Вести
Екс-директорот на УБК Атанасовски повикан да сведочи за 27 април: Не се сеќавам каде бев
Како сведок на одбраната на Александар Василевски - Нинџа, кој денеска пред судот изјави дека настаните во Собранието од 27 април биле високи функционери на ВМРО-ДПМНЕ, беше донесен и поранешниот директор на УБК, Владимир Атанасовски.
Тој пред Судот изјави дека „не се сеќава точно каде бил непосредно пред настанот“ и не одговараше директно на прашањата на судијата - каде бил, што правел и какви мерки презел како директор на УБК за време на случувањата во Собранието, лани на 27 април.
По ова, судијката Добрила Кацарска побара судската полиција да го изнесе Атанасовски од судницата. Следниот сведок во одбраната на Василевски е Веле Петрушевски.
На Атанасовски вчера му беше одреден 30-дневен притвор.
Претходно, Василевски пред Судот изјави дека „Митко Чавков, Билјана Бришковска – Бошковски, Спиро Ристовски, Миле Јанакиески и Кирил Божиновски биле дел од, како што рече, парамилитантниот, односно командно-оперативен штаб кој ги организирал насилствата во Собранието на 27 април минатата година, и додаде дека подоцна во тој штаб дошол и директорот на УБК, Владимир Атанасовски.
види ги сите денешни вести
УНХЦР: До крајот на април 122 милиони лица биле насилно раселени
Високиот комесаријат на ОН за бегалци (УНХЦР) денеска (12 јуни) објави дека во светот има 122,1 милиони луѓе насилно раселени поради војна или други форми на насилство.
По соборувањето на сирискиот претседател Башар ал-Асад и враќањето на голем број Сиријци во своите домови, вкупниот број на насилно раселени лица во светот е малку намален во споредба со рекордот во 2024 година, објави ОН. На крајот на 2024 година, рекордни 123,2 милиони луѓе ширум светот биле принудени да ги напуштат своите домови поради војна, насилство или прогон.
Но, до крајот на април, тој број е 122,1 милиони, според годишниот извештај на УНХЦР, со оглед на тоа што речиси два милиони Сиријци успеале да се вратат во своите домови.
И покрај ова, продолжувањето на овој тренд најмногу ќе зависи од исходот на големите конфликти и кризи со кои светот моментално се соочува и кои принудија многу луѓе да ги напуштат своите домови.
„Живееме во време на голема нестабилност во меѓународните односи во кое модерното војување создава кревка и тешка средина карактеризирана со постојано човечко страдање. Мора да ги удвоиме нашите напори за постигнување мир и наоѓање трајни решенија кога станува збор за бегалците и сите други кои се принудени да ги напуштат своите домови“, рече високиот комесар на ОН за бегалци, Филипо Гранди.
Главните виновници за присилното раселување сè уште се големите светски конфликти: Судан, Мјанмар, Украина.
По тринаесетгодишната граѓанска војна во Сирија и падот на Башар ал-Асад во декември 2024 година, во првите месеци од оваа година, сè поголем број Сиријци постепено почнаа да се враќаат дома. Се проценува дека, од средината на мај, повеќе од 500 000 од нив се вратиле дома од странство, додека приближно 1,2 милиони внатрешно раселени лица се вратиле во своите домови од крајот на ноември.
Според податоците на агенцијата на ОН, до крајот на 2025 година, еден и пол милион Сиријци би можеле да се вратат дома од странство, а уште два милиони, колку што беа раселени во земјата.
Судан, каде што од средината на април 2023 година беснее граѓанска војна, а хуманитарната криза и кризата со недостиг на храна принудуваат милиони луѓе да ги напуштат своите домови, сега е земјата со најголем број насилно раселени лица - дури 14,3 милиони.
И покрај враќањето на Сиријците, 13,5 милиони жители на таа земја се уште се бегалци во странство или внатрешно раселени, по што следуваат Авганистан (10,3 милиони) и Украина (8,8 милиони). Мирот или барем прекинот на огнот, особено во Демократска Република Конго, Судан и Украина, би можел да направи значителна разлика, се наведува во извештајот.
Но, останува прашањето за финансирањето, кое мора да биде доволно за да се гарантира „безбедно и достоинствено“ враќање на сите, но ОН, како и бројни други хуманитарни организации, се соочува со голема финансиска криза.
САД се убедливо најголемиот донатор, сега често се отсутни од програмата за финансирање, а бројни други земји имаат други приоритети. На крајот од минатата година, секое 67-мо лице во светот беше класифицирано како присилно раселено, што е дури 123,2 милиони луѓе.
Ова вклучува 73,5 милиони внатрешно раселени лица, како и 31 милион бегалци под мандатот на УНХЦР. Во текот на 2024 година, вкупно 9,8 милиони присилно раселени лица се вратија дома. Меѓу нив се 1,6 милиони бегалци, што е најголем број во повеќе од дваесет години.
Мицкоски: Ако има иницијатива за средба Давкова-Жељазков на Самитот на НАТО - тоа треба да се прифати
Премиерот Христијан Мицкоски вели дека нема да присустува на престојниот Самит на НАТО во Хаг, туку таму ќе замине претседателката Гордана Сиљановска Давкова. Во однос на најавите од бугарска страна дека наместо нивниот претседател Румен Радев ќе присустува премиерот Росен Жељазков, тој истакна дека доколку има каква било иницијатива за средба меѓу македонската претседателка и бугарскиот премиер и тоа треба да се прифати, за да се покаже проактивност.
„Ако има каква било иницијатива за средба на ниво претседател-премиер, тоа треба да се прифати без разлика што јас нема да бидам таму, тоа е мојот став и убеден сум дека тоа ќе биде став и на претседателката. Мора да бидеме проактивни и да покажеме дека не е тоа тоа што се зборува, да покажеме дека неколку стотини наши граѓани, кои за себе велат дека бугарскиот им е мајчин јазик, дека тоа не е проблемот, туку има многу поголем проблем, тоа е политика стара децении, тоа е стратегија која се пишувала, говорела, внимателно се создавала и без квинслинзи овде кај нас не можела да се спроведе. За жал такви имаше во минатата влада“, рече премиерот.
Мицкоски напомена дека иницијативата за средбата на маргините на Самитот пристигнала од претседателот на Европскиот Совет, Антонио Кошта и македонската страна веднаш ја прифатила.
„Претседателот на Европскиот совет прати предлог, ние веднаш го прифативме, да седнат двајцата претседатели, фасцилитирани од страна на ЕУ, за време на настан, во кој сме рамноправни и едните и другите. На тој состанок имаше идеја да присуствува и генералниот секретар на НАТО, Руте, претставници од американската администрација и да ги вкрстиме аргументите. Е сега таму гледаме една егзибиција, можеби е таков начинот на фунционирање на бугарската политичка сцена. На Самитот во Вашингтон присутен беше премиерот, каде бев јас. Логично е да ротираат претседателот и премиерот, барем таква е праксата, затоа оваа година таму е претседателката Сиљановска и логично беше од страна на Бугарија да биде испратен претседателот и тој беше најавен, во последен момент е испратен премиерот, истакна Мицкоски.
Кон крајот на минатиот месец, Мицкоски истакна дека на средбата во Скопје со високата претставничка на Европската Унија за надворешни работи и безбедносна политика Каја Калас, меѓу другото, разговарале и за евентуалната билатералната средба со бугарската страна, за нејзиниот формат, кој се би можел на неа да присустуствува и каде би можела да се одржи.
Претстојниот Самитот на НАТО во Хаг, како што кажа тогаш е добра можност за средбата, на неа би присустувале претедателката Гордана Сиљановска Давкова, претседателот на Европскиот совет Антонио Кошта, претседателката на ЕК Урсула Фон дер Лајен, високата претставничка на ЕУ за надворешна политика и безбедност Каја Калас, а составот, како што посочи Мицкоски го прошириле и со можноста за присуство на генералниот секретар на НАТО Марк Руте, како и претставници на САД.
Инаку премиерот Мицкоски вчера во изјава за медиумите кажа дека суштината на проблемот е „обидот на еден инженеринг, да се создаде нова македонска нација, која е резултат на одлука на Коминтерната по 1945-та година од минатиот век и дека таа нова македонска нација користи нов македонски јазик, кој станува службен во ОН, како дел од југословенската федерација во '45-та година и дека почива на бугарски корени“.
Тој додаде дека ова го знаел и поранешниот министер за надворешни работи, Бујар Османи, кога го прифатил францускиот предлог.
Екс министерот за надворешни работи, Бујар Османи, остро реагираше на контроверзната изјава на Мицкоски, обвинувајќи го дека, наместо да работи на зајакнување на внатрешната стабилност, свесно ја разгорува омразата и го крши општествениот баланс. Додаде дека македонскиот јазик веќе е заштитен и признат од страна на ЕУ.
Игуменот Георгиј е нов митрополит на Дебарско-кичевската епархија
Игуменот Георгиј (Ѓорѓевски) е избран за нов митрополит на Дебарско-кичевската епархија.
Тој е избран на денешната седница на Светиот архиерејски синод, без ниту еден глас против.
Назначен е на местото на упокоениот митрополит Тимотеј.
Поранешниот декан на Богословскиот факултет Ѓоко Ѓорѓевски се замонаши на 27 мај, на 28 мај беше произведен за јероѓакон, а на 29 мај беше избран за јеромонах.
Инаку одлуката за избор на митрополит се носи со просто мнозинство. Во црковните редови има 12 владици, кои управуваат со епархии, така што за избор на идниот митрополит ќе бидат доволни седум гласови. Ако соодносот на гласовите е 50-50, пресудува гласот на архиепископот.
Минатата недела беа одржани мирни собири на верниците, во Охрид, Скопје и во Кичево, кои се залагаат за изборот на епископот антаниски Партениј за нов охридски владика.
„Време е Европа да преземе одговорност“, порачаа од отворањето на форумот GLOBSEC во Прага
Претставници од речиси седумдесет земји се собраа во чешката престолнина Прага за да учествуваат на 20-тото издание на Форумот GLOBSEC.
Се очекува лидерите да разговараат за најитните геополитички, безбедносни и геоекономски предизвици.
„Започнавме во 2005 година со надеж, продолжуваме во 2025 година со одговорност. Нека овие три дена бидат повеќе од дијалог, нека бидат пресвртница. Да преземеме одговорност, да поведеме и да изградиме иднина што другите сакаат да ја следат“, рече претседателот на GLOBSEC, Роберт Вас, на отворањето на Форумот.
Дваесетгодишнината од форумот нуди единствена платформа за меѓународен дијалог, а оваа година фокусот е на зајакнување на улогата на Европа во градењето постабилна и попросперитетна иднина.
Официјално насловен како „Командување на хаосот: Време е Европа да преземе одговорност“, форумот го отвори чешкиот претседател Петр Павел, под чие покровителство се одржува Форумот.
Иднината на Украина, новата трансатлантска средина и европската безбедност беа во фокусот на неговото обраќање. Тој, исто така, истакна дека улогата на Соединетите Држави во европската безбедност се менува и дека Европа мора да преземе поголема одговорност.
„Мораме да ги забрзаме нашите напори во градењето сигурни европски одбранбени капацитети и зајакнувањето на нашите одбранбени индустрии. Ова не значи дека сакаме раскинување со нашиот американски сојузник. Напротив, водењето и одржувањето дијалог со нашите партнери преку Атлантикот е поважно од кога било“, рече претседателот на Чешката Република.
На самото отворање на Форумот, виртуелно се обрати и украинскиот претседател Володимир Зеленски, барајќи поддршка за зголемување на санкциите против Русија.
„На Русија не ѝ е гајле за милион жртви, но се грижи за санкциите, вклучително и мерките за намалување на придонесите од нафтата“, рече Зеленски.
Овогодинешниот форум GLOBSEC се одржува во време кога европските земји сè повеќе ја преиспитуваат својата улога во променливата глобална средина.
Дводневната програма на форумот ќе се фокусира на клучни прашања како што се зајакнување на европската одбрана и стратешка автономија, обезбедување долгорочна поддршка за Украина, справување со хибридни закани, заштита на критичната инфраструктура, дигитална отпорност, иновации во технологијата и одржливо финансирање на одбранбената индустрија.
Авион на Ер Индија се урнал по полетувањето за Лондон
Авион на „Ер Индија“ со повеќе од 200 патници се урнал во близина на аеродромот во западниот индиски град Ахмедабад, соопштија во четврток (12 јуни) претставници на авиокомпанијата и полицијата, без да прецизираат дали има жртви.
Авионот бил на пат кон аеродромот Гетвик во Лондон, соопшти „Ер Индија“, додека полициски претставници изјавија дека авионот се урнал во цивилна зона во близина на аеродромот, објави „Ројтерс“.
„Моментално собираме детали и ќе споделиме дополнителни информации“, соопшти авиокомпанијата Ер Индија.
Според телевизиските канали, несреќата се случила за време на полетувањето.
Снимките покажуваат запалени остатоци и густ црн чад како се издига кон небото над аеродромот.
Исто така, беа прикажани снимки од луѓе на носилки како се транспортираат со амбулантни возила.
Според извештајот на новинската агенција АНИ, во летот имало вкупно 242 лица, повикувајќи се на полициски контролен центар во државата Гуџарат.
Иран не се откажува од збогатувањето на ураниум
Иран нема да се откаже од своето право да збогатува ураниум поради зголемените тензии во регионот, соопшти Техеран во четврток (12 јуни).
Висок ирански функционер за Ројтерс изјави дека „пријателска“ земја во регионот го предупредила Техеран за потенцијален воен напад од страна на Израел.
Функционерот рече дека ескалацијата на тензиите имала за цел „да влијае врз Техеран да го промени својот став за своите нуклеарни права“ за време на разговорите со САД во Оман во неделата.
Американскиот претседател Доналд Трамп вчера изјави дека американскиот персонал се преместува од Блискиот Исток бидејќи тој може да биде „опасно место“, додавајќи дека САД нема да дозволат Иран да има нуклеарно оружје.
Оман во четврток официјално го објави шестиот круг разговори меѓу Иран и САД во Оман во недела. Разговорите имаат за цел да ги ограничат напорите на Техеран да ја развие својата нуклеарна програма.
По пет рунди разговори меѓу иранскиот министер за надворешни работи, Абас Аракчи, и пратеникот на Трамп за Блискиот Исток, Стив Виткоф, остануваат малку пречки.
Меѓу нив е и отфрлањето од страна на Иран на барањето на САД да се обврзе да се откаже од збогатувањето на ураниум.
Претходните рунди беа одржани во Мускат и во амбасадата на Оман во Рим.
По средбата со Вучиќ, Зеленски ѝ се заблагодари на Србија за поддршката
Претседателот на Украина, Володимир Зеленски, на 11 јуни објави дека разговарал со претседателот на Србија, Александар Вучиќ, на маргините на самитот Украина-Југоисточна Европа во Одеса.
Зеленски на платформата Телеграм напиша дека Украина и е благодарна на Србија за нејзината поддршка во зачувувањето на суверенитетот и територијалниот интегритет на таа земја.
„Разговаравме за меѓусебна поддршка на патот кон Европската Унија, билатерална соработка и обнова на Украина. Ви благодарам за иницијативата да помогнете во обновата и да преземете покровителство за обнова на неколку населени места во Украина. Ова е навистина ефикасен формат на соработка и ќе сметаме на добри резултати“, напиша Зеленски.
Украинскиот претседател потсети дека претседателот на Србија ја посетува Украина за прв пат и нагласи дека „важно е да се биде тука и да се види војната со свои очи“.
Претходно на 11 јуни, Вучиќ на Инстаграм напиша дека имал „значаен и отворен разговор со Зеленски за клучните прашања на современите геополитички предизвици со кои се соочува Европа и целиот свет“.
Словенечката министерка за надворешни работи Тања Фајон го поздрави учеството на Вучиќ на самитот Украина-Југоисточна Европа, наведувајќи дека тоа може да се протолкува како силна поддршка за украинското раководство.
Вучиќ е единствениот учесник на Самитот кој не ја потпиша усвоената декларација, бидејќи, како што изјави за српските медиуми, таа повикува на воведување санкции против Русија поради војната против Украина.
Вучиќ, сепак, рече дека Зеленски „покажал почит кон територијалниот интегритет на Србија“ бидејќи на Самитот немало претставник на Косово и додаде дека тоа е „одличен гест“ кон Србија што „ќе го цени колку што е можно повеќе“.
Декларацијата, која беше потпишана на самитот во Одеса од страна на лидерите на Западен Балкан, вклучувајќи ги Романија, Молдавија, Грција и Хрватска, ја осудува инвазијата, повикува на членство на Украина во НАТО и ги осудува воените злосторства извршени од Русија, објави АФП.
Во документот, меѓу другото, се повикува Русија да ги повлече своите трупи од Украина и се осудува депортацијата на илјадници украински цивили, вклучувајќи и деца, од страна на Русија.
На почетокот на руската инвазија на Украина, Србија го поддржуваше територијалниот интегритет на таа земја, но до денес одбива да воведе санкции против Москва.
Српските власти продолжија да одржуваат врски со Русија, а на 9 мај Вучиќ беше во Москва на Парадата на победата по повод 80-годишнината од победата над фашизмот. Потоа се сретна со рускиот претседател Владимир Путин.
Претседателот на Србија на својот Инстаграм профил објави дека на 11 јуни во Одеса се залагал за интензивирање на дијалогот и брзо постигнување мир.
Србија одржуваше официјална политика на неутралност за време на тригодишната офанзива на Москва против Украина и негираше вооружување на која било страна.
Сепак, на 28 мај, Службата за надворешна безбедност на Руската Федерација ја обвини Србија дека продолжува да испорачува муниција на Украина, „и покрај нејзината официјално прогласена неутралност“, и дека со тоа „и пука во грб на Русија“.
Реакцијата од Москва доаѓа откако пред години некои медиуми објавија дека српското оружје и муниција преку трети земји завршуваат во рацете на украински војници.
Официјален Белград постојано негира дека Србија директно извезува оружје во Украина или Русија и дека не може да влијае на тоа дали српското оружје од трети земји ќе заврши на украинскиот фронт.
По објавата на руската служба, Вучиќ изјави дека договорите за продажба на оружје и муниција, каде што постои сомневање за злоупотреба и испраќање на украинското бојно поле, ќе бидат прекинати.
Косово привремено прифаќа 50 државјани од трети земји во рамки на договорот со САД
Привремената влада на Косово одлучи да обезбеди привремена заштита за 50 лица од трети земји, во рамките на соработката со Соединетите Држави.
„Лицата засегнати од оваа одлука, за време на нивниот престој во Република Косово, ќе постапуваат во согласност со важечкото законодавство и ќе ги уживаат правата утврдени со важечките закони“, објави привремената извршна власт по електронската седница одржана на 11 јуни.
Привремениот премиер на Косово, Албин Курти изјави дека престојот на до 50 лица во земјата, кои подоцна ќе се вратат во своите матични земји, ќе го управува и координира Министерството за внатрешни работи.
Курти на мрежата X напиша дека по донесувањето на оваа одлука косовските власти ќе работат „во тесна соработка со надлежните американски власти во текот на целиот процес“.
Во четврток, портпарол на американскиот Стејт департмент за Радио Слободна Европа изјави дека САД се „благодарни на нашиот партнер, Косово, за прифаќањето на државјани од трети земји кои ќе бидат депортирани од САД“.
„Ја поздравуваме соработката по овој клучен приоритет на администрацијата на Трамп“, рече портпаролот.
Портпаролот не одговори на конкретни прашања за тоа зошто е избрано Косово, кои критериуми се користеле за избор на мигрантите или дали Косово ќе добие поддршка или стимулации во замена за учество во овој договор. Стејт департментот упати дополнителни прашања до Владата на Косово.
Привремената влада на Косово во среда за Радио Слободна Европа потврди дека изразила подготвеност да соработува со Соединетите Држави во врска со прифаќањето и привременото сместување на државјани од трети земји во Косово, „во согласност со утврдените услови“.
„Во период од една година, до 50 лица можат привремено да бидат преместени, со цел да се олесни нивното безбедно враќање во нивната земја на потекло. Владата изрази подготвеност да се ангажира, со можност за избор на лица од предложениот список, под услов да ги исполнуваат одредени критериуми поврзани со владеењето на правото и јавниот ред“, изјави за Радио Слободна Европа, Перпарим Криезиу, портпарол на привремената влада на Косово.
Стејт департментот на 6 јуни за РСЕ потврди дека земјите од Балканот се вклучени во контакти како дел од пошироката стратегија на САД за депортирање на странски државјани без регулиран статус.
„Американските партнери и регионалните лидери тесно соработуваат со нас за да се стави крај на кризата со нелегалната и масовна миграција“, нагласи Стејт департментот, додавајќи дека спроведувањето на миграциската политика на администрацијата на претседателот Доналд Трамп е еден од нејзините главни приоритети.
„Депортирањето на странци од САД, за кои постојат конечни одлуки за депортација, како и протерувањето на нелегалните мигранти, ги штити Соединетите Држави од странски терористи и други закани за националната безбедност и јавниот ред“, се наведува во одговорот.
За убиствата на Вања и Панче се бара доживотен затвор за четворица обвинети
Доживотен затвор за четворица обвинети побараа обвинителките од скопското јавно обвинителство во завршните зборови на судењето за убиството на Вања Ѓорчевска и Панче Жежовски. Тоа е максимална казна која ја бараат од судот за обвинетите Љупчо Палевски, Влатко Кешишев, Боре Видевски и Велибор Манев, додека за таткото на Вања, обвинетиот Александар Ѓорчевски побараа судот да му ја одреди соодветната затворска казна.
Како што посочи обвинителката Ана Стојковиќ Димитровска, исказите на обвинетите дадени пред Обвинителството не се совпаѓаат со исказите дадени пред судот, ниту пак, како што рече, се совпаѓаат со изведените докази. Според неа, не е нужно да се утврди мотивот за убиството, туку, како што рече, тој е субјективен однос на злосторникот кон делото.
„Отсуството на мотив не е причина некој да не биде осуден. Казната според Кривичниот законик е од 10 години до доживотен. Нема олеснителни околности за обвинетите. Сите се во зрела возраст, сите се родители, сакале да се и политички фактор. Дополнително ги трауматизираат фамилијата и јавноста со нивните негирања на доказите и со манипулациите. За сите четворица Јавното обвинителство бара доживотен затвор. Одземање живот на дете не се толерира“, посочи обвинителката.
За таткото на Вања, Александар Ѓорчевски, обвинителката рече:
„Нема потешка казна од загуба на дете и од живот со таква совест како во случајов на таткото на Вања, обвинетиот Александар Ѓорчевски. Не тврдиме дека сакал да му го убијат детето, но учествувал во киднапирањето на ќерка си и бараме соодветна казна за тоа”.
Стојковиќ Димитровска за првообвинетиот Палевски, нагласи дека ја водел целата операција, креирал алиби и уништувал докази. Според Обвинителството снимките и другите докази, ја утврдуваат неговата вина.
„Тврдеше дека снимките од пред куќата во мај е од друг период, мај 2023, но тие го немале возилото „рено кангу“ пред септември 2023. Палевски за себе се обидувал да создаде алиби. За 22 ноември се обиде алиби да му биде Ерол Османи, дека му го поправал котелот, но Османи тврди друго. За 27 ноември нема алиби, тврди дека бил во банка, но тоа е после 11 часот, а детето е убиено пред 9. Тврдеше дека нема податоци од базните станици за неговиот телефон, но тие постојат и не му одат во прилог. За време на злосторот носеле радиостаници. Сите обвинети имаат повици после 11 часот, рече обвинителката.
За Велибор Манев нагласи дека обвинетиот тврдел дека сакале да го грабнат Панче, но не и да го убијат, како и дека Вања била грабната по грешка, но, како што рече, и двете тврдења се неосновани.
Додаде дека исказот во Обвинителството даден од страна на обвинетиот Боре Видевски се совпаѓа со исказот на останатите обвинети. Вели неговата одбрана се состои од негирање пред судот иако претходно ги признал делата што му се ставаат на товар во исказот даден пред Јавното обвинителство.
За обвинетиот Влатко Кешишев рече дека тој се обидел да се прикаже само како послушник на првообвинетиот Љупчо Палевски и дека не бил соизвршител, но, според обвинителката, од доказите произлегува дека е соизвршител, бидејќи копал дупка, вршел обиколка околу куќата на Манев, ги закопувал убиените, носел радиостаница, како и ги возел обвинетите.
Ова е второ рочиште како обвинителството ги дава своите завршни зборови за грабнувањето и убиството на Панче Жежовски од Велес и на 14-годишната Вања Ѓорчевска од Скопје. Жежовски беше убиен на 22 ноември 2023 година а Вања 5 дена подоцна.
Мајката на Вања, Зорица Ѓорчевска, преку адвокатот кој ја застапува рече дека се согласува со кривичниот прогон, на обвинетите како и за поранешниот сопруг Александар, таткото на нејзиното убиено дете.
„Кога ќе слушневме за вакви брутални убиства на деца, на моите девојчиња им велев: Ова кај нас не се случува. Но, ми се случи мене. Го убија моето дете. Го испратив на училиште, по една недела ја дочекав во мртовечки сандак. Ова повеќе не смее да се повтори”, прочита адвокатката писмо од Зорица.
Кон кривичниот прогон се придружија и ќерките на Жежовски.
Судењето ќе продолжи со завршни зборови на одбраната, по што судот ќе треба да ја донесе и објави пресудата.
Јаневска: Учебници ќе има за секое дете
Министерката за образование и наука Весна Јаневска изјави дека наредната учебна година ќе има учебници за секое дете и оти дотогаш ќе се надминат одредени недоразбирања што постојат на релации министерство-општини-училишта.
„Очигледно има некакви недоразбирања меѓу раководствата на училиштата, па и меѓу некои општини и централната власт. Учебници треба да има за секое дете. Министерството ќе обезбеди учебник за секое дете. Постојат нeкои недоразбирања каде што се бара учебници кои реално ги нема и реално нема ни учебници затоа што училиштата не ги побарале од министерството. Оваа година сериозно ќе се потрудиме тој предизвик да го надминеме“, истакна Јаневска на последниот ден од учебната година и по повод завршената реконструкција на ОУ „Андреја Савески - Ќиќиш“ во Тетово.
Проблемот со немање нови учебници се повторува на почетокот на секоја учебна година. Учебниците или не се секаде навреме доставени, или пак дел од тие што се доставени се стари и речиси неупотребливи.
Учебниците се печатат во тираж кој пред почетокот на учебната година, секое училиште го пријавува преку посебна електронска апликација на МОН, зависно од потребите како што е зголемен број на ученици или оштетени учебници.
На прашање до кога ќе се чекаат одредени реконструкции или нови згради за училишта низ државата, Јаневска посочи дека новата влада постојано вложува во инфраструктурата, но оцени дека за една година може да се направат само определени работи.
Министерката информираше дека со 32 000 000 евра се инвестира во повеќе инфраструктурни проекти и дека во моментов се градат седум училишни згради, 20 училишта се реновираат, а во тек е изградба на четири спортски сали и реконструкција на два студентски дома.
Мултимедија
Најпосетени
Што треба да знаете