Вести
Чулев: Настанот во Ченто има политичка заднина
Синоќешниот настан во Ченто има политичка позадина и МВР е решено да постапува неселективно во однос на сите што поттикнуваат или не го почитуваат полицискиот час, изјави денеска на прес-конференција, министерот за внатрешни работи Наќе Чулев.
Тој подетално се осврна на синоќешниот протест на стотина граѓани од скопско ченто, кои за време на полицискиот час се собраа да протестираат против приведувањето на три лица, кои, според полицијата, не ја почитувале одлуката за ограничено движење донесена како мерка за заштита од коронавирусот.
„Политичката позадина не го оправдува ова поведение и зборува за тендензиозно загрозување на граѓаните предизвикано од политички побуди. Граѓаните свесно се изложија себеси на ризик што може сите нас скапо да не чини“, изјави Чулев.
Според него, на социјалните мрежи во 21 часот се појавиле фотографии за групирање на граѓани, по што била извршена контрола во тој реон. Кога пристигнале полициските службеници забележале група од 8 лица кои почнале да бегаат, а тројца останале, по што биле лишени од слобода и спроведени во полициската станица во Гази Баба. Едно од лицата притоа се преставил како член на Советот на општина Гази Баба од СДСМ за да изврши притисок да не биде лишен од слобода, но според Чулев поднесени се кривични пријави за сите тројца за сторено кривично дело според членот 206 од Кривичниот законик.
Околу 22 часот, додаде Чулев, биле информирани дека на местото каде што биле лишени од слобода тројцата граѓани се собрала поголема група луѓе како реакција на лажна информација дека приведените биле физички малтретирани и лишени од слобода.
„Потенцирам дека двете информации не се точни, а тоа го потврдија и тие самите“, рече Чулев.
Тој потврди исто така дека градоначалникот на Гази Баба дал изјава дека ќе ги ослободи притворените, но му порача дека МВР постапува неселективно кон сите граѓани во државата и секаде каде што се прекршени законските одредби постапува, па така за сите тројца се поднесени кривични пријави. Чулев најави исто така дека ќе се прегледаат видео снимките од настанот и ќе следат пријави и за тие што учествувале и го поттикнувале протестот во Ченто.
види ги сите денешни вести
Украина бара повеќе оружје затоа што Русија „не е заинтересирана“ за мир, вели советникот на Зеленски за РСЕ
Украина бара повеќе оружје од Западот поради загриженоста дека, дури и по двата неодамнешни самити во Соединетите Држави, Русија „не е заинтересирана“ за мир, изјави за Радио Слободна Европа, висок советник на украинскиот претседател Володимир Зеленски.
Михајло Подољак рече дека Киев е во „активни консултации“ со американски и европски претставници „за зголемување на снабдувањето со разни алатки за спроведување контравоени операции“.
„Јасно ни е колку Русија моментално троши и што ќе прави следно - какви ресурси користи по фронтот или подлабоко на украинската територија“, рече Подољак, клучна фигура во администрацијата на Володимир Зеленски од 2020 година, на 25 август.
„Следствено, во тек се консултации и преговори за зголемување на протокот на одредени видови оружје во Украина. Ракети со долг дострел, беспилотни летала со долг дострел - ова е една од приоритетните насоки денес, што навистина ни овозможува ефикасно да влијаеме на текот на оваа војна“, рече тој.
Руските напади врз украинскиот Сумски регион убиле еден цивил, а девет други биле ранети, соопштија официјални лица на 25 август.
„Напад со беспилотно летало извршен преку ноќ погоди автомобил во Новослобидски, мала заедница недалеку од руската граница, при што загина едно лице, а две беа повредени“, изјави началникот на регионалната воена администрација Олех Хрихоров во објава на Телеграм.
Тој рече дека уште седум лица се ранети во напади во други делови од регионот во североисточна Украина, каде што руските сили држат дел од територијата по должината на границата и започнаа воздушни напади врз главниот град и други градови и места.
„Украина откри вкупно 104 руски беспилотни летала кои таргетираат локации на север и исток од Украина пред 8 часот наутро“, објавија украинските вооружени сили.
Се вели дека нивните сили уништиле или разоружале 76 беспилотни летала.
На фронтовската линија долга повеќе од 1000 километри, која се протега од границата на североисток до устието на реката Днепар на југ, во претходните 24 часа се воделе најмалку 159 битки или размени на оган, соопшти војската. Најжестоките борби се случиле околу градот Покровское во регионот Донецк, каде што Русија врши силен притисок со месеци.
Руските напади продолжиле по средбата меѓу американскиот претседател Доналд Трамп и рускиот претседател Владимир Путин во Алјаска на 15 август и разговорите меѓу Трамп, украинскиот претседател Володимир Зеленски и европските лидери во Белата куќа три дена подоцна.
Зборувајќи на Денот на независноста на Украина на 24 август, Зеленски рече дека средбата со Путин би била „најефикасен пат напред“ и вети дека ќе „ја турка Русија кон мир“.
Трамп ги искористи самитите овој месец за да се заложи за средба еден на еден меѓу Путин и Зеленски, но Русија сигнализираше дека не е подготвена за тоа сега и можеби нема да биде наскоро.
„Путин е подготвен да се сретне со Зеленски кога ќе биде готова агендата за самитот. А оваа агенда воопшто не е готова“, изјави рускиот министер за надворешни работи Сергеј Лавров за NBC News во интервју емитувано на 22 август.
Лавров, исто така, рече дека коментарите на Европејците по самитот во Алјаска и на состанокот во Вашингтон на 18 август укажуваат дека тие „не сакаат мир“ и изрази забелешки на плановите дека западните поддржувачи на Украина се обидуваат да добијат безбедносни гаранции за Киев во случај на мировен договор.
Тој рече дека постојаните членки на Советот за безбедност на ОН - Кина, Франција, Русија, Обединетото Кралство и САД - треба да бидат гаранти на безбедноста на Украина. Киев и другите сојузници досега ја отфрлија идејата Москва да биде меѓу безбедносните гаранти на мировниот договор, а Зеленски ја отфрли можноста Пекинг да игра улога.
Канадскиот премиер Марк Карни, кој беше во посета на Киев на 24 август, изјави дека „не е избор на Русија да го гарантира идниот суверенитет, независност и слобода на Украина“.
Карни, исто така, рече дека не ја исклучува можноста за присуство на канадски трупи во Украина како дел од идните предложени безбедносни гаранции, чии детали сè уште ги разработуваат Киев и неговите европски сојузници. Русија постојано се спротивставува на распоредување на западни трупи во Украина.
Меѓу загинатите во израелски напад врз болница во Газа има и новинари
Најмалку 15 лица, вклучувајќи четворица новинари кои работеле за меѓународни медиуми, наводно биле убиени во израелски напад врз болница во јужниот дел на Појасот Газа.
Ројтерс објави дека еден од нивните сниматели бил убиен во нападот врз болницата Насер. Останатите тројца наводно работеле за Ал Џезира, Асошиејтед Прес и Ен Би Си.
Неколку лица биле убиени во првиот напад, а други во вториот, кој се случил додека спасувачите пристигнувале на местото на настанот, соопшти Цивилната одбрана, која ја води Хамас, палестинско движење кое САД и Европската Унија го сметаат за терористичко.
Израелската војска и канцеларијата на премиерот изјавија дека немаат коментар.
Снимките покажуваат како се издига чад од главната болница во јужна Газа.
На едно видео, додека докторот држи крвава облека за да им покаже на новинарите, може да се види уште еден напад, објавува Би-Би-Си.
Новинската агенција Ројтерс објави дека нивниот снимател, Хусам ал-Масри, е меѓу загинатите. Останатите се Мохамед Саламех, кој работи за Ал Џезира, Маријам Абу Дака, новинарка на Асошиејтед Прес, и фотографот Муат Абу Таха, кој работи за американската ТВ мрежа Ен Би Си (NBC).
Новинар на Ал Џезира е убиен во Газа, изјави претходно портпаролот на катарската ТВ мрежа на 24 август. Смртта на Мохамед Салама е „потврдена“, изјави портпаролот, откако Ал Џезира објави дека тој е убиен во израелски напад.
Од 15 септември сите приватни болници треба да го информираат МЗ за извршените прегледи и интервенции
Министерот за здравство Азир Алиу денеска (25 август) имаше средба со д-р Сашко Кедев, на која беа разменети информации во врска со наводите дека се вршеле непотребни кардиохируршки интервенции кај пациенти во приватните болници, соопшти Министерството за здравство.
Министерот Алиу на средбата потсетил дека ќе биде испратен допис со кој сите приватни здравствени установи се задолжени од 15 септември да го информираат Министерството, односно Управата за електронско здравство за сите извршени прегледи и интервенции.
Од Министерството за здравство наведуваат дека се отворени за соработка со сите чинители и ги повикуваат сите засегнати страни кои имаат каква било информација за евентуални неправилности во системот, веднаш да се обратат до нив.
Во меѓувреме Азири најави и дека експерти од Словенија, Италија, Австрија или Германија ќе утврдуваат дали се правеле непотребни операции во приватните болници. Листата со имиња на странските експерти, треба да биде комплетирана денеска. Министерството за здравство со нив ќе потпише договор со цел да утврдат дали се вршеле непотребни интервенции кај пациенти во приватните клиники.
Одлуката за ангажирање на странски експерти, според министерот Алиу, е заради поголема објективност и утврдување на вистинската слика.
Директорот на Фондот за здравство Сашо Клековски во саботата упати апел до можните оштетени граѓаните во кардиохирургијата и до сите други пациенти, да поднесат жалби.
Изјавата на Клековски доаѓа откако кардиохирургот Сашко Кедев пред неколку дена изјави дека во некои приватни болници се вршат непотребни интервенции со цел профит, вклучувајќи и стентирања и операции. По оваа изјава МЗ најави формирање комисија со експерти од три различни земји за проверка на работењето во приватните здравствени институции, но и продолжување на контролите во јавните здравствени установи кои се занимаваат со истата проблематика.
ДЗР: Податоците во Системот за интегрирано планирање на ресурсите се незаштитени
Недостиг на безбедносни политики, користење на застарени оперативни системи и на заеднички лозинки и без двојна потврда, како и неажурирани резервни копии, се дел од слабостите на системот за интегрирано планирање на ресурсите што ги утврдиле ревизорите.
Системот за интегрирано планирање на ресурсите го употребува Службата за општи и заеднички работи на Владата за извршување на сметководствено-финансиските услуги за повеќе државни институции.
Иако, како што се наведува во ревизорскиот извештај од Државниот завод за ревизија (ДЗР), ИПР системот е имплементиран во 2016 година, се уште отсуствува правен акт кој ги регулира правата и обврските на Министерството како сопственик и на Службата како корисник на системот што, според ревизорите, создава ризик од несоодветно управување со податоците.
„Поради несоодветно планирање и ненавремено спроведување на постапките за одржување на системот, во периодот од 522 дена не бил склучен договор за регулирање на правата и обврските за негово одржување. Ваквата состојба влијае на безбедноста, достапноста и точноста на податоците, како и до потешкотии во изготвувањето на финансиските извештаи за соодветните известувачки периоди. Во периодот на одржување не се преземени активности за редовна проверка на резервната копнија (бекап) на податоците, а со тоа се зголемува ризикот од поврат на податоците“, наведуваат ревизорите.
Во Службата за општи и заеднички работи, како што се посочува во ревизорскиот извештај, недостигаат стратешки документи кои ги дефинираат насоките за развој, одржување и надградба на информатичките системи, како и политики и процедури за управување со податоци што, според ревизорите, може да доведе до неефикасно управување и до ранливост од безбедносни закани.
Ревизорите утврдиле и повторување на исти надградбени активности и надградби што не се засноваат на потребите и не ги опфаќаат сите корисници, недостиг од поврзување со Централниот регистар преку интероперабилност, како и високи трошоци и забавување на процесите поради недостиг на интегрција.
Покрај горенаведеното, на навременото и ефикасно извршување на задачите, според ревизорите влијае и недостигот на човечки ресурси поради постојаниот одлив по основ пензионирање и недостигот на вработени со соодветни знаења.
Националната гарда во Вашингтон почна да носи оружје
Националната гарда на Соединетите Држави, распоредена во Вашингтон, почна да носи оружје во главниот град на САД, каде што повеќе од 2200 војници се распоредени за борба против криминалот по барање на претседателот Доналд Трамп, објави војската.
„Почнувајќи од недела навечер, 24 август 2025 година, војниците на Заедничката работна група Вашингтон почнаа да го носат своето службено оружје“, се вели во соопштението на американската војска.
Овие резервисти се овластени да користат сила само „како последно средство и само како одговор на непосредна закана од смрт или сериозни телесни повреди“, се наведува во текстот.
Трамп претходно изјави дека Вашингтон е „преплавен со банди“ и дека распоредувањата се неопходни.
Националната гарда веќе беше мобилизирана во јуни во Лос Анџелес, за време на големите протести против имиграциската политика на федералната влада.
Сепак, полициската статистика во главниот град покажува пад на насилниот криминал помеѓу 2023 и 2024 година, иако тој пад следеше по скокот по епидемијата на коронавирус.
Резервистите на Националната гарда можат да бидат распоредени само во случај на национална вонредна состојба, како што е природна катастрофа, на барање на федералната влада и со одобрение од локалниот гувернер, пренесува АФП.
ЦУК: Еден активен пожар, два под контрола
Во текот на изминатото деноноќие на територијата на Северна Македонија имало вкупно 27 пожари на отворен простор, од кои еден е активен, 2 се под контрола и изгаснати се 24 пожари.
Активни се пожарите во Општина Долнени с.Долгаец (мешана шума), под контрола се два во Општина Македонски Брод на подрачјето Јасен (мешана шума) и во Општина Гевгелија на планината Кожуф (висока шума).
Како што информира ЦУК изгаснати се 24 пожари.
Северна Македонија и ова лето се справува со зголемен број пожари на отворено.
На територијата на цела држава е прогласена кризна состојба, која Владата на седница на 7 август ја продолжи за нови 30 дена.
За да се зајакнат капацитетите во справување со пожарите, Дирекцијата за заштита и спасување преку општините потпиша договори со 352 граѓани што се пријавија на неодамнешниот повик за обука на пожарникари.
За Зеленски разговорите со Путин се сѐ уште најефикасниот начин за постигнување мировен договор
Украинскиот претседател Володимир Зеленски рече дека средбата со рускиот претседател Владимир Путин би била „најефикасниот пат напред“ и покрај застојот во напорите за прекин на конфликтот и континуираните напади со беспилотни летала од двете страни.
Зборувајќи на 24 август на церемонијата по повод Денот на независноста на земјата, Зеленски вети дека ќе „ја турка Русија кон мир“.
Порано на 24 август, Врховниот командант на Украина изјави дека повторно освоиле три села во регионот Донецк и дека Украина започнала напади со беспилотни летала против Русија, предизвикувајќи пожар во нуклеарна централа кој брзо бил изгаснат.
Градоначалникот на Москва, Сергеј Собјанин, рано на 25 август изјави дека руските единици за воздушна одбрана уништиле две беспилотни летала што летале кон рускиот главен град. Тој рече дека службите за итни случаи работат на местото каде што паднале остатоците.
Руски напад доцна во ноќта на 24 август остави некои населби во регионот Суми без електрична енергија, рече шефот на регионалната воена администрација. Руските војници, исто така, нападнале цивилна инфраструктура во регионот користејќи водени бомби и дронови за напад, рече функционерот. Немаше жртви.
Нападите со беспилотни летала и копнените борби продолжија и покрај притисокот на американскиот претседател Доналд Трамп да посредува во самит Украина-Русија, кој пропадна откако Трамп го угости Путин на самит во Анкориџ, Алјаска, на 15 август.
Зеленски рече дека „форматот на разговори меѓу лидерите е најефикасниот пат напред“, но рускиот министер за надворешни работи Сергеј Лавров постави нова пречка за тоа, за време на интервју за американската телевизија NBC.
„Реакцијата на состанокот во Анкориџ, собирањето на овие европски претставници во Вашингтон и она што го направија по Вашингтон укажува дека тие не сакаат мир“, рече Лавров во претходно снимено интервју.
Тој додаде дека постојаните членки на Советот за безбедност на ОН - Кина, Франција, Русија, Велика Британија и Соединетите Држави - треба да бидат гаранти на безбедноста на Украина. Киев и другите сојузници досега ја отфрлија идејата Москва да биде меѓу безбедносните гаранти на мировниот договор, а Зеленски ја отфрли можноста Пекинг да игра улога.
Канадскиот премиер Марк Карни, кој го посети Киев на 24 август, изјави дека „не е избор на Русија како да го гарантира идниот суверенитет, независност и слобода на Украина“.
Карни, исто така, рече дека не ја исклучува можноста за присуство на канадски трупи во Украина како дел од идните предложени безбедносни гаранции, чии детали сè уште ги разработуваат Киев и неговите европски сојузници.
Русија постојано се спротивставува на стационирањето на западните трупи во Украина.
Потпретседателот на САД, Џ.Д. Венс, исто така, разговараше со американскиот радиодифузер NBC на 24 август, велејќи дека Русија направила „значајни отстапки“ за да го заврши конфликтот.
„Тие всушност беа спремни да бидат флексибилни во однос на некои од нивните клучни барања. Разговараа за тоа што ќе биде потребно за да се заврши војната“, рече Венс во едно интервју.
Венс рече дека Москва признала „дека Украина ќе има територијален интегритет по војната“ и дека „сфатиле дека нема да можат да воспостават марионетски режим во Киев“.
Во својот говор на церемонијата по повод годишнината од независноста на Украина во 1991 година, Зеленски рече дека САД и Европа се согласуваат дека Украина „сè уште не победила целосно, но сигурно нема да изгуби. Украина ја обезбеди својата независност“, рече тој.
Тројцата кандидати на Движењето Самоопределување без поддршка за претседател на Собранието на Косово
За време на продолжението на конститутивната седница, ниту Хекуран Мурати, ниту Арберије Нагавци , ниту Димал Башa од Движењето Самоопределување (ЛВВ) не успеаја да ги добијат потребните 61 глас за избор за претседател на Собранието на Косово.
Ова беше втор пат Мурати да биде предложен за оваа функција, додека Нагавци и Башa беа предложени за првпат.
За Мурати и Нагавци гласаа по 55 пратеници, додека 46 беа против. Пет пратеници беа воздржани за Мурати, а четворица за Нагавци.
Во меѓувреме, Башa доби 57 гласови „за“, 25 „против“ и 24 „воздржани“. За него гласаа и Арбен Гаши и Беке Бериша, од партии кои во претходниот мандат беа во опозиција.
Конститутивната седница продолжува на 26 август
Конститутивната седница беше прекината и ќе продолжи на 26 август во 11:00 часот.
По седницата, Хекуран Мурати изјави дека целта на партиите кои беа во опозиција е да го блокираат формирањето на институциите на Косово.
„Целта на тие партии е она што не го добија преку гласовите на граѓаните да се обидат да го добијат преку вакви одолговлекувања,“ изјави Мурати.
Што се однесува до гласањето против Димал Башa од страна на Демократската партија на Косово, иако партијата претходно тврдеше дека нема да гласа само за поранешни министри во владата на Курти, Мурати изјави дека тоа покажува дека проблемот не е во имињата на кандидатите.
„И оваа фраза ‘потребни се консултации’ е само уште еден обид за одложување, бидејќи јасно се гледа нивната цел. Станува збор за политички игри, а не за принципи – секојпат кога Движењето Самоопределување (ЛВВ) нуди компромис, опозициските партии поставуваат нов услов,“ рече Мурати.
Претседателот на Демократската партија на Косово (ПДК), Мемли Красниќи, рече дека од претседавачот Авни Дехари побарале десетминутна пауза за консултации со другите партии пред гласањето за Башa, но тоа не им било дозволено.
„Се надевам дека Дехари нема да биде арогантен задутре. Ако има предлог кој може да ги добие гласовите на ПДК, нека даде пауза од 10 минути,“ рече тој.
ПДК претходно соопшти дека нема да гласа за министри од владата на Курти, потсети Красниќи, но додаде дека Башa е пратеник и може да добие гласови од неговата партија.
„Имам резервации кон секого,“ нагласи Красниќи, но додаде дека Башa денес можеше да биде избран за претседател на Собранието доколку имаше консултации пред гласањето.
По седницата, пратеникот на Демократскиот сојуз на Косово (ЛДК), Арбен Гаши, појасни дека Башa претходно лично му побарал глас, па затоа го поддржал.
Бесиан Мустафа изјави дека ЛДК има став дека нема да гласа за кандидати на Движењето Самоопределување без политички договор, но додаде дека пратеникот Гаши со својот глас за Башa изразил личен став.
„Во отсуство на политички договор, која било партија што ќе предложи кандидат за претседател на Собранието, ЛДК нема причина да го поддржи,“ рече Мустафа.
Ехат Мифтараи од Косовскиот институт за правда (ИКД) ја критикуваше ПДК што не гласала за Башa, иако претходно тврдеше дека ги поддржува пратениците кои не биле дел од извршната власт.
„Бесмислени оправдувања по седницата немаат никаква вредност. На Косово му е потребен конституиран парламент за да се отвори патот за формирање влада. Потребни се легитимни институции за да се стави крај на институционалната блокада. ПДК се обиде, но не успеа,“ напиша Мифтараи на Фејсбук.
Ова беше третото продолжение на конститутивната седница откако на 18 август беше објавена целосната пресуда на Уставниот суд.
Според пресудата, пратениците имаат рок од 30 дена да изберат претседател и пет потпретседатели на Собранието.
Претседателот на Собранието мора да биде избран со јавно гласање, а едно име може да биде ставено на гласање најмногу три пати.
Од објавувањето на пресудата, Движењето Самоопределување (ЛВВ) ги предложи Албулена Хаџиу, Доника Гервалa и Хекуран Мурати, но ниту еден од предложените не успеа да добие потребни 61 глас.
Демократската партија на Косово (ПДК) и Алијансата за иднината на Косово (ААК) изјавија дека ќе гласаат за одредени кандидати од Движењето Самоопределување (ЛВВ). Од друга страна, Демократскиот сојуз на Косово (ЛДК) и Социјалдемократската иницијатива (Нисма) нагласија дека нема да поддржат ниту еден кандидат за претседател на Собранието без претходен политички договор.
ЛВВ на претходните седници – пред последната пресуда на Уставниот суд – инсистираше на кандидатурата на Хаџиу за претседателка на Собранието. Сега оваа партија тврди дека, по неуспешните кандидатури на Гервалa и Мурати, аргументот на опозициските партии од претходниот состав дека Хаџиу не е соодветна за таа функција веќе не држи. ЛВВ ги обвинува другите партии за блокирање на формирањето на институциите.
Сепак, другите партии тврдат дека ЛВВ сега предлага имиња за кои знае дека нема да добијат потребен број гласови. ААК побара името на кандидатот на ЛВВ да се објави однапред, пред да се формализира предлогот, но тоа сè уште не е направено.
Како настана политичката блокада?
Конститутивната седница на Собранието на Косово започна на 15 април, но до денес не е завршена поради несогласувања меѓу политичките партии околу начинот на гласање за претседател на Собранието.
Откако кандидатката на Движењето Самоопределување (ЛВВ) за претседателка на Собранието, Албулена Хаџиу, повеќекратно не успеа да биде избрана на шест јавни гласања, Дехари на 1 мај го смени дневниот ред.
Потоа побара од Демократската партија на Косово (ПДК), Демократскиот сојуз на Косово (ЛДК), Алијансата за иднината на Косово (ААК) и Српската листа да предложат по еден член во комисија што би го надгледувала тајното гласање за претседател на Собранието. На овој предлог се спротивставија партиите кои беа во опозиција во претходниот мандат, кои одбија да номинираат член во таа Комисија.
Првично, ААК поднесе прашање до Уставниот суд во врска со овој политички застој.
Судот одговори на 26 јуни, наведувајќи дека гласањето мора да се одвива според досегашната практика. Судот им даде рок од 30 дена на пратениците да го завршат процесот на конституирање, но тој рок беше игнориран.
Во меѓувреме, ПДК и ЛДК поднесоа одделни иницијативи во врска со прашањето за гласањето за претседател на Собранието.
Уставниот суд на 27 јуни донесе привремена мерка со која им се забранува на пратениците да носат одлуки и да преземаат дејства во врска со конституирањето на Собранието до 8 август.
На 8 август, Уставниот суд ја објави одлуката за двата поднесени предмети – целосната пресуда беше објавена на 18 август – со која утврди дека промената на дневниот ред претставувала прекршување, и го задолжи Собранието да се врати на јавно гласање. Ниту една политичка партија не освои доволно гласови за самостојно да формира мнозинство, ниту е постигнат политички договор.
ЛВВ, чиј лидер Албин Курти е технички премиер, освои 48 места на изборите одржани на 9 февруари, но останатите парламентарни партии не прифатија да гласаат за неговата кандидатка за претседателка на Собранието, за чие избирање се потребни најмалку 61 глас.
ПДК освои 24 места, ЛДК е трета со 20, следува Српска листа – најголемата партија на Србите во Косово – со девет, а коалицијата на ААК и Социјалдемократската иницијатива (Нисма) со осум места.
Уште 11 места им припаѓаат на малцинските заедници.
Инцидент на натпреварот меѓу младинските екипи на „Брегалница“ и „Шкупи“, едно лице е уапсено
Четириесет и тригодишен родител е уапсен денеска (24 август), откако се случил инцидент на фудбалскиот натпревар меѓу екипите на фудбалските клубови „Шкупи“ и „Брегалница“ на стадионот „Бело Брдо“ во Штип – соопшти МВР.
Полицијата информираше дека во инцидентот, повредени се двајца петнаесетгодишни фудбалери на ФК „Брегалница“.
– Денеска (24.08.2025) во СВР Штип било пријавено дека на игралиштето „Бело Брдо“ во Штип, за време на одигрување на фудбалски натпревар помеѓу младинските екипи на ФК „Брегалница“ од Штип и ФК „Шкупи“ од Скопје, А.А.(43) од Скопје, родител на фудбалер од ФК „Шкупи“, физички нападнал двајца малолетници од Штип, фудбалери на ФК „Брегалница“, и им нанел повреди – наведе Министерството за внатрешни работи.
Веднаш по нападот, полициски службеници од СВР Штип го лишиле од слобода А.А., а малолетниците биле пренесени во Клиничка болница Штип за укажување помош, се додава во соопштението на МВР.
Известен е јавен обвинител и се преземаат мерки за целосно расчистување на настанот, по што ќе бидат поднесени соодветни пријави, наведе полицијата.
Денешниот натпревар бил прекинат при резултат 2:1 за Брегалница.
Реакција од ФК Брегалница
По инцидентот, овој фудбалски клуб реагираше преку писмено соопштение во кое побара ФФМ „детално да ја разгледа ситуацијата“.
-Денешното дерби во Втората лига го одбележа инцидентот (веќе неколку пати домаќинот е во улога на иницијатор) каде за малку посериозно не настрадаа судиите и нашите фудбалери. Иако без гледачи, неслужбени лица од таборот на домаќините беа тие кои го предизвикаа инцидентот, поради кој беше прекинат натпреварот – велат од ФК „Брегалница“ во соопштението.
Оттаму додаваат дека уште во првата минута имало „константни притисоци“.
„Во првото полувреме неколку неслужбени лица од домашниот табор вербално го нападнаа главниот судија Иванов, неговите помошници и дел од гостинските фудбалери. Причина за нападот беше судискиот свиреж при акција на домаќините бидејќи во моментот на теренот имаше две топки. Главниот судија, по правило, ја прекина играта за да се отстрани едната топка. На тоа бурно реагираа неслужбени лица кои влегоа во теренот и почнаа вербално да ги напаѓаат гореспоменатите лица“, нагласуваат од фудбалскиот клуб.
Оттаму реагираат и дека помошниот судија кој бил од страната на клупата на домаќините во текот на целиот натпревар бил изложен на напади, а поради тоа, „не можел да се фокусира на случувањата на теренот“.
Фудбалските терени не смеат да бидат поле за етнички и политички препукувања, а уште помалку место за демонстрација на насилство – порачуваат од ФК Брегалница.
Костова: Младите спортисти немаат минимум безбедност
Реакција за денешниот инцидент, преку писмено соопштение, пристигна и од потпретседателката на СДСМ, Кристина Костова.
„Додека Панче Тошковски му тера кампања на Орце Ѓоргиевски, на нас штипјани денеска децата ни ги сокршија од ќотек на стадионот Бело Брдо. Нов ден, нов крах на безбедноста под водство на најнеспособниот министер за внатрешни работи во историјата на самостојна Македонија“, реагира Костова.
-Најостра осуда за денешниот инцидент на натпреварот меѓу младинските екипи на „Брегалница“ и „Шкупи“! Додека Тошковски се слика, младите спортисти немаат минимум безбедност, ниту можност за непречено спроведување на обичен фудбалски натпревар – се додава во реакцијата.
Соборен украински дрон предизвика пожар во нуклеарната електрана Курск
Пожар изби во Нуклеарната електрана Курск откако руските вооружени сили соборија украински дрон кој летал во близина на електраната, соопшти прес-службата на електраната.
Дронот, еден од неколкуте за кои руските власти известија на 23 август, паднал врз помошен трансформатор, предизвикувајќи пожар кој бил изгаснат, а повредени нема, се наведува во соопштението на прес-службата.
„Борбеното беспилотно летало кое им припаѓа на Вооружените сили на Украина е соборено од страна на системите за противвоздушна одбрана во близина на Нуклеарната електрана Курск,“ се наведува во соопштението објавено на Телеграм.
„По ударот, дронот експлодирал, оштетувајќи го помошниот трансформатор,“ се додава во соопштението.
Повредени нема, но како последица на експлозијата, капацитетот на третиот блок од електраната е намален на 50 проценти, соопшти прес-службата.
Нивото на радијација на локацијата и во околината не ја надминало нормалната граница, се додава во соопштението.
Украина не се огласи веднаш.
Киев во последните неколку месеци ги засили нападите со дронови на територија на Русија како одговор на континуираните руски напади врз Украина. Тие напади, според наводите, се насочени кон уништување на инфраструктура што е клучна за воените напори на Москва.
Информациите прва ги објави руската федерална телевизиска мрежа РЕН ТВ (REN TV), која наведе дека трансформаторот не е дел од нуклеарниот сегмент на електраната, повикувајќи се на изјава од прес-службата на електраната. Не беше веднаш јасно во кој дел од електраната избувнал пожарот.
Нуклеарната електрана Курск се наоѓа 40 километри западно од градот Курск, регионалната престолнина, на брегот на реката Сеим. Првата единица е пуштена во работа во 1976 година. Останатите единици се додадени во 1979, 1983 и 1985 година, според наводите на прес-службата.
Мултимедија
Најпосетени
Што треба да знаете