Рускиот претседател Владимир Путин е подготвен да направи чекор напред кон мировен договор за Украина, но главната цел на Москва е да ги постигне своите цели, изјави портпаролот на Кремљ, Дмитриј Песков за државната телевизија, јави Ројтерс.

Ден претходно, на 19 јули, украинскиот претседател Володимир Зеленски изјави дека Киев ѝ испратил на Москва понуда за одржување нова рунда мировни преговори следната недела, нагласувајќи дека сака да ги забрза преговорите за прекин на огнот.

Тој рече дека руската страна „треба да престане да бега од носење одлуки“.

Видете и ова:

Трамп ѝ се закани на Москва со царини ако не постигне договор со Украина за 50 дена

Песков рече дека светот е навикнат на понекогаш „острата“ реторика на американскиот претседател Доналд Трамп, но истакна дека Трамп, исто така, во коментарите за Русија нагласил дека ќе продолжи да бара мировен договор.

„Претседателот Путин постојано зборуваше за својата желба што поскоро да го доведе украинското решение до мирен крај. Ова е долг процес, бара напор и не е лесно. Главната работа за нас е да ги постигнеме нашите цели. Нашите цели се јасни“, рече Песков пред новинарот на државната телевизија, Павел Зарубин.

Трамп објави построг став кон Русија, ветувајќи нов бран воена помош за Украина, вклучувајќи ги и системите за ракетна одбрана „Патриот“.

Тој, исто така, ѝ даде на Русија рок од 50 дена да се согласи на прекин на огнот или да се соочи со дополнителни санкции.

Украина и Русија одржаа две рунди разговори во Истанбул во минатите пет месеци. Тие се согласија за размена на затвореници, но немаше значителен напредок во завршувањето на речиси три и полгодишниот конфликт што започна со руската инвазија на Украина во 2022 година.

Во денешна Русија, дури и споделувањето информации од книги што се слободно достапни во книжарниците може да доведе до години затвор. Токму тоа му се случи на Григориј Скворцов, 35-годишен фотограф и музичар од Перм.

Тој, како и илјадници други низ целата земја, купил книга од 2021 година наречена „Тајни советски бункери“, напишана од историчарот Дмитриј Јурков. Книгата содржи бројни дијаграми на некогаш тајни советски објекти кои неодамна беа декласифицирани.

Книгата, исто така, доаѓаше со дополнителни дигитални материјали, кои Скворцов исто така ги купи. Подоцна споделил некои од овие документи со неименуван американски новинар.

Во ноември 2023 година, додека еден пријател го посетувал, руската полиција извршила рација во неговиот стан во Перм.

Според роднина, полицијата снимала сè што се случило.

„Го претепале и го навредувале“, изјавил роднината на фотографот за „Сибирските реалности“ на Радио Слободна Европа.

„Потоа го принудиле да му каже на камерата кому ги испратил информациите од книгата на Јурков“.

Роднината, која сакала да остане анонимна, рекол дека поминале месеци откако Скворцов комуницирал со Американецот и дека полицијата морала да го потсети на идентитетот на Американецот. „Тие самите му го кажале името, практично му го „предложиле““, рекол тој.

Од инвазијата на Украина во 2022 година, Русија драстично ја проширила дефиницијата за она што може да се смета за „државна тајна“.

Во случајот на Скворцов, немало парична размена, а пријателите тврдат дека документите биле испратени за да му помогнат на лице со слични интереси - вообичаена практика меѓу урбаните истражувачи и љубителите на историјата. „Тој немал себични цели“, рекол еден пријател за „Сибирските реалности“.

Пријателите на Григориј Скворцов велат дека архитектурата отсекогаш му била страст. Во 2010 година дипломирал на Градежниот факултет во Перм, со насока архитектура, но набрзо постигнал успех како фотограф.

„Никој не му бил рамен кога станувало збор за фотографирање индустриски згради. Тој го обожавал тоа - покриви, напуштени згради - знаел како да направи визуелно задоволство дури и од обична работилница“, рекол колега.

„Градежните компании од Перм и други делови на Русија му нарачувале промотивно снимање“, се сеќава еден познаник од Перм. „Се сеќавам дека дури и имал изложба во зградата на локалната администрација. Беше многу баран.“

Во 2017 година, Скворцов го основа бендот Jagath, кој негува музички жанр познат како индустриски амбиент. На веб-страницата на бендот пишува:

„Ние ја создаваме нашата музика на напуштени индустриски локации - на дното на влажни подземни канализации и во огромни шупливи резервоари за нафта.“

Иако нивната музика се смета за алтернативна, таа беше објавена под покровителство на британска издавачка куќа, а го привлече и вниманието на германското музичко списание Sonic Seducer. За време на интервјуто за списанието, Скворцов го изрази своето противење на руската инвазија на Украина.

Неговите пријатели веруваат дека некој што го прочитал интервјуто го пријавил Скворцов во Федералната служба за безбедност (ФСБ) на Русија.

На прашањето како руските безбедносни служби откриле дека Скворцов му предал историски материјали на американски новинар, неговите роднини рекле дека веруваат оти надзорот врз него започнал по интервјуто, околу една година пред неговото апсење во ноември 2023 година.

Скворцов тврди дека негов познаник бил под надзор на ФСБ поради споделување материјали од книгата „Тајни советски бункери“. После тоа, тој го контактирал американскиот новинар и го замолил да не ги објавува материјалите што претходно му ги испратил.

Во писма до пријателите, Скворцов тврди дека руските власти отвориле случај против него за да ги прикријат сопствените недостатоци, не забележувајќи дека потенцијално чувствителни информации слободно се продаваат и споделуваат преку интернет.

„Немав пристап до државни тајни и немав злонамерна намера“, напишал фотографот од притвор.

„Овие информации не беа заштитени од државата... Обвинителството и судовите ги игнорираат овие факти и го третираат случајот формално, очигледно од страв од репресија од страна на ФСБ.“

Пријателите и поддржувачите на фотографот, кои формирале своја група на Телеграм, велат дека имаат намера да се жалат на пресудата.

Претседателот на Собранието, Африм Гаши на денешниот брифинг со новинарите истакна дека прашањето за учеството на независните кандидати на претстојните локлани избори ќе мора да се реши, но ,ни самиот не знае како и кога би се согласиле парламентарните партии да го донесат законот.

Тој потенцира дека ова прашање ако не се реши до одморите, ќе мора по одморите кон крајот на август.

„Препораките на Уставниот суд беа да се донесе нов Изборен законик, кој ни е во процедура но не можеме да го поминеме, откако во март ги укина членовите со кои на независните кандидати им беа потребни зголемен број потписи за да се кандидираат на избори, но еве сега и на крајот на јули не се исполнети условите за да се донесат новите норми. Имаше согласност од големите партии, а се противеа ДУИ и Левица. Ако имаме услови до крајот на месецов би го изгласале, ако не, не знам. Ќе треба да се продолжи по старите решенија да се оди на избори. Ќе треба да најдеме решение. Ова сме го збореле на координации со координаторите на сите пратенички групи дека Изборниот законик е нешто што е приоритетно и мораме да најдеме начин да го решиме“, рече Гаши.

Видете и ова:

Јовановски: Како независни очекуваме подобри резултати на изборите

Гаши соопшти дека во првите 10 дена на август се очекува да ги распише локалните избори кои треба да се одржат во октомври.

„Не можам да ви тврдам кога ќе ги распишам изборите, затоа што се поврзани некои теми. Сакаме да решиме некои проблеми, за да не биде тоа после пречка“, рече тој.

Гаши потенцира дека уште два-три закони остануваат да се донесат, а кои се поврзани со Бадентер.

За Предлог-законот за правична застапеност, кој се очекува Владата да го прати на мислење до Венецијанската комисија, Гаши нагласи дека подобро е да ги апсолвираат сите дилеми пред да почне законодавната постапка, за кога ќе го изгласаат веднаш да се применува.

„Не сме информирани и консултирани. Мислам дека Владата постапува како што таа мисли дека е во ред. Сепак, работата на Собранието почнува во моментот кога еден закон се приложува во нашата архива и во моментот кога почнува законодавната постапка. Оттогаш Собранието стапува на сила. Тој е политички дел. Владата, парламентарното мнозинство сакаат да ги разгледаат сите можности, да се направат сите можни консултации, тука мислам и на Венецијанската комисија, за кога ќе дојде во Собрание да не го враќаме назад, туку да биде финална постапка. Не значи дека ќе го прифатиме така каков што е, но со што помалку дилеми да се влезе во собраниска процедура е подобро“, рече Гаши.

Видете и ова:

Институцијата што ги штити граѓанските права остана незаштитена

Спикерот информира дека е објавен огласот за нов Народен правобранител на местото на досегашниот Насер Зибери на кого му престана функцијата поради исполнување на условите за старосна пензија.

Премиерот Христијан Мицкоски изјави дека интензивно работи со професори и со министерот за економија и труд, Бесар Дурмиши за преземање мерки за намалување на цените на производите, како и на предлог за нови анализи за потрошувачката кошничка.

Мицкоски очекува наскоро да биде закажан Економско-социјалниот совет (ЕСС), а на состанокот ќе се разговара и на темата за потрошувачката кошничка.

„На тој Економско-социјален совет претставниците на синдикатите, на работодавачите и Владата ќе разговараат и за потрошувачката кошничка, којашто мислам дека треба да биде поделена во пет сегменти: потрошувачката кошничка за самец, потрошувачка кошничка за млад брачен пар, за трочлено семејство, за четири члено семејство и потрошувачка кошничка за пензионери. Мислам дека треба во иднина да опфатиме анализа на пет потрошувачки кошнички, затоа што потребите на луѓето се според возраста, се разбира. Но, исто така потребите на луѓето се во зависност од бројноста, како е сочината една заедница“, изјави премиерот Мицкоски.

Премиерот додаде дека ова ќе биде неговиот предлог на Економско-социјалниот совет, а доаѓа по средбите и разговорите со академската фела.

„Мислам дека е добар за разгледување и за дебата на тој Економско-социјален совет, да имаме неколку потрошувачки кошнички, бидејќи потребите на еден пар пензионери не е ист како на еден млад брачен пар, или пак на трочлено и на четири члено семејство или пак на самец. Јас немам проблем да направиме една ваква темелна анализа, бидејќи само со повеќе анализи, со повеќе податоци можеме да дојдеме до подобри резултати“, вели Мицкоски.

Сојузот на синдикатите на Македонија (ССМ) денеска објави дека вредноста на синдикалната минимална кошница за домаќинство за јули 2025 година изнесува 65.328 денари и е зголемена за 630 денари во однос за јуни кога изнесуваше 64.698 денари.

Видете и ова:

Јулската синдикална кошница зголемена за 630 денари во однос на јуни

Според опозицискиот СДСМ, зголемувањето на синдикалната минимална кошничка е нов удар за граѓаните. Животот станува уште поскап, инфлацијата притиска, а куповната моќ на граѓаните е срушена, оценуваат од партијата.

„Овие поразителни бројки се резултатот од една година владеење на ВМРО ДПМНЕ – целосно промашена, аматерска економска политика. Ова е показател за целисниот дебакл на економските политики на Владата. Со ВМРО-ДПМНЕ граѓаните од ден во ден стануваат се посиромашни. Не само што немаат план како да се справат со растечката инфлација, туку упорно не прифаќаат ниту еден предлог што го понуди СДСМ за намалаување на цените и зголемување на платите“, се вели во партиското соопштение.

Косовските пратеници не успеаја во својот 50-ти обид да формираат собрание, и покрај најавите дека во текот на викендот може да се постигне договор за ставање крај на кризата предизвикана од институционалната блокада поради несогласувањата меѓу парламентарните партии.

На седницата во понеделник беа присутни 104 од 120 пратеници.

Фатон Пеци од партијата Гуксо, која е во коалиција со Движењето Самоопределување и Алтернативата, рече дека се вложени големи напори за формирање на собранието и ги повика сите пратеници да размислат за ситуацијата.

„Напорите продолжуваат. Вршителот на должноста премиер (Албин Курти) даде конкретни понуди до некои политички партии. Моментално, понудата е до Социјалдемократската иницијатива, додека во претходната фаза имаше понуди да се разговара за заедничка поделба на власта со Демократската лига на Косово“, изјави Пеци пред новинарите.

Видете и ова:

Конституирањето на Собранието на Косово повторно пропадна: Дали мандатите на пратениците се во опасност?

Тој потсети дека според Уставот на Косово, функцијата претседател на Собранието ѝ припаѓа на најголемата парламентарна група, во овој случај на Движењето Самоопределување.

Парламентарните партии со месеци не можат да најдат компромисно решение, а рокот за конституирање на Собранието, според Уставниот суд, истекува на 26 јули. Сепак, одлуката на судот не прецизира што ќе се случи ако партиите не постигнат договор до крајниот рок.

Претседателката на Косово, Вјоса Османи, најави дека оваа недела ќе се обрати до Уставниот суд за понатамошни чекори.

Застојот во конституирањето на косовското собрание настана затоа што најголемите албански партии не сакаа да ја поддржат кандидатката на Самоопределување за претседател на Собранието, Албулена Хаџиу, по што, од 1 мај, претседателот на конститутивната седница почна да предлага тајно гласање - на што повторно се спротивставуваат партиите што беа во опозиција во претходното собрание.

Самоопределување победи на парламентарните избори во февруари, но нема доволно гласови за самостојно да формира нови институции.

По седницата во понеделник, лидерот на Демократската лига на Косово, Лумир Абдиџику, изјави дека не очекува решение во наредните денови.

„Она што се очекува е дека, по рокот од 30 дена што завршува на 25 јули, ќе добиеме ново толкување од Уставниот суд на Република Косово. Сепак, веќе имаме едно толкување, како и негово непочитување. Ова значи дека имаме пресврт на уставниот поредок“, рече тој.

Во меѓувреме, во текот на викендот, лидерот на Самоопределување, Албин Кирти, и лидерот на Социјалдемократската иницијатива, Фатмир Лимај, се сретнаа, но деталите од состанокот не беа објавени.

Пратеничката на Социјалдемократската иницијатива, Џевахире Измаку, изјави дека нејзината партија побарала Лимај да биде номиниран за претседател на Собранието.

Пратениците од Демократската лига на Косово и Алијансата за иднината на Косово во понеделник повторија дека нема да гласаат за Лимај доколку тој биде номиниран за претседател на Собранието.

Пратениците од Демократската партија на Косово претходно изјавија дека нема да гласаат за ниту еден кандидат кој претходно имал министерски позиции.

Од друга страна, лидерот на партијата „За слобода, правда и опстанок“, Ненад Рашиќ - кој е и министер во сегашната влада - изјави дека ќе гласа за Лимај доколку Самоопределување го номинира.

За избор на претседател на Собранието на Косово се потребни 61 глас од пратениците. Движењето „Самоопределување“ освои 48 пратеници на изборите на 9 февруари, Демократската партија на Косово 24, Демократскиот сојуз на Косово 20, Српската листа 9, а коалицијата Алијанса за иднината на Косово – Социјалдемократска иницијатива 8. Уште 11 места им припаднаа на заедниците кои не се мнозинство, но Дуда Бале, Ветон Бериша и Адем Хоџа изјавија дека нема да поддржат никого додека не се исполнат нивните услови.

Земјите од Квинт досега во неколку наврати повикаа на брзо формирање на нови институции, додека граѓанското општество во Косово во неколку наврати протестираше пред зградата на Собранието, повикувајќи ги пратениците на одговорност.

Најмалку 19 лица загинаа на 21 јули кога авион за обука на воена армија од Бангладеш се урна во кампусот на приватно основно и средно училиште во Дака, изјави претставник на противпожарната служба.

Повеќе од 50 лица, вклучувајќи деца и возрасни, се хоспитализирани со изгореници, изјави за новинарите лекар од Националниот институт за изгореници и пластична хирургија.

Авионот се урна во кампусот на приватното училиште и колеџ „Мајлстоун“ во северниот округ Утара во Дака, соопштија официјални лица.

„Авион за обука Ф-7 БГИ на воздухопловните сили на Бангладеш се урна во Утара“, соопшти војската.

Авионот удрил во зграда, предизвикувајќи пожар.

„Ученик од трето одделение беше донесен мртов, а уште тројца, на возраст од 12, 14 и 40 години, беа примени во болница“, изјави Бидан Саркер, раководител на одделот за изгореници во болницата во Дака.

Владата вети истрага и помош на жртвите.

Инцидентот се случува нешто повеќе од еден месец откако авион на „Ер Индија“ се урна во студентски дом на медицински колеџ во Ахмедабад, Индија. Од 242 патници и членови на екипажот, 241 загинаа, заедно со 19 лица на земја.

Вредноста на синдикалната минимална кошница за домаќинство за јули 2025 година изнесува 65.328 денари и е зголемена за 630 денари во однос за јуни кога изнесуваше 64.698 денари, соопшти Сојузот на синдикатите на Македонија (ССМ).

Со изнајмен стан од 60 квадрати за месец март, додава ССМ, кошницата изнесува 80 703 денари.

Вредноста на Синдикалната минимална кошница за храна и пијалаци, за 63-те производи кои ги следи СМК, за јули 2025 изнесува 23.682 денари и споредено со јуни 2025 (23 167 денари) е зголемена за 515 денари.

Русија лансираше стотици беспилотни летала и повеќе од дваесетина ракети во масовен ноќен напад врз Украина, при што загинаа најмалку две лица, вклучувајќи едно во главниот град Киев, кој беше нападнат еден ден откако претседателот Володимир Зеленски предложи нови мировни преговори.

Зеленски ѝ понуди на Москва нова рунда мировни преговори оваа недела за време на викендот, додека нејзините меѓународни партнери се подготвуваат да испратат повеќе оружје во Украина откако постигнаа договор со американскиот претседател Доналд Трамп за користење на НАТО како канал за воена помош.

Украинските воздухопловни сили соопштија дека Русија испалила 426 беспилотни летала Шахед, пет хиперсонични ракети Кинжал и 19 крстосувачки ракети на различни локации околу Киев и други делови од земјата. Малку помалку од половина од беспилотните летала и сите освен една ракета беа уништени или блокирани, додаде таа.

„Спасувачките операции се во тек во нашите градови и заедници“, рече Зеленски.

Градоначалникот на Киев, Виталиј Кличко, потврди дека едно лице е убиено, а две други се ранети во ноќниот напад.

„Во областа Дарниција, едно лице беше хоспитализирано. Во областа Шевченко, каде што пожар уништи два ката од станбена зграда, едно лице побара медицинска помош на местото на настанот“, рече Кличко.

Нападот, исто така, го уништи влезот на метро станицата Лукјанивска во Киев, која се користеше како засолниште за време на воздушните напади. Станицата мораше да биде затворена.

Во западниот град Ивано-Франкивск, градоначалникот Руслан Марцинкив го нарече нападот најголем врз градот од почетокот на руската инвазија во февруари 2022 година.

И покрај сè поголемиот број докази за спротивното, Русија инсистира дека нејзините воздушни напади не се насочени кон цивилна инфраструктура.

Видете и ова:

Кремљ: Путин е подготвен да разговара за мир во Украина, но сака да ги постигне целите

Украинските власти и меѓународните агенции, вклучувајќи ги Обединетите нации и Европската унија, ја обвинија Русија за намерно насочување кон цивили, што според нив претставува воено злосторство.

Два круга директни мировни преговори меѓу Русија и Украина во Истанбул во мај и почетокот на јуни обезбедија голема размена на затвореници и договори за враќање на телата на паднатите војници.

Сепак, не е постигнат напредок во постигнувањето прекин на огнот што потенцијално би го завршил воениот конфликт што започна со инвазијата на Русија врз нејзиниот сосед во февруари 2022 година.

Американскиот претседател Доналд Трамп, изразувајќи фрустрација поради недостатокот на напредок, минатата недела ѝ даде на Москва рок од 50 дена да се согласи на прекин на огнот или да се соочи со построги санкции.

Зеленски рече дека Рустем Умеров, новоназначениот шеф на Советот за национална безбедност и одбрана на Украина, ѝ испратил на Москва понуда за одржување состанок следната недела, но не даде дополнителни детали.

Кремљ соопшти дека ги поздравува новите разговори, но дека „најважно за нас е да ги постигнеме нашите цели. Нашите цели се јасни, очигледни, тие не се променети“.

Тој, исто така, инсистираше дека секој мировен договор ќе бара од Украина да се откаже од контролата и да се повлече од четири региони што Русија нелегално ги анектираше во септември 2022 година, но никогаш целосно не ги окупираше.

Киев, исто така, мора да се откаже од својата кандидатура за членство во НАТО и да прифати строги ограничувања на своите вооружени сили - барања што Украина и нејзините западни сојузници категорично ги отфрлија.

Oдлуката за престанок на функцијата и разрешувањето на претседателката Татјана Димитровска, која е обвинета за оддавање службена тајна и фалсификување на испитот за добивање безбедносен сертификат е во надлежност на Собранието согласно Законот за спречување на корупцијата и судирот на интереси, се наведува во денешното соопштение на Државната комисија за спречување на корупцијата.

Од Комисијата напоменуваат дека поднесување оставка како морален чин е одлука и право на самата претседателка на Антикорупциска.

„Имајќи предвид дека во конкретниот случај станува збор за индивидуална одговорност, Државната комисија работи и ќе продолжи да работи и да ги извршува своите надлежности пропишани со Законот за спречување на корупцијата и судирот на интереси“, велат од ДКСК.

Од институцијата информираат дека претседателката на ДКСК согласно изречените мерки од надлежниот суд, во изминатиот период не доаѓа на работа.

Видете и ова:

Случај „Адитив“: Претседателката на ДКСК обвинета за одавање службена тајна

На 18 јули, Основното јавно обвинителство за гонење на организиран криминал и корупција, поднесе обвинителен предлог против претседателката Татјана Димитровска, која се сомничи дека во периодот од мај до декември 2024 година, на неповикано лице обвинето во предметот „Адитив“ му сторила достапни податоци кои се сметаат за службена тајна. Воедно, на Димитровска ѝ се става на товар и дека незаконски го добила сертификатот за класифицирани информации.

Гаши: За разрешување на Димитровска, потребна е правосилна судска пресуда

Претседателот на Собранието, Африм Гаши на денешниот брифинг со новинарите нагласи дека треба да има правосилна судска пресуда за да се почне постапка во законодавниот дом за одземање на мандатот на претседателката на Државната комисија за спречување на корупцијата, Татјана Димитровска,

Потренцира дека собраниската Комисија за прашања на изборите и именувањата треба да одлучува за ова прашање.

„Треба да има правосилна судска пресуда. Процедурата е пропишана во Деловникот и за тоа ќе одлучува Комисијата за прашања на изборите и именувањата. Значи, ако има било каква постапка, треба да се отпочне од таа Комисија. И ако тие одлучат можат да донесат каква било одлука. За разрешување, тие треба да донесат одлука, па тоа да се процесира на пленарна седница. Што и да одлучи Комисијата, јас ќе го процесуирам во пленарна седница. Но, да, законот е јасен, зборува не за покренување на обвинение, туку за правосилна судска пресуда. Тоа е делот каде што пратениците треба да размислат. Законски услови се уште нема, но делот на угледот, дали може некој да го води тоа тело а има покренато обвинение, тоа повеќе е работа на етика и углед, достоинственост на водење на таа институција“, рече Гаши.

Видете и ова:

Претседателката на ДКСК, Димитровска доби мерки за претпазливост за предметот „Адитив“

Претседателот на Собранието нагласи дека претседателката на ДКСК досега до законодавниот дом нема доставено оставка. Потенцира дека иницијатива за разрешување на Димитровска треба да доаѓа од пратениците.

„Според мене, законските услови не се исполнети. Тие тоа не можат вон закон да го направат. Тие сепак ќе треба да одлучат. Таа Комисија има пратеник кој ја води, има правилник за работа. И особено кога избираат вакви важни претседатели на битни комисии, сигурно имало прилика порано како се одлучувало. Гледам дека и во јавноста има резервираност. Не е баш лесно да се влезе во тоа, затоа што некој административно тоа да го оспори, па да оди на Управен суд итн. Внимателни се во тој дел. Да се делува, а да не се направи штета“, рече Гаши.

Димитровска уште во текот на истрагата објави дека нема намера да се повлече од фунцијата, бидејќи смета дека без судска пресуда, секој е невин.

По предлог на Обвинителството, таа веќе неколку месеци има забрана да постапува во предмети на ДКСК, не смее да прима пошта, а судот и го одзема и пасошот.

Најмалку 11 осомничени се уапсени откако видеото од бруталното убиство на млад пар во планинскиот регион Белуџистан предизвика шок и осуда низ целиот Пакистан и светот.

Локалниот племенски совет (џирга) наводно наредил убиство бидејќи парот се венчал без согласност на нивните семејства. Идентитетите на жртвите не беа веднаш објавени.

На видеото се гледа како жената држи Куран и го моли мажот да направи седум чекори со неа пред да се согласи да биде убиена. Иако е погодена, таа останува исправена и пркосна, сè додека не падне откако е застрелана повеќе пати. Напаѓачите продолжиле да пукаат откако жртвите паднале, а на снимката се гледаат и теренски возила, што сугерира дека жртвите биле намерно донесени на местото на злосторството.

Захра Шах, активистка за правата на жените во Карачи, го нарече видеото „срцекршачко“ и ги повика жените да продолжат да се борат за своите права:

„Оваа суровост на убиствата од чест мора да престане.“

Властите започнаа истрага, а покраинската влада на Белуџистан ја презеде улогата на обвинител бидејќи семејствата на жртвите не го пријавиле злосторството.

Премиерот на Белуџистан, Сарфраз Бугти, вети целосна истрага и гонење на одговорните за шокантното убиство на млада двојка. Владата ја презеде улогата на обвинител, бидејќи семејствата на жртвите не го пријавиле злосторството, што често е случај кај таканаречените „убиства од чест“.

Стотици вакви убиства се пријавуваат во Пакистан секоја година - само во 2024 година се регистрирани најмалку 405 случаи, повеќето од нив против жени.

И покрај постојаните повици за построги мерки од страна на меѓународните и домашните организации, племенските совети (џирги) сè уште имаат големо влијание во руралните средини, честопати изрекувајќи смртни казни за бракови без согласност на семејството.

Амнести интернешнл предупреди во 2023 година дека не е доволно да се апсат луѓе по напад.

„Властите мора да стават крај на неказнивоста за насилство и да ги забранат таканаречените селски и племенски совети кои пропишуваат вакви злосторства“, наведува организацијата.

Иран ќе се сретне со претставници од Велика Британија, Франција и Германија - таканаречената Европска тројка - во Истанбул на 25 јули за да разговараат за нуклеарната програма на земјата, бидејќи западните земји го зголемуваат притисокот врз Техеран да постигне договор или да се соочи со нови санкции.

Портпаролот на иранското Министерство за надворешни работи, Есмаил Багаеи, доцна на 20 јули изјави дека разговорите ќе се одржат на ниво на заменик-министри за надворешни работи.

„Како одговор на барањето на европските земји, Иран се согласи да одржи нова рунда разговори“, изјави Багаеи за државната телевизија.

Претходно, иранскиот министер за надворешни работи, Абас Арагчи, потврди дека состанокот е планиран, но рече дека времето и местото на одржување сè уште не се утврдени.

Земјите од Европската тројка предупредија дека доколку не се постигне нуклеарен договор со Иран до крајот на август, тие повторно ќе ги воведат сите санкции на ОН врз Иран со активирање на таканаречениот механизам за „автоматско продолжување на санкциите“.

Видете и ова:

Каде е ураниумот на Иран-мистерија и потрага по американското бомбардирање

На 18 јули, Арагчи ги повика европските сили да ги сопрат заканите кон Техеран, вклучително и предупредувањата за повторно воведување на санкциите на ОН.

Според нуклеарниот договор од 2015 година - Заедничкиот сеопфатен план за акција - долгогодишните ограничувања на ОН за продажба на оружје, банкарство и нуклеарна технологија беа укинати пред една деценија.

Европските влади сè уште можат да го активираат механизмот на договорот за повторно да ги укинат пред рокот на 15 октомври, потег што би ги обновил тие санкции и би им дал тесен, но значаен извор на влијание во тековните преговори.

Иран ја суспендираше соработката со Меѓународната агенција за атомска енергија (МААЕ) по бомбардирањето на неговите нуклеарни постројки од страна на САД и Израел минатиот месец.

Европските влади вршат притисок врз нуклеарните инспектори на ОН да продолжат со работата во Иран, делумно за да го спречат Техеран да ја реорганизира својата нуклеарна програма по штетата предизвикана од нападите.

Според нуклеарниот договор од 2015 година, Кина и Русија - долгогодишни поддржувачи на Иран во ваквите преговори - не можат да стават вето на повторното воведување на санкциите. Иако формалниот рок за активирање на механизмот истекува во октомври, европските влади би можеле да одлучат да го одложат потегот понатаму за да ја задржат вратата отворена за понатамошни разговори.

На 20 јули, рускиот претседател Владимир Путин одржа ненајавени разговори во Кремљ со Али Лариџани, главниот советник на врховниот лидер на Иран за нуклеарни прашања.

Лариџани „ја пренесе својата проценка за ескалацијата на ситуацијата на Блискиот Исток и околу нуклеарната програма на Иран“, изјави портпаролот на Кремљ, Дмитриј Песков.

Песков додаде дека рускиот претседател ги изразил „добро познатите ставови на Москва за тоа како да се стабилизира ситуацијата во регионот и за политичко решение за нуклеарната програма на Иран“.

Иранските и американските преговарачи требаше да се сретнат во Осло претходно овој месец, но состанокот беше одложен и не е договорен нов датум.

Видете и ова:

Во услови на длабока недоверба САД и Иран се подготвени за продолжување на нуклеарните разговори

Иако двете страни велат дека ја поддржуваат дипломатијата, Иран бара гаранции против идните напади. Американскиот претседател Доналд Трамп сигнализираше интерес за поширок договор, но предупреди за понатамошни напади ако Иран продолжи да збогатува ураниум на високо ниво.

Главното нерешено прашање е судбината на иранските залихи од високо збогатен ураниум, збогатен до 60 проценти - над нивото потребно за цивилна употреба, но сепак под нивото за оружје. Се проценува дека Иран имал околу 400 килограми од овој ураниум.

Во меѓувреме, иранската државна новинска агенција ИРНА на 20 јули објави дека се случила голема експлозија во станбена зграда во градот Резваншахр во покраината Гилан во близина на Каспиското Море.

Локален функционер изјави за новинската агенција дека експлозијата се случила околу 13 часот на 20 јули во станбена зграда. Причината за инцидентот е под истрага, соопштија официјални лица.

„Жителите на станбената зграда каде што се случи експлозијата не биле дома, па за среќа немало жртви, но осум жители на блиските куќи биле повредени поради силата и интензитетот на експлозијата и им била укажана медицинска помош на лице место“, изјави локален функционер.