алки за надзор на лица во куќен притвор и куќен затвор, кој како што потсети, биле ставени во функција по десет години.
Од осумте закони во Реформската агенда со рок до јуни 2025, седум се веќе испратени во владина процедура, од кои го истакна Законот за Судски совет, за кој нагласи дека „не се работи за декларативен пристап, туку за суштинска промена насочена кон градење транспарентен, отчетен и професионален Судски совет“.
„Министерството за правда изработи целосно нов Закон за Судски совет кој веќе е во владина процедура. Законот беше изготвен преку инклуизивен и траснпарентен процес, преку јавни дебати, експертски консултации и активно вклучување на сите релевантни чинители. Посебна потврда за ова е и позитивното мислење добиено од Венецијанската комисија„, изјави Филков, апелирајќи до пратениците на Собранието за препознавање на итноста и важноста од носењето на овој закон.
Во процедура се и законите за плати на судии, за плати на јавните обвинители и за плати на членовите на Судскиот совет и за плати на членовите на Советот на јавни обинители.
До Владата, посочи Филков, се испратени уште два многу важни закони кои не се дел од реформската агнеда, а тоа се Законот за спречување на судир на интереси и Закон за заштитено пријавување и заштита на укажувачи.
Во подготовка се уште десет закони, меѓу кои Кривичен законик, Закон за кривична постапка, Закон за судови, Закон за пробација, Закон за конфискација на имот во граѓанска постапка, Закон за помилување, Законт за здруженија и фондации, како и Закон за процена и Закон за судски буџет.
Филков, исто така, нагласи дека е формиран и нов Совет за координирање на информатичко комуникациската техенологија во правосудството, кој работи на дигитализација на целокупниот систем и негово меѓусебно поврзување.
Мултимедија
Најпосетени
Што треба да знаете