Вести
ГЕРБ бара технократска влада во Бугарија, но парламентот не сака
Мандатарот за нова бугарска влада Николај Габровски од партијата на десниот центар ГЕРБ денеска предложи формирање технократска влада за да ја изведе балканската земја од ќор-сокакот, но тој се соочува со тешка задача да најде поддршка во парламентот. ГЕРБ победи на предвремените избори на 2 октомври, четврти во последните 18 месеци, но досега не успеа да обезбеди мнозинска поддршка за технократската влада што ќе ја предводи Габровски. Неуспехот да се формира редовна влада ќе влијае врз плановите на Бугарија да се приклучи на еврозоната во 2024 година, што ќе донесе милијарди евра во фондовите за обновување на ЕУ. Тоа, исто така, би ги попречило напорите да се состави сеопфатен буџет за 2023 година во услови на висока инфлација и претстојното економско забавување.
ГЕРБ доби рок од една недела да формира влада во Бугарија
Политичките аналитичари велат дека шансите за формирање влада предводена од ГЕРБ, па дури и администрација на технократ, остануваат мали. Тие гледаат можен договор само за влада под друга партија со ограничен временски рок - или дополнителни предвремени избори напролет. „Мојата главна цел ќе биде деескалација на тензиите, но главно да одиме заедно и да ја извлечеме Бугарија од кризата во која се наоѓа“, му рече Габровски на претседателот Румен Радев при денешното поднесување на неговиот предлог-кабинет. ГЕРБ го предложи Габровски, 51-годишен неврохирург без политичко искуство, за премиер во обид да добие поддршка. Но, четири од седум политички партии во парламентот рекоа дека нема да го поддржат. Радев рече дека ќе побара од парламентот да гласа за предложениот кабинет на Габровски оваа недела. За министер за надворешни работи, Габровски го номинираше Драгомир Заков, поранешен министер за одбрана и амбасадор во НАТО, кој се залагаше за поддршка на Бугарија за Украина по руската инвазија.
Софија лута поради холандското „не“ за влез во Шенген
Ако ГЕРБ не успее, може да има уште два обида за формирање влада. Доколку и тие не успеат, претседателот треба да закаже предвремени избори во рок од два месеца.
види ги сите денешни вести
Инцидент на натпреварот меѓу младинските екипи на „Брегалница“ и „Шкупи“, едно лице е уапсено
Четириесет и тригодишен родител е уапсен денеска (24 август), откако се случил инцидент на фудбалскиот натпревар меѓу екипите на фудбалските клубови „Шкупи“ и „Брегалница“ на стадионот „Бело Брдо“ во Штип – соопшти МВР.
Полицијата информираше дека во инцидентот, повредени се двајца петнаесетгодишни фудбалери на ФК „Брегалница“.
– Денеска (24.08.2025) во СВР Штип било пријавено дека на игралиштето „Бело Брдо“ во Штип, за време на одигрување на фудбалски натпревар помеѓу младинските екипи на ФК „Брегалница“ од Штип и ФК „Шкупи“ од Скопје, А.А.(43) од Скопје, родител на фудбалер од ФК „Шкупи“, физички нападнал двајца малолетници од Штип, фудбалери на ФК „Брегалница“, и им нанел повреди – наведе Министерството за внатрешни работи.
Веднаш по нападот, полициски службеници од СВР Штип го лишиле од слобода А.А., а малолетниците биле пренесени во Клиничка болница Штип за укажување помош, се додава во соопштението на МВР.
Известен е јавен обвинител и се преземаат мерки за целосно расчистување на настанот, по што ќе бидат поднесени соодветни пријави, наведе полицијата.
Денешниот натпревар бил прекинат при резултат 2:1 за Брегалница.
Реакција од ФК Брегалница
По инцидентот, овој фудбалски клуб реагираше преку писмено соопштение во кое побара ФФМ „детално да ја разгледа ситуацијата“.
-Денешното дерби во Втората лига го одбележа инцидентот (веќе неколку пати домаќинот е во улога на иницијатор) каде за малку посериозно не настрадаа судиите и нашите фудбалери. Иако без гледачи, неслужбени лица од таборот на домаќините беа тие кои го предизвикаа инцидентот, поради кој беше прекинат натпреварот – велат од ФК „Брегалница“ во соопштението.
Оттаму додаваат дека уште во првата минута имало „константни притисоци“.
„Во првото полувреме неколку неслужбени лица од домашниот табор вербално го нападнаа главниот судија Иванов, неговите помошници и дел од гостинските фудбалери. Причина за нападот беше судискиот свиреж при акција на домаќините бидејќи во моментот на теренот имаше две топки. Главниот судија, по правило, ја прекина играта за да се отстрани едната топка. На тоа бурно реагираа неслужбени лица кои влегоа во теренот и почнаа вербално да ги напаѓаат гореспоменатите лица“, нагласуваат од фудбалскиот клуб.
Оттаму реагираат и дека помошниот судија кој бил од страната на клупата на домаќините во текот на целиот натпревар бил изложен на напади, а поради тоа, „не можел да се фокусира на случувањата на теренот“.
Фудбалските терени не смеат да бидат поле за етнички и политички препукувања, а уште помалку место за демонстрација на насилство – порачуваат од ФК Брегалница.
Костова: Младите спортисти немаат минимум безбедност
Реакција за денешниот инцидент, преку писмено соопштение, пристигна и од потпретседателката на СДСМ, Кристина Костова.
„Додека Панче Тошковски му тера кампања на Орце Ѓоргиевски, на нас штипјани денеска децата ни ги сокршија од ќотек на стадионот Бело Брдо. Нов ден, нов крах на безбедноста под водство на најнеспособниот министер за внатрешни работи во историјата на самостојна Македонија“, реагира Костова.
-Најостра осуда за денешниот инцидент на натпреварот меѓу младинските екипи на „Брегалница“ и „Шкупи“! Додека Тошковски се слика, младите спортисти немаат минимум безбедност, ниту можност за непречено спроведување на обичен фудбалски натпревар – се додава во реакцијата.
Соборен украински дрон предизвика пожар во нуклеарната електрана Курск
Пожар изби во Нуклеарната електрана Курск откако руските вооружени сили соборија украински дрон кој летал во близина на електраната, соопшти прес-службата на електраната.
Дронот, еден од неколкуте за кои руските власти известија на 23 август, паднал врз помошен трансформатор, предизвикувајќи пожар кој бил изгаснат, а повредени нема, се наведува во соопштението на прес-службата.
„Борбеното беспилотно летало кое им припаѓа на Вооружените сили на Украина е соборено од страна на системите за противвоздушна одбрана во близина на Нуклеарната електрана Курск,“ се наведува во соопштението објавено на Телеграм.
„По ударот, дронот експлодирал, оштетувајќи го помошниот трансформатор,“ се додава во соопштението.
Повредени нема, но како последица на експлозијата, капацитетот на третиот блок од електраната е намален на 50 проценти, соопшти прес-службата.
Нивото на радијација на локацијата и во околината не ја надминало нормалната граница, се додава во соопштението.
Украина не се огласи веднаш.
Киев во последните неколку месеци ги засили нападите со дронови на територија на Русија како одговор на континуираните руски напади врз Украина. Тие напади, според наводите, се насочени кон уништување на инфраструктура што е клучна за воените напори на Москва.
Информациите прва ги објави руската федерална телевизиска мрежа РЕН ТВ (REN TV), која наведе дека трансформаторот не е дел од нуклеарниот сегмент на електраната, повикувајќи се на изјава од прес-службата на електраната. Не беше веднаш јасно во кој дел од електраната избувнал пожарот.
Нуклеарната електрана Курск се наоѓа 40 километри западно од градот Курск, регионалната престолнина, на брегот на реката Сеим. Првата единица е пуштена во работа во 1976 година. Останатите единици се додадени во 1979, 1983 и 1985 година, според наводите на прес-службата.
Ограничување на трговските маржи за околу 3.000 производи во Србија
Претседателот на Србија, Александар Вучиќ, претстави нов пакет економски мерки за, како што најави, подобрување на животниот стандард на граѓаните.
Овие мерки предвидуваат ограничување на маржите на најголемите трговски синџири за 3.000 производи, што претставува разлика меѓу набавната цена што ја плаќаат трговците и крајната цена што ја плаќаат потрошувачите. Како што најави, маржите ќе бидат најмногу 20 проценти.
Со мерката се опфатени 24 малопродажни трговци.
Вучиќ на прес-конференција најави и донесување на Закон за трговија и Закон за заштита на потрошувачите.
„Ќе мора да има јасно истакнати ценовници, нема да смее да има измами со таканаречени акции,“ посочи тој.
Мерките вклучуваат и намалени каматни стапки на готовински и потрошувачки кредити, измени во прописите за извршување и обезбедување, попусти за електрична енергија за дел од потрошувачите и пониски цени на огревот.
Најавена е измена и на Законот за извршување и обезбедување (ЗИО) со цел да се оневозможи одземање на недвижен имот доколку се работи за единствена семејна недвижност до 60 квадратни метри и ако живеалиштето на таа адреса е регистрирано најмалку пет години пред поднесување на предлогот за извршување.
Вториот дел од економските мерки, претседателот на Србија го најави за средината на септември.
Претседателот на Србија, Вучиќ ги претставува економските мерки во време на протести што траат повеќе од девет месеци.
Протестите, предводени од студенти, избувнаа по уривањето на бетонската настрешница на Железничката станица во Нови Сад, при што загинаа 16 лица, а едно лице беше тешко повредено.
Учесниците на протестите бараат одговорност за трагедијата во Нови Сад, а подоцна во нивните барања вклучија и распишување вонредни парламентарни избори.
Власта ја отфрла можноста за распишување вонредни избори во овој момент.
Први реакции
Опозицискиот Зелено-лев фронт (ЗЛФ) оцени дека ограничувањето на трговските маржи нема да доведе до трајно намалување на цените на храната.
ЗЛФ смета дека „во сегашните политички околности, таквите мерки претставуваат обид за политички маркетинг со цел стабилизирање на рејтингот на владејачкиот режим“.
Тие наведоа дека искуствата од Романија, Унгарија и Северна Македонија, на кои се повикува власта, покажале дека до намалување на цените на храната доаѓа во првиот и евентуално вториот месец од важењето на мерката, а потоа постепено се враќаат на првичните нивоа.
Од утре редовни активности во Собранието, заврши одморот на пратениците
Пратениците од утре официјално почнуваат со работа по годишниот одмор. Претседателот на Собранието, Африм Гаши за утре закажа неформална средба со собраниските известувачи, на која ќе информира за тековните активности во законодавниот дом, по редовната координација со координаторите на пратеничките групи.
До петокот на собраниската веб страна освен брифингот со новинарите, Собранието немаше закажано други активности за следната недела.
Одморот на пратениците беше прекинат на 16 август кога беше свикана итна седница за Предлог на законот за изменување и дополнување на Изборниот законик, по скратена постапка кој не помина поради немање на Бадентерово мнозинство.
Претходно, на 13 август седница одржа и Комисијата за прашања на изборите и именувањата, која формира Комисија за селекција на кандидатите за претседател на Државната комисија за спречување на корупцијата. Вообичаено одморот на пратениците започнува по Националниот празник Илинден.
Претседателот на Собранието, Гаши на 9 август ги распиша локалните избори за 19 октомври. Се очекува Собранието да одржува пленарни седници и седници на комисиите до пред почетокот на кампањата за локалните избори на 29 септември.
На последниот брифинг со новинарите, Гаши посочи дека доколку е потребно пратениците ќе бидат повикани за седници.
Во тек е акредитацијата на набљудувачи на локалните избори
Согласно Роковникот за локалните избори 2025, во тек е барањето за акредитации за набљудување и известување од изборите закажани за 19 октомври. Досега за набљудување на изборите е акредитиран само Младински културен центар Битола.
Рокот за барањето за набљудување започна од денот на распишување на изборите, а завршува на десет дена пред денот на гласањето, односно на 8 октомври на полноќ.
Барања за набљудување на изборите може да достават сите домашни здруженија и странски организации, кои се регистрирани согласно со закон, најмалку една година пред денот на одржувањето на изборите, а во чии статути е вклучено начелото на заштита на човековите права, меѓународни организации и претставници на странски земји вклучително и претставници на медиуми.
Подносителите на барањата за следење на изборите поднесуваат Барање за регистрација на набљудувачи на изборен процес, додека претставниците на странските медиуми поднесуваат Формулар за акредитација на медиуми. Двете барања се достапни на веб страната www.sec.мк.
Домашните здруженија и странски организации, покрај Барањето доставуваат и Копија од Статут на здружението, копија од регистрација пред надлежен орган, список на набљудувачи и копија од документ за идентификација на предложените набљудувачи.
Меѓународните организации и претставници на странски земји, покрај Барањето за набљудување, доставуваат и Список на набљудувачи и копија од документи за идентификација на предложените набљудувачи.
Претставниците на странските медиуми покрај Барањето за акредитација на медиуми, доставуваат список на новинари, сниматели, фоторепортери и копија од документ за идентификација.
Претставниците на медиумите од Република Северна Македонија не подлежат на процес на акредитација.
Барањата со потребните прилози се доставуваат на мејл адресата observers@sec.mk, најдоцна десет дена пред денот на гласање, односно најдоцна до 08 октомври 2025 година до 24.00 часот.
Државната изборна комисија ќе издаде овластување на сите подносители за набљудување и следење на изборите кои ги исполнуваат условите најдоцна 7 дена по приемот на барањето.
Првиот круг на локалните избори ќе се одржи на 19 октомври, а вториот круг на 2 ноември. Ќе се бираат градоначалници и советници во 80 општини и Градот Скопје.
Барање за праведна разрешница на деветнаесеттиот „Марш на ангелите“ во Кочани
Денеска (23 август) во Кочани по деветнаесетти пат се одржа протестен „Марш на ангелите“. Родителите на младите чии животи згаснаа во пожарот во дискотеката „Пулс“ порачаа дека „оваа трагедија не е само црна хроника во вести и не е статистичка бројка“.
„Тоа се 62 згаснати животи, 62 семејства во црнина, 62 иднини украдени за миг“, истакнаа родителите.
Поворката од родители и нивните поддржувачи ја поминаа предвидената маршута - од Паркот на револуцијата, Трговскиот центар и зградата на Општина Кочани, Управата за јавни прихдои, зградата на полицијата, па се до Основниот суд од каде побараа овој случај да добие епилог, да не се заташка и заборави.
-Ако институциите дозволат оваа трагедија да заврши во тишина, ако не ја исполнат својата должност, тогаш испраќаат порака дека животот на нашите деца не значел ништо, а тоа ќе значи втора неправда, уште поголема и по тешка од првата, порачаа тие.
Семејствата на загинатите, како што самите рекоа, не бараат од државата сочувство и празни зборови, туку вистинска, целосна и праведна разрешница.
-Секој што носи одговорност без разлика на функцијата, позицијата или моќта мора да биде изведен пред лицето на правдата, затоа што човековиот живот нема цена, а нашите загуби немаат замена, истакнаа на маршот.
Родителите го завршија маршот онаму од каде што тој и почна - во Паркот на револуцијата во Кочани, со себе носејќи фотографии од своите деца и транспаренти со пораки што постојано ги упатуваат до истите институции.
Во пожарот што се случи на 16 март годинава, животот го загубија 62 лица помеѓу кои шест деца, а над 200 беа повредени.
Граѓански собири против блокадите низ Србија
Во повеќе градови во Србија денеска (23 август) се организирани собири на граѓаните кои „се противат на блокадите“, а на кои, преку социјалните мрежи и провладините медиуми, повикуваа претставници на Српската напредна партија (СНС) тврдејќи дека собирот не е партиски.
Претседателот на Србија, Александар Вучиќ се приклучи на протестите кои се организирани во Уб.
„Граѓаните против блокадите“, „Ја сакам мојата Србија назад“, се само дел од транспарентите на овие собири.
Репортерката на Н1 јави дека на собирот во Врбас, граѓаните носат транспаренти со пораките „Сакам живот“, „Мир да, блокади не“, „Мирен ден, слободна Србија“, балони и знамиња.
Под паролата „Го сакаме својот живот“, во Обреновац се собраа приврзаниците на СНС, а потоа тргнаа во прошетка по главните улици.
На улиците се присутни единиците на Жандармеријата, но и луѓе со „црвени беретки“, пренесе агенцијата Бета.
Формацијата „Црвени беретки“ е расформирана поради учеството во убиството на премиерот Зоран Ѓинѓиќ во 2003 година.
Претходните собири кои се одржаа на 20 август, официјално ги организираше невладината организација Центар за општествена стабилност – пренесе Бета.
Претседателот на Србија, Александар Вучиќ тогаш изјави дека собирите се одржале во педесетина градови и села во Србија, а дека не станува збор за 'собири против оние кои блокираат', туку против блокадите.
Министерот за внатрешни работи, Ивица Дачиќ изјави дека во 49 места во Србија се одржале „собири на граѓани кои се противат на блокадите" и дека според проценките на полицијата, на нив биле присутни околу 33.000 луѓе.
Овие собири се организираат како реакција на антивладините протести кои траат повеќе од девет месеци, а на кои пред сѐ, се бара утврдување одговорност за смртта на 16 лица, кои починаа при падот на настрешницата на Жeлезничката станица во Нови Сад.
Студентите кои ги предводат протестите додадоа и барање за распишување на вонредни парламентарни избори. Сметаат дека тоа е неизбежен потег бидејќи „државата не направила ништо во однос на одговорноста за несреќата".
Властите одбиваат да распишат предвремени избори.
Додик предложи мандатар на Владата на РС без законско овластување
Милорад Додик го предложи Саво Миниќ за мандатар на новата Влада на Република Српска. Миниќ досега беше министер за земјоделство, шумарство и водостопанство.
Додик го направи ова иако нема законска надлежност, откако Централната изборна комисија на Босна и Херцеговина му го одзеде мандатот од позицијата претседател на Република Српска.
Централната изборна комисија (ЦИК) го одзеде мандатот бидејќи Судот на Босна и Херцеговина на почетокот на август изрече правосилна пресуда со која Додик е осуден на една година затвор и шестгодишна забрана за вршење јавна функција. Затворската казна потоа, беше отплатена.
Во меѓувреме, Радован Вишковиќ, досегашниот претседател на Владата на РС, на почетокот на неделата поднесе оставка, така што ентитетот Република Српска остана без претседател и без премиер.
Оставката на Вишковиќ беше потврдена на 22. август од Собранието на Република Српска. Според законот, новиот мандатар го предлага претседателот на РС.
Во заклучоците на Собранието на РС од 22 август, се повикува Додик да продолжи да ја врши функцијата претседател на РС, се отфрлаат предвремени избори, а на институциите на ентитетот им се налага да не соработуваат со ЦИК. Опозицијата предупреди дека со тоа се влегува во зоната на кривични дела и повреда на уставниот поредок на БиХ.
Британскиот амбасадор Рејли: Референдумот за пресудата на Додик е закана за уставниот поредок на БиХ
Откако Народното собрание на Република Српска вчеравечер донесе одлука за одржување референдум по повод пресудата на Судот на Босна и Херцеговина за одземање на мандатот на Милорад Додик како претседател на Република Срска (РС), реагираше британскиот амбасадор во БиХ, Џулијан Рејли.
„Судот на БиХ, независна институција, го осуди поранешниот претседател на Република Српска, г. Додик, и таа пресуда мора да се почитува. Спроведувањето референдум за која било судска пресуда или непочитувањето на истата би било противзаконски и би го поткопало владеењето на правото и уставниот поредок на БиХ", изјави британскиот амбасадор во БиХ.
Народното собрание на Република Српска донесе одлука во доцните вечерни часови на 22-ри август за одржување на референдум на кој граѓаните на таа единица ќе се изјаснуваат за пресудата на Судот на Босна и Херцеговина против Милорад Додик и одлуката на Централната изборна комисија на БиХ со која му е одземен мандатот како претседател на РС.
Референдумот е закажан за 25. октомври.
Референдумското прашање гласи: „Дали ги прифаќате одлуките на неизбраниот странец Кристијан Шмит и неуставните пресуди на Судот на БиХ против претседателот на РС, како и одлуката на ЦИК за одземање на мандатот на претседателот на РС, Милорад Додик?“
Одлуката за референдумот не е во согласност со Уставот на Босна и Херцеговина, кој не предвидува можност субјектите самостојно да распишуваат референдуми за одлуки на државните институции.
Исто така, усвоени се и измените на Законот за референдум и граѓанска иницијатива по итна постапка, кои овозможуваат формирање посебни комисии за спроведување референдум.
На почетокот на август, Судот на БиХ донесе конечна пресуда со која го осуди Милорад Додик на една година затвор и шестгодишна забрана за вршење јавна функција. Затворската казна беше отплатена, додека Централната изборна комисија на БиХ, постапувајќи по пресудата, му го одзеде мандатот на Додик како претседател на РС.
Од 18 август, Додик официјално не е претседател на РС, а Централната изборна комисија на БиХ е должна да распише предвремени избори за претседател на ентитетот во рок од 90 дена.
По одземањето на мандатот на Додик, ентитетот остана без претседател и без премиер, со оглед на тоа дека Радован Вишковиќ поднесе оставка.
Во заклучоците се наведува дека Народното собрание се спротивставува на одржувањето предвремени избори, дека „Додик е повикан да продолжи да ја извршува функцијата претседател на РС“ и дека од сите институции во ентитетот се бара да не преземаат активности поврзани со распишувањето избори.
Опозицијата предупреди дека со тоа се влегува во зоната на кривични дела и кршење на уставниот поредок на БиХ.
Мицкоски: Реконструкција на Владата, веднаш по изборите
Ниту една функција не е загарантирана ниту вечна – порача денеска (23 август) претседателот на владеачката ВМРО-ДПМНЕ, Христијан Мицкоски. Тој информираше дека веднаш по локалните избори ќе има промени во партијата, како и реконструкција и, како што рече, подобрување на капацитетите на Владата.
„Тоа не значи дека луѓето кои ќе се заменат биле лоши или немарни, но на владата секогаш ѝ треба зголемен капацитет, уште посилно темпо за промените кои ги правиме“ истакна Мицкоски во своето обраќање на денешниот Саем за отчет на градоначалниците од ВМРО-ДПМНЕ „4 години работа за тебе“.
Според Мицкоски, овие избори нема да бидат „вратата на ДУИ за во Владата“.
„Еден човек ми вели го готвите ДУИ да ви биде партнер во владата. Мојот директен одговор е ДУИ уште долго ќе биде во опозиција, затоа што досега не научи ниту една лекција. Не ги ставивме во опозиција за да без ниту една научена лекција се вратат на власт. Тие таму припаѓаат со нивниот коалициски пајташ во криминалот и ударите по Македонија, СДСМ“, рече Мицкоски.
Тој обвини дека „ДУИ и СДСМ имаат таен план против народот“.
„Со инфлација од независни кандидатури и фантомски листи сакаат намерно да го урнат изборниот процес, да го збунат гласачот, да ја изиграат демократијата и да ја заматат чистата слика на нивниот историски пораз што доаѓа“, додаде Мицкоски.
Реакција од ДУИ
На неговите изјави, Демократската унија за интеграција (ДУИ) реагираше преку писмено соопштение, оценувајќи дека тие се „чисти клевети“.
Наместо да измислува имагинарни непријатели, премиерот треба да објасни зошто неговата влада го крши Уставот, зошто ги дискриминира Албанците, зошто спротивно на Уставот и законот го намали бројот на советници, зошто ја инструментализира ДИК, Уставниот суд и другите институции во служба на неговите партиски и моноетнички планови и зошто со секоја одлука ја враќа државата назад во времето пред 2001 година – наведуваат од ДУИ во денешното соопштение.
-ДУИ не може да остане рамнодушна кога се гази Охридскиот рамковен договор, кој е клучен за стабилноста на земјата и нејзината прогресивна иднина – се додава во писмената реакција.
СДСМ: Наместо развој, разочарувања за граѓаните
Во меѓувреме, портпаролката на СДСМ, Богданка Кузеска и и кандидатите за градоначалник на Битола, Прилеп, Охрид, Штип, Свети Николе, Неготино и Куманово одржаа серија прес конференции во партиското седиште.
„Четири години локална власт на ВМРО-ДПМНЕ се четири години разочарувања за граѓаните. Четири години кои наместо развој и проекти за граѓаните, донесоа само разочарувања, нечисти општини, урбанистички хаос, поскапи цени за граѓаните и бројни скандали со тендери“, истакна Кузеска на денешната прес конференција.
Таа обвини дека „општините предводени од ВМРО-ДПМНЕ, се претвориле во епицентар на тендерски шеми и партиски злоупотреби на народните пари“.
„Локалната власт на ВМРО-ДПМНЕ воведе поскапи сметки за вода, канализација, смет и го зголеми данокот на промет. Прилеп, Штип, Охрид, Битола, Ѓорче Петров, Бутел, Неготино, Гевгелија, Велес, речиси и да нема општина водена од ВМРО-ДПМНЕ каде не се покачени сметките за граѓаните“, додаде Кузеска.
Според неа, „изборните програми останале само на хартија, а граѓаните добиле четири години изгубено време“.
-А сликата на општините под капата на ВМРО-ДПМНЕ е срамна: улици полни со ѓубре, сообраќаен хаос, никакви инфраструктурни решенија, ниту еден сериозен проект за подобар живот. Наместо развој, видовме само застој и назадување – истакна Кузеска.
Таа се осврна и на состојбата во главниот град, каде како што рече, има хаос во јавниот превоз, но и нечисти улици.
„Наместо локалната самоуправа да биде сервис на народот, тие ја претворија во сервис за сопствени интереси и партиски привилегии“, посочи портпаролката на СДСМ, порачувајќи дека локалните избори се шанса за клучни промени на локално ниво.
Мултимедија
Најпосетени
Што треба да знаете