Семејствата и родителите на починатите во пожарот во клубот „Пулс“ денеска доставија писмен допис до Основното јавно обвинителство во Кочани, со кој бараат непосредна средба со обвинителите.
Барањето доаѓа по минатонеделното образложение на обвинителниот акт за трагедијата кое го даде јавниот обвинтел Љупчо Коцевски, а за што на саботниот „Марш за ангелите“ родителите нагласија дека не ги разбрале наводите.
– Како што веќе најавивме во саботата, денеска доставивме писмено барање за средба со обвинителите за подетално да ни ја образложат истражната постапка и обвинението. Претходно ја добивме информацијата дека од Обвинителството се подготвени да се сретнат со нас и откако меѓусебно ќе се договориме, ќе доставиме известување за можниот термин на средбата - истакна Марија Петрушова, мајка чиј син настрада во „Пулс“.
На последниот „Марш за ангелите“ во Кочани, родителите на младите чии животи згаснаа во пожарот, посочија дека не се правници и не го разбрале обвинението против осомничените.
„Сметаме дека е од суштинско значење Обвинителството конечно и целосно да нѐ запознае со исходот од истражната постапка и со содржината на поднесениот обвинителен акт, кои лица се опфатени, а кои се изземени од одговорност, за да ги отстраниме сите дилеми кои се јавуваат кај нас. Неприфатливо е за нас да добиеме информации преку медиуми“, порача Петрушева на маршот во саботата (14 јуни).
Поддршка за следење на целата постапка, родителите побараа и од Коалицијата за правично судење и од Транспаренси Македонија.
Јавното обвинителство вчера (15 јуни) информираше дека стои на располагање за директна средба со семејствата на загинатите. Од прес службата на Обвинителството додадоа дека ако има такво барање, во следните денови ќе организираат средба на која ќе ги информираат блиските на жртвите за сите аспекти од поднесеното обвинение, без да ја нарушат натамошната постапка.
