За амбасадор во Софија ќе биде испратен еден од најискусните дипломати во Министерството за надворешни работи. Владата го прифати предлогот на Министерсвото за надворешни работи за амбасадор во Бугарија, информира денеска по брифингот за новинарите шефот на дипломатијата Бујар Османи.

„Амбасадор во Софија ќе биде еден од најискусните дипломати во МНР и намерно така е одлучено искусен дипломат да се испрати во Софија во услови кога сакаме да ја вратиме довербата и да ги надминеме разликите. Меѓутоа, не можам да коментирам за името додека не се добие агреман, меѓутоа барањето за агреман што значи и одобрување од страна на претседателот е добиено и веќе е пратено во бугарското МНР“, наведе Османи.

• Османи најавува наскоро предлог за амбасадор во Бугарија

Дел од македонските медиуми во почетокот на неделава го споменаа името на Агнеса Руси за амбасадор во Софија, која е дипломатка од кариера а во моментов е шефица на македонската мисија при ЕУ во Брисел од 2018 година.
Северна Македонија е без амбасадор во соседна Бугарија од април 2020 година, додека вршител на должноста амбасадор ја извршуваше Владимир Крстевски.

Од викендов на двонеделна рехабилитација во одморалиштето на МВР на Пониква се наоѓа првата група од 45 повредени лица од пожарот во клубот „Пулс“.

Со нив работат лекари специјалисти од Клиниката за пластична хорургија од Скопје, како и физиотерапевти од Кочани и Штип, кои им овозможуваат соодветна медицинска нега и физиотерапевтска терапија.

„Престојот на повредените им годи. Превентивно носат долги ракави, заштитени се, не излегуваат преку ден на сончева светлина, а во вечерните часови се физички активни и ги користат опремените игралишта, со што некои постепено се враќаат на своите нормални спортски активности од претходно“, истакна Катерина Мирчовска, в.д. директорка на Општата болница во Кочани.

Таа додаде дека сите пациенти се вклучени во системот „Мој термин“ во рамки на проектот за рехабилитација на Пониква.

На Одделот за хирургија во болницата во Кочани пак, веќе се обезбедени услови за ПРП терапијата на повредените според списокот што е добиен од Клиниката за пластична хирургија. Терапијата ќе се спроведе в петок во соработка со специјалисти по пластична и реконструктивна хирургија од Универзитетската клиника „Св. Наум Охридски“ од Скопје.

„Во нашата болница ќе продолжи и физикалната терапија за 16 повредени, оваа недела ќе се реализира во втора смена, во адаптираните простории на хирургија“, рече д-р Мирчовска.

Пристигнаа повредените од „Пирогов“ во Софија

Таа информираше дека дополнително, пристигнале и повредените од болницата „Пирогов“ во Софија. Тие ќе се вклучат во терапијата во кочанската болница, затоа што сѐ уште ќе имаат обврски за прегледи во бугарската здравствена институција.

„Со оглед што реконструкцијата на просториите за физикална терапија оди според планот, очекуваме за три недели да почнат да се користат условите таму“, додаде Мирчовска.

Видете и ова:

Пластичен хирург утре ќе ги посети повредените во одморалиштето на Пониква

Во втората група повредени кои ќе престојуваат на Пониква, освен оние на кои им е потребна физикална терапија, ќе бидат вклучени и лица со респираторна патологија на кои им завршило лекувањето.

Лекувањето за сите повредени во пожарот во дискотеката „Пулс“ е бесплатно, а одлуката одморалиштето на Пониква да стане рехабилитационен центар за нив, Владата ја донесе на 11 јуни.

Владината прес служба тогаш соопшти дека одморалиштето има 27 соби и 56 легла коишто му се ставаат на располагање на Министерството за здравство.

Неколку дена подоцна, ваквата одлука беше оспорена од опозицијата која реагираше дека се отвораат сериозни прашања околу „одговорноста и профеисоналноста на институциите“.

„Македонија располага со повеќе објекти наменети за долготрајна нега и рехабилитација: Јасеново, Отешево, Лешок, па дури и делови од постојните клиники и болници кои можеа да бидат пренаменети и опремени. Зошто ниту еден од овие капацитети не беше земен предвид? Зарем здравствениот систем не знае со што располага“ – праша на прес конференција д-р Елена Радевска, членка на Комисијата за здравство на СДСМ.

Од ВМРО-ДПМНЕ пак, ги оценија овие изјави како „паушални и злонамерни“.

„Врз основа на која проценка и кои факти проценија од СДС и Радевска дека одморалиштето Пониква се несоодветни за таа намена? Ставањето во употреба на одморалиштето беше проценка на стручен здравствен тим од лекари на министерството за здравство, а меѓу другото е и барање на самите пациенти“, возвратија од владеачката партија.

Пожарот кој избувна на 16 март годинава во дискотеката „Пулс“ во Кочани ги одзеде животите на 62 млади лица, а околу 200 беа повредени.

Иранските пратеници ги поддржуваат повиците за затворање на Ормускиот теснец, витална глобална трговска рута, каде што поминува повеќе од една петтина од светското снабдување со нафта секој ден.

Техеран во минатото се закануваше дека ќе го затвори теснецот, што ќе ја ограничи трговијата и ќе влијае на глобалните цени на нафтата,но никогаш не ја оствари заканата.

Иако очигледно постои консензус во иранскиот парламент за поддршка на затворањето на теснецот, крајната одлука е на Врховниот совет за национална безбедност на земјата.

Покрај Иран, Саудиска Арабија, Кувајт и Ирак исто така се потпираат на тесниот воден пат за да ја донесат својата нафта до Кина и другите светски пазари.

Теснецот лежи помеѓу Оман и Иран и го поврзува Персискиот Залив на север со Оманскиот Залив на југ и Арапското Море пошироко.

Широк е 33 километри во својата најтесна точка, а неговата лента за транспорт е широка само 3 километри.

Стравувањата од затворањето на теснецот предизвикуваат шокови низ нафтените пазари

Иран, клучна членка на ОПЕК, произведува околу 3,3 милиони барели нафта дневно и извезува над 2 милиони дневно, најголем дел преку Ормутскиот Теснец.

Како што ескалираат тензиите со Израел, се зголемуваат стравувањата дека оваа витална бродска рута би можела да биде цел или затворена.

Приближно 20% од светската нафта, околу 18-19 милиони барели дневно, поминува низ теснецот.

Дури и привременото нарушување може да предизвика шок на глобалното снабдување и да доведе до пораст на цените на енергијата.

Затворањето на теснецот му нуди на Техеран начин директно да ги притисне САД со предизвикување скок на цените на нафтата, што веројатно би предизвикало итна инфлација, како во САД, така и на глобално ниво.

Меѓутоа, таквиот потег би бил и значаен чин на економска самосаботажа.

Иран се потпира на истата рута за сопствениот извоз на нафта, а нејзиното блокирање може да ги натера арапските земји од Персискиот залив - и покрај нивните критики за израелскиот напад - да влезат во кавгата со цел да ги заштитат своите стратешки и економски интереси.

Во пресрет на локалните избори наесен партијата Демократска обнова на Македонија (ДОМ) објави дека излегува од досегашната коалиција со СДСМ и во иднина ќе делува независно на македонската политичка сцена. Стратегиската определба на партијата е создавање на нова "Зелена коалиција" во партнерство со граѓански организации.

Промените ги донел Централниот одбор на ДОМ, со цел да се постави нова програмска насока ориентирана кон развој на еколошки, фер и инклузивни политики. "Кога процесите се затворени, потребно е самостојно и доследно политичко дејствување", наведуваат од партијата.

Ова било решено на седница на Централниот одбор на ДОМ одржана пред два дена, на која, како што велат од партијата, се донесени три важни одлуки кои ќе ја постават идната политичка насока на ДОМ, која води кон вредносна доследност, отвореност и одговорност.

Видете и ова:

Дали гневот по трагедијата во Кочани може да се прелее на изборите во октомври?

Велат дека ваквиот политички избор е желба на членовите на партијата да градат нова култура на локална политика – автентична, вредносно доследна и поврзана со потребите на локалните заедници.

„Наместо компромиси со политички партнери без визија, ДОМ ги отвора вратите само за граѓанските сојузници кои ја споделуваат вредносната мисија за зелена, праведна и инклузивна локална политика“, велат од партијата.

Во својата изјава, партијата изразува критика кон актуелниот политички амбиент и потенцира дека коалициите треба да се создаваат врз основа на вредности, а не само на партиски интереси. За претстојните локални избори, ДОМ најавува отсуство на формални коалиции со политички партии и соработка исклучиво со граѓански иницијативи и локални заедници.

ДОМ не соопштува со кого конкретно ќе коалицира на локалните избори кои најверојатно че се одржат во октомври, ниту каде ќе има свои кандидати за градоначалници и советници.

Двете најголеми партии ВМРО-ДПМНЕ и СДСМ вече објавија кандидати за градоначалници во голем дел градови, но и двете партии главно ги објавуваат имињата на актуелни градоначалници кои повторно ќе се кандидираат .

Американскиот претседател Доналд Трамп сугерираше дека би можел да го поздрави соборувањето на владата во Техеран, неколку часа откако членовите на неговата администрација инсистираа дека неодамнешните напади врз Иран не биле наменети за „промена на режимот“.

„Политички не е коректно да се користи терминот „Промена на режимот“, но ако актуелниот ирански режим не е во состојба да го направи Иран ПОВТОРНО ГОЛЕМ, зошто да не го промени режимот? Да ја направиме Америка повторно голема!!!“, напиша Трамп на својата платформа „Truth Social“.

Коментарите дојдоа неколку часа откако водечките членови на неговата администрација - потпретседателот Џеј Ди Венс, државниот секретар Марко Рубио и секретарот за одбрана Пит Хегсет - посочија дека американските воздушни напади на иранските нуклеарни постројкина 21 јуни имале за цел да се постигне договор преку преговори, а не да се собори сегашната теократска влада предводена од исламот.

На прес-конференција, Хегсет ги нарече нападите „прецизна операција“ чија цел е само иранската нуклеарна програма, а не иранските трупи или иранскиот народ. „Оваа мисија не беше, и не е, за промена на режимот“, рече тој.

Трамп „бара мир, а Иран треба да оди по тој пат“, рече Хегсет, подоцна додавајќи: „Треба да има договор со преговори овде“.

„Ние не сакаме да го продолжиме ова или да го прошириме повеќе отколку што е веќе проширено. Сакаме да ставиме крај на нивната нуклеарна програма“, рече Венс на телевизијата NBC. „Сакаме да разговараме со Иранците за долгорочно решение овде.

„Иранскиот режим треба да се разбуди и да каже: „Во ред, ако навистина сакаме нуклеарна енергија во нашата земја -- постои начин да го направиме тоа“. Таа понуда сè уште постои.

Видете и ова:

САД го бомбардира Иран: Што треба да знаете за можните промени во светот

Некои членови на Републиканската партија на Трамп, сепак, повикаа на соборување на иранската влада во минатото, вклучувајќи го и влијателниот сенатор од Тексас, Тед Круз.

„Јас се залагам да користиме максимален притисок и економски санкции за да извршиме притисок врз режимот на начин што би можел да го поттикне падот на овој режим“, рече тој пред американските напади.

На 22 јуни, американските власти го предупредија Техеран да не возвраќа по невидените воздушни напади за кои Трамп тврдеше дека ги „уништиле“ клучните ирански нуклеарни постројки.

Во услови на зголемени тензии, Соединетите Држави објавија ретко „глобално предупредување“, советувајќи ги Американците во странство да бидат повнимателни.

„Конфликтот меѓу Израел и Иран резултираше со нарушувања на патувањата и периодично затворање на воздушниот простор низ Блискиот Исток. Постои можност за демонстрации против американските граѓани и интересите во странство“, се вели во предупредувањето.

Иран и Израел започнаа нови рунди воздушни напади едни против други во раните утрински часови на 23 јуни.

Видете и ова:

Дали воената интервенција во Иран може да го смени режимот на ајатоласите?

Иран одговори ладнокрвно на итните повици за враќање на разговорите, нагласувајќи го своето право на самоодбрана, велејќи дека Соединетите Држави ќе бидат одговорни за „опасните последици“ од своите постапки и сугерирајќи дека дипломатијата може да дојде само откако Техеран ќе одговори.

Министерот за надворешни работи Абас Аракчи на прес-конференција во Истанбул рече дека „вратата на дипломатијата“ секогаш треба да биде отворена, но дека „тоа не е така во моментов“.

Иран е нападнат и ќе го користи своето право на самоодбрана се додека е потребно, додаде тој, но рече дека не може да открие какви дејствија ќе преземе Иран како одговор на американските напади.

Иранските државни медиуми подоцна објавија дека Аракчи пристигнал во Москва на 23 јуни за да одржи консултации со високи лидери, вклучително и со претседателот Владимир Путин, чија неодамнешна понуда да помогне во преговорите со Техеран беше практично отфрлена од Трамп.

„Русија е наш партнер и ние секогаш се консултираме“, рече Аракчи пред неговото пристигнување.

Видете и ова:

Нови ракетни напади меѓу Иран и Израел: Техеран нема да преговара додека Тел Авив напаѓа

Во меѓувреме, израелскиот премиер Бенјамин Нетанјаху рече дека Израел е „многу, многу блиску“ до постигнување на своите цели по повеќе од една недела воздушни напади против Иран, вклучително и елиминирање на балистичките ракети и нуклеарните закани на Техеран.

„Чекор по чекор се движиме кон постигнување на овие цели, многу, многу сме блиску до нивно исполнување“, рече Нетанјаху на прес-конференција.

Тој додаде дека „штом ќе бидат постигнати, операцијата ќе биде завршена“.

На 13 јуни, Израел започна големи напади против Иран, гаѓајќи ги неговите ракетни и нуклеарни постројки, како и воените лидери и безбедносните служби.

Многу врвни воени лидери и нуклеарни научници беа убиени во нападите, призна Иран.

Од почетокот на првичните израелски напади, двете нации разменија воздушни напади една против друга, предизвикувајќи воени и цивилни жртви и материјална штета.

Групата за човекови права Активисти за човекови права со седиште во Вашингтон соопштија дека најмалку 950 луѓе се убиени во Иран во воздушни напади од 13 јуни, меѓу кои 380 цивили. Израелските власти соопштија дека бројот на загинати во иранските напади е 24.

Генералниот секретар на ОН предупреди на „растечкиот ризик дека овој конфликт може брзо да излезе од контрола“, бидејќи стравувањата од поширока војна се зголемија по американското бомбардирање во текот на ноќта.

Антонио Гутереш зборуваше на вонредната седница на Советот за безбедност на ОН, додавајќи дека „народот во регионот не може да издржи уште еден циклус на уништување“.

Извори: Ројтерс, АФП, АП

Премиерот, Христијан Мицкоски тврди дека деновиве добил „вознемирувачки информации за една силна активност на одредени политичари во Брисел“.

„Очекувам силна порака од Европскиот парламент за македонскиот идентитет и за македонскиот јазик. Успеавме да го амортизираме ударот, којшто повторно некој сакаше да го нанесе врз македонскиот идентитет и јазик“, истакна Мицкоски одговарајќи на новинарски прашања при пуштањето во употреба на реконструираниот регионален пат Понов мост-Богданци.

Тој посочи дека откако ја добил информацијата за една силна активност на одредени политичари во Брисел, имал организирана активност со министерот за надворешни работи, при што успеале да го амортизираат ударот, кој како што рече, повторно некој сакал да го нанесе врз македонскиот идентитет и јазик.

„Јас успеав да контактирам со сите од Брисел и мислам дека успеавме некако да го амортизираме оној удар, кој што повторно некој сакаше да го нанесе врз македонскиот идентитет и јазик, доформулирајќи го, дообјаснувајќи го со модерен или сегашен, само да се обидат да креираат некоја нова нација, а со тоа да го нарушат и кредибилитетот на самата ЕУ. За жал, постојат и такви членови на Европскиот парламент, но среќа за нас што огромното мнозинство таму, застануваат зад нашите аргументи“, рече Мицкоски.

Видете и ова:

Во потрагата по Бадентер, закони може да заглават во собраниските фиоки

Прашан за коментар во врска со денешната трибина на СДСМ насловена „Македонија понижена – Една година Влада“, Мицкоски порача дека сето она на кое што работат овие денови, е токму исплата на сите долгови наследени од оваа партија.

Тој потенцира дека веќе нема да има прифаќање на сѐ што „ќе се сервира на маса, нема да се прифаќаат билатерални спогодби и договори кои што се на штета на македонскиот идентитет“.

Претходно, опозицискиот лидер Венко Филипче реагираше дека актуелната влада ги понижила работниците, земјоделците и младите.

„Една година беше повеќе од доволно време да видиме дека ВМРО-ДПМНЕ дојде на власт со една голема лага. По една година од владеењето на ВМРО-ДПМНЕ, ЗНAM и ВЛЕН, Македонија не изгледа како просперитетна држава со јасна насока, туку како држава со повредено достоинство и разочарани граѓани“, порача денеска лидерот на СДСМ, Филипче на партиската трибина насловена „Македонија понижена – една година Влада“.

Експерт за пластична хирургија утре ќе ги посети повредените од пожарот од Кочани кои се на рехабилитација во Пониква за да види какви потреби имаат и како ќе може да им се помогне - најави денеска (22 јуни) министерот за здравство, Азир Алиу.

„Таму 45 граѓани се дел од таа програма во Пониква. Имаме пет вработени, двајца лекари и три медицински сестри. Имаме програма која е во тек од сабота. Денеска на пример таму температурата е фантастична 17 степени. Надвор се, играат кошарка и такви активности имаат“, изјави Алиу на денешната прес конференција.

Што се однесува до Кочани и последиците од пожарот во дискотеката „Пулс“, тој кажа дека се планира долгогодишна програма за градот не само за граѓаните и за настраданите.

Видете и ова:

Три месеци по трагедијата во Кочани - повредените бавно закрепнуваат

Претходно, на брифинг со новинарите тој најави дека Кочани ќе добие модерен и иновативен центар, каде повредените ќе може да развиваат креативни идеи.

„Верувам дека од таков тип на центар ќе излезат можеби и старт-ап компании со нови идеи во здравството и во други решенија. Тие млади се многу креативни, само им треба инфраструктура и менторирање за да реализираат креативни идеи во проекти, компании и така натаму“, истакна министерот.

Првите пациенти од трагедијата во Кочани пристигнаа во одморалиштето на Пониква вчера, а во меѓувреме се подобруваат условите и во болницата во Кочани.

Доктор Катерина Паниќ - Мирчовска, в.д. директор на Општата болница - Кочани, во петокот информираше дека веќе ги добиле потребните креми за апликација на изгорениците. Таа рече дека е стигната и тура од 95 лепенки кои како што додаде, пациентите долго ги барале.

„Support Kocani“ обезбеди 4.070 силиконски лепенки за повредените

Попладнево пак, граѓанската иницијатива Support Kocani соопшти дека во Кочани пристигнале 407 кутии со силиконски лепенки Atrauman Silicone, со вкупно 4.070 лепенки, како дел од континуираната хуманитарна помош за повредените од трагичниот настан во клубот „Пулс“.

Овие медицински лепенки, во кои секоја кутија содржи 10 парчиња, како што посочуваат, се специјално наменети за третман на изгореници и чувствителни повреди на кожа. Тие претставуваат донација од хумани сограѓани и компании кои живеат и работат во Словенија, кои великодушно се приклучија на нашата мисија за помош.

-Лепенките наскоро ќе бидат донирани на Општата болница во Кочани, во координација со здравствените служби и потребите на пациентите. Оваа донација е уште еден потсетник дека вистинската поддршка понекогаш доаѓа таму каде што најмалку ја очекуваме - од срцата на обичните луѓе, преку граници и без големи зборови, велат од иницијативата.

Нагласуваат дека Support Kocani очекува нови пратки со медицински материјали и од други земји, меѓу кои Австралија и Данска, каде како што велат, македонски иселеници и пријатели на Кочани активно се вклучуваат со поддршка.

Киев прими тела на најмалку 20 руски војници, наместо на украински, во текот на неодамнешната размена на загинати во војната со Москва – изјави претседателост Володомир Зеленски, обвинувајќи ја Русија дека „не проверува кого праќа“.

„Нам ни дадоа мртви тела на свои граѓани. Тоа е нивниот став кон војната, кон своите војници. И тоа е веќе документирано. Понекогаш овие тела дури имаат и руски пасоши“, истакна Зеленски,

Тој посочи дека руската страна инсистирала дека сите загинати се Украинци.

Зеленски разговараше со новинарите во Киев на 20 јуни, покажувајќи им руски пасош и лична карта за кои украинските власти сметаат дека му припаѓаат на еден од дваесетмината загинати Руси.

Видете и ова:

Путин тврди дека е подготвен за разговори за прекин на огнот во Украина

Според надлежните, човекот бил од околината на Москва, но тие не го открија неговиот идентитет.

Репатријациите беа спроведени по двете рунди директни мировни преговори во Истанбул на почетокот на јуни, кои резултираа со договор за враќање на затвореници и тела на загинати, но не донесоа видлив напредок во заокружувањето на руската војна против Украина.

За време на втората рунда преговори, Украина и Русија се согласија да разменат тела на по 6000 војници. Меѓутоа, Киев изрази загриженост дека бројот е преголем и дека немало доволно време за форензички прегледи и проверка на идентитетот на загинатите.

Десетина илјади војници беа убиени на двете страни од почетокот на руската инвазија на Украина во февруари 2022. Ниту една од двете земји не објавува редовни информации за воените жртви.

Украина бара поддршка од Западот за зголемување на производството на оружје. Зеленски исто така, изјави дека Украина почнала да користи домашни дронови-пресретнувачи за да се спротивстави на руските дронови. При тоа, побара од западните сојузници на Украина да издвојат 0,25 проценти од својот бруто домашен производ (БДП) за да му помогнат на Киев да го зголеми производството на оружје.

Видете и ова:

Лидерите на групата Г7 не успеаја да постигнат амбициозни договори за клучни прашања

Тој додаде и дека Украина преговарала со Данска, Норвешка, Германија, Канада, Велика Британија и Литванија за отпочнување на заедничко производство на оружје.

„Украина е дел од европската безбедносна мрежа и сакаме 0,25 проценти од бруто домашниот производ на одредени земји да се издвои за нашата одбранбена индустрија и домашното производство“, исткна Зеленски.

Тој посочи дека Украина оваа година обезбедила 43 милијарди долари за финансирање на домашното производство на оружје.

Шефовите на државите членки на НАТО ќе имаат средба на претстојниот самит во Хаг идната недела за да разговараат за поголеми издатоци за одбраната.

Генералниот секретар на НАТО, Марк Руте предложи секоја земја да потроши пет проценти од својот БДП за одбранбени и безбедносни мерки.

Министерството за здравство потпишало меморандум за соработка со компанијата ЛИМАК ДОО Скопје, со што ќе се обезбеди паркинг простор за 300 возила, наменет за вработените во здравствените установи кои функционираат во рамки на Клиничкиот центар.

За ова денеска (22 јуни) на прес конференција информираше министерот за здравство, Азир Алиу кој рече дека „во услови кога над 6.000 луѓе секој ден минуваат низ комплексот, а повеќе од 2.500 од нив се вработени, прашањето на паркирањето не може да биде оставено на импровизација“.

Тој посочи дека од 1 јули, овој паркинг простор ќе биде ставен во функција и достапен 24 часа.

„Се наоѓа на оддалеченост од приближно пет минути пешачење од било која клиника. Со пренасочување на возилата на вработените надвор од срцето на кампусот, го ослободуваме најблискиот простор за пациентите“, рече Алиу.

Според него, ова е само прв чекор во решавање на проблемот, а во меѓувреме здравствените власти почнуваат и со системска анализа на просторот.

„Ќе го мапираме секој агол, ќе знаеме точно колку возила може да се паркираат, кои се пиковите во текот на денот и каде се најкритичните точки на застој. На основа на тие податоци, ќе создадеме модел за управување со просторот, кој нема да се темели на навика и хаос, туку на бројки, потреби и логистика“, истакна министерот.

Во процесот, ќе бидат вклучени и самите клиники, директорите и вработените, бидејќи секое практично решение мора да доаѓа со знаење од неговите корисници.

Информативни табли за полесен пристап на пациентите

Во следната фаза, рече тој, ќе се подобри и движењето на пациентите во рамки на Клиничкиот центар.

„Во тек се подготовките за поставување на дигитални информативни табли на влезовите од комплексот, како и на клучните точки во внатрешноста на Клиничкиот центар, со што ќе овозможиме полесна ориентација, побрз пристап до клиниките“, порача Алиу.

Видете и ова:

Во недостиг на долгорочно, се бара краткорочно решение за паркингот на Клинички

Одговарајќи на новинарско прашање во врска со ѕидот што се урна кај Детската клиника, Алиу рече дека процедурата е веќе почната, како и дека ќе има повлекување од еден метар и половина за да може патот над Клиниката да биде проширен.

Во однос на проблемот со клиничката Перална, кажа дека во моментов се анализира состојбата и дека за кратко време ќе се изнајде решение.

„Знаете дека институцијата е подолг период во финансиска криза, но исто така мора да најдеме начин и процеси за да се исплатат бараните сервиси кои таа институција ги нуди. Малку е покомплексен проблемот. Заедно со Владата, директорот на институцијата и со мене како министер за здравство ценам дека брзо ќе најеме решение како институцијата да се ослободи од таков тип на финансиски притисоци“, рече Алиу.

Видете и ова:

Повредените во Кочани ќе добијат центар за дружби и креативни идеи

Наредната недела тој има состанок и со претставниците на компанијата која стопанисува со Клиничката перална.

Министерот за здравство на прес-конференцијата соопшти дека мора да се направи нова методологија и анализа за потребите на здравството и на пациентите врз основа на понови податоци поврзани со демографијата, нови болести, потреби на пациентите, на здравствените установи за вработени.

Амбасадата на Северна Македонија во Израел денеска соопшти дека воздушниот простор на Израел како и аеродромот, се затворени, а планот за евакуација на странски државјани преку аеродромот Тел Авив засега не е возможен.

Има најава за отворање на аеродромот, денес 22 јуни, од 14:00 часот - се наведува во информацијата што Амбасадата ја објави на Фејсбук.

-Од Министерството за туризам на Израел сме информирани дека функционира морска рута од Ашдод до Лимасол (Кипар) (компанијата "Mano Shipping"). Следниот брод со слободни места "Crown Iris" планирано е да отпловува од Ашдод на 27 јуни (петок) – велат од Амбасадата.

Оттаму информираат дека картите може да се купат директно од веб страната на компанијата.

Видете и ова:

Муцунски: 28 македонски државјани се пријавиле за евакуација од Израел

Македонските државјани кои немаат никаков валиден пасош, молиме да се обратат до Амбасадата за добивање на Патен лист – додаваат од Амбасадата.

Во објавата се посочува и информација од Министерството за туризам на Израел во врска со патувањето со брод.

Инаку, првата група македонски државјани кои побараа евакуација од територијата на Израел пристигнаа на скопскиот аеродром во средата (18 јуни).

„Со ова, станавме една од првите земји во Европа што успешно организираше и реализираше повраток на своите граѓани од зоната на конфликт“, објави на социјалните мрежи министерот за надворешни работи и надворешна трговија, Тимчо Муцунски.

До понеделникот (16 јуни) поддршка за евакуација по ескалацијата на Блискиот Исток побарале 28 македонски државјани.

Министерот Муцунски тогаш на прес-конференција изјави дека вкупно 28 лица се пријавиле да бидат евакуирани од Израел и оти евакуацијата ќе се врши со владиниот авион. Тогаш најави дека осум наши државјани, од кои четири деца, ќе заминат во Египет и со авион на Владата, придружени од безбедносен конвој ќе пристигнат во Скопје.

Министерот во понеделникот најави дека втората група се очекува да го напушти Израел и да замине кон нашата држава веднаш по воспоставување редовен авионски сообраќај од Тел Авив.

Неколку стотици граѓани од повеќе белградски општини протестираа вчера (21 јуни) пред зградата на Републичката изборна комисија (РИК) во центарот на Белград барајќи да се распишат вонредни парламентарни избори.

Распишувањето на изборите е дел од барањата на студентите во блокада кои отпочнаа со протести низ цела Србија по падот на настрешницата на Железничката станица во Нови Сад во ноември 2024 година.

Граѓаните на вчерашниот протест побараа власта да ја „признае победата“ на опозицијата на локалните избори во Косјериќ, како и поништување на резултатите од изборите во Заечар.

Според официјалните резултати, на изборите во Заечар на истокот на Србија на 8 јуни, највеќе гласови освои владеачката Српска напредна странка (СНС), но опозицијата тврди дека имало големи изборни манипулации.

Видете и ова:

Со протести во 30 градови во Србија се бараат избори

„Притисокот мора да продолжи“, изјави на протестот во Белград студент од Заечар и додаде дека се поднесени критивчни пријави против оние кои „учествувале во купувањето гласови“.

Студентка од Косјериќ пак, изјави дека СНС ги изгубила изборите во ова место и дека граѓаните „кажале што мислат“.

Владеачката СНС според официјалните резултати, во Косјериќ освои 14 места, а опозициската листа „Обединети за Косјериќ“ 13.

Полиција околу пионерскиот парк

Набљудувачката мисија на Центарот за истражување, транспарентност и одговорност (ЦРТА) во прелиминарниот извештај оцени дека изборниот ден во Косјериќ не бил ниту слободен ниту чесен, додека резултатот во Заечар не ја изразува волјата на граѓаните затоа што дури на 19 отсто од избирачките места се забележани тешки облици на неправилности.

Протестот на граѓаните кој се одржа под слоганот „Циркусот мора да си замине“, се одржа во непосредна близина на Пионерскиот парк каде од март има камп на луѓе кои се против протестите и блокадите.

Таму, граѓаните кои протестираа побараа од надлежните да ги отстранат оградите кои се поставени околу паркот и да овозможат слободен пристап.

Околу Прионерскиот парк пред самиот протест беше распоредена полицијата, а група од импровизираниот камп на разглас пушташе националистички песни.