Вести
Мицкоски и Христовски тврдат дека имало незаконско следење, детали не откриваат
На одбележување на Денот на Агенцијата за национална безбедност (АНБ) – 1 септември, премиерот Христијан Мицкоски и директорот на оваа институција, Бојан Христовски, излегоа со тврдења дека во земјава имало незаконско следење, но детали не споделија.
На новинарско прашање како ги коментира информациите дека лично тој бил следен и прислушуван, премиерот посочи дека не би можел да зборува за детали, дека тоа е „државна тајна“ и така биле класифицирани и документите.
„Но, факт е дека двете агенции, и Агенцијата за разузнавање и АНБ темелно се занимавале со претседателот на, во тоа време, најголемата опозициска партија т.е. со мене, меѓу другото и со новинари, бизнисмени. Така што да оставиме периодот процесот да тече, да видиме што ќе каже обвинителството и судиите во еден судски процес“, изјави Мицкоски.
Мицкоски рече дека е „навикнат на таков тип на луѓе“ и оти очекува овие, како што ги нарече, „глодари“ да завршат зад решетки и еднаш засекогаш да се стави крај на злоупотребите на безбедносните агенции за вакви цели.
Повеќе детали не откри ниту актуелниот директор на АНБ, Бојан Христовски, освен што меѓу виновниците посочи еден поранешен директор на Агенцијата.
„Тоа што се случувало внатре било да една помала група составена од еден поранешен директор и помала група вработени во институцијата, и тоа како имаме индиции дека ја злоупотребиле својата службена положба. За истото е известено надлежното Јавно обвинителство и повеќе детали за ова не можам да споделам бидејќи се работи за детали кои се со виска класификација и се сензитивни“, рече Христовски додавајќи дека не сака да наруши некаков законски процес или евентуална истрага што би била отворена во иднина.
За тоа колкава група на луѓе биле прислушувани и следени, директорот не даде одговор туку им посочи на новинарите да се обратат до Јавното обвинителството.
ВМРО-ДПМНЕ како опозиција тврдеше дека во земјава продолжило незаконско следење и прислушувања, а истите обвинувања ги изнесе и по преземањето на власта по парламентарните избори во мај 2024 година.
Денеска, директорот на АНБ, обвини дека Агенција со која раководи, а чии ресурси биле злоупотребени, во пракса не доживеала никаква реформа туку сето тоа било само „фасада“.
Оваа Агенција започна со работа на 1 септември 2019 година откако во Северна Македонија беше спроведена реформа во безбедносно-разузнавачкиот сектор. Тоа значеше одземање на ингеренции за следење на комуникациите од Управата за безбедност и контраразузнавање (УБК) во рамки на МВР и формирање на Оперативно-техничката агенција (ОТА) и Агенцијата за национална безбедност (АНБ).
Реформите следуваа откако во 2016 година, СДСМ како опозиција го започна проектот „Вистината за Македонија“ обелоденувајќи ја аферата со незаконското следење на комуникациите за што почна да објавува и прислушувани разговори т.н. бомби. За аферата беше отворена и истрага, а потоа следуваше и судски процес кој во јавноста беше познат под името „Таргет-Тврдина“. Според обвинението за случајот, со прислушувањето нелегално биле таргетирани над 5.000 телефонски броеви, а опфатени биле над 20.000 граѓани.
Но, овој судски процес заврши неславно бидејќи кривични дела на обвинетите за прислушувањето застареа и случајот не дочека изрекување правосилна пресуда.
види ги сите денешни вести
До ДИК доставени 69 иницијативи за градоначалници на општините и за градоначалник на Град Скопје
До вчера на полноќ до подрачните одделенија и канцеларии на Државната изборна комисија (ДИК) доставени се вкупно 69 иницијативи за предлагање на листи за градоначалници на општините и градоначалник на Град Скопје.
Од ДИК денеска (2 септември) соопштија и дека се доставени 68 иницијативи за предлагање на листи на советници за советите на општините и советот на Град Скопје.
- Листите на кандидати заедно со евидентираните потписи како предлог и целокупната друга документација се поднесуваат до општинските изборни комисии до 13 септември 2025 година, до 24 часот, кои одлучуваат за потврдување на истите - велат од ДИК.
Потписи за независни кандидати за градоначалници се собрани за општините Пробиштип, Македонска Каменица, Куманово, Крива Паланка, Охрид, Дебарца, Прилеп, Долнени Струга, Дебар Струмица, Радовиш, Брвеница, Свети Николе, Гевгелија, Демир Капија, Кичево, Македонски Брод, Кочани, Чешиново Облешево, Битола, Могила, Новаци, Ресен, Гостивар, Демир Хисар, Виница, Сарај, Центар, Аеродром,Карпош , Шуто Оризари, Арачиново, Кисела Вода, Зелениково, Студеничани, Чучер Сандево и градоначалник на Град Скопје.
- Кон листите за кандидати поднесени од група избирачи, покрај Образецот за собрани потписи за листата за градоначалник на општината односно Градот Скопје и/или листа на кандидати за членови на советот на општината односно Советот на Градот Скопје, се доставуваат и сите документи кои се потребни согласно Упатството за начинот и постапката за поднесување на прием и потврдување на кандидатски листи за локалните избори 2025, кое е објавено на официјалната веб-страна на Државната изборна комисија.
Рокот за собирање на потписите заврши ноќеска, 1 септември 2025 година во 24 часот на полноќ, стои во соопштението од ДИК.
Локалните избори беа распишани на 9 август. Првиот круг на гласање ќе се одржи на 19 октомври, а две недели подоцна – на 2 ноември и вториот круг.
Ова ќе бидат осми по ред локални избори од независноста на државата.
Националното студентско тело бара зголемување на сумата за субвенциониран студентски оброк
Националното студентско тело бара зголемување на сумата за субвенциониран студентски оброк. Ова тело, кое е претставничко на сите студенти во државата, денеска (2 септември) преку писмено соопштение бара сумата за субвенционираниот оброк да се искачи од 140 на 150 денари.
Барањето доаѓа пред носењето на републичкиот Буџет за 2026 година.
-Согласно Законот за субвенциониран студентски оброк, износот се усогласува во согласност со инфлациската стапка после секоја фискална година, а пред донесување на републичкиот Буџет за следната година. Последен пат, висината на сумата за субвенционираниот оброк се промени во 2023 година од 120 на 140 денари - се вели во соопштението од Националното студентско тело.
Студентите, во нивното денешно соопштение наведуваат дека инфлациската стапка во Република Северна Македонија во 2024 година изнесува 3,5% (согласно податоците на НБРМ и ДЗС).
Дополнително согласно проекциите на ММФ, инфлациската стапка за 2025 година ќе изнесува 3,4%, додека НБРМ, проектира 3% инфлација за 2025. Доколку се направи пресметка за двете години, сумата на студентскиот оброк треба да порасне за 10 денари во 2026 година – се додава во соопштението.
Од Националното студентско тело посочуваат дека мерката ја користат околу 30.000 студенти во државата во текот на 9 месеци во една година. Според ова, како што велат оттаму, за зголемувањето кое се бара би биле потребни дополнителни 70.200.000 денари или 1.141.463 EUR годишно.
-Ова усогласување не претставува дополнителна привилегија, туку неопходен чекор за зачувување на реалната вредност на студентскиот оброк. Со ова зголемување, ќе се обезбеди поголема сигурност и поддршка на студентите во услови на растечки животни трошоци, ќе се олесни нивниот финансиски товар и ќе придонесе кон создавање подобри услови за студирање – истакнуваат од Националното студентско тело.
Аплицирањето за субвенциониран студентски оброк за академската 2025/2026 година почна на средината на август. Финансиската поддршка изнесува 140 денари дневно и е наменета за купување храна. Средствата можат да се користат од понеделник до сабота кај правни лица кои произведуваат, подготвуваат или продаваат храна.
Исплата не се врши во периодот на летниот распуст – од 1 јули до 1 октомври.
Одбиен предлогот за спојување на постапките во случајот „Адитив“
Судечкиот совет во Кривичниот суд денеска го одби предлогот на обвинителството за спојување на постапките во случајот „Адитив“, кој се однесува на злоупотреби во државната компанија ЕСМ и фиктивни тендери вредни милиони евра.
Според судот, спојувањето би довело до непотребно одолговлекување и би ги ставило обвинетите во потешка положба. Согласно одлуката, Случајот „Адитив“ сега ќе се води преку две одвоени постапки.
Првиот предмет опфаќа над 30 физички и правни лица, меѓу кои и поранешни директори и функционери, обвинети за злосторничко здружување, злоупотреба на службена положба, перење пари и оддавање службена тајна.
Вториот предмет во кој е и поранешната претседателка на Државната комисија за спречување на корупција, Татјана Димитровска, е оформен како продолжение на истрагата, со обвинителен акт против едно лице (Б.Н.) и обвинителен предлог против Димитриевска и уште двајца (Б.П.М. и М.С.) за кривично дело „оддавање службена тајна“.
Одлучувајќи по денешниот предлог на обвинителството за спојување на постапките, Судот оцени дека предметите се различно оформени, со различен број обвинети и степен на подготвеност, што не дозволува нивно спојување без да се наруши економичноста и правата на обвинетите.
„Не постојат услови за спојување на постапката, токму поради тоа обвинетите за кои е поднесен обвинителен предлог да не бидат изложени на долготрајно судење“, рече судијката Лидија Петровска.
Обвинителството, пак, го бранеше предлогот за спојување со аргумент дека постои меѓусебна врска меѓу кривичните дела и заеднички докази, но, судот остана на ставот дека раздвоените постапки се поцелисходни.
Судењето за предметот „Адитив“ во кое се опфатени над 30 физички и правни лица за злоупотреби во државната компанија ЕСМ и фиктивни тендери вредни милиони евра, продолжува на 15 септември. Додека, за вториот предмет ќе биде дополнително утврдено.
Бројот на загинати во земјотресот во Авганистан надмина 1.400, Tалибанците бараат помош од странство
Во разорниот земјотрес на истокот на Авганистан на 31 август загинаа повеќе од 1.400 лица - соопштија на 2 септември талибанските власти, кои побараа помош од странство.
Претходно, беше соопштено дека бројот на загинати во земјотресот се искачил на 1.124.
Најмалку 3.251 лице е повредено, а повеќе од 8.000 куќи се уништени во катастрофата, беше наведено.
Талибанските власти утрото по земјотресот, на 1 септември, првично соопштија дека најмалку 800 луѓе загинале, а речиси 3.000 се повредени во земјотресот со јачина од 6 степени според Рихтеровата скала, со епицентар кај Џалалабад, близу пакистанската граница.
„Потребна ни е (помош), бидејќи многу луѓе овде ги загубија своите животи и домови“, изјави портпаролот на Министерството за здравство под контрола на талибанците, Шарафат Заман, за Ројтерс на 1 септември.
Владата предводена од талибанците не е официјално признаена од ниту една земја, освен Русија, иако хуманитарните организации се обидуваат да одржат контакти, и покрај пречките што всушност самите талибански власти ги поставија.
Амнести интернешнл упати повик за „итна хуманитарна помош“, но оваа организација за човекови права со седиште во Лондон исто така остро ги критикуваше талибанците поради отежнување на операциите за спасување. Исто така го критикуваше и Пакистан поради истовремената присилна репатријација на речиси два милиони авганистански бегалци, велејќи дека тоа ги влошува проблемите.
„Де факто, талибанските власти се исто така одговорни за намалувањето на работата на хуманитарните и помошните агенции во земјата, поради рестриктивните политики и забраната за работа на авганистанските жени за ОН, како и за други невладини организации во Авганистан. Ова е дел од систематскиот напад на талибанците врз човековите права во земјата“, се наведува во соопштението на Амнести интернешнл.
Меѓународните организации кои ја подготвуваат помошта вложија напори да нагласат дека целата помош ќе оди кај жртвите, а не во рацете на талибанските лидери.
Генералниот секретар на ОН, Антонио Гутереш, изјави дека светската организација соработува со властите со цел „брзо да се проценат потребите, да се обезбеди итна помош и да се биде подготвен за мобилизирање на дополнителна поддршка“.
Мисијата на ОН во Авганистан додаде дека се „изгубени стотици животи“ и дека се мобилизирала за да обезбеди помош и поддршка за спасување животи, додека Европската унија (ЕУ) изрази „целосна солидарност со народот на Авганистан“.
Катастрофата се случи во време кога осиромашената земја се соочува со намалување на меѓународната помош поради преземањето на власта од страна на талибанците и враќањето на стотици илјади авганистански бегалци од соседните земји.
„Селата се изградени на начин што куќите се поставени, една над друга“, изјави за Радио Слободна Европа (РСЕ) Салам Ал-Џанаби, портпарол на УНИЦЕФ во Кабул.
„Тоа значи дека овие куќи паѓаат една врз друга. И токму затоа гледаме толку голем број жртви.“
Во округот Дарах Нур во Нангархар, жителите рекоа за Радио Азади, програм на РСЕ, дека сѐ уште се чувствувало тресењето на земјата на 1 септември, по земјотресот што се случи непосредно пред полноќ.
„Итно ни се потребни шатори и итна помош за повредените во болницата“, изјави Шад Нур Мазлумјар.
„Немаме храна, сè е уништено — нашите домови, опремата и кујните. Немаме ништо останато.“
Друг жител на Нангархар, 35-годишниот Шукрула Халим, рече: „Домовите на луѓето се уништени.“
„Сè е срамнето со земја. Итно треба да им се достават здравствени пакети, како и храна и основни домашни потреби“, додаде тој.
Ал-Џанаби рече дека „во моментов сите агенции на ОН во Авганистан го зголемуваат бројот на персонал таму“, и дека околу 600 домови се уништени.
„Каде живеат овие семејства? Каде живеат овие деца? Можеби за сега ќе биде во ред да останат под шатори... но во наредните три недели ќе стане студено во овој регион.“
Видео објавено на социјалните мрежи прикажува како луѓе очајно копаат по урнатините, обидувајќи се да стигнат до луѓето заробени под нив.
Повредените преживеани биле пренесени со хеликоптер од оддалечената планинска област. Талибанските официјални лица изјавија дека теренот ја отежнува достапноста на хуманитарните работници и итните служби до местото на настанот.
Забиулла Муџахид, портпарол на талибанската влада, предупреди дека се очекува зголемување на бројот на загинати и наведе дека според податоците од утрото на 1 септември, во провинцијата Кунар околу 800 лица загинале, 2.500 биле повредени, а голем број куќи уништени.
Слично, во провинцијата Нангархар загинале 12 лица, 250 биле повредени, а десетици куќи исто така се оштетени.
Претходниот земјотрес со јачина од 6,3 степени го погоди Авганистан на 7 октомври 2023 година, по што следеа силни дополнителни потреси.
Талибанската влада процени дека загинале најмалку 4.000 луѓе, но ОН дадоа многу помал број, околу 1.500. Тоа беше најсмртоносната природна катастрофа во Авганистан во поновата историја.
Две години затвор за напаѓачот на скопската градоначалничка Арсовска
Две години казна затвор доби Сулејман Љамалари, осуден дека физички ја нападнал скопската градоначалничка Данела Арсовска. Кривичниот суд ја изрече пресудата и го прогласи за виновен.
„Основен кривичен суд Скопје известува дека судот на 02.09.2025 година ја донесе и јавно ја објави пресудата по предметот К.бр.1338/25, со која обвинетиот С.Љ. го огласи за виновен за сторено кривично дело – Насилство од член 386 став 3 вв со став 1 од Кривичниот законик, по што му изрече казна затвор во траење од 2 – две години, а заради тоа што на 11.07.2025 година извршил грубо насилство врз градоначалничката на Град Скопје“, соопштија од Кривичниот суд.
Согласно член 47 од Кривичниот законик, во изречената казна затвор на обвинетиот С.Љ. му се засметува и времето поминато во куќен притвор, преиначена во мерка притвор. Од Кривичен суд додаваат дека против ваквата пресуда странките имаат право на жалба во рок од 8 дена по приемот на пресудата, до Апелациониот суд Скопје.
С. Љ. останува во притвор до правосилност на пресудата, односно до започнување со издржување на казната затвор, но не подолго од 60 – шеесет дена.
Градоначалничката на Скопје, Данела Арсовска, на 11 јули беше физички нападната во Општина Чаир, додека вршела увид на терен, на локација каде што, како што изјави, се гради дивоградба спроти Полициската станица Чаир.
Од Обвинителството тогаш информираа дека обвинетиот (сега веќе осуден С.Љ.) извршил грубо насилство врз градоначалничката Арсовска, со кое предизвикал телесна повреда кај оштетената и чувство на несигурност, загрозување и страв во јавноста.
На 12 јули, Министерството за внатрешни работи (МВР) одобри 24-часовно обезбедување на градоначалничката Арсовска.
Нов руски гасовод за зголемен извоз на гас во Кина
Русија и Кина потпишаа правно обврзувачки меморандум за изградба на нов гасовод низ Монголија до Кина, објави шефот на „Газпром“, Алексеј Милер, во Пекинг, јавуваат руските новински агенции, а пренесе ДПА.
Цената на гасот што ќе се испорачува преку гасоводот „Моќта на Сибир 2“ ќе биде пониска од онаа за Европа, истакна Милер, посочувајќи на намалените трошоци за транспорт.
„Газпром“ и Кинеската национална нафтена корпорација, исто така, потпишаа документи за зголемување на испораките на гас преку постојниот гасовод „Моќта на Сибир“ од 38 милијарди кубни метри годишно на 44 милијарди кубни метри, според извештаите.
Гасоводот „Моќта на Сибир 2“, долг 6700 километри, вклучувајќи 2700 километри на руска почва, треба да има капацитет од 50 милијарди кубни метри годишно. Договорот е поставен на 30 години, според руските извештаи.
Милер го опиша гасоводот како „најголем, најобемниот и капитално интензивен гасен проект во светот“, без да даде детали за трошоците. Проценките сугерираат дека ќе чини десетици милијарди долари.
Соопштението доаѓа по средбата на рускиот претседател Владимир Путин со неговиот кинески колега Си Џинпинг и монголскиот претседател Ухнаагин Хурелсух во Пекинг.
Временската рамка за изградба на новиот гасовод останува нејасна. Преговорите за гасоводот „Моќта на Сибир 2“ траат веќе пет години, а Москва и Пекинг не можат да се договорат за цената.
Откако во голема мера го загуби европскиот пазар на нафта и гас по целосната инвазија на Русија во Украина, Москва е под притисок од Кина да понуди големи попусти, а медиумите објавија дека Пекинг сакал да ги плати домашните цени на рускиот гас.
Разговорите неколку пати заглавија. Сепак, според „Волстрит џурнал“, неодамнешниот конфликт меѓу Израел и Иран, вклучувајќи ги и нападите на САД врз Иран, го разгоре кинескиот интерес за проектот, поради загриженоста за безбедноста на снабдувањето со нафта од Блискиот Исток.
Витакер: САД сакаат стабилност на Западен Балкан
Американскиот амбасадор во НАТО, Метју Г. Витакер, изјави дека Соединетите Држави внимателно ја следат ситуацијата во Србија и во Босна и Херцеговина, со цел да не се дозволи развој на настани што би можеле да доведат до регионален конфликт.
„Многу внимателно следиме сè што се случува и во Република Српска и во Србија. Моментално сме фокусирани на тоа да се осигураме дека ситуацијата нема да се претвори во потенцијален регионален конфликт“, рече Витакер на еден од панелите на Стратешкиот форум во Блед.
Тој нагласи дека САД „сакаат стабилност на Западен Балкан“ и дека тоа, како што рече, е важно и за европските партнери во рамките на НАТО, кои „имаат обврска да дејствуваат заедно во кризни ситуации“.
Со месеци, Србија е потресена од антивладини протести, за време на кои повремено избувнуваше насилство, додека претседателот Александар Вучиќ ги обвини странските фактори дека се обидуваат да поттикнат револуција, без никакви докази или споменување кој ја поттикнува насилната промена на власта.
Во Република Српска, поранешниот претседател Милорад Додик ја оспорува пресудата на судот во БиХ, кој му го одзеде претседателскиот мандат по неговата пресуда, и постојано се закануваше дека ќе го одвои тој ентитет од остатокот од БиХ.
На прашањето дали НАТО ќе интервенира доколку политичката криза ескалира во вооружен конфликт, особено во Босна и Херцеговина, но и во Србија, Витакер рече дека НАТО дејствува едногласно, но додаде и дека „ние сме далеку од тоа“.
„Ако НАТО се вклучи... Правило број еден во политиката е да не се дејствува врз основа на претпоставки. Мислам дека треба да видиме како ќе се одвиваат работите. Ќе продолжиме да ги охрабруваме сите страни да работат во согласност со Дејтонскиот договор“, рече тој, осврнувајќи се на договорите со кои заврши војната во Босна и Херцеговина во 1990-тите“, рече Витакер.
Американскиот амбасадор, исто така, рече дека „НАТО е посилен од кога било“ и дека „тоа треба да биде многу загрижувачко за нашите противници“.
На прашањето дали американскиот претседател Доналд Трамп би можел да се сретне со Вучиќ или Додик, Витекер рече дека нема индикации за такви средби, но дека тие би можеле да се дискутираат доколку има јасни придобивки за мирот и стабилноста.
Тој рече дека Трамп има посебна способност да комуницира со светските лидери, да го користи влијанието на американското претседателство и моќта на државата, во корист на мирот, демократијата, стабилноста и економскиот развој. Истакна дека доколку Трамп одлучи да се сретне со Вучиќ или Додик, тоа нема да биде за да ја зајакне нивната политичка позиција, туку само ако тоа би послужило за промовирање на пошироките интереси на мирот и стабилноста.
„Секако не би прифатил средба насочена кон зајакнување на политичката позиција на кој било лидер. Тоа не е она што го прави претседателот Трамп“, рече американскиот амбасадор во НАТО.
Тој го опиша Трамп како „миротворец“, истакнувајќи дека неговите политики се фокусираат на резултати и на создавање можности за напредок.
Мицкоски не бил таргет на прислушување, тврди Димовски и бара декласификација на документите
Поранешниот директор на Агенцијата за национална безбедност (АНБ) Виктор Димовски тврди дека премиерот Христијан Мицкоски не бил следен и прислушкуван во времето кога Димовски беше директор на Агенцијата за национална безбедност. Тој денеска преку својот Фејсбук-профил, одговори за наводите за злоупотреби во Агенцијата што биле правени во периодот додека тој раководел со службата, а се однесуваат на следење и прислушување на тогашниот лидер на опозицијата, а сега актуелен премиер Христијан Мицкоски, како и на бизнисмени и новинари.
„Во текот на вчерашниот ден од страна на премиерот и од актуелниот директор на Агенцијата за национална безбедност беа изнесени сериозни обвинувања за наводна злоупотреба на државни ресурси за прислушкување на поранешниот лидер на опозицијата (сега премиер), бизнисмени и новинари од страна на АНБ и Агенцијата за разузнавање. Со оглед на тоа што во претходен брифинг за медиуми во АНБ бил споменат периодот од 2019 до 2024 година во дел од кој и јас ја извршував должноста директор на АНБ, одговорно тврдам дека тој како лидер на тогашна опозициона партија во периодот од 2019 -2022 година не бил предмет на посебен оперативен интерес на Агенцијата, не бил предмет на организирана оперативна работа, а со тоа ниту таргет кон кого биле применувани било какви оперативно-технички мерки“, наведува Димовски во својата објава на Фејсбук.
Димовски го повикува актуелниот директор на АНБ, Бојан Христовски да ги декласифицира документите за наводни злоупотреби, особено оние кои се однесуваат на Мицкоски.
Вели дека е точно оти „во наведениот период согласно законските надлежности во Агенцијата имаше постапка за преиспитување на проверките за безбедносни сертификати, вклучително и за еден тогашен и сегашен пратеник поради оддавање на класифицирана информација, а за што му беше поднесена соодветна кривична пријава до надлежното обвинителство“.
Во врска со тоа, како што посолува, на негово барање, на дневен ред на надлежната собраниска Комисија за надзор на работата на АР и АНБ беше ставена точката за информирање за случајот и изнесените наводи во електронските медиуми.
„Со оглед на сериозноста на изнесените наводи на синоќешниот прес и на претходниот брифинг во АНБ го повикувам директорот на Агенцијата веднаш и неодложно да ги декласифицира документите за наводни злоупотреби, а особено тие кои се однесуваат на прислушкување на тогашниот лидер на опозицијата. Македонската јавност има право да знае кој тоа предлагал, барал, одобрувал и кој ги извршувал наводните прислушкувања! Очекувам дека овојпат нема да има криење со изговори од типот „класифицирани информации со степен на државна тајна", посебно после последните неколку објави во некои „информирани медиуми" кои лифериваат конкретни имиња на лица кои наводно биле таргет на Агенцијата, вклучително и податоци за идентитетот на вработени и тајни соработници“, наведува во објавата на Фејсбук, поранешниот директор на АНБ Димовски.
Коментарот на Димовски следува откако во петокот беше објавено дека Агенцијата за национална безбедност доставила три известувања до Јавното обивнителство за еден поранешен директор и група вработени во АНБ поради индиции за незаконско, непрофесионално и неетичко постапување.
Нив ги потврдија и премиерот Христијан Мицкоски и директорот на АНБ, Бојан Христовски.
Премиерот Христијан Мицкоски порача дека најновите информации за незаконско прислушување не се личен напад врз него, туку директен удар врз демократијата и правото на слобода.
„Јас лично, тогаш како претседател на опозицијата, а денеска како премиер, заедно со новинари, медиуми, бизнисмени и јавни личности сме биле жртва на системот кој ги следел своите граѓани. Ова не е напад само врз мене, туку врз демократијата, врз правото на слобода, врз темелите на државата“, изјави денеска (2 септември) премиерот Мицкоски.
Мицкоски и Христовски не посочија детали бидејќи, како што рекоа, станува збор за документи кои се класифицирани како државна тајна, но и двајцата изразија очекување дека случајот ќе добие правна разрешница, а одговорните ќе бидат казнети.
Од Основното јавно обвинителство за гонење организиран криминал и корупција (ОЈО ГОКК), до кое АНБ ги доставило известувањата, вчера во одговор на новинарски прашања излегоа со став дека во моментов се води предистражна постапка и поради нејзината тајност не можат да споделат повеќе детали.
Димовски беше првиот директор на АНБ, која беше основана по реформите на безбедносниот систем на државата. Тој со Агенцијата раководеше од нејзиното основање во 2019 до 2022 година, кога на негово место дојде Зарко Милошевски.
Собранието на Република Српска расправа за неуставниот предлог за мандатар и нова влада
На 2 септември во Бања Лука започна посебна седница на Собранието на Република Српска, чиј дневен ред е изборот на претседател и новата ентитетска влада.
Од 22 август, владата дејствува со „технички мандат“ откако Собранието ја прифати оставката на премиерот на ентитетот Радован Вишковиќ.
Милорад Додик го предложи новиот мандатар Сава Миниќ, иако тој нема уставно овластување за тоа, бидејќи мандатот му беше одземен од Централната изборна комисија на Босна и Херцеговина.
Според Уставот на РС, претседателот на РС треба да го предложи претставникот.
Миниќ е поранешен министер за земјоделство, шумарство и водостопанство и член на Здружението на независни социјалдемократи на Милорад Додик.
ЦИК му го одзеде мандатот на Додик, бидејќи Судот на БиХ, на почетокот на август, донесе конечна пресуда со која беше осуден на една година затвор (казната ја откупи со парична исплата) и шестгодишна забрана за вршење јавна функција.
После тоа, Централната изборна комисија на БиХ распиша предвремени избори за претседател на РС за 23 ноември.
Во заклучоците од седницата одржана истиот ден кога беше прифатена оставката на Вишковиќ, Собранието на РС го покани Додик да продолжи да ја извршува функцијата претседател на РС, ги отфрли предвремените избори и им наложи на институциите на ентитетите да не соработуваат со ЦИК.
Опозицијата предупреди дека ова влегува во зоната на кривични дела и кршење на уставниот поредок на Босна и Херцеговина.
Собранието, исто така, објави референдум на кој гласачите треба да одлучат дали да ги прифатат одлуките на високиот претставник на меѓународната заедница, Кристијан Шмит, на Судот и на Централната изборна комисија (ЦИК) на Босна и Херцеговина, со кои беше казнет поранешниот претседател на ентитетот Милорад Додик.
Милорад Додик беше осуден и отстранет од функцијата на почетокот на август, откако беше осуден за непочитување на одлуките на високиот претставник на меѓународната заедница во Босна и Херцеговина, Кристијан Шмит.
Меѓу другото, Шмит, со својот авторитет, ги поништи неуставните закони донесени од Република Српска со кои се обиде да ги оспори одлуките на државниот Уставен суд на Босна и Херцеговина, до кој Додик поднесе жалба на пресудата.
Белгија најави признавање на палестинската држава на Генералното собрание на ОН
Белгија ќе ја признае палестинска држава на Генералното собрание на ОН, изјави во вторник (2 септември) министерот за надворешни работи Максим Прево, зголемувајќи го меѓународниот притисок врз Израел по сличните потези на Австралија, Велика Британија, Канада и Франција, објави Ројтерс.
Под зголемените глобални критики за војната во Газа, Израел е незадоволен од најавата на голем број земји дека формално ќе ја признаат палестинска држава на седница на телото на ОН подоцна овој месец.
„Белгија ќе им се придружи на потписниците на Декларацијата од Њујорк, отворајќи го патот за решение за две држави, имено палестинска држава која мирно коегзистира со Израел“, напиша Прево во објава на мрежата X.
Одлуката доаѓа „во светлината на хуманитарната трагедија што се одвива во Палестина, особено во Газа, и како одговор на насилството што Израел го врши кршејќи го меѓународното право“, додаде Прево.
Белгија, исто така, ќе разгледа воведување на 12 санкции против Израел, како што се забрана за увоз на производи од неговите населби и ревидирање на политиките за јавни набавки со израелските компании, како и прогласување на лидерите на Хамас (палестинска група која САД и ЕУ ја прогласија за терористичка организација?) за персона нон грата во Белгија, додава Прево.
Палестинците долго време бараат држава на Западниот Брег и Газа, окупирани од Израел, со Источен Ерусалим како главен град.
Соединетите Држави тврдат дека таква држава може да се воспостави само преку директни преговори меѓу Израелците и Палестинците.
„Белгија, членка на Европската Унија, донесе одлука да го зголеми притисокот врз израелската влада и Хамас“, рече Превота.
Врховниот суд на Обединетите Нации во 2024 година пресуди дека израелската окупација на палестинските територии, вклучувајќи го Западниот Брег и неговите населби, е нелегална и дека израелската армија треба да се повлече што е можно поскоро.
Израел, од друга страна, тврди дека териториите не се окупирани во правна смисла бидејќи се наоѓаат на спорно земјиште, но ОН и поголемиот дел од Меѓународната заедница ги сметаат за окупирани територии.
Мултимедија
Најпосетени
Што треба да знаете