Вести
„Зелен хуман град“ обвинува за неправилности и најавува приговори и кривични пријави
Кандидатката за градоначалник на Град Скопје од „Зелен хуман град“ Ана Петровска вечерва оцени дека денешните избори поминале со бројни нерегуларности и импровизации при толкувањето на Изборниот законик.
Според „Зелен хуман град“, имало случаи на семејно гласање, гласање со придружба и помош при гласање од член на избирачки одбор, а на избирачкото место 2 722, член на избирачкиот одбор по грешка дал две исти ливчиња за градоначалник на Град Скопје, при што гласачот гласал.
На избирачко место во Карпош не му било дозволено на овластениот претставник на „Зелен хуман град“ да присуствува на избирачкото место, по што биле принудени да достават нов документ за негово присуство, а подоцна истиот претставник пријавил дека при броењето на гласовите не им било дозволено на овластените претставници да имаат увид во гласачките ливчиња.
На друго избирачко место неколкупати имало прекин на гласањето поради проблем со апаратите за отпечаток на прст.
„На сите изборни места, нашите овластени претставници констатираа дека околу 50 проценти од апаратите не функционираа при што луѓето биле принудени да ги користат останатите опции. Некои од овие опции одземаа и до 10-минути по гласач, што значеше дека луѓето беа принудувани да си заминат поради предолго чекање“, истакна Драгана Велковска од „Зелен хуман град“.
Од таму најавуваат дека ќе поднесат приговори за сите забележани неправилности, а онаму каде што имаат докази, ќе поднесат и кривични пријави за злоупотреба на службената должност.
„Зелен хуман град“ очекува да освои советници во Град Скопје, но сепак, како што велат, ќе ги причекаат резултатите од гласањето.
„Премногу е рано за да можеме да кажеме какви било информации. Од она што пристигнува до нас од нашите набљудувачи имаме убава застапеност во смисла на процентност на освоени гласови што ќе значи голем број на советници во Град Скопје, но, да почекаме до официјалните резултати“, истакна Петровска.
види ги сите денешни вести
Струшкиот градоначалник Мерко доби ослободителна пресуда за набавката на службениот автомобил
Градоначалникот на Струга, Рамиз Мерко, доби ослободителна пресуда во предметот што се водеше против него за наводна злоупотреба на службената положба при набавката на службен автомобил „ауди“ во вредност од 67 000 евра. Според обвинителниот акт, тој го набавил автомобилот во услови кога општината се наоѓала во долгови и со блокирана сметка, а обврските и се сервисирале преку релоцирање средства од централниот буџет на државата.
Основниот кривичен суд во Скопје денеска (9 јуни) оцени дека нема доволно докази за да се утврди дека Мерко сторил кривично дело.
Судот утврди дека постапката за јавна набавка била спроведена без прекршување на законските процедури, а не постојат докази дека Мерко делувал со намера за лична или за политичка корист.
Адвокатот на Мерко, Игор Петковски, изјави дека пресудата потврдува оти целата набавка била спроведена транспарентно и во рамки на законот. Тој додаде дека вкупната вредност на службените возила изнесувала 114 000 евра, што исто така била предмет на интерес во јавноста.
Македонскиот суд донесе одлука дека во овој конкретен случај на јавна набавка нема основ за кривична одговорност, со што градоначалникот на Струга беше ослободен од сите обвинувања.
Струшкиот градоначалник Рамиз Мерко од политичката партија ДУИ на 9 јуни 2023 година се најде на „црната листа“ на САД поради корупција и мешање во судски процеси.
Според соопштението од Стејт Департментот тој присвојувал државни средства, се мешал во судските и другите јавни процеси, нанесувајќи ѝ штета на вербата на јавноста во демократските институции.
Мерко е обвинет и за незаконски поставување на директори на училишта и други институции. Тој е исто така обвинет дека како градоначалник на општина Струга, во март лани, поставил спомен обележје – плоча на влезот на општинската зграда, со кое поттикнал етничка омраза и раздор меѓу жителите на Струга, со што сторил кривично дело предвидено во член 27 од Законот за меморијални споменици и спомен-обележја.
Уапсен е струмичкиот бизнисмен Крмзов
Уапсен е струмичкиот бизнисмен Ристо Крмзов, за кого беше отворена истрага за злоупотреби што се проценуваат на околу 15 милиони евра.
Како што информира Министерството за внатрешни работи (МВР), апсењето е извршено по насоки на јавен обвинител од Основното јавно обвинителство за гонење организиран криминал и корупција (ОЈО ГОКК).
„Од страна на полициски службеници, по насоки на јавен обвинител од ОЈО ГОКК, лицето Р.К. е лишено од слобода“, се вели во соопштението од МВР.
Истрагата за случајот познат како „Крмзов“ е при крај, беше потврдено на брифинг со премиерот Христијан Мицкоски, во ноември минатата година кога и беше посочено дека наскоро ќе бидат објавени информации за злоупотреба на милионски суми поврзани со поврат на ДДВ на компании.
Во септември беше спроведена акција за даночно затајување во фирми во Струмица, Скопје и Гостивар. Тогаш беа приведени четири лица, а државниот јавен обвинител информираше дека е оформен предмет за даночна измама и за перење пари и дека се сослушани три лица, а за едно се предложени мерки за претпазливост.
За Крмзов и неговите бизниси, Обвинителството отвори предмет откако претходно беа направени претреси на неколку локации низ државата поради основи на сомневања за даночно затајување, даночна измама и перење пари. Потоа, судија на претходна постапка донесе одлука за одземање на патната исправа на бизнисменот Крмзов, додека другите три приведени лица беа пуштени на слобода без мерки за обезбедување.
Истрагата, според објавите во медиумите, се шири на повеќе струмички компании, кои биле дел од шемата на Крмзов, кој важи за близок до семејството на поранешниот премиер Зоран Заев и дека при претресите се пронајдени дијаманти и поголеми суми пари во кеш.
Државниот јавен обвинител Љупчо Коцевски во интервју за „360 степени“ на 13 јануари годинава, зборувајќи за предметот поврзан со струмичкиот бизнисмен Ристо Крмзов, рече дека по првпат во предистрага Обвинителството побарало одземање пасош.
Уапсен е лидерот на главната опозициска партија во Република Српска
Уапсен е Милан Миличевиќ, претседателот на Српската демократска партија (СДС), потврдуваат од најголемата опозициска партија во Република Српска.
Министерството за внатрешни работи на овој ентитет соопшти дека Управата на криминалистичката полиција спроведува оперативна акција со кодно име „Блок“, во рамките на која се уапсени лица од Теслиќ, иницијали М.М., М.Д. и М.Ј.
„Поради постоење на основи на сомнение дека тие сториле кривични дела на влијание и примање мито“, соопшти Министерството за внатрешни работи на РС на 9 јуни.
Акцијата се спроведува под надзор на Специјалното одделение за сузбивање на корупција, организиран и сериозен економски криминал на Републичкото јавно обвинителство, а по наредба на Специјалното одделение за сузбивање на корупција, организиран и сериозен економски криминал на Окружниот суд во Бања Лука.
Во текот на истрагата, во изминатите шест месеци, конфискувани се околу 45 000 евра, кои потекнуваат од коруптивните дејствија на споменатите лица, а парите биле депонирани во судски депозит, наведуваат од Министерството за внатрешни работи.
Во тек се претреси на локациите што ги користеле осомничените, а се бараат уште околу 125 000 евра што потекнуваат од коруптивни дејствија, а врз основа на кои, преку злоупотреба на влијание, нелегално било сменето парламентарното мнозинство во Општинското собрание Теслиќ.
Управата за криминалистичка полиција до Републичкото јавно обвинителство го достави Извештајот за сторените кривични дела против трите приведени лица.
По завршувањето на кривичната истрага, тие ќе бидат предадени на обвинителството, соопшти Министерството за внатрешни работи на Република Српска.
Русија истрела рекордни 479 дронови кон Украина
Русија лансираше 479 дронови во Украина во најголемото ноќно бомбардирање со дронови од почетокот на инвазијата во февруари 2022 година, соопштија украинските воздухопловни сили во понеделник (9 јуни).
Покрај беспилотните летала, 20 ракети од различни видови биле испукани кон различни делови од Украина, според воздухопловните сили, кои наведоа дека баражот бил насочен главно кон централните и западните области на Украина, објави АП.
Градоначалникот на западниот град Ривне, Олександр Третјак, го нарече ова „најголемиот напад“ врз регионот од почетокот на војната.
Украинската воздушна одбрана уништи 277 дронови и 19 ракети во лет, според соопштението на украинските воздухопловни сили, во кое се тврди дека само десет дронови или ракети ја погодиле целта.
АП не можеше независно да го потврди оваа тврдење.
Руските воздушни напади обично започнуваат доцна навечер и завршуваат наутро, бидејќи дроновите потешко се забележуваат во темница.
Русија немилосрдно напаѓаше цивилни области во Украина со беспилотни летала „Шахед“ во текот на повеќе од три години војна.
Според Обединетите Нации, во нападите загинале повеќе од 12000 украински цивили.
Русија тврди дека гаѓа само воени цели.
Русија ги засили нападите низ Украина во последните недели, што според Киев покажува дека Москва нема намера да ја запре својата тригодишна инвазија и не е сериозна во врска со мировните преговори.
Во истрагата за трагедијата во Кочани, осомничен и газдата на фирмата за обезбедување
Со истражната постапка за пожарот во кочанската дискотека “Пулс” е опфатено уште едно лице за кое е поведена истрага за - Тешки дела против општата сигурност од член 292 во врска со член 288 од Кривичниот законик.
„Во текот на досегашната постапка се обезбедија докази согласно кои за сега осомничениот се утврди дека е одговорно лице – реален сопственик на осомниченото правно лице – агенција за обезбедување на имот и лица од Скопје.
Согласно доказите, тој раководел со деловниот потфат и целокупното работење на агенцијата, заедно со претходно осомничениот управител и со овластеното лице на подружницата во Кочани.
„Тие без да имаат склучено договор со корисникот на услугата Кабаре ПУЛС Кочани, во текот на 2025 година вршеле обезбедување на имот и лица за клубот. Новиот осомничен во континуитет активно раководел со планот и начинот за давање на услугата обезбедување преку правното лице. Заедно со осомничените кои биле ангажирани како обезбедување, спротивно на повеќе членови од Законот за приватно обезбедување, без каква било претходна безбедносна проценка и план за обезбедување, како и без проверка на условите за противпожарна заштита и опасност од пожари, без да извршат проверка по однос на сигурносните услови во кабарето од аспект на имот и лица, особено по опасност и можност за евакуација, во текот на вечерта кога настанал пожарот не контролирале и овозможиле влез на деца во објектот, не воделе грижа за преполнетоста на капацитетот за посетители во објектот, не спречиле внес и користење на експлозивни материи – пиротехнички средства од членовите на музичката група, со кои бил предизвикан пожарот, поради што настапила смрт кај 62 лица, со тешки телесни повреди се здобиле 157 лица, а со телесни повреди се здобиле 54 лица“, велат од Обвинителството.
Врз основа на судска наредба вчера (8 јуни) бил извршен претрес на две локации во Скопје и во Пробиштип, како и во автомобилот на осомничениот, при што била одземена обемна документација поврзана со правното лице и електронски уреди.
Лицето е лишено од слобода и со оглед на сите околности и законски основи, јавниот обвинител денеска до судијата на претходна постапка од Основниот кривичен суд Кочани ќе достави предлог за определување мерка притвор.
Пожарот во Кочани избувна ноќта на 15 наспроти 16 март при што загинаа 62 млади луѓе, а речиси 200 беа повредени. Дел од повредените сѐ уште се на лекување во странство.
Со последното проширување истрагата опфаќа 70 осомничени.
Шест ранети во пукотница во Подгорица, осомничениот е уапсен
Дваесет и тригодишен млад човек ранил шест лица, од кои петмина полесно, а едно потешко, околу полноќ, во кафуле во центарот на Подгорица, соопшти полицијата.
Младиот човек бил уапсен.
Синоќа, околу дваесет минути по полноќ, дежурната служба на Одделот за безбедност на Подгорица добила пријава дека е употребено огнено оружје во градината на ресторанот „Зошто“ во центарот на градот, соопшти Полициската управа.
„Во таа прилика, шест лица се здобија со повреди, од кои пет беа полесни во долните екстремитети, додека едно лице доби прострелна рана во пределот на грбот и не е во животна опасност“, рсоопшти полицијата.
На повредените веднаш им е укажана медицинска помош во Клиничкиот центар на Црна Гора.
Полицијата го идентификуваше Михаил Лакушиќ од Подгорица како осомничен, кој избегал по пукањето.
Откако завршил увидот на местото на настанот, поставени биле блокади, земени изјави од десетици граѓани и видео снимки од неколку објекти, а полицијата го уапсила осомничениот.
„За краток временски период, осомничениот Л.М. беше пронајден и уапсен на улицата Фрушкогорска во населбата Мало Брдо“, информираше полицијата.
Оваа населба се наоѓа на неколку километри од кафулето на улица „Његошева“ каде што се случило пукањето.
Полицијата се сомнева дека на настанот му претходела кавга.
Вишото државно обвинителство во Подгорица е информирано за инцидентот, чиј обвинител спроведе истрага со полицијата. Лакушиќ треба да биде однесен во обвинителството во законскиот рок.
Колумбиски претседателски кандидат застрелан на предизборен митинг
Конзервативниот сенатор Мигел Урибе, кандидат за претседател на Колумбија на изборите следната година, беше ранет во Богота за време на предизборен митинг.
Видео објавено на социјалните мрежи покажува истрели додека 39-годишниот политичар држи говор на предизборен митинг западно од колумбиската престолнина, објави АФП.
Градоначалникот на Богота, Карлос Галан, изјави дека Урибе е во болница и дека „напаѓачот е уапсен“.
Осомничениот напаѓач е малолетник кој отворил оган околу 17:30 часот по локално време.
Урибе бил застрелан двапати во главата и еднаш во коленото, потврдија лекарите.
Тој успешно беше опериран по приемот во болница во критична состојба – соопшти градоначалникот на главниот град, Карлос Фернандо Галан.
– Мигел Урибе ја помина првата хируршка интервенција успешно – изјави Галан, додавајќи дека 39-годишниот сенатор од Партијата на демократскиот центар влегува во „критичните часови“ на закрепнување, кои ќе бидат клучни за неговиот живот.
Уште две лица се повредени во инцидентот.
Трамп ја испрати националната гарда во Лос Анџелес за смирување на немирите
Американскиот претседател Доналд Трамп нареди 2.000 припадници на Националната гарда на САД да бидат распореди во Лос Анџелес и Калифорнија во саботата, пренесоа светските агенции.
Ова следува по два последователни дена судири меѓу демонстрантите и имиграциските власти, додека луѓето протестираа против кампањата на администрацијата на Трамп за масовни апсења на нелегални имигранти.
За време на протестите, агентите на Службата за имиграција и царина (ICE) притворија десетици имигранти за кои се сомневаше дека се нелегално во САД, што предизвика насилни немири. Демонстрантите фрлаа камења кон полицијата, која возврати со солзавец, бибер спреј и шок бомби.
Во саботата, претседателот Доналд Трамп потпиша меморандум со кој се овозможува распоредување на 2.000 припадници на Националната гарда во Лос Анџелес. Националната гарда на САД е воена структура што може да биде активирана и на ниво на поединечни држави и на федерално ниво, под одредени услови.
Администрацијата на Трамп изјави дека ова е неопходно бидејќи, според нив, „неодговорните демократски лидери во Калифорнија целосно се откажаа од својата одговорност да ги заштитат своите граѓани“.
Но, гувернерот на Калифорнија, Гевин Њусом, ја нарече одлуката за распоредување на Гарда „намерна провокација“ и предупреди дека тоа само ќе ги влоши тензиите.
„Ова е погрешна иницијатива што ќе го поткопа јавното доверба,“ рече Њусом. Градоначалничката Карен Бас исто така се изјасни против постапките на властите.
Американскиот министер за одбрана Пит Хегсет предупреди дека Пентагон е подготвен да мобилизира активни војници „доколку насилството продолжи“ во Лос Анџелес, пишува Ројтерс.
Тој рече дека маринците во блискиот камп Пендлтон се „во состојба на висока готовност“.
Во саботата, федералните безбедносни агенти се судрија со демонстрантите во областа Парамаунт во југоисточен Лос Анџелес, каде што некои демонстранти мавтаа со мексикански знамиња.
Втор протест во центарот на Лос Анџелес привлече околу 60 луѓе во саботата навечер, извикувајќи слогани како „ICE надвор од ЛА!“
Трамп потпиша претседателски меморандум за испраќање војници на Националната гарда за „да се справат со анархијата на која ѝ е дозволено да тлее“, се вели во соопштението на Белата куќа, пренесува Ројтерс.
Борбата против нелегалната имиграција беше едно од главните ветувања на Трамп во неговата изборна кампања. По доаѓањето на функција, презеде низа мерки во таа насока, од кои некои беа оспорени.
На пример, на почетокот на јануари, тој започна со присилна депортација на колумбиски имигранти, кои владата ги смета за нелегални. Колумбија првично одби да ги прими авионите со свои државјани, но попушти откако Трамп се закани со санкции и царини.
Најсилен руски напад од почетокот на војната врз украинскиот Харкив
Најмалку три лица загинаа, а 21 е рането во руски напад врз Харкив, вториот најголем град во Украина, кој го претрпе „најсилниот напад од почетокот на војната“ во февруари 2022 година.
Градоначалникот Игор Терехов изјави дека „најмалку 40 експлозии“ одекнале во краток временски период во овој град на североистокот на земјата со околу 1,4 милиони жители, сместен помалку од 50 километри од руската граница.
„Непријателот истовремено напаѓа со ракети, дронови Шахед и наведувани воздушни бомби“, рече Терехов, според кого биле употребени најмалку 48 дронови Шахед, две ракети и четири наведувани бомби.
Нападнати биле станбени згради со повеќе катови и приватни домови, образовни и инфраструктурни објекти.
Две лица загинале во Киевскиот округ на Харкив, а едно во Основјанскиот округ, додека околу 20 се повредени, изјави Терехов.
Брачна двојка во педесеттите години загинала во напад што погодил две згради во Херсон, според гувернерот на таа јужна област, Олександр Прокудин. Две лица се повредени, исто како и во Дњепропетровската област на истокот на земјата.
Русија изведе еден од најголемите напади од почетокот на војната во ноќта меѓу четврток и петок, со 407 дронови и 45 проектили, според украинската армија. Бројот на загинати во овој напад се зголеми на најмалку пет во саботата, откако во рушевините во Луцк, близу полската граница, беше пронајдено телото на млада жена.
Руското Министерство за одбрана соопшти дека преку ноќ уништило 36 украински дронови, главно во Московската, Курската и Смоленската област. Овој напад доведе до привремено затворање на главниот московски аеродром Шереметјево, според воздухопловните власти.
Москва во петокот вети „одговор“ на претходните украински напади врз неколку руски воздухопловни бази далеку од првите линии на фронтот, во кои беа уништени неколку бомбардери.
Нападите беа извршени во услови на застој во мировните преговори по вториот круг директни разговори меѓу Русија и Украинаво Истанбул во понеделникот, кои не доведоа до прекин на огнот, туку само до договор за размена на затвореници.
Двете завојувани страни требаше овој викенд да разменат по 500 воени затвореници, по претходната размена на 1.000 лица од секоја страна во мај. Беше договорено и страните да ги предадат телата на 12.000 загинати војници.
Меѓутоа, според наводите од Русија, Украина неочекувано ја одложила размената на воени затвореници и телата на војниците до понатамошно, објави официјалниот претставник на Кремљ, Владимир Медински, пренесе „Ројтерс“.
„Русија на 6 јуни, строго почитувајќи ги договорите од Истанбул, започна хуманитарна операција за предавање на повеќе од 6.000 тела на убиени украински војници, како и размена на повредени и тешко болни затвореници, како и оние помлади од 25 години“, напиша Медински на апликацијата Телеграм.
Тој тврди дека 1.212 тела на загинати Украинци се наоѓаат во ладилници на местото предвидено за размена.
Наведе и дека Русија ѝ предала на Украина список со првите 640 затвореници од категоријата „повредени, болни и млади“ за да започне размената.
„Контакт групата на руското министерство за одбрана се наоѓа на границата со Украина“, продолжи Медински и додаде дека таму нема украински преговарачи.
Петро Јаценко од украинскиот Координациски штаб за воени заробеници изјави дека размената е поместена за следната недела.
Во знак на непопустливост на Москва, додека барањата на двете страни изгледаат непомирливи, Кремљ ја претставува инвазијата на Украина, која започна во февруари 2022 година, како „егзистенцијално прашање“.
„За нас ова е егзистенцијално прашање, еден од нашите национални интереси, нашата безбедност, нашата иднина и иднината на нашите деца“, изјави во петокот портпаролот на рускиот претседател, Дмитриј Песков.
Руските сили, кои ја окупираат приближно една петина од украинската територија, речиси секојдневно ги бомбардираат украинските градови од 2022 година. Како одговор, Украина речиси секој ден изведува воздушни напади врз Русија.
Во ЕУ загрижени за безбедноста, на Балканот приоритет е преживувањето
Граѓаните на Европската унија и Западен Балкан имаат различни животни приоритети и погледи кон иднината, според новото истражување на Евробарометарспроведено во пролетта 2025 година.
Додека граѓаните на ЕУ и понатаму се фокусирани на безбедносни прашања поврзани со руската инвазија врз Украина, на Западен Балкан повеќе се загрижени поради поскапувањето на прехранбените производи, криминалот, корупцијата и квалитетот на здравствената заштита.
Истражувањето на Евробарометар открива и разлики меѓу земјите од Западен Балкан, особено помеѓу Србија и остатокот од регионот, кога станува збор за оптимизмот, довербата во ЕУ, недовербата кон НАТО и самата поддршка за можно членство.
Три години по ред, повеќе од една четвртина од испитаниците во 27-те земји-членки се согласуваат дека војната во Украина претставува директна закана за безбедноста на ЕУ, каде што една петтина (20 проценти) ѝ дава приоритет на одбраната и безбедноста.
Западниот Балкан, пак, е насочен кон секојдневното преживување. Во споредба со истото истражување спроведено есента, Северна Македонија бележи најголем пораст на загриженост поради криминалот, а Косово поради растот на цените.
Косово се издвојува во споредба со остатокот од Западен Балкан по оптимизмот, каде што 76 проценти од испитаниците изразиле задоволство од пазарот на труд.
Околу 40 проценти од испитаниците во другите земји сметаат дека можноста за наоѓање работа во нивната земја е добра, што е во просекот на Европската унија.
Во споредба со есенското истражување на Евробарометар, Албанија бележи најголем пораст на оптимизмот — за 17 проценти, додека Босна и Херцеговина забележува пораст на песимизмот — за 6 проценти.
Што се однесува до општата ситуација во земјата, две третини од испитаниците во Србија сметаат дека таа е лоша, што претставува и најголем пораст на негативното гледиште за состојбата во земјата — за 19 проценти.
Спротивно на тоа, речиси 80 проценти од испитаниците на Косово ја оцениле состојбата во својата земја како добра.
Песимизмот по ова прашање најмногу пораснал токму во Србија, за 19 проценти, во споредба со октомври 2024 година.
Испитаниците во Црна Гора и на Косово се оптимисти кога станува збор за иднината на нивните земји.
Во Босна и Херцеговина ист процент од граѓаните смета дека нивната земја се движи во погрешна насока, што претставува 14 проценти понегативна перцепција во споредба со истражувањето од есента 2024 година — веднаш по Србија, каде што порастот на песимизмот изнесуваше 11 проценти.
Додека мнозинството граѓани на ЕУ и Западен Балкан сметаат дека нивните животи нема значително да се променат во наредната година, оптимизмот блеска на Косово и во Албанија.
Во овие две земји, повеќето испитаници веруваат дека нивниот живот ќе се подобри, додека секој петти испитаник во Србија и Северна Македонија се плаши дека го очекува полош живот.
Во споредба со истото истражување спроведено во есента 2024 година, во Црна Гора за 20 проценти се зголемил бројот на оние што сметаат дека сè ќе остане исто, додека во остатокот од регионот резултатите се речиси непроменети.
Во Србија, Црна Гора и Босна и Херцеговина, мнозинството граѓани предвидуваат влошување на општата состојба во нивните земји во текот на наредната година.
Косово и Албанија повторно се надвор од овој тренд — таму мнозинството испитаници очекуваат подобрување во иднина, и тоа во поголем обем отколку што беше случај во есента.
Песимизмот во изминатите шест месеци најмногу пораснал во Босна и Херцеговина — за шест проценти.
Членството во ЕУ и понатаму останува привлечно за земјите од Западен Балкан — освен во Србија.
Ентузијазмот е најсилен во Албанија и Црна Гора, каде што мнозинството граѓани веруваат дека членството во Унијата би ѝ користело на нивната земја.
Во Србија, еднаков број испитаници го гледаат пристапувањето кон ЕУ како нешто добро, лошо или се изјаснуваат неутрално.
Во Црна Гора е забележан најголем пораст на оптимизмот во однос на есенското истражување — за 13 проценти.
Мултимедија
Најпосетени
Што треба да знаете