Вести
Агелер: Внимателно ги следиме изјавите за интерпелациите на Судскиот совет
Американската амбасадорка во Северна Македонија, Анџела Агелер, изјави дека не може да ги коментира интерпелациите во Собранието за петте члена на Судскиот совет, но упати порака дека внимателно ги следат случувањата.
„Јас не можам да ги коментирам. Многу внимателно ги следиме процедурите во Собранието и изјавите во врска со изгласаните интерпелации за петте членови на Судскиот совет. Она што е најважно за секој од овие случаи е да се следи на начин што е јасен и транспарентен за сите оние кои го набљудуваат“, изјави Агелер на 13 март.
На 11 март, пратениците од владејачкото мнозинство изгласаа интерпелации на петте члена на Судскиот совет кои се избрани од Собранието. Интерпелациите не се правно обврзувачки односно останува на самите членови да одлучат дали ќе се повлечат, на што повикуваа претставници од власта.
Уште откако беа најавени интерпелациите во февруари, од Судскиот совет порачаа дека единственото место каде може да се разреши член е во самиот Совет.
На тројца од петте члена на Советот шестгодишните мандати им истекнуваат во јули односно декември 2025 година.
За нови членови кои се избираат од Собранието, според премиерот Христијан Мицкоски, не се дискутирано.
„Ние не влеговме во ова затоа што имаме однапред спремено тефтерчиња во коишто се наоѓаат имиња, како тие што беа во Речица и на Бихаќка. Ние влеговме од принципиелни причини бидејќи вие граѓаните им дадовте доверба помала два проценти, а и последните случувања за избор на вршител на должноста претседател на Врховниот суд, името коешто е избрано, е дополнителен мотив овие членови на Судскиот совет да бидат разрешени“ рече Мицкоски, кој заедно со Агелер присуствуваа на настан во Центарот за обука на полицијата во Идризово на 13 март.
Судскиот совет е составен од 15 члена, од кои тројца ги избира Собранието со Бадентерово мнозинство. Други двајца предлага претседателот на државата, но изборот го врши Собранието. Еден од овие два члена треба да биде припадник на помалите етнички заедници.
Осум члена, пак, ги избираат судиите од своите редови на непосредни избори, со тоа што тројца од нив се припадници на заедниците кои не се мнозинство во државава.
Останатите двајца членови се дел од Советот само по функција – може да присуствуваат на седници, но немаат право на глас, а тоа се претседателот на Врховниот суд и министерот за правда.
види ги сите денешни вести
Николоски: Државата го доби случајот „Казандол“, заштедени 115 милиони евра
Донесена е пресуда во арбитражната постапка за рудникот „Казандол“ во валандовско каде државата беше тужена од неколку инвеститори кои бараа 115 милиони евра отштета, рече Александар Николоски, министер за транспорт и претседател на координативното арбитражно тело на Владата, на прес-конференција на 19 август.
„Можам со гордост да кажам дека овој случај го добивме. Сите 11 основи по кои државата беше тужена се одбиени и заштедени се 115 милиони евра. Пресдудата е целосно во наша корист, случајот не беше воопшто лесен“, рече Николоски.
Арбитражен спор пред меѓународна институција во кој некоја компанија бара наплата на шетата од странска држава е пракса кога правилата на игра или договорите се нарушени.
Случајот „Казандол“ стигна до меѓународна арбитража откако поранешниот премиер Зоран Заев на 27 март 2018 година ја потпиша одлуката за едностран раскин на договорот, велејќи дека концесионерот не ги исполнил обврските.
„Владата е посветена на здравјето на граѓаните, здравјето е поважно од било кој приватен интерес и ова е порака до граѓаните на општините Валандово, Богданци и Дојран“, изјави тогаш Заев, додавајќи дека компанијата била обврзана „во рок од две години да изгради постројка за експлоатација на катоден бакар, а Владата нема да плаќа пенали, бидејќи во овој случај концесионерот не го испочитувал договорот“.
Концесионер на „Казандол“ беше англиско-украинскиот конзорциум „Сардич МЦ“.
Конститутивна седница на косовското собрание в среда
Косовското собрание ќе се состане на 20 август за да ја продолжи конститутивната седница на законодавниот дом што произлезе од изборите во февруари.
Продолжувањето на седницата доаѓа откако рокот од 30 дена за конституирање на законодавниот дом започна на 18 август.
Ова се случува откако Уставниот суд ја објави целосната пресуда, со која му наложи на Собранието да избере нов претседател на Парламентот во рок од 30 дена преку јавно гласање, ставајќи го истиот кандидат на гласање не повеќе од три пати.
Одлуката беше поздравена од партиите што беа во опозиција минатиот мандат, но критикувана од победникот на изборите, движењето Самоопределување.
Захир Черкини, професор по уставно право на Универзитетот Иса Болетини во Митровица, за Радио Слободна Европа (РСЕ) изјави дека пресудата значи дека понатамошните одложувања во конституирањето на Собранието не се само политичко прашање, туку и кршење на уставните норми што го гарантираат функционирањето на државата.
„Почитувањето на пресудите на Судот не е опција што политичките актери можат да ја изберат или не, туку е неопходна обврска. Секое спротивно дејство би ги поткопало темелите на владеењето на правото и би ризикувало создавање длабока институционална криза“, изјави тој за РСЕ на 18 август.
Пресудата не споменува конкретни последици ако Собранието не ја почитува одлуката, но, според Черкини, „тогаш имаме нова уставна ситуација што бара институционално разјаснување“.
„Во таков случај, се очекува претседателот или друг овластен субјект да го врати прашањето на Уставниот суд за дополнително толкување на следните чекори“, рече тој.
„Идејата дека земјата автоматски оди на избори во оваа фаза нема уставна поддршка. Уставот предвидува нови избори само откако ќе се конституира Собранието и ќе се исполни една од уставните околности наведени за негово распуштање“, додаде Черкини.
Според Черкини, кандидатката на Движењето Самоопределување за претседател на Парламентот, Аљбуљена Хаџија, може повторно да биде номинирана за претседател на Парламентот.
„Сепак, ова мора да се направи почитувајќи ги ограничувањата и упатствата што веќе се утврдени со последната пресуда на Уставниот суд,“, рече тој.
Како почна политичката криза?
Конститутивната седница започна на 15 април. Сепак, таа сè уште не е завршена поради несогласувања меѓу политичките партии во врска со начинот на гласање за претседател на Парламентот.
Откако кандидатката на Движењето Самоопределување за претседател, Аљбуљена Хаџија, не беше избрана на шест отворени гласања, претседателот на конститутивната седница, Авни Дехари, го смени дневниот ред на 1 мај.
Потоа тој побара од Демократската партија на Косово (ДПК), Демократскиот сојуз на Косово (ДСК), Алијансата за иднината на Косово и Српската листа да номинираат по еден член за комисијата што ќе го надгледува тајното гласање за претседател. На ова се спротивставија партиите што беа во опозиција во претходниот мандат, кои одбија да номинираат член за оваа комисија.
Првично, Алијансата за иднината на Косово поднесе жалба до Уставниот суд поради застојот. Судот одговори на 26 јуни, велејќи дека гласањето треба да се одржи во согласност со минатите практики. Тој им даде на пратениците 30 дена да го завршат процесот на конституирање, но овој рок беше игнориран.
Во меѓувреме, ДПК и ДСК поднесоа одделни тужби во врска со гласањето за претседател на парламентот.
Уставниот суд воведе привремена мерка од 27 јуни до 8 август, со која им забранува на пратениците да донесуваат одлуки и да дејствуваат во врска со конституирањето на Собранието.
Потоа, на 8 август, тој објави одлука за двете поднесени тужби - а целосната пресуда беше објавена на 18 август - во која Уставниот суд изјави дека промената на дневниот ред е прекршување на законот, обврзувајќи го Собранието да се врати на отворено гласање.
Ниту една партија не освои доволно гласови за самостојно да формира мнозинство, ниту пак беше постигнат политички договор.
Движењето Самоопределување на актуелниот премиер Албин Курти освои 48 места на изборите на 9 февруари, а другите парламентарни партии одбија да гласаат за својот кандидат за претседател на Собранието, чија номинација бара најмалку 61 глас.
Иако Самоопределување инсистира дека Аљбулхена Хаџиу е достоен кандидат, некои од најголемите парламентарни партии, како што се ДПК, ДСК и АБК, ја исклучуваат како личност која „предизвикува раздор“.
На изборите, ДПК беше втора со 24 места, ДСК трета со 20, по што следуваа Српска листа - најголемата српска партија во Косово - со 9, и коалицијата на АБК и Социјалдемократската иницијатива, со 8 гласа. Уште 11 места ги држат малцинствата.
По разговорите во Вашингтон, Русија спроведе масовни воздушни напади врз Украина
Руската армија во раните утрински часови на 19 август изврши една од најголемите воздушни офанзиви овој месец, користејќи 270 дронови и 10 ракети, соопштија Украинските воздухопловни сили.
Од нив биле соборени 230 дронови и шест ракети. Сепак, удари биле регистрирани на 16 локации со четири ракети и околу 40 дронови.
Локалните власти соопштија дека централниот украински град Кременчук бил сериозно погоден, оставајќи стотици корисници во Полтавска област без електрична енергија.
„Токму во моментот кога Путин му зборуваше на Трамп по телефон дека сака мир, неговата армија започна нов масовен напад врз Кременчук. Светот повторно виде дека Путин не сака мир – тој сака уништување на Украина“, изјави градоначалникот Виталиј Малецки.
Гувернерот на Полтавска област, Володимир Когут, потврди дека биле погодени административни згради на еден локален енергетски објект и дека околу 1500 домаќинства и 119 деловни објекти останале без струја.
Русија, пак, соопшти дека украински дронови предизвикале пожари во нафтена рафинерија и на покрив на болница во Волгоградска област.
Од почетокот на војната, и Киев и Москва редовно напаѓаат клучна инфраструктура на другата страна.
Андоновски најави модернизиран електронски систем за управување со документи
Целосно редизајниран и модернизиран ќе биде електронскиот систем за управување со документи еДМС, нaјави министерот за дигитална трансформација Стефан Андоновски. Системот, нагласи тој е клучен за дигиталната администрација и функционирањето на јавната управа, а според најавите од 1 октомври 2025 година, министерството целосно ќе ги исфрли хартиените документи од своето работење.
Досега системот бил користен само од 20 институции, а се покажал нестабилен, несоодветен и без соодветна техничка поддршка и сајбер безбедносни стандарди.
„Станува збор за прескап, но дисфункционален систем кој се користи во само 20 институции. Во последните две години немало техничка поддршка, одржување или развој. Не постоеле стандарди за сајбер безбедност и никој не се грижел за безбедноста на системот. Честите прекини и падови го правеле системот нестабилен. Тој се користел исклучиво како електронска писарница, без примена на архивирање или дигитална обработка на документи“, појасни Андоновски.
Одговорноста за системот ја презема министерството за дигитална трансформација, а една од мерките кои ги спровело е донесување нов закон за архивско работење по европски стандарди и спроведување тестови за безбедност.
Целта е до крајот на годината, еДМС да биде целосно функционален, безбеден и интегриран систем, со автоматизирана обработка на документи и можност за следење на предмети во реално време.
Планираме, рече Андоновски, и вклучување на нови институции, министерства, агенции и јавни претпријатија и дека во моментот има најави од пет нови.
Нагласи дека на граѓаните ќе им биде овозможено да го следат статусот на своите предмети во реално време и дека системот ќе обезбеди целосна електронска обработка, автоматизирано создавање решенија, известувања и сертификати со електронски потписи и печати.
За државата, ова ќе значи усогласување со стандардите на ЕУ и реформската агенда, која предвидува воведување единствен систем за управување со документи во сите државни институции до 2028 година, согласно законот за архивско работење.
Иако националниот портал за е-услуги нуди над 300 дигитални услуги, искуствата на граѓаните и натаму покажуваат дека патот до документите често вклучува многу чекање, двојни процедури и враќање на шалтерите. Проблем е и ниската дигитална писменост во администрацијата, но и на населението, покажуваат истражувањата на невладиниот сектор.
Сѐ уште активен еден крак на пожарот во ловиштето Јасен
Директорот на Дирекцијата за заштита и спасување (ДЗС) Стојанче Ангелов информира дека се уште е активен еден крак на пожарот во ловиштето Јасен.
„За жал пожарот во ловиштето Јасен се уште не е изгаснат. Еден крак е се уште активен. Дождот што заврна во многу мала количина не го изгасна огнот. Овде дејствуваме со два „ер трактори“ на Дирекцијата за заштита и спасување бидејќи можам да забележам една жешка точка и горе високо над сртот, и од спротивната страна две жешки точки со чадење“, изјави Ангелов.
Ангелов појасни дека се работи за екстремно стрмен терен и еден со зимзелена шума кадешто е исклучително ризично да се спуштат луѓе.
„Нашиот фокус ќе биде со два „ер трактори“ коишто со полицискиот хеликоптер да дејствуваме на оваа точка. Ќе дадеме се од себе во текот на денешниот ден да го ставиме под целосна контрола и овој преостанат крак од пожарот, но веќе гледам дека горењето се засилува што само по себе подразбира дека во попладневните часови ќе имаме посилен оган“, додаде Ангелов.
Поради пожар во националниот Парк Јасен, регионалниот пат Р1106 Македонски Брод - Скопје се уште останува затворен за секаков вид на возила.
Поради честите пожари летово, на територијата на цела држава е прогласена кризна состојба, која Владата на седница на 7 август ја продолжи за нови 30 дена.
За да се зајакнат капацитетите во справување со пожарите, Дирекцијата за заштита и спасување преку општините потпиша договори со 352 граѓани што се пријавија на неодамнешниот повик за обука на пожарникари.
Блокада на судот во Нови Сад, полицијата уапси опозициски пратеник
Полицијата го уапси опозицискиот член на Движењето на слободни граѓани во Собранието на Војводина, Радивој Јововиќ, додека студентите во блокадата на факултетот на Универзитетот во Нови Сад и граѓаните ја блокираат судската зграда во тој град од раните утрински часови на 19 август.
Јововиќ беше приведен пред еден од страничните влезови, додека полициските сили го опколија судот.
Пратеникот Јововиќ претходно го спречи обвинителот Слободан Јосимовиќ да влезе во судската зграда. Станува збор за обвинителот ангажиран во случајот со падот на настрешницата на железничката станица, кој го води Вишото јавно обвинителство во Нови Сад.
За тој случај, во Белград и Нови Сад се водат неколку паралелни постапки, а поради падот на настрешницата и смртта на 16 лица во Србија, антивладините протести предводени од студенти во блокадата траат повеќе од девет месеци.
Студентите и граѓаните во Нови Сад, на протестот на 19 август, бараат итно ослободување на сите оние кои беа „приведени без докази“ за учество во антивладини протести, а против кои беа поднесени кривични и прекршочни пријави.
„Вклучувајќи обвинувања за напад врз службено лице, насилно однесување, нарушување на јавниот ред и мир, па дури и обид за тешко убиство“, изјавија студентите кои ги блокираа факултетите во Нови Сад.
Според репортерот на Радио Слободна Европа, сите влезови во судската зграда се блокирани, додека група вработени стои пред нив.
Во судската зграда и на задниот службен влез, полицијата е присутна во опрема за разбивање на демонстрациите, а кратко по почетокот на протестот, пристигнаа поголем број полицајци.
Повеќе од десетина припадници на Интервентната единица на полицијата се сместија на еден од страничните влезови и повремено пуштаа дел од вработените да поминат.
Претходно, тие ги потиснаа дел од демонстрантите кои стоеја на тој влез.
Студентите кои повикаа на протестот најавија дека блокадата ќе продолжи сè додека не бидат ослободени сите притворени демонстранти.
Тие ја најавија блокадата како „чин на отпор против неоснованите апсења и законското насилство што се спроведува овие денови“ врз нивните колеги и пријатели.
Тие истакнуваат дека досега им е одредена мерка притвор од 30 дена на нивните 12 „другари“ во Нови Сад.
Во Србија, веќе една недела се организираат антивладини протести, за време на кои избувнаа инциденти.
Меѓу уапсените се, меѓу другите, шест лица за кои постои сомневање дека се осомничени за нападот врз членовите на единицата „Кобра“ за време на протестот во тој град на 13 август.
Во понеделник, на 18 август, Вишиот суд во Нови Сад им одреди 30 дена притвор на петмина, додека на шестиот осомничен му беше одреден куќен притвор од, како што е наведено, здравствени причини.
На протестот на 13 август, припадник на единицата „Кобра“, поручникот на српската армија Владимир Бркушанин, пукал во воздух за време на судир меѓу демонстрантите и активистите на владејачката Српска напредна партија (СНС).
Бркушанин еден ден подоцна изјави дека бил принуден да го стори тоа за да се заштити себеси и своите колеги.
Во тоа време, се обрати шефот на Воената безбедносна агенција (ВБА), Ѓуро Јованиќ, кој рече дека за време на немирите во Нови Сад, седум членови на „Кобра“ биле повредени, од кои четворица сериозно.
Министерот за одбрана Братислав Гашиќ на 14 август објави дека тие се во Нови Сад на официјална мисија „да го обезбедат заштитеното лице во согласност со законот“. Тој не кажа кого штителе членовите на „Кобра“ во таа пригода.
Три дена по инцидентот на протестот, во сабота, 16 јуни, полицијата уапси шест осомничени за нападот врз членовите на „Кобра“.
Во текот на изминатата недела, во Србија секојдневно се организираат антивладини протести, за време на кои избувнаа инциденти - судири меѓу демонстрантите и поддржувачите на владата, како и со полицијата.
Некои од најжестоките конфликти се случија токму во Нови Сад.
Вучиќ ги обиколи демолираните простории на неговата партија за време на протестот во Белград
За време на антивладиниот протест во понеделник во Белград, жандармеријата интервенираше со солзавец, потиснувајќи ги демонстрантите откако некои маскирани лица фрлаа камења врз просториите на владејачката Српска напредна партија (СНС) на улицата Цвијиќева.
Антивладини протести се одржаа во неколку градови во Србија седма ноќ како реакција на третманот на полицијата кон демонстрантите кои бараат одговорност за смртта на 16 лица при падот на кров на Железничката станица во Нови Сад на 1 ноември 2024 година.
Претседателот на Србија, Александар Вучиќ, кој доаѓа од СНС, рече дека „ќе ја ослободиме земјата од овој терор и зло“ за време на обиколката на вандализираните простории на наредникот.
„Ќе гониме многу повеќе, многу побрзо, многу посилно. Нема да бараме никого однадвор, ниту ќе бараме дозвола“, додаде тој.
Вучиќ ја повтори својата проценка, без да даде никакви детали или докази, дека постои обид за „обоена револуција“, како што властите ги нарекуваат антивладините демонстрации од претходните девет и пол месеци по падот на настрешницата во Нови Сад.
Одговарајќи на прашање од руски новинари, Вучиќ рече дека обидот за „обоена револуција“ бил организиран и платен надвор од земјата, додавајќи дека руското Министерство за надворешни работи „правилно заклучило дека станува збор за обид за обоена револуција“.
Претходно, пред просториите имаше мала група поддржувачи на владата, кои скандираа „Ацо, Србине“ во поддршка на Вучиќ.
Протестите се одржаа на две локации во Белград, собирите започнаа во Нов Белград и во центарот на градот во близина на Споменикот на Волкот, од каде што започнаа протестните прошетки.
На собраните во Нов Белград им се придружија граѓани на белградската општина Земун за да одат до Бранков мост, кој го поврзува Нов Белград со стариот дел од градот, а потоа се вратија во Земун, со што заврши протестот.
„Во текот на вечерта, некои пратеници и министри на Српската напредна партија дојдоа во српското Собрание за да ги поддржат студентите кои сакаат да студираат“, објави министерот за финансии Синиша Мали.
Пред српското Собрание имаше десетина бели шатори со поддржувачи на СНС, додека во паркот Пионирски имаше членови на здружението „Студент 2.0“ кои се нарекуваат себеси „студенти кои сакаат да учат“.
Протести во неколку градови низ Србија
Протести се одржаа и во Крагуевац, Пожега, Сремска Митровица, Нови Пазар, Србобран, Пожаревац и други градови.
Студентите и граѓаните на Нови Пазар го блокираа главниот пат што води низ овој град кон Црна Гора како знак на поддршка и солидарност со граѓаните кои беа претепани и уапсени за време на протестите во други градови, објави Бета.
Минатонеделните протести беа обележани со судири меѓу полицијата и поддржувачите на владејачката СНС со демонстрантите.
Секојдневните собири на демонстрантите се реакција на протестите во градовите Врбас и Бачка Паланка во Војводина на 12 август, кога поддржувачите на владата ги нападнаа демонстрантите со пиротехнички средства.
Немирите беа предизвикани и од постапките на полицијата тој ден, која демонстрантите ја обвинија дека не презема ништо за да ги спречи нападите.
Повредените од пожарот во Кочани повторно ќе добијат компресивна облека обезбедена со донации
Граѓанската иницијатива Сапорт Кочани повторно обезбеди специјализирана компресивна облека наменети за лицата кои преживеаја во пожарот во дискотеката „Пулс“ во Кочани.
Иницијативата соопшти дека се работи за 176 парчиња облека, вредна 2.193.047 денари, средства кои се целосно обезбедени исклучиво преку донации од граѓани, компании и поддржувачи од земјата и дијаспората.
Со ова, вкупната вредност на досегашните три испораки надминува 3,4 милиони денари – велат од Сапорт Кочани.
-Со оваа пратка се опфатени втората тура на нарачки од првите две групи корисници на компресивна облека. Во оваа донација вкупно се обезбедени 176 парчиња, изработени по индивидуални мерки за секој од засегнатите лица. Благодарение на секој поединец, компанија и пријател кој се вклучи со своја донација, успеавме да ја обезбедиме оваа донација, порачуваат од Граѓанската иницијатива Сапорт Кочани.
Оттаму додаваат дека облеката е веќе предадена на Општата болница во Кочани, со цел да се овозможи правилна рехабилитација и побрзо заздравување.
Пожарот во дискотеката „Пулс“, беше кобен за 62 лица, а околу 200 беа повредени.
Вкупно 13 кандидати се пријавиле за претседател на Антикорупциската комисија
Заврши рокот за пријавување за претседател на Државната комисија за спречување на корупцијата (ДКСК) – соопштија денеска (18 август) од собраниската прес служба, додавајќи дека се пријавиле вкупно 13 кандидати.
-Со оглед на тоа што постапката е прекината, прекината е и административната селекција. Имињата ќе бидат познати откако ќе заврши процесот на административна селекција на пријавените кандидати. Засега може да го потврдиме само вкупниот број на пријавите, велат од Собранието.
До 15 август, кога заврши рокот, десетина кандидатури биле пристигнати до Собранието за јавниот оглас за претседател на Државната комисија за спречување на корупција (ДКСК).
Претседателот на Комисијата за прашања на избори и именувања, Ѓорѓија Сајкоски тогаш посочи дека конечната бројка би се знаела денеска откако ќе пристигнат и оние што се пратени по пошта. Нагласи дека постапката по овој оглас ќе продолжи по 3 ноември, односно по завршување на локалните избори – пренесе новинската агенција МИА.
Во средата пак, на 13 август, собраниската Комисија за прашања на изборите и именувањата одржа седница на која ја формираше Комисијата за селекција на кандидати за претседател на ДКСК.
Како членови на ова тело беа избрани заменикот народен правобранител Илбер Руфати, двајца претставници на здруженија кои се дел од советите за соработка на Владата и граѓанскиот сектор – Дарко Аврамовски и Бардил Јашари, како и четворица пратеници – Бојан Стојаноски од ВМРО-ДПМНЕ, Саранда Имери Стафаи од ВРЕДИ, Митко Трајчулески од СДСМ и Арбана Пашоли од Европскиот фронт.
Членовите на Комисијата за селекција се овластуваат да вршат обработка на личните податоци, при што се должни да обезбедат тајност и заштита на податоците согласно Законот за заштита на лични податоци, за што до Комисијата за прашања на изборите и именувањата ќе достават изјави.
Собранието на 1 август донесе Одлука за објавување на јавен оглас за избор на претседател на ДКСК, откако сега веќе поранешната претседателка, Татјана Димитровска поднесе оставка.
Нејзината оставка следуваше по обвинувањата на Обвинителството за гонење организиран криминал и обвиненијата за две кривични дела и тоа за оддавање службена тајна на поранешниот директор на ТЕЦ Неготино Небојша Стојановиќ, обвинет во „Адитив“, и за компјутерски фалсификат затоа што ревизор од ДЗР во нејзино име и го положил тестот за сертификат за државна тајна.
Иницијативата „Шанса за Центар“ продолжува со собирањето потписи за формирање партија во пресрет на изборите
Граѓанската иницијатива Шанса за Центар сепак ќе продолжи со собирањето потписи за да ја основа политичката платформа „Независни заедно“.
Одлуката следува иако Државната изборна комисија го донесе новиот Правилник со кој на независните кандидати за советници и градоначалници ќе им бидат потребни само два потписи за учество на претстојните локални избори.
И покрај ова, Иницијативата „Шанса за Центар“ ќе продолжи да собира потписи за да прерасне во партија бидејќи како што велат оттаму „овој Правилник ќе важи сами за овие избори“.
-Не сакаме повеќе неизвесност „пет до дванаесет“. Ќе продолжи примената на членот од законот според кој независните групи ќе бидат претставени само со имињата на носителите на листите, наместо со називот на групата, односно ќе стои „група избирачи“ и името и презимето на носителот на листата. Ова отвора можност да се појават слични имиња со цел да се создаде забуна кај гласачите. Пример: Билјана Ивановска и Биљана Ивановска. Ова веќе се случувало на претходни избори – објавија од оваа Иницијатива на социјалната мрежа Фејсбук денеска (18 август).
Од „Шанса за Центар“ обвинуваат и за нерамноправност:
-Постои можност наместо јасна листа за гласање, да добиеме тетратка со голем број имиња, каде партиите ќе бидат најгоре, а под нив ќе следат долги списоци со имиња – се додава во нивната денешна објава.
Минатата недела, оваа Иницијатива заедно со иницијативите „Зелените за Гази Баба“ и „Групација 398“ застанаа зад кандидатурата на Билјана Ивановска за градоначалничка на Општина Центар.
Ивановска, која беше претседателка на Антикорупциската комисија од 2019 до 2024 година, во изјава за медиумите посочи дека нема да дозволи „детални урбанистички планови кои не се усогласени со Генералниот урбанистички план“.
Собирањето потписи продолжува иако Државната изборна комисија (ДИК) вчера го усвои новиот Правилник за регулирање на постапка за собирање потписи за поддршка на кандидатски листи поднесени од група избирачи и за начинот на определување на нотарите за локалните избори 2025 година.
Првиот круг од изборите е закажан за 19 октомври, а вториот за 2 ноември.
Мултимедија
Најпосетени
Што треба да знаете