Притвор побара штипското Обвинителство за 43 годишниот Скопјанец кој на 24 август насилно влезе на спортски терен и повреди две 15 годишни момчиња кои играле фудбал во младинските фудбалски екипи на фудбалските клубови „Брегалница“ и „Шкупи“.

Против него е поведена постапка за насилство, откако нападнал две момчиња нанесувајќи им телесни повреди, односно скрешен нос и набиеници.

„Со дејствијата тој ја загрозил сигурноста на две деца родени 2010 година, играчи за тимот на „Беласица“, нанесувајќи им телесни повреди. Освен тоа, кај оштетените, останатата присутна публика и во јавноста предизвикал чувство на несигурност, загрозување и страв“, се вели во соопштението од Обвинителството.

Нападот се случил во 89-тата минута од натпреварот, кога судијата поради прекршок доделил втор жолт картон со што го исклучил од игра синот на осомничениот, кој играл за „Шкупи“.

„Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди – повеќе набиеници и скршеница на нос без дислокација. На игралиштето влегле и други лица од публиката, кои спречиле натамошна ескалација на настанот“, соопштија од обвинителството.

Штипскиот јавен обвинител побарал од Судот да му се додели мерка притвор на осомничениот поради опасност од бегство и можност да го повтори делото.

Видете и ова:

Спортскиот терен - политичка предизборна арена со националистички скандирања

Во меѓувреме Фудбалската федерација на Македонија (ФФМ) соопшти дека повела дисциплинска мерка според која на младиот фудбалер од клубот Шкупи му е изречена санкција исклучување од фудбалската организација поради нанесување на сериозни повреди на играч од спротивен тим.

Во соопштението е наведено дека на синот на осомничениот му се приклучиле двајца соиграчи кои извршиле физички напад и нив им е изречена казна -забрана на играње во траење од три (3) месеци.

„ Дополнително, беше утврдено дека играч на ФК Брегалница 2008 се впуштил во груба игра и пречекорена самозаштита, реагирајќи на нападот. За неговата постапка, му е изречена казна – забрана на играње на четири (4) натпревари“, се вели во соопштението на ФФМ.

Дисциплинската комисија на ФФМ утврдила и одговорност кај двата младински фудбалски клубови.

Против ФК Шкупи 1927 е поведена дисциплинска постапка поради физички напад од родители/навивачи врз противнички играчи, со што е сторен тежок прекршок. Додека против ФК Брегалница 2008 е поведена дисциплинска постапка поради слаба организација на натпреварот и пропуст во обезбедувањето.

Во двата случаи евентуалните санкции ќе се однесуваат на конкретната екипа, помлади пионери учествувале на натпреварот.

Поведена е и дисциплинска постапка протов Алејса Виши, координатор на млади категории на ФК Шкупи 1927, затоа што во излажал, односно ФФМ го известил дека на натпреварот ќе присуствуваат шеф на стручен штаб и кондициски тренер кои воопшто не присуствувале на натпреварот Брегалница – Шкупи 1927.

Американскиот амбасадор во НАТО, Метју Г. Витакер, изјави дека Соединетите Држави внимателно ја следат ситуацијата во Србија и во Босна и Херцеговина, со цел да не се дозволи развој на настани што би можеле да доведат до регионален конфликт.

„Многу внимателно следиме сè што се случува и во Република Српска и во Србија. Моментално сме фокусирани на тоа да се осигураме дека ситуацијата нема да се претвори во потенцијален регионален конфликт“, рече Витакер на еден од панелите на Стратешкиот форум во Блед.

Тој нагласи дека САД „сакаат стабилност на Западен Балкан“ и дека тоа, како што рече, е важно и за европските партнери во рамките на НАТО, кои „имаат обврска да дејствуваат заедно во кризни ситуации“.

Со месеци, Србија е потресена од антивладини протести, за време на кои повремено избувнуваше насилство, додека претседателот Александар Вучиќ ги обвини странските фактори дека се обидуваат да поттикнат револуција, без никакви докази или споменување кој ја поттикнува насилната промена на власта.

Видете и ова:

Илјадници граѓани во Белград излегоа на протест по повик од средношколците

Во Република Српска, поранешниот претседател Милорад Додик ја оспорува пресудата на судот во БиХ, кој му го одзеде претседателскиот мандат по неговата пресуда, и постојано се закануваше дека ќе го одвои тој ентитет од остатокот од БиХ.

На прашањето дали НАТО ќе интервенира доколку политичката криза ескалира во вооружен конфликт, особено во Босна и Херцеговина, но и во Србија, Витакер рече дека НАТО дејствува едногласно, но додаде и дека „ние сме далеку од тоа“.

„Ако НАТО се вклучи... Правило број еден во политиката е да не се дејствува врз основа на претпоставки. Мислам дека треба да видиме како ќе се одвиваат работите. Ќе продолжиме да ги охрабруваме сите страни да работат во согласност со Дејтонскиот договор“, рече тој, осврнувајќи се на договорите со кои заврши војната во Босна и Херцеговина во 1990-тите“, рече Витакер.

Американскиот амбасадор, исто така, рече дека „НАТО е посилен од кога било“ и дека „тоа треба да биде многу загрижувачко за нашите противници“.

Видете и ова:

„Со средбите со Путин, Додик и Вучиќ испраќаат пораки до ЕУ“

На прашањето дали американскиот претседател Доналд Трамп би можел да се сретне со Вучиќ или Додик, Витекер рече дека нема индикации за такви средби, но дека тие би можеле да се дискутираат доколку има јасни придобивки за мирот и стабилноста.

Тој рече дека Трамп има посебна способност да комуницира со светските лидери, да го користи влијанието на американското претседателство и моќта на државата, во корист на мирот, демократијата, стабилноста и економскиот развој. Истакна дека доколку Трамп одлучи да се сретне со Вучиќ или Додик, тоа нема да биде за да ја зајакне нивната политичка позиција, туку само ако тоа би послужило за промовирање на пошироките интереси на мирот и стабилноста.

„Секако не би прифатил средба насочена кон зајакнување на политичката позиција на кој било лидер. Тоа не е она што го прави претседателот Трамп“, рече американскиот амбасадор во НАТО.

Тој го опиша Трамп како „миротворец“, истакнувајќи дека неговите политики се фокусираат на резултати и на создавање можности за напредок.

Поранешниот директор на Агенцијата за национална безбедност (АНБ) Виктор Димовски тврди дека премиерот Христијан Мицкоски не бил следен и прислушкуван во времето кога Димовски беше директор на Агенцијата за национална безбедност. Тој денеска преку својот Фејсбук-профил, одговори за наводите за злоупотреби во Агенцијата што биле правени во периодот додека тој раководел со службата, а се однесуваат на следење и прислушување на тогашниот лидер на опозицијата, а сега актуелен премиер Христијан Мицкоски, како и на бизнисмени и новинари.

„Во текот на вчерашниот ден од страна на премиерот и од актуелниот директор на Агенцијата за национална безбедност беа изнесени сериозни обвинувања за наводна злоупотреба на државни ресурси за прислушкување на поранешниот лидер на опозицијата (сега премиер), бизнисмени и новинари од страна на АНБ и Агенцијата за разузнавање. Со оглед на тоа што во претходен брифинг за медиуми во АНБ бил споменат периодот од 2019 до 2024 година во дел од кој и јас ја извршував должноста директор на АНБ, одговорно тврдам дека тој како лидер на тогашна опозициона партија во периодот од 2019 -2022 година не бил предмет на посебен оперативен интерес на Агенцијата, не бил предмет на организирана оперативна работа, а со тоа ниту таргет кон кого биле применувани било какви оперативно-технички мерки“, наведува Димовски во својата објава на Фејсбук.

Димовски го повикува актуелниот директор на АНБ, Бојан Христовски да ги декласифицира документите за наводни злоупотреби, особено оние кои се однесуваат на Мицкоски.

Вели дека е точно оти „во наведениот период согласно законските надлежности во Агенцијата имаше постапка за преиспитување на проверките за безбедносни сертификати, вклучително и за еден тогашен и сегашен пратеник поради оддавање на класифицирана информација, а за што му беше поднесена соодветна кривична пријава до надлежното обвинителство“.

Во врска со тоа, како што посолува, на негово барање, на дневен ред на надлежната собраниска Комисија за надзор на работата на АР и АНБ беше ставена точката за информирање за случајот и изнесените наводи во електронските медиуми.

„Со оглед на сериозноста на изнесените наводи на синоќешниот прес и на претходниот брифинг во АНБ го повикувам директорот на Агенцијата веднаш и неодложно да ги декласифицира документите за наводни злоупотреби, а особено тие кои се однесуваат на прислушкување на тогашниот лидер на опозицијата. Македонската јавност има право да знае кој тоа предлагал, барал, одобрувал и кој ги извршувал наводните прислушкувања! Очекувам дека овојпат нема да има криење со изговори од типот „класифицирани информации со степен на државна тајна", посебно после последните неколку објави во некои „информирани медиуми" кои лифериваат конкретни имиња на лица кои наводно биле таргет на Агенцијата, вклучително и податоци за идентитетот на вработени и тајни соработници“, наведува во објавата на Фејсбук, поранешниот директор на АНБ Димовски.

Видете и ова:

Мицкоски и Христовски тврдат дека имало незаконско следење, детали не откриваат

Коментарот на Димовски следува откако во петокот беше објавено дека Агенцијата за национална безбедност доставила три известувања до Јавното обивнителство за еден поранешен директор и група вработени во АНБ поради индиции за незаконско, непрофесионално и неетичко постапување.

Нив ги потврдија и премиерот Христијан Мицкоски и директорот на АНБ, Бојан Христовски.

Премиерот Христијан Мицкоски порача дека најновите информации за незаконско прислушување не се личен напад врз него, туку директен удар врз демократијата и правото на слобода.

„Јас лично, тогаш како претседател на опозицијата, а денеска како премиер, заедно со новинари, медиуми, бизнисмени и јавни личности сме биле жртва на системот кој ги следел своите граѓани. Ова не е напад само врз мене, туку врз демократијата, врз правото на слобода, врз темелите на државата“, изјави денеска (2 септември) премиерот Мицкоски.

Мицкоски и Христовски не посочија детали бидејќи, како што рекоа, станува збор за документи кои се класифицирани како државна тајна, но и двајцата изразија очекување дека случајот ќе добие правна разрешница, а одговорните ќе бидат казнети.

Од Основното јавно обвинителство за гонење организиран криминал и корупција (ОЈО ГОКК), до кое АНБ ги доставило известувањата, вчера во одговор на новинарски прашања излегоа со став дека во моментов се води предистражна постапка и поради нејзината тајност не можат да споделат повеќе детали.

Димовски беше првиот директор на АНБ, која беше основана по реформите на безбедносниот систем на државата. Тој со Агенцијата раководеше од нејзиното основање во 2019 до 2022 година, кога на негово место дојде Зарко Милошевски.

На 2 септември во Бања Лука започна посебна седница на Собранието на Република Српска, чиј дневен ред е изборот на претседател и новата ентитетска влада.

Од 22 август, владата дејствува со „технички мандат“ откако Собранието ја прифати оставката на премиерот на ентитетот Радован Вишковиќ.

Милорад Додик го предложи новиот мандатар Сава Миниќ, иако тој нема уставно овластување за тоа, бидејќи мандатот му беше одземен од Централната изборна комисија на Босна и Херцеговина.

Според Уставот на РС, претседателот на РС треба да го предложи претставникот.

Миниќ е поранешен министер за земјоделство, шумарство и водостопанство и член на Здружението на независни социјалдемократи на Милорад Додик.

Видете и ова:

Република Српска пред избори: Кој ќе учествува, а кој ќе бојкотира?

ЦИК му го одзеде мандатот на Додик, бидејќи Судот на БиХ, на почетокот на август, донесе конечна пресуда со која беше осуден на една година затвор (казната ја откупи со парична исплата) и шестгодишна забрана за вршење јавна функција.

После тоа, Централната изборна комисија на БиХ распиша предвремени избори за претседател на РС за 23 ноември.

Во заклучоците од седницата одржана истиот ден кога беше прифатена оставката на Вишковиќ, Собранието на РС го покани Додик да продолжи да ја извршува функцијата претседател на РС, ги отфрли предвремените избори и им наложи на институциите на ентитетите да не соработуваат со ЦИК.

Видете и ова:

На Република Српска ѝ се заканува институционален распад

Опозицијата предупреди дека ова влегува во зоната на кривични дела и кршење на уставниот поредок на Босна и Херцеговина.

Собранието, исто така, објави референдум на кој гласачите треба да одлучат дали да ги прифатат одлуките на високиот претставник на меѓународната заедница, Кристијан Шмит, на Судот и на Централната изборна комисија (ЦИК) на Босна и Херцеговина, со кои беше казнет поранешниот претседател на ентитетот Милорад Додик.

Милорад Додик беше осуден и отстранет од функцијата на почетокот на август, откако беше осуден за непочитување на одлуките на високиот претставник на меѓународната заедница во Босна и Херцеговина, Кристијан Шмит.

Меѓу другото, Шмит, со својот авторитет, ги поништи неуставните закони донесени од Република Српска со кои се обиде да ги оспори одлуките на државниот Уставен суд на Босна и Херцеговина, до кој Додик поднесе жалба на пресудата.

Белгија ќе ја признае палестинска држава на Генералното собрание на ОН, изјави во вторник (2 септември) министерот за надворешни работи Максим Прево, зголемувајќи го меѓународниот притисок врз Израел по сличните потези на Австралија, Велика Британија, Канада и Франција, објави Ројтерс.

Под зголемените глобални критики за војната во Газа, Израел е незадоволен од најавата на голем број земји дека формално ќе ја признаат палестинска држава на седница на телото на ОН подоцна овој месец.

„Белгија ќе им се придружи на потписниците на Декларацијата од Њујорк, отворајќи го патот за решение за две држави, имено палестинска држава која мирно коегзистира со Израел“, напиша Прево во објава на мрежата X.

Одлуката доаѓа „во светлината на хуманитарната трагедија што се одвива во Палестина, особено во Газа, и како одговор на насилството што Израел го врши кршејќи го меѓународното право“, додаде Прево.

Видете и ова:

Црвениот крст предупредува против евакуација на Газа, додека Израел ја заострува опсадата

Белгија, исто така, ќе разгледа воведување на 12 санкции против Израел, како што се забрана за увоз на производи од неговите населби и ревидирање на политиките за јавни набавки со израелските компании, како и прогласување на лидерите на Хамас (палестинска група која САД и ЕУ ја прогласија за терористичка организација?) за персона нон грата во Белгија, додава Прево.

Палестинците долго време бараат држава на Западниот Брег и Газа, окупирани од Израел, со Источен Ерусалим како главен град.

Соединетите Држави тврдат дека таква држава може да се воспостави само преку директни преговори меѓу Израелците и Палестинците.

„Белгија, членка на Европската Унија, донесе одлука да го зголеми притисокот врз израелската влада и Хамас“, рече Превота.

Врховниот суд на Обединетите Нации во 2024 година пресуди дека израелската окупација на палестинските територии, вклучувајќи го Западниот Брег и неговите населби, е нелегална и дека израелската армија треба да се повлече што е можно поскоро.

Израел, од друга страна, тврди дека териториите не се окупирани во правна смисла бидејќи се наоѓаат на спорно земјиште, но ОН и поголемиот дел од Меѓународната заедница ги сметаат за окупирани територии.

Два пожара се активни во моментов низ државава, додека три се ставени под контрола. Изминатото деноноќие, до осум часот утрово, на територија на државава регистрирани се вкупно 18 пожари на отворен простор. Од нив, 13 се изгаснати, соопштија денеска од Центарот за управување со кризи.

Нискостеблеста вегетација гори во подрачјето на селата Црнилиште и Долгаец во општина Долнени. Мешана шума гори во регионот на селото Никуштак во општина Липково.

Ставени под контрола се пожарите во општините Гевгелија, Македонски Брод и Гази Баба. Станува збор за приземен пожар на планината Кожуф, опожарена мешана шума во „Јасен“, како и запалено ѓубриште во „Вардариште“.

Видете и ова:

Гори депонијата Вардариште, превентивно исклучени неколку далноводи

Изгаснатите пожари биле на територија на општините Арачиново, Валандово, Делчево, Илинден, Кавадарци, Куманово, Липково, Радовиш, Свети Николе, Чешиново - Облешево. Останатите три биле во подрачјето на општина Струга.

Инаку на територијата на цела држава е прогласена кризна состојба која ќе трае до 7 септември.

За да се зајакнат капацитетите во справување со пожарите, Дирекцијата за заштита и спасување преку општините потпиша договори со 352 граѓани што се пријавија на неодамнешниот повик за обука на пожарникари

Од Џалалабад денеска (2 септември) продолжија спасувачките операции со хеликоптери во обид да се стигне до селата во епицентарот на земјотресот што го погоди Авганистан.

Нивна задача е да ги пренесат повредените во регионалната болница во овој источен авганистански град, јави Би-Би-Си.

Според локалното население, многу луѓе сè уште се заробени под урнатините. Во планинскиот терен на Кунар, пристапот по пат до погодените области е тежок дури и во најдобри временски услови. Ќе бидат потребни денови за да се процени целосниот обем на катастрофата.

Талибанската влада апелираше за меѓународна помош.

ОН ослободија итни средства, додека Велика Британија вети помош од 1 милион фунти (1,3 милиони долари), нагласувајќи дека парите нема да одат во рацете на Талибанците.

Индија испрати храна и материјали за помош, вклучувајќи шатори. Кина, исто така, вети поддршка.

Видете и ова:

Стотици луѓе настрадаа во земјотрес во Авганистан

Земјотрес со јачина од 6 степени ја погоди источната авганистанска провинција Кунар, со епицентар на само 27 километри оддалеченост од градот Џалалабад, петти по големина град во земјата.

Бројот на загинати од земјотресот се искачи на над 1000 луѓе, додека над 3500 лица се повредени.

Според талибанската влада, некои села се целосно уништени. Оддалеченоста на областите погодени од земјотресот го отежнуваат пребарувањето и спасувањето. Се стравува дека многу луѓе се заробени под урнатините

Најмалку 1000 луѓе загинаа во лизгање на земјиште во оддалечените планини Мара во западен Судан, соопшти бунтовничката група Движење за ослободување на Судан/Армија.

Како што пренесува Би-Би-Си, обилните дождови кои го зафатиле регионот неколку дена предизвикале одрон во неделата, кој оставил само еден преживеан и „израмнил“ голем дел од селото Тарасин, се вели во соопштението на групата.

Движењето апелира за хуманитарна помош од Обединетите нации и други регионални и меѓународни организации.

Многу жители од државата Северен Дарфур побарале засолниште во регионот на планините Мара, откако војната меѓу суданската армија и паравоените Сили за брза поддршка ги принуди да ги напуштат своите домови.

Видете и ова:

Седум мртви, 71 ранети при напад на паравоена група во Судан

Гувернерот на Дарфур, кој е сојузник на армијата, Мини Минави, го нарече одронот „хуманитарна трагедија“.

Граѓанската војна што избувна во април 2023 година меѓу суданската армија и паравоените Сили за брза поддршка предизвика глад во земјата и доведе до обвинувања за геноцид во западниот регион Дарфур.

Проценките за бројот на загинати од граѓанската војна значително се разликуваат, но американски официјален претставник минатата година процени дека до 150 000 луѓе биле убиени од почетокот на непријателствата во 2023 година. Околу 12 милиони луѓе избегаа од своите домови.

Фракциите на Движењето за ослободување на Судан/Армија, кое ја контролира областа каде што се случи одронот, ветија дека ќе се борат заедно со суданската војска против паравоените Сили за брза поддршка.

Еврокомесарката за проширување Марта Кос денеска (1 септември) изјави дека Црна Гора би можела да стане првата земја што следна ќе се приклучи на Европската Унија во 2028 година, а Албанија би можела тоа да го направи во 2029, пренесе агенцијата Бета.

На панел за проширувањето на ЕУ на Бледскиот стратешки форум, Кос порача дека вклучувањето на нови земји во Унија не е само зголемување на територијата на блокот или бројот на жители, туку и нејзина заштита од надворешни влијанија.

„За мене, процесот на проширување денес е еден вид обединување на Европа, какво што никогаш не сме имале во историјата“, рече Кос.

Таа ја истакна важноста на лидерството на патот кон членство во ЕУ, како и порешителното спроведување на реформите во земјите-кандидати.

Видете и ова:

ЕУ одобри осум милиони евра за Северна Македонија од Инструментот за раст за Западен Балкан

Како позитивни примери еврокомесарката ги наведе црногорскиот и албанскиот премиер, Милојко Спајиќ и Еди Рама, и рече дека е оптимист во врска со влезот на овие земји во ЕУ.

„Напредуваме со Црна Гора и можно е, доколку го завршиме техничкиот дел од преговорите во 2026 година, таа да стане 28-ма членка на Европската Унија во 2028 година“, рече Кос, додавајќи дека Албанија би можела да се приклучи на ЕУ во 2029 година.

Говорејќи на панелот, албанскиот премиер, пак, оцени дека влезот на земјите од Западен Балкан во ЕУ ќе ја направи организацијата „посилна и покомпактна“, додека црногорскиот шеф на владата ја нагласи важноста на компромисот во оваа мултиетничка држава.

„Ако ЕУ се прошири за да нè вклучи и нас, таа ќе биде посилна и покомпактна. Зошто? Затоа што нема да остави ниту еден дел отворен за вируси, микроби, напади и инфекции“, рече Рама.

Словенечкиот премиер Роберт Голоб ги повика земјите од Западен Балкан да го искористат „отворениот прозорец“ за пристапување кон ЕУ, кој го отвори војната во Украина.

Видете и ова:

Сиљановска-Давкова: Блокадата на евроинтеграциите е сериозен безбедносен ризик за Западен Балкан и ЕУ

Голоб, исто така, зборуваше за тоа како да се избегнат евентуални блокади од страна на поединечни земји на патот кон проширување на ЕУ.

„Формулата 26 или 27-1 веќе функционираше, па би можела да функционира и во овие случаи“, рече Голоб.

Бледскиот стратешки форум, која традиционално се одржува во Блед, Словенија, кон крајот на август или почетокот на септември, собира учесници од различни области за размена на мислења и идеи за надминување на сегашните и идните предизвици.

Повеќе илјади граѓани се собраа на антивладин протест на Савскиот плоштад во Белград на 1 септември, по повикот од средношколците во блокада на првиот ден од учебната година.

На протест тие повикаа преку социјалните мрежи со пораката „Средношколците памтат“.

Собрани кај поранешната зграда на Главната железничка станица, на барање на учениците и студентите, демонстрантите не креваат никаква бучава. Тие беа замолени да ги остават свирчињата дома бидејќи ова е комеморативен марш, пренесува агенцијата Бета.

Граѓаните се собраа на протестот доаѓајќи во колони од повеќе правци, а сообраќајот во тој дел од Белград е запрен.

Радио Слободна Европа (РСЕ) разговараше со некои од учесниците на протестот.

Сања Тасиќ вели дека протестира „од истата причина како и другите луѓе“.

„Да бараме промени што сè уште не се случиле. Бараме владеење на правото, еднаквост за сите, праведно општество“, рече таа.

Собир се организира и на кампусот на Универзитетот во Нови Сад, каде што беа прочитани имињата на загинатите во трагедијата на Железничката станица со пораката: „Нема да заборавиме и нема да се откажеме“.

На протестот се придружија и земјоделците.

Видете и ова:

Десет месеци од трагегијата во Нови Сад, комеморативни собири во неколку српски градови

Претходно во текот на денот и во други градови низ Србија, студенти и граѓани одржаа комеморативни собири со кои им одадоа почит на 16-те лица кои загинаа при уривањето на настрешницата на реконструираната Железничка станица во Нови Сад на 1 ноември 2024 г. Меѓу загинатите беше и еден македонски државјанин, Васко Саздовски, кој работеше како научник во Нови Сад.

Причината за протестот во Белград и собирите во останатите градови е одбележување на десет месеци од трагедијата во Нови Сад која предизвика масовни протести низ Србија и блокада на високообразовните институции.

Демонстрантите бараат одговорност од власта за оваа несреќа.

Власта, пак, отфрла одговорност, а претседателот Александар Вучиќ одби да распише предвремени парламентарни избори, кои беа побарани во мај од страна на демонстрантите предводени од студентите.

Вишото јавно обвинителство во Нови Сад, на 30 декември, поднесе обвинение за случајот со настрешницата, но кон средината на април Вишиот суд во Нови Сад го врати „на понатамошна обработка“.

Со ова постапката се врати во фаза на истрага.

Видете и ова:

Вучиќ ги пoвика претставниците на демонстрантите на јавна дебата, тие одбија додека не се распишат избори

Во одделна постапка, Обвинителството за организиран криминал на Србија на 1 август објави дека уапсило 11 лица осомничени за корупција во врска со проектот за модернизација на пругата од Нови Сад до унгарската граница. Дел од тој проект беше и реконструкцијата на железничката станица во Нови Сад.

Покрај поранешниот министер за градежништво Томислав Момировиќ, кој беше уапсен на 1 август, во случајот е опфатен и поранешниот министер Горан Весиќ, кој е на болничко лекување.

Медиумите на 15 август објавија дека сите осомничени се испратени во домашен притвор.

На одбележување на Денот на Агенцијата за национална безбедност (АНБ) – 1 септември, премиерот Христијан Мицкоски и директорот на оваа институција, Бојан Христовски, излегоа со тврдења дека во земјава имало незаконско следење, но детали не споделија.

На новинарско прашање како ги коментира информациите дека лично тој бил следен и прислушуван, премиерот посочи дека не би можел да зборува за детали, дека тоа е „државна тајна“ и така биле класифицирани и документите.

„Но, факт е дека двете агенции, и Агенцијата за разузнавање и АНБ темелно се занимавале со претседателот на, во тоа време, најголемата опозициска партија т.е. со мене, меѓу другото и со новинари, бизнисмени. Така што да оставиме периодот процесот да тече, да видиме што ќе каже обвинителството и судиите во еден судски процес“, изјави Мицкоски.

Мицкоски рече дека е „навикнат на таков тип на луѓе“ и оти очекува овие, како што ги нарече, „глодари“ да завршат зад решетки и еднаш засекогаш да се стави крај на злоупотребите на безбедносните агенции за вакви цели.

Видете и ова:

„Вечниот“ страв дека некој прислушува

Повеќе детали не откри ниту актуелниот директор на АНБ, Бојан Христовски, освен што меѓу виновниците посочи еден поранешен директор на Агенцијата.

„Тоа што се случувало внатре било да една помала група составена од еден поранешен директор и помала група вработени во институцијата, и тоа како имаме индиции дека ја злоупотребиле својата службена положба. За истото е известено надлежното Јавно обвинителство и повеќе детали за ова не можам да споделам бидејќи се работи за детали кои се со виска класификација и се сензитивни“, рече Христовски додавајќи дека не сака да наруши некаков законски процес или евентуална истрага што би била отворена во иднина.

За тоа колкава група на луѓе биле прислушувани и следени, директорот не даде одговор туку им посочи на новинарите да се обратат до Јавното обвинителството.

ВМРО-ДПМНЕ како опозиција тврдеше дека во земјава продолжило незаконско следење и прислушувања, а истите обвинувања ги изнесе и по преземањето на власта по парламентарните избори во мај 2024 година.

Денеска, директорот на АНБ, обвини дека Агенција со која раководи, а чии ресурси биле злоупотребени, во пракса не доживеала никаква реформа туку сето тоа било само „фасада“.

Оваа Агенција започна со работа на 1 септември 2019 година откако во Северна Македонија беше спроведена реформа во безбедносно-разузнавачкиот сектор. Тоа значеше одземање на ингеренции за следење на комуникациите од Управата за безбедност и контраразузнавање (УБК) во рамки на МВР и формирање на Оперативно-техничката агенција (ОТА) и Агенцијата за национална безбедност (АНБ).

Видете и ова:

„Големото уво“ остана неказнето

Реформите следуваа откако во 2016 година, СДСМ како опозиција го започна проектот „Вистината за Македонија“ обелоденувајќи ја аферата со незаконското следење на комуникациите за што почна да објавува и прислушувани разговори т.н. бомби. За аферата беше отворена и истрага, а потоа следуваше и судски процес кој во јавноста беше познат под името „Таргет-Тврдина“. Според обвинението за случајот, со прислушувањето нелегално биле таргетирани над 5.000 телефонски броеви, а опфатени биле над 20.000 граѓани.

Но, овој судски процес заврши неславно бидејќи кривични дела на обвинетите за прислушувањето застареа и случајот не дочека изрекување правосилна пресуда.