Техничкиот премиер Оливер Спасовски денеска рече дека нема штетен отпад што се увезува во државата. Тој додаде дека случувањата во Бугарија одблизу ги следат и апелираше да се проверуваат информациите посебно кога се работи за сензитивна материја како оваа.

Одговорајќи на новинарски прашања по посетата на новата операциска сала на Клиниката за торакална и васкуларна хирургија на Клиничкиот центар „Мајка Тереза“, Спасовски напомена дека и Јавното обвинителство поведе постапка за испитување на наводите во јавноста за наводно увезување штетен отпад во земјава.

„Од Министерството за животна средина и просторно планирање имаме информација дека увезувањето на отпадот е оној што е дозволен и за кој се поседуваат одредени сертификати, дека нема штетен отпад што се увезува во државата. Добро е што Град Скопје презема чекори за средување на состојбите. Институциите тоа мора да го следат“, истакна премиерот.

Темата за увоз на отпад деновиве е актуелна и во Бугарија каде Обвинителството во Бургас отвори истрага против фирмата „Блацион ООД“ за нерегулиран увоз на отпад. Во сопственичката структура на таа фирма се јавуваат македонските државјани Горан Ангелов кој беше и доскорашен директор на скопската депонија Дрисла и Блаже Игнатовски кој во Дрисла се јавува како содружник.

Девизните резерви се во сигурни раце и изнесуваат 4,6 - 4,7 милијарди евра, што е сосема комотна позиција за земјата, а покриваат околу 4,5-месечни вредности на увозот додека светскиот стандард што се препорачува е 3 до 3,5.

Oва денеска (22 јули) го изјави гувернерот на Народната банка (НБ), Трајко Славески на отворената работна средба со претседателот на Стопанската комора, Бранко Азески.

Гувернерот истакна дека дел од македонските девизни резерви се во злато кое се чува во Банката во Англија, но и дека златните резерви, засега не се на задоволително ниво, а тој не знае зошто е прекината практиката земјата да не го зголемува износот на монетарното злато.

„Во минатото НБ од рудниците го откупуваше златото и го ставаше во златните резерви. Моментно тие не се на задоволително ниво. Златото барем последната година двојно ја зголеми цената. Секогаш кога настанува некоја несигурност во светот, инвеститорите бегаат во сигурни средства, а едно од нив е златото“, потенцира Славевски.

Тој потсети дека висината на девизните резерви е клучен фактор за одржување на фиксниот девизисен курс кога има нестабилност на светските пазари.

Видете и ова:

Славески -  Со повисоки камати да се скрши 'рбетот на инфлацијата

Во текот на јавната дискусија, Азески, пак, укажа дека за бизнисот сѐ уште клучни проблеми се борбата против корупцијата, сложените банкарски процедури за граѓаните и компаниите, но и транспарентноста која како што посочи „никаде ја нема, на пример за државната помош со странските инвеститори, за стоковните резерви, за девизните резерви“.

Светската здравствена организација (СЗО) соопшти дека израелската копнена офанзива во централна Газа ги попречила напорите да продолжи со својата работа, бидејќи погодени се нејзини објекти.

Оваа агенција на Обединетите нации (ОН) ги обвини израелските сили за напад врз зграда во која се сместени нејзините вработени и нивните семејства во градот Деир ал-Балах и за злоупотреба на оние што биле внатре.

Израелската војска сè уште не ги коментираше обвинувањата.

Илјадници Палестинци се насилно раселени како последица на првата голема воена операција на израелската војска во Деир ал-Балах од почетокот на војната што Хамас - организација прогласена за терористичка организација од страна на САД и ЕУ - ја започна пред 21 месец.

Од ОН соопштија дека добиле извештаи за тешко неухранети луѓе кои пристигнуваат во клиниките и болниците во критична состојба.

Во неделата (20 јули), израелската војска нареди итна евакуација на шест блока јужно од Деир ал-Балах, предупредувајќи дека ќе дејствува „со голема сила за да ги уништи непријателските капацитети и терористичката инфраструктура“.

Се проценува дека помеѓу 50.000 и 80.000 луѓе што живеат во погодените области добиле наредба да се преселат во јужна Газа.

Видете и ова:

Израел издаде наредба за евакуација на централниот дел на Појасот Газа

Канцеларијата за хуманитарни прашања на ОН соопшти дека персоналот на ОН ќе остане во Деир ал-Балах и покрај наредбата за евакуација.

Според организацијата, околу 87 проценти од Газа сега е под израелски наредби за евакуација, принудувајќи 2,1 милиони луѓе да се преселат во област од само 46 квадратни километри, каде што недостасуваат дури и најосновните потреби.

Израелски извори го наведоа можното присуство на израелски заложници што ги држи Хамас како причина зошто Деир ал-Балах досега не е цел на копнена офанзива.

Се верува дека најмалку 20 до 50 заложници сè уште се живи.

Семејствата на заложниците изразија загриженост, велејќи дека офанзивата би можела да им го загрози животот.

Израел ја започна својата воена кампања во Газа како одговор на нападот на Хамас врз јужен Израел на 7 октомври 2023 година, во кој беа убиени 1.200 луѓе, а околу 240 беа земени како заложници.

Палестинските здравствени власти велат дека повеќе од 59.000 луѓе загинале во Газа од тогаш.

Украинскиот претседател Володимир Зеленски изјави дека нова рунда мировни преговори со Москва е закажана за 23 јули во Турција, додека Западот го засилува притисокот врз Кремљ да се согласи на прекин на огнот, иако руските сили продолжуваат со смртоносните воздушни напади врз Киев и други украински градови.

„Денес разговарав со Рустем Умеров за подготовките за размена на затвореници и уште еден состанок со руската страна во Турција“, рече Зеленски во своето вечерно видео обраќање на 21 јули, осврнувајќи се на новиот шеф на Советот за национална безбедност и одбрана на Украина.

„Умеров извести дека состанокот е закажан за среда [23 јули]. Повеќе детали ќе следат утре“, додаде тој.

Умеров претходно беше министер за одбрана на Украина и ги водеше првите две рунди разговори со Русија.

Два дена претходно, Зеленски рече дека испратил предлог до Москва за одржување нова рунда разговори следната недела, откако по разговорите минатиот месец не се постигна напредок кон завршување на војната.

„Мора да се направи сè за да се постигне прекин на огнот“, рече Зеленски во своето редовно вечерно обраќање на 19 јули, додавајќи дека „руската страна мора да престане да се крие од донесување одлуки“.

Доколку страните се сретнат во Турција, тоа ќе биде првата средба лице в лице во последните седум недели. Турската влада соопшти дека разговорите ќе се одржат во Истанбул.

Кремљ не го потврди датумот или локацијата на следната рунда разговори, велејќи само дека чека повеќе детали и додавајќи дека двете страни остануваат „дијаметрално спротивставени“ за тоа како да се стави крај на долготрајниот и смртоносен конфликт.

„Постои нашиот нацрт-меморандум - постои и нацрт поднесен од украинската страна. Треба да има размена на мислења и дискусии за овие два нацрта, кои во моментов се дијаметрално спротивни“, изјави портпаролот на Кремљ, Дмитриј Песков.

Видете и ова:

Русија обвинета за „кражба“ на иднината на Украина со присилна депортација на деца

Кремљ соопшти дека ги поздравува новите разговори, но дека „најважно за нас е да ги постигнеме нашите цели. Нашите цели се јасни, очигледни. Тие не се променети“.

Тие, исто така, инсистираа дека секој мировен договор мора да вклучува препуштање на контролата од страна на Украина и нејзино повлекување од четири региони што Русија незаконски ги анектираше во септември 2022 година, но никогаш целосно не ги окупираше.

Украина, исто така, мора да се откаже од своите аспирации за членство во НАТО и да прифати строги ограничувања на своите вооружени сили - барања што Украина и нејзините западни сојузници цврсто ги отфрлаат.

Руската државна новинска агенција ТАСС цитираше неименуван извор кој изјави дека следната рунда разговори веројатно ќе се одржи во Турција, но може да биде закажана за 24 или 25 јули.

Зеленски претходно им рече на украинските дипломати: „Нашата агенда е јасна: враќање на воените заробеници, враќање на децата киднапирани од Русија и подготовка на состанок на лидерите“.

Американскиот претседател Доналд Трамп во последните недели изрази фрустрација поради недостатокот на напредок кон прекин на огнот и минатата недела ѝ даде на Москва 50 дена да се согласи на договор или да се соочи со построги санкции.

Рускиот претседател Владимир Путин ги отфрли поканите на Зеленски за лична средба и честопати ја доведуваше во прашање легитимноста на избраниот украински лидер.

Претходните разговори се одржаа во Истанбул на 16 мај и 2 јуни. Тие разговори доведоа до размена на затвореници и посмртни останки на загинатите војници, но немаше видлив напредок кон евентуален прекин на огнот предизвикан од целосната руска инвазија врз Украина која почна во февруари 2022 година.

Министерството за финансии (МФ) ја исплати главницата и каматата за втората година од издадената прва Граѓанска обврзница, на сметките на 1 448 граѓани.

На граѓаните кои на аукцијата во 2023 година запишаа граѓански обврзници им се исплатени вкупно 1,4 милијарди денари (23,5 милиони евра), износ кој беше запишан во граѓански обврзници и камата за втората година во износ од 72,4 милиони денари (1,2 милиони евра).

Првата граѓанска обврзница беше издадена на 13 јули 2023 година со рок на достасување од 2 години и каматна стапка од 5% годишно.

Каматата се исплаќаше годишно, па во јули 2024 година беа исплатени 72,4 милиони денари (1,2 милиони евра), а овој јули уште толку.

Видете и ова:

Наместо пари под перница, инвестиција во обврзница

Граѓанската обврзница беше воведена како иновативен производ наменет за граѓаните, а со цел унапредување на пазарот на државни хартии од вредност.

Министерството за финансии издаде две емисии на граѓански обврзници во вкупен износ од 41,1 милион евра. Втората Граѓанска обврзница беше издадена на 7 ноември 2023 година во износ од 17,6 милиони евра и доспева во ноември 2025 година.

Вкупно 38 пожари на отворен простор се евидентирани изминатото деноноќие. Под контрола се пет, активни се шест, а изгаснати се 27 пожари, соопштија од Центарот за управување со кризи (ЦУК).

Активни се пожарите во село Нивичино, Мал Готен и Малешевските планини во општините Василево, Радовиш и Берово.

Во Општина Македонски Брод, во селото Грешница гори мешана шума и сува трева, помеѓу селата Локвица и Крапа гори деградирана дабова шума, грмушки и ниска вегетација во село Латово, кај месност Маркова Стапалка горат грмушки и сува трева.

Во Општина Прилеп активни се пожарите во село Штавица кон селата Чумово, Волково и Прилепец, а во Општина Желино пожар има помеѓу селата Церово и Групчин.

Под контрола се пожарите во Општина Ресен, Општина Дојран, Општина Велес, Општина Гостивар и во Општина Прилеп, велат од ЦУК.

Иран не планира да се откаже од својата нуклеарна програма, вклучително и збогатувањето на ураниум и покрај обемната штета нанесена на неговите постројки како резултат на американските напади минатиот месец, изјави иранскиот министер за надворешни работи, Абас Арагчи.

Иран нема планови да се откаже од својата нуклеарна програма, вклучително и збогатувањето на ураниум, и покрај обемната штета нанесена на неговите постројки од американските напади минатиот месец, изјави иранскиот министер за надворешни работи, Абас Арагчи.

Во интервју за американскиот телевизиски канал „Фокс њуз“, Арагчи рече дека збогатувањето на ураниум засега е запрено бидејќи „штетата е сериозна и тешка“.

„Но, секако не можеме да се откажеме од збогатувањето, бидејќи тоа е достигнување на нашите научници“, рече тој, нарекувајќи го целиот процес „прашање на национална гордост“.

Според него, секој нуклеарен договор што може да се постигне мора да го вклучува правото на збогатување на ураниум.

На прашањето дали збогатен ураниум бил складиран некаде по нападот, Арагчи рече дека „нема детални информации“, но дека Организацијата за атомска енергија на Иран се обидува да „направи проценки за тоа што точно се случило со збогатениот материјал“.

На 22 јуни, Вашингтон бомбардираше три нуклеарни постројки во Иран во знак на поддршка на 12-дневната воена офанзива на Израел.

Видете и ова:

Во услови на длабока недоверба САД и Иран се подготвени за продолжување на нуклеарните разговори

Американската војска, исто така, го таргетираше и главниот центар за збогатување на ураниум, Фордоу, кој се наоѓа јужно од Техеран.

Американскиот претседател Доналд Трамп постојано повторуваше дека нападите биле успешни и дека сите три ирански објекти биле „целосно уништени“.

Изјавите на иранскиот министер доаѓаат во време кога се очекува Техеран да одржи нови разговори за својата нуклеарна програма со Германија, Франција и Обединетото Кралство. Разговорите ќе се одржат во Истанбул во петок.

Во врска со преговорите со САД за регионални заштеди, Арагчи рече дека Иран е отворен за разговори, но „не директно во овој момент“.

Тој вели дека Техеран е подготвен да преземе каква било акција за градење доверба за да докаже дека неговата нуклеарна програма е за мирни цели во замена за укинување на санкциите на САД.

Иранскиот министер призна дека Иран ќе продолжи да развива и произведува ракети.

И покрај значителниот број ракети насочени кон Израел за време на 12-дневниот конфликт, Арагчи тврдеше дека Иран сè уште има „одредена количина ракети за заштита“.

Во денешна Русија, дури и споделувањето информации од книги што се слободно достапни во книжарниците може да доведе до години затвор. Токму тоа му се случи на Григориј Скворцов, 35-годишен фотограф и музичар од Перм.

Тој, како и илјадници други низ целата земја, купил книга од 2021 година наречена „Тајни советски бункери“, напишана од историчарот Дмитриј Јурков. Книгата содржи бројни дијаграми на некогаш тајни советски објекти кои неодамна беа декласифицирани.

Книгата, исто така, доаѓаше со дополнителни дигитални материјали, кои Скворцов исто така ги купи. Подоцна споделил некои од овие документи со неименуван американски новинар.

Во ноември 2023 година, додека еден пријател го посетувал, руската полиција извршила рација во неговиот стан во Перм.

Според роднина, полицијата снимала сè што се случило.

„Го претепале и го навредувале“, изјавил роднината на фотографот за „Сибирските реалности“ на Радио Слободна Европа.

„Потоа го принудиле да му каже на камерата кому ги испратил информациите од книгата на Јурков“.

Роднината, која сакала да остане анонимна, рекол дека поминале месеци откако Скворцов комуницирал со Американецот и дека полицијата морала да го потсети на идентитетот на Американецот. „Тие самите му го кажале името, практично му го „предложиле““, рекол тој.

Од инвазијата на Украина во 2022 година, Русија драстично ја проширила дефиницијата за она што може да се смета за „државна тајна“.

Во случајот на Скворцов, немало парична размена, а пријателите тврдат дека документите биле испратени за да му помогнат на лице со слични интереси - вообичаена практика меѓу урбаните истражувачи и љубителите на историјата. „Тој немал себични цели“, рекол еден пријател за „Сибирските реалности“.

Пријателите на Григориј Скворцов велат дека архитектурата отсекогаш му била страст. Во 2010 година дипломирал на Градежниот факултет во Перм, со насока архитектура, но набрзо постигнал успех како фотограф.

„Никој не му бил рамен кога станувало збор за фотографирање индустриски згради. Тој го обожавал тоа - покриви, напуштени згради - знаел како да направи визуелно задоволство дури и од обична работилница“, рекол колега.

„Градежните компании од Перм и други делови на Русија му нарачувале промотивно снимање“, се сеќава еден познаник од Перм. „Се сеќавам дека дури и имал изложба во зградата на локалната администрација. Беше многу баран.“

Во 2017 година, Скворцов го основа бендот Jagath, кој негува музички жанр познат како индустриски амбиент. На веб-страницата на бендот пишува:

„Ние ја создаваме нашата музика на напуштени индустриски локации - на дното на влажни подземни канализации и во огромни шупливи резервоари за нафта.“

Иако нивната музика се смета за алтернативна, таа беше објавена под покровителство на британска издавачка куќа, а го привлече и вниманието на германското музичко списание Sonic Seducer. За време на интервјуто за списанието, Скворцов го изрази своето противење на руската инвазија на Украина.

Неговите пријатели веруваат дека некој што го прочитал интервјуто го пријавил Скворцов во Федералната служба за безбедност (ФСБ) на Русија.

На прашањето како руските безбедносни служби откриле дека Скворцов му предал историски материјали на американски новинар, неговите роднини рекле дека веруваат оти надзорот врз него започнал по интервјуто, околу една година пред неговото апсење во ноември 2023 година.

Скворцов тврди дека негов познаник бил под надзор на ФСБ поради споделување материјали од книгата „Тајни советски бункери“. После тоа, тој го контактирал американскиот новинар и го замолил да не ги објавува материјалите што претходно му ги испратил.

Во писма до пријателите, Скворцов тврди дека руските власти отвориле случај против него за да ги прикријат сопствените недостатоци, не забележувајќи дека потенцијално чувствителни информации слободно се продаваат и споделуваат преку интернет.

„Немав пристап до државни тајни и немав злонамерна намера“, напишал фотографот од притвор.

„Овие информации не беа заштитени од државата... Обвинителството и судовите ги игнорираат овие факти и го третираат случајот формално, очигледно од страв од репресија од страна на ФСБ.“

Пријателите и поддржувачите на фотографот, кои формирале своја група на Телеграм, велат дека имаат намера да се жалат на пресудата.

Претседателот на Собранието, Африм Гаши на денешниот брифинг со новинарите истакна дека прашањето за учеството на независните кандидати на претстојните локлани избори ќе мора да се реши, но ,ни самиот не знае како и кога би се согласиле парламентарните партии да го донесат законот.

Тој потенцира дека ова прашање ако не се реши до одморите, ќе мора по одморите кон крајот на август.

„Препораките на Уставниот суд беа да се донесе нов Изборен законик, кој ни е во процедура но не можеме да го поминеме, откако во март ги укина членовите со кои на независните кандидати им беа потребни зголемен број потписи за да се кандидираат на избори, но еве сега и на крајот на јули не се исполнети условите за да се донесат новите норми. Имаше согласност од големите партии, а се противеа ДУИ и Левица. Ако имаме услови до крајот на месецов би го изгласале, ако не, не знам. Ќе треба да се продолжи по старите решенија да се оди на избори. Ќе треба да најдеме решение. Ова сме го збореле на координации со координаторите на сите пратенички групи дека Изборниот законик е нешто што е приоритетно и мораме да најдеме начин да го решиме“, рече Гаши.

Видете и ова:

Јовановски: Како независни очекуваме подобри резултати на изборите

Гаши соопшти дека во првите 10 дена на август се очекува да ги распише локалните избори кои треба да се одржат во октомври.

„Не можам да ви тврдам кога ќе ги распишам изборите, затоа што се поврзани некои теми. Сакаме да решиме некои проблеми, за да не биде тоа после пречка“, рече тој.

Гаши потенцира дека уште два-три закони остануваат да се донесат, а кои се поврзани со Бадентер.

За Предлог-законот за правична застапеност, кој се очекува Владата да го прати на мислење до Венецијанската комисија, Гаши нагласи дека подобро е да ги апсолвираат сите дилеми пред да почне законодавната постапка, за кога ќе го изгласаат веднаш да се применува.

„Не сме информирани и консултирани. Мислам дека Владата постапува како што таа мисли дека е во ред. Сепак, работата на Собранието почнува во моментот кога еден закон се приложува во нашата архива и во моментот кога почнува законодавната постапка. Оттогаш Собранието стапува на сила. Тој е политички дел. Владата, парламентарното мнозинство сакаат да ги разгледаат сите можности, да се направат сите можни консултации, тука мислам и на Венецијанската комисија, за кога ќе дојде во Собрание да не го враќаме назад, туку да биде финална постапка. Не значи дека ќе го прифатиме така каков што е, но со што помалку дилеми да се влезе во собраниска процедура е подобро“, рече Гаши.

Видете и ова:

Институцијата што ги штити граѓанските права остана незаштитена

Спикерот информира дека е објавен огласот за нов Народен правобранител на местото на досегашниот Насер Зибери на кого му престана функцијата поради исполнување на условите за старосна пензија.

Премиерот Христијан Мицкоски изјави дека интензивно работи со професори и со министерот за економија и труд, Бесар Дурмиши за преземање мерки за намалување на цените на производите, како и на предлог за нови анализи за потрошувачката кошничка.

Мицкоски очекува наскоро да биде закажан Економско-социјалниот совет (ЕСС), а на состанокот ќе се разговара и на темата за потрошувачката кошничка.

„На тој Економско-социјален совет претставниците на синдикатите, на работодавачите и Владата ќе разговараат и за потрошувачката кошничка, којашто мислам дека треба да биде поделена во пет сегменти: потрошувачката кошничка за самец, потрошувачка кошничка за млад брачен пар, за трочлено семејство, за четири члено семејство и потрошувачка кошничка за пензионери. Мислам дека треба во иднина да опфатиме анализа на пет потрошувачки кошнички, затоа што потребите на луѓето се според возраста, се разбира. Но, исто така потребите на луѓето се во зависност од бројноста, како е сочината една заедница“, изјави премиерот Мицкоски.

Премиерот додаде дека ова ќе биде неговиот предлог на Економско-социјалниот совет, а доаѓа по средбите и разговорите со академската фела.

„Мислам дека е добар за разгледување и за дебата на тој Економско-социјален совет, да имаме неколку потрошувачки кошнички, бидејќи потребите на еден пар пензионери не е ист како на еден млад брачен пар, или пак на трочлено и на четири члено семејство или пак на самец. Јас немам проблем да направиме една ваква темелна анализа, бидејќи само со повеќе анализи, со повеќе податоци можеме да дојдеме до подобри резултати“, вели Мицкоски.

Сојузот на синдикатите на Македонија (ССМ) денеска објави дека вредноста на синдикалната минимална кошница за домаќинство за јули 2025 година изнесува 65.328 денари и е зголемена за 630 денари во однос за јуни кога изнесуваше 64.698 денари.

Видете и ова:

Јулската синдикална кошница зголемена за 630 денари во однос на јуни

Според опозицискиот СДСМ, зголемувањето на синдикалната минимална кошничка е нов удар за граѓаните. Животот станува уште поскап, инфлацијата притиска, а куповната моќ на граѓаните е срушена, оценуваат од партијата.

„Овие поразителни бројки се резултатот од една година владеење на ВМРО ДПМНЕ – целосно промашена, аматерска економска политика. Ова е показател за целисниот дебакл на економските политики на Владата. Со ВМРО-ДПМНЕ граѓаните од ден во ден стануваат се посиромашни. Не само што немаат план како да се справат со растечката инфлација, туку упорно не прифаќаат ниту еден предлог што го понуди СДСМ за намалаување на цените и зголемување на платите“, се вели во партиското соопштение.

Косовските пратеници не успеаја во својот 50-ти обид да формираат собрание, и покрај најавите дека во текот на викендот може да се постигне договор за ставање крај на кризата предизвикана од институционалната блокада поради несогласувањата меѓу парламентарните партии.

На седницата во понеделник беа присутни 104 од 120 пратеници.

Фатон Пеци од партијата Гуксо, која е во коалиција со Движењето Самоопределување и Алтернативата, рече дека се вложени големи напори за формирање на собранието и ги повика сите пратеници да размислат за ситуацијата.

„Напорите продолжуваат. Вршителот на должноста премиер (Албин Курти) даде конкретни понуди до некои политички партии. Моментално, понудата е до Социјалдемократската иницијатива, додека во претходната фаза имаше понуди да се разговара за заедничка поделба на власта со Демократската лига на Косово“, изјави Пеци пред новинарите.

Видете и ова:

Конституирањето на Собранието на Косово повторно пропадна: Дали мандатите на пратениците се во опасност?

Тој потсети дека според Уставот на Косово, функцијата претседател на Собранието ѝ припаѓа на најголемата парламентарна група, во овој случај на Движењето Самоопределување.

Парламентарните партии со месеци не можат да најдат компромисно решение, а рокот за конституирање на Собранието, според Уставниот суд, истекува на 26 јули. Сепак, одлуката на судот не прецизира што ќе се случи ако партиите не постигнат договор до крајниот рок.

Претседателката на Косово, Вјоса Османи, најави дека оваа недела ќе се обрати до Уставниот суд за понатамошни чекори.

Застојот во конституирањето на косовското собрание настана затоа што најголемите албански партии не сакаа да ја поддржат кандидатката на Самоопределување за претседател на Собранието, Албулена Хаџиу, по што, од 1 мај, претседателот на конститутивната седница почна да предлага тајно гласање - на што повторно се спротивставуваат партиите што беа во опозиција во претходното собрание.

Самоопределување победи на парламентарните избори во февруари, но нема доволно гласови за самостојно да формира нови институции.

По седницата во понеделник, лидерот на Демократската лига на Косово, Лумир Абдиџику, изјави дека не очекува решение во наредните денови.

„Она што се очекува е дека, по рокот од 30 дена што завршува на 25 јули, ќе добиеме ново толкување од Уставниот суд на Република Косово. Сепак, веќе имаме едно толкување, како и негово непочитување. Ова значи дека имаме пресврт на уставниот поредок“, рече тој.

Во меѓувреме, во текот на викендот, лидерот на Самоопределување, Албин Кирти, и лидерот на Социјалдемократската иницијатива, Фатмир Лимај, се сретнаа, но деталите од состанокот не беа објавени.

Пратеничката на Социјалдемократската иницијатива, Џевахире Измаку, изјави дека нејзината партија побарала Лимај да биде номиниран за претседател на Собранието.

Пратениците од Демократската лига на Косово и Алијансата за иднината на Косово во понеделник повторија дека нема да гласаат за Лимај доколку тој биде номиниран за претседател на Собранието.

Пратениците од Демократската партија на Косово претходно изјавија дека нема да гласаат за ниту еден кандидат кој претходно имал министерски позиции.

Од друга страна, лидерот на партијата „За слобода, правда и опстанок“, Ненад Рашиќ - кој е и министер во сегашната влада - изјави дека ќе гласа за Лимај доколку Самоопределување го номинира.

За избор на претседател на Собранието на Косово се потребни 61 глас од пратениците. Движењето „Самоопределување“ освои 48 пратеници на изборите на 9 февруари, Демократската партија на Косово 24, Демократскиот сојуз на Косово 20, Српската листа 9, а коалицијата Алијанса за иднината на Косово – Социјалдемократска иницијатива 8. Уште 11 места им припаднаа на заедниците кои не се мнозинство, но Дуда Бале, Ветон Бериша и Адем Хоџа изјавија дека нема да поддржат никого додека не се исполнат нивните услови.

Земјите од Квинт досега во неколку наврати повикаа на брзо формирање на нови институции, додека граѓанското општество во Косово во неколку наврати протестираше пред зградата на Собранието, повикувајќи ги пратениците на одговорност.