Вести
Нема неправилности во работењето, велат од Стоматолошката комора по сомнежите за пропусти во лиценците
Имавме неколку контроли и не беа констатирани неправилности - изјави денеска (11 август), претседателот на Стоматолошката комора, Маријан Денковски.
Тој се обрати на прес конференција откако министерот за здравство, Азир Алиу во саботата информираше дека Министерството за здравство ги презема надлежностите за лиценцирање на Стоматолошката комора.
- Прво, бидејќи јавните овластувања согласно Законот за здравствена заштита, член 262, се многу широк поим и за поголемиот дел од страна на комисијата формирана од министерот за здравство воопшто нема ни вршено надзор, ниту пак која било комисија или кој било министер се имаат произнесено на кој било начин, Комора не може да знае зошто и во кој обем е т.н. времено одземање до исправање на неправилностите, односно да ги цитираме неговите зборови „до стишување на работите во Комората" - истакна Денковски.
Тој посочи и дека минатата недела имале интензивна комуникација со министерот за здравство, Алиу.
„Заклучокот беше дека, доколку има неправилности, Комората секако ќе ги вложи сите напори да се исправат“, додаде Денковски.
На денешната прес конференција, од Комората информираа дека во меѓувреме, за нивното работење се направени неколку надзори и контроли од страна на Министерството за здравство, ДСЗИ, Управа за јавни приходи, разни државни инспекторати и агенции.
Оттука, „согласно записниците од направените надзори и контроли кои ги поседува Комората, нема утврдени неправилности во кој било сегмент во работењето на Комората, па ниту во делот на јавните овластувања кои се доделени со закон“, наведоа од Комората.
Средби и со Лекарската комора
Денковски ги демантираше наводите дека на Комората ѝ биле дадени насоки од министер, а дека таа не постапила.
-Информираме дека нема вистина во тоа и не е точно дека Комората не постапила, изјави тој на прес конференцијата и најави дека ќе ги повика на разговор и консултација претходните претседатели.
- За да го слушнеме и нивното мислење, зошто по она што знаеме засега, се работи за некои „незаконски" постапки на Комората уште од 2016 година, па дури и порано, односно од 2006 година – рече Денковски.
Тој информираше дека ќе има средба и со Лекарската комора.
-Ако кај нас, во стоматологија, т.н. „незаконска" едукација вршеле околу 15-ина, како што беа наречени, нерегистрирани здруженија, во Лекарската комора, во системот на Континуирана медицинска едукација учествуваат или учествувале над 80 такви здруженија - меѓу кои доминираат членки на Македонско лекарско друштво, истакнаа од Комората.
Понатаму, посочија и дека планирааат свикувања на вонредни седници на Извршниот одбор и на Собранието на Комората.
- Сите ние во Комората сме спремни на сите последици доколку имаме згрешено, но исто така доколку се потврди дека Комората нема финасиски или други криминали, сосема реално е да бараме и очекуваме јавно извинување до целокупната македонска јавност и целокупното членство на Комората – истакнаа претставниците на Стоматолошката комора.
Реакција на Министерството за здравство
По нивната прес конференција, од Министерството за здравство се огласија преку писмено соопштение во кое наведуваат дека „одлуката е донесена врз основа на факти“.
-Потсетуваме дека на овој процес претходеше времена мерка изречена од Уставен суд, а потоа и конечна одлука од истата институција со која се запира извршувањето на поединечните акти и дејствија, а дополнително покрај времената мерка, Комората продолжила со континуираната едукација. Паралелно, во прилог на оваа одлука е и извештајот од Државната комисија за спречување на корупција, пишува во соопштението.
Министерството за здравство, како што се додава, за оваа цел имаше формирано две комисии за надзор над законитоста на работата на Комората и „во двата случаи се констатирани неправилности на кои е укажано со законски рок за отстранување на истите, но, во законските рокови не е постапено од страна на Стоматолошката комора“.
- Потенцираме дека по извршениот надзор на првата комисија, формирана во 2024 година, воопшто не е постапено по препораките, односно во целост се неточни тврдењата дека комисиите „немаат утврдени неправилности во кој било сегмент од работењето во Комората“, додека втората комисија веќе дава јасни насоки до МЗ за утврдените неправилности, недостатоци и предлог за дејствија што треба да се преземат, истакнуваат од Министерството за здравство.
Претходно, во саботата министерот Алиу соопшти дека Министерството за здравство ги презема надлежностите за лиценцирање на Стоматолошката комора.
Тој тогаш изјави дека „одземањето на надлежностите, односно на јавното овластување на Стоматолошката комора се сѐ додека не се воспостави систем преку кој Комората ќе работи законито, транспарентно и професионално“.
види ги сите денешни вести
Судир меѓу полицијата и демонстрантите пред судот во Нови Пазар
Дел од студентите на Државниот универзитет во Нови Пазар (ДУНП) и граѓани се обидоа да ги блокираат влезовите во зградата на правосудните органи во вторник наутро, а во еден момент дојде до конфликт меѓу насобраните и полицијата.
Во таа прилика неколку граѓани и студенти добија полесни повреди, јавува агенцијата Бета.
Демонстрантите се собраа пред почетокот на работното време, обидувајќи се да ги спречат вработените да влезат во зградата, пред која беа припадници на полицијата.
Во еден момент, кога дојде до судир, полицијата им дозволи на вработените да влезат низ спореден влез. Потоа, пред зградата беше формиран полициски кордон.
Учесниците на протестот се собраа на покана на студентите што го блокираа ДУНП.
Тие бараат ослободување на двајца млади мажи кои се уапсени под сомнение за наводен напад врз полицијата за време на протестот пред Државниот универзитет во Нови Пазар на 29 јули.
Според неофицијални информации, во тек е одлука за укинување на притворот.
Тие беа уапсени со уште осум други мажи кои оттогаш се пуштени да се бранат од слобода.
Во ноќта помеѓу 27 и 28 јули, група маскирани мажи насилно ги избркале студентите што го блокираа Државниот универзитет во Нови Пазар (ДУНП). Тие беа придружувани од ректоката Зана Доличанин.
По ова следуваше протест на стотици студенти и граѓани, а имаше и судири со полицијата и апсења.
Трамп ја продолжи суспензијата на царините за кинески производи за уште 90 дена
Американскиот претседател Доналд Трамп потпиша извршна наредба со која се продолжува примирјето во трговската војна со Кина за дополнителни 90 дена, објави функционер на Белата куќа.
Наредбата дојде откако Трамп даде нејасен одговор на прашањето на новинар дали ќе ги продолжи пониските царини еден ден откако го повика Пекинг четирикратно да ги зголеми своите нарачки на американска соја.
Примирјето во трговската војна меѓу Пекинг и Вашингтон требаше да истече една минута по полноќ по локално време во вторник(12 август).
Наредбата спречува американските царини за кинескиот увоз да се зголемат на 145 проценти, што би ги зголемило кинеските царини за американските стоки на 125 проценти, што ефикасно би довело до трговско ембарго.
„Ќе видиме што ќе се случи. Тие се однесуваат доста пристојно. Имам многу добри односи со кинескиот претседател Си Џинпинг“, рече Трамп на прес-конференција кога новинарите го прашаа дали има намера да го продолжи рокот.
Во моментов има царини од 30 проценти за увоз од Кина, вклучувајќи основна стапка од 10 проценти и 20 проценти за фентанил, што Вашингтон го воведе во февруари и март.
Кина одговори со деескалација, односно со намалување на царините за увоз од Соединетите Држави на 10 проценти.
САД ја прогласија Ослободителната армија на Балучистан за терористичка организација
Соединетите Држави ја означија пакистанската сепаратистичка Ослободителна армија на Балучистан (БЛА) за странска терористичка организација, соопшти Стејт департментот.
„Денешната акција преземена од Стејт департментот ја покажува посветеноста на администрацијата на Доналд Трамп во борбата против тероризмот“, се вели во соопштението на Стејт департментот.
БЛА е најмоќната од голем број бунтовнички групи кои долго време дејствуваат во регионот што се граничи со Авганистан и Иран, кој е богат со минерали и дом на кинески инвестиции во пристаништето Гвадар и други проекти.
„БЛА неодамна ја презеде одговорноста за киднапирањето на пакистанскиот воз Џафар Експрес од Квета до Пешавар во март, при што загинаа 31 цивил и безбедносни сили и беа земени повеќе од 300 патници како заложници“, изјави американскиот државен секретар Марко Рубио во соопштението.
Со означувањето на БЛА како странска терористичка организација, САД воведуваат ограничувања за финансиска помош и друга поддршка за групата.
Националистите и сепаратистичките групи во Балучистан сè уште не се изјаснија за оваа одлука на Вашингтон.
Бунтовите во Балучистан траат со години, а за нив најчесто се обвинуваат групи како Ослободителната армија на Балучистан. Оваа покраина е исто така област на активност на милитантите поврзани со пакистанските талибанци.
Сепаратистите во Балучистан се спротиставуваат на експлоатацијата на природните ресурси од страна на пакистанските и странските компании и ги нападнаа пакистанските безбедносни сили и кинеските државјани кои работат на проекти вредни повеќе милијарди долари поврзани со економскиот коридор меѓу Кина и Пакистан.
Почнува полагањето државна матура во августовскиот рок
Матурантите кои не ја положија државната матура во јуни денеска (12 август) ќе го полагаат првиот, задолжителен екстерен испит - мајчин јазик и литература. На 14 август (четврток), пак, е полагањето на вториот, изборен екстерен испит од државната матура во августовската испитна сесија.
Според податоците на Државниот испитен центар (ДИЦ), за двата испитни дена вкупно се пријавени 1118 ученици.
Според видот на образование, од гимназиско ќе полагаат 265 ученици, средно стручно – 835 и 18 матуранти од средно уметничко образование. Испитите во августовскиот рок кандидатите ќе ги полагаат во простории на факултетите.
МОН и ДИЦ минатата недела ги соопштија резултатите од спроведената државна матура во јуни кои се подобри од минатата учебна година.
Посечната оценка на успехот од полагањето на двата екстерни испита во јунската сесија е 3.69 и е повисок од минатата година кога средната оценка беше 3.26. Поголем успех е забележан кај мајчините јазици и кај други предмети, а особено по математика за кој средната оценка е 4.14.
Пријавени за полагање во јунскиот рок беа 15 004 ученици.
Поради обиди за препишување, употреба на електронски уреди и други неправилности, поништени биле тестовите на 172 ученици и тие ќе може повторно да полагаат во августовскиот испитен рок.
Косово, Албанија и Хрватска планираат заедничко купување американско оружје
Косово, Албанија и Хрватска работат на спроведување на соработката во областа на одбраната, за која се согласија пред околу пет месеци, кога министрите за одбрана потпишаа заедничка декларација на 18 март во Тирана.
Министерствата за одбрана на Косово и Албанија потврдија за Радио Слободна Европа дека експертските групи работат на план за спроведување на декларацијата.
Вршителот на должноста министер за одбрана на Косово, Ејуп Македончи, изјави дека на 18 јули во Тирана се одржал состанок на групата за имплементација „за да се разработи план на оперативно ниво“.
Министерството за одбрана на Албанија, кое беше домаќин на церемонијата на потпишување на договорот, објави дека во септември оваа година, водичот, кој е во завршна фаза на развој, ќе им биде презентиран на министерствата на Албанија, Косово и Хрватска за одобрување.
Во декларацијата потпишана од вршителот на должноста министер за одбрана на Косово Ејуп Македончи, министерот за одбрана на Албанија Пиро Венгу и министерот за одбрана на Хрватска Иван Анушиќ, беа утврдени четири точки на соработка:
Промоција на одбранбените капацитети и соработка во релевантната индустрија;
Зголемување на интероперабилноста преку образование, обука и воени вежби;
Одговор на хибридни закани и зајакнување на отпорноста;
Целосна поддршка за евроатлантската интеграција.
Во текстот на декларацијата се наведува дека оваа соработка е насочена кон обезбедување добри позиции за соочување со заканите и постигнување цели во областа на одбраната и безбедноста.
Заедничко набавување на оружје
Купувањето на одбранбени капацитети е првата обврска од декларацијата на која се обврзаа министрите за одбрана.
Во овој контекст, според Македончи, целта е да се направи една единствена нарачка, наместо три одделни нарачки од секоја земја.
„На пример, системот [на оружје] што трите земји сакаат да го купат од САД, да го нарачаме како една набавка, користејќи го законодавството на секоја земја, но количината и времето на испорака да бидат заеднички. Бидејќи кога се купува поголема количина од САД, цената е пониска, а испораката е побрза“, изјави Македончи за Радио Слободна Европа.
Планирано е овие набавки да бидат финансирани од националните буџети на секоја земја.
Македончи очекува дека државите партнери во овој договор ќе му помогнат на Косово на неговиот пат кон евроатлантската интеграција, особено во врска со членството на Косово во програмата на НАТО Партнерство за мир.
Пред неколку месеци, хрватската влада изјави за Радио Слободна Европа дека на оваа иницијатива можат да се приклучат сите земји кои сакаат да ги поддржат Косово и Албанија на нивниот европски и евроатлантски пат
Досега не е официјално објавено дали друга земја ќе се приклучи на оваа соработка.
Според хрватската влада, целта на соработката не е создавање воен сојуз.
„Таков сојуз - освен членството во НАТО - дури и не е потребен“, изјави хрватската влада во март оваа година.
Вршителот на должноста министер за одбрана на Косово, Ејуп Македончи, вели дека ќе го искористи следниот состанок во рамките на Американско-јадранската повелба (А5), кој се очекува во октомври оваа година, за да ги покани регионалните партнери да се приклучат на иницијативата.
Членки на Американско-јадранската повелба се Албанија, Хрватска, Северна Македонија, Црна Гора и Босна и Херцеговина, додека Косово има статус на набљудувач.
Очекувања од договорот
Покрај соработката во областа на воената индустрија, државите планираат да спроведат билатерални и трилатерални воени вежби, како и да соработуваат во регрутирањето персонал, а воедно да ги зголемат можностите за образование преку воените академии и колеџи.
Се очекува заеднички ангажман и во борбата против хибридните закани, вклучувајќи ги сајбер заканите, кампањите со дезинформации, како и злонамерното странско влијание што може да ја загрози или да влијае на националната и регионалната безбедност.
Предвидено е меѓу земјите-партнери во рамките на овој договор да се разменуваат информации и разузнавачки податоци со цел да се спречат заеднички предизвици.
Македончи наведува дека овој договор бил поздравен во Пентагон, за време на неговата посета на Соединетите Американски Држави во јуни оваа година.
„Тие го сметаа тоа за добра можност за регионална соработка во соочувањето со предизвиците“, рече тој, додавајќи дека добиле поддршка и од неколку членки на НАТО, без да прецизира за кои земји станува збор.
Сепак, на оваа соработка се спротивстави Србија, чиј претседател Александар Вучиќ изјави дека ова го крши таканаречениот субрегионален договор од 1996 година.
Овој договор, кој се однесува на дозволените квоти за оружје, потоа го потпишаа двата ентитета на Босна и Херцеговина - Федерацијата на Босна и Херцеговина и Република Српска - како и Хрватска и Сојузна Република Југославија, која ја сочинуваа Србија и Црна Гора.
Неколку дена по потпишувањето на декларацијата за соработка во областа на одбраната, меѓу Косово, Албанија и Хрватска, Србија и Унгарија потпишаа документ во кој се конкретизира стратешкиот договор за одбранбена соработка постигнат во 2023 година.
Вучиќ тогаш изјави дека верува оти овој договор ќе доведе до понатамошно приближување кон создавање воен сојуз меѓу Србија и Унгарија.
Трамп бара „конструктивни“ разговори со Путин, додека ЕУ инсистира на вклучување на Зеленски
Американскиот претседател, Доналд Трамп изјави дека очекува „конструктивен разговор“ со рускиот претседател, Владимир Путин за прекин на војната во Украина, додека Брисел се обидува да ја обезбеди улогата на Киев на самитот.
„Ќе му кажам: ’Мораш да ја завршиш оваа војна’“, истакна Трамп на конференцијата за новинарите во Белата куќа, прашан за неговиот состанок со Путин на 15. август на Алјаска додавајќи дека би сакал да види брз прекин на огнот во судирот кој трае повеќе од три години.
Истовремено, министрите за надворешни работи на ЕУ одржаа видео конференција со украинскиот министер за надворешни работи, Андриј Сибиха. Тој предупреди дека самитот на Алјаска би можел да претставува дипломатска „замка“, која Русија би можела да ја искористи за да избегне одговорност за војната.
Разговарајќи со новинарите денеска (11 август), Трамп повтори дека потенцијалниот договор меѓу Украина и Русија би можел да вклучува „размена на територии“.
„Можеби ќе отидам и само ќе кажам ‘среќно’. И тоа ќе биде крај“, изјави тој.
Трамп понатаму посочи дека веднаш по состанокот ќе го повика украинскиот претседател, Володомир Зеленски, но и другите европски лидери сугерирајќи дека веднаш ќе биде јасно дали постојат некакви изгледи за крај на војната.
Тој додаде дека САД не одлучуваат за самиот потенцијал на мировниот договор и го опиша состанокот на Зеленски и Путин како клучен за решавање на судирот:
„Следниот состанок ќе биде со Зеленски и Путин, или Зеленски и Путин со мене. Ќе бидам таму ако им требам“.
Еден ден претходно, по бројните повици на Зеленски до европските престолнини, Брисел ја потврди својата позиција, повикувајќи го Трамп да изврши поголем притисок врз Русија.
„Патот кон мирот во Украина не може да се одлучи без Украина“, порачаа лидерите на Франција, Германија, Италија, Полска, Велика Британија и Финска, заедно со шефицата на Европската комисија, Урсула фон дер Лајен, во заедничка изјава на 10 август.
На прашањето дали Зеленски ќе присуствува на самитот во Алјаска, Трамп не даде јасен одговор, но рече дека е „малку вознемирен“ од коментарот на Зеленски дека за какви било територијални отстапки ќе биде потребно уставно одобрение.
„Мислам, тој има одобрение да оди во војна и да ги убие сите. Но, му треба одобрение за размена на територии?“, рече Трамп. „Русија окупираше некои важни територии, ние ќе се обидеме да вратиме дел од таа територија на Украина.“
Иако Вашингтон се чинеше дека ги подготвува Киев и Москва за големи компромиси за завршување на војната, Сибиха на конференцијата на министрите за надворешни работи на ЕУ изјави дека Путин го гледа својот состанок со Трамп како „награда и оправдување“ за руската агресија.
Претходно на 10 август, потпретседателот на САД, Џеј Ди Венс за „Фокс њуз“ изјави дека секој мировен договор веројатно ќе ги остави двете страни „незадоволни“.
„Тоа нема никого да направи среќен. И Русите и Украинците веројатно ќе бидат незадоволни од тоа на крајот на денот“, додаде тој.
Сепак, Сибиха посочи дека преговорите меѓу САД и Русија би можеле да бидат корисни за Путин.
„Тој не е миротворец, тој е уништувач на мирот. За да постигнеме вистински мир и да ги избегнеме овие стапици, мора да ги уништиме плановите и сценаријата на Путин“, им рече Сибиха на дипломатите од ЕУ.
Во своето ноќно обраќање на 10 август, Зеленски рече: „Ја разбираме намерата на Русија да се обиде да ја измами Америка - нема да го дозволиме тоа“.
Европските лидери ги поздравија напорите на Трамп да се обиде да го реши 41-месечниот воен конфликт, но ја нагласија потребата да се изврши притисок врз Москва и да се обезбедат безбедносни гаранции за Киев.
Во друго соопштение пак, кое на 10. Август го објавија западните сојузници на Киев, земјите од Нордиско-балтичката група изразија поддршка за Украина истакнувајќи дека мирот може да се постигне само со зголемување на притисокот врз Русија да ја прекине својата „нелегална“ војна.
Лидерите на Данска, Естонија, Финска, Исланд, Латвија, Литванија, Норвешка и Шведска изјавија дека „го потврдуваат принципот дека меѓународните граници не треба да се менуваат со сила“.
„Волстрит џурнал“, повикувајќи се на неименувани преговарачи, објави дека европските претставници поднеле контрапредлог на нејасниот американски план, вклучувајќи го и барањето за прекин на огнот пред да се преземат какви било други чекори и секоја размена на територија да биде реципрочна и да вклучува безбедносни гаранции.
Европските претставници му ги презентираа своите предлози на Венс за време на состанокот со украински и европски претставници во вила надвор од Лондон на 9 август, се наведува во извештајот.
Руската инвазија се претвори во најголемата копнена војна во Европа во повеќе од 50 години, уништувајќи ја Украина.
Според западните проценки, бројот на жртви во Москва, мртви и ранети, изнесува повеќе од еден милион. Се верува дека бројот на мртви во војната во Украина е повеќе од 100.000, а вкупниот број на жртви е околу 400.000.
Мицкоски по изјавата на Меџити за УЧК: Не може убиства од заседа да се праведна борба
Не може да биде разумна и праведна војната во која кукавички, од заседа, се убиени припадници на безбедносните сили, изјави премиерот Христијан Мицкоски коментирајќи ја изјавата на неговиот коалициски партнер од ВРЕДИ, Изет Меџити дека војната на УЧК била „праведна, разумна и чиста“.
Одговарајќи на новинарски прашања, претседателот на Владата ги повика, како што рече, сите разумни политичари да се воздржат и да не се враќаат на теми што се затворени, да не ја следат политиката на поделби на ДУИ, туку да се фокусираат на теми од иднината.
„Ја слушнав таа изјава и тука апсолутно имаме различни гледишта на работите. Не може да биде разумна и праведна. Не може некој кој од заседа кукавички одземал животи и убивал припадници на министерствата за внатрешни работи и за одбрана, тоа не може да биде праведна и чесна војна, барем не во Мекедонија, не коментирам за соседството. Но, тоа се теми кои се дел од минатото, затворени со Рамковниот договор, а со последните законски измени, конкретно Законот за правична застапеност кој е во Венцијанската комсиија, тој е затворен“, изјави Мицкоски.
Тој нагласи дека во фокусот на Владата е иднината, а не минатото, и повика „разумните политичари“ да гледаат напред, а не назад.
„Нашиот фокус како Влада е иднината, тоа е она што ние сакаме да го видиме. Ова се теми затворени и јас апалирам до сите разумни политичари, да не играат на картата на ДУИ и на оние коишто сакаат да нè вратат 25 години назад. Единствената порака што доаѓа од Демократската унија за интеграција во 14-15 месеци опозиција, заедно со новите коалициски партрнери СДСМ и Левица, е токму тоа – поделба. Затоа, апелирам до сите да се воздржиме од какви било теми коишто нè враќаат назад во минатото, да гледаме кон теми во иднината“, порача Мицкоски.
Вицепремиерот и кандидат за градоначалник на општина Чаир, Изет Меџити, во објава на социјалните мрежи пред три дена истакна дека „Војната на УЧК во Косово, во Прешево и во Македонија беше праведна, разумна и чиста“, изразувајќи поддршка на протест што се одржал во Приштина организиран од Здружението на воени ветерани на паравоените УЧК и ОВК.
Протестот во Приштина се одржа „против неправдата“ што наводно ја извршил Специјализираниот совет на Косово во Хаг против поранешните водачи на ОВК и УЧК кои се обвинети за воени злосторства и злосторства против човештвото.
Еден од говорниците на протестот беше и лидерот на ДУИ, Али Ахмети.
Курти и Грвала велат дека Србија е „реална закана за безбедноста на Косово“
Вршителот на должноста премиер на Косово Албин Курти и вршителот на должноста министер за надворешни работи Доника Грвала изјавија дека Србија сè уште претставува „вистинска закана за националната безбедност на Косово“.
На Конференцијата на амбасадори - која ги собира сите косовски амбасадори од целиот свет во Приштина, Курти рече дека косовските амбасадори имаат витална улога во борбата против пропагандата, но и во промоцијата на Косово во странство.
„Напорите на Србија да го поткопа суверенитетот и територијалниот интегритет на нашата земја продолжуваат да претставуваат закана за нашата национална безбедност“, рече Курти.
Во меѓувреме, Грвала рече дека односите меѓу Косово и Србија се „предизвик“ бидејќи Србија претставува „вистинска закана за безбедноста и стабилноста на Косово“.
„Србија не само што одбива да ја признае нашата земја, туку води и отворена кампања за поткопување на нашата меѓународна субјективност, ги попречува процесите на интеграција и финансирање и управува со нелегални, криминални структури во нашата земја“, рече таа.
Таа додаде дека Косово тесно соработува со своите сојузници за „заканите“ на Србија никогаш да не станат реалност.
Косово редовно ја обвинува Србија дека води кампања против признавањето на независноста на Косово, како и дека го спречува членството во меѓународни организации и спроведува кампања за дезинформации.
Во овој контекст, Курти рече дека Србија „во тесна соработка со Руската Федерација“ троши милиони евра за лобирање и дистрибуција на „систематски лажни пораки против Косово“ низ целиот свет.
Србија секогаш реагира остро кога други земји ја признаваат независноста на Косово, како што беше случајот оваа година, кога Кенија и Судан ја признаа независноста на Косово.
Србија го смета Косово за дел од својата територија.
Дијалогот за нормализација на односите преку Европската Унија меѓу двете страни се води од 2011 година, во рамките на кој се постигнати десетици договори, но повеќето од нив не се спроведени на терен.
Општините лани потрошиле 190 милиони евра за јавни набавки
Сите осумдесет општини во земјава и Градот Скопје во 2024 година потрошиле рекордни 190 милиони евра на тендери, покажува истражувањето на Центарот за граѓански комуникации.
Истражувањето покажува дека биле склучени вкупно 4006 договори за јавни набавки, а само во 2024 година, вредноста на општинските тендери пораснала за 16 проценти, односно за 26 милиони евра. Најголемо зголемување во вредноста на тендерите имаат скопските општини Гази Баба, Аеродром и Кисела Вода.
„Град Скопје за прв пат го загуби приматот и со годишен пад на вредноста на тендерите од 11,5 милиони евра, се наоѓа на шестото место. Општините склучиле договори за јавни набавки со 1210 фирми. Дури една четвртина од вкупната вредност на локалните тендери завршила кај само 10 фирми. На врвот според вкупната вредност на договорите е ЕДС (Енерџи деливери солушнс) со вредност на договорите од 500 милиони денари, односно околу 8 милиони евра“ се вели во истражувањето.
Општините трошеле на јавни набавки просечно по 28 % од своите буџети. Најголема вредност на набавки по жител има Општина Дојран или 675 евра, а најмала Градот Скопје, само 14 евра.
Најголемо зголемување на вредноста на јавните набавки во 2024 година има кај Општина Гази Баба и тоа околу 5,7 милиони евра. Веднаш по неа е Општина Аеродром со годишно зголемување од 5,4 милиони евра, па Општина Кисела Вода со 4,9 милиони евра. Следуваат општините Битола, Ѓорче Петров и Штип со зголемена вредност на јавните набавки за околу 3 милиони евра, па Струмица со 2,8, Велес со 2,2 милиони евра и Охрид со 2 милиони евра.
„Околу милион и пол евра зголемена вредност на јавните набавки имаат општините Кавадарци, Илинден и Арачиново. Општините Крива Паланка и Виница имаат зголемување од околу милион евра, додека кај останатите 38 општини, вредноста на јавните набавки во 2024 година е зголемена за помалку од милион евра“, се наведува во истражувањето.
Пад на вредноста на тендерите кај Град Скопје и 28 општини
Намалување на вредноста на набавките во 2024 година во однос на 2023 година има кај вкупно 29 општини. Најголем пад во апсолутна вредност на тендерите во 2024 година бележи Градот Скопје, од дури 11,5 милиони евра, а по него следуваат општините Центар, со пад од 2,2 милиони евра, потоа Радовиш, со намалување од 2 милиони евра, Тетово со 1,5 и Општина Карпош, со пад од околу милион евра.
„Градот Скопје ја изгуби апсолутната доминација во јавните набавки и сега се наоѓа дури на шестото место со остварена вредност на договорите за јавни набавки во 2024 година од 7,3 милиони евра. Во 2023 година вредноста на договорите за јавни набавки на Град Скопје изнесуваше близу 19 милиони евра, па така во 2024 година Скопје има пад од околу 11,5 милиони евра. Набавките на Градот Скопје во 2024 се драстично пониски од изминативе 7 години и тоа двојно пониски од 2018 година кога биле најниски во оваа седумгодишна низа, а изнесувале околу 14 милиони евра“, покажува истражувањето.
Сепак, како што се наведува во истражувањето, вредноста на јавните набавки на скопските општини и Градот Скопје во 2024 изнесува 30 % од вкупните набавки на сите 80 единици на локална самоуправа и Градот Скопје.
Локалните самоуправи кај кои само една фирма има добиено половина од вкупните набавки на општината за 2024 година се: Желино Дојран, Врапчиште, Струмица, Бутел, Крушево, Старо Нагоричане, Зелениково, Липково, Могила, Арачиново, Босилово и Виница.
Интересно е што кај половина од општините, третина од спроведените јавни набавки во 2024 година ги реализирала само една фирма.
„Целта на овој податок е да ги алармира локалните власти да преземат активности во насока на стимулирање на конкуренцијата, како и, по можност, поделба на тендерите на делови наспроти нивно окрупнување“, се наведува во истражувањето.
Од Центарот за граѓански комуникации наведуваат дека воочувањето концентрација на една фирма во јавните набавки на одделните општини е и една од главните придобивки на оваа база на податоци за јавните набавки на општините бидејќи овозможува јасен и визуелен приказ на состојбите.
Мултимедија
Најпосетени
Што треба да знаете