Администрацијата на американскиот претседател Доналд Трамп ќе побара од судот да дозволи објавување на сведочењата од големата порота во случајот на осудениот сексуален престапник Џефри Епштајн.

„Врз основа на апсурдната количина публицитет што му беше даден на Џефри Епштајн, ја замолив државната обвинителка Пам Бонди да ги достави сите релевантни сведочења пред Големата порота, под услов судот да одобри“, рече Трамп.

Кратко по неговата изјава, Бонди напиша на X Network дека Министерството за правда е подготвено да побара од судот да ги стави на располагање транскриптите од судењето пред големата порота.

Некои поддржувачи на Трамп го доведоа во прашање случајот на Епштајн откако Министерството за правда заклучи претходно овој месец дека нема докази за долготраен терористички заговор за неговите клиенти и смртните случаи во затвор во 2019 година. Тие побараа да се објават повеќе информации за случајот, предизвикувајќи редок раскол меѓу базата на Трамп.

Видете и ова:

Франција стартува истрага за милијардерот Епштајн

Одлуката на Трамп доаѓа откако тој рече дека ќе го тужи Волстрит џурнал (WSJ) поради статија во која се тврдеше дека „непристојна“ честитка за роденден со неговото име му била испратена на Епштајн во 2003 година, пред Епштајн да биде обвинет за сексуални злосторства. Трамп вели дека писмото е лажно.

Според WSJ, писмото било дел од колекцијата роденденски честитки составена од соработничката на Епштајн, Гислајн Максвел. Таа беше осудена на 20 години затвор во 2021 година за помагање на Епштајн во трговија со деца за сексуална експлоатација.

Смртта на Епштајн во затвор во 2019 година, додека чекаше федерално судење, официјално беше прогласена за самоубиство.

Неговото име беше поврзано со многу познати личности, вклучувајќи го и поранешниот американски претседател Бил Клинтон, како и британскиот принц Ендру.

Епштајн првично беше уапсен во Флорида во 2005 година по обвинувањата дека платил на 14-годишно девојче за секс. Десетици други опишаа дека биле сексуално злоставувани од Епштајн. Во 2008 година, Епштајн постигна договор за признавање на вина и тајно се изјасни за виновен по една точка, а потоа отслужи 13 месеци во затворска програма што му овозможи да продолжи да работи.

Но, во 2019 година, Епштајн ќе биде обвинет за трговија со луѓе во Њујорк. Тој е обвинет дека им плаќал на девојчиња под 18 години да вршат сексуални дејствија во неговите домови во Њујорк, Флорида, и на неговиот приватен остров помеѓу 2002 и 2005 година.

Доколку беше осуден, ќе беше осуден на 45 години затвор.

Европската Унија одобри нов пакет санкции против Русија поради војната во Украина, вклучувајќи и намалување на ценовниот лимит за извоз на руската нафта.

„ЕУ штотуку го одобри еден од своите најсилни пакети на санкции против Русија досега“, изјави шефицата на европската дипломатија, Каја Калас.

„Ќе продолжиме да ја зголемуваме цената, за да може единствена опција за Москва да биде запирањето на агресијата“, додаде Калас.

Усвојувањето на санкциите го поздрави и претседателката на Европската Комисија, Урсула фон дер Лајен:

„Ѝ удираме директно во срце на руската воена машина, со тоа што ги таргетираме банкарскиот, воениот и енергетскиот сектор и вклучуваме ново динамично ограничување на цените на нафтата“.

Како што објави Ројтерс, најновиот пакет санкции вклучува намалување на ценовниот лимит за Г7 групата за руската сирова нафта на 47,6 долари по барел.

Оваа мерка е дел од иницијативата на Г7 со цел да се ограничи приходот на Русија од извозот на нафта ширум светот.

Видете и ова:

Со нова мрежа за регрутирање, Русија бара „потрошна работна сила“ за војната во Украина

Ценовното ограничување, утврдено од Г7 на 60 долари за барел во 2022 година, им забранува на компаниите за превоз и осигурување да учествуваат во извозот на руска нафта по повисоки цени.

Санкциите вклучуваат и забрана за трансакции со гасоводот „Северен поток“ и таргетирање на бродови кои се дел од таканаречената „флота во сенка“ на Русија, бродови за кои се верува дека ги заобиколуваат санкциите на ЕУ со тоа што превезуваат претежно руска нафта. Иако рускиот гас во моментов не тече низ двата гасоводи „Северен поток“ во Балтичкото Море што ја поврзуваат Русија со Германија, потегот за забрана на трансакциите има за цел да го спречи потенцијалното продолжување на таквите испораки.

Ова е осумнаесеттиот пакет економски мерки против Москва откако започна инвазијата во 2022 година, а беше усвоен откако Словачка ја укина блокадата што траеше неколку недели, по преговорите со Брисел за одделни планови за постепено укинување на увозот на руски гас.

Обвинувања за нови партиски вработувања повторно ја брануваат компанијата Македонска навигација (М-НАВ) откако во јавноста излегоа информации дека на оглас за вработување се примени луѓе блиски до владејачката партија ВМРО-ДПМНЕ.

Опозицискиот СДСМ побара итно да се поништи спорниот оглас и да се вратат професионалните критериуми за вработување, а да има и „оставки од сите кои го овозможија овој срам“.

И социјалдемократите преку соопштение реагираат на лицата за кои претходно повеќе медиуми објавија дека се нововработени во М-НАВ.

„Избрани се лица кои од квалификации единствено имаат партиска книшка. Во М-НАВ, место професионалци кои знаат англиски и имаат стручни лиценци, ВМРО-ДПМНЕ вработува, сопруг на директорка на Централен регистар, сопруга на Игор Југ — осуден за нападот на Собранието на 27 април и потпретседател на младинската организација на ВМРО-ДПМНЕ“, реагираа од СДСМ.

Видете и ова:

Одлуката за штрајк на контролорите на летање е ставена во мирување

ВМРО-ДПМНЕ, исто така се јави со реакција. Но, не ги демантираше вработувањата туку ја обвини претходната власт дека таа вршела партизација на Македонската навигација.

„СДС и ДУИ ја претворија М-НАВ во партиска филијала напикаа роднини, деца, внуци и коалициски партнери за плати неколкупати поголеми од просечните. За време на СДС и ДУИ само што не настана огромен безбедносен проблем, откако контролорите за летање беа тепани од активисти на ДУИ“, реагираше ВМРО-ДПМНЕ.

Во јуни, поради партиски вработувања контролорите на летање во М-НАВ се заканија со штрајк.

Струковиот синдикат на контролори на летање (ССКЛМ) бараше да се поништи последниот оглас за нови вработувања и да се испочитуваат обврските од минатогодишната Спогодба која беше основа за ставање во мирување на тогашната одлука за штрајк.

Првично најавија дека ќе штрајкуваат од 10 јули, но дента кога требаше да отпочне штрајкот од синдикатот соопштија дека одлуката ја ставаат во мирување бидејќи имало придвижување во исполнувањето на нивните барања. Меѓу барањата беа да се вработи кадар каков што навистина е потребен во М-НАВ односно контролори на летање, како и да се направи функционална анализа со која ќе се определи кои се работните места и бројот на извршители што треба да постојат во компанијата.

Со 60 гласа „за“ и ниту еден „против“ или „воздржан“ пратениците во македонското Собрание денеска, 17 јули, го изгласаа Законот за ратификација на Договорот за стратешка соработка меѓу владите на Северна Македонија и Унгарија.

Координаторот на пратеничката група на најголемата владејачка партија ВМРО-ДПМНЕ, Никола Мицевски, во обраќањето на собраниската седница оцени дека договорот треба да се поздрави како „како чекор во вистинска насока, насока на конкретна надворешна политика, продуктивна економска дипломатија и визионерска посветеност кон иднината на државата“.

Според власта, договорот е јасна порака дека Северна Македонија гради „стабилни, долгорочни и доверливи партнерства со вистински пријатели“.

„Партнерството ќе овозможи унапредување на соработката во многу важни сфери – инфраструктура, енергетика, транспорт, информатичка технологија, сајбер безбедност и одбрана. Овие области се двигател на секој сериозен развој и гаранција за економска и безбедносна стабилност, што е од особено значење во моменталната геополитичка состојба во Европа. Договорот нуди можности за домашната економија преку активно вклучување на македонскиот приватен сектор и внесување на странски инвеститори во реализацијата на стратешките проекти“, рече пратеникот Мицевски.

Видете и ова:

„Банкарски тајни“ за имињата на фирмите што земаа од унгарскиот кредит

Договорот за стратешко партнерство со Унгарија, беше потпишан на 13 јуни за време на официјалната посета на шефот на унгарската дипломатија Петер Сијарто на Скопје, чиј домаќин беше министерот за надворешни работи и надворешна трговија, Тимчо Муцунски.

ВМРО-ДПМНЕ важи за блиска со унгарската владејачка партија Фидес на премиерот Виктор Орбан и беа сестрински партии во Европската народна партија. По враќањето на власт на ВМРО-ДПМНЕ во Северна Македонија во мај лани, покрај потпишувањето на Договорот за стратешко партнерство, владите на двете земји досега одржаа и две меѓувладини седници – едната во септември 2024 во Охрид, а другата во Будимпешта во март 2025 г.

Владата предводена од Христијан Мицкоски се задолжи и со кредит од една милијарда евра од Унгарија. Половина од милијардата беше земена со цел раздолжување на еврообврзница, додека 250 илјади евра беа наменети за поддршка на бизнис секторот, а останатите 250 илјади за проекти во општините.

Опозицскиот СДСМ, пак, обвинуваше дека тоа е најлошиот можен договор за кредит со скриени трошоци, премиерот Мицкоски го прозиваше дека станува најголем „поданик на Унгарија“, а изразуваше и сомнежи дека ова задолжување ќе се рефлектира и со унгарско влијание врз политичките одлуки во Северна Македонија и стратешката ориентација на земјата.

Во заедничка операција на безбедносните служби во Косово уапсен е полицаец под сомнение дека шпионирал за српските безбедносни структури, објави в.д. министерот за внатрешни работи, Џелал Свеќала.

Полицаецот Бојан Јевтиќ, рече косовскиот министер, е шестото лице уапсено за случаи на шпионажа порачувајќи дека „истата судбина ќе го снајде секој што ќе се обиде да ја поткопа работата и улогата што ѝ е доверена на полицијата“.

„Професионализмот, соработката и координацијата на безбедносните институции на Република Косово се неопходни за постигнување резултати во борбата против нелегалните активности, особено оние со висок ризик кои често имаат извор во српските разузнавачки структури“, изјави тој.

Видете и ова:

Курти: Имаме докази за директно мешање на Србија во изборите

Специјалното обвинителство на Косово го потврди апсењето на полицаецот кој се сомничи за сторено кривично дело „шпионажа“ и посочи дека за лицето е одреден притвор од 48 часа.

„За време на претресот на куќата на осомничениот во село во Каменица, запленети се материјални докази, како што се: доверливи документи на косовската полиција, неколку паметни телефони, USB мемориски стик, пиштол, муниција, готовина во вредност од 10.000 евра, два милиони српски динари, 600 швајцарски франци и други докази што ќе бидат испитани за време на истрагата“, се вели во соопштението на обвинителството.

Оттаму додаваат дека уапсениот полицаец ја извршувал функцијата началник на операции во граничната полиција на преминот „Бела земја“, како и дека Инспекторатот препорачал негово суспендирање.

Акцијата се спроведува во соработка меѓу Инспекторатот на косовската полиција и Косовската разузнавачка агенција.

Оваа акција доаѓа откако во претходниот период беа уапсени неколку Срби и Албанци под сомнение за шпионажа за српските разузнавачки служби.

Во Косово, под шпионажа се подразбираат тајни активности на собирање, пренесување или дистрибуција на чувствителни информации до друга држава, организација или група.

Според Кривичниот законик на Косово, шпионажата се смета за сериозно кривично дело и се казнува со најмалку пет години затвор.

На почетокот на јуни, Основниот суд во Приштина го осуди Александар Влајиќ на пет години затвор, откако тој се изјасни за виновен по обвиненијата дека се занимавал со шпионажа како член на Српската безбедносно-разузнавачка агенција (БИА).
Во меѓувреме, жена од српската заедница во северно Косово, исто така беше уапсена за шпионажа на почетокот на март оваа година.
Таа беше вработена во ОБСЕ (Организација за безбедност и соработка во Европа) во Косово, додека медиумите објавија дека била „шпион“ на БИА. Српската безбедносно-разузнавачка агенција не коментираше за ова прашање.

Видете и ова:

Уапсени две лица на Косово за шпионажа

Претходно, на 20 февруари, Специјалното обвинителство на Косово, исто така, подигна обвинение против двајца косовски Албанци, Бедри Шабани и Мухарем Ќерими, за сторено кривично дело шпионажа. Тие се изјаснија за невини по обвиненијата дека дале информации на српската БИА за безбедносните институции на Косово, Ослободителната војска на Косово и масакрот во Рачак.

БИА негираше каква било поврзаност со овие притвореници во Косово, додавајќи дека ова е „обид за ширење лажни вести“ од страна на Приштина.

Поранешниот главен инспектор на Косовската разузнавачка агенција, Бурим Рамадани, претходно за РСЕ изјави дека шпионажата е една од главните закани за националната безбедност на Косово.

„Со штетата што се обидува да се направи целта е да се прикаже Косово во лошо светло однадвор и да се држи под тензија однатре“, рече Рамадани.

Украинските пратеници ја именуваа Јулија Свириденко, поранешната министерка за економија и прва замениничка на премиерот, за нова премиерка на земјата во рамки на реконструкцијата на Владата насочена кон зајакнување на односите со САД и кон давање нов импулс на земјата разурната од војната.

Свириденко ги водеше клучните преговори со САД за договорот за минерали.

Таа беше избрана за премиерка со 262 гласа „за“, 22 „против“ и 26 „воздржани“.

39-годишната економистка, позната во Вашингтон по нејзината клучна улога во посредувањето за договорот за минерали, доаѓа на премиерската функција на местото на Денис Шмихал, најдолгогодишниот премиер на Украина.

Во реконструираната влада, Шмихал ќе биде на чело на Министерството за одбрана додека претседателот Володимир Зеленски се стреми да го зголеми домашното производство на оружје со оглед дека војната што ја започна Русија влегува во својата четврта година.

Видете и ова:

Украинскиот премиер поднесе оставка среде големата реконструкција на владата

Во обраќањето пред парламентот, Свириденко порача дека нејзин приоритет е „да се обезбеди одбраната и безбедноста на Украина и стабилноста на државата“.

„Државниот апарат нема право да ги уништува ресурсите и потенцијалот на земјата“, додаде Свириденко.

Колку и потезите на украинскиот претседател да се насочени кон оживување на воените напори на Украина, промените на функциите, во кои се очекува досегашниот министер за одбрана Рустем Умеров да стане амбасадор на Киев во Вашингтон, се сметаат за обид на претседателот да ја подобри комуникацијата и соработката со Белата куќа.

Серија настани што датираат од 2019-та, вклучително и постапката за импичмент на Трамп иницирана по телефонскиот разговор со Зеленски во јули истата година, го налутија Трамп во однос на прашањето со Украина, а целосната поддршка на Вашингтон за Киев се смета за сè друго освен за стабилна.

Договор за минерали

Свириденко, кој беше министерка и прва вицепремиерка од 2021 година, ги водеше преговорите со САД за договорот со кој им се овозможува на американските компании пристап до украински минерали и ретки земјини елементи.

Трамп го промовираше договорот како клучен дел од неговата политика кон Украина, инсистирајќи дека со него САД треба да добијат компензација за помошта што ја даваат на Киев од февруари 2022 година, а којашто достигна околу 175 милијарди долари.

Видете и ова:

Трамп: Некои ракети за „Патриот“ веќе се на пат кон Украина

Во април, Свириденко отпатува во Вашингтон каде што потпиша договор со американскиот секретар за финансии Скот Бесент за основање на Фондот за обнова и инвестиции на Украина, кој им дава право на САД на дел од профитот од новите украински проекти во енергетскиот и рударскиот сектор.

Трамп го претстави договорот како механизам за заштита на американските интереси во обновата и одбраната на Украина.

Додека Трамп изрази незадоволство од ненапредокот во мировните разговори со Русија, Украина се обиде да го искористи моментот за да ги зацврсти договорите за оружје и друга помош од Вашингтон.

Трамп оваа недела објави дека ќе продава оружје на НАТО за понатамошен трансфер во Украина, што досега е неговиот најјасен показател за поддршка на Украина откако ја презеде функцијата во јануари.

Министерот за надворешни работи и надворешна трговија Тимчо Муцунски и британскиот секретар за надворешни работи Дејвид Лами денеска (17 јули) во Форин офисот во Лондон потпишаа Декларација за стратешко партнерство меѓу Република Северна Македонија и Обединетото Кралство на Велика Британија и Северна Ирска.

Шефот на македонската дипломатија на Фејсбук објави дека со ова се отвора ново поглавје во односите меѓу двете земји и се зајакнуваат билатералните односи со Обединетото Кралство.

„Овој документ ќе ги зајакне и унапреди стратешките односи меѓу двете земји, вклучително и соработката во областа на надворешната политика, безбедноста и одбраната, особено во рамките на НАТО. Разговаравме и за неодамнешниот договор „влада со влада“, кој ќе ја зголеми трговијата, ќе го поттикне економскиот раст и ќе овозможи реализација на низа инфраструктурни проекти. Разговаравме и за нашето сојузништво во рамките на НАТО, како и за соработката во мултилатералните организации, наведува Муцунски во објавата на Фејсбук.

Видете и ова:

Милијарди прашања за милијардите од Лондон

Претходно, македонското собрание го донесе Законот за ратификација на Договорот меѓу Владата на Република Северна Македонија и Владата на Обединетото Кралство на Велика Британија и Северна Ирска во врска со партнерство за реализација на инфраструктурни проекти.

Со Договорот на земјава ќе и се обезбеди кредитна линија од пет милијарди фунти на располагање за големи инфраструктурни железнички, транспортни, здравствени и енергетски проекти.

Северна Македонија е прва земја на Балканот која склучува Договор за стратешко партнерство со Велика Британија.

Видете и ова:

Пратениците го донесоа Законот за ратификација на Договорот со Обединетото Кралство

Согласност за стратешко партнерство беше постигната на средбата на премиерите на Северна Македонија и Обединетото кралство, Христијан Мицкоски и Кир Стармер на маргините на самитот во Тирана на 16 мај.

Како што информираше владата, целта на договорот, што ќе биде во сила 10 години, е да воспостави партнерство за поддршка на реализација на инфраструктурни проекти, во секторите транспорт, здравство, технологија, енергетика и други критични сектори во државата.

Студентите во блокада најавија дека ги насочуваат своите акции кон граѓаните, одговарајќи на прашањето на Радио Слободна Европа (РСЕ) зошто не учествувале на состанокот на опозицијата и граѓанското општество на 16 јули во Белград.

„Не веруваме дека парламентарното мнозинство ќе направи нешто во насока на подобри изборни услови, ја обиколуваме Србија, се грижиме за притворените и правиме сè што е во наша моќ да ги распишеме изборите“, изјавија за РСЕ, студентите во блокада.

Тие изјавија дека ги сметаат за важни разговорите за подобрување на изборните услови.

„Режимот направи сè за да ги спречи изборите под нивна власт да бидат фер и слободни, во ова повторно нè убедија со срамниот процес на избор на новиот Совет на Регулаторното тело за електронски медиуми, кампањата на функционерите и корупцијата во Заечар и Косјериќ“, изјавија студентите во блокада.

Видете и ова:

На саемот во Нови Сад полагање испити со полициски кордон и протест на студентите во блокада

Состанокот за подобрување на изборните услови во Србија го иницираше претседателот на Народното движење на Србија (НДС), Мирослав Алексиќ, кој изјави дека дијалогот е отворен за сите општествени актери.

Тој додаде дека на состанокот во Белград на 16 јули било разговарано за ревизијата на избирачкиот список.

Покрај иницијаторите, на состанокот присуствуваа претставници на Зелено-левичарскиот фронт, Движењето на слободни граѓани, Еколошкото востание, Центарот Србија и Партијата за слобода и правда.

Невладините организации Биро за социјални истражувања (BIRODI), Граѓански иницијативи, Центар за истражување, транспарентност и отчетност (CRTA) и Центар за слободни избори и демократија (CESID) исто така одговорија.

Видете и ова:

Полициски интервенции и апсења во Белград, жандармеријата дојде пред вратата на Правниот факултет

Поканата беше одбиена од иницијативата „Проглас“, која ги обединува група интелектуалци, Демократската партија и движењето „Крени-промени“, додека коалицијата НАДА, која ја сочинуваат Новата демократска партија на Србија и Движењето за обнова на Кралството Србија, не даде соопштение.

Студентите во блокада во мај побараа свикување вонредни парламентарни избори. Властите одбија да ги објават.

Повеќе од осум месеци низ целата земја во Србија се одржуваат студентски и граѓански протести и демонстрации, со кои се бара кривична и политичка одговорност од владејачката Српска напредна партија (СНС) за смртта на 16 лица при падот на настрешницата на главната железничка станица во Нови Сад на 1 ноември.

Претходните парламентарни избори се одржаа кон средината на декември 2023 година.

Според извештаите на домашните и меѓународните набљудувачи, на нив биле забележани голем број неправилности, а опозицијата ги окарактеризира како неправедни и украдени.

Почетокот на судскиот процес против Раде Трајковски-Штекли и уште 9 лица обвинети за трговија со дрога е одложен за 7 август поради хоспитализација на обвинетиот Трајковски.

Трајковски утрово бил неконтактибилен и дезориентиран, поради што требало итно да биде пренесен во Клиничкиот центар, рече судијата Илија Трпков. Такви напади, како што дополни судијата, обвинетиот имал и во текот на вчерашниот ден.

По одложувањето, обвинителката Верица Бержецка-Крстева информираше дека во меѓувреме Штекли доставил психијатриско мислење дека не е способен да ги следи судењата. Таа рече дека и Јавното обвинителство ќе направи вештачење по таа околност и ќе бара подготвително рочиште за да се соочат вештачењата.

Видете и ова:

Притвор за Раде Трајковски-Штекли и за уште деветмина

Обвинителството за гонење организиран криминал и корупција (ОЈО ГОКК) поднесе обвинение против 10 лица за продажба на дрога. Истрагата траеше речиси една година и вклучуваше посебни истражни мерки. Првично беа опфатени 16 лица, но 7 од нив склучиле спогодби и добиле затворски казни од 3 години до 3 години и 6 месеци.

Како што соопштија претходно од ОЈО ГОКК, групата била добро организирана, со јасно поделени улоги - од набавка до продажба на кокаин и марихуана.

Во 2024-та година имаше три обиди за убиство на Раде Трајковски - Штекли во скопскиот трговски центар „Ист Гејт“ и неговата семејна куќа. Ккао што пишуваа медиумите, Штекли се смета за близок до криминалната група „Беланоца“.

Видете и ова:

Приведен,па ослободен „полицискиот крт“ кој им „шепнал“ за акцијата на „Беланоца“

Претходно во декември минатата година Обвинителството почна истрага против 18 припадници на криминалната банда позната во јавноста како „Беланоца-Барон“ за сторени најмалку осум убиства, рекет, лихва и опожарени спортски обложувалници. Дел од уапсените се сомничат дека наплаќале од 10 до 250 илјади евра за убиство.

Претседателот на Собранието, Африм Гаши на почетокот на денешната седница (17 јули) соопшти дека на 12 јули 2025 година му престанала функцијата Народен правобранител на Насер Зибери, поради исполнување на условите за старосна пензија.

„Ве известувам дека Народниот правобранител Насер Заибери на 12.07.2025 година исполни услови за старосна пензија. Констатирам дека врз основа на член 9 став 1 од точка 3 од Законот за Народниот правобранител на Народниот правобранител Насер Зибери му престанува функцијата Народен правобранител на 12 јули 2025 година поради исполнување на условите за старосна пензија“, рече Гаши.

Претходно, народниот правобранител Зибери обвини дека Собранието го прекршило Законот за народен правобранител, бидејќи не распишало оглас за нов мандатар во предвидениот рок, односно најдоцна три месеци пред истекот на мандатот. Токму поради тоа, оваа институција сега останува без Омбудсман.

Пратениците кои го поднесоа барањето до Собранието за распишување на оглас за избор на нов, на само два дена пред тој да замине во пензија, рекоа дека не биле известени навремено кога се исполнува условот за старосна пензија.

Видете и ова:

Институцијата што ги штити граѓанските права остана незаштитена

Мандатот на Зибери започна во јануари 2021-ва и завршува по 4 и пол години, иако според законот треба да трае 8 години. На изборите 2020-тата, ДУИ го промовираше како кандидат за премиер -Албанец, а тогашната опозициска партија од албанскиот блок поради тоа го оспоруваше неговиот избор за Омбудсман.

Дополнително на оваа институција и недостигаат уште најмалку петмина заменици, чии мандати истекоа во изминативе три години, а пратениците од последните два пратенички состава не ги разгледаа понудените кандидати за пополнување на нивните позиции.

Инаку Зибери го депонирал потписот на еден од тројцата заменици кои се уште имаат активен мандат, Илбер Руфати од Кичево, затоа што неговата колешка од Битола, Лилјана Илиевска за неколку дена заминува во пензија, а колешката од скопската канцеларија Соња Трифуновска одбила.