Вести
Во Украина се водат тешки борби
Тешки борби меѓу украинските и руските сили се во тек денеска во делови од источна Украина и североисточниот регион Харкив. Претседателот Володимир Зеленски рече дека источниот регион Доњецк останува главен стратешки приоритет на Украина со борби во неколку градови додека руските трупи се обидуваат да напредуваат кон југ и запад. Зеленски во своето ноќно видео обраќање рече дека воената ситуација во Доњецк е „особено тешка“. „Правиме сè за да ја задржиме непријателската активност. Ова е нашата цел број 1 во моментов, бидејќи Донбас сè уште е цел бр. 1 за окупаторите“, рече Зеленски. Регионалните власти во меѓувреме соопштија дека Русија извршила најмалку пет напади врз цели во регионот на Одеса, користејќи ирански беспилотни летала.
Зеленски: интензивните борби покажуваат „позитивни резултати“
Руски проектили го нападнаа аеродромот во Кривиј Рих во централна Украина, уништувајќи ја инфраструктурата и го направија аеродромот неупотреблив, изјави на Телеграм Валентин Резниченко, гувернер на регионот Дњепропетровск. Јужната команда на Вооружените сили на Украина на 27 септември денеска соопшти дека нејзината контраофанзива во југоисточниот регион Керсон резултирала со непријателски загуби на 77 војници, шест тенкови, пет хаубици, три противвоздушни инсталации и 14 оклопни возила. Тврдењето не можеше да се потврди независно. Борби се водеа и во регионот Харкив на североисток, кој беше цел на украинска контраофанзива овој месец. Украинските сили во меѓувреме продолжија со кампањата да ги оневозможат четирите моста и другите речни премини за да ги нарушат линиите за снабдување на руските сили на југ.
види ги сите денешни вести
Германија го запира извозот на воена опрема во Израел што би можела да се користи во Газа
Германија нема да одобри никаков извоз на воена опрема што би можела да се користи во Газа „до понатамошно известување“, објави канцеларот Фридрих Мерц на 8 авгус. Ова е пвиот одговор на еден од најсилните меѓународни поддржувачи на Израел по одлуката соопштена од кабинетот на израескиот премиер Бенјамин Нетанјаху да ја преземе контролата врз Газа.
Нетанјаху претходно изјави дека сака да го преземе целиот Појас Газа - одобрениот план конкретно се фокусира на градот Газа, најголемиот град во енклавата.
Во соопштението, Мерц нагласи дека Израел „има право да се брани од теророт на Хамас“ и рече дека ослободувањето на израелските заложници и целните преговори за прекин на огнот во 22-месечниот конфликт „се наш врвен приоритет“. Тој рече дека Хамас не смее да има улога во иднината на Газа.
„Уште построгата воена акција на израелската армија во Појасот Газа, одобрена од израелскиот кабинет синоќа, ѝ отежнува на германската влада да види како ќе се постигнат овие цели. Под овие околности, германската влада нема да одобри никаков извоз на воена опрема што би можела да се користи во Појасот Газа до понатамошно известување“, додаде тој.
Не беше веднаш јасно која воена опрема од Германија ќе биде засегната, јавува новинската агенција Асошиетет прес.
Германската влада останува длабоко загрижена за страдањето на цивилите во Газа, рече Мерц.
„Со планираната офанзива, израелската влада носи уште поголема одговорност од порано за обезбедување на нивните потреби“, рече Мерц.
Тој го повика Израел да дозволи сеопфатен пристап за испораките на помош, вклучително и за организациите на ОН и други невладини организации - и рече дека Израел „мора да продолжи сеопфатно и одржливо да се справува со хуманитарната ситуација во Газа.“
Мерц, исто така, ја повика израелската влада „да не презема никакви понатамошни чекори кон анексирање на Западниот Брег“.
Овој потег има посебна тежина бидејќи Германија се смета за еден од најсилните поддржувачи на Израел, веројатно надминат само од Соединетите Држави.
Владата на Мерц не се придружи на најавите на претседателот Емануел Макрон на клучниот германски сојузник Франција и на британскиот Кир Стармер дека планираат формално да ја признаат палестинската држава во септември.
Германија со децении одржува силно произраелски став, главно поради нејзината историска одговорност за Холокаустот, кој ја обликуваше нејзината повоена надворешна политика околу обезбедувањето на безбедноста на Израел и борбата против антисемитизмот, јавива новинската агенција Асошиетет прес.
Десет мртви, 33 исчезнати во поплавите во северозападна Кина
Десет лица загинаа, а 33 се водат како исчезнати по ненадејните поплави во северозападната кинеска покраина Гансу, објавија државните медиуми во петокот.
„Од 7 август, континуираните обилни дождови предизвикаа ненадејни поплави. Од 15:30 часот на 8 август, 10 лица загинаа, а 33 се водат како исчезнати“, објави државната телевизија CCTV.
Кинескиот претседател Си Џинпинг нареди „максимални напори“ за спасување на исчезнатите лица, соопшти телевизијата.
Поради „честата појава на екстремни временски услови“, Си им нареди на сите региони да ги зајакнат напорите за идентификување на ризиците.
Снимките споделени од кинеските противпожарни власти на Weibo покажаа спасувачи како водат луѓе низ вода во едно село, додека фотографиите објавени од владата на Гансу покажаа патишта покриени со тиња и големи камења.
Природните катастрофи се чести низ Кина, особено во лето кога некои региони доживуваат обилни дождови, додека други се печат на жешкото време.
Обилните дождови во северен Пекинг минатиот месец убија 44 лица, а руралните предградија на главниот град беа најтешко погодени.
Кина е најголемиот емитер во светот на стакленички гасови кои предизвикуваат климатски промени и придонесуваат за почести и поинтензивни екстремни временски услови.
Но, таа е исто така и глобална сила за обновлива енергија која има за цел да ја направи својата огромна економија јаглеродно неутрална до 2060 година.
OН: Израел мора што поскоро да го запре планот за целосна контрола на Газа
Израел мора да го запре својот план за Газа „што е можно поскоро“, изјави високиот комесар на ОН за човекови права, Волкер Турк.
„Оваа понатамошна ескалација ќе резултира со поголемо масовно присилно раселување, повеќе убиства, повеќе неподносливо страдање, бесмислено уништување и ужасни злосторства. Војната во Газа мора веднаш да заврши. На Израелците и Палестинците мора да им се дозволи да живеат еден до друг во мир“, рече тој.
На 8 август, израелскиот кабинет за безбедност одобри план за преземање на контролата врз градот Газа, објави канцеларијата на премиерот Бенјамин Нетанјаху.
Турк додаде дека израелската влада „треба да ги вложи сите свои напори за спасување на животите на цивилите во Газа со тоа што ќе овозможи целосен, непречен проток на хуманитарна помош“.
Тој, исто така, ги повика палестинските вооружени групи „веднаш и безусловно“ да ги ослободат сите преостанати заложници.
Нетанјаху претходно изјави дека сака да го преземе целиот Појас Газа - одобрениот план конкретно се фокусира на градот Газа, најголемиот град во енклавата.
Претходно, ОН предупреди дека проширувањето на воените операции на Израел ризикува „катастрофални последици“ за палестинските цивили и израелските заложници.
Контроверзната ескалација наидува на отпор во Израел - вклучително и од семејствата на заложниците и веројатно дополнително ќе ја изолира земјата на меѓународно ниво, објавува Би-Би-Си.
Израел ја започна војната во Газа по нападот на Хамас на 7 октомври 2023 година, во кој загинаа околу 1200 луѓе и беа земени 251 заложник во Газа.
Масовната израелска воена офанзива уби најмалку 61 158 Палестинци од тогаш, според Министерството за здравство во Газа, кое го води Хамас, палестинско движење кое САД и Европската Унија го сметаат за терористичко.
Трговците, производителите и дистрибутерите на средба кај Дурмиши за цените на храната
Министерот за економија и труд Бесар Дурмиши денеска попладне (8 август) ќе има средба со трговците, производителите и дистрибутерите на која ќе стане збор за цените на прехранбените производи. Како што информира, ова ќе биде крајна опомена и предупредување до нив да се однесуваат соодветно. Во спротивно, најави дека Владата ќе воведе ригорозни мерки.
„Нашето барање е да дејствуваат соодветно, да не ги зголемуваат цените. Ова ќе биде крајна опомена и предупредување до нив. Во спротивно, ќе преземеме мерки кои ќе бидат ригорозни. Ако се однесуваат како претходните месеци, ќе преземеме соодветни чекори, ќе донесеме остра одлука. Со тоа што ги викаме на средба, значи дека се подготвуваме за преземање мерки, истакна министерот“, одговорајќи на новинарски прашања.
Инаку министерот на денешната прес-конференцијата ја промовираше мерката „училишна кошничка“ што вчера ја донесе Владата.
Мерката која ќе важи од 15 август до 15 септември 2025 година, предвидува намалување на цените на школскиот прибор за најмалку 10 отсто во трговијата на големо и 15 проценти во трговијата на мало.
Мерката ќе важи за сите видови продавници кои продаваат училишен прибор-книжарници, супермаркети, спортски продавници, а опфаќа широк спектар производи: тетратки, ранци, моливи, боици, фломастери, калкулатори, ножици, лепак, папки и други основни материјали.
Секој производ што ќе биде опфатен ќе биде јасно означен со натписот „Помалку трошоци, повеќе за тебе“, а во сите продавници ќе биде поставен плакат со информации за мерката.
Цените ќе се споредуваат со референтната цена од 1 јуни 2025 година или со набавните документи за поново внесените производи.
САД ја удвоија наградата на 50 милиони долари за апсење на Мадуро
Соединетите Држави (САД) на 8 август објавија дека ја дуплирале наградата, на 50 милиони долари, за апсење на венецуелскиот претседател Николас Мадуро, кој е обвинет од американските власти за трговија со дрога.
„Денес, Министерството за правда и Државниот департмент објавуваат награда од 50 милиони долари за информации што ќе доведат до апсење на Николас Мадуро“, напиша главниот обвинител Пам Бонди на социјалната мрежа X.
Претходната награда објавена во јануари беше 25 милиони долари.
САД сметаат дека изборот на Мадуро за претседател во јануари, за време на администрацијата на Џозеф Бајден, е нелегитимен.
Во јули оваа година, неговата партија освои огромно мнозинство градоначалнички места на локалните избори, кои беа обележани со бојкот од страна на опозицијата.
Истиот месец беше првата годишнина од претседателските избори на кои Мадуро беше прогласен за победник.
Националниот изборен совет ја прогласи Мадура за победник на претседателските избори, без да даде детали за гласањето, тврдејќи дека била жртва на компјутерско хакирање што многу експерти го сметаат за неверодостојно.
Опозицијата потоа прогласи победа и ја обвини владата за измама. Поради ова, голем дел од нив ги бојкотираа парламентарните избори одржани во мај, на кои таборот на Мадуро освои 253 од 285 места, според Националниот изборен совет.
Дваесет и четири години од нападот кај Карпалак
Во Прилеп и во месноста Карпалак денеска (8 август) ќе бидат одбележани 24 години од загинувањето на армиските резервисти: Сашо Китаноски, Нане Наумоски, Бранко Секулоски, Марко Деспотоски, Ердован Шабаноски, Љубе Грујоски, Дарко Вељаноски, Веби Рушитоски, Горан Миноски и Пеце Секулоски.
Повеќе делегации ќе ги посетат вечните почивалишта на загинатите, во Прилеп и населените места, а ќе биде посетена и месноста Карпалак каде на 8 август 2001 година во заседа загинаа 10-те прилепски бранители, кога беше нападнат армискиот конвој.
Во Прилеп вчера почна одбележувањето на 24-годишнината од загинувањето на прилепските армиски резервисти кај Карпалак, со поклон пред спомен-обележјето во кругот на касарната „Мирче Ацев“.
Потполковникот Сашко Палески, командант на гарнизонот „Мирче Ацев“ во Прилеп истакна дека спомените за загинатите ќе се чуваат, со порака - „никогаш да не се повтори“!
Почит на загинатите пред спомен-обележјето во касарната оддадоа повеќе делегации, како и семејствата на загинатите и здруженија на бранителите.
Во чест на загинатите бранители, вчера беше посетен нивниот споменик во прилепското село Лениште и манастирот „Света Петка“ каде се одржа вечерна богослужба.
На 8 август 2001 година, за време на конфликтот, кај месноста Карпалак, на патот Скопје – Тетово, армискиот конвој беше нападнат од заседа. Животот го загубија десет резервисти на Армијата.
Над 350 невработени утре ќе ги потпишат договорите за ангажман во справувањето со пожарите
Вкупно 352 кандидати ја завршија дводневна теоретска и практична обука изведена во координација со претставници на Дирекцијата за заштита и спасување (ДЗС) и територијалните противпожарни единици на Град Скопје, каде се одвиваше обуката – информираше директорот на ДЗС, Стојанче Ангелов.
„Овие лица утре ќе потпишат договор за работно ангажирање во рамки на владината мерка од оперативниот план за 2025, јавни работи за заштита и превенција од пожари и оплеменување на животната средина на локално ниво (пошумување)“, додаде тој.
Ангелов денеска (7. август) истакна дека вкупно 499 кандидати се пријавиле на јавниот повик на Владата, а од нив на обука се појавиле 364 кандидати.
Центарот за управување со кризи пак, претходно денеска соопшти дека до 15 часот, имало еден активен пожар, еден под контрола и еден изгаснат пожар. на територијата на државава.
Од Центарот за управување со кризи посочија дека активен е пожарот во село Неготино, блиску до пругата, во општина Врапчиште, каде што гори ниска вегетација.
Под контрола е пожарот во валандовското село Јосифово каде што е зафатена ниска вегетација и лозови насади, а изгаснат е пожарот во село Цер, Кичевско, каде што е опожарена ниска вегетација – додадоа од ЦУК.
Инаку, за мерката за ангажирање на 400 лица, пред сѐ, во создавањето на противпожарните појаси, Владата информираше на 07. јули.
Владината портпаролка, Марија Митева на прес конференција соопшти дека секој ангажиран учесник ќе добива финансиска поддршка од 24.000 денари.
Државната изборна комисија донесе упатство за избор на нови избирачки одбори за локалните избори
Државната изборна комисија денеска (7. август), донесе неколку одлуки во пресрет на локални избори.
Комисијата усвои упатство за именување на претседател, членови и нивни заменици во избирачките одбори, што произлегува од законските обврски за формирање нови состави од редовите на државната администрација, откако годинава истече четиригодишниот мандат на избирачките одбори, кои беа избрани пред локалните избори во 2021 година.
Како што посочи претседателот на ДИК Борис Кондарко, донесена е и методологија за именување на претседател, членови и нивни заменици на новите избирачки одбори.
„Изборот ќе се спроведе преку систем на случаен избор од Министерството за јавна администрација (МЈА), согласно важечките законски процедури и врз основа на упатство за родовата и националната застапеност“, нагласи тој.
Кондарко информираше дека Предлог-методологијата за именување на претседател, членови и нивни заменици на новите избирачки одбори произлегува од донесено упатството, а се однесува за новиот избор кој ќе следи до крајот на август на новиот состав од редовите на администрацијата.
„Потоа, во септември, ќе следи нивна соодветна обука и доставување прирачници за нивната работа“, изјави претседателот на Државната изборна комисија (ДИК), Кондарко.
Тој посочи дека оваа точка е поврзана со претходно усвоеното Упатство (точка 10) и претставува „логичен следствен чекор во постапката за составување на новите избирачки одбори во пресрет на Локалните избори 2025 година“.
Едногласно беше усвоена и Предлог-одлука за измена на описот на избирачки места во кои бројот на избирачи надминува 1000 како дел од редовната постапка за усогласување со законската одредба дека на едно избирачко место не смее да има повеќе од 1.000 избирачи.
Промените се однесуваат на избирачки места во општините Гостивар, Кисела Вода, Чаир, Струмица, Куманово и во Тетово, каде што ќе се изврши нова распределба на гласачите – без да се менува вкупниот број на избирачки места. Овие одлуки се дел од подготвките за одржување на изборите во согласност со Изборниот законик и со цел обезбедување фер и ефикасен изборен процес.
ДИК ја усвои и Предлог-одлуката за измена и дополнување на Годишниот план за вкупни потреби за јавни набавки за 2025 година на ДИК.
Членот на ДИК, Ангелчо Ристов рече дека предмет на измена во Годишниот план се набавка на сервер за системскиот и софтверскиот оддел на ДИК. Втората е набавка на систем за складирање на податоци, исто така, наменет за серверскиот оддел на Комисијата.
Беше усвоена и Предлог-одлука за дополнување на Упатството за работа на Oпштинските изборни комисии и Општинската изборна комисија на град Скопје.
Воедно, комисијата го прифати Предлог-правилникот за неможност за извршување на повеќе работни обврски по два или повеќе основи во постапката за организирање и спроведување на еден ист изборен процес.
На седницата исто така, беше усвоена и Предлог-одлуката за неможност за извршување на работни обврски по два или повеќе основи во постапка за организирање и спроведување на ист изборен процес и Предлог-одлука за изгледот на беџовите за идентификација.
Во самата одлука се наведува дека следните категории лица не можат истовремено да бидат ангажирани по повеќе основи од страна на ДИК: членови на изборни органи, членови на избирачки одбори, членови и секретари на општински изборни комисии, сертифицирани обучувачи за изборни органи, лица ангажирани како помошни тела во Стручната служба на ДИК.
Кондарко најави дека на денот на распишување на изборите ДИК ќе одржи јавна седница на која ќе го донесе роковникот со изборни дејствија што ќе следат.
Според бројот на учесници, изборната администрација, вклучувајќи ги и вработените во Државната изборна комисија (ДИК), локалните избори се најголеми и најмасовни.
Карактеристично за овие избори е и тоа што дијаспората нема да може да гласа, а ако некој од македонските државјани сака да го искористи своето право тоа ќе може да го направи само доколку допатува во земјата.
Вкупниот буџет за одржување на локалните избори 2025, кој е веќе објавен, изнесува 9 милиони 760 илјади евра, од кои две третини се пари наменети за медиумите и платеното политичко рекламирање.
Осуден германски државјанин за веење знаме на „Голема Албанија“ на фудбалски натпревар
Осуден на две години условна казна доби германски државјанин за кривичното дело предизвикување омраза на меѓународниот фудбалски натпревар меѓу фудбалските клубови Шкендија и Карабах. Оваа пресуда ја донесе Основниот суд Скопје 1 по извршена идентификација, во која Основното јавно обвинителство по итна постапка покреана обвинение.
„Против него беше поднесено обвинение, бидејќи на 5 август, непосредно пред фудбалскиот натпревар помеѓу ФК „Шкендија“ и ФК „Карабаг“, со истакнување и веење знаме на „Голема Албанија“ и со натпис „Автохтона“, предизвикал чувство на омраза, раздор и нетрпеливост врз основа на етничка припадност. Тоа го забележале полициски службеници, кои го лишиле од слобода“, се вели во соопштението на ОЈО Скопје.
Во него е наведено дека врз основа на обезбедените докази Основниот кривичен суд Скопје изрече пресуда со која обвинетиот го огласи за виновен и го осуди на условна казна затвор од две години, која нема да се изврши доколку осудениот не стори ново кривично дело во следните 5 години.
Во исто време, бидејќи станува збор за странски државјанин, Судот донесе одлука да го протера и да му забрани влез во државава во следните пет години.
Во меѓувреме, МВР и Јавното обвинителство соопштија дека продолжуваат да преземаат мерки за откривање и идентификување на сторители на кривични дела на ширење на омраза и нетрпеливост поврзани со спортски натпревари.
Ова е втор спортски настан на кој во период од една недела, навивачи скандираат националистички пароли предизвикувајќи меѓуетнички препукувања.
Алиу: Бесплатен влез за онколошките пациенти на новиот паркинг на Клинички
Ќе има четири различни влезови на новиот паркинг на Клинички – најави министерот за здравство, Азир Алиу денеска (7. август).
Тој информираше дека за онколошките пациенти влезот ќе биде бесплатен, за пациенти со упат, како што рече, влезот ќе биде евтин. За вработени ќе има трета цена и за граѓани кои доаѓаат поради „икс причини“ ќе биде трета цена која што ќе биде најскапа.
„Ценовникот на паркингот нема да биде ист за сите, почнувајќи од нула денари до цени за граѓани кои што не се пациенти“, изјави Алиу по промоцијата на новиот модул за електронска евиденција на здравствените прегледи во областа на медицина на трудот.
Одговарајќи на новинарско прашање поврзано со изградбата на новиот паркинг простор на Клинички, министерот рече дека наредната недела на прес-конференција ќе соопшти повеќе детали, но, вели, она што може да го каже во овој момент е тоа дека договорот ќе биде потпишан со Јавното претпријатие Градски паркинг кое и досега раководеше со паркингот на Клинички.
„Очекуваме во текот на денот да се потпише договорот помеѓу Министерство за здравство и ЈП Градски паркинг. Исто така, ќе бидат отворени дополнителни влезови, еден од нив ќе биде отворен на Кардиологија за да може пациентите кои што имаат потреба од интервенција во таа Клиника да може директно таму да влезат“, додаде ресорниот министер.
Тој кажа дека излезите ќе бидат исти, бројот на паркинг места ќе биде двојно поголем од сега, поради оптимизацијата на просторот.
Според него, засега нема да има изградба на нов тврд или монтажен објект, бидејќи како што рече, со оваа оптимизација бројот на паркинг места ќе биде повеќе од доволно.
Прашан зошто договорот се потпишува со истата институција којашто раководеше со паркингот на Клинички, односно ЈП Градски паркинг, тој рече :„мојот пристап како министер е да се работи со институции кои имаат експертиза во областите“.
„Проблемот досега не беше во ЈП Градски паркинг, туку во менаџирање на процесите во паркингот. Знаете дека ниту ЈП Градски паркинг, ниту Министерството за здравство немаа некој процес за следење на активностите на паркингот“, истакна Алиу.
Тој посочи дека сега се дефинира начинот на плаќање, но и се дефинира начинот на креирање на извештаи во реално време.
„Значи 24 часа ќе се има мониторинг на целиот простор. Исто така, ќе има камери за следење на автомобилите. За цената сѐ уште не е разговарано, ќе треба да има промени во цената, рече Алиу.
За тоа како ќе се направи поголем број на паркинг места, министерот нагласи дека има доста неискористен простор којшто ќе се искористи. Доколку има потреба и доколку оптимизирањето на паркинг просторот не даде резултати, тој посочи дека ќе се размислува за монтирање на катна гаража.
„Знаете дека имаме позади Клинички простор којшто буквално не е достапен ни за пешаци, ниту за автомобили, едноставно тој ќе биде оптимизиран. Работеа неколку архитекти и според нив ќе имаме дупло повеќе паркинг простор отколку што имаме сега. Доколку имаме потреба и резултатите покажуваат дека и со ваков тип на паркинг места и со оптимизација на тие слободни паркинг места, нема да бидат доволни, ќе одиме со третата фаза, монтирање на катна гаража внатре“, рече Алиу.
Мултимедија
Најпосетени
Што треба да знаете