Вести
„Јаху њуз“: Русија го хакирала ФБИ за да ги заштити руските шпиони во САД
Руската влада го хакирала комуникацискиот систем на ФБИ за да го спречи Бирото да ги следи руските шпиони што работат во САД, објави „Јаху њуз“, во својата, како што вели интернет медиумот, ексклузивна истражувачка сторија.
„САД во 2012 година станале свесни за целата сериозност на можноста на Русија да се пробие во одредени видови безбедносни комуникации и да ги следи уредите што ги користеле надзорните екипи на ФБИ, се вели во статијата. Покрај стравувањата дека Русите можеби имаат пристап до американските разузнавачки канали, властите верувале и дека руските шпиони можат да ги лоцираат тајните надзорни тимови на ФБИ и содржината на комуникациите на Бирото. Тоа на Русите освен што ќе им овозможело да го избегнат следењето и да комуницираат со човечки извори, ќе им дало и можност да собираат информации за своите гонители“, се вели во истражувањето на „Јаху њуз“.
Според сторијата, Русите првпат ги хакирале комуникациските системи на ФБИ во 2010 година, по апсењето и разоткривањето на група руски шпиони во САД.
„Таа година, ФБИ почнало да ги испитува напорите на Русија за регрутирање американски шпиони. Една од највисоките цели им бил американскиот консултант за нафтена индустрија Картер Пејџ, кој подоцна беше помошник за надворешна политика во кампањата на Трамп. ФБИ во 2013 година го информирало Пејџ дека Русите се обидуваат да го „култивираат“, но Пејџ ги игнорирал нивните предупредувања, па дури и јавно се фалел за своите врски со високи претставници на руската влада“, објави „Јаху њуз“.
Русите, додаваат од „Јаху“, ги хакирале помошните комуникациски канали што ги користело ФБИ, за што поранешен висок службеник за контраразузнавање, за „Јаху њуз“ рекол дека „САД тоа многу сериозно го сфатиле“.
Истрагата открила дека руското хакирање на комуникациските системи на ФБИ било клучната причина поради која администрацијата на Обама во декември 2016 година исфрли 35 руски дипломати и затвори два руски дипломатски објекти.
види ги сите денешни вести
Пакистан ќе го номинира Трамп за Нобелова награда за мир
Пакистан денеска (21 јуни 2025) објави дека ќе препорача американскиот претседател Доналд Трамп да ја добие Нобеловата награда за мир, награда за која тој повеќепати кажа дека ја сака за неговите напори да го реши неодамнешниот конфликт меѓу Индија и Пакистан.
Трамп во петокот ја презеде заслугата за мировниот договор меѓу Конго и Руанда, но се пожали дека нема да ја добие Нобеловата награда за мир за тоа, ниту за, како што рече, спречување војна меѓу Косово и Србија, одржување на мирот меѓу Египет и Етиопија и спречување војна меѓу Индија и Пакистан.
Некои аналитичари во Пакистан веруваат дека предлогот на земјата може да го поттикне Трамп да ја преиспита можноста да му се придружи на Израел во нападот на иранските нуклеарни постројки. Пакистан ги осуди акциите на Израел како кршење на меѓународното право и закана за регионалната стабилност.
Трамп ненадејно објави прекин на огнот во мај со кој заврши четиридневниот судир меѓу Индија и Пакистан, две земји со нуклеарно оружје. Оттогаш, тој постојано тврдеше дека спречил нуклеарна војна, спасувајќи милиони животи, но не добил никаква заслуга за тоа.
Пакистан се согласува дека американската дипломатска интервенција ги прекина борбите, додека Индија тврди дека тоа е договор меѓу војските на двете земји.
Истрага за помагање на сторителите на убиството на Вања и Панче
Основното јавно обвинителство Скопје итно постапи за проверка на наводите изнесени од обвинет во текот на вчерашното рочиште од судењето за убиствата на Вања Ѓорчевска и Панче Жежовски.
По наредба на јавен обвинител едно лице е лишено од слобода и против него е поведена истрага за – Помагање на сторител по извршено кривично дело согласно член 365 став 3 од Кривичниот законик, соопштија од Обвинителството денеска (21 јуни).
Согласно исказот на еден од обвинетите, сега осомничениот помогнал со прикривање на орудијата со кои се извршени кривичните дела за кои е пропишана казна доживотен затвор.
По пренесени инструкции од првообвинетиот, осомничениот од просториите на политичката партија Десна зел еден син ранец во кој се наоѓало огнено оружје пиштол – со кој биле извршени двете кривични дела и го отстранил од партијата.
Со тоа им помогнал на обвинетите да не бидат откриени, посочуваат од Обвинителството.
Со цел проверка на наводите, јавниот обвинител обезбеди и судски наредби со кои беа извршени претреси на две локации, а се преземаат и други истражни дејствија.
Со цел обезбедување на осомничениот до завршување на постапката, надлежниот јавен обвинител до Основниот кривичен суд Скопје достави предлог за определување мерки на претпазливост – привремено да му се одземе патната исправа и да се определи забрана за нејзино издавање, како и да се определи повремено да се јавува кај службено лице во судот.
Истрагата против ова лице претставува посебен предмет кој не влијае на судската постапка за двете грабнувања и убиства која е во завршна фаза и во рамките на која Јавното обвинителство го поткрепи обвинението со огромен број вербални и материјални докази за сторените дела – се додава во соопштението.
Малолетната Вања од Скопје и велешанецот Панче беа пријавени за исчезнати на 27 и 24 ноември 2023, а на 2 декември истата година, беа пронајдени мртви во близина на Скопје и Велес.
Пленковиќ до Мицкоски: Имате поддршка од Хрватска, заслужувате влез во ЕУ
Хрватскиот премиер Андреј Пленковиќ на социјалната мрежа „Х“ информираше дека имал телефонски разговор со македонскиот премиер Христијан Мицкоски и јавно даде поддршка за нашата држава на патот кон членство во ЕУ.
„Со премиерот Христијан Мицкоски разговарав за понатамошната динамика на европскиот пат на Северна Македонија, за претстојниот Извештај на Европскиот парламент за напредокот и состојбата во Југоисточна Европа. Хрватска ќе продолжи силно да ја поддржува Северна Македонија, која заслужува членство во ЕУ“, напиша Пленковиќ на социјалната мрежа.
Овој став доаѓа во пресрет на новиот извештај на Европскиот парламент за земјите од Западен Балкан, каде што ќе се оценува напредокот на државите кои сакаат членство во Унијата.
И премиерот Мицкоски објави дека разговарал со неговиот хрватски колега.
„Имав телефонски разговор со премиерот на Република Хрватска, Андреј Пленковиќ. Во пресрет на извештајот на Европскиот парламент, продолжувам да ги користам сите контакти за да ја раскажам македонската вистина – за нашиот напредок, за вредностите што ги браниме и за иднината што ја заслужуваме. Хрватска е докажан пријател на нашата држава, а нејзината гласна поддршка во клучни моменти претставува голем поттик и охрабрување за сите нас“, објави Мицкоски на Фексбук.
Тој додава дека „Македонија заслужува влез во ЕУ, но со крената глава“.
Туристите заминуваат од хрватското крајбрежје додека пожарите излегуваат од контрола
Шумски пожар кој беснее на хрватското крајбрежје предизвика масовно заминување на туристите, објави агенцијата ДПА.
Повеќе туристички дестинации долж крајбрежјето се погодени од пожарот, а дел од патиштата се затворени за сообраќај – пренесоа хрватските медиуми денеска (21 јуни).
За сега, нема соопштенија за жртви поврзани со пожарот.
Огнената стихија изби на триесетина километри јужно од Сплит, во близина на приморските населби Писак и Марушиќ кои се популарни меѓу туристите.
Пожарот изби на подрачјето на Писак и Марушиќ источно од Омиш, а пожарникарите не можат а го контролираат, па спасуваат куќи кои се загрозени, наведоа пожарникарите од Омиш, пренесува Хрватска радиотелевизија.
ХРТ пренесе дека во претходните два дена избиле пожари на 17 места од Омиш до Макарска, но со брзото интервенирање на пожарникарите тие пожари биле изгасени во рок од неколку часа.
Пожарникарите наведуваат дека дел од жителите на местата зафатени со пожарите се евакуирани.
Сушата, високите температури и силниот ветер придонесуваат за ширење на пожарите низ густите борови шуми на таа област. Засега не е позната причината за пожарите кои уништија бројни куќи и автомобили.
Јаневска: Ќе воведеме вештачка интелигенција во наставата
Во процесот на дигитална трансформација на образовниот систем, интеграцијата на вештачката интелигенција (ВИ) претставува следен, логичен чекор кој значително ќе го унапреди квалитетот, ефикасноста и инклузивноста на образованието во Македонија – изјави денеска (21 јуни) министерката за образование и наука, Весна Јаневска.
Таа рече дека ваквата технолошка иновација стратешки и постепено ќе биде имплементирана во начинот на учење, спроведување на наставата и генерално во развојот на човечките ресурси.
„Препознаваме дека вештачката интелигенција не треба да го замени човечкиот фактор во образованието, туку да го дополни и унапреди“, истакна Јаневска на Меѓународниот самит за образовни технологии, што се одржува во Истанбул, од 20 до 22 јуни 2025 година, во организација на Министерството за национално образование и наука на Република Турција.
Таа додаде дека вештачката интелигенција треба да овозможи создавање на образовна средина каде што секој поединец може да го развие својот потенцијал до максимум.
Министерката посочи дека воведувањето на вештачката интелигенција во основното образование е првиот и најкритичен чекор.
Децата, додаде, прво треба да стекнат основно разбирање што е вештачката интелигенција, како функционира, каде се среќава во секојдневието и треба да се фокусираат на нејзиниот етички пристап.
„Учениците мора да научат да бидат критички кон информациите кои ги добиваат од ВИ системите. Треба да бидат свесни дека вештачката интелигенција може да прави грешки и да има пристрасности и затоа податоците и изворите мора да споредуваат“, нагласи Јаневска.
Информираше дека работна група на Министерството за образование и наука со професори од факултети по информатика, работи на подоготовка на документ со насоки и посебни препораки за наставниците и учениците за примена на генеративна вештачка интелигенција во процесот на образованието.
Дигитализација во образовните услуги
Министерството за образование и наука во изминатиот период интензивно работеше на дигитализација на образовната сфера.
Јаневска информираше дека најголем дел од услугите кои ги нуди образовниот систем, како запишување на ученици во основно и средно училиште, нострификација на дипломи стекнати во странство, доделување на ученички и студентски стипендии, сместување во ученички и студентски домови и аплицирање на конкурси од областа на науката се дигитализирани.
Воспоставен е систем за учење на далечина, а етапно се воведуваат и дигитални интерактивни учебници.
Меѓународниот самит за образовни технологии се организира по шести пат. Оваа година над 100 учесници - креатори на образовни политики од повеќе земји, претставници на образовни установи, глобални техничко – технолошки компании и технолошки паркови се фокусираат на обликување на иднината на образованието преку примена на вештачката интелигенција.
На повеќе од 50 сесии на кои се дискутира за трансформативната моќ на дигиталните иновации во образованието и се разменуваат искуства поврзани со креирање стратегии за интегрирање на технологијата во образовните системи.
УНИЦЕФ предупредува за колапс на системот за водоснабдување во Газа
Газа се соочува со човечки предизвиканата суша по колапсот на водоводниот систем - соопшти Агенцијата на Обединетите нации за деца, УНИЦЕФ, на 20. јуни.
„Децата ќе почнат да умираат од жед. Само 40 проценти од капацитетите за производство на вода се функционални“, изјави за новинарите во Женева, портпаролот на УНИЦЕФ, Џејмс Елдер.
„Далеку сме под итните стандардни за питка вода за луѓето во Газа“, додаде тој.
УНИЦЕФ исто така, соопшти дека зголемувањето од 50 проценти на децата од шест месеци до пет години кои се хоспитализирани поради неухранетост во текот на април и мај во Газа, како и за половина милион луѓе кои страдаат од глад.
Оваа агенција исто така, информираше дека системот за дистрибуција на помош кој го води Хуманитарната фондација за ГАЗА (GHF) поддржана од страна на Израел и САД ја прави „ситуацијата уште поочајна“.
Вчера (20 јуни) најмалку 25 лица кои чекале камиони со помош се убиени од израелски оган во Нецарим – соопштија здравствените власти во Појасот Газа. Ден претходно, најмалку 51 лице се убиени во израелските напади, вклучувајќи ги и дванаесетмината кои се обидувале да се приближат до центар управуван од GHF во централниот дел на Газа.
Во израелските напади во петокот, уште 12 луѓе беа убиени во текот на воздушниот напад кој ја погоди куќата на едно семејство во Деир Ал-Балах, со што бројот на жртви од тој ден се искачи на 37.
Од почетокот на израелската воена кампања во октомври 2023 убиени се повеќе од 55.3000 Палестинци – наведе Министерството за здравство.
Израел ја започна офанзивата по нападот на Хамас на 7 октомври, во кој беа убиени околу 1.200 луѓе.
Според израелските податоци, 53 заложници сѐ уште се во Газа.
Војната предизвика големи разорувања на палестинската територија, додека ОН алармираа дека речиси целата популација на Газа е на работ на глад.
Најмалку пет новинарки во Србија, според здруженијата, добиле отказ заради студентските протести
Најмалку пет новинарки од повеќе редакции во Србија добиле отказ откако на своите лични профили на социјалните мрежи објавиле фотографии од студентските протести, пишувале за протестите или јавно се спротивставиле на одредени одлуки на уредништвата.
При отказите, најчесто биле прогласувани за технолошки вишок.
На собирот „Стоп за прогон на новинари“, што го организираа во Белград Здружението на новинари на Србија (УНС) и Независното здружение на новинари на Србија (НУНС), новинарките порачаа дека отказите најчесто ги добивале директно од управата, без претходно известување или консултација со уредниците.
Уредничката на викенд-изданието на Политика, Сандра Гуцијан, изјави дека таа и уредничката на хрониката, Доротеа Чарниќ, добиле отказ откако биле изменети правилата за систематизација на работата во редакцијата, со што нивните позиции биле укинати, а тие прогласени за технолошки вишок.
„Јас не сум ја прекршила уредувачката политика. Мојот последен текст беше ‘Александар Вучиќ во Ниш’ на првата страница. Од таа гледна точка, јас бев во линија со уредувачката политика“, рече Гуцијан.
Сандра Гуцијан посочи дека во нејзиниот случај, како и во случајот на нејзината колешка Доротеа Чарниќ, проблемот бил тоа што своите „активности во приватното, слободно време ги објавувале на социјалните мрежи, кои исто така биле затворени профили“.
Таа ја прочита пораката од Чарниќ, која не можела да присуствува на трибината, во која се наведува дека целта на настанот е да се укаже на тоа дека „властите сè почесто се пресметуваат со новинаркипреку откази — жени кои професионално си ја вршеле работата, без да го кријат својот политички став, на што според законот имаат право“.
Водителката на телевизијата Јуроњуз (Euronews), Марија Шехиќ, изјави дека добила отказ поради наводно кршење на работната дисциплина, непрофесионализам, неизвршување на работните обврски и прекршување на новинарската етика — но дека тоа се случило откако таа и дел од нејзините колеги се оградиле од соопштението на управата со кое се осудуваше студентската блокада на РТС.
„Имаше многу ситуации и реченици што во моментот не привлекуваат внимание, како на пример: ‘Биди паметна’, ‘Полека’, ‘Чекај, застани, знаеш ли ти за кого работиш’, ‘Ајде да бидеме паметни’“, рече Шехиќ.
Настанот го осветли зголемениот притисок врз новинарките во Србија кои јавно изразуваат ставови, дури и надвор од работното време, при што отказите сè почесто се користат како средство за замолчување и дисциплинирање.
Новинарката на Вечерње новости, Војислава Црњански Спасојевиќ, изјави дека била прогласена за технолошки вишок откако се оградила од објавувањето на лични податоци од пасошите на двајца студенти во онлајн изданието на „Новости“, како и поради објава на Инстаграм за време на нејзиното учество на студентските протести.
„Ден потоа, без никакво предупредување, без понуда за друго работно место, без никаков разговор, добив решение дека сум технолошки вишок – по 31 година работен стаж, од кои 15 години поминати во ‘Вечерње новости’“, рече таа.
Црњански Спасојевиќ истакна дека дури ни нејзините уредници не биле информирани за отказот и дека првпат слушнале за тоа од неа самата.
Овој случај, како и претходните, го нагласува загрижувачкиот тренд на отстранување новинари кои јавно или приватно изразуваат став што се разликува од линијата на медиумската управа или владејачката структура – често без транспарентна процедура и без правна заштита.
Уредничката на онлајн изданието на магазинот Elle за Србија, Тара Ѓукиќ, изјави дека добила отказ поради објава на текст за студентските протести, односно откако исечок од текстот бил споделен на Инстаграм — што го забележал сопственикот на компанијата, Игор Жежељ.
„Тогаш започнаа закани, заплашувања од самиот врв на нашата компанија, илјадници повици што беа упатени кон целата редакција – ние сме четири лица – но најмногу кон мене како веб уредник, со барање веднаш да го повлечам и избришам текстот“, рече Ѓукиќ.
Кога одбила да го стори тоа, ѝ било соопштено дека е прогласена за технолошки вишок.
Овој случај се надоврзува на серијата откази кои, според самите новинари и новинарки, не се резултат на реална потреба за реорганизација, туку чин на цензура и одмазда поради уредничка независност и професионален интегритет. Случаите јасно покажуваат дека учеството во јавен дијалог или дури објективно известување за протести се третираат како прекршок во дел од медиумските средини во Србија.
Претседателката на Европската федерација на новинари, Маја Север, оцени дека е „застрашувачко тоа што се случува“, укажувајќи на длабоки промени што се случуваат во медиумскиот простор, особено по уривањето на бетонската надстрешница на Железничката станица во Нови Сад, каде што загинаа 16 лица. Таа истакна дека начинот на кој политиката се рефлектира врз редакциите станува сè поагресивен и загрижувачки.
Трагедијата во Нови Сад беше клучен момент што предизвика масовнистудентски и граѓански протести, со јасни барања за одговорност од страна на властите — како на локално, така и на државно ниво.
Во последно време, студентите го радикализираа својот став и почнаа да бараат распишување на вонредни парламентарни избори, наведувајќи ја недостигот од транспарентност, одговорност и безбедност како главни причини за својата политичка мобилизација.
Сите овие настани се одвиваат во атмосфера на зголемени притисоци врз медиумите и новинарите, каде што известувањето за протестите, па дури и приватните објави на социјалните мрежи, доведуваат до откази, цензура или заплашување – што дополнително ја продлабочува загриженоста за состојбата со медиумските слободи во Србија.
Пресудата за убиствата на Вања и Панче на 25 јуни
Велибор Манев е организатор, Боре Видевски извршителот, а Влатко Кешишев стражарот во убиствата на Вања Ѓорчевска и Панче Жежовски. Ова во својот завршен збор денеска го кажа Љупчо Палевски-Палчо, првообвинетиот за двете грозоморни убиства што се случија кон крајот на 2023 година. Со завршниот збор на Палевски заврши судењето за убиствата, а пресудата ќе биде изречена на 25 јуни.
Во својот завршен збор Палевски рече дека иако е обвинет за двете убиства, не постои трага, видео, доказ, сведок дека тој учествувал во ова злосторство.
Тој како доказ посвети внимание на фотографија од убиениот Панче најдена во телефонот на Манев, за која рече дека е направена 9 дена пред убиството на Жежовски.
„Овој круцијален доказ за тоа кој е организатор, судијата и ОЈО го заборавија. Нема прашање зошто Манев ја сликал жртвата и сликата ја пратил до Видевски. Кој обвинет следи и слика жртви? Обвинетиот Манев е организатор, кој пак вели дека јас сум организатор. Видевски и Кешишев кажаа дека не се под уцена од мене. Во времето кога Манев сликал, не бил под уцена. Заклучувам, дека со ќотек или не, факт е дека уште на 6.12.2023 година, Манев измислува дека јас сум зборувал со Вања. А на сивата лента кај Вања има негова ДНК“, кажа меѓу другото Палевски во судот.
Планот на Обвинителството, според него, бил за двете убиства да биде наместено друго лице, иако имало докази дека се извршени од три, а не четири лица.
„Основното јавно обвинителство не презентира докази, а медиумите го лажат народот по наредба на Обвинителството и на Гаврил Бубевски. Обвинителството функционира така што прима и послушно исполнува политички наредби.“, обвини Палевски.
Палевски кажа и дека нема никакви докази за комуникација со таткото на Вања, Александар Ѓорчевски, и дека тој бил измислен од Обвинителството како помагач во грабнувањето на девојчето. Во врска со барањето на Ѓорчевски да ја каже зошто е убиена Вања, Палевски рече дека одговорот на ова прашање треба да се бара преку Велес.
Попладнево службеник од Народната банка, кој е член на политичката партија „Десна“ предводена од Љупчо Палевски, беше приведен откако Велибор Манев, еден од обвинетите за убиството на Вања Ѓорчевска и Панче Жежовски, го посочи како човекот на кој му го предал пиштолот што бил употребен при двојното убиство, со цел да биде уништен.
Станува збор за Зоран Д., технички службеник во Народната банка. Обвинителството потврди дека тој е приведен, но засега не е познато дали е пронајдено оружјето или е уништено, како што е посочено во сведочењето.
На денешното судење, Манев изјави дека по барање на Палевски, му го предал ранецот на сопартијецот што работи во банката и повтори дека не го познава таткото на Вања. Тој и натаму тврди дека признанието го дал под притисок и физичка принуда, а дополнително изјави дека Палевски имал двоен план.
Малолетната Вања од Скопје и велешанецот Панче беа пријавени за исчезнати на 27 и 24 ноември 2023, а на 2 декември истата година, беа пронајдени мртви во близина на Скопје и Велес.
Судијата Ивица Стефановски, кој претседава со петчлениот судечки совет во овој предмет, по ова рече дека главната расправа е завршена.
Пресудата, како што соопшти тој, ќе биде изречена в среда на 25 јуни во 10 часот.
Путин и Си разговарале за ситуацијата на Блискиот Исток
Претседателите на Кина и Русија, Си Џинпинг и Владимир Путин, разговарале телефонски за нестабилната ситуација на Блискиот Исток, објавија кинеските медиуми.
Путин го изложи ставот на Русија за ситуацијата на Блискиот Исток, наведувајќи дека израелскиот напад врз иранските нуклеарни објекти е „многу опасен“ и дека ескалацијата на конфликтот „не е во интерес на ниту една страна“, се вели во соопштението.
„Иранското нуклеарно прашање треба да се реши преку дијалог и преговори. Двете земји треба да ја обезбедат безбедноста на граѓаните на трети земји. Ситуацијата во регионот продолжува да се развива брзо, а Русија е подготвена да одржува тесна комуникација со Кина, со цел заеднички да придонесе за смирување на тензиите“, му рекол Путин на Си.
Си Џинпинг ги изложил принципите и ставот на Кина, наведувајќи дека ситуацијата на Блискиот Исток е „многу критична“ и дека ова „уште еднаш потврдува дека светот влегува во нов период на нестабилност“.
„Доколку конфликтот дополнително ескалира, не само што двете страни ќе претрпат големи загуби, туку и земјите во регионот ќе страдаат многу“, рече кинескиот лидер.
Си додал дека е итно неопходно да прекине огнот меѓу Иран и Израел.
„Војната не е вистинскиот начин за решавање на меѓународните спорови, бидејќи само ги продлабочува омразата и противречностите. Страните во конфликтот, особено Израел, треба што е можно поскоро да го прекинат огнот за да се спречи понатамошна ескалација“, рекол Си.
Според него потребно е да се обезбеди безбедноста на цивилите, а „црвената линија за заштита на цивилите во воените конфликти не смее да се премине“. Кинескиот претседател, исто така, рекол дека комуникацијата и дијалогот се „вистинскиот начин за постигнување траен мир“.
„Мораме непоколебливо да се придржуваме до општата насока на политичкото решавање на иранското нуклеарно прашање и да инсистираме на промовирање на враќањето на иранското нуклеарно прашање на патот на политичко решавање преку дијалог и преговори“, рекол Си.
Двајцата лидери, исто така, разговарале за меѓусебната политичка доверба и стратешката соработка на високо ниво меѓу Кина и Русија и се согласиле да одржуваат тесни размени на високо ниво и да ја промовираат соработката во различни области.
Еден загинат, најмалку 14 ранети во руски напад врз Одеса
Најмалку едно лице е убиено, а најмалку 14 лица се ранети во руски напад со беспилотни летала врз украинскиот град Одеса на Црното Море во текот на ноќта, при што се оштетени високи згради и железничка инфраструктура, соопштија локалните власти.
„И покрај активната работа на силите за воздушна одбрана, има штета на цивилната инфраструктура, вклучувајќи станбени згради, универзитет, гасовод и приватни автомобили, изјави регионалниот гувернер на Одеса, Олег Кипер, на мрежата Телеграм.
Тој објави фотографии од запалени куќи и јагленисани повеќекатници.
Локалните служби за итни случаи соопштија дека се извршени најмалку 10 напади со беспилотни летала врз станбени згради, предизвикувајќи огромни пожари.
Украинските воздухопловни сили денеска (20 јуни) соопштија дека Русија испратила 86 дронови против Украина во текот на ноќта.
Војската соопшти дека нејзините единици за воздушна одбрана собориле 34 дронови, додека 36 дронови биле или изгубени или биле имитации на дронови кои не носеле боеви глави.
Сепак, војската соопшти дека дроновите погодиле осум населени места.
Украинската државна железничка компанија „Укрзализниција“ соопшти дека железничката станица во Одеса била оштетена во нападот, при што биле оштетени електрични жици и пруги.
Во текот на ноќта, руски дронови го нападнале и Харкив во североисточна Украина, оштетувајќи неколку приватни и повеќекатни куќи, објавија локалните власти во Харкив.
Одеса е најголемото црноморско пристаниште во Украина, клучен центар за увоз и извоз, и е под постојани ракетни и беспилотни напади од Русија од почетокот на војната.
Мултимедија
Најпосетени
Што треба да знаете